ಕೆಜಿಎಫ್ (kgf) ಸರಣಿ ಗೆಲುವಿನ ನಂತರದಲ್ಲಿ ರಾಕಿಂಗ್ ಸ್ಟಾರ್ ಯಶ್ (yash) ಇಂಟರ್‍ನ್ಯಾಷನಲ್ ಸ್ಟಾರ್ ಆಗಿ ಬಿಟ್ಟಿದ್ದಾರೆ. ಸದ್ಯಕ್ಕೀಗ ಅವರ ಮುಂದಿನ ನಡೆಯೇನೆಂಬುದರ ಸುತ್ತಾ ಸಿನಿಮಾ ಪ್ರೇಮಿಗಳ ಚರ್ಚೆಗಳು ಚಾಲ್ತಿಯಲ್ಲಿವೆ. ಒಂದು ಕಡೆಯಿಂದ ಯಶ್ ಕೆಜಿಎಫ್ (kgf3) ಮೂರನೇ ಭಾಗಕ್ಕೆ ತಯಾರಿ ನಡೆಸುತ್ತಿದ್ದಾರೆಂಬ ಸುದ್ದಿ ಕೇಳಿ ಬರುತ್ತಲೇ, ಮತ್ತೊಂದು ಕಡೆಯಿಂದ ಇನ್ನು ಆ ಸರಣಿ ಸಾಕು ಎಂಬಂಥಾ ಮಾತುಗಳೂ ಕೇಳಿ ಬರುತ್ತಿವೆ. ಆದರೂ ಕೂಡಾ ರಾಕಿ ಭಾಯ್‍ಗೆ ಡಾರ್ಕ್ ಶೇಡಿನ ನಶೆ ಇಳಿದಂತೆ ಕಾಣಿಸುತ್ತಿಲ್ಲ. ಹಾಗಂತ, ಯಶ್‍ಗೆ ಬೇರೆ ಅವಕಾಶಗಳ ಕೊರತೆ ಇದೆ ಅಂತಲೂ ಅಲ್ಲ. ಹೊಸಾ ಸಿನಿಮಾದ ವಿಚಾರದಲ್ಲಿ ಅದೆಂಥಾದ್ದೇ ಜಗ್ಗಾಟ ನಡೆದರೂ ಯಶ್ ಮೇಲೆರುವ ಕ್ರೇಜ್ ಮಾತ್ರ ಒಂದಿನಿತೂ ಕಡಿಮೆಯಾಗಿಲ್ಲ!

ಒಂದು ಕಾಲದಲ್ಲಿ ಪರಭಾಷೆಗಳಲ್ಲಿ ಪ್ರಸಿದ್ಧಿ ಪಡೆದ ನಟಿಯರನ್ನು ಕನ್ನಡಕ್ಕೆ ಕರೆತರುವ ಸರ್ಕಸ್ಸುಗಳಾಗುತ್ತಿದ್ದವು. ಆದರೆ, ಅಂಥಾ ನಟಯರನ್ನು ಕರೆತರೋದು ಹೆಚ್ಚಿನ ಸಂದರ್ಭದಲ್ಲಿ ಕನಸಿನ ಮಾತಾಗುತ್ತಿತ್ತು. ಆದರೀಗ ಅದೇ ಪರಭಾಷಾ ಚಿತ್ರರಂಗದ ನಂಬರ್ ಒನ್ ನಟಿಯರೆಲ್ಲ ಯಶ್‍ಗೆ ನಾಯಕಿಯಾಗಿ ಕನ್ನಡಕ್ಕೆ ಪಾದಾರ್ಪಣೆ ಮಾಡಲು ಪೈಪೋಟಿಗೆ ಬಿದ್ದು ಕಾಯಲಾರಂಭಿಸಿದ್ದಾರೆ. ಇದು ಒಂದರ್ಥದಲ್ಲಿ ರಾಕಿ ಭಾಯ್ ಕಡೆಯಿಂದ ಕನ್ನಡ ಚಿತ್ರರಂಗಕ್ಕೆ ಸಿಕ್ಕ ಕೊಡುಗೆ ಎಂದರೂ ತಪ್ಪೇನಲ್ಲ. ಈ ಕ್ಷಣದಲ್ಲಿ ಹುಡುಕಿದರೂ ಯಶ್ ಜೊತೆ ತೆರೆ ಹಂಚಿಕೊಳ್ಳುವ ಕನಸು ಹೊಂದಿರುವ ಸ್ಟಾರ್ ನಟಿಯರು ದಂಡಿ ದಂಡಿಯಾಗಿ ಕಾಣ ಸಿಗುತ್ತಾರೆ. ಆ ಸಾಲಿನಲ್ಲಿ ಮುಂಚೂಣಿಯಲ್ಲಿರುವಾಕೆ ಬಾಲಿವುಡ್ ಮಟ್ಟದಲ್ಲಿ ಮಿಂಚುತ್ತಿರುವ ಮಂಗಳೂರಿನ ಹುಡುಗಿ ಪೂಜಾ ಹೆಗ್ಡೆ!

