ವೈಯಕ್ತಿಕ ಬದುಕಿನ ತಿಕ್ಕಾಟವೊಂದರ ವಿಚಾರದಲ್ಲಿ ನಟಿ ಪವಿತ್ರಾ ಲೋಕೇಶ್ ವಿವಾದದ ಕೇಮದ್ರಬಿಂದುವಾಗಿದ್ದಾರೆ. ತೆಲುಗು ನಟ ನರೇಶ್‌ರೊಂದಿಗಿನಿ ಅಫೇರ್ ಸಂಬಂಧವಾಗಿ ಪವಿತ್ರಾ ಲೋಕೇಶ್ರನ್ನು ಮೀಡಿಯಾ ಮಂದಿ ಹೋದಲ್ಲಿ ಬಂದಲ್ಲಿ ಕಾಡುತ್ತಿದ್ದಾರೆ. ಇತ್ತ ಸಭ್ಯ ನಟ, ಪವಿತ್ರಾರ ಮಾಜೀ ಪತಿ ಸುಚೇಂದ್ರ ಪ್ರಸಾದ್ ಕೂಡಾ ಮಾಧ್ಯಮಗಳ ಮೂಲಕ ಪುಂಖಾನುಪುಂಖವಾಗಿ ಬಿತ್ತರವಾಗುತ್ತಿರುವ ಸುದ್ದಿಗಳನ್ನು ನೋಡಿ ಪೆಚ್ಚಾಗಿದ್ದಾರೆ. ಇದೆಲ್ಲದರ ನಡುವೆ ಅವನ್ಯಾರೋ ಬುರುಡೆ ವಾಸ್ತು ತಜ್ಞನೊಬ್ಬ ಬರ್ಬರವಾಗಿ ಹತನಾಗುವುದರೊಂದಿಗೆ ಪವಿತ್ರಾ ಲೋಕೇಶ್ ಪ್ರಕರಣಕ್ಕೆ ಒಂದಷ್ಟು ವಿರಾಮ ಬಿದ್ದಿದೆ. ಎಲ್ಲ ತಣ್ಣಗಾದಂತೆ ಕಾಣುತ್ತಿರುವ ಈ ಹೊತ್ತಿನಲ್ಲಿ ಹರಿದಾಡುತ್ತಿರುವ ಒಂದಷ್ಟು ಫೋಟೋಗಳನ್ನು ನೋಡಿದರೆ, ಅರೇ ನಟಿ ಪವಿತ್ರಾ ಲೋಕೇಶ್ ಅವರನ್ನು ಪೊಲೀಸ್ ಕಸ್ಟಡಿಗೆ ತೆಗೆದುಕೊಳ್ಳಲಾಗಿದೆಯಾ? ಅವರನ್ನು ಬಂಧಿಸಿ ವಿಚಾರಣೆ ನಡೆಸಲಾಗುತ್ತಿದೆಯಾ ಅಂತೆಲ್ಲ ಪ್ರಶ್ನೆಗಳು ಮೂಡಿಕೊಳ್ಳುತ್ತವೆ.

ಅಷ್ಟಕ್ಕೂ ಪವಿತ್ರಾ ಲೋಕೇಶ್ ಪ್ರಕರಣದ ಬಗ್ಗೆ ಮೀಡಿಯಾ ಮಂದಿ ಅದೇನೇ ಬಾಯಿ ಬಡಿದುಕೊಂಡರೂ, ಅದು ಪವಿತ್ರಾರ ಖಾಸಗೀ ವಿಚಾರವಷ್ಟೇ. ಯಾರಿಂದ ದೂರಾಗಬೇಕು, ಯಾರೊಂದಿಗೆ ಬದುಕಬೇಕೆಂಬುದೆಲ್ಲ ಅವರವರ ವೈಯಕ್ತಿಕ ಆಯ್ಕೆ. ಈ ಸೆಲೆಬ್ರಿಟಿಗಳ ವಿಚಾರದಲ್ಲಿಯೂ ಅದು ಅನ್ವಯಿಸುತ್ತೆ. ಆದ್ದರಿಂದ ಪವಿತ್ರಾ ಲೋಕೇಶ್‌ರನ್ನು ಪೊಲೀಸರು ಬಂಧಿಸಿ ವಿಚಾರಣೆಗೊಳಪಡಿಸುವಂಥಾ ಯಾವ ಪ್ರಮೇಯವೂ ಇಲ್ಲ. ಹಾಗಾದರೆ ಈಗ ಹರಿದಾಡುತ್ತಿರೋ ಫೋಟೋಗಳು ಎಲ್ಲಿಂದ ಬಂದವು? ಅದರ ಹಿಂದಿರೋದು ಯಾರೆಂಬ ವಿಚಾರ ನಿಮ್ಮ ತಲೆಯಲ್ಲಿ ಗಿರಕಿ ಹೊಡೆಯುತ್ತಿದ್ದರೆ ಅದಕ್ಕುತ್ತರವಾಗಿ ನಿಲ್ಲೋದು ವೆಡ್ಡಿಂಗ್ ಗಿಫ್ಟ್ ಚಿತ್ರ!

