ಇತ್ತೀಚೆಗಷ್ಟೇ ರಕ್ಷಿತ್ ಶೆಟ್ಟಿ ನಿರ್ದೇಶನದ ಚಾರ್ಲಿ ಚಿತ್ರ ಬಿಡುಗಡೆಗೊಂಡಿತ್ತಲ್ಲಾ? ಅದು ಮಾಡಿದ್ದ ಮೋಡಿ ಸಣ್ಣ ಮಟ್ಟದ್ದೇನಲ್ಲ. ಬಹುತೇಕ ಮಂದಿ ಅದನ್ನು ಮತ್ತೆ ಮತ್ತೆ ನೋಡಿ ಮರುಳಾದ ಕಥೆ ಕಣ್ಣಮುಂದಿದೆ. ಚಾರ್ಲಿ ನಂತರದಲ್ಲಿ ಅಂಥಾದ್ದೇ ಮೋಹ ಮೂಡಿಸೋ ಮತ್ತೊಂದು ಚಿತ್ರಕ್ಕಾಗಿ ಪ್ರೇಕ್ಷಕರು ಕಾದು ಕೂತಿದ್ದರು. ಆ ಕ್ಷಣದಲ್ಲಿ ಎಂಟ್ರಿ ಕೊಟ್ಟಿದ್ದು ವಿಲೋಕ್ ಶೆಟ್ಟಿ ನಿರ್ದೇಶನದ ಚೇಸ್. ಅಷ್ಟಕ್ಕೂ ಇದು ವರ್ಷಾಂತರಗಳ ಕಾಲದಿಂದಲೂ ಕುತೂಹಲವನ್ನು ಜತನದಿಂದ ಕಾಪಿಟ್ಟುಕೊಂಡು ಬಂದಿದ್ದ ಚಿತ್ರ. ಅದರ ಬಗ್ಗೆ ಪ್ರೇಕ್ಷಕರಲ್ಲಿ ಭಾರೀ ಪ್ರಮಾಣದ ನಿರೀಕ್ಷೆಗಳಿದ್ದವು. ಒಂದಷ್ಟು ಅಮೋಘವಾದ ಕಲ್ಪನೆಗಳೂ ಇದ್ದವು. ಅಂಥಾ ಎಲ್ಲ ಕಲ್ಪನೆಗಳ ಪರಿಧಿಯಾಚೆಗೆ ಹರಡಿಕೊಂಡಿದ್ದ ಚೇಸ್, ಪ್ರೇಕ್ಷಕರ ಮುಂದೆ ಅವತರಿಸಿ ಅಚ್ಚರಿ ಮೂಡಿಸಿತ್ತು.

ಬಿಡುಗಡೆಗೊಂಡ ಕ್ಷಣದಿಂದಲೇ ಚೇಸ್ ಬಗ್ಗೆ ಒಳ್ಳೆ ಅಭಿಪ್ರಾಯಗಳು ಮೂಡಿಕೊಳ್ಳುತ್ತಾ ಬಂದಿದ್ದವು. ಗಟ್ಟಿಯಾದ ಕಥೆ, ಕ್ಷಣ ಕ್ಷಣವೂ ಕೌತುಕದ ದಿಕ್ಕಿನತ್ತ ಹೊರಳಿಕೊಳ್ಳುತ್ತಾ ಮುಂದುವರೆಯುವ ಚೇತೋಹಾರಿ ನಿರೂಪಣೆಯೊಂದಿಗೆ ಚೇಸ್ ಪ್ರತೀ ನೋಡುಗರಲ್ಲಿಯೂ ಥ್ರಿಲ್ಲಿಂಗ್ ಭಾವ ಮೂಡಿಸುವಲ್ಲಿ ಯಶಸ್ವಿಯಾಗಿತ್ತು. ಹೀಗೆ ನೋಡಿ ಬಂದ ಜನರ ಕಡೆಯಿಂದ ಹೊಮ್ಮಿಕೊಂಡಿದ್ದ ಸದಭಿಪ್ರಾಯಗಳೇ ಹೆಚ್ಚೆಚ್ಚು ಪ್ರೇಕ್ಷಕರು ಸಿನಿಮಾ ಮಂದಿರಗಳತ್ತ ನದೌಡಾಯಿಸುವಂತೆ ಮಾಡಿತ್ತು. ಈ ಕಾರಣದಿಂದಲೇ ಅಪರೂಪದ ಕ್ರೈಂ, ಸಸ್ಪೆನ್ಸ್ ಥ್ರಿಲ್ಲರ್ ಕಥಾನಕದ ಚೇಸ್ ರಾಜ್ಯಾದ್ಯಂತ ಯಶಸ್ವೀ ಪ್ರದರ್ಶನ ಕಾಣುತ್ತಾ ಮುಂದುವರೆಯುತ್ತಿದೆ. ಈ ಸಕಾರಾತ್ಮಕ ಪಲ್ಲಟಗಳು ಚಿತ್ರತಂಡವನ್ನೂ ಥ್ರಿಲ್ ಆಗಿಸಿರೋದು ಸತ್ಯ.

ಈ ಚಿತ್ರದಲ್ಲಿ ಈ ಸಮಾಜವನ್ನು ಕ್ಷಣ ಕ್ಷಣವೂ ಕಾಡುತ್ತಿರುವ, ಜನರನ್ನು ಕಿತ್ತು ತಿನ್ನುತ್ತಿರುವ ಜ್ವಲಂತ ಸಮಸ್ಯೆಯೊಂದರ ಸುತ್ತಾ ಕಥೆ ಸಾಗುತ್ತದೆ. ಅದನ್ನು ಪಕ್ಕಾ ಕಮರ್ಶಿಯಲ್ ಹಾದಿಯಲ್ಲಿ ನಿರೂಪಣೆ ಮಾಡುವ ಮೂಲಕ ನಿರ್ದೇಶಕ ವಿಲೋಕ್ ಶೆಟ್ಟಿ ಗೆದ್ದಿದ್ದಾರೆ. ಇದರಲ್ಲಿ ಪ್ರಧಾನ ಪಾತ್ರ ನಿರ್ವಹಿಸಿರುವ ರಾಧಿಕಾ ನಾರಾಯಣ್ ಸೇರಿದಂತೆ ಎಲ್ಲ ಪಾತ್ರಗಳೂ ಕೂಡಾ ಪ್ರೇಕ್ಷಕರನ್ನು ಒಳಗಿಳಿದು ಕಾಡಿವೆ. ಒಟ್ಟಾರೆಯಾಗಿ, ಒಂದು ಅದ್ಭುತವಾದ ಸಸ್ಪೆನ್ಸ್ ಥ್ರಿಲ್ಲರ್ ಚಿತ್ರ ನೋಡಿದ ಖುಷಿಯನ್ನು ಚೇಸ್ ಕೊಡಮಾಡಿದೆ. ಈ ಮೂಲಕ ಅತೀವವಾದ ಸಿನಿಮಾ ಪ್ರೇಮದಿಂದ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದ ಮನೋಹರ್ ಸುವರ್ಣರ ಶ್ರಮವೂ ಸಾರ್ಥಕಗೊಂಡಂತಾಗಿದೆ.

ಚೇಸ್‌ಗೆ ಪ್ರಶಾಂತ್ ಶೆಟ್ಟಿ ಮತ್ತು ಪ್ರದೀಪ್ ಶೆಟ್ಟಿ ಸಾಥ್ ಕೊಟ್ಟಿದ್ದಾರೆ. ಶಿವ್ ಶೆಟ್ಟಿ ಕಾರ್ಯಕಾರಿ ನಿರ್ಮಾಪಕರಾಗಿ ಕಾರ್ಯನಿರ್ವಹಿಸಿದ್ದಾರೆ. ಅನಂತ್ ರಾಜ್ ಅರಸ್ ಛಾಯಾಗ್ರಹಣ, ಕಾರ್ತಿಕ್ ಆಚಾರ್ಯ ಹಿನ್ನೆಲೆ ಸಂಗೀತ ಮತ್ತು ಸಂಗೀತ ನಿರ್ದೇಶನ, ಶ್ರೀ ಕ್ರೇಜಿಮೈಂಡ್ಸ್ ಸಂಕಲನ, ಅವಿನಾಶ್ ಎಸ್ ದಿವಾಕರ್ ಕಲಾ ನಿರ್ದೇಶನ, ಸುನೀಲ್ ಕಟಾಬು ಉಪ ನಿರ್ದೇಶನ, ಡಿಫರೆಂಟ್ ಡ್ಯಾನಿ, ಚೇತನ್ ರಮ್ಶಿ ಡಿಸೋಜಾ ಮತ್ತು ವಿನೋದ್ ಸಾಹಸ ನಿರ್ದೇಶನ, ವಿಜಯ ರಾಣಿ ಮತ್ತು ಸುಶಾಂತ್ ಪೂಜಾರಿ ನೃತ್ಯ ನಿರ್ದೇಶನ ಈ ಚಿತ್ರಕ್ಕಿದೆ. ರಾಧಿಕಾ ನಾರಾಯಣ್, ಅವಿನಾಶ್, ಶೀತಲ್ ಶೆಟ್ಟಿ, ಅರ್ಜುನ್ ಯೋಗಿ, ಸುಶಾಂತ್ ಪೂಜಾರಿ, ರಾಜೇಶ್ ನಟರಂಗ, ಅರವಿಂದ್ ರಾವ್, ಪ್ರಮೋದ್ ಶೆಟ್ಟಿ, ಅರವಿಂದ್ ಬೋಳಾರ್, ಶ್ವೇತಾ ಸಂಜೀವುಲು, ರೆಹಮಾನ್ ಹಾಸನ್, ವೀಣಾ ಸುಂದರ್, ಸುಧಾ ಬೆಳವಾಡಿ, ಉಷಾ ಭಂಡಾರಿ, ಸುಂದರ್, ಸತೀಶ್ ಸಿದ್ಧಾರ್ಥ ಮಾಧ್ಯಮಿಕ, ಪ್ರಿಯಾ ಶಟಮರ್ಶನ್ ಮುಂತಾದವರ ತಾರಾಗಣವಿದೆ.

The post ಇದು ಚೆಂದದ ಕಥೆಯೊಂದು ಸೃಷ್ಟಿಸಿದ ಮ್ಯಾಜಿಕ್ಕು! appeared first on ಶೋಧ ನ್ಯೂಸ್ - Shodha News.