ಮಂಗಳೂರಿನ ಹುಡುಗಿ ಪೂಜಾ ತೆಲುಗು ಚಿತ್ರರಂಗದಲ್ಲಿ ಸ್ಟಾರ್‍ಗಿರಿ ಪಡೆದುಕೊಂಡಿರುವ ನಟಿ. ಎಲ್ಲರೂ ಅವಾಕ್ಕಾಗುವಂತೆ ತೆಲುಗು ಚಿತ್ರಪ್ರೇಮಿಗಳನ್ನು ಆವರಿಸಿಕೊಂಡಿರುವ ಪೂಜಾ, ಇದೀಗ ಬಾಲಿವುಡ್ಡಿನಲ್ಲಿಯೂ ಹವಾ ಶುರುವಿಟ್ಟುಕೊಂಡಿದ್ದಾಳೆ. ಇಂಥಾ ಪೂಜಾ ಸಂಣದರ್ಶನವೊಂದರಲ್ಲಿ ತನ್ನ ಮನದಾಸೆಯನ್ನು ಹಂಚಿಕೊಂಡಿದ್ದಾಳೆ. ರಾಕಿಂಗ್ ಸ್ಟಾರ್ ಯಶ್ ಈಗ ಲೆಜೆಂಡ್ ನಟ. ಅವರೊಂದಿಗೆ ನಾಯಕಿಯಾಗಿ ನಟಿಸಲು ಕಾತರದಿಂದಿದ್ದೇನೆ ಎಂಬುದು ಪೂಜಾ ಮಾತಿನ ಸಾರಾಂಶ. ಕನ್ನಡದ ನೆಲೆಯ ನಟನೊಬ್ಬನ ಬಗ್ಗೆ ಈ ಪರಿಯಾಗಿ ಕ್ರೇಜ್ ಹಬ್ಬಿಕೊಂಡಿರುವುದಿದೆಯಲ್ಲಾ? ಅದು ನಿಜಕ್ಕೂ ಕನ್ನಡಿಗರೆಲ್ಲರೂ ಹೆಮ್ಮೆ ಪಡುವಂಥಾ ಸಂಗತಿ ಅನ್ನೋದರಲ್ಲಿ ಯಾವ ಸಂದೇಹವೂ ಇಲ್ಲ!

The post pooja hegde: ರಾಕಿ ಬಾಯ್ ಬಗ್ಗೆ ಮಂಗಳೂರು ಹುಡುಗಿ ಹೇಳಿದ್ದೇನು? appeared first on ಶೋಧ ನ್ಯೂಸ್ - Shodha News.

ಕನ್ನಡ ಸಿನಿಮಾಗಳು ಸೀಮಿತ ಪರಿಧಿಯಲ್ಲಿ ಗಿರಕಿ ಹೊಡೆಯುತ್ತಿದ್ದ ಘಳಿಗೆಯಲ್ಲಿ, ಎಲ್ಲೆ ಮೀರಿ ಹಬ್ಬಿಕೊಂಡು ವಿಶ್ವ ಮಟ್ಟದಲ್ಲಿ ಗೆದ್ದಿದ್ದ ಚಿತ್ರ ಕೆಜಿಎಫ್. ಈ ಗೆಲುವಿನ ಹಿಂದೆ ನಿರ್ದೇಶಕ ಪ್ರಶಾಂತ್ ನೀಲ್ ಸೇರಿದಂತೆ ಒಂದಿಡೀ ತಂಡದ ಶ್ರಮವಿದೆ. ಆದರೆ, ಅಂಥಾದ್ದೊಂದು ಪವಾಡಸದೃಶ ಗೆಲುವು ಸಾಧ್ಯವಾಗಿದ್ದರಲ್ಲಿ ರಾಕಿಂಗ್ ಸ್ಟಾರ್ ಯಶ್ ಪಾತ್ರ ಪ್ರಧಾನವಾಗಿದೆ. ಈ ಮೂಲಕ ಅತ್ಯಂತ ಕಡುಗಷ್ಟದಿಂದ ಬಂದ ಹುಡುಗನೊಬ್ಬ, ವಿಶ್ವವೇ ನಿಬ್ಬರಗಾಗುವಂತೆ ಬೆಳೆದುನಿಲ್ಲ ಬಲ್ಲ ಎಂಬುದಕ್ಕೆ ಯಶ್ ಸಜೀವ ಉದಾಹರಣೆಯಾಗಿ ನಿಂತಿದ್ದಾರೆ. ಕನಸು ಬಿಟ್ಟರೆ ಬೇರೇನೂ ದಿಕ್ಕಿಲ್ಲದ ಕೋಟಿ ಜೀವಗಳ ಕಣ್ಣುಗಳಲ್ಲಿ ಭರವಸೆಯ ಮಿಂಚೊಂದು ಹೊಳೆಯುವಂತೆ ಮಾಡಿದ್ದಾರೆ. ಈ ನಿಟ್ಟಿನಲ್ಲಿ ಯಶ್ ನಡೆದು ಬಂದ ರೀತಿ, ಪರಿಶ್ರಮದಿಂದಲೇ ಏರಿರುವ ಎತ್ತರ ಸಾರ್ವಕಾಲಿಕ ಸ್ಫೂರ್ತಿ.

