ಭಾರತೀಯ ಚಿತ್ರರಂಗದ ಮೇರು ನಿರ್ದೇಶಕ ಮಣಿರತ್ನಂ. ತಾನೇ ಮುರಿಯಲು ಕಷ್ಟವಾಗುವಂಥಾ ಹಿಟ್ ದಾಖಲೆಗಳನ್ನು ಹೊಂದಿರುವ ಮಣಿರತ್ನಂ ನಮ್ಮ ನಡುವಿನ ಕ್ರಿಯಾಶೀಲ ನಿರ್ದೇಶಕರಲ್ಲಿಯೇ ಮುಂಚೂಣಿಯಲ್ಲಿರುವವರು. ಸಾಮಾನ್ಯವಾಗಿ ಒಂದು ಹಿಟ್ ಚಿತ್ರದಾಚೆಗೆ, ಆ ಗೆಲುವಿನ ಪ್ರಭೆಯನ್ನು ಮುಂದುವರೆಸಿಕೊಂಡು ಹೋಗುವುದು ಯಾರ ಪಾಲಿಗಾದರೂ ಸವಾಲಿನ ಸಂಗತಿಯೇ. ಕೆಲವರಂತೂ ಒಂದು ಹಿಟ್ ನಂತರದಲ್ಲಿ ಎದುರಾಗೋ ಆಘಾತದಿಂದ ತತ್ತರಿಸಿ ಅಕ್ಷರಶಃ ಮೂಲೆಗುಂಪಾಗಿಬಿಡೋದಿದೆ. ಆದರೆ ಮಣಿರತ್ನಂ ವೃತ್ತಿ ಬದುಕಿನ ಗ್ರಾಫಿನಲ್ಲಿ ಸಾಕಷ್ಟು ಏರಿಳಿತಗಳು ಕಾಣಿಸುತ್ತವೆ. ಅದ್ಯಾವುದರಿಂದಲೂ ವಿಚಲಿತರಾಗದೆ ಮತ್ತೆ ಹೊಸ ಹೊಸಾ ಅಚ್ಚರಿಗಳ ಮೂಲಕ ಮೇಲೆದ್ದು ನಿಲ್ಲುತ್ತಾ ಬಂದಿರೋದು ನಿಜವಾದ ವಿಶೇಷ. ಅಂಥಾದ್ದೊಂದು ಮಹಾನ್ ಅಚ್ಚರಿಯಂಥಾ ಚಿತ್ರ ‘ಪೊನ್ನಿಯಿನ್ ಸೆಲ್ವನ್’!

‘ಪೊನ್ನಿಯಿನ್ ಸೆಲ್ವನ್’ ಭಾರತೀಯ ಚಿತ್ರರಂಗವೆಲ್ಲ ಸಾರಾಸಗಟಾಗಿ ಕಣ್ಣರಳಿಸಿ ನೋಡುತ್ತಿರುವ, ಪ್ರೇಕ್ಷಕರಲ್ಲಿ ಗಾಢವಾದ ನಿರೀಕ್ಷೆ ಮೂಡಿಸಿರುವ ಚಿತ್ರ. ಒಂದು ಸಿನಿಮಾ ಆರಂಭಿಸಿದರೆಂದರೆ, ಅದನ್ನೊಂದು ಧ್ಯಾನದಂತೆ ಪರಿಭಾವಿಸುವವರು ಮಣಿರತ್ನಂ. ಅಂಥಾದ್ದೊಂದು ತಾದಾತ್ಮ್ಯದ ಶಿಖರ ಸ್ಥಿತಿಯಲ್ಲಿ ಅವರು ನಿರ್ದೇಶನ ಮಾಡಿರುವ ಚಿತ್ರ ‘ಪೊನ್ನಿಯಿನ್ ಸೆಲ್ವನ್’. ಬಹು ದೊಡ್ಡ ತಾರಾಗಣ, ಸ್ಟಾರ್ ನಟ ನಟಿಯರ zಂಡನ್ನೇ ಹೊಂದಿರುವ ಇದು ಮಲ್ಟಿ ಸ್ಟಾರರ್ ಚಿತ್ರ. ಈಗಾಗಲೇ ಅಷ್ಟದಿಕ್ಕುಗಳಿಂದಲೂ ಈ ಸಿನಿಮಾ ಬಗ್ಗೆ ಅಗಾಧ ನಿರೀಕ್ಷೆಗಳು ಕೇಳಿ ಬರುತ್ತಿವೆ. ತಮಿಳು ಚಿತ್ರೋದ್ಯಮದ ದಿಕ್ಕಿನಿಂದಂತೂ ಥ್ರಿಲ್ ಆಗಿಸುವಂಥಾ ಅಭಿಪ್ರಾಯಗಳೇ ಪಡಿಮೂಡಿಕೊಂಡಿವೆ. ಇದೀಗ ಬಂದಿರುವ ಸುದ್ದಿಯಂತೂ ಅಂಥಾ ಥ್ರಿಲ್ಲಿಗೆ ಮತ್ತಷ್ಟು ಆವೇಗ ಮೂಡಿಸುವಂತಿದೆ.

