ಪ್ರವಾಸ ಮತ್ತು ವಿಶಿಷ್ಟವಾದ ಸ್ಥಳಗಳ ವೀಕ್ಷಣೆ ಅಂದ್ರೆ ಇಷ್ಟವಿಲ್ಲ ಅನ್ನುವವರೇ ಸಿಗಲಿಕ್ಕಿಲ್ಲ. ಜೀವನದಲ್ಲಿ ಒಮ್ಮೆಯಾದ್ರೂ ವಿಶ್ವದ ಅಷ್ಟೂ ಸುಂದರ ಪ್ರದೇಶಗಳನ್ನು, ಚಿತ್ರವಿಚಿತ್ರವಾದ ತಾಣಗಳನ್ನು ಕಣ್ತುಂಬಿಕೊಳ್ಳಬೇಕೆಂಬುದು ಬಹುತೇಕರ ಕನಸು. ಈ ಜಗತ್ತಿನಲ್ಲಿ ಅಡಕವಾಗಿರೊ ವಿಶಿಷ್ಟ ಸ್ಥಳಗಳು ಒಂದೆರಡಲ್ಲ. ಅದರ ಆಕರ್ಷಣೆಗಳಿಗಂತೂ ಕೊನೆ ಮೊದಲೆಂಬುದೇ ಇಲ್ಲ. ಅದು ವಿಶ್ವದ ಕಥೆಯಾಯ್ತು. ನಮ್ಮ ದೇಶದಲ್ಲಿಯೇ ನಮಗೆ ಗೊತ್ತಿಲ್ಲದ, ಒಮ್ಮೆಯಾದ್ರೂ ನೋಡಲೇ ಬೇಕಾದ ಅದೆಷ್ಟು ತಾಣಗಳಿದ್ದಾವೆ ಅಂತ ಯಾವತ್ತಾದರೂ ಯೋಚಿಸಿದ್ದೀರಾ?
ನಮ್ಮ ದೇಶದಲ್ಲಿರೋ ಒಂದಷ್ಟು ವಿಸ್ಮಯಕಾರಿ ಪ್ರದೇಶಗಳು ನಮಗೆ ಚಿರಪರಿಚಿತ. ಅದನ್ನು ನೋಡೇ ತೀರಬೇಕೆಂಬುದು ನಮ್ಮೆಲ್ಲರ ಹಂಬಲ. ಆದ್ರೆ ನಮಗೆ ಅಷ್ಟು ಸಲೀಸಾಗಿ ಗೊತ್ತಾಗದ ಒಂದಷ್ಟು ಅದ್ಭುತಗಳು ನಮ್ಮಲ್ಲಿವೆ. ಅಂಥಾದ್ದರಲ್ಲಿ ಲೋಕ್ತಕ್ ಸರೋವರವೂ ಒಂದಾಗಿ ಸೇರಿಕೊಳ್ಳುತ್ತೆ.ನಮಗೆಲ್ಲ ರಾಷ್ಟ್ರೀಯ ಉದ್ಯಾನ ವನಗಳು ಗೊತ್ತು. ಅದರೊಳಗೆ ಕೋಟಿ ಕೋಟಿ ಸಸ್ಯ ಮತ್ತು ಜೀವ ಸಂಕುಲಗಳಿವೆ ಅನ್ನೋದೂ ಗೊತ್ತು. ಆದರೆ, ಅಂಥಾದ್ದೇ ಒಂದು ಉದ್ಯಾನವನ ಸರೋವರವೊಂದರ ಮೇಲೆ ತೇಲುತ್ತಿದೆ ಅಂದ್ರೆ ನಂಬಲು ತುಸು ಕಷ್ಟವಾಗಬಹುದೇನೋ… ಅಂಥಾ ಅಪರೂಪದ ಬೆರಗುಗಳನ್ನ ಲೋಕ್ತಕ್ ಸರೋವರ ತನ್ನೊಡಲಲ್ಲಿ ಬಚ್ಚಿಟ್ಟುಕೊಂಡಿದೆ.
ಲೋಕ್ತಕ್ ಸರೋವರ ಇರೋದು ಮಣಿಪುರ ರಾಜ್ಯದಲ್ಲಿ. ಮೊಯಿರಾಂಗ್ ಬಳಿ ಇರೋ ಇದು ಅತ್ಯಂತ ಶುದ್ಧ ನೀರಿನ ಸರೋವರ. ಅದರ ಮೇಲೆಲ್ಲ ವಿಶಿಷ್ಟವಾದ ಹುಲ್ಲುಗಳಿಂದ ರಚನೆಯಾದ ಹಾಸಿಗೆಗಳಂಥವುಗಳಿವೆ. ಅಲ್ಲಲ್ಲಿ ಚದುರಿಕೊಂಡ ಅದರ ಮೇಲೆ ನೂರಾರು ಸಂಖ್ಯೆಯ ಜಲ ಸಸ್ಯಗಳು, ಹಾವು, ಕಪ್ಪೆಗಳು ಮತ್ತು ಹೆಬ್ಬಾವುಗಳೂ ಇವೆಯಂತೆ. ಇದನ್ನು ನೋಡಲು ಪ್ರತೀ ವರ್ಷ ಲಕ್ಷ ಲಕ್ಷ ಪ್ರೇಕ್ಷಕರು ಎಡತಾಕುತ್ತಾರೆ.