ಕೆಜಿಎಫ್ ಚಿತ್ರೀಕರಣವಾಗುತ್ತಿದ್ದ ಘಳಿಗೆಯಲ್ಲಿದ್ದ ವಾತಾವರಣವನ್ನೊಮ್ಮೆ ರಿವೈಂಡ್ ಮಾಡಿಕೊಳ್ಳಿ. ಆಗ ಪ್ಯಾನಿಂಡಿಯಾ ಅಂತೊಂದು ಪದವೇ ಅಸಾಧ್ಯವೆಂಬಂತೆ ಭಾಸವಾಗುತ್ತಿತ್ತು. ಇದೆಲ್ಲದರ ನಡುವೆ ಯಶ್, ಇಡೀ ಭಾರತವೇ ತಿರುಗಿ ನೋಡುವಂಥಾ ಸಿನಿಮಾ ಮಾಡಬೇಕು, ಕನ್ನಡ ಚಿತ್ರರಂಗವನ್ನು ಉತ್ತುಂಗಕ್ಕೇರಿಸಬೇಕೆಂಬಂಥಾ ಸ್ಫೂರ್ತಿಯ ಮಾತಾಡುತ್ತಿದ್ದರು. ಆ ಕಾಲಕ್ಕದು ಕೆಲಮಂದಿಗೆ ಆಗದ ಕೆಲಸವೆಂಬಂತೆಯೂ, ಮತ್ತೆ ಕೆಲವರಿಗೆ ಅಹಮ್ಮಿಕೆಯ ಮಾತಿನಂತೆಯೂ ಭಾಸವಾಗಿದ್ದರಲ್ಲಿ ಅಚ್ಚರಿ ಪಡುವಂಥಾದ್ದೇನೂ ಇಲ್ಲ. ವರ್ಷಗಟ್ಟಲೆ ಚಿತ್ರೀಕರಣಗೊಂಡಿದ್ದ ಕೆಜಿಎಫ್ ಬಗ್ಗೆ ನಕಾರಾತ್ಮಕ ರೂಮರ್‍ಗಳು ಹಬ್ಬಿಕೊಂಡಿದ್ದವೇ ಹೊರತು, ಅದು ದೊಡ್ಡ ಮಟ್ಟದಲ್ಲಿ ಗೆಲುವು ಕಾಣುತ್ತದೆಂಬ ನಂಬಿಕೆ ಯಾರೆಂದರೆ ಯಾರಿಗೂ ಇರಲಿಲ್ಲ. ಆದರೆ, ಅದು ಬಿಡುಗಡೆಗೊಂಡ ನಂತರ ಸೃಷ್ಟಿಯಾಗಿದ್ದ ಕ್ರೇಜ್, ಪರಭಾಷಿಕರೇ ದಿಗ್ಭ್ರಾಂತರಾಗಿ ಕನ್ನಡ ಚಿತ್ರರಂಗದತ್ತ ದಿಟ್ಟಿಸಿದ ಪರಿಯೆಲ್ಲವೂ ಐತಿಹಾಸಿಕ ವಿದ್ಯಮಾನಗಳೇ.

ಅದಾದ ನಂತರ ತೆರೆಕಂಡ ಕೆಜಿಎಫ್ ಚಾಪ್ಟರ್2 ಕೂಡಾ ಅಂಥಾದ್ದೇ ಅದ್ಭುತ ಗೆಲುವು ದಾಖಲಿಸಿದೆ. ಅದಾಗಿ ಹತ್ತತ್ತಿರ ವರ್ಷ ಕಳೆಯುತ್ತಾ ಬಂದಿದೆ. ಆದರೆ ರಾಕಿಂಗ್ ಸ್ಟಾರ್ ಯಶ್ ಅವರ ಮುಂದಿನ ಚಿತ್ರ ಯಾವುದು? ಅದನ್ನು ಯಾರು ನಿರ್ದೇಶನ ಮಾಡಲಿದ್ದಾರೆ ಅಂತೆಲ್ಲ ಸಾವಿರ ಪ್ರಶ್ನೆಗಳು ಹುಟ್ಟಿಕೊಂಡಿವೆ. ಖುದ್ದು ಯಶ್ ಅಭಿಮಾನಿಗಳೇ ಅದಕ್ಕೆಲ್ಲ ಉತ್ತರದ ನಿರೀಕ್ಷೆಯಲ್ಲಿದ್ದಾರೆ. ಆದರೆ, ಯಶ್ ಕಡೆಯಿಂದ ಈ ವರೆಗೂ ಮುಂದಿನ ನಡೆಯ ಬಗ್ಗೆ ಸಣ್ಣದೊಂದು ಸುಳಿವೂ ಜಾಹೀರಾಗಿರಲಿಲ್ಲ. ಅಂತೂ ಹೊಸಾ ವರ್ಷ ಕಣ್ಣಳತೆಯಲ್ಲಿ ಕಣ್ಣು ಮಿಟುಕಿಸುತ್ತಿರುವ ಈ ಘಳಿಗೆಯಲ್ಲಿ ಶುಭ ಸುದ್ದಿಯೊಂದು ಹೊರಬಿದ್ದಿದೆ.