ಹಾಗೆ ನೋಡಿದರೆ, ಈ ಚಿತ್ರ ಸೂಪರ್ ಹಿಟ್ ಆಗುತ್ತದೆಂಬಂಥಾ ನಂಬಿಕೆ ಎಲ್ಲರಲ್ಲಿಯೂ ಇದೆ. ಅದು ಮೂಡಿ ಬಂದಿರುವ ಅದ್ದೂರಿಒ ಸ್ವರೂಪದ ಬಗೆಗಂತೂ ಊರು ತುಂಬಾ ಬೆರಗು ಹಬ್ಬಿಕೊಂಡಿದೆ. ಈ ಚಿತ್ರ ಓಟಿಟಿ ಪ್ಲಾಟ್‌ಫಾರ್ಮಿನಲ್ಲಿ ನೂರಾ ಇಪ್ಪತೈದು ಕೋಟಿಗೆ ಮಾರಾಟವಾಗೋದರ ಮೂಲಕ ಮಹಾ ದಾಖಲೆಯನ್ನೇ ಬರೆದಿದೆ. ಈ ಮೂಲಕ ನಿರ್ಮಾಪಕರೂ ಆಗಿರುವ ಮಣಿರತ್ನಂಗೆ ಮೊದಲ ಹಂತದ ಗೆಲುವು ಲಭಿಸಿದಂತಾಗಿದೆ. ಓಟಿಟಿಗೇ ಇಷ್ಟು ದೊಡ್ಡ ಮೊತ್ತದ ವ್ಯಾಪಾರ ಕುದುರಿಕೊಂಡಿರೋದು ಸದರಿ ಚಿತ್ರದ ಕಿಮ್ಮತ್ತಿನ ಕಂಟೆಂಟಿಗೊಂದು ಸಾಕ್ಷಿ. ಅಂದಹಾಗೆ, ಈ ಚಿತ್ರ ಎರಡು ಭಾಗಗಳಲ್ಲಿ ಬಿಡುಗಡೆಗೊಳ್ಳಲಿರೋ ಪ್ಯಾನಿಂಡಿಯಾ ಮಟ್ಟದ್ದು. ಮೊದಲ ಭಾಗ ಇದೇ ಸೆಪ್ಟೆಂಬರ್ ಮೂವತ್ತರಂದು ದೇಶಾದ್ಯಂತ ಬಿಡುಗಡೆಗೊಳ್ಳಲಿದೆ. ಓಟಿಟಿ ವ್ಯವಹಾರದ ಖದರ್ ಕೇಳಿಯೇ ಮತ್ತಷ್ಟು ಪ್ರೇಕ್ಷಕರು ‘ಪೊನ್ನಿಯಿನ್ ಸೆಲ್ವನ್’ನತ್ತ ಚಿತ್ತ ಹಾಯಿಸಿದ್ದಾರೆ.