ಅಲ್ಲಿ ಚಿತ್ರೀಕರಣ ನಡೆಸಿದ್ದೇ ಒಂದು ಅದ್ಭುತ ಅನುಭವ!
ವಿಲೋಕ್ ಶೆಟ್ಟಿ ನಿರ್ದೇಶನದ ಚೇಸ್ ಇಂದು ತೆರೆಗಂಡಿದೆ. ಪ್ರೀಮಿಯರ್ ಶೋಗಳಲ್ಲಿ ಭರಪೂರ ಮೆಚ್ಚುಗೆಗೆ ಪಾತ್ರವಾಗಿರುವ ಈ ಚಿತ್ರ ರಾಜ್ಯಾದ್ಯಂತ ಹೆಚ್ಚಿನ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದೆ. ಈವತ್ತಿನ ಸನ್ನಿವೇಶದಲ್ಲಿ ಯಾವುದೇ ಚಿತ್ರಗಳು ಒಂದಷ್ಟು ಡಿಲೇ ಆದರೂ ಅದರಿಂದ ಪ್ರೇಕ್ಷಕರು ವಿಮುಖರಾಗುತ್ತಾರೆ. ಅಂಥಾ ವಾತಾವರಣದಲ್ಲಿ ಎರಡ್ಮೂರು ವರ್ಷಗಳ ಕಾಲ ಕುತೂಹಲವನ್ನು ಯಥಾ ಪ್ರಕಾರವಾಗಿ ಕಾಯ್ದಿಟ್ಟುಕೊಂಡು ಬಂದಿರುವ ಚಿತ್ರ ಚೇಸ್. ವಿಲೋಕ್ ಶೆಟ್ಟಿ ಸೇರಿದಂತೆ ಒಂದಿಡೀ ಚಿತ್ರತಂಡ ಶ್ರಮ ವಹಿಸಿ, ಚೇಸ್ ಅನ್ನು ಪ್ರೇಕ್ಷಕರ ಕುತೂಹಲದ ಕೇಂದ್ರದಲ್ಲಿ ಕಾಪಿಟ್ಟುಕೊಂಡು ಬಂದಿತ್ತು. ಅದೆಲ್ಲವೂ ಸಾರ್ಥಕಗೊಳ್ಳುವ ಕ್ಷಣಗಳು ಇಂದು ಎದುರಾಗಿವೆ.

ಒಡಲ ತುಂಬಾ ವಿಶೇಷತೆಗಳನ್ನು ಬಚ್ಚಿಟ್ಟುಕೊಂಡಿರುವ ಈ ಸಿನಿಮಾವನ್ನು ಸಿಂಪ್ಲಿ ಫನ್ ಮೀಡಿಯಾ ನೆಟ್‌ವರ್ಕ್ ಬ್ಯಾನರಿನಡಿಯಲ್ಲಿ ಮನೋಹರ್ ಸುವರ್ಣ ನಿರ್ಮಾಣ ಮಾಡಿದ್ದಾರೆ. ನಿರ್ದೇಶಕ ವಿಲೋಕ್ ಶೆಟ್ಟಿಯ ಕಲ್ಪನೆಯಂತೆಯೇ ಇಡೀ ಚಿತ್ರ ಮೂಡಿ ಬರಲು ಒತ್ತಾಸೆಯಾಗಿ ನಿಂತಿದ್ದಾರೆ. ಈ ಕಾರಣದಿಂದಲೇ ಬಾಲಿವುಡ್ಡಿನ ಮಂದಿಯೂ ಕಾಲಿಡಲಾಗಂಥಾ ಅಪರೂಪದ ಪ್ರದೇಶಗಳಲ್ಲಿ ಚೇಸ್‌ನ ದೃಷ್ಯಾವಳಿಗಳು ಕಳೆಗಟ್ಟಿಕೊಂಡಿವೆ. ಅಂಥಾ ದೃಷ್ಯ ವೈಭವಗಳೂ ಕೂಡಾ ಈ ಚಿತ್ರದ ಪ್ರಧಾನ ಆಕರ್ಷಣೆಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿವೆ.

ಸಾಮಾನ್ಯವಾಗಿ ಕಥೆಯೊಂದು ಸಿನಿಮಾ ರೂಪ ಧರಿಸುತ್ತಲೇ ಅದರ ಚಿತ್ರೀಕರಣ ಇಂತಿಂಥಾದ್ದೇ ಲೊಕೇಶನ್ನುಗಳಲ್ಲಿ ನೆರವೇರಬೇಕೆಂಬ ಸ್ಪಷ್ಟ ಅಂದಾಜಿರುತ್ತದೆ. ಅದೇ ರೀತಿಯಲ್ಲಿ ನಿರ್ದೇಶಕ ವಿಲೋಕ್ ಶೆಟ್ಟಿಗೂ ಆ ಥರದ್ದೊಂದು ಕನಸಿತ್ತು. ಇದರ ಪ್ರಧಾನ ಭಾಗದ ಚಿತ್ರೀಕರಣವನ್ನು ಹಿಮಾಚಲ ಪ್ರದೇಶದಲ್ಲಿ ನೆರವೇರಿಸಬೇಕೆಂಬುದು ಅವರ ಇರಾದೆಯಾಗಿತ್ತು. ಆದರೆ ಅದು ಅಷ್ಟು ಸಲೀಸಿನ ಸಂಗತಿಯಾಗಿರಲಿಲ್ಲ. ಯಾಕೆಂದರೆ ಆವರೆಗೂ ಬಾಲಿವುಡ್ಡಿನ ಮಂದಿಗೂ ಆ ಪ್ರದೇಶದಲ್ಲಿ ಚಿತ್ರೀಕರಣ ನಡೆಸುವ ಅವಕಾಶ ಸಿಕ್ಕಿರಲಿಲ್ಲ. ಕಡೆಗೂ ಹರಸಾಹಸ ಪಟ್ಟು ಆ ಪ್ರದೇಶದಲ್ಲಿಯೇ, ಮೈ ಕೊರೆಯುವ ಚಳಿಯ ನಡುವೆಯೂ ಚಿತ್ರೀಕರಣ ಮಾಡಲಾಗಿದೆ.

ಇನ್ನುಳಿದಂತೆ ಬಾಲಿವುಡ್ ಮಟ್ಟದಲ್ಲಿ ಹೆಸರು ಮಾಡಿರುವ ತಂತ್ರಜ್ಞರ ತಂಡ ಚೇಸ್‌ಗೆ ಸಾಥ್ ಕೊಟ್ಟಿದೆ. ಈ ಕಾರಣದಿಂದಲೇ ಸದರಿ ಸಿನಿಮಾ ತಾಂತ್ರಿಕವಾಗಿಯೂ ಶ್ರೀಮಂತಿಕೆಯ ಕಳೆಕಟ್ಟಿಕೊಂಡಿದೆ. ಎರಡು ವರ್ಷಗಳ ಕಾಲ ಅವಿರತವಾಗಿ ಶ್ರಮಿಸಿ ಇಡೀ ಚಿತ್ರತಂಡ ಚೇಸ್ ಅನ್ನು ಸಿದ್ಧಪಡಿಸಿದೆ. ಇಂದು ಅದೆಲ್ಲವೂ ಸಾರ್ಥಕಗೊಳ್ಳುವ ದಿನ. ಯಾಕೆಂದರೆ, ರಾಜ್ಯಾದ್ಯಂತ ಚೇಸ್ ತೆರೆಗಂಡಿದೆ. ಇಂದೇ ಹತ್ತಿರದ ಚಿತ್ರಮಂದಿರಗಳಿಗೆ ತೆರಳಿ ನೋಡುವ ಮೂಲಕ ಒಂದು ಅಪರೂಪದ ಅನುಭೂತಿಯನ್ನು ನಿಮ್ಮದಾಗಿಸಿಕೊಳ್ಳಬಹುದು.

The post ಅದ್ಭುತ ಅನುಭೂತಿಗಾಗಿ ಇಂದೇ ನೋಡಿ! appeared first on ಶೋಧ ನ್ಯೂಸ್ - Shodha News.

ವಿಲೋಕ್ ಶೆಟ್ಟಿ ನಿರ್ದೇಶನದ ಚೇಸ್ ಚಿತ್ರ ಈ ವಾರವೇ ಬಿಡುಗಡೆಗೊಳ್ಳಲಿದೆ. ಕೊರೋನಾ ವೈರಸ್ಸಿನ ಘಾತುಕ ವಾತಾವರಣವನ್ನೆಲ್ಲ ದಾಟಿಕೊಂಡು ಬಂದಿದ್ದ ಚೇಸ್, ಅಂಥಾ ವಿಷಮ ಸನ್ನಿವೇಶದಲ್ಲಿಯೂ ಒಂದಲ್ಲೊಂದು ರೀತಿಯಲ್ಲಿ ಸುದ್ದಿ ಮಾಡಿಕೊಂಡೇ ಸಾಗಿ ಬಂದಿತ್ತು. ಇಂಥಾ ಪರಿಸ್ಥಿತಿಯಲ್ಲಿ ಒಂದಷ್ಟು ತಡವಾದಾಗ, ಸಿನಿಮಾ ಪ್ರೇಕ್ಷಕರ ಸ್ಮೃತಿಯಿಂದ ಮರೆಯಾಗದಂತೆ ನೋಡಿಕೊಳ್ಳೋದೇ ಒಂದು ಚಾಲೆಂಜ್. ಅದನ್ನು ವಿಲೋಕ್ ಶೆಟ್ಟಿ ಸಾರಥ್ಯದಲ್ಲಿ ಚಿತ್ರತಂಡ ಸಮರ್ಥವಾಗಿ ಎದುರಿಸಿದೆ. ತಡವಾದಷ್ಟೂ ಚೇಸ್ ಬಗೆಗಿನ ಕುತೂಹಲದ ಮೀಟರ್ ಏರುಗತಿ ಕಾಣುತ್ತಲೇ ಸಾಗುತ್ತಿತ್ತು. ಇದೀಗ ಕಡೇ ಕ್ಷಣದಲ್ಲಿ ಕುತೂಹಲದ ಕಿಚ್ಚು ಹಚ್ಚುವಂಥಾ ಜಬರ್ದಸ್ತ್ ಟ್ರೈಲರ್ ಲಾಂಚ್ ಆಗಿದೆ!

