ಬನಾರಸ್ ಚಿತ್ರದ ಮೂಲಕ ನಾಯಕನಾಗಿ ಪ್ಯಾನಿಂಡಿಯಾ ಮಟ್ಟದಲ್ಲಿ ಎಂಟ್ರಿ ಕೊಡುತ್ತಿರುವವರು ಝೈದ್ ಖಾನ್. ಈ ಚಿತ್ರ ಬಿಡುಗಡೆಗೆ ಇನ್ನು ಕೆಲವೇ ಕೆಲ ದಿನಗಳು ಮಾತ್ರವೇ ಬಾಕಿ ಉಳಿದುಕೊಂಡಿವೆ. ಈ ಹೊತ್ತಿಗೆಲ್ಲಾ ಝೈದ್ ಯಾವುದೇ ತಟವಟಗಳಿಲ್ಲದ ತಮ್ಮ ನಡವಳಿಕೆಯ ಮೂಲಕವೇ ಎಲ್ಲರ ಇಷ್ಟದ ಹೀರೋ ಆಗಿ ಹೊರಹೊಮ್ಮಿದ್ದಾರೆ. ಅದಕ್ಕೆ ಕಾರಣವಾಗಿರೋದು ಎಲ್ಲವನ್ನೂ ಜಾತಿ ಧರ್ಮಗಳ ಭೂಮಿಕೆಯಲ್ಲಿ ನೋಡುವಂಥಾ ಇಂದಿನ ಕಾಲಘಟ್ಟದಲ್ಲಿ ಝೈದ್ ಖಾನ್ ಮುಂದುವರೆಯುತ್ತಿರುವ ರೀತಿಯಷ್ಟೇ. ಇದೀಗ ಬೇರೆ ರಾಜ್ಯಗಳಲ್ಲಿ ಬನಾರಸ್ ಪ್ರಚಾರ ಕಾರ್ಯದಲ್ಲಿ ತೊಡಗಿಸಿಕೊಂಡಿರುವ ಝೈದ್, ಆ ಹಾದಿಯಲ್ಲೆದುರಾಗೋ ದೇವಸ್ಥಾನಗಳಿಗೆಲ್ಲ ಭೇಟಿ ಕೊಟ್ಟು ಭಕ್ತಿ ಭಾವದಿಂದ ನಡೆದುಕೊಳ್ಳುತ್ತಿದ್ದಾರೆ. ಬಹುಶಃ ಅಂಥಾದ್ದೊಂದು ಸಹಜವಾದ ನಡವಳಿಕೆಯ ಫಲವಾಗಿಯೇ ಏನೋ… ಝೈದ್‌ಗೆ ಕುಂಭ ಮೇಳದ ಸಂದರ್ಭದಲ್ಲಿ ನಡೆಯುವ ಗಂಗಾರತಿಯಲ್ಲಿ ಭಾಗಿಯಾಗೋ ಸದವಕಾಶ ಕೂಡಿ ಬಂದಿದೆ.

ಈಗೊಂದಷ್ಟು ದಿನಗತಳಿಂದ ಝೈದ್ ಖಾನ್ ಕಾಲಿಗೆ ಚಕ್ರ ಕಟ್ಟಿಕೊಂಡಂತೆ ಬಿಡುವಿರದೆ ಸುತ್ತುತ್ತಿದ್ದಾರೆ. ಬನಾರಸ್ ಬಿಡುಗಡೆಗೆ ಕೆಲವೇ ದಿನಗಳು ಮಾತ್ರ ಬಾಕಿ ಉಳಿದಿರುವ ಈ ಹೊತ್ತಿನಲ್ಲಿ, ಎಲ್ಲವೂ ಸಾರ್ಥಕ್ಯ ಕಾಣುವಂತೆ ಮಾಡಲು ಶ್ರಮಿಸುತ್ತಿದ್ದಾರೆ. ಗಮನೀಯ ಅಂಶವೆಂದರೆ, ಈ ಹಾದಿಯಲ್ಲಿ ಸಿಗುವ ಧಾರ್ಮಿಕ ಕ್ಷೇತ್ರಗಳಿಗೆಲ್ಲ ಝೈದ್ ಜಾತಿ ಮತಗಳ ಹಂಗಿಲ್ಲದೆ ಭೇಟಿ ನೀಡಿ ಭಕ್ತಿಯಿಂದ ನಮಿಸುತ್ತಿದ್ದಾರೆ. ಈ ಮೂಲಕ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿರುವ ಜೋಡಿಯೀಗ ಪ್ರಚಾರ ಕಾರ್ಯದ ನಿಮಿತ್ತವಾಗಿಯೇ ವಾರಾಣಸಿಗ ಅಂಗಳ ತಲುಪಿಕೊಂಡಿದೆ. ಇಲ್ಲಿಯೇ ಒಂದಷ್ಟು ಸ್ಮರಣೀಯ ಕ್ಷಣಗಳಿಗೆ ಸಾಕ್ಷಿಯಾಗಿದೆ.