ಅದರನ್ವಯ ಹೇಳೋದಾದರೆ, ಮುಂದಿನ ವರ್ಷದ ಮೊದಲ ವಾರದಲ್ಲಿಯೇ ಯಶ್ ತಮ್ಮ ಮುಂದಿನ ಸಿನಿಮಾ ಬಗ್ಗೆ ಖುದ್ದಾಗಿ ಮಾತಾಡಲಿದ್ದಾರೆ. ತಾವು ಒಪ್ಪಿಕೊಂಡಿರೋ ಹೊಸಾ ಸಿನಿಮಾದ ಬಗ್ಗೆ ಒಂದಷ್ಟು ಇಂಟರೆಸ್ಟಿಂಗ್ ವಿಚಾರಗಳನ್ನು ಹಂಚಿಕೊಳ್ಳಲಿದ್ದಾರೆ. ಹಾಗೆ ಯಶ್ ಜಾಹೀರು ಮಾಡಲಿರುವ ಪ್ರತೀ ಅಂಶಗಳೂ ಕೂಡಾ ದೇಶ ಮಟ್ಟದಲ್ಲಿ ಸಂಚಲನ ಸೃಷ್ಟಿಸಲಿದ್ದಾವೆ. ಯಶ್ ಮುಂದಿನ ನಡೆ ಈಗ ಹಬ್ಬಿಕೊಂಡಿರುವ ಎಲ್ಲ ಅಂತೆಕಂತೆಗಳನ್ನೂ ತಲೆ ಕೆಳಗೆ ಮಾಡಲಿದ್ದಾವೆ. ಈ ವರ್ಷ ಒಂದು ಸುದೀರ್ಘ ಗ್ಯಾಪ;ಇನಲ್ಲಿ ನಿರಾಶರಾಗಿರುವ ಅಭಿಮಾನಿಗಳಿಗೆ, ಮುಂದಿನ ವರ್ಷವನ್ನು ಹಬ್ಬವಾಗಿಸುವಂಥಾ ಎಲ್ಲ ತಯಾರಿಗಳನ್ನೂ ಯಶ್ ಮಾಡಿಕೊಂಡಿದ್ದಾರೆ.

ಹಾಗೆ ನೋಡಿದರೆ, ಯಶ್‍ಗೇನೂ ಅವಕಾಶಗಳಿಗೆ ಬರವಿಲ್ಲ. ಈ ಕ್ಷಣಕ್ಕೂ ಬಾಲಿವುಡ್ ಲೆವೆಲ್ಲಿನ ಪ್ರಖ್ಯಾತ ನಿರ್ಮಾಣ ಸಂಸ್ಥೆಗಳು ಬೆಂಬಿಡದೆ ಎಡತಾಕುತ್ತಿವೆ. ಯಶ್‍ಗಾಗಿ ಒಂದು ಸಿನಿಮಾ ನಿರ್ದೇಶನ ಮಾಡಬೇಕೆಂದು ಸ್ಟಾರ್ ನಿರ್ದೇಶಕರ ದಂಡೇ ಕಾದು ಕೂತಿದೆ. ಅತ್ತ ನೇರವಾಗಿ ಬಾಲಿವುಡ್‍ಗೆ ಹಾರೋ ವಿಪಲ ಅವಕಾಶಗಳೂ ಕೂಡಾ ಯಶ್ ಮುಂದೆ ಇದ್ದೇ ಇದ್ದಾವೆ. ಆದರೆ, ಈ ವಿಚಾರದಲ್ಲಿ ಯಶ್ ಯಾವ ಕಾರಣಕ್ಕೂ ತುರ್ತಿನಲ್ಲಿ ನಿರ್ಧಾರ ತೆಗೆದುಕೊಳ್ಳುವವರಲ್ಲ. ಕೊಂಚ ತಡವಾದರೂ ಪರವಾಗಿಲ್ಲ, ಕೆಜಿಎಫ್ ಸರಣಿಯ ಗೆಲುವನ್ನು ಮತ್ತಷ್ಟು ಆವೇಗದಿಂದ ಮುನ್ನಡೆಸಬೇಕೆಂಬ ನಿರ್ಧಾರ ಅವರದ್ದಾಗಿದೆ.