ವಿಕ್ರಂ ಪ್ರಭು ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚೊಚ್ಚಲ ಚಿತ್ರ ವೆಡ್ಡಿಂಗ್ ಗಿಫ್ಟ್. ಈ ಚಿತ್ರದಲ್ಲಿ ಪವಿತ್ರಾ ಲೋಕೇಶ್ ಕೂಡಾ ಪ್ರಧಾನವಾದೊಂದು ಪಾತ್ರವನ್ನು ನಿರ್ವಹಿಸಿದ್ದಾರೆ. ಕಾಕತಾಳೀಯವೆಂಬಂತೆ ಈ ಚಿತ್ರವೂ ಕೂಡಾ ಕೌಟುಂಬಿಕ ಕಲಹಗಳ, ವಾಸ್ತವಿಕ ನೆಲೆಗಟದ್ಟಿನ ಕಥೆಯನ್ನೊಳಗೊಂಡಿದೆ. ಅದರಲ್ಲಿಯೂ ಕೂಡಾ ನಟಿ ಪವಿತ್ರಾ ಲೋಕೇಶ್ ಪಾತ್ರ ಪೊಲೀಸ್ ಠಾಣಾ ಮೆಟ್ಟಿಲು ಹತ್ತಿ, ವಿಚಾರಣೆಗೆ ಮುಖಾಮುಖಿಯಾಗುವಂಥಾ ಸನ್ನಿವೇಶಗಳಿದ್ದಾವೆ. ಸದರಿ ಚಿತ್ರದ ಸ್ಟಿಲ್ಲುಗಳಿಗೂ, ಸದ್ಯ ಪವಿತ್ರಾ ಲೋಕೇಶ್ ವೈಯಕ್ತಿಕ ಬದುಕಿನಲ್ಲಿ ಬೀಸುತ್ತಿರುವ ಬಿರುಗಾಳಿಗೂ ಸಾಮ್ಯತೆಗಳಿದ್ದಾವೆ. ಅವುಗಳನ್ನು ನೋಡಿದವರೆಲ್ಲ ಸಹಜವಾಗಿಯೇ ಆ ಫೋಟೋಗಳನ್ನು ಪ್ರಸ್ತುತ ವಿದ್ಯಮಾನಗಳಿಗೆ ಕನೆಕ್ಟ್ ಮಾಡಿ ನೋಡುವಂತಿದೆ.