ಈ ಸಂದರ್ಭದಲ್ಲಿ ಝೈದ್ ಖಾನ್ ಮತ್ತು ಸೋನಲ್ ಮೊಂತೇರೋ ಗಂಗಾರತಿಯಲ್ಲಿ ಪಾಲ್ಗೊಂಡರು. ವಿಧಿವಿಧಾನಗಳಿಗೆ ತಕ್ಕುದಾಗಿ ಅದರಲ್ಲಿ ಪಾಲ್ಗೊಂಡು ಭಕ್ತಿ ಭಾವದಲ್ಲಿ ಮಿಂದೆದ್ದಿದ್ದಾರೆ. ಗಂಗಾರತಿಗೆ ಧಾರ್ಮಿಕವಾಗಿ ಮಹತ್ವವಿದೆ. ಅದು ಕೋಟ್ಯಂತರ ಜನರ ಭಕ್ತಿ ಭಾವಗಳ ಆಚರಣೆ. ಅದರಲ್ಲಿ ಭಾಗಿಯಾಗುವ ಅವಕಾಶ ಬನಾರಸ್ ಹೀರೋ ಝೈದ್ ಖಾನ್ ಮತ್ತು ನಾಯಕಿ ಸೋನಲ್ ಮೊಂತೇರೋ ಅವರುಗಳಿಗೆ ಅದಾಗಿಯೇ ಒಲಿದು ಬಂದಿದೆ. ಎಲ್ಲ ನಂಬಿಕೆಗಳನ್ನೂ ಗೌರವಿಸುವ, ಅಷ್ಟೇ ಆಪ್ತವಾಗಿ ಆಚರಿಸುವ ಮನೋಭಾವದ ಝೈದ್ ಖಾನ್ ತಲ್ಲೀನರಾಗಿ ಗಂಗಾರತಿಯಲ್ಲಿ ಪಾಲ್ಗೊಂಡಿದ್ದಾರೆ. ಅಂಥಾದ್ದೊಂದು ಧನ್ಯತಾ ಭಾವದೊಂದಿಗೆ ಮತ್ತೆ ಬನಾರಸ್ ಪ್ರಚಾರ ಕಾರ್ಯಕ್ಕೆ ಮರಳಿದ್ದಾರೆ.

