ನಮ್ಮಲ್ಲಿರೋದು ಪ್ರಜಾಪ್ರಭುತ್ವ, ಇಲ್ಲಿ ಪ್ರಜೆಗಳೇ ಪ್ರಭುಗಳು ಎಂಬಿತ್ಯಾದಿ ಸವಕಲು ಸ್ಲೋಗನ್ನುಗಳಿವೆಯಲ್ಲಾ? ಅದೇನಿದ್ದರೂ ಜನಪ್ರತಿನಿಧಿಗಳೆಂಬೋ ಫಟಿಂಗರ ನಾಲಿಗೆ ಕೆರೆತ ನಿವಾರಿಸುವ ಮೂಲಿಕೆಯಾಗಿಯಷ್ಟೇ ಬಳಕೆಯಾಗುತ್ತಿದೆ. ಜನರಿಂದ ಆಯ್ಕೆಯಾಗಿ ಅಧಿಕಾರ ಕೇಂದ್ರ ತಲುಪಿಕೊಂಡ ಖಾದಿಗಳು, ಪಟ್ಟಾಗಿ ಕೂತು ಓದಿ ಅಧಿಕಾರಿಗಳಾದವರ ಬೂಟುಗಾಲುಗಳ ಪ್ರಮುಖ ಗುರಿ ಈ ನೆಲದ ಬಾಯಿ ಸತ್ತ ಮುಗ್ಧರೇ ಎಂಬುದು ಕರಾಳ ಸತ್ಯ. ಈ ಮಾತಿಗೆ ಅಪವಾದವೆಂಬಂತಿರುವ ಜನಪ್ರತಿನಿಧಿಗಳು, ಅಧಿಕಾರಿಗಳಿರಬಹುದಾದರೂ ಅಂಥವರ ಧ್ವನಿಗೂ ಇಲ್ಲಿ ಕಿಮ್ಮತ್ತಿಲ್ಲ. ಇಂಥಾ ದುಷ್ಟ ವ್ಯವಸ್ಥೆಯ ನಗ್ನ ಸತ್ಯವೊಂದಕ್ಕೆ ದೃಷ್ಯ ರೂಪ ಬಂದಂತಿರೋ ಚಿತ್ರ `ಗೌಳಿ’. ದೊಡ್ಡ ಮಟ್ಟದಲ್ಲಿ ಭರವಸೆ ಮೂಡಿಸಿದ್ದ ಈ ಸಿನಿಮಾವೀಗ ಬಿಡುಗಡೆಗೊಂಡಿದೆ!

ಅಷ್ಟಕ್ಕೂ ಗೌಳಿ ಈ ಪರಿಯಲ್ಲಿ ನಿರೀಕ್ಷೆ ಮೂಡಿಸಿರೋದರ ಹಿಂದೆ ನಾನಾ ಕಾರಣಗಳಿದ್ದವು. ಒಂದು ಕಡೆಯಲ್ಲಿ ಬಿಸಿ ನೆತ್ತರ ಹುಡುಗ ಸೂರ, ಹಸಿ ಹಸೀ ಕಥೆಯೊಂದರ ಸಾರಥ್ಯ ವಹಿಸಿದ ಸುಳಿವು, ಆರಕ್ಕೇರದೆ ಮೂರಕ್ಕಿಳಿಯದ ಸ್ಥಿತಿಯಲ್ಲಿದ್ದ ಶ್ರೀನಗರ ಕಿಟ್ಟಿಯ ರಗಡ್ ಲುಕ್ಕು ಮತ್ತು ಒಂದೇ ಏಟಿಗೆ ಪ್ಯಾನಿಂಡಿಯಾ ಮಟ್ಟ ಮುಟ್ಟುವಂತಿದ್ದ ಮೇಕಿಂಗ್ ವೈಖರಿ… ಹೀಗೆ ಹೆಜ್ಜೆ ಹೆಜ್ಜೆಗೂ ಸಂಚಲನ ಸೃಷ್ಟಿಸುತ್ತಾ ಸಾಗಿ ಬಂದಿದ್ದ ಈ ಚಿತ್ರಕ್ಕೆ ಚೆಂದದ ಓಪನಿಂಗ್ ಸಿಕ್ಕಿದೆ. ಒಂದಷ್ಟು ಕೊರತೆಗಳಾಚೆಗೂ ಇಷ್ಟವಾಗುವಂತೆ ಮೂಡಿ ಬಂದಿರುವ ಗೌಳಿ ನೆಲದ ಘಮಲಿನ ಕಥೆಯ ಜೊತೆ ಗುಟುರು ಹಾಕಿದ್ದಾನೆ!

