ಹೇಮಂತ್ ಕುಮಾರ್ ನಿರ್ದೇಶನದ ತುರ್ತು ನಿರ್ಗಮನ ಚಿತ್ರ ತೆರೆಗಾಣಲು ಕ್ಷಣಗಣನೆ ಶುರುವಾಗಿದೆ. ಈ ಹೊತ್ತಿಗಾಗಲೇ ಈ ಸಿನಿಮಾದ ಕಥೆ, ಪಾತ್ರಗಳ ಬಗ್ಗೆ ವ್ಯಾಪಕವಾಗಿ ಚರ್ಚೆಗಳು ನಡೆಯಲಾರಂಭಿಸಿವೆ. ಅಷ್ಟೊಂದು ವಿಶೇಷತೆಗಳಿಂದ ಕೂಡಿರುವ ಪಾತ್ರಗಳು ತುರ್ತು ನಿರ್ಗಮನದಲ್ಲಿದೆ ಎಂಬ ವಿಚಾರ ಈಗಾಗಲೇ ಎಲ್ಲರಿಗೂ ಮನದಟ್ಟಾಗಿದೆ. ಅದರಲ್ಲಿಯೂ ನಟ, ನಿರ್ದೇಶಕ ರಾಜ್ ಬಿ ಶೆಟ್ಟಿ ಈ ಸಿನಿಮಾದಲ್ಲಿ ನಟಿಸಿದ್ದಾರೆಂಬುದೇ ಹಲವರ ಕುತೂಹಲಕ್ಕೆ ಕಾರಣವಾಗಿದೆ. ಯಾಕೆಂದರೆ, ನಿರ್ದೇಶನ ಮಾಡಿರೋದು, ನಟಿಸಿರುವುದು ಕೆಲವೇ ಕೆಲ ಸಿನಿಮಾಗಳಲ್ಲಿಯೇ ಆದರೂ ರಾಜ್ ಶೆಟ್ಟಿ ಎರಡೂ ವಲಯಗಳಲ್ಲಿ ತಮ್ಮೇ ಆದೊಂದು ಛಾಪು ಮೂಡಿಸಿದ್ದಾರೆ. ಈ ಕಾರಣದಿಂದಲೇ ಅವರ ಪಾತ್ರ ತುರ್ತು ನಿರ್ಗಮನದಲ್ಲಿ ಹೇಗಿರಬಹುದೆಂಬ ಕ್ಯೂರಿಯಾಸಿಟಿ ಸಹಜವಾಗಿಯೇ ಎಲ್ಲರಲ್ಲಿದೆ.

ಒಂದಷ್ಟು ಕಾಲದವರೆಗೂ ನಿರ್ದೇಶಕರು ರಾಜ್ ಶೆಟ್ಟಿ ಪಾತ್ರವನ್ನು ಗೌಪ್ಯವಾಗಿಟ್ಟಿದ್ದರು. ಆದರೆ, ಬಿಡುಗಡೆಯ ಘಳಿಗೆ ಹತ್ತಿರಾಗುತ್ತಿರುವ ಸಂದರ್ಭದಲ್ಲಿ ಆ ಬಗೆಗಿನ ಒಂದಷ್ಟು ಮಾಹಿತಿಗಳನ್ನು ಬಿಟ್ಟು ಕೊಟ್ಟಿದ್ದಾರೆ. ರಾಜ್‌ರ ಒಂದಷ್ಟು ಗೆಟಪ್ಪುಗಳೂ ಹೊರಬಂದಿವೆ. ಈ ಚಿತ್ರದಲ್ಲಿನ ಪ್ರತೀ ಪಾತ್ರಗಳನ್ನೂ ಒಂದೊಂದು ತೆರನಾಗಿ ಪ್ರೇಕ್ಷಕರನ್ನು ತಾಕುವಂತೆ ಹೇಮಂತ್ ರೂಪಿಸಿದ್ದಾರೆ. ಅದರ ಮುಂದುವರೆದ ಭಾಗವಾಗಿರೋದು ರಾಜ್ ಶೆಟ್ಟಿ ಪಾತ್ರ. ಅವರಿಲ್ಲಿ ಕ್ಯಾಬ್ ಡ್ರೈವರ್ ಆಗಿ ನಟಿಸಿದ್ದಾರೆ. ಮೊದಲ ಬಾರಿ ಅವರು ಘನ ಗಂಭೀರವಾದ ಪಾತ್ರವನ್ನು ನಿಭಾಯಿಸಿದ್ದಾರೆ.