ಇದೇ ಹೊತ್ತಿನಲ್ಲಿ ಮತ್ತೊಂದು ಅಚ್ಚರಿದಾಯಕ ಅವಕಾಶ ಕೂಡಾ ಬನಾರಸ್ ಜೋಡಿಗೆ ಕೂಡಿ ಬಂದಿದೆ. ವಾರಾಣಸಿಯಲ್ಲಿ ನಡೆಯುತ್ತಿರುವ ಪ್ರಪ್ರಥಮ ಮಣಿಕರ್ಣಿಕಾ ಫಿಲಂ ಫೆಸ್ಟಿವಲ್‌ನಲ್ಲಿಯೂ ಬನಾರಸ್ ಜೋಡಿ ಭಾಗಿಯಾಗಿದ್ದೊಂದು ಅವಿಸ್ಮರಣೀಯ ಕ್ಷಣ. ಆ ಕಾರ್ಯಕ್ರಮವನ್ನು ಬಾಲಿವುಡ್‌ನ ಹಿರಿಯ ನಟ ಸಂಜಯ್ ಮಿಶ್ರಾ ಉದ್ಘಾಟಿಸಿದ್ದಾರೆ. ಬಳಿಕ ಬಲು ಪ್ರೀತಿಯಿಂದ ಅವರೇ ಖುದ್ದಾಗಿ ಬನಾರಸ್ ಜೋಡಿಯನ್ನು ಸನ್ಮಾನಿಸಿದ್ದಾರೆ. ಒಟ್ಟಾರೆ ಚಿತ್ರದ ಬಗ್ಗೆ ಒಳ್ಳೆ ಮಾತುಗಳನ್ನಾಡಿ, ಗೆಲುವಾಗಲೆಂದು ಹಾರೈಸಿದ್ದಾರೆ. ಸಂಜಯ್ ಮಿಶ್ರಾ ಬಾಲಿವುಡ್ ಚಿತ್ರಗಳಲ್ಲಿ ನಟಿಸಿರುವ ಪ್ರತಿಭಾವಂತ ಹಿರಿಯ ನಟ. ದೂರದರ್ಶನವೂ ಸೇರಿದಂತೆ ಅನೇಕ ಭೂಮಿಕೆಗಳಲ್ಲಿ ಪ್ರಸಿದ್ಧಿ ಪಡೆದುಕೊಂಡಿರುವ ಮಿಶ್ರಾ ಬನಾರಸ್ ಬಗ್ಗೆ ಭರವಸೆಯ ಮಾತುಗಳನ್ನಾಡಿದ್ದಾರೆ. ಅದು ನವನಾಯಕ ಝೈದ್ ಖಾನ್ ಅವರಿಗೆ ಹೊಸಾ ಹುರುಪು ತುಂಬಿದೆ.

ಈ ಸಿನಿಮಾ ಫೆಸ್ಟಿವಲ್ ವಾರಾಣಸಿಯಲ್ಲಿ ಇದೇ ಮೊದಲ ಬಾರಿಗೆ ನಡೆಯುತ್ತಿದೆ. ಆ ವೇದಿಕೆಯಲ್ಲಿಯೇ ಝೈದ್ ಖಾನ್ ಮತ್ತು ಸೋನಲ್ ಮೊಂತೇರೋ ಅವರುಗಳಿಗೆ ಸನ್ಮಾನ ಸಿಗುವ ಮೂಲಕ ಬನಾರಸ್ ಚಿತ್ರಕ್ಕೆ ವ್ಯಾಪಕ ಪ್ರಚಾರ ಸಿಕ್ಕಂತಾಗಿದೆ. ಅಷ್ಟಕ್ಕೂ ವಾರಾಣಸಿಯ ವಾತಾವರಣವೇ ಒಂದಿಡೀ ಬನಾರಸ್ ಚಿತ್ರದ ಜೀವಾಳ. ಒಂದು ಅಮೋಘವಾದ ಪ್ರೇಮ ಕಥಾನಕ ಮತ್ತೊಂದಷ್ಟು ಬೆರಗುಗಳೊಂದಿಗೆ ಗಂಗೆಯ ತಟದಿಂದಲೇ ಗರಿಬಿಚ್ಚಿಕೊಳ್ಳುತ್ತದೆ. ಇದೀಗ ಅದೇ ನೆಲದಲ್ಲಿ, ಸಿನಿಮಾ ಹಬ್ಬದಲ್ಲಿ ಸನ್ಮಾನಿಸಿಕೊಳ್ಳುವ ಸದಾವಕಾಶ ಝೈದ್ ಪಾಲಿಗೆ ಕೂಡಿ ಬಂದಿದೆ. ಅದೇ ಹುರುಪಿನೊಂದಿಗೆ ಝೈದ್ ಮತ್ತಷ್ಟು ಆವೇಗದಿಂದ ಬನಾರಸ್ ಪ್ರಚಾರ ಕಾರ್ಯ ಆರಂಭಿಸಿದ್ದಾರೆ. ಹೋದಲ್ಲೆಲ್ಲ ಇಂಥಾದ್ದೇ ಪ್ರೀತ್ಯಾಧರಗಳು ಅವರನ್ನರಸಿ ಬರುತ್ತಿವೆ. ಇಂಥಾ ಸಕಾರಾತ್ಮಕ ವಾತಾವರಣದಲ್ಲಿ, ಭಾರೀ ಕ್ರೇಜ್‌ನ ಒಡ್ಡೋಲಗದಲ್ಲಿ, ಬನಾರಸ್ ಇದೇ ನವೆಂಬರ್ ನಾಲಕ್ಕರಂದು ಅದ್ದೂರಿಯಾಗಿ ತೆರೆಗಾಣುತ್ತಿದೆ.