ಒಂದಿಡೀ ಚಿತ್ರದ ಸಾರವನ್ನು ಕಥೆಯ ಆಂತರ್ಯ ಬಿಟ್ಟುಕೊಡದೆ, ಕುತೂಹಲವನ್ನಷ್ಟೇ ತೀವ್ರವಾಗಿಸುವಂತೆ ಕಟ್ಟಿ ಕೊಡೋದು ಸಿನಿಮಾ ತಂಡಗಳ ಪಾಲಿಗೆ ಸವಾಲಿನ ಸಂಗತಿ. ಇದುವರೆಗೂ ಟೀಸರ್ ಮುಂತಾದವುಗಳ ಮೂಲಕ ವಿಲೋಕ್ ಶೆಟ್ಟಿ ಅಂಥಾದ್ದೊಂದು ಜಾಣ್ಮೆ ತೋರಿಸಿದ್ದಾರೆ. ಈಗ ಟ್ರೈಲರ್ ವಿಚಾರದಲ್ಲಿಯೂ ಅದುವೇ ಮುಂದುವರೆದಿದೆ. ಒಂದು ಮರ್ಡರ್, ಅದರ ಸುತ್ತ ಹೆಪ್ಪುಗಟ್ಟಿಕೊಳ್ಳುವ ವಿದ್ಯಮಾನಗಳು, ಆ ಬಿಂದುವಿನಿಂದ ಚಿಮ್ಮುವಂಥಾ ಒಂದಷ್ಟು ಪಾತ್ರಗಳು… ಇದೆಲ್ಲದರೊಂದಿಗೆ ಸೀಟಿನ ಅಂಚಿನಿಂದ ಪ್ರೇಕ್ಷಕರನ್ನು ಆಚೀಚೆ ಕದಲದಂತೆ ಕಟ್ಟಿಡುವ ಕಂಟೆಂಟು ಚೇಸ್‌ನಲ್ಲಿದೆ ಎಂಬುದು ಈ ಟ್ರೈಲರ್ ಮೂಲಕ ಸಾಬೀತಾಗಿದೆ.

ಒಂದು ಟ್ರೈಲರ್ ಯಾವ್ಯಾವ ವಿಚಾರದಲ್ಲಿ ಗಮನ ಸೆಳೆಯಬೇಕೋ, ಅದೆಲ್ಲವನ್ನೂ ಒಳಗೊಂಡಿರುವ ಚೇಸ್ ಟ್ರೈಲರ್‌ಗೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಹೆಚ್ಚೆಚ್ಚು ವೀಕ್ಷಣೆಗಳು ಸಿಗುತ್ತಾ, ಪ್ರೇಕ್ಷಕರೆಲ್ಲ ಚೇಸ್ ಅನ್ನು ಕಣ್ತುಂಬಿಕೊಳ್ಳಲು ಕಾದು ಕೂರುವಂತಾಗಿದೆ. ಹಲವಾರು ಕೋನಗಳಲ್ಲಿ ಕಥೆಯ ಹರವು ಹೊಂದಿರುವ ಈ ಚಿತ್ರ ಸಸ್ಪೆನ್ಸ್ ಥ್ರಿಲ್ಲರ್ ಜಾನರಿನಲ್ಲಿಯೇ ಭಿನ್ನ ಬಗೆಯದ್ದೆಂದು ಈ ಹಿಂದೆಯೂ ವಿಲೋಕ್ ಶೆಟ್ಟಿ ಹೇಳಿಕೊಂಡಿದ್ದರು. ಇದೀಗ ಟ್ರೈಲರ್ ನೋಡಿದ ಸರ್ವರಿಗೂ ಅದು ನಿಜವೆನ್ನಿಸಿದೆ. ತಾಂತ್ರಿಕವಾಗಿಯೂ ಶ್ರೀಮಂತವಾಗಿರುವ ಚೇಸ್, ದೃಷ್ಯ ವೈಭವದಲ್ಲಿಯೂ ವಿಶೇಷ ಸ್ಥಾನ ಪಡೆದುಕೊಳ್ಳುತ್ತದೆ. ಅದೆಲ್ಲವೂ ದಿನದೊಪ್ಪತ್ತಿನಲ್ಲಿಯೇ ನಿಮ್ಮೆಲ್ಲರ ಮುಂದೆ ಅನಾವರಣಗೊಳ್ಳಲಿದೆ.

ಈ ಚಿತ್ರವನ್ನು ಮನೋಹರ್ ಸುವರ್ಣ ನಿರ್ಮಾಣ ಮಾಡಿದ್ದಾರೆ. ಪ್ರಶಾಂತ್ ಶೆಟ್ಟಿ ಮತ್ತು ಪ್ರದೀಪ್ ಶೆಟ್ಟಿ ನಿರ್ಮಾಣದಲ್ಲಿ ಸಾಥ್ ಕೊಟ್ಟಿದ್ದಾರೆ. ಶಿವ್ ಶೆಟ್ಟಿ ಕಾರ್ಯಕಾರಿ ನಿರ್ಮಾಪಕರಾಗಿ ಕಾರ್ಯನಿರ್ವಹಿಸಿದ್ದಾರೆ. ಅನಂತ್ ರಾಜ್ ಅರಸ್ ಛಾಯಾಗ್ರಹಣ, ಕಾರ್ತಿಕ್ ಆಚಾರ್ಯ ಹಿನ್ನೆಲೆ ಸಂಗೀತ ಮತ್ತು ಸಂಗೀತ ನಿರ್ದೇಶನ, ಶ್ರೀ ಕ್ರೇಜಿಮೈಂಡ್ಸ್ ಸಂಕಲನ, ಅವಿನಾಶ್ ಎಸ್ ದಿವಾಕರ್ ಕಲಾ ನಿರ್ದೇಶನ, ಸುನೀಲ್ ಕಟಾಬು ಉಪ ನಿರ್ದೇಶನ, ಡಿಫರೆಂಟ್ ಡ್ಯಾನಿ, ಚೇತನ್ ರಮ್ಶಿ ಡಿಸೋಜಾ ಮತ್ತು ವಿನೋದ್ ಸಾಹಸ ನಿರ್ದೇಶನ, ವಿಜಯ ರಾಣಿ ಮತ್ತು ಸುಶಾಂತ್ ಪೂಜಾರಿ ನೃತ್ಯ ನಿರ್ದೇಶನ ಈ ಚಿತ್ರಕ್ಕಿದೆ. ರಾಧಿಕಾ ನಾರಾಯಣ್, ಅವಿನಾಶ್, ಶೀತಲ್ ಶೆಟ್ಟಿ, ಅರ್ಜುನ್ ಯೋಗಿ, ಸುಶಾಂತ್ ಪೂಜಾರಿ, ರಾಜೇಶ್ ನಟರಂಗ, ಅರವಿಂದ್ ರಾವ್, ಪ್ರಮೋದ್ ಶೆಟ್ಟಿ, ಅರವಿಂದ್ ಬೋಳಾರ್, ಶ್ವೇತಾ ಸಂಜೀವುಲು, ರೆಹಮಾನ್ ಹಾಸನ್, ವೀಣಾ ಸುಂದರ್, ಸುಧಾ ಬೆಳವಾಡಿ, ಉಷಾ ಭಂಡಾರಿ, ಸುಂದರ್, ಸತೀಶ್ ಸಿದ್ಧಾರ್ಥ ಮಾಧ್ಯಮಿಕ, ಪ್ರಿಯಾ ಶಟಮರ್ಶನ್ ಮುಂತಾದವರ ತಾರಾಗಣ ಚೇಸ್‌ಗಿದೆ.

The post ಇದು ಸಸ್ಪೆನ್ಸ್ ಥ್ರಿಲ್ಲರ್ ಜಾನರಿಗೇ ಹೊಸಾ ದಿಕ್ಕು ತೋರುವ ಚಿತ್ರ! appeared first on ಶೋಧ ನ್ಯೂಸ್ - Shodha News.

ಗೆಲುವೆಂಬುದು ಅವರ ಪಾಲಿಗೆ ಹೂವ ಹಾದಿಯಲ್ಲ!

ಬದುಕೆಂದರೇನೇ ಹಾಗೆ; ಅದು ಯಾವ ಕ್ಷಣದಲ್ಲಿ ಅದ್ಯಾವ ಹೊರಳು ಹಾದಿತ್ತ ಪಥ ಬದಲಿಸುತ್ತದೋ ಹೇಳಲು ಬರುವುದಿಲ್ಲ. ಕೆಲವೊಮ್ಮೆ ಅದೆಷ್ಟು ತೀವ್ರವಾಗಿ ಕನಸು ಕಂಡರೂ ಗುರಿಯತ್ತ ದಾರಿ ತೆರೆದುಕೊಳ್ಳೋದಿಲ್ಲ. ಮತ್ತೆ ಕೆಲವೊಮ್ಮೆ ಬದುಕೇ ಮತ್ಯಾವುದೋ ಗಮ್ಯದತ್ತ ತಾನೇತಾನಾಗಿ ಕೈ ಹಿಡಿದು ಕರೆದೊಯ್ಯುತ್ತೆ. ಶ್ರದ್ಧೆ, ಪರಿಶ್ರಮ ಮತ್ತು ತಾಳ್ಮೆಯ ಗುಣಗಳಿದ್ದರೆ ಎಲ್ಲವನ್ನೂ ಕರುಣಿಸುತ್ತೆ. ಅಂಥಾ ಗುಣಗಳನ್ನು ಮೈಗೂಡಿಸಿಕೊಳ್ಳದೇ ಹೋಗಿದ್ದರೆ ಶೀತಲ್ ಶೆಟ್ಟಿ ಎಂಬ ಪ್ರತಿಭೆ ನಿರೂಪಕಿಯಾಗಿ ಕರುನಾಡಿಗೆ ಪರಿಚಯವಾಗಲು ಸಾಧ್ಯವಾಗುತ್ತಿರಲಿಲ್ಲ. ಅದಾದ ಬಳಿಕ ನಟಿಯಾಗಿ ನೆಲೆಗೊಳ್ಳುವ ಅವಕಾಶಗಳು ಬಂದೊದಗುತ್ತಿರಲಿಲ್ಲ. ಅದರ ಬೆನ್ನಲ್ಲಿಯೇ ನಿರ್ದೇಶಕಿಯಾಗಿ ಅವತರಿಸಿ ಅಚ್ಚರಿ ಮೂಡಿಸೋದೂ ಕೂಡಾ ಅಕ್ಷರಶಃ ಕನಸಿನ ಮಾತಾಗುತ್ತಿತ್ತು!