ಕಥೆಯನ್ನು, ಅದರಲ್ಲಿ ಅಡಕವಾಗಿದ್ದ ವಿಶೇಷತೆಗಳನ್ನು ಆರಂಭದಲ್ಲಿಯೇ ಮೆಚ್ಚಿಕೊಂಡಿದ್ದ ರಾಜ್ ಶೆಟ್ಟಿ ನಟಿಸಲು ಒಪ್ಪಿಕೊಂಡಿದ್ದರು. ಆದರೆ ಚಿತ್ರೀಕರಣಕ್ಕಿಳಿಯುವ ಮುನ್ನ ಒಂದು ದೊಡ್ಡ ಸಮಸ್ಯೆ ಅವರನ್ನೆದುರಾಗಿತ್ತು. ಹೇಳಿಕೇಳಿ ಅವರಿಲ್ಲಿ ಕ್ಯಾಬ್ ಡ್ರೈವರ್ ಪಾತ್ರವನ್ನು ನಿರ್ವಹಿಸಬೇಕಿತ್ತು. ಆದರೆ ರಾಜ್ ಶೆಟ್ಟರಿಗೆ ಕಾರ್ ಡ್ರೈವಿಂಗಿನ ಗಂಧ ಗಾಳಿಯೇ ಗೊತ್ತಿರಲಿಲ್ಲ. ಹಾಗಂತ ಈ ನಿರ್ಧಾರದಿಂದ ಹಿಂದೆ ಸರಿಯುವಂತೆಯೂ ಇರಲಿಲ್ಲ. ಕಡೆಗೂ ನಿರ್ದೇಶಕ ಹೇಮಂತ್ ಶೆಟ್ಟರಿಗೆ ಕಾರ್ ಡ್ರೈವಿಂಗ್ ಕಲಿಸಿದ್ದರಂತೆ. ಹಾಗೆ ಚಾಲನೆ ಕಲಿತುಕೊಂಡ ರಾಜ್ ಶೆಟ್ಟಿ ಪಳಗಿದ ಚಾಲಕರನ್ನೂ ನಾಚಿಸುವಂತೆ ಆ ಪಾತ್ರವನ್ನು ನಿರ್ವಹಸಿದ್ದಾರಂತೆ. ಹೀಗೆ ಹೊಸತನದ ಪಾತ್ರದ ಮೂಲಕ ರಾಜ್ ಶೆಟ್ಟಿ ನಾಳೆ ಬೆಳಗ್ಗಿನ ಹೊತ್ತಿಗೆಲ್ಲ ನಿಮ್ಮನ್ನು ಮುಖಾಮುಖಿಯಾಗಲಿದ್ದಾರೆ.

The post ಕ್ಯಾಬ್ ಡ್ರೈವರ್ ರಾಜ್ ಶೆಟ್ಟಿಯ ತುರ್ತು ನಿರ್ಗಮನ! appeared first on ಶೋಧ ನ್ಯೂಸ್ - Shodha News.