‘ಪೊನ್ನಿಯಿನ್ ಸೆಲ್ವನ್’ ಮಣಿರತ್ನಂ ವೃತ್ತಿ ಬದುಕಿನಲ್ಲಿಯೇ ಮಹತ್ತರವಾದ ಚಿತ್ರ. ಇದರ ಸ್ಕ್ರೀನ್ ಪ್ಲೇಯನ್ನು ಮಣಿರತ್ನಂ ಎಲಂಗೋ ಕುಮಾರವೇಲ್ ಜೊತೆಗೂಡಿ ರಚಿಸಿದ್ದಾರೆ. ಕಲ್ಕಿ ಕೃಷ್ಣಮೂರ್ತಿ ಅವರ ಕಾದಂಬರಿಯಾಧಾರಿತ ಈ ಚಿತ್ರದಲ್ಲಿ ಸ್ಟಾರ್ ನಟ ನಟಿಯರದ್ದೊಂದು ದಂಡೇ ಇದೆ. ಜಯಂ ರವಿ, ಕಾರ್ತಿ, ವಿಕ್ರಂ, ಐಶ್ವರ್ಯಾ ರೈ, ತ್ರಿಷಾ ಮುಂತಾದವರು ಪ್ರಧಾನ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಹಿಂದೆ ಕನ್ನಡದ ಕೆಜಿಎಫ್ ಭಾರತೀಯ ಚಿತ್ರರಂಗವೇ ತಿರುಗಿ ನೋಡುವಂತೆ ಮಿರುಗಿತ್ತಲ್ಲಾ? ಆ ಹಿಸ್ಟರಿ ‘ಪೊನ್ನಿಯಿನ್ ಸೆಲ್ವನ್’ ವಿಚಾರದಲ್ಲಿ ಮತ್ತೆ ಮರುಕಳಿಸುವ ಕುರುಹುಗಳು ಸ್ಪಷ್ಟವಾಗಿಯೇ ಗೋಚರಿಸುತ್ತಿವೆ. ಅಂತೂ ಈ ಚಿತ್ರವೀಗ ಓಟಿಟಿ ವ್ಯವಹಾರದ ಸಂಬಂಧವಾಗಿ ಮತ್ತೆ ಸುದ್ದಿ ಕೇಂದ್ರದಲ್ಲಿದೆ. ಅದನ್ನು ಕಣ್ತುಂಬಿಕೊಳ್ಳುವ ಕಾತರ ಇನ್ನು ಕೆಲವೇ ದಿನಗಳಲ್ಲಿ ಸಾಕಾರಗೊಳ್ಳಲಿದೆ.

The post ಇದು ಪೊನ್ನಿಯಿನ್ ಸೆಲ್ವನ್ ಚಿತ್ರದ ಪ್ರಥಮ ದಾಖಲೆ! appeared first on ಶೋಧ ನ್ಯೂಸ್ - Shodha News.

ಭಾರತೀಯ ಚಿತ್ರರಂಗದಲ್ಲಿ ವಿಶಿಷ್ಟ ನಟನಾಗಿದ್ದುಕೊಂಡು, ಸಾರ್ವಕಾಲಿಕ ಪ್ರೀತಿ ಸಂಪಾದಿಸಿಕೊಂಡಿರುವವರು ಕಮಲ್ ಹಾಸನ್. ಈ ಕಾರಣದಿಂದಲೇ ಕಮಲ್ ಒಂದು ಸಿನಿಮಾದಲ್ಲಿ ನಟಿಸುತ್ತಿದ್ದಾರೆಂಬ ಸುದ್ದಿ ಹೊರ ಬೀಳುತ್ತಲೇ ಅದರ ಸುತ್ತ ನಿರೀಕ್ಷೆಗಳು ತಂತಾನೇ ಜಮಾವಣೆಯಾಗಿರುತ್ತವೆ. ಯಾವಾಗ ಕಮಲ್ ವಿಕ್ರಮ್ ಎಂಬ ಸಿನಿಮಾದಲ್ಲಿ ನಟಿಸಲಿದ್ದಾರೆಂಬ ಸುದ್ದಿ ಹೊರ ಬಿದ್ದಿತ್ತೋ, ಆವಾಗಿನಿಂದಲೇ ಪ್ರೇಕ್ಷಕರ ಕಣ್ಣಲ್ಲಿ ಹೊಳಪು ಮೂಡಿಕೊಂಡಿತ್ತು. ಆ ಚಿತ್ರವೀಗ ಬಿಡುಗಡೆಗೊಂಡು ಯಶಸ್ವೀ ಪ್ರದರ್ಶನ ಕಾಣುತ್ತಿದೆ. ಹಲವಾರು ಏಳುಬೀಳುಗಳು ಮತ್ತು ಮಿಶ್ರ ಪ್ರತಿಕ್ರಿಯೆಗಳ ನಡುವೆಯೂ ವಿಕ್ರಮ್ ನೂರರ ಗಡಿ ದಾಟಿಕೊಂಡಿದೆ. ಆ ಕಾರಣದಿಂದಲೇ ಬಹುಕಾಲದ ನಂತರ ಕಮಲ್ ಕಣ್ಣಲ್ಲಿ ಖುಷಿಯ ಕಿಡಿ ಕಾಣಿಸಿಕೊಂಡಿದೆ!

ಇದು ಕಮಲ್ ಪಾಲಿಗೆ ನಿಜಕ್ಕೂ ಸಂಭ್ರಮದ ಸಂಗತಿ. ವಿಕ್ರಮ್ ಬಹಳಷ್ಟು ಭಿನ್ನವಾಗಿ, ರಿಚ್ ಆಗಿ ಮೂಡಿ ಬಂದಿದ್ದರೂ ಕೂಡಾ ಬಿಡುಗಡೆಯ ಕ್ಷಣಗಳಲ್ಲಿ ಗ್ರಹಣದಂಥಾ ವಾತಾವರಣವೂ ಇದ್ದಿದ್ದು ನಿಜ. ಯಾಕೆಂದರೆ, ವಿಕ್ರಮ್ ಚೆನ್ನಾಗಿದೆ ಎಂಬ ಅಭಿಪ್ರಾಯಗಳೇ ಮುಸುಕಾಗುವಂತೆ ಮಿಶ್ರ ಪ್ರತಿಕ್ರಿಯೆಗಳ ಒಡ್ಡೋಲಗ ಆರಂಭವಾಗಿತ್ತು. ಇದರಿಂದಾಗಿ ಕೊಂಚ ಗೊಂದಲದ ವಾತಾವರಣ ಸೃಷ್ಟಿಯಾಗಿದ್ದರೂ, ವಿಕ್ರಮ್ ಬಹುಬೇಗನೆ ಚೇತರಿಸಿಕೊಂಡು ನಾಗಾಲೋಟ ಪ್ರಾರಂಭಿಸಿತ್ತು. ಅದೇ ಆವೇಗದೊಂದಿಗೆ ಆ ಚಿತ್ರವೀಗ ನೂರು ದಿನದಾಚೆ ಹೆಜ್ಜೆಯಿಟ್ಟಿದೆ. ಈ ಸಂಬಂಧವಾಗಿ ಸಾಮಾಜಿಕ ಜಾಲತಾಣಗಳ ಮೂಲಕ ಕಮಲ್ ಖುಷಿ ಹಂಚಿಕೊಂಡಿದ್ದಾರೆ.

ಸವಾಲಿನ ನಡುವೆಯೂ ಯಶಸ್ಸಿನ ದಡ ಸೇರಿಸಿದ ಸರ್ವರಿಗೂ ಕಮಲ್ ಧನ್ಯವಾದ ಸಮರ್ಪಣೆ ಮಾಡಿದ್ದಾರೆ. ತಲೆಮಾರುಗಳಾಚೆಗೂ ತನ್ನ ಮೇಲಿನ ಪ್ರೀತಿ ಪ್ರವಹಿಸುತ್ತಿರುವ ಪರಿ ಕಂಡು ಅಚ್ಚರಿಗೊಳ್ಳುತ್ತಲೇ, ಅದಕ್ಕಾಗಿ ಆಭಾರಿಯಾಗಿರೋದಾಗಿಯೂ ಹೇಳಿಕೊಂಡಿದ್ದಾರೆ. ಅಂದಹಾಗೆ, ಇದು ಲೋಕೇಶ್ ಕನಕರಾಜ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚಿತ್ರ. ಲೋಕೇಶ್ ತಮಿಳಿನಲ್ಲಿ ಸ್ಟಾರ್ ನಿರ್ದೇಶಕ. ಕಮಲ್ ಸಾಥ್‌ನೊಂದಿಗೆ ಅವರ ಸ್ಟಾರ್ ವರ್ಚಸ್ಸು ವಿಕ್ರಮ್ ಮೂಲಕ ಮತ್ತೆ ಮುಂದುವರೆದಿದೆ. ಈ ಚಿತ್ರದಲ್ಲಿ ವಿಜಯ್ ಸೇತುಪಥಿ ಮತ್ತು ಫಹಾಲ್ ಫಾಸಿಲ್ ಕೂಡಾ ಪ್ರಧಾನ ಪಾತ್ರಗಳಲ್ಲಿ ನಟಿಸಿದ್ದಾರೆ. ಆ ಪಾತ್ರಗಳನ್ನು ಸೃಷ್ಟಿಸಿರುವ ಪರಿ ಮತ್ತು ಅದಕ್ಕೆ ಜೀವ ತುಂಬಿದ ರೀತಿಗಳೆಲ್ಲವನ್ನೂ ಪ್ರೇಕ್ಷಕರು ಮೆಚ್ಚಿಕೊಂಡಿದ್ದಾರೆ. ಈ ಕಾರಣದಿಂದಲೇ ವಿಕ್ರಮ್ ಗೆದ್ದಿದೆ. ಇದರೊಂದಿಗೆ ಕಮಲ್ ಹಾಸನ್ ವೃತ್ತಿಬದುಕಿನ ಮತ್ತೊಂದು ಮೋಹಕ ಇನ್ನಿಂಗ್ಸ್ ಆರಂಭವಾದಂತಿದೆ!

The post ನೂರರ ಗಡಿ ದಾಟಿದ ವಿಕ್ರಮ್! appeared first on ಶೋಧ ನ್ಯೂಸ್ - Shodha News.