ಬಹುಶಃ ಶೀತಲ್ ಶೆಟ್ಟಿ ಕೂಡಾ ತಮ್ಮ ಬದುಕಿನ ದಿಕ್ಕು ಈ ಪರಿಯಾಗಿ ಹೊರಳಿಕೊಳ್ಳುತ್ತದೆ ಅಂದುಕೊಂಡಿರಲಿಕ್ಕಿಲ್ಲ. ಬದುಕು ತಂದೊಡ್ಡುವ ಆಘಾತ, ಅದು ಸೃಷ್ಟಿಸೋ ಅನಿವಾರ್ಯತೆಗಳಿಗೆಲ್ಲ ಎದೆಗುಂದಬಾರದೆಂಬ ಮಂತ್ರವೊಂದಷ್ಟೇ ಅವರ ಮನಸಲ್ಲಿತ್ತು. ಅಂಥಾದ್ದೊಂದು ಗಟ್ಟಿತನದಿಂದಲೇ ಯಾವುದಕ್ಕೂ ಅಂಜದೆ ಟಿವಿ೯ ನಿರೂಪಕಿಯಾಗಿ ತಮ್ಮ ಸ್ಫುಟವಾದ ಕನ್ನಡ ಉಚ್ಛರಣೆಯಿಂದಲೇ ಖ್ಯಾತಿ ಪಡೆದುಕೊಂಡಿದ್ದವರು ಶೀತಲ್ ಶೆಟ್ಟಿ. ಪತ್ರಕರ್ತೆಯಾಗಿ ಪರಿಚಿತರಾಗಿದ್ದ ಅವರೀಗ ನಿರ್ದೇಶಕಿಯಾಗಿ ಗುರುತು ಮೂಡಿಸುವ ಉದ್ದೇಶದಿಂದಲೇ ನಿರ್ದೇಶನಕ್ಕಿಳಿದಿದ್ದಾರೆ. ಅವರ ಕನಸಿನ ಕೂಸಿನಂಥಾ ಪ್ರಥಮ ಚಿತ್ರ ವಿಂಡೋ ಸೀಟ್ ಈ ರಾತ್ರಿಯೊಂದು ಹೊರಳಿಕೊಂಡಾಕ್ಷಣವೇ ಪ್ರೇಕ್ಷಕರೆದುರು ತೆರೆದುಕೊಳ್ಳಲಿದೆ.

ಹೀಗೆ ನಿರೂಪಕಿಯಾಗಿ, ನಟಿಯಾಗಿ, ನಿರ್ದೇಶಕಿಯಾಗಿ ತಮ್ಮದೇ ಆದ ಛಾಪು ಮೂಡಿಸುತ್ತಿರುವ ಶೀತಲ್ ಶೆಟ್ಟಿ ಹುಟ್ಟೂರು ಬ್ರಹ್ಮಾವರ. ಅವರ ತಂದೆ ಶ್ರೀಧರ್ ಶೆಟ್ಟಿ ಎಲ್‌ಐಸಿಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದವರು. ತಂದೆಯ ಕೆಲಸದ ಕಾರಣದಿಂದಲೇ ಚಿಕ್ಕ ವಯಸ್ಸಿನಲ್ಲಿ ಶಿವಮೊಗ್ಗೆಯ ಮಡಿಲಲ್ಲಿರೋ ಸಾಗರದ ಸಖ್ಯ ಶೀತಲ್‌ರಿಗೆ ಒಲಿದು ಬಂದಿತ್ತು. ಅವರ ಬಾಲ್ಯವೆಲ್ಲ ಗರಿಬಿಚ್ಚಿಕೊಂಡಿದ್ದು ಸಾಗರ ಸೀಮೆಯಲ್ಲಿಯೇ. ಹಾಗೆ ಚೆಂದಗಿದ್ದ ಬದುಕಿನಲ್ಲಿ ಅಪ್ಪನ ಅಕಾಲಿಕ ಅಗಲುವಿಕೆಯ ಆಘಾತ ಅವರನ್ನು ಇನ್ನಿಲ್ಲದಂತೆ ಬಾಧಿಸಿತ್ತು. ಹೀಗೆ ಪುಟ್ಟ ವಯಸ್ಸಿನಲ್ಲಿ ಅಪ್ಪನೆಂಬೋ ಆಸರೆ ಮರೆಯಾದಾಗ ಮನಸು ಅಭದ್ರತೆಯ ಸುಳಿಗೆ ಬೀಳುತ್ತೆ. ಮತ್ತೆ ಕೆಲವರು ಆದ ಆಘಾತದಿಂದಲೇ ಮತ್ತಷ್ಟು ಗಟ್ಟಿಗೊಳ್ಳುತ್ತಾ ಸಾಗುತ್ತಾರೆ. ಶೀತಲ್ ಶೆಟ್ಟಿ ಎರಡನೇ ಸಾಲಿಗೆ ಸೇರುವವರು!

ಆ ಹೊತ್ತಿಗೆಲ್ಲ ತುಂಬಾ ಪ್ರೀತಿಸೋ ಅಮ್ಮ ಹಾಗೂ ಬೆನ್ನಿಗೇ ಹುಟ್ಟಿದ್ದ ತಮ್ಮ ಮಾತ್ರ ಶೀತಲ್‌ರ ಜಗತ್ತು. ಚೆಂದಗೆ ಓದಿ, ಒಂದು ನೌಕರಿ ಗಿಟ್ಟಿಸಿಕೊಂಡು ಅಮ್ಮನನ್ನು ಚೆಂದಗೆ ನೋಡಿಕೊಂಡು ತಮ್ಮನನ್ನು ನೆಲೆಗಾಣಿಸಬೇಕೆಂಬುದಷ್ಟೇ ಅವರ ಮಹಾ ಕನಸಾಗಿತ್ತು. ಇದರ ಭಾಗವಾಗಿಯೇ ಶಿವಮೊಗ್ಗೆಯಲ್ಲಿಬಿಎಸ್‌ಸಿ ಬಯೋಟೆಕ್ನಿಕ್ ಪದವಿ ವ್ಯಾಸಂಗ ಆರಂಭಿಸಿದ್ದರು. ಆ ಪದವಿಯ ಕಡೇಯ ವರ್ಷವಿನ್ನೂ ಪೂರ್ತಿಯಾಗುವ ಮುನ್ನವೇ ಟಿವಿ9 ವಾಹಿನಿಯಲ್ಲಿ ನಿರೂಪಕಿಯಾಗೋ ಅವಕಾಶವಿದೆ ಎಂಬ ವಿಚಾರ ಶೀತಲ್‌ರ ಗಮನನಕ್ಕೆ ಬಂದಿತ್ತು. ಆ ಕಾಲಕ್ಕೆ ಟಿವಿ9 ಸ್ಟಾರ್ ವಾಹಿನಿ. ಆದರೆ ಅದುವರೆಗೂ ಮಾಧ್ಯಮದ ಬಗ್ಗೆಯಾಗಲಿ, ನಿರೂಪಕಿಯಾಗಿ ಮಿಂಚಬೇಕೆಂಬ ಬಯಕೆಯಾಗಲಿ ಶೀತಲ್ ಪಾಲಿಗಿರಲಿಲ್ಲ. ಅವರೊಳಗಿದ್ದ ಭಾವವೊಂದೇ; ಬದುಕಿನ ಅನಿವಾರ್ಯತೆ!

ಹಾಗೆ ಯಾವ ಮಹತ್ವಾಕಾಂಕ್ಷೆಗಳೂ ಇಲ್ಲದೆ, ಒಂದು ಕೆಲಸ ಸಿಕ್ಕಬೇಕೆಂಬ ಒಂದೇ ಆಸೆಯಿಂದ ಟಿವಿ೯ನ ಆಂಕರಿಂಗ ಆಡಿಷನ್‌ನಲ್ಲಿ ಶೀತಲ್ ಪಾಲ್ಗೊಂಡಿದ್ದರು. ಈ ಹುಡುಗಿಯ ಸ್ಪಷ್ಟವಾದ ಕನ್ನಡ ಉಚ್ಛಾರ ಶಕ್ತಿಯೇ ಕೆಲಸ ಹಠಾತ್ತನೆ ಕೆಲಸ ದೊರಕಿಸಿ ಕೊಟ್ಟಿತ್ತು. ಹಾಗೆ ಅಚಾನಕ್ಕಾಗಿ ಸಿಕ್ಕ ಆ ವಕಾಶವನ್ನು ಮಾತ್ರ ಶೀತಲ್ ತುಂಬಾ ಎಚ್ಚರಿಕೆಯಿಂದ ಬಳಸಿಕೊಂಡಿದ್ದರು. ಮಾಧ್ಯಮವೊಂದರಲ್ಲಿ ನೆಲೆ ಕಂಡುಕೊಳ್ಳಲು ಬೇಕಾದ ಎಲ್ಲ ಪಟ್ಟುಗಳನ್ನೂ ಕರಗತ ಮಾಡಿಕೊಂಡಿದ್ದರು. ಅದರ ಫಲವಾಗಿಯೇ ಕೆಲವೇ ವರ್ಷಗಳಲ್ಲಿ ನಂಬರ್ ಒನ್ ನಿರೂಪಕಿಯೆಂಬ ಗರಿಮೆ ಶೀತಲ್‌ರ ಮುಡಿಗೇರಿಕೊಂಡಿತ್ತು. ಬಹುಶಃ ನಿರೂಪಕಿಯಾಗಿಯೇ ಮುಂದುವರೆದಿದ್ದರೆ ಈ ಕ್ಷಣದ ವರೆಗೂ ಅವರ ಪಾಲಿಗೆ ಯಾವ ಅಡ್ಡಿ ಆತಂಕಗಳೂ ಎದುರಾಗೋದಿಲ್ಲ.