ಕೆಜಿಎಫ್‍ನಂಥಾ ಅಮೋಘ ಗೆಲುವು ಯಾವ ನಟನ ಪಾಲಿಗಾದರೂ ವಿಶೇಷವೇ. ಭಾರತೀಯ ಚಿತ್ರರಂಗದ ಮಟ್ಟಿಗೆ ಅದೊಂದು ಸಮ್ಮೋಹಕವಾದ ಗೆಲುವು. ಆದರೆ, ಆ ಗೆಲುವಿನ ಪ್ರಭೆಯನ್ನು ಮುಂದುವರೆಸಿಕೊಂಡು ಹೋಗೋದು ಕೂಡಾ ಸವಾಲಿನ ಸಂಗತಿಯೇ. ಕೊಂಚ ಯಾಮಾರಿದರೂ ಗೆಲುವಿನ ಹಾದಿಯಲ್ಲಿ ಮತ್ತೆ ಕಲ್ಲು ಮುಳ್ಳುಗಳು ಹರಡಿಕೊಳ್ಳುವ ಅಪಾಯಗಳಿರುತ್ತವೆ. ಅದೆಲ್ಲವನ್ನೂ ಮನಗಂಡೇ ಯಶ್ ಮುಂದಿನ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ. ಒಂದು ಮೂಲದ ಪ್ರಕಾರ ಅದಕ್ಕೆ ಬೇಕಾದ ಸರ್ವ ತಯಾರಿಯನ್ನೂ ಅವರೀಗಲೇ ಮಾಡಿಕೊಂಡಿದ್ದಾರೆ. ಮುಂದಿನ ವರ್ಷದ ಆರಂಭದಿಂದಲೇ ಯಶ್ ಅಭಿನಯದ ಹೊಸಾ ಸಿನಿಮಾಕ್ಕೆ ವಿದ್ಯುಕ್ತ ಚಾಲನೆ ಸಿಗಲಿದೆ. ವರ್ಷಗಟ್ಟಲೆ ಕಾದು ಕೂತಿರುವ ಅಭಿಮಾನಿಗಳ ಮುಂದೆ ಇಷ್ಟರಲ್ಲಿಯೇ ಹಬ್ಬದಂಥಾ ವಾತಾವರಣ ತೆರೆದುಕೊಳ್ಳಲಿದೆ!

The post ಯಶ್ ಅಭಿಮಾನಿಗಳಿಗೆಲ್ಲ ಹಬ್ಬವಾಗಲಿದೆ ಹೊಸಾ ವರ್ಷ! appeared first on ಶೋಧ ನ್ಯೂಸ್ - Shodha News.

ಕಾಂತಾರ ಬಂದ ನಂತರ ಹಠಾತ್ ಹವಾಮಾನ ಬದಲಾವಣೆ!
ಇಲ್ಲಿ ಯಾವುದೂ ಶಾಶ್ವತವಲ್ಲ. ಸೋಲಿನಿಂದ ಕಂಗೆಟ್ಟು ನಿಂತವರಿಗೂ ಕೂಡಾ ಸತತ ಪ್ರಯತ್ನಕ್ಕೊಂದು ಗೆಲುವು ಒಲಿಯುತ್ತೆ. ಸಿಕ್ಕ ಗೆಲುವೊಂದನ್ನು ನೆತ್ತಿಗೇರಿಸಿಕೊಂಡು ಮೆರೆಯಲು ನಿಂತರೆ ಹೀನಾಯ ಸೋಲೊಂದು ಬಡಿಗೆಯೇಟು ಕೊಡುತ್ತೆ. ಹಾಗೆ ದಕ್ಕಿದ ಒಂದು ಗೆಲುವನ್ನು ಮುದ್ದುಮಾಡಿ, ಮೆರೆದು, ವಾಸ್ತವಕ್ಕೆ ಮರಳೋದರೊಳಗಾಗಿ ಸೋಲೆಂಬುದು ಹೆಬ್ಬಾಗಿಲ ಬಳಿಯೇ ಬಂದು ನಿಲ್ಲುತ್ತೆ. ಅದಕ್ಕಾಗಿಯೇ ಗೆಲುವನ್ನು ಮ್ಯಾನೇಜು ಮಾಡೋದೂ ಒಂದು ಕಲೆ ಅಂತ ತಿಳಿದವರು ಹೇಳಿದ್ದಾರೇನೋ… ದುರಂತವೆಂದರೆ, ಗಾಢ ಬೆಳಕಿನ ಪ್ರಭೆಯಲ್ಲಿ ಮೈಮರೆಯೋ ಸಿನಿಮಾ ಜಗತ್ತಿನ ಪ್ರಬೃತ್ತಿಗಳಿಗೆ ಈ ವಾಸ್ತವ ಅರಿವಾಗೋದೇ ಇಲ್ಲ. ಸೋಲಿನ ಶೀತಲ ಹಸ್ತ ಬೆನ್ನು ಸವರೋವರೆಗೂ ಮೆರೆದಾಡುತ್ತಾರೆ. ಗೆದ್ದಷ್ಟೇ ವೇಗವಾಗಿ ಪಾತಾಳ ಕಾಣುತ್ತಾರೆ. ಇಷ್ಟನ್ನೆಲ್ಲ ಈ ಕ್ಷಣದಲ್ಲಿ ಹೇಳಲು ಕಾರಣವಾಗಿರೋದು ನಮ್ಮದೇ ಕನ್ನಡ ಚಿತ್ರರಂಗದ ಈವತ್ತಿನ ವಾತಾವರಣ!