ಪಟ್ಟಣದ ಚಹರೆಗಳ ಸೋಂಕಿಲ್ಲದೆ ಮೈತುಂಬಿಕೊಂಡಿರುವ ಊರುಗಳು ಕರ್ನಾಟಕದಲ್ಲಿ ಸಾಕಷ್ಟಿವೆ. ಕಾಡಿಗೆ ಆತುಕೊಂಡಂತಿರುವ ಭೂಭಾಗಗಳಲ್ಲಿ ತಮ್ಮದೇ ವೃತ್ತಿ ಮಾಡುತ್ತಾ, ಬದುಕಲು ಬೇಕಾಗುವಷ್ಟೇ ಕಾಸು ಹೊಂದಿಸಿಕೊಂಡು, ಇದ್ದುದರಲ್ಲಿಯೇ ಹಸನಾಗಿ ಬದುಕೋ ಬುಡಕಟ್ಟು ಜನಾಂಗಗಳೂ ಇದ್ದಾವೆ. ಆ ಸಾಲಿನಲ್ಲಿ ಉತ್ತರ ಕನ್ನಡ ಜಿಲ್ಲೆಯ ಯಲ್ಲಾಪುರ ಸೀಮೆಯಲ್ಲಿರುವ ಗೌಳಿಗರೂ ಸೇರಿಕೊಳ್ಳುತ್ತಾರೆ. ದನ, ಕರು, ಎಮ್ಮೆಗಳ ಸಾಕಾಣಿಕೆ ಮತ್ತು ಹಾಲು ಮಾರಾಟವೇ ಈ ಜನರ ಜೀವನದ ಮೂಲ. ಅಂಥಾ ಜನಾಂಗದ ಕಥನವನ್ನ ಮನಮುಟ್ಟುವಂತೆ ಕಟ್ಟಿ ಕೊಡುವಲ್ಲಿ ನಿರ್ದೇಶಕ ಸೂರ ಗೆದ್ದಿದ್ದಾರೆ. ಇದುವರೆಗಿನ ಕೆಲ ಸುಳಿವುಗಳ ಆಧಾರದಲ್ಲಿ ಗೌಳಿ ಎಂಬುದೊಂದು ರಗಡ್ ಕಥಾನಕ ಅಂದುಕೊಂಡು ಸಿನಿಮಾ ಮಂದಿರ ಹೊಕ್ಕವರಿಗೆ ಹಾಯಾದೊಂದು ಸರ್‍ಪ್ರೈಸ್ ಎದುರಾಗುತ್ತೆ. ಯಾಕೆಂದರೆ, ಕಣ್ಣಿಗೆ ಹಬ್ಬವಾಗಿ ಮನಸಿಗಿಳಿದು ಬಿಡುವ ವಾತಾವರಣದ ಹಿನ್ನೆಲೆಯಲ್ಲಿ ಸಾಂಸಾರಿಕ ಕಥೆಯೊಂದು ಗರಿಬಿಚ್ಚಿಕೊಳ್ಳುತ್ತೆ. ಗಂಡ ಹೆಂಡತಿ, ಪುಟ್ಟದೊಂದು ಕೂಸು ಮತ್ತು ಚಿಕ್ಕಪ್ಪನ ಪಾತ್ರಗಳ ಸುತ್ತ ಕದಲುವುವ ಮೊದಲಾರ್ಧ, ಅಧಿಕಾರಸ್ಥ ದುಷ್ಟರ ಕಾಕದೃಷ್ಟಿ ಬೀಳುವ ಮೂಲಕ ಮಹತ್ತರ ತಿರುವು ಪಡೆದುಕೊಳ್ಳುತ್ತೆ.