ಆದರೆ, ಹೊಸದೇನನ್ನೋ ಧ್ಯಾನಿಸುವ ಮನಸುಗಳು ಒಂದು ಪರಿಧಿಯಲ್ಲಿ ಹೆಚ್ಚು ವರ್ಷಗಳ ಕಾಲ ಗಿರಕಿ ಹೊಡೆಯುವುದಿಲ್ಲ. ಯಶಸ್ಸೆಂಬುದು ಅಪಾದಮಸ್ತಕ ಸುತ್ತುವರಿದಿದ್ದರೂ ಅದೊಂದು ಥರದ ಏಕತಾನತೆ ಕಾಡಲಾರಂಭಿಸುತ್ತೆ. ಶೀತಲ್‌ಗೂ ಅಂಥಾದ್ದೊಂದು ಭಾವ ಬಲವಾಗಿಯೇ ಕಾಡಲಾರಂಭಿಸಿತ್ತು. ಏನಾದರೊಂದು ಕ್ರಿಯಾಶೀಲ ಬದಲಾವಣೆಯನ್ನು ಮನಸು ಧ್ಯಾನಿಸುತ್ತಿರುವಾಗ ವರದಂತೆ ಒಲಿದು ಬಂದಿದ್ದದ್ದು ಉಳಿದವರು ಕಂಡಂತೆ ಚಿತ್ರದಲ್ಲಿ ನಟಿಸುವ ಅವಕಾಶ. ಅದನ್ನೂ ಕೂಡಾ ಯಾವ ನಿರೀಕ್ಷೆಗಳೂ ಇಲ್ಲದಂತೆ ಎದುರುಗೊಂಡಿದ್ದ ಅವರಿಗೆ ಕಚೇರಿಯ ಕಡೆಯಿಂದ ಹೇಳಿಕೊಳ್ಳುವಂತಾ ಬೆಂಬಲ ಸಿಗಲಿಲ್ಲ. ಆ ಕ್ಷಣವೇ ಗಟ್ಟಿ ನಿರ್ಧಾರ ಮಾಡಿ ಏಕಾಏಕಿ ವೃತ್ತಿಯನ್ನೇ ಬದಲಾವಣೆ ಮಾಡಿಕೊಂಡು ನಟಿಯಾಗಲು ಹೊರಟು ನಿಂತರು ನೋಡಿ ಶೀತಲ್? ಅದನ್ನು ಕಂಡು ಅವರ ಅಮ್ಮ ಮಾತ್ರವಲ್ಲದೇ ಬಹುತೇಕರು ಅಚ್ಚರಿ ಪಟ್ಟಿದ್ದರು.

ಕಡೆಗೂ ರಕ್ಷಿತ್ ಶೆಟ್ಟಿ ನಿರ್ದೇಶನ ಮಾಡಿ ನಾಯಕನಾಗಿದ್ದ ಉಳಿದವರು ಕಂಡಂತೆ ಚಿತ್ರದಲ್ಲಿ ಶೀತಲ್ ಒಂದೊಳ್ಳೆ ಪಾತ್ರ ಮಾಡಿದ್ದರು. ಅದು ಜನರಿಗೂ ಇಷ್ಟವಾಗಿತ್ತು. ಆ ನಂತರದಲ್ಲಿಯೂ ನಟಿಯಾಗಿ ಒಂದಷ್ಟು ಅವಕಾಶಗಳು ಅವರನ್ನು ಅರಸಿ ಬಂದಿದ್ದವು. ಒಂದು ಸಿನಿಮಾದ ನಾಯಕಿಯಾಗಿಯೂ ಮಿಂಚಿದ್ದ ಶೀತಲ್ ನಟಿಯಾಗಿ ಉತ್ತುಂಗಕ್ಕೇರುತ್ತಾರೆಂಬಂಥಾ ವಾತಾವರಣವಿತ್ತು. ಆದರೆ ಆ ಹೊತ್ತಿನಲ್ಲಿಯೇ ಅವರ ಚಿತ್ರ ನಿರ್ದೇಶನದತ್ತ ವಾಲಿಕೊಂಡಿತ್ತು. ಬರೆಯುವ ಹವ್ಯಾಸವನ್ನೂ ರೂಢಿಸಿಕೊಂಡಿದ್ದ ಶೀತಲ್‌ಗೆ ಕಥೆಯೆಂಬುದು ಅಚ್ಚುಮೆಚ್ಚಿನ ಪ್ರಾಕಾರ. ಒಂದಷ್ಟು ಕೇಳುಗರನ್ನು ಸೃಷ್ಟಿಸಿಕೊಂಡು ಚೆಂದದ ಕಥೆ ಹೇಳಬೇಕೆಂಬುದು ಶೀತಲ್ ಕಟ್ಟಿಕೊಂಡಿದ್ದ ಕನಸು. ಅದಕ್ಕೆ ನಿರ್ದೇಶನಕ್ಕಿಂತಲೂ ಸೂಕ್ತವಾದ ಮಾಧ್ಯಮ ಇನ್ನೊಂದಿಲ್ಲ ಎಂಬುದು ಅವರಿಗಾಗಲೇ ಮನದಟ್ಟಾಗಿ ಹೋಗಿತ್ತು.

ಅಂಥಾದ್ದೊಂದು ನಿರ್ಧಾರ ತಳೆದ ಘಳಿಗೆಯಿಂದಲೇ ತಯಾರಿ ಆರಂಭಿಸಿದ್ದ ಶೀತಲ್ ವಿಂಡೋ ಸೀಟ್ ಕಥೆ ಬರೆದು ಮುಗಿಸಿಕೊಂಡಿದ್ದರು. ಅದಕ್ಕೆ ಸಿನಿಮಾ ರೂಪವನ್ನೂ ಕೂಡಾ ಕೊಟ್ಟಾಗಿತ್ತು. ಯಾವ ಅವಕಾಶವೇ ಆಗಿರಲಿ; ಅದನ್ನು ಸೂಕ್ತ ತಯಾರಿಯೊಂದಿಗೇ ಬರಮಾಡಿಕೊಳ್ಳಬೇಕೆಂಬುದು ಶೀತಲ್‌ರ ಮನಸ್ಥಿತಿ. ನಿರ್ದೇಶನವೆಂದ ಮೇಲೆ ಅದಕ್ಕೇ ಆದಂಥಾ ಪರಿಭಾಷೆಯಿದೆ. ಅದೆಲ್ಲವನ್ನೂ ಮೈಗೂಡಿಸಿಕೊಳ್ಳಬೇಕೆಂಬ ಕಾರಣದಿಂದಲೇ ಅವರು ಕಿರುಚಿತ್ರಗಳತ್ತ ಗಮನ ಹರಿಸಿದ್ದರು. ಅದು ಅವರ ಪಾಲಿಗೆ ನಿರ್ದೇಶಕಿಯಾಗುವ ತಾಲೀಮಾಗಿತ್ತು. ಸಂಗಾತಿ ಎಂಬ ಕಿರುಚಿತ್ರವನ್ನು ನಿರ್ದೇಶಿಸಿದ್ದ ಶೀತಲ್‌ಗೆ ಎಲ್ಲ ದಿಕ್ಕಿನಿಂದಲೂ ಪ್ರಶಂಶೆಯ ಸುರಿಮಳೆಯಾಗಿತ್ತು. ಅದಾಗುತ್ತಲೇ ಇನ್ನು ಸಿನಿಮಾ ನಿರ್ದೇಶನಕ್ಕಿಳಿಯಬಹುದೆಂಬ ಭರವಸೆ ಅವರೊಳಗೆ ಮೂಡಿಕೊಂಡಿತ್ತು.

2020ರ ಸುಮಾರಿಗೆ ಒಂದು ಪ್ರತಿಭಾವಂತ ಸಿನಿಮಾ ವ್ಯಾಮೋಹಿಗಳ ತಂಡ ಕಟ್ಟಿಕೊಂಡ ಶೀತಲ್ ವಿಂಡೋ ಸೀಟ್ ಚಿತ್ರೀಕರಣಕ್ಕೆ ಚಾಲನೆ ನೀಡಿದ್ದರು. ಆ ಹೊತ್ತಿನಲ್ಲಿ ಬಂದೆರಗಿದ ಕೊರೋನಾ ಎಂಬ ದುಷ್ಟ ವೈರಸ್ಸು ಒಂದಷ್ಟು ಹಿನ್ನಡೆ ಉಂಟು ಮಾಡಿದ್ದದ್ದು ನಿಜ. ಆದರೆ ಶೀತಲ್ ಅದ್ಯಾವುದಕ್ಕೂ ತಲೆಕೆಡಿಸಿಕೊಳ್ಳದೆ ಚಿತ್ರೀಕರಣ ಮಾಡಿ ಮುಗಿಸಿಕೊಂಡಿದ್ದಾರೆ. ಮರ್ಡರ್ ಮಿಸ್ಟ್ರಿ ಹಾಗೂ ರೊಮ್ಯಾಂಟಿಕ್ ಥ್ರಿಲ್ಲರ್ ಗುಣಗಳನ್ನು ಹೊಂದಿರುವ ಈ ಜಾನರ್ ಕನ್ನಡದ ಮಟ್ಟಿಗೆ ತುಂಬಾನೇ ಅಪರೂಪದ್ದು. ಒಂದು ಅದ್ಭುತ ಪ್ರೇಮಕಾವ್ಯದೊಂದಿಗೆ, ಮರ್ಡರ್ ಮಿಸ್ಟ್ರಿ ಕಥೆ ಹೇಳ ಹೊರಟಿರುವ ಶೀತಲ್ ಶೆಟ್ಟಿ ಅವರಿಗೆ ಅಭೂತಪೂರ್ವವಾದ ಗೆಲುವು ದಕ್ಕುವ ಭರವಸೆಯಿದೆ. ಮುಂದಿನ ದಿನಗಳಲ್ಲಿ ನಿರ್ದೇಶಕಿಯಾಗಿ ಮುಂದುವರೆಯ ಬೇಕೆಂಬ ನಿರ್ಧಾರ ತಳೆದಿರುವ ಅವರಿಗೆ, ಈ ಚಿತ್ರದ ಮೂಲಕ ತಮ್ಮ ಪ್ರತಿಭೆಯನ್ನು ಸಾಬೀತುಪಡಿಸಿಕೊಳ್ಳುವ ದರ್ದೂ ಇದೆ. ಒಟ್ಟಾರೆಯಾಗಿ ಶಿವಮೊಗ್ಗೆಯ ಈ ಹುಡುಗಿ ನಿರ್ದೇಶಕಿಯಾಗಿ ನೆಲೆ ಕಂಡುಕೊಳ್ಳಲಿ, ವಿಂಡೋಸೀಟ್‌ಗೆ ರೋಮಾಂಚಕ ಗೆಲುವು ದಕ್ಕಲೆಂಬುದು ಹಾರೈಕೆ!