ನೀವೆಲ್ಲ ಮರೆತಿರಲಿಕ್ಕಿಲ್ಲ; ಕೆಜಿಎಫ್ ಎಂಬೊಂದು ಚಿತ್ರ ಅದೆಂಥಾ ದಾಖಲೆ ಬರೆಯಿತೆಂಬ ರೋಚಕ ವಿದ್ಯಮಾನವನ್ನ. ಆರಂಭದಲ್ಲಿ ಕಾಡಿಬೇಡಿ ಸೀರಿಯಲ್ಲುಗಳಲ್ಲಿ ನಟಿಸುತ್ತಿದ್ದ, ಕಡುಗಷ್ಟದಿಂದಲೇ ಚಿತ್ರರಂಗದಲ್ಲಿ ನಾಯಕನಾಗಿದ್ದ ಯಶ್ ಎಂಬ ಹುಡುಗ ಕೆಜಿಎಫ್ ಮೂಲಕ ಪ್ಯಾನಿಂಡಿಯಾ ಸ್ಟಾರ್ ಆಗಿಬಿಟ್ಟಿದ್ದ. ಅದು ನಿಜಕ್ಕೂ ರೋಮಾಂಚಕ ಗೆಲುವು. ಕನ್ನಡ ಚಿತ್ರರಂಗ ಲಕ್ಷ, ಕೋಟಿಗಳ ಬಜೆಟ್ಟಿಗೇ ಏದುಸಿರು ಬಿಡುತ್ತಿದ್ದಾಗ, ಮರಳಿ ಸಿಕ್ಕ ಒಂದಷ್ಟು ಬಾಬತ್ತನ್ನೇ ಹಣೆಗೊತ್ತಿಕೊಂಡು ತೃಪ್ತಿಪಡುತ್ತಿದ್ದಾಗ, ನೂರಾರು ಕೋಟಿ ವಹಿವಾಟಿನ ರುಚಿ ತೋರಿಸಿದ್ದದ್ದು ಇದೇ ಕೆಜಿಎಫ್. ಹೀಗೊಂದು ಅಭೂತಪೂರ್ವ ಯಶಸ್ಸು ಸಿಕ್ಕುತ್ತಲೇ ಸಹಜವಾಗೆಂಬಂತೆ ಯಶ್ ವರ್ತನೆಯಲ್ಲಿ ಬದಲಾವಣೆಗಳಾಗಿದ್ದವು. ಅಂಥಾ ಮಹಾ ಗೆಲುವಿನ ಮುಂದೆ ಅದೆಲ್ಲವೂ ಗೌಣವೆಂದೇ ಅನ್ನಿಸಿದ್ದು ಸುಳ್ಳೇನಲ್ಲ.

ಆ ನಂತರದಲ್ಲಿ ಕೆಜಿಎಫ್‌ನಂಥಾ ಸಿನಿಮಾವನ್ನು ಪ್ಯಾನಿಂಡಿಯಾ ಮಟ್ಟಕ್ಕೆ ಕೊಂಡೊಯ್ಯೋ ಛಾತಿ ಇರೋದು ತನಗೊಬ್ಬನಿಗೇ ಅಂತ ಯಶ್ ಅಂದುಕೊಂಡಿದ್ದರೂ ಅಚ್ಚರಿಯೇನಿಲ್ಲ. ಅದಕ್ಕೆ ಸರಿಯಾಗಿ ಬೇರ‍್ಯಾವ ಸ್ಟಾರ್‌ಗಳೂ ಪ್ಯಾನಿಂಡಿಯಾ ಮಟ್ಟದಲ್ಲಿ ಮಿರುಗುವ ಪ್ರಯತ್ನ ಮಾಡಲಿಲ್ಲ. ಇತ್ತೀಚೆಗೆ ಬಂದಿದ್ದ ವಿಕ್ರಾಂತ್ ರೋಣ ಅಂಥಾದ್ದೊಂದು ನಿರೀಕ್ಷೆ ಮೂಡಿಸಿದ್ದದ್ದು ನಿಜ. ಈಗಾಗಲೇ ದೇಶವಿದೇಶಗಳಲ್ಲಿ ಪ್ರಸಿದ್ಧಿ ಪಡೆದಿರೋ ಸುದೀಪ್‌ಗೆ ಪ್ಯಾನಿಂಡಿಯಾ ಲೆವೆಲ್ಲಿನಲ್ಲಿ ಸದ್ದು ಮಾಡೋದು ದೊಡ್ಡ ವಿಚಾರವೇನಲ್ಲ. ಆದರೆ ಅದಕ್ಕೆ ಬೇಕಾದ ಕಥೆ, ನಿರ್ದೇಶನವೆಲ್ಲ ಸಿಕ್ಕಬೇಕಷ್ಟೇ. ಅದು ವಿಕ್ರಾಂತ್ ರೋಣನ ರೂಪದಲ್ಲಿ ಸಾಧ್ಯವಾಗುತ್ತೆ ಅಂತಲೇ ಬಹುತೇಕರು ಅಂದುಕೊಂಡಿದ್ದರು. ಆದರೆ ನಿರ್ದೇಶಕ ಅನೂಪ್ ಭಂಡಾರಿ ಮಾಡಿದ್ದೇ ಬೇರೆ. ರಂಗಿತರಂಗದ ಡಾರ್ಕ್ ವರ್ಷನ್ನಿನಂತೆ ವಿಕ್ರಾಂತ್ ರೋಣನನ್ನು ರೂಪಿಸಿಬಿಟ್ಟಿದ್ದರು. ಆ ಚಿತ್ರ ಕರ್ನಾಟಕದಲ್ಲೇ ಬರಖತ್ತಾಗಲು ಸಾಧ್ಯವಾಗಲಿಲ್ಲ.