ಆದರೆ, ಅದು ವೆಡ್ಡಿಂಗ್ ಗಿಫ್ಟ್‌ಗೆ ಮಾತ್ರವೇ ಸೀಮಿತವಾಗಿರೋ ಫೋಟೋಗಳು. ಅದಕ್ಕೂ ಪವಿತ್ರಾರ ಖಾಸಗೀ ಬದುಕಿನ ವಿವಾದಗಳಿಗೂ ಸಂಬಂಧವಿಲ್ಲ. ಇದೆಲ್ಲದರಾಚೆ ನಿಂತು ನಾಳೆ ಬಿಡುಗಡೆಯಾಗಲಿರೋ ವೆಡ್ಡಿಂಗ್ ಗಿಫ್ಟ್ ಚಿತ್ರದ ಬಗ್ಗೆ ಹೇಳೋದಾದರೆ, ಇದು ಈಗಿನ ವಾತಾವರಣದಲ್ಲಿ ಹಲವಾರು ಕುಟುಂಬಗಳ ನೆಮ್ಮದಿಗೆ ಎರವಾಗಿರುವ ನೈಜ ಘಟನೆಗಳನ್ನಾಧರಿಸಿರೋ ಚಿತ್ರ. ಹೆಣ್ಣುಮಕ್ಕಳನ್ನು ಕೌಟುಂಬಿಕ ದೌರ್ಜನ್ಯಗಳಿಂದ ಪಾರುಗಾಣಿಸಲು ಒಂದಷ್ಟು ಕಠಿಣವಾದ ಕಾನೂನುಗಳು ಅಸ್ತಿತ್ವಕ್ಕೆ ಬಂದಿವೆ. ಆದರೆ ಸ್ವಾರ್ಥದಿಂದ ಕೆಲ ಹೆಣ್ಣು ಮಕ್ಕಳೇ ಅದನ್ನು ದುರುಪಯೋಗ ಪಡಿಸಿಕೊಂಡು ಗಂಡು ಜನ್ಮವನ್ನು ಕಷ್ಟದ ಕೂಪಕ್ಕೆ ತಳ್ಳುತ್ತಿದ್ದಾರೆ. ಇದರಲ್ಲಿ ಎಲ್ಲರಿಗೂ ತಾಕುವಂಥಾ ಪಾತ್ರವೊಂದಕ್ಕೆ ಪವಿತ್ರಾ ಲೋಕೇಶ್ ಜೀವ ತುಂಬಿದ್ದಾರೆ. ಆದರೆ ಆ ಪಾತ್ರದ ಬಗ್ಗೆ ಹೆಚ್ಚಿನ ವಿವರಗಳನ್ನು ಚಿತ್ರತಂಡ ಜಾಹೀರು ಮಾಡಿಲ್ಲ. ನಾಳೆ ವೆಡ್ಡಿಂಗ್ ಗಿಫ್ಟ್ ಬಿಡುಗಡೆಯಾಗಲಿರೋದರಿಂದ ಪವಿತ್ರಾ ಲೋಕೇಶ್‌ರಿಗೆ ಸಂಬಂಧಿಸಿದ ಫೋಟೋಗಳ ಅಸಲೀಯತ್ತು ನಾಳೆಯೇ ಎಲ್ಲರೆದುರು ತೆರೆದುಕೊಳ್ಳಲಿದೆ.

The post ಇದು ಚೆಂದದ ನಟಿಗೆ ಸಿಕ್ಕ ವೆಡ್ಡಿಂಗ್ ಗಿಫ್ಟ್! appeared first on ಶೋಧ ನ್ಯೂಸ್ - Shodha News.

ಕುಟುಂಬ ಸಮೇತರಾಗಿ ಕೂತು ನೋಡುವಂಥಾ ಥರ ಥರದ ಪಾತ್ರಗಳ ಮೂಲಕ ಬೆಳ್ಳಿತೆರೆಯನ್ನು ಶ್ರೀಮಂತಗೊಳಿಸಿದ್ದವರು ನಟಿ ಪ್ರೇಮಾ. ಅವರ ಹೆಸರು ಕೇಳಿದರೂ ಪುಳಕಿತರಾಗಿ, ಪ್ರೇಮಾ ನಟಿಸಿದ ಚಿತ್ರಗಳನ್ನು ನೆನಪು ಮಾಡಿಕೊಂಡು ಮದಗೊಳ್ಳುವ ಕೋಟ್ಯಂತರ ಅಭಿಮಾನಿಗಳು ಕರುನಾಡಿನಲ್ಲಿದ್ದಾರೆ. ಹಾಗೆ ಪ್ರೇಕ್ಷಕರ ಪ್ರೀತಿ ಸಂಪಾದಿಸಿಕೊಂಡು, ತಮ್ಮದೇ ಆದ ಅಭಿಮಾನಿ ವರ್ಗವೊಂದನ್ನು ಸೃಷ್ಟಿಸಿಕೊಂಡಿದ್ದವರು ಪ್ರೇಮಾ. ತೊಂಭತ್ತರ ದಶಕದಲ್ಲಿ ಮುಖ್ಯನಾಯಕಿಯಾಗಿ ಮಿಂಚಿ ಸ್ಟಾರ್ ನಟರೊಂದಿಗೆ ತೆರೆಹಂಚಿಕೊಂಡಿದ್ದ ಅವರು ದಶಕಗಳ ಕಾಲ ಆ ಅಲೆಯನ್ನು ಹಾಗೆಯೇ ಕಾಪಿಟ್ಟುಕೊಂಡಿದ್ದರು. ಆ ನಂತರದಲ್ಲಿ ಒಂದು ಸುದೀರ್ಘವಾದ ಗ್ಯಾಪ್‌ನ ನಂತರ ಆಗಾಗ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಪ್ರೇಮಾ, ಇದೀಗ ಹೊಸಾ ಆವೇಗದೊಂದಿಗೆ, ಹೊಸಾ ಬಗೆಯ ಪಾತ್ರದೊಂದಿಗೆ ವೆಡ್ಡಿಂಗ್ ಗಿಫ್ಟ್ ಚಿತ್ರದ ಮೂಲಕ ಮತ್ತೆ ಮರಳಿದ್ದಾರೆ.

