ವರ್ಷವೊಂದು ಮುಗಿಯುತ್ತಾ ಬಂದಾಗ, ಇನ್ನೇನು ಹೊಸಾ ವರ್ಷವೊಂದು ಕಣ್ಣಳತೆಯಲ್ಲಿಯೇ ಕೈಚಾಚುತ್ತಿರುವಾಗ, ಪಡೆದದ್ದೇನು ಕಳೆದುಕೊಂಡಿದ್ದೇನೆಂಬ ಲೆಕ್ಕಾಚಾರಗಳು ಶುರುವಾಗುತ್ತವೆ. ಆದರೆ, ಕನ್ನಡ ಚಿತ್ರರಂಗದ ಮಟ್ಟಿಗೆ ಈ ವರ್ಷ ಪಡೆದುಕೊಂಡಿದ್ದೇ ಹೆಚ್ಚೆಂದರೂ ಅತಿಶಯವೇನಲ್ಲ. ಹಾಗೆ ಗಳಿಸಿಕೊಂಡ ಗೆಲುವಿನ ಪಟ್ಟಿಗೆ ಕಡೇ ಕ್ಷಣದಲ್ಲಿ ಸೇರ್ಪಡೆಯಾಗಬಲ್ಲ ಒಂದಷ್ಟು ಚಿತ್ರಗಳಿದ್ದಾವೆ. ಆ ಯಾದಿಯಲ್ಲಿ ಇದೇ ಡಿಸೆಂಬರ್ 22ರಂದು ಬಿಡುಗಡೆಗೊಳ್ಳಲಿರುವ ಹೊಸ ದಿನಚರಿ ಚಿತ್ರ ಖಂಡಿತವಾಗಿಯೂ ಸೇರ್ಪಡೆಗೊಳ್ಳುತ್ತದೆ.
ಇದು ಹೊಸಬರ ತಂಡವೊಂದು ಸೇರಿ ರೂಪಿಸಿರುವ, ಹೊಸತನಗಳನ್ನು ಹೊಂದಿರುವ ಚಿತ್ರ. ಕೀರ್ತಿ ಶೇಖರ್ ಮತ್ತು ವೈಶಾಕ್ ಪುಷ್ಪಲತಾ ಸೇರಿಕೊಂಡ ಈ ಚಿತ್ರವನ್ನು ನಿರ್ದೇಶನ ಮಾಡಿದ್ದಾರೆ. ಹಾಗಾದರೆ, ಹೊಸಾ ದಿನಚರಿ ಯಾವ ಬಗೆಯ ಚಿತ್ರ? ಅದರಲ್ಲಿರುವ ಕಥೆ ಎಂಥಾದ್ದೆಂಬ ಪ್ರಶ್ನೆಗಳೀಗ ಮೂಡಿಕೊಂಡಿವೆ. ಆ ನಿಟ್ಟಿನಲ್ಲಿ ಚಿತ್ರತಂಡವೇ ಒಂದಷ್ಟು ವಿಚಾರಗಳನ್ನು ಜಾಹೀರು ಮಾಡಿದೆ. ಆ ಎಲ್ಲವುಗಳ ಸಾರಾಂಶವಾಗಿ ಕಣ್ಣೆದುರು ನಿಲ್ಲೋದು ಪ್ರೀತಿ ಎಂಬ ಮಾಯೆ. ಪ್ರೀತಿ ಎಂಬುದು ಎಂದಿಗೂ ಸವಕಲಾಗದಂಥಾ ಸಿನಿಮಾ ಸರಕು. ಆದರೆ, ಅದನ್ನು ಹೊಸತನಕ್ಕೆ ಒಗ್ಗಿಸಿಕೊಂಡು ರೂಪಿಸೋದು ತ್ರಾಸದಾಯಕ ಕೆಲಸ. ಅದನ್ನು ಈ ತಂಡ ಅತ್ಯಂತ ಜಾಣ್ಮೆಯಿಂದ ಮಾಡಿ ಮುಗಿಸಿರುವ ಸೂಚನೆಗಳು ದಟ್ಟವಾಗಿವೆ.
ಈ ಜಗತ್ತಿನಲ್ಲಿ ಯಾವುದೂ ಶಾಸ್ವತವಲ್ಲ. ಜೀವಕ್ಕಮಟಿಕೊಂಡಂತಿರೋ ಪ್ರೀತಿ ಕೂಡಾ ಅದಕ್ಕೆ ಹೊರತಾದುದಲ್ಲ. ಯಾರನ್ನಾದರೂ ಪ್ರೀತಿಸಿದಾಗ, ಕೈ ಕೈ ಹಿಡಿದು ನಡೆಯುವಾಗ, ಪ್ರೀತಿಸಿದ ಜೀವದ ಬಗ್ಗೆ ಕನಸು ಕಾಣುವಾಗೆಲ್ಲ ಆ ವ್ಯಕ್ತಿಯ ಹೊರತಾಗಿ ಜೀವನವೇ ಇಲ್ಲ ಅನ್ನಿಸಿರುತ್ತೆ. ಆದರೆ, ಆ ಅಧ್ಯಾಯ ಅರ್ಧದಾರಿಯಲ್ಲಿಯೇ ಮುಕ್ತಾಯವಾದಾಗ, ಹೊಸಾ ವ್ಯಕ್ತಿಯೊಂದಿಗೆ ಬದುಕೋ ಅನಿವಾರ್ಯತೆ ಎದುರಾದಾಗ ಏನೇನಾಗುತ್ತೆ ಅನ್ನೋದೇ ಹೊಸಾ ದಿನಚರಿ. ಹಾಗಂತ ಅಷ್ಟಕ್ಕೆ ಮಾತ್ರವೇ ಈ ಚಿತ್ರ ಸೀಮಿತವಾಗಿಲ್ಲ. ಅಲ್ಲಿ ಬೇರೇನೇನೋ ಬೆರಗುಗಳಿದ್ದಾವೆ. ಈ ಚಿತ್ರದಲ್ಲಿ ದಾಸಪುರಂದರ ಖ್ಯಾತಿಯ ದೀಪಕ್ ಸುಬ್ರಹ್ಮಣ್ಯ ನಾಯಕನಾಗಿ ನಟಿಸಿದ್ದಾರೆ. ಯಾರೇ ನೀ ಮೋಹಿನ ಧಾರಾವಾಹಿ ಖ್ಯಾತಿಯ ಚೇತನ್ ವಿಕ್ಕಿ, ಬಾಬು ಹಿರಣ್ಣಯ್ಯ, ಅರುಣಾ ಬಾಲರಾಜ್, ಮಂದಾರ ಕವಿತಾಳ್, ವರ್ಷಾ ಕರಿಯನ್ ಮುಂತಾದವರ ತಾರಾಗಣವಿದೆ.