ಯಾವ ಕೆಡುಕಿನ ಪಸೆಯೂ ಇಲ್ಲದ ಆ ಊರಲ್ಲಿ ನಡೆಯೋ ಯುವತಿಯೊಬ್ಬಳ ಮೇಲಿನ ಅತ್ಯಾಚಾರ, ಪೊಲೀಸ್ ಅಧಿಕಾರಿಯ ದಬ್ಬಾಳಿಕೆ, ಗೌಳಿಯ ರೂಪವಂತ ಮಡದಿಯ ಮೇಲೇ ಕಣ್ಣಿಡುವಂಥಾ ಖಾಖಿಯೊಳಗಿನ ಕೀಚಕ ಬುದ್ಧಿ… ಒಟ್ಟಾರೆಯಾಗಿ ನೋಡ ನೋಡುತ್ತಲೇ ಕಥೆ ಮತ್ತೊಂದು ಆಯಾಮದತ್ತ ಹೊರಳಿಕೊಳ್ಳುತ್ತೆ. ತಾನಾಯಿತು ತನ್ನ ಪುಟ್ಟ ಜಗತ್ತಾಯಿತು ಎಂಬಂತಿದ್ದ ಮುಗ್ಧ ಗೌಳಿಗೆ ಗೂಳಿಯಾಗದೆ ಬೇರೆ ದಾರಿ ಉಳಿಯೋದಿಲ್ಲ. ಹಾಗೆ ಗೂಳಿಯಾದ ಗೌಳಿ ದುಷ್ಟತನದ ಪಕ್ಕೆಗೆ ಗುಮ್ಮುತ್ತಾನೆ. ಈ ಹಂತದಲ್ಲಿ ಯಥೇಚ್ಛವಾಗಿ ಮಾಸ್ ದೃಷ್ಯಾವಳಿಗಳು ರಂಗೇರುತ್ತವೆ. ಅಲ್ಲಿ ಕಣ್ಣೀರು ಜಿನುಗುತ್ತದೆ. ಅದಕ್ಕೆ ನೆತ್ತರು ಬೆರೆಯುತ್ತದೆ. ಔಭಾವ ತೀವ್ರತೆಯಲ್ಲಿ ದೃಷ್ಯಗಳು ತೋಯುತ್ತವೆ. ಅಂಥಾ ಆದ್ರ್ರ ಭಾವಗಳೆಲ್ಲವೂ ಒಂದಿನಿತೂ ಮುಕ್ಕಾಗದಂತೆ ನೋಡುಗರ ಮನಸಿಗೆ ಸೀದಾ ದಾಟಿಕೊಳ್ಳುತ್ತವೆ. ಅದನ್ನೇ ಗೌಳಿಯ ನಿಜವಾದ ಸಾರ್ಥಕತೆ ಎನ್ನಲಡ್ಡಿಯಿಲ್ಲ!

ನಿಜ, ಇಲ್ಲಿನ ಒಂದಷ್ಟು ಸನ್ನಿವೇಷಗಳನ್ನು ಬೇರೆಯದ್ದೇ ರೀತಿಯಲ್ಲಿ ನಿಭಾಯಿಸಬಹುದೆನ್ನಿಸುತ್ತೆ. ಆದರೆ ಅಂಥಾ ಕಂಪ್ಲೇಂಟುಗಳನ್ನೆಲ್ಲ ಮರೆಮಾಚುವಂತೆ ನಿರ್ದೇಶಕ ಸೂರ ಆಯಕಟ್ಟಿನ ಜಾಗಳಲ್ಲಿ ಮ್ಯಾಜಿಕ್ಕು ಮಾಡಿದ್ದಾರೆ. ಒಂದಿಡೀ ಕಥೆ ತೀವ್ರತೆ ಕಳೆದುಕೊಳ್ಳದಂತೆ ನೋಡಿಕೊಂಡಿರುವ ರೀತಿ, ಈ ಕ್ಷಣಕ್ಕೂ ಪ್ರಸ್ತುತವೆನ್ನಿಸುವಂತೆ, ಆಕ್ರೋಶವೆಂಬುದು ಪಾತ್ರಗಳ ಕಣ್ಣಿಂದ ನೋಡುಗರ