ಯಾವಾಗ, ಯಾವ ಸಿನಿಮಾಗಳೂ ಪ್ಯಾನಿಂಡಿಯಾ ಮಟ್ಟದಲ್ಲಿ ರೀಚ್ ಆಗಲು ಸಾಧ್ಯವಾಗಿಲ್ಲವೋ, ಆವಾಗ ರಾಕಿಭಾಯ್ ತಾನೇ ಕಿಂಗು ಅಂದುಕೊಂಡಿರಲಿಕ್ಕೂ ಸಾಕು. ಆದರೆ, ಈ ನಡುವೆ ಸದ್ದೇ ಇಲ್ಲದಂತೆ ರಿಶಭ್ ಶೆಟ್ಟಿ ನಿರ್ದೇಶನದ ಕಾಂತಾರ ಚಿತ್ರ ರೆಡಿಯಾಗಿ ನಿಂತಿತ್ತು. ಆರಂಭಿಕವಾಗಿ ಕೇವಲ ಕರ್ನಾಟಕದಲ್ಲಿ ಮಾತ್ರವೇ ಬಿಡುಗಡೆಯಾಗಿದ್ದ ಕಾಂತಾರ, ಈವತ್ತಿಗೆ ಪ್ಯಾನಿಂಡಿಯಾ ಸಿನಿಮಾವಾಗಿಬಿಟ್ಟಿದೆ. ಎಲ್ಲ ಭಾಷೆಗಳಲ್ಲಿಯೂ ಅದನ್ನು ನೋಡಿದ ಮಂದಿ ಥ್ರಿಲ್ ಆಗಿದ್ದಾರೆ. ಹಾಗೆ ನೋಡಿದರೆ, ಕೆಜಿಎಫ್‌ಗೆ ಸಿಕ್ಕ ಪ್ರತಿಕ್ರಿಯೆಗಿಂತಲೂ ಕಾಂತಾರದ ಅಬ್ಬರ ಜೋರಾಗಿದೆ. ಇಲ್ಲಿ ಮತ್ತೊಂದು ವಿಚಾರವನ್ನು ಹೇಳಲೇಬೇಕು. ಡೊಡ್ಡ ಬಜೆಟ್ಟಿನ ಚಿತ್ರ ಮಾತ್ರವೇ ಪ್ಯಾನಿಂಡಿಯಾ ಮಟ್ಟದಲ್ಲಿ ಸದ್ದು ಮಾಡುತ್ತೆ ಅನ್ನೋದೆಲ್ಲ ಭ್ರಮೆ. ಅದನ್ನು ಕಾಂತಾರ ಸಾಬೀತು ಮಾಡಿದೆ. ಸಿಕ್ಕ ಸೀಮಿತ ಬಜೆಟ್ಟಿನಲ್ಲಿಯೇ ರೂಪುಗೊಂಡ ಗಟ್ಟಿ ಕಂಟೆಂಟು ಸದ್ದು ಮಾಡಿದೆಯಷ್ಟೇ!