The post ಮಣಿಕರ್ಣಿಕಾ ಫಿಲಂ ಫೆಸ್ಟಿವಲ್‌ನಲ್ಲಿ ಸನ್ಮಾನದ ಪುಳಕ! appeared first on ಶೋಧ ನ್ಯೂಸ್ - Shodha News.

ಕನ್ನಡ ಚಿತ್ರರಂಗದ ಪಾಲಿಗೀಗ ಅಕ್ಷರಶಃ ಸಕಾರಾತ್ಮಕ ಪರ್ವವೊಂದು ಆರಂಭವಾಗಿದೆ. ಇದೀಗ ಚಿತ್ರರಂಗದತ್ತ ತಣ್ಣಗೊಮ್ಮೆ ಕಣ್ಣು ಹಾಯಿಸಿದರೆ ಹಾಯೆನಿಸುವಂಥಾ ವಾತಾವರಣವೇ ಮೇಳೈಸಿಕೊಂಡಿದೆ. ಬಿಡುಗಡೆಗೆ ಸಜ್ಜಾಗಿ ನಿಂತಿರುವ ಒಂದಷ್ಟು ಚಿತ್ರಗಳನ್ನು ಗಮನಿಸಿದರಂತೂ, ಒಂದರ ಹಿಂದೊಂದರಂತೆ ಹಿಟ್ ಆಗಬಲ್ಲ ಸಿನಿಮಾಗಳೇ ಸರತಿಯಲ್ಲಿ ನಿಂತಂತಿವೆ. ವಿಶೇಷವೆಂದರೆ, ಆ ಸಾಲಿನಲ್ಲಿ ಝೈದ್ ಖಾನ್ ನಾಯಕನಾಗಿ ನಟಿಸಿರುವ ಬನಾರಸ್ ಕೂಡಾ ಸೇರಿಕೊಂಡಿದೆ. ಜಯತೀರ್ಥ ನಿರ್ದೇಶನದ ಈ ಚಿತ್ರ ಈಗಾಗಲೇ ಟ್ರೈಲರ್‌ನೊಂದಿಗೆ ವ್ಯಾಪಕ ಪ್ರಚಾರ, ಅದಕ್ಕೆ ತಕ್ಕುದಾದ ನಿರೀಕ್ಷೆ ಮೂಡಿಸಿದೆ. ವಾರದ ಹಿಂದೆ ಬಿಡುಗಡೆಗೊಂಡಿದ್ದ ಬನಾರಸ್ ಟ್ರೈಲರ್ ಈಗ ಹತ್ತು ಮಿಲಿಯನ್ ವೀಕ್ಷಣೆಗಳಾಚೆಗೆ ದಾಪುಗಾಲಿಡಲಾರಂಭಿಸಿದೆ.

ಜಯತೀರ್ಥ ಚಿತ್ರವೆಂದ ಮೇಲೆ ಅದರತ್ತ ಕುತೂಹಲವೊಂದು ಹರಳುಗಟ್ಟಿಕೊಂಡು ಬಿಡುತ್ತೆ. ಯಾವಾಗ ಮಾಯಗಂಗೆ ಎಂಬ ಹಾಡು ಬಿಡುಗಡೆಗೊಂಡು ಇದೊಂದು ಪ್ರೇಮ ಕಥಾನಕ ಎಂಬ ವಿಚಾರ ಜಾಹೀರಾಯಿತೋ, ಆ ಕ್ಷಣದಿಂದಲೇ ನಿರೀಕ್ಷೆ ನೂರ್ಮಡಿಸಿತ್ತು. ಬನಾರಸ್ ಅನ್ನು ಪ್ರೇಕ್ಷಕರ ಆಸಕ್ತಿ ಕೇಂದ್ರದಲ್ಲಿ ಪ್ರತಿಷ್ಟಾಪಿಸಿದ್ದರ ಹಿಂದೆ ಮಾಯಗಂಗೆಯ ಪಾಲು ಬಹಳಷ್ಟಿದೆ. ಆ ಹಾಡಿನ ಮೂಲಕವೇ ಸಮ್ಮೋಹಕ ದಾಖಲೆ ಬರೆದಿದ್ದ ಬನಾರಸ್, ಟ್ರೈಲರ್ ಮೂಲಕ ಮತ್ತೆ ಮುನ್ನೆಲೆಗೆ ಬಂದು ನಿಂತಿದೆ. ಈ ಸಿನಿಮಾ ದೊಡ್ಡ ಮಟ್ಟದಲ್ಲಿ ಬಗೆಲುವು ದಾಖಲಿಸುತ್ತೆ, ಕನ್ನಡ ಚಿತ್ರರಂಗದ ಘನತೆಯನ್ನು ಮತ್ತೆ ಜಗತ್ತಿನ ಮುಂದೆ ಎತ್ತಿ ಹಿಡಿಯುತ್ತೆ ಎಂಬಂಥಾ ಗಾಢ ನಂಬಿಕೆ ಅಷ್ಟದಿಕ್ಕುಗಳತ್ತಲೂ ವ್ಯಾಪಿಸಿಕೊಂಡಿದೆ.