ಹೇಗಾದರೂ ಮಾಡಿ ಚಿತ್ರರಂಗದಲ್ಲಿ ಏನಾದರೊಂದು ಸಾಧಿಸಬೇಕೆಂಬ ಹಂಬಲ ಹೊತ್ತ ಜೀವಗಳೆಲ್ಲ ಬದುಕಿನ ಯಾವುದೋ ಇರಿಕ್ಕು ಗಲ್ಲಿಗಳಲ್ಲಿ ಕಳೆದು ಹೋಗೋದಿದೆ. ವರದಂತೆ, ಅದುವರೆಗಿನ ತಪಸ್ಸಿನ ಫಲದಂತೆ ಒಲಿದು ಬಂದ ಅವಕಾಶವನ್ನು ಉಪಯೋಗಿಸಿಕೊಂಡು ತಾರೆಗಳಾದವರಿಗೂ ಏಕಾಏಕಿ ಮಂಕಾಗುವ, ಕಳೆದು ಹೋಗಿ ಬಿಡುವ ಅಪಾಯ ಇದ್ದೇ ಇರುತ್ತೆ. ಅದು ಬಣ್ಣದ ಜಗತ್ತಿನ ಬಣ್ಣನೆಗೆ ನಿಲುಕದ ಮಾಯೆ. ಹಾಗೆ ನಾಯಕ ನಟರಾಗಿ ಮಿಂಚಿ, ಭರವಸೆ ಮೂಡಿಸಿ ಇದ್ದಕ್ಕಿದ್ದಂತೆ ನೇಪಥ್ಯಕ್ಕೆ ಸರಿದ ಒಂದಷ್ಟು ಪ್ರತಿಭೆಗಳಿದ್ದಾವೆ. ಆ ಸಾಲಿನಲ್ಲಿ ಪ್ರಧಾನವಾಗಿ ಗಣನೆಗೆ ತೆಗೆದುಕೊಳ್ಳಬಹುದಾದ ಹೆಸರು ಸುನೀಲ್ ರಾವ್ ಅವರದ್ದು. ಖ್ಯಾತ ಗಾಯಕಿ ಬಿ.ಕೆ ಸುಮಿತ್ರಾರ ಮಗ ಸುನೀಲ್ ರಾವ್. ಅದರಾಚೆಗೆ ತನ್ನದೇ ಆದ ಐಡೆಂಟಿಟಿ ಪಡೆದುಕೊಂಡು ಮರೆಯಾಗಿದ್ದ ಅವರು ತುರ್ತು ನಿರ್ಗಮನದ ಮೂಲಕ ಮತ್ತೆ ಆಗಮಿಸಿದ್ದಾರೆ.

ಇದು ಸಿನಿ ಪ್ರೇಮಿಗಳ ಪಾಲಿಗೆ ಖುಷಿಯ ಸಂಗತಿ. ಕಡಿಮೆಯೇನಲ್ಲ; ಹತ್ತತ್ತಿರ ಹನ್ನೆರಡು ವರ್ಷಗಳ ಕಾಲ ಚಿತ್ರರಂಗದಿಂದ ದೂರವುಳಿದಿದ್ದವರು ಸುನೀಲ್ ರಾವ್. ಈ ಹಂತದಲ್ಲಿ ಅವರು ತೆರೆಗೆ ಸರಿದ ಬಗ್ಗೆ ಊಹಾಪೋಹಗಳು ಹಬ್ಬಿಕೊಂಡಿದ್ದವು. ಗಾಂಧಿನಗರದಗುಂಟ ಥರ ಥರದ ಕಥೆಗಳು ಹುಟ್ಟಿಕೊಂಡಿದ್ದವು. ಅದೆಲ್ಲದರಾಚೆಗೆ ಸುನೀಲ್ ಬದುಕು ಬೇರೆಯದ್ದೇ ಪಥದತ್ತ ಹೊರಳಿಕೊಂಡಿತ್ತು. ಆದರೆ ಆತ್ಮದಂತೆ ಅಂಟಿಕೊಂಡ ಬಣ್ಣದ ನಂಟನ್ನು ಅಷ್ಟು ಸಲೀಸಾಗಿ ಕಳಚಿಕೊಳ್ಳಲು ಸಾಧ್ಯವೇ? ಒಂದೊಳ್ಳೆ ಕಥೆಯ ಮೂಲಕ ಮತ್ತೆ ಎಂಟರಿ ಕೊಡಬೇಕು, ತನ್ನನ್ನು ಪ್ರೀತಿಸುವ ಜೀವಗಳನ್ನು ಚಕಿತಗೊಳಿಸಬೇಕೆಂಬ ಇರಾದೆ ಸುನೀಲ್‌ರೊಳಗೆ ಇದ್ದೇ ಇತ್ತು. ಅಂಥಾ ಧ್ಯಾನಕ್ಕೊಲಿದು ಬಂದ ಅಪೂರ್ವ ಅವಕಾಶ ತುರ್ತು ನಿರ್ಗಮನ.