The post ನಿರ್ದೇಶಕಿಯಾಗಿ ನೆಲೆಯೂರಬಹುದೇ ಶಿವಮೊಗ್ಗೆಯ ಹುಡುಗಿ? appeared first on ಶೋಧ ನ್ಯೂಸ್ - Shodha News.

ಶೀತಲ್ ಶೆಟ್ಟಿ ನಿರ್ದೇಶನದ ಚೊಚ್ಚಲ ಚಿತ್ರ ವಿಂಡೋ ಸೀಟ್ ಬಿಡುಗಡೆಗೆ ಕ್ಷಣಗಣನೆ ಆರಂಭವಾಗಿದೆ. ಒಂದು ಕಾಲದಲ್ಲಿ ಟಿವಿ೯ ನಿರೂಪಕಿಯಾಗಿದ್ದುಕೊಂಡು ಸ್ಪಷ್ಟ ಕನ್ನಡದ ಮೂಲಕವೇ ಎಲ್ಲರ ಮನಗೆದ್ದಿದ್ದ ಶೀತಲ್, ಇದೀಗ ನಿರ್ದೇಶಕಿಯಾಗಿಯೂ ನೆಲೆ ಕಂಡುಕೊಳ್ಳುವ ಸನ್ನಾಹದಲ್ಲಿದ್ದಾರೆ. ಹಾಗೆ ನೋಡಿದರೆ ಕನ್ನಡದಲ್ಲಿ ಮಹಿಳಾ ನಿರ್ದೇಶಕಿಯರ ಸಂಖ್ಯೆ ತೀರಾ ಕಡಿಮೆ ಇದೆ. ಆ ಸಾಲಿನಲ್ಲಿ ಶೀತಲ್ ಭದ್ರವಾಗಿ ನೆಲೆ ಕಂಡುಕೊಳ್ಳುವ ಮುನ್ಸೂಚನೆ ಈಗಾಗಲೇ ಸಿಕ್ಕಿ ಬಿಟ್ಟಿದೆ. ಟ್ರೈಲರ್, ಟೀಸರ್‌ಗಳ ಮೂಲಕ ವಿಂಡೋ ಸೀಟ್ ಒಂದು ವಿಭಿನ್ನ ಚಿತ್ರವೆಂಬ ಸುಳಿವು ಈಗಾಗಲೇ ಎಲ್ಲರಿಗೂ ಸಿಕ್ಕಿದೆ. ಅತ್ತ ಪ್ರೀಮಿಯರ್ ಶೋಗೆ ಸಿಕ್ಕಿರುವ ಭರಪೂರ ಪ್ರತಿಕ್ರಿಯೆ, ಇತ್ತ ಪ್ರೇಕ್ಷಕ ವಲಯದಲ್ಲಿ ಮಿರುಗುತ್ತಿರುವ ಗಾಢ ನಿರೀಕ್ಷೆಗಳೆಲ್ಲವೂ ಸೇರಿಕೊಂಡು ನಿರ್ದೇಶಕಿಯಾಗಿ ಶೀತಲ್ ಹಾದಿಯನ್ನು ಸುಗಮಗೊಳಿಸುವಂಥಾ ವಾತಾವರಣವಿದೆ.

ಈ ಸಿನಿಮಾ ಮೂಲಕ ಶೀತಲ್ ಶೆಟ್ಟಿ ನಿಜಕ್ಕೂ ಪ್ರೇಕ್ಷಕರಿಗೆ ಕೊರೋನಾ ಕಾಲದಲ್ಲೊಂದು ಸರ್‌ಪ್ರೈಸ್ ಕೊಟ್ಟಿದ್ದರು. ೨೦೨೦ರ ಸುಮಾರಿಗೆ ಆರಂಭವಾಗಿದ್ದ ಈ ಚಿತ್ರ ಸಾಕಷ್ಟು ಅಡತಡೆಗಳನ್ನು ಮೀರಿಕೊಂಡು ಚಿತ್ರೀಕರಣ ಮುಗಿಸಿಕೊಂಡಿದ್ದೇ ಒಂದು ಸಾಹಸ. ಓರ್ವ ನಿರ್ದೇಶಕಿಯಾಗಿ ಮೊದಲ ಹೆಜ್ಜೆಯಲ್ಲಿಯೇ ಬಂದೆರಗಿದ ಅಂಥಾ ಸವಾಲುಗಳನ್ನು ಶೀತಲ್ ಸಮರ್ಥವಾಗಿಯೇ ಎದುರಿಸಿದ್ದಾರೆ. ರಂಗಿತರಂಗ ಖ್ಯಾತಿಯ ನಿರೂಪ್ ಭಂಡಾರಿ ನಾಯಕನಾಗಿ ನಟಿಸಿರುವ ಈ ಚಿತ್ರದಲ್ಲಿ ಅಮೃತಾ ಅಯ್ಯಂಗಾರ್ ಮತ್ತು ಸಂಜನಾ ಆನಂದ್ ನಾಯಕಿಯರಾಗಿ ನಟಿಸಿದ್ದಾರೆ. ಕಥೆಯ ಭಾವಕ್ಕೆ ತಕ್ಕಂತೆ ತವರು ನೆಲ ಸಾಗರದ ಸುತ್ತಮುತ್ತ ಶೀತಲ್ ಚಿತ್ರೀಕರಣವನ್ನೂ ನಡೆಸಿದ್ದಾರೆ. ತಾಳಗುಪ್ಪದಿಂದ ತೆರೆದುಕೊಳ್ಳುವ ಈ ಮೋಹಕ ಜರ್ನಿಯ ಕಥಾನಕ ಈಗಾಗಲೇ ಎಲ್ಲರ ಮನಸುಗಳಲ್ಲಿಯೂ ತೀವ್ರ ಕುತೂಹಲವೊಂದನ್ನು ಪ್ರತಿಷ್ಟಾಪಿಸಿದೆ.

ಈ ಹಿಂದಿನ ಎರಡು ಕಿರುಚಿತ್ರಗಳು ಮತ್ತವುಗಳ ಭಾವ ತೀವ್ರತೆಯೇ ಶೀತಲ್‌ರ ನಿರ್ದೇಶನದ ಪ್ರತಿಭೆಗೆ ಕನ್ನಡಿ ಹಿಡಿದಿದ್ದವು. ಈ ಕಾರಣದಿಂದಲೇ ವಿಂಡೋ ಸೀಟಿನ ಕಥೆಯತ್ತ ಪ್ರೇಕ್ಷಕರ ಚಿತ್ತ ನೆಡುವಂತಾಗಿದೆ. ಇದು ಮರ್ಡರ್ ಮಿಸ್ಟ್ರಿಯನ್ನೊಳಗೊಂಡಿರೋ ಭಿನ್ನ ಕಥೆಯೆಂಬ ಸುಳಿವನ್ನಷ್ಟೇ ಶೀತಲ್ ಶೆಟ್ಟಿ ಇದುವರೆಗೂ ಬಿಟ್ಟು ಕೊಟ್ಟಿದ್ದಾರೆ. ಅದರೊಂದಿಗೆ ಭಾವನೆಯಗಳ ಜೀಕುವಿಕೆಯೂ ಇದ್ದೇ ಇರುತ್ತದೆ ಹಾಗೂ ಇದೊಂದು ಅಪರೂಪದ ದೃಷ್ಯಕಾವ್ಯವಾಗಿರುತ್ತದೆ ಅನ್ನೋದಕ್ಕೆ ಈ ಶೀರ್ಷಿಕೆಯೇ ಸಾಕ್ಷಿಯಾಗಿ ನಿಲ್ಲುತ್ತದೆ. ಮೊದಲ ಹೆಜ್ಜೆಯಲ್ಲಿಯೇ ಅಪರೂಪದ ಕಥೆಯೊಂದನ್ನು ದೃಷ್ಯವಾಗಿಸಿರುವ ಶೀತಲ್ ಕನ್ನಡದ ಮಟ್ಟಿಗೆ ವಿರಳವಾದ ಜಾನರ್‌ನೊಂದಿಗೆ ಪ್ರೇಕ್ಷಕರನ್ನು ತಾಕಲು ಅಣಿಯಾಗಿದ್ದಾರೆ.

ಸಾಮಾನ್ಯವಾಗಿ ಬಸ್ಸು ಹತ್ತಿದಾಗ ಬಹುತೇಕರ ಮೊದಲ ಆದ್ಯತೆ ವಿಂಡೋ ಸೀಟಾಗಿರುತ್ತೆ. ಯಾವ ಸೀಟಿನಲ್ಲಿ ಕೂತರೂ ಸೇರೋ ನಿಲ್ದಾಣವಾಗಲಿ, ತಲುಪೋ ಸಮಯವಾಗಲಿ ವ್ಯತ್ಯಾಸವಾಗೋದಿಲ್ಲ. ಅದು ಒಟ್ಟಾರೆ ಪ್ರಯಾಣಿಕರಿಗೆಲ್ಲ ಒಂದೇ. ಆದರೆ ವಿಂಡೋ ಸೀಟಿನ ಯಾನದ ಅನುಭೂತಿ ಮಾತ್ರ ಬೇರೆ ಬಗೆಯದ್ದು. ಇಂಥಾ ಭಾವನಾತ್ಮಕ ಅಂಶಗಳೊಂದಿಗೆ ಮರ್ಡರ್ ಮಿಸ್ಟರಿಯನ್ನು ಕಟ್ಟಿಕೊಟ್ಟಿರೋ ಈ ಚಿತ್ರ ಗಹನವಾದುದೇನನ್ನೋ ತನ್ನೊಡಲಲ್ಲಿ ಬಚ್ಚಿಟ್ಟುಕೊಂಡಿದೆ ಎಂಬ ಸತ್ಯ ಈಗಾಗಲೇ ಜಾಹೀರಾಗಿದೆ.