ವಾರದ ಹಿಂದೆ ಕ್ರೇಜಿಸ್ಟಾರ್ ರವಿಚಂದ್ರನ್ ಮತ್ತು ಬಾಲಿವುಡ್ ನಟ ಅರ್ಬಾಜ್ ಖಾನ್ ಸಮ್ಮುಖದಲ್ಲಿ ಬನಾರಸ್ ಟ್ರೈಲರ್ ಬಿಡುಗಡೆಗೊಂಡಿತ್ತು. ಈ ಟ್ರೈಲರ್ ನೋಡಿದ ಕ್ರೇಜಿಸ್ಟಾರ್ ಬಹುವಾಗಿ ಮೆಚ್ಚಿಕೊಂಡಿದ್ದರು. ನವ ನಾಯಕ ಝೈದ್ ಖಾನ್ ನಟನೆ ಮತ್ತು ಅದರ ಹಿಂದಿರುವ ಎಫರ್ಟ್‌ಗಳನ್ನೆಲ್ಲ ಮನಸಾರೆ ಕೊಂಡಾಡಿದ್ದರು. ದಿನದೊಪ್ಪತ್ತಿನಲ್ಲಿಯೇ ಕನಸುಗಾರನ ಮೆಚ್ಚುಗೆಗಳಿಗೆ ಕನ್ನಡವೂ ಸೇರಿದಂತೆ ಅನೇಕ ಭಾಷೆಗಳಿಂದ ಸಹಮತ ಕೇಳಿಬರಲಾರಂಭಿಸಿತ್ತು. ಅದರ ಫಲವಾಗಿಯೇ ಏಳೂ ಭಾಷೆಗಳಲ್ಲಿ ಈ ಟ್ರೈಲರ್‌ಗೆ ಮಿಲಿಯನ್ನುಗಟ್ಟಲೆ ವೀವ್ಸ್‌ಗಳು ಸಿಕ್ಕಿವೆ. ಅದು ಈ ಕ್ಷಣಕ್ಕೂ ಅತ್ಯಂತ ವೇಗವಾಗಿ ಏರುಗತಿ ಕಾಣುತ್ತಾ ಮುಂದುವರೆಯುತ್ತಿದೆ.