ವಿಕ್ರಂ ಪ್ರಭು ನಿರ್ಮಾಣ ಮಾಡಿ ನಿರ್ದೇಶಿಸಿರುವ ವೆಡ್ಡಿಂಗ್ ಗಿಫ್ಟ್ ಒಂದಷ್ಟು ಕಾತರ ಮೂಡಿಸಿರೋದಕ್ಕೆ ಪ್ರೇಮಾ ಪುನರಾಗಮನವೂ ಪ್ರಧಾನ ಕಾರಣ. ಪ್ರೇಮಾ ಆರಂಭ ಕಾಲದಿಂದಲೂ ಕುಟುಂಬ ಸಮೇತರಾಗಿ ಕೂತು ನೋಡುವಂಥಾ ಪಾತ್ರಗಳಲ್ಲಿ ನಟಿಸುತ್ತಾ ಬಂದಿದ್ದಾರೆ. ಬಲು ತೂಕದ ಪಾತ್ರಗಳನ್ನೇ ಆವಾಹಿಸಿಕೊಳ್ಳುತ್ತಾ ಪ್ರೇಕ್ಷಕರಿಗೆ ಹತ್ತಿರಾಗಿದ್ದಾರೆ. ಹಾಗಿರುವಾಗ ರೀ ಎಂಟ್ರಿಯ ಈ ಹೊತ್ತಿನಲ್ಲಿ ಎಂತೆಂಥಾದ್ದೋ ಪಾತ್ರ ನಿರ್ವಹಿಸುವ ಮನಸ್ಥಿತಿ ಅವರಿಗಿಲ್ಲ. ಕಥೆ ಚೆನ್ನಾಗಿರಬೇಕು. ಪಾತ್ರವೂ ಅದಕ್ಕೆ ತಕ್ಕುದಾಗಿರೋದರ ಜೊತೆಗೆ ಸಾಮಾಜಿಕ ಸಂದೇಶವನ್ನೂ ಕೊಡುವಂತಿರಬೇಕೆಂಬುದು ಪ್ರೇಮಾರ ಬಯಕೆ. ಅದನ್ನು ಪೂರೈಸುವಂತೆ ಸಿಕ್ಕ ಚಿತ್ರ ವೆಡ್ಡಿಂಗ್ ಗಿಫ್ಟ್.

ವಿಕ್ರಂ ಪ್ರಭು ಕಥೆಯ ಎಳೆಯನ್ನು ಹೇಳಿದಾಕ್ಷಣವೇ ಅದು ಪ್ರೇಮಾರನ್ನು ತಾಕಿತ್ತಂತೆ. ಅದರಲ್ಲಿರುವ ಪ್ರಯೋಗಾತ್ಮಕ ಗುಣ, ಕಥೆಯೊಳಗೇ ಅಡಕವಾಗಿರುವಂಥಾ ಸಾಮಾಜಿಕ ಕಾಳಜಿ ಮತ್ತು ತಮ್ಮ ಪಾತ್ರದ ಮಹತ್ವಗಳೆಲ್ಲವೂ ಅವರನ್ನು ಸೆಳೆದಿದ್ದವಂತೆ. ಈ ಕಾರಣದಿಂದಲೇ ಬೇರೇನೂ ಯೋಚಿಸದೆ ಪ್ರೇಮಾ ನಟಿಸಲು ಒಪ್ಪಿಕೊಂಡು ಬಿಟ್ಟಿದ್ದರಂತೆ. ಆ ನಂತರದಲ್ಲಿ ಅವರು ಈ ಕಥೆಯ ಮೇಲಿಟ್ಟಿದ್ದ ನಂಬಿಕೆ ಮುಕ್ಕಾಗದಂತೆ ಅದು ದೃಷ್ಯ ರೂಪಕ್ಕಿಳಿದಿದೆಯೆಂಬ ಖುಷಿ ಪ್ರೇಮಾರಲ್ಲಿದೆ. ಕ್ಯಾಮೆರಾ ವರ್ಕ್ ಸೇರಿದಂತೆ ಒಂದಿಡೀ ಚಿತ್ರ ರೂಪುಗೊಂಡಿದ್ದರ ಬಗ್ಗೆ ಅವರು ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ. ವೆಡ್ಡಿಂಗ್ ಗಿಫ್ಟ್ ಮೂಲಕ ತಾವು ಮತ್ತೊಮ್ಮೆ ಪ್ರೇಕ್ಷಕರನ್ನು ಭಿನ್ನ ಪಾತ್ರದ ಮೂಲಕ ಮುಖಾಮುಖಿಯಾಗುತ್ತಿರುವ ಖುಷಿಯೂ ಅವರಲ್ಲಿದೆ.