ಈ ಚಿತ್ರಕ್ಕೆ ಅರ್ಜುನ್ ಜನ್ಯಾ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಅದರ ಫಲವಾಗಿ ಹಾಡುಗಳ ಮುಂಗಾರು ಜೋರಾಗಿಯೇ ಹನಿದಿದೆ. ಅದಕ್ಕೆ ಮೈಯೊಡ್ಡಿ ಪ್ರೇಕ್ಷಕರೆಲ್ಲರೂ ಸಂಭ್ರಮಿಸಿದ್ದಾರೆ. ಇನ್ನೂ ವಿಶೇಷವೆಂದರೆ, ನಿರೂಪ್ ಭಂಡಾರಿ ಆರಂಭದಲ್ಲಿಯೇ ಈ ಕಥೆ ಕೇಳಿ ಥ್ರಿಲ್ ಆಗಿದ್ದರಂತೆ. ಇದರಲ್ಲಿನ ಪಾತ್ರ ತನಗೆ ಬೇರೆಯದ್ದೇ ಥರದ ಆವೇಗ ತಂದುಕೊಡಲಿದೆ ಎಂಬ ಭರವಸೆಯೂ ಅವರಲ್ಲಿದೆ. ಇನ್ನುಳಿದಂತೆ ಸಂಜನಾ ಮತ್ತು ಅಮೃತಾ ಅಯ್ಯಂಗಾರ್ ಪಾತ್ರವೂ ಹೊಸಾ ಥರದವುಗಳೇ ಎಂಬ ಸುಳಿವು ಈಗಾಗಲೇ ಸ್ಪಷ್ಟವಾಗಿದೆ. ಪ್ರೇಕ್ಷಕರ ತಲೆಯಲ್ಲಿ ಸುಳಿದಾಡುತ್ತಿರುವ ಕಲ್ಪನೆ ಮತ್ತು ವಿಂಡೋ ಸೀಟ್ ಆಂತರ್ಯದಲ್ಲಿರುವ ವಾಸ್ತವಗಳು ಮುಖಾಮುಖಿಯಾಗುವ ಅಮೂರ್ಥ ಘಳಿಗೆ ಇನ್ನೇನು ಹತ್ತಿರಾಗಿದೆ. ಈ ಮೂಲಕ ನಿರ್ದೇಶಕಿಯಾಗಿ ಶೀತಲ್ ಶೆಟ್ಟಿ ಪ್ರೇಕ್ಷಕರ ಮನ ಮುಟ್ಟುವುದೂ ಪಕ್ಕಾ ಆದಂತಾಗಿದೆ.

The post ಪ್ರೇಕ್ಷಕರ ಮನ ಮುಟ್ಟಲಿದ್ದಾರಾ ಶೀತಲ್ ಶೆಟ್ಟಿ? appeared first on ಶೋಧ ನ್ಯೂಸ್ - Shodha News.

ಯಾರೇ ಆದರೂ ನಿರ್ದೇಶನದಲ್ಲಿ ಮೊದಲ ಹೆಜ್ಜೆಯಲ್ಲಿಯೇ ಅಗಾಧ ಪ್ರಮಾಣದಲ್ಲಿ ಭರವಸೆ ಮೂಡಿಸೋದು ಕಡುಗಷ್ಟದ ಕೆಲಸ. ಆದರೆ ಶೀತಲ್ ಶೆಟ್ಟಿ ಮಾತ್ರ ಲೀಲಾಜಾಲವಾಗಿಯೇ ಅದನ್ನು ಸಾಧ್ಯವಾಗಿಸಿದ್ದಾರೆ. ಅದರ ಫಲವಾಗಿಯೇ ಆರಂಭದಿಂದ ಇಲ್ಲೀವಯವರೆಗೂ ಕುತೂಹಲವನ್ನು ಕಾಪಿಟ್ಟುಕೊಂಡು ಬಂದಿರುವ ವಿಂಡೋ ಸೀಟ್ ಜುಲೈ೧ರಂದು ರಾಜ್ಯಾದ್ಯಂತ ಬಿಡುಗಡೆಗೊಳ್ಳಲಿದೆ. ಈ ಹೊತ್ತಿನಲ್ಲಿ ಈ ಚಿತ್ರದ ಬಗ್ಗೆ ಮತ್ತಷ್ಟು ಮೋಹಗೊಳ್ಳುವಂತೆ ಮಾಡುವಂಥಾ ಚೆಂದದ ವೀಡಿಯೋ ಸಾಂಗ್ ಒಂದು ಇದೀಗ ಲಾಂಚ್ ಆಗಿದೆ. ಮನಸಿಗೆ ತಂಗಾಳಿ ತೀಡಿದಂತಾಗಿ, ಯಾವುದೋ ಭಾವಲೋಕದಲ್ಲಿ ಕಳೆದು ಹೋಗುವಂತೆ ಮಾಡುವ ಈ ವೀಡಿಯೋ ಸಾಂಗ್‌ಗೀಗ ವ್ಯಾಪಕ ಮೆಚ್ಚುಗೆ ಸಿಗುತ್ತಿದೆ. ಹೆಚ್ಚೆಚ್ಚು ವೀಕ್ಷಣೆಯೂ ದಕ್ಕುತ್ತಿದೆ.

ಅತಿ ಚೆಂದದ ಹೂಗೊಂಚಲು ಈ ಕಿಟಕಿಯಾಚೆ ಕಂಡಂತಿದೆ ಎಂಬ ಸಮ್ಮೋಹಕ ಸಾಲುಗಳಿಂದ ಶುರುವಾಗುವ ಈ ಹಾಡು, ದೃಷ್ಯವೈಭವ, ಸಾಹಿತ್ಯ ಮತ್ತು ಸಂಗೀತ ಸೇರಿದಂತೆ ಎಲ್ಲ ರೀತಿಯಿಂದಲೂ ಕಾಡುವಂತಿದೆ. ಈ ಹಾಡಿಗೆ ವಿಜಯ ಪ್ರಕಾಶ್ ಧ್ವನಿಯಾಗಿದ್ದಾರೆ. ಅರ್ಜುನ್ ಜನ್ಯಾ ಸಂಗೀತ ನಿರ್ದೇಶನದಲ್ಲಿ ರೂಪುತಳೆದ ಈ ಹಾಡಿಗೆ ಖ್ಯಾತ ನಿರ್ದೇಶಕ ಯೋಗರಾಜ ಭಟ್ ಸಾಹಿತ್ಯ ಒದಗಿಸಿದ್ದಾರೆ. ಒಂದು ಅಸೀಮ ವ್ಯಾಮೋಹದೊಂದಿಗೆ ಈ ಸಿನಿಮಾ ನಿರ್ದೇಶನ ಮಾಡಿರುವ ಶೀತಲ್ ಶೆಟ್ಟಿ ಪ್ರತಿಯೊಂದರಲ್ಲಿಯೂ ಪರ್ಫೆಕ್ಟ್ ಆಗಿರುವಂತೆ ನೋಡಿಕೊಂಡಿದ್ದಾರೆ. ಅದರ ಭಾಗವಾಗಿಯೇ ಯೋಗರಾಜ್ ಭಟ್ ಸಾಹಿತ್ಯ ಒದಗಿಸಿದ್ದಾರೆ.

ಈ ಯೋಗರಾಜ ಭಟ್ಟರು ಪಡ್ಡೆ ಹುಡುಗರು ಹುಚ್ಚೆದ್ದು ಕುಣಿದು ಸದಾ ಗುನುಗಿಸುವಂಥಾ ಹಾಡು ಬರೆಯೋದರಲ್ಲಿ ಸಿದ್ಧಹಸ್ತರು. ಆದರೆ ಅವರು ಪಕ್ಕಾ ಮೆಲೋಡಿ ಟ್ರ್ಯಾಕಿನಲ್ಲಿಯೂ ಆಗಾಗ ಅಚ್ಚರಿ ಮೂಡಿಸುತ್ತಾರೆ. ಅಂಥಾ ಅಪರೂಪದ ಮ್ಯಾಜಿಕ್ಕೊಂದು ಈ ವೀಡಿಯೋ ಸಾಂಗಿನಲ್ಲಿ ಸಂಭವಿಸಿದೆ. ಈ ಹಾಡಿನ ಪ್ರತೀ ಫಲುಕುಗಳಿಗೂ ಮಲೆನಾಡಿನ ಘಮವಿದೆ. ತಾಳಗುಪ್ಪದ ಸುಂದರ ವಾತಾವರಣದಿಂದ ತೆರೆದುಕೊಳ್ಳು ಈ ಹಾಡು ನಿಮ್ಮನ್ನು ಸೀದಾ ಪ್ರೇಮಲೋಕಕ್ಕೆ ಕೈ ಹಿಡಿದು ಕರೆದೊಯ್ಯುತ್ತದೆ. ಅದರ ಜೊತೆ ಜೊತೆಗೇ ವಿಂಡೋ ಸೀಟ್‌ನ ಬಗ್ಗೆ ಮತ್ತೊಮ್ಮೆ ಮೋಹಗೊಳ್ಳುವಂತೆ ಮಾಡುತ್ತದೆ.

ಈ ಹಾಡೂ ಕೂಡಾ ಶೀತಲ್ ಶೆಟ್ಟಿ ನಿರ್ದೇಶಕಿಯಾಗಿ ಗಟ್ಟಿಯಾಗಿ ನೆಲೆ ಕಂಡುಕೊಳ್ಳುತ್ತಾರೆಂಬುದನ್ನು ಸಾಕ್ಷೀಕರಿಸುವಂತಿದೆ. ಇಂಥಾ ಭರವಸೆ, ನಿರೀಕ್ಷೆಗಳ ಒಡ್ಡೋಲಗದಲ್ಲಿ ವಿಂಡೋ ಸೀಟ್ ಜಯಲೈ ೧ರಂದು ತೆರೆಗಾಣುತ್ತಿದೆ. ಈ ಚಿತ್ರವನ್ನು ಕೆಎಸ್‌ಕೆ ಶೋ ರೀಲ್ ಬ್ಯಾನರಿನಡಿಯಲ್ಲಿ ಜಾಕ್ ಮಂಜು ನಿರ್ಮಾಣ ಮಾಡಿದ್ದಾರೆ. ಈ ಚಿತ್ರದಲ್ಲಿ ನಿರೂಪ್ ಭಂಡಾರಿ, ಸಂಜನಾ ಆನಂದ್, ಅಮೃತ ಅಯ್ಯಂಗಾರ್ ನಾಯಕ ನಾಯಕಿಯರಾಗಿ ನಟಿಸಿದ್ದಾರೆ. ರವಿಶಂಕರ್, ಮಧುಸೂಧನ್ ರಾವ್, ಲೇಖಾ ನಾಯ್ಡು, ಸೂರಜ್ ಮುಂತಾದವರ ತಾರಾಗಣ, ಅರ್ಜುನ್ ಜನ್ಯಾ ಸಂಗೀತ, ರಿತ್ವಿಕ್ ಸಂಕಲನ, ವೀರೇಶ್ ಶಿವಮೂರ್ತಿ ಸಂಭಾಷಣೆ ಈ ಚಿತ್ರಕ್ಕಿದೆ.