ಹವಾಮಾನವೆಂಬುದು ಹೀಗೆ ಹಠಾತ್ತಾಗಿ ಬದಲಾಗುತ್ತಲೇ, ಯಶ್ ಅದೇಕೋ ಮೌನ ತಾಳಿದಂತಿದೆ. ದೇಶಾದ್ಯಂತ ಸ್ಟಾರುಗಳು ಮೆಚ್ಚಿಕೊಳ್ಳುತ್ತಿರೋ ಕಾಂತಾರದ ಬಗ್ಗೆಯೂ ಅವರು ತುಟಿಬಿಚ್ಚಿಲ್ಲ. ಅವರೇಕೆ ಕಾಂತಾರದ ಬಗ್ಗೆ ಮಾತಾಡಿಲ್ಲ ಅಂತ ಸಾಮಾಜಿಕ ಜಾಲತಾಣದಲ್ಲಿಯೂ ಸುದ್ದಿಯಾಗುತ್ತಿದೆ. ಹಾಗಾದರೆ, ಯಶ್ ಮುಂದಿನ ಸಿನಿಮಾಗಾಗಿ ತಯಾರಿ ನಡೆಸುತ್ತಿದ್ದಾರಾ ಅಂತ ನೋಡ ಹೋದರೆ, ಆ ಬಗ್ಗೆ ಅವರಲ್ಲಿಯೇ ಗೊಂದಲವಿದ್ದಂತಿದೆ. ಯಾಕಂದ್ರೆ, ಕೆಜಿಎಫ್ ಗೆಲುವನ್ನು ಕಾಯ್ದುಕೊಂಡು ಹೋಗೋ ದರ್ದು ಅವರ ಮುಂದಿದೆ. ರಿಶಭ್ ಶೆಟ್ಟಿ ಸಣ್ಣ ಬಜೆಟ್ಟಿನ ಸಿನಿಮಾದಲ್ಲಿಯೇ ಸದ್ದು ಮಾಡಿದ ಪರಿ ಕಂಡು, ರಾಕಿ ಭಾಯ್ ಒಳಗೆ ಢವಢವ ಆರಂಭವಾಗಿರಲೂ ಬಹುದು.

ಸಿನಿಮಾ ಡೈಲಾಗುಗಳ ಮೂಲಕವೇ ಇತರೇ ಸ್ಟಾರ್‌ಗಳಿಗೆ ಟಾಂಗ್ ಕೊಡುತ್ತಾ ನಂದೇ ಹವಾ ಅಂತ ಎದೆ ಬಡಿದುಕೊಂಡಿದ್ದಾತ ಯಶ್. ಇದೀಗ ಅದೇ ಯಶ್ ಮುಂದೆ ಮುಂದೇನು ಎಂಬ ಪ್ರಶ್ನೆಯೊಂದು ಅಂಗಾತ ಮಲಗಿದಂತಿದೆ. ಕೆಜಿಎಫ್ ಅವತರಣಿಕೆಗಳಲ್ಲಿ ಯಶ್ ಮೆರೆದಾಡಿದ್ದು ನಿಜ. ದೇಶಾದ್ಯಂತ ಆತನನ್ನು ಜನ ಒಪ್ಪಿಕೊಂಡಿದ್ದೂ ನಿಜ. ಹಾಗಂತ ಮುಂದೆಯೂ ಕೆಜಿಎಫ್ ಸರಣಿಯನ್ನ ಮುಂದುವರೆಸಿದರೆ ಬಚಾವಾಗೋದು ಕಷ್ಟವಿದೆ. ಕಾಂತಾರ ಬಂದ ನಂತರ ಅದು ಮತ್ತಷ್ಟು ಸ್ಪಷ್ಟವಾಗಿದೆ. ಡಾರ್ಕ್ ಶೇಡಿನಲ್ಲೇ ಆಟವಾಡುತ್ತಾ ಸಾಗುತ್ತಿರುವ ಪ್ರಶಾಂತ್ ನೀಲ್ ಕೂಡಾ ಇದೀಗ ಕೊಂಚ ಅದುರಿದಂತಿದೆ. ನಿಷ್ಠುರವಾಗಿ ಹೇಳಬೇಕೆಂದರೆ, ಇನ್ನೊಂದು ಭಾಗದಲ್ಲೇನಾದರೂ ಕೆಜಿಎಫ್ ಬಂದರೆ, ಜನ ಬೋರೆದ್ದು ಹೋಗುತ್ತಾರೆ. ಒಂದು ಮೂಲದ ಪ್ರಕಾರ ಯಶ್ ಕೆಜಿಎಫ್ ಮೂರನೇ ಅಧ್ಯಾಯವನ್ನು ನಂಬಿ ಕೂತಿದ್ದರು. ಆದರೀಗ ಅದೂ ಮಂಕಾಗಿದೆ. ಯಾಕೆಂದರೆ; ಹಠಾತ್ತನೆ ಚಿತ್ರರಂಗದಲ್ಲಿ ಹವಾಮಾನ ಬದಲಾವಣೆಯಾಗಿದೆ!

The post ಇಲ್ಲಿ ಯಾವುದೂ ಶಾಶ್ವತವಲ್ಲ ಅಣ್ತಮ್ಮಾ..! appeared first on ಶೋಧ ನ್ಯೂಸ್ - Shodha News.