ಬನಾರಸ್ ಏಳು ಭಾಷೆಗಳಲ್ಲಿ ಏಕಕಾಲಕ್ಕೆ ತಯಾರುಗೊಂಡಿರುವ ಪ್ಯಾನಿಂಡಿಯಾ ಸಿನಿಮಾ. ಗಮನೀಯ ಸಂಗತಿಯೆಂದರೆ, ಝೈದ್ ಖಾನ್ ಮೊದಲ ಹೆಜ್ಜೆಯಲ್ಲಿಯೇ ಪ್ಯಾನಿಂಡಿಯಾ ಲೆವೆಲ್ಲಿನಲ್ಲಿ ನಾಯಕನಾಗಿ ಎಂಟ್ರಿ ಕೊಡುತ್ತಿದ್ದಾರೆ. ಇದು ಯಾವ ನಟರ ಪಾಲಿಗಾದರೂ ಅಕ್ಷರಶಃ ಸವಾಲಿನ ಸಂಗತಿ. ಅದಕ್ಕೆ ಸಾಕಷ್ಟು ಪೂರ್ವ ತಯಾರಿ ಬೇಕಾಗುತ್ತದೆ. ಅಂಥಾ ಸರ್ವ ತಯಾರಿಯನ್ನೂ ಮಾಡಿಕೊಂಡೇ ಝೈದ್ ಅಖಾಡಕ್ಕಿಳಿದಿದ್ದಾರೆ. ಆರಂಭದಲ್ಲಿ ಅವರ ಹಿನ್ನೆಲೆಯ ಕಾರಣದಿಂದ ಒಂದಷ್ಟು ಮಂದಿ ಕುಹಕವಾಡಿದ್ದದ್ದು ನಿಜ. ಆದರೆ ಟ್ರೈಲರ್ ನೋಡಿದ ಪ್ರತಿಯೊಬ್ಬರಿಗೂ ಕೂಡಾ ಝೈದ್ ಖಾನ್ ಬನಾರಸ್ ಚಿತ್ರಕ್ಕಾಗಿ ಮಾಡಿಕೊಂಡಿರುವ ತಯಾರಿ ಎಂಥಾದ್ದೆಂಬುದರ ಅರಿವಾಗಿದೆ. ನೋಡಿದವರೆಲ್ಲ ಝೈದ್ ಬಗ್ಗೆ ವೀಶೆಷವಾಗಿ ಭರವಸೆಯ ಮಾತುಗಳನ್ನಾಡುತ್ತಿದ್ದಾರೆ. ಅಂದಹಾಗೆ, ಬನಾರಸ್ ಇದೇ ನವೆಂಬರ್ ನಾಲಕ್ಕರಂದು ಬಿಡುಗಡೆಗೊಳ್ಳಲಿದೆ.

The post ನವನಾಯಕ ಝೈದ್ ಖಾನ್ ಬಗ್ಗೆ ನಿಗಿನಿಗಿಸಿತು ನಿರೀಕ್ಷೆ! appeared first on ಶೋಧ ನ್ಯೂಸ್ - Shodha News.

ಹೂವಿನಂಥಾ ಹಾಡಿನ ಮಹಾ ಮೋಡಿ!
ಕಾಡುವ ಹಾಡಿಗೆ ಮನಸೋಲದವರಿಲ್ಲ. ಸಂಗೀತ ಪ್ರೇಮಿಗಳಂತೂ ಕೇಳುತ್ತಾ ಮತ್ಯಾವುದೋ ಭಾವ ಲೋಕದಲ್ಲಿ ಕಳೆದು ಹೋಗಿಸುವಂಥಾ ಹಾಡಿಗಾಗಿ ಸದಾ ಧ್ಯಾನಿಸುತ್ತಿರುತ್ತಾರೆ. ಅಂಥಾ ಹಾಡೊಂದು ಅಚಾನಕ್ಕಾಗಿ ಕಿವಿ ಸೋಕಿದಾಗ ಆಗುವ ಖುಷಿಯಿದೆಯಲ್ಲಾ? ಅದು ಜಗದ ಎಲ್ಲ ಸೌಭಾಗ್ಯ, ಸುಖಗಳನ್ನೂ ಮೀರಿದ ಮಾಯೆ. ಅದನ್ನು ಅನುಭವಿಸಬಹುದೇ ಹೊರತು ಮಾತಲ್ಲಿ ಹಿಡಿದಿಡೋದಾಗಲಿ, ಅಕ್ಷರಗಳಲ್ಲಿ ಬಂಧಿಸೋದಾಗಲಿ ಕಡುಗಷ್ಟದ ಕೆಲಸ. ಇತ್ತಿತ್ತಲಾಗಿ ಅಂಥಾದ್ದೊಂದು ಸ್ವರ್ಗ ಸುಖವನ್ನು ಕೇಳಿದ ಪ್ರತಿಯೊಬ್ಬರೆದೆಯೂ ಮೊಗೆದು ಸುರಿದ ಹಾಡು ಬನಾರಸ್‌ನ ಮಾಯಗಂಗೆ. ಇತ್ತೀಚೆಗೆ ಬಿಡುಗಡೆಯಾಗಿದ್ದ ಈ ಹಾಡನ್ನು ಕೇಳಿ ಥ್ರಿಲ್ ಆಗದವರೇ ಇಲ್ಲ. ಅಷ್ಟು ಚೆಂದಗೆ ಮೂಡಿ ಬಂದಿದ್ದ ಮಾಯಗಂಗೆಯನ್ನು ಎಲ್ಲರೂ ಮನಸೊಳಗೆ ಹರಿಯಲು ಬಿಟ್ಟಿದ್ದಾಳೆ, ಈ ಕಾರಣದಿಂದಲೇ ಈಗ ಮಾಯಗಂಗೆ ಕರುನಾಡಿನ ಗಡಿದಾಟಿ, ನೆರಯ ರಾಜ್ಯಗಳಲ್ಲಿಯೂ ಮೈದುಂಬಿ ಹರಿಯುತ್ತಿದ್ದಾಳೆ.