The post ಚೆಂದದ ವೀಡಿಯೋ ಸಾಂಗ್‌ನೊಂದಿಗೆ ಬಂದರು ನೋಡಿ ಶೀತಲ್! appeared first on ಶೋಧ ನ್ಯೂಸ್ - Shodha News.

ಮುದ್ದಾದ ಪ್ರೇಮಕಥೆ ಬೆರೆತ ಮರ್ಡರ್ ಮಿಸ್ಟ್ರಿ?
ಶೀತಲ್ ಶೆಟ್ಟಿ ನಿರ್ದೇಶನದ ವಿಂಡೋ ಸೀಟ್ ಚಿತ್ರದ ಟ್ರೈಲರ್ ಬಿಡುಗಡೆಯಾಗಿದೆ. ಈ ಮೂಲಕ ಸುದೀರ್ಘವಾದೊಂದು ನಿರೀಕ್ಷೆ ನಿರ್ಣಾಯಕ ಘಟ್ಟ ತಲುಪಿಕೊಂಡಂತಾಗಿದೆ. ಅಷ್ಟಕ್ಕೂ ಇದುವರೆಗೂ ಕೂಡಾ ಕೌತುಕದ ಕಾವು ಒಂದಿನಿತೂ ಆರದಂತೆ ಶೀತಲ್ ಶೆಟ್ಟಿ ಜಾಣ್ಮೆಯಿಂದಲೇ ಸಾಗಿ ಬಂದಿದ್ದಾರೆ. ಫಸ್ಟ್ ಲುಕ್, ಮೇಕಿಂಗ್ ವೀಡಿಯೋ, ಟೀಸರ್, ಹಾಡು ಅಂತೆಲ್ಲ ನಿರೀಕ್ಷೆಯೆಂಬುದು ನಿಗಿನಿಗಿಸುವಂತೆ ಮಾಡಿದ್ದಾರೆ. ಇತ್ತೀಚೆಗಷ್ಟೇ ಟ್ರೈಲರ್ ಪ್ರೋಮೋ ಮೂಲಕ ಟಾಕ್ ಕ್ರಿಯೇಟ್ ಮಾಡಿದ್ದ ಶೀತಲ್ ಇದೀಗ ಚೆಂದದ ಟ್ರೈರಲ್ ಅನ್ನು ಲಾಂಚ್ ಮಾಡಿದ್ದಾರೆ.

ಮಳೆ, ನಾಯಕನನ್ನು ಆವರಿಸಿಕೊಂಡ ದುಃಖದ ಕಾರ್ಮೋಡ, ನನಗೇ ಯಾಕೆ ಪದೇ ಪದೆ ಹೀಗಾಗುತ್ತದೆಂಬಂಥಾ ಯಾತನೆ ಮತ್ತು ಶೀತಲ್ ಶೆಟ್ಟಿಯವರ ಹಿನ್ನೆಲೆಯ ನಿರೂಪಣೆಯೊಂದಿಗೆ ಸಾಗುವ ಈ ಟ್ರೈಲರ್ ನಾನಾ ದಿಕ್ಕಿನಲ್ಲಿ ಈ ಕಥೆಯ ಬಗ್ಗೆ ಆಲೋಚಿಸುವಂತೆ ಮಾಡಿದೆ. ಇದರ ಜೊತೆ ಜೊತೆಗೇ ಮುದ್ದಾದೊಂದು ಪ್ರೇಮ ಕಥಾನಕ ಸುಳಿವಿನೊಂದಿಗೆ, ಇದು ರೋಚಕವಾಗಿ ಸಾಗುವ ಮರ್ಡರ್ ಮಿಸ್ಟ್ರಿ ಇರಬಹುದಾ ಎಂಬ ದಿಕ್ಕಿನಲ್ಲಿಯೂ ಆಲೋಚನೆಗೆ ಹಚ್ಚಿದೆ. ಅದೆಲ್ಲಕ್ಕಿಂತಲೂ ಮಿಗಿಲಾಗಿ ಶೀತಲ್ ಮೊದಲ ಪ್ರಯತ್ನದಲ್ಲಿಯೇ ಪಳಗಿದ ನಿರ್ದೇಶಕಿಯಂತೆ ಇಲ್ಲಿನ ದೃಷ್ಯಗಳನ್ನು ಹ್ಯಾಂಡಲ್ ಮಾಡಿರುವುದು ಎದ್ದು ಕಾಣುತ್ತದೆ. ಈ ಮೂಲಕ ಅವರು ನಿಜಕ್ಕೂ ಭರವಸೆ ಮೂಡಿಸಿದ್ದಾರೆ.

ಆರಂಭದಲ್ಲಿ ಲಾಂಚ್ ಆಗಿದ್ದ ಫಸ್ಟ್ ಲುಕ್‌ನಲ್ಲಿಯೇ ಒಂದಷ್ಟು ಅಂಶಗಳು ಪ್ರೇಕ್ಷಕರನ್ನ ತಲುಪಿಕೊಂಡಿದ್ದವು. ಆ ಘಳಿಗೆಯಲ್ಲಿ ಶೀಘ್ರದಲ್ಲಿಯೇ ಟ್ರೈಲರ್ ಲಾಂಚ್ ಮಾಡೋದಾಗಿಯೂ ನಿರ್ದೇಶಕಿ ಶೀತಲ್ ಶೆಟ್ಟಿ ಹೇಳಿಕೊಂಡಿದ್ದರು. ಅದರ ಬೆನ್ನಲ್ಲಿಯೇಕಿಚ್ಚ ಕ್ರಿಯೇಷನ್ಸ್ ಯೂಟ್ಯೂಬ್ ಚಾನೆಲ್‌ನಲ್ಲಿ ವಿಂಡೋ ಸೀಟ್‌ನ ಮಸ್ತ್ ಆಗಿರೋ ಮೇಕಿಂಗ್ ವೀಡಿಯೋ ಕೂಡಾ ಬಿಡುಗಡೆಗೊಂಡಿತ್ತು. ಅದರಲ್ಲಿ ಸದರಿ ಸಿನಿಮಾ ಬಗೆಗಿನ ಮತ್ತೊಂದಷ್ಟು ರಸವತ್ತಾದ ಹೊಳಹುಗಳು ಜಾಹೀರಾಗಿದ್ದವು. ಆ ನಂತರವೂ ಅದೇ ಬಿಸಿಯನ್ನು ಕಾಪಿಟ್ಟುಕೊಂಡು ಬಂದಿದ್ದ ವಿಂಡೋ ಸೀಟ್ ಒಂದಲ್ಲೊಂದು ರೀತಿಯಲ್ಲಿ ಸದಾ ಸುದ್ದಿ ಕೇಂದ್ರದಲ್ಲಿತ್ತು. ಹಾಗೆ ಸಾಗಿ ಬಂದು ಬಹು ನಿರೀಕ್ಷಿತ ಚಿತ್ರವಾಗಿಯೂ ಬಿಂಬಿಸಲ್ಪಟ್ಟಿತ್ತು. ಅದನ್ನು ಈಗ ಬಿಡುಗಡೆಗೊಂಡಿರೋ ಟ್ರೈಲರ್ ತೀವ್ರವಾಗಿಸಿದೆ.

ಕೊರೋನೋತ್ತರ ಕಾಲದಲ್ಲಿ ಚಿತ್ರರಂಗಕ್ಕೆ ಹೊಸಾ ಆವೇಗ ನೀಡಬಲ್ಲ ಭರವಸೆ ಮೂಡಿಸಿರುವ ಒಂದಷ್ಟು ಸಿನಿಮಾಗಳಿದ್ದಾವೆ. ಆ ಯಾದಿಯಲ್ಲಿ ಜಾಕ್ ಮಂಜು ನಿರ್ಮಾಣದಲ್ಲಿ ಮೂಡಿ ಬಂದಿರುವ ವಿಂಡೋ ಸೀಟ್ ಖಂಡಿತಾ ಪ್ರಧಾನವಾಗಿ ಸೇರಿಕೊಳ್ಳುತ್ತದೆ. ಇದೀಗ ಲಾಂಚ್ ಆಗಿರೋ ಟ್ರೈಲರ್‌ನಲ್ಲಿ ವಿಂಡೋ ಸೀಟ್‌ನ ಕಥಾ ಹಂದರದ ಝಲಕ್‌ಗಳೂ ಕೂಡಾ ಸ್ಪಷ್ಟವಾಗಿ ಕಾಣಿಸಿದೆ. ಒಂದೊಳ್ಳೆ ರೊಮ್ಯಾಂಟಿಕ್ ಕ್ರೈಂ ಥ್ರಿಲ್ಲರ್ ಕಥಾನಕವನ್ನು ಶೀತಲ್ ಶೆಟ್ಟಿ ಕಟ್ಟಿ ಕೊಟ್ಟಿದ್ದಾರೆಂಬುದೂ ಸ್ಪಷ್ಟವಾಗಿದೆ. ಅದಲ್ಲದೇ ನಿರೂಪ್ ಭಂಡಾರಿ ಇಲ್ಲಿ ಯಾವ್ಯಾವ ಗೆಟಪ್ಪುಗಳಲ್ಲಿ ಕಾಣಿಸಿಕೊಂಡಿದ್ದಾರೆಂಬ ಪ್ರೇಕ್ಷಕರ ಕ್ಯೂರಿಯಾಸಿಟಿ ಕೂಡಾ ಕೊಂಚ ತಣಿದಂತಾಗಿದೆ. ಒಟ್ಟಾರೆಯಾಗಿ ಈ ಟ್ರೈಲರ್ ವಿಂಡೋ ಸೀಟ್ ಅನ್ನು ಕಣ್ತುಂಬಿಕೊಳ್ಳಲು ತದೇಕಚಿತ್ತದಿಂದ ಕಾಯುವಂತೆ ಮಾಡುವಷ್ಟು ಶಕ್ತವಾಗಿ ಮೂಡಿ ಬಂದಿದೆ.

The post ವಿಂಡೋ ಸೀಟ್ ಟ್ರೈಲರ್: ಮಳೆಯ ಹಿಮ್ಮೇಳದಲ್ಲಿ ಮನಸಿಗೆ ಮೆತ್ತಿಕೊಂಡ ನೆತ್ತರ ಛಾಯೆ! appeared first on ಶೋಧ ನ್ಯೂಸ್ - Shodha News.