ನಿರ್ದೇಶಕ ಹೇಮಂತ್ ಕುಮಾರ್ ತುರ್ತು ನಿರ್ಗಮನ ಎಂಬ ಕಥೆಯನ್ನು ಬರೆದು, ಚಿತ್ರಕಥೆ ಸೇರಿದಂತೆ ಎಲ್ಲವನ್ನೂ ಫೈನಲ್ ಮಾಡಿದ ಕ್ಷಣದಲ್ಲಿ ಎದುರಾದದ್ದು ಯಾರು ಹೀರೋ ಎಂಬ ಪ್ರಶ್ನೆ. ಅದಾದ ಮರುಘಳಿಗೆಯಲ್ಲಿಯೇ ಸುನೀಲ್ ರಾವ್ ಎಂಬ ಹೆಸರು ಅದಕ್ಕುತ್ತರವಾಗಿ ನಿಂತಿತ್ತು. ಅದಾದ ಬಳಿಕ ಸುನೀಲ್‌ರನ್ನು ಸಂಪರ್ಕಿಸಿ ಕಥೆ ಹೇಳಿದರಲ್ಲಾ ಹೇಮಂತ್ ಕುಮಾರ್? ಅದರ ಚಹರೆಗಳನ್ನು ಕಂಡು, ಇಡೀ ಕಥೆಯನ್ನು ಆಸ್ವಾದಿಸಿದ ಸುನೀಲ್ ಮರು ಮಾತನಾಡದೆ ಒಪ್ಪಿಗೆ ಸೂಚಿಸಿದ್ದರಂತೆ. ಆ ಕ್ಷಣದಲ್ಲಿಯೇ ತನ್ನ ರೀ ಎಂಟ್ರಿಗೆ ಹೇಳಿ ಮಾಡಿಸಿದ ಕಥೆ ಇದೆಂಬ ಭಾವ ಸುನೀಲ್‌ರೊಳಗೆ ಗಟ್ಟಿಯಾಗಿ ಬೇರೂರಿಕೊಂಡಿತ್ತಂತೆ.

ದಶಕಗಳಷ್ಟು ಹಿಂದೆ ಎಕ್ಸ್‌ಕ್ಯೂಸ್ ಮೀ ಚಿತ್ರದ ಮೂಲಕ ಚಿತ್ರಪ್ರೇಮಿಗಳ ಮನಸೆಳೆದಿದ್ದವರು ಸುನೀಲ್. ಪಾದರಸದಂಥಾ ಆ ಪಾತ್ರದ ಮೂಲಕ ಅವರು ನೋಡುಗರ ಮನಸಿಗಿಳಿದಿದ್ದರು. ನೋಡ ನೋಡುತ್ತಲೇ ಅವರಿಗೊಂದು ಫ್ಯಾನ್ ಬೇಸ್ ಸೃಷ್ಟಿಯಾಗಿತ್ತು. ಒಂದರ್ಥದಲ್ಲಿ ಎಕ್ಸ್‌ಕ್ಯೂಸ್ ಮಿ ದಾಖಲೆಯನ್ನೇ ಸೃಷ್ಟಿಸಿತ್ತು. ಅಂಥಾದ್ದೇ ದಾಖಲೆಯನ್ನು ತುರ್ತು ನಿರ್ಗಮನವೂ ಸೃಷ್ಟಿಸಲಿದೆ ಎಂಬ ಅಚಲ ನಂಬಿಕೆ ಅವರಲ್ಲಿದೆ. ಹೊರ ಜಗತ್ತಿನಲ್ಲೂ ಕೂಡಾ ಅಂಥಾದ್ದೇ ಅಭಿಪ್ರಾಯಗಳು ಹೊಮ್ಮುತ್ತಿವೆ. ಈ ಚಿತ್ರ ಸುನೀಲ್ ರಾವ್ ಅವರ ನಸೀಬು ಬದಲಿಸಲಿದೆ ಎಂಬ ಮಾತುಗಳೂ ವ್ಯಾಪಕವಾಗಿ ಕೇಳಿ ಬರುತ್ತಿವೆ. ಅದು ನಿಜವಾಗಲಿ, ಸುನೀಲ್ ರಾವ್ ಎಂಬ ಮಲೆನಾಡ ಪ್ರತಿಭೆ ಮತ್ತೆ ಪ್ರಜ್ವಲಿಸಲೆಂಬುದು ಹಾರೈಕೆ…

The post ಎಕ್ಸ್‌ಕ್ಯೂಸ್‌ಮೀ ಹೀರೋಗೊಲಿದ ಅಪೂರ್ವ ಅವಕಾಶ! appeared first on ಶೋಧ ನ್ಯೂಸ್ - Shodha News.