ಹಾಗೊಂದು ಮಹಾಮೋಡಿ ಘಟಿಸದೇ ಹೋಗಿದ್ದರೆ ಖಂಡಿತವಾಗಿಯೂ ಇಷ್ಟು ಕಡಿಮೆ ಅವಧಿಯಲ್ಲಿ ಈ ಹಾಡಿಗೆ ಐದು ಮಿಲಿಯನ್ನಿಗೂ ಅಧಿಕ ವೀಕ್ಷಣೆಗಳು ಸಿಕ್ಕಲು ಸಾಧ್ಯವಾಗುತ್ತಿರಲಿಲ್ಲ. ನಿಮಗೆಲ್ಲ ಗೊತ್ತಿರುವಂತೆ ಜಯತೀರ್ಥ ನಿರ್ದೇಶನದ ಬನಾರಸ್ ಚಿತ್ರ ಕನ್ನಡವೂ ಸೇರಿದಂತೆ ಐದು ಭಾಷೆಗಳಲ್ಲಿ ಏಕಕಾಲದಲ್ಲಿಯೇ ಬಿಡುಗಡೆಯಾಗಿದೆ. ಆರಂಭಿಕವಾಗಿ ಮಾಯಗಂಗೆ ಹಾಡು ಕನ್ನಡದಲ್ಲಿ ಬಿಡುಗಡೆಯಾಗಿತ್ತು. ಆ ನಂತರ ಹಲವಾರು ಗಣ್ಯರ ಕಡೆಯಿಂದ ತೆಲುಗು, ತಮಿಳು, ಹಿಂದಿ ಮುಂತಾದ ಭಾಷೆಗಳಲ್ಲಿಯೂ ಮಾಯಗಂಗೆ ಬಿಡುಗಡೆಯಾಗಿತ್ತು. ಕನ್ನಡದಲ್ಲಿ ಎಂಥ ಪ್ರತಿಕ್ರಿಯೆ ಸಿಕ್ಕಿತ್ತೋ, ಅಂಥಾದ್ದೇ ರೋಮಾಂಚಕ ಪ್ರತಿಕ್ರಿಯೆಗಳು ಎಲ್ಲ ಭಾಷೆಗಳಲ್ಲಿಯೂ ಮಾಯಗಂಗೆಗೆ ಸಿಕ್ಕಿದೆ.

ನಿರ್ದೇಶಕ ಜಯತೀರ್ಥ ವಿಶಿಷ್ಟವಾದ ಅಭಿರುಚಿ ಹೊಂದಿರುವ ಅಪರೂಪದ ನಿರ್ದೇಶಕ. ಒಲವೇ ಮಂದಾಚ ಚಿತ್ರದಿಂದ ಬನಾರಸ್ ವರೆಗೂ ಅವರ ಹಾದಿ ಭಿನ್ನಾತಿ ಭಿನ್ನ. ವಿಶೇಷವೆಂದರೆ, ಪ್ರತೀ ಸಿನಿಮಾಗಳಲ್ಲಿಯೂ ಅವರು ಹಾಡುಗಳಿಗೆ ಹೆಚ್ಚಿನ ಪ್ರಾಧಾನ್ಯತೆ ನೀಡುತ್ತಾರೆ. ಈ ಕಾರಣದಿಂದಲೇ ಅವರೊಂದು ಸಿನಿಮಾ ನಿರ್ದೇಶನಕ್ಕಿಳಿದರೆಂದರೆ ಸಂಗೀತಾಸಕ್ತರು ಹಾಡುಗಳ ಆಗಮನಕ್ಕಾಗಿ ಕಾದು ಕೂತಿರುತ್ತಾರೆ. ಬನಾರಸ್ ಘೋಷಣೆಯಾದಂದಿನಿಂದಲೂ ಅಂಥಾದ್ದೊಂದು ಕಾಯುವಿಕೆ ಚಾಲ್ತಿಗೆ ಬಂದಿತ್ತು. ಹಾಗೆ ಕಾದವರೆಲ್ಲರ ಮನಸುಗಳೂ ಮಾಯಗಂಗೆಯ ಮೋಡಿಗೆ ಮರುಳಾಗಿವೆ. ಅದರ ಫಲವಾಗಿಯೇ ಈ ಸಾಂಗು ಇದೀಗ ಎಲ್ಲ ಕಡೆಗಳಲ್ಲಿಯೂ ಟ್ರೆಂಡಿಂಗ್‌ನಲ್ಲಿದೆ. ಎಲ್ಲ ಬಾಷೆಗಳಲ್ಲಿಯೂ ಇದೀಗ ಮಾಯಗಂಗೆ ಮೈದುಂಬಿ ಹರಿಯುತ್ತಾ ಕೇಳಿದ ಪ್ರತೀ ಮನಸುಗಳಲ್ಲಿಯೂ ಪ್ರಫುಲ್ಲ ಭಾವ ಮೂಡಿಸುತ್ತಾ ಸಾಗುತ್ತಿದೆ.

ಒಂದು ಹಾಡಿನ ಮೂಲಕ ಒಂದಿಡೀ ಚಿತ್ರ ಪ್ರೇಕ್ಷಕರ ಆಸಕ್ತಿ ಕೇಂದ್ರದ ಮುನ್ನೆಲೆಗೆ ಬಂದು ನಿಲ್ಲುವುದು ಅಪರೂಪದ ಬೆಳವಣಿಗೆ. ಕೆಲವೇ ಕೆಲ ಸಿನಿಮಾಗಳಿಂದ ಮಾತ್ರವೇ ಆ ಥರದ್ದೊಂದು ಮ್ಯಾಜಿಕ್ಕು ಸಾಧ್ಯವಾಗುತ್ತದೆ. ಆ ಸಾಲಿನಲ್ಲಿ ಬನಾರಸ್ ಕೂಡಾ ನಿಸ್ಸಂದೇಹವಾಗಿ ಸೇರಿಕೊಳ್ಳುತ್ತದೆ. ಇದಕ್ಕೆ ಪ್ರಧಾನ ಕಾರಣವಾಗಿರೋದು ಅಜನೀಶ್ ಲೋಕನಾಥ್‌ರ ಮಾಂತ್ರಿಕ ಸಂಗೀತ ಮತ್ತು ವಿ. ನಾಗೇಂದ್ರ ಪ್ರಸಾದ್ ಅವರ ಸಮ್ಮೋಹಕ ಸಾಹಿತ್ಯ. ಅಕ್ಷರಕ್ಷರವೂ ಒಳಗಿಳಿಯುವಂಥಾ ಸಾಹಿತ್ಯ ಆರಂಭಿಕವಾಗಿಯೇ ಮನಸೆಳೆದಿತ್ತು. ಈ ಮೂಲಕ ನಾಗೇಂದ್ರ ಪ್ರಸಾದ್‌ರ ಹಿಟ್ ಲಿಸ್ಟಿಗೂ ಈ ಹಾಡು ಬಹು ಬೇಗನೆ ಸೇರಿಕೊಂಡಿತ್ತು. ಮಾಯಗಂಗೆಯ ಮೂಲಕವೇ ಬನಾರಸ್‌ನ ದೃಷ್ಯ ವೈಭವದ ಸುಳಿವೂ ಸಿಕ್ಕಿದೆ. ಜೊತೆಗೆ ನವನಾಯಕ ಝೈದ್ ಖಾನ್ ಬಗ್ಗೆ ಭರಪೂರ ಮೆಚ್ಚುಗೆಗಳೂ ದಕ್ಕಿವೆ. ಚಿತ್ರ ತಂಡ ಖುಷಿಗೊಳ್ಳಲು ಮತ್ತೇನು ಬೇಕು?

The post ನೆರೆಯ ರಾಜ್ಯಗಳಲ್ಲಿಯೂ ಮೈದುಂಬಿ ಹರಿದ ಮಾಯಗಂಗೆ! appeared first on ಶೋಧ ನ್ಯೂಸ್ - Shodha News.