ಪ್ರೇಮಾ ಒಂದಷ್ಟು ವರ್ಷಗಳ ಕಾಲ ಕಾಲ ತೆರೆಮರೆಯಲ್ಲಿದ್ದರಲ್ಲಾ? ಅವರಿಗೆ ಅವಕಾಶಗಳ ತತ್ವಾರವಾಗಿದೆ ಅಂತೆಲ್ಲ ಒಂದಷ್ಟು ಮಂದಿ ಸುದ್ದಿ ಹಬ್ಬಿಸಿದ್ದರು. ಆದರೆ ಅಸಲೀ ಕಥೆ ಬೇರೆಯದ್ದೇ ಇದೆ. ಬೇರೆ ಭಾಷೆಗಳಲ್ಲಿ ಬ್ಯುಸಿಯಾಗಿದ್ದ ಪ್ರೇಮಾರ ಮುಂದೆ ಕನ್ನಡದಲ್ಲಿಯೂ ದಂಡಿ ದಂಡಿ ಅವಕಾಶಗಳು ಬರುತ್ತಿದ್ದವು. ಆದರೆ ಅದಾಗಲೇ ಸ್ಟಾರ್ ನಟಿಯಾಗಿ ಗುರುತಿಸಿಕೊಂಡು, ಘನತೆಯಿರುವ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದ ಅವರಿಗೆ ಯಾವ್ಯಾವುದೋ ಚಿತ್ರಗಳಲ್ಲಿ ನಟಿಸೋದು ಸುತಾರಾಂ ಇಷ್ಟವಿರಲಿಲ್ಲ. ಅಷ್ಟಕ್ಕೂ ಪ್ರೇಮಾ ತಮ್ಮ ಚಿತ್ರದಲ್ಲಿ ನಟಿಸಿದರೆ ಮೈಲೇಜು ಸಿಗುತ್ತದೆಂದು ಕಾದು ಕೂತಿದ್ದ ಒಂದಷ್ಟು ಮಂದಿಗೆ, ಪ್ರೇಮಾರ ಘನತೆ, ಗೌರವಕ್ಕೆ ತಕ್ಕುದಾದ ಪಾತ್ರ ಸೃಷ್ಟಿಸಬೇಕೆಂಬ ಪರಿವೆ ಇರಲಿಲ್ಲ. ಅಂಥಾದ್ದರ ಬಗ್ಗೆ ಯಾವ ಮರುಕ, ಕಂಪ್ಲೇಂಟುಗಳನ್ನೂ ಇಟ್ಟುಕೊಳ್ಳದ ಪ್ರೇಮಾರಿಗೆ ವೆಡ್ಡಿಂಗ್ ಗಿಫ್ಟ್ ಚಿತ್ರದಲ್ಲಿ ವಕೀಲೆಯಾಗೋ ಅವಕಾಶ ಕೂಡಿ ಬಂದಿದೆ. ಪ್ರೇಮಾ ನಟಿಸಲು ಒಪ್ಪಿಕೊಂಡಿರೋದೇ ಈ ಚಿತ್ರದ ಕಥೆ ಭಿನ್ನವಾಗಿದೆ ಎಂಬುದರ ಸ್ಪಷ್ಟ ಸಂಕೇತ.

ಪ್ರೇಮಾ ಈ ಚಿತ್ರದ ಮೂಲಕ ಮತ್ತೆ ಬಂದಿರೋದರಿಂದ ಕನ್ನಡದ ಪ್ರೇಕ್ಷಕರು ನಿಜಕ್ಕೂ ಥ್ರಿಲ್ ಆಗಿದ್ದಾರೆ. ೧೯೯೫ರಲ್ಲಿ ಸವ್ಯಸಾಚಿ ಎಂಬ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ನಟಿಯಾಗಿ ಎಂಟ್ರಿ ಕೊಟ್ಟಿದ್ದವರು ಪ್ರೇಮಾ. ಈ ಚೆಂದದ ಹುಡುಗಿಯನ್ನು ಆ ನಂತರದ ದಿನಗಳಲ್ಲಿ ಕನ್ನಡದ ಚಿತ್ರಪ್ರೇಮಿಗಳೆಲ್ಲ ಆರಾಧಿಸಿದ ಪರಿಯೇ ಅದ್ಭುತ. ಕನ್ನಡದಲ್ಲಿ ಸಕ್ರಿಯರಾಗಿದ್ದುಕೊಂಡು ಮಲೆಯಾಳಂ ಸೇರಿದಂತೆ ನಾನಾ ಭಾಷೆಗಳಲ್ಲಿ ನಟಿಸುತ್ತಾ, ದಕ್ಷಿಣ ಭಾರತೀಯ ಚಿತ್ರರಂಗದಲ್ಲವರು ದೊಡ್ಡ ಹೆಸರು ಮಾಡಿದ್ದಾರೆ. ಓಂ ಚಿತ್ರದ ಅಮೋಘ ನಟನೆಗಾಗಿ ರಾಜ್ಯ ಪ್ರಶಸ್ತಿಯನ್ನೂ ಪಡೆದುಕೊಂಡಿರುವ ಪ್ರೇಮಾ ಕನ್ನಡ ಚಿತ್ರರಂಗದ ನಿಜವಾದ ಆಸ್ತಿ. ಅವರಿಗಾಗಿ ಚೆಂದದ, ಸದಭಿರುಚಿಯ, ಸಾಮಾಜಿಕ ಸಂದೇಶದ ಪಾತ್ರಗಳು ಸೃಷ್ಟಿಯಾದರೆ ಮತ್ತೆ ಪ್ರೇಮಾ ಕನ್ನಡದಲ್ಲಿ ಮಿಂಚೋದರಲ್ಲಿ ಯಾವ ಸಂದೇಹವೂ ಇಲ್ಲ. ಅದಕ್ಕೆ ವೆಡ್ಡಿಂಗ್ ಗಿಫ್ಟ್ ಚಿತ್ರ ಶ್ರೀಕಾರ ಹಾಕಲಿ, ಅವರ ವೃತ್ತಿ ಬದುಕು ಮತ್ತೆ ಪ್ರಜ್ವಲಿಸಲೆಂದು ಹಾರೈಸೋಣ…

The post ವಕೀಲೆಯಾಗಿದ್ದೇ ಒಂದು ವಿಶಿಷ್ಟ ಅನುಭವ! appeared first on ಶೋಧ ನ್ಯೂಸ್ - Shodha News.

ಹೊಸಾ ಅವತಾರದ ಸೋನು ಪ್ರೇಕ್ಷಕರ ಮನಗೆಲ್ಲುತ್ತಾರಾ?

ಒಂದಷ್ಟು ಯಶಸ್ಸು ಕಂಡ ಪ್ರತೀ ನಟ ನಟಿಯರನ್ನೂ ಕೂಡಾ ಭಿನ್ನ ಬಗೆಯ ಪಾತ್ರಗಳು ಸೆಳೆಯುತ್ತವೆ. ಅಂಥಾದ್ದೊಂದು ತುಡಿತ ಕಲಾವಿದರೊಳಗೆ ಮೂಡಿಕೊಳ್ಳೋದಿದೆಯಲ್ಲಾ? ಅದು ಅವರ ಕಡೆಯಿಂದ ಅಚ್ಚರಿದಾಯಕ ಪಾತ್ರಗಳು ಎದುರುಗೊಳ್ಳುವ ಸ್ಪಷ್ಟ ಲಕ್ಷಣ. ಈಗಾಗಲೇ ಸಾಕಷ್ಟು ಸಿನಿಮಾಗಳಲ್ಲಿ ನಟಿಸಿ ಪ್ರೀತಿ ಸಂಪಾದಿಸಿಕೊಂಡಿರುವ ಸೋನು ಗೌಡ ಕೂಡಾ ಅಂಥಾದ್ದೊಂದು ಪಲ್ಲಟಕ್ಕೆ ತಮ್ಮನ್ನು ತಾವು ಒಡ್ಡಿಕೊಂಡಿದ್ದಾರೆ. ಅದರ ಫಲವಾಗಿಯೇ ವಿಕ್ರಂ ಪ್ರಭು ನಿರ್ದೇಶನದ ವೆಡ್ಡಿಂಗ್ ಗಿಫ್ಟ್‌ನಲ್ಲಿ ಎರಡು ಶೇಡ್‌ಗಳಿರುವ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಇದುವರೆಗಿನ ಸಿನಿಮಾ ಯಾನದಲ್ಲಿ ತಮ್ಮನ್ನು ಮೆಚ್ಚಿಕೊಂಡು ಬಂದ ಪ್ರೇಕ್ಷಕರಿಗೆಲ್ಲ ಈ ಹೊಸಾ ಅವತಾರವೂ ಮೆಚ್ಚುಗೆಯಾಗುತ್ತದೆಂಬ ಗಾಢ ನಂಬಿಕೆ ಅವರಲ್ಲಿದೆ.

ಇದು ವಿಕ್ರಂ ಪ್ರಭು ನಿರ್ದೇಶನದ ಚೊಚ್ಚಲ ಚಿತ್ರ. ಸಮಾಜಕ್ಕೆ ಕಣ್ಣಾಗುವ, ಎಲ್ಲರ ಬದುಕಿಗೂ ಹತ್ತಿರಾಗುವ ಕಥಾನಕವನ್ನೊಳಗೊಂಡಿದ್ದ ಈ ಚಿತ್ರದ ನಾಯಕಿ ಯಾರಾಗಬೇಕೆಂಬುದೇ ಮೊದಲು ಯಕ್ಷ ಪ್ರಶ್ನೆಯಾಗಿತ್ತಂತೆ. ನಾಯಕಿ ಅಂದಾಕ್ಷಣ ಪಾಸಿಟಿವ್ ರೋಲ್‌ಗಳೇ ಕಣ್ಣಮುಂದೆ ಬರುತ್ತವೆ. ಆದರೆ ಈ ಪಾತ್ರಕ್ಕೆ ನಗೆಟಿವ್ ಶೇಡೂ ಇತ್ತು. ಅದನ್ನು ನಿರ್ವಹಿಸೋದಕ್ಕೆ ಸೋನು ಗೌಡ ಅವರೇ ಸೂಕ್ತ ಎಂಬ ನಿರ್ಣಯಕ್ಕೆ ಬಂದಿದ್ದ ನಿರ್ದೇಶಕರಿಗೆ, ಸೋನು ಕಡೆಯಿಂದ ಎಂಥಾ ಪ್ರತಿಕ್ರಿಯೆ ಬಂದೀತೆಂಬ ಆತಂಕವಿತ್ತಂತೆ. ಆದರೆ ಕಡೆಗೂ ಕಥೆ ಕೇಳಿದ ಸೋನು ಗೌಡರಿಗೆ ಬಹುವಾಗಿ ಇಷ್ಟವಾಗಿ ಬಿಟ್ಟಿತ್ತು.

ಈ ಕಥೆ ಮತ್ತು ತಮ್ಮ ಪಾತ್ರ ಹಿಡಿಸಿದಾಕ್ಷಣವೇ ಸೋನು ಗೌಡ ಸ್ಕ್ರಿಪ್ಟ್ ಕೇಳಿದ್ದರಂತೆ. ಎಲ್ಲವನ್ನೂ ಓದಿ ಮನನ ಮಾಡಿಕೊಂಡ ಅವರಿಗೆ ಇದೊಂದು ಭಿನ್ನ ಚಿತ್ರವಾಗಿ ನೆಲೆಗಾಣುತ್ತದೆಂಬ ಭರವಸೆ ಮೂಡಿಕೊಂಡಿತ್ತು. ಅದಾದೇಟಿಗೆ ಮರುಮಾತನಾಡದೇ ಖುಷಿಯಿಂದಲೇ ಆ ಪ್ರಾತ್ರಕ್ಕೆ ಒಪ್ಪಿಗೆ ಸೂಚಿಸಿದ್ದರಂತೆ. ಆದರೆ ಚಿತ್ರೀಕರಣ ಶುರುವಾದಾಗ ಹೆಜ್ಜೆ ಹೆಜ್ಜೆಗೂ ಅವರನ್ನು ಆತಂಕ ಕಾಡಿತ್ತಂತೆ. ಆ ಪಾತ್ರವನ್ನು ಆವಾಹಿಸಿಕೊಳ್ಳುವುದಕ್ಕೆ ಭಯವೂ ಆಗಿತ್ತಂತೆ. ಜಗತ್ತಿನಲ್ಲಿ ಇಂಥವರೂ ಇರುತ್ತಾರಾ ಎಂಬ ಪ್ರಶ್ನೆಯನ್ನು ಅವರಿಗವರೇ ಕೇಳಿಕೊಳ್ಳುವಂತೆಯೂ ಆಗಿತ್ತಂತೆ. ಆದರೂ ಈ ಸಮಾಜಕ್ಕೆ ಆ ಪಾತ್ರದ ಕಡೆಯಿಂದೊಂದು ಸಂದೇಶವಿದೆ ಎಂಬ ಕಾರಣದಿಂದ ಅವರು ಖುಷಿಯಾಗಿಯೇ ಅದಕ್ಕೆ ನ್ಯಾಯ ಸಲ್ಲಿಸಿದ್ದರಂತೆ.

ಸಾಮಾನ್ಯವಾಗಿ ಯಾರೇ ನಟ ನಟಿಯರಾದರೂ ಏಕಾಏಕಿ ನೆಗೆಟೀವ್ ರೋಲ್ ಅಂದಾಕ್ಷಣ ಹಿಂದೇಟು ಹಾಕುತ್ತಾರೆ. ಆನ ಅದನ್ನು ಹೇಗೆ ಸ್ವೀಕರಿಸಬಹುದೆಂಬ ಅಳುಕು ಯಾರಿಗಾದರೂ ಕಾಡುತ್ತೆ. ಆದರೆ ವೆಡ್ಡಿಂಗ್ ಗಿಫ್ಟ್‌ನ ಕಥೆ ಗಟ್ಟಿಯಾಗಿದ್ದುದರಿಂದಾಗಿ ಅಂಥಾ ಯಾವ ಗೊಂದಲಗಳೂ ಸೋನು ಗೌಡರನ್ನು ಕಾಡಲಿಲ್ಲವಂತೆ. ತಮ್ಮನ್ನು ಇಷ್ಟ ಪಡುವ ಜನರೆಲ್ಲರೂ ಈ ಪಾತ್ರವನ್ನೂ ಕೂಡಾ ಮೆಚ್ಚಿಕೊಳ್ಳುತ್ತಾರೆಂಬ ಗಾಢ ನಂಬಿಕೆ ಅವರಲ್ಲಿದೆ. ಈ ಚಿತ್ರದಲ್ಲಿ ಪ್ರತಿಭಾವಂತ ನಟ ನಟಿಯರ ತಾರಾಗಣ ಸೋನುಗೆ ಜೊತೆಯಾಗಿದೆ. ನಾಯಕನಾಗಿ ನಿಶಾನ್ ನಟಿಸಿದ್ದರೆ, ಅಚ್ಯುತ್ ರಾವ್ ಮತ್ತು ಪ್ರೇಮಾ ವಕೀಲರಾಗಿ ಕಾಣಿಸಿಕೊಂಡಿದ್ದಾರೆ. ಪವಿತ್ರಾ ಲೋಕೇಶ್ ಕೂಡಾ ಮಹತ್ವದ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಈ ಚಿತ್ರ ಇದೇ ಜುಲೈ ೮ರಂದು ತೆರೆಗಾಣಲಿದೆ.

The post ಆ ಪಾತ್ರ ಸೋನು ಗೌಡರಿಗೆ ಭಯ ಹುಟ್ಟಿಸಿದ್ದೇಕೆ? appeared first on ಶೋಧ ನ್ಯೂಸ್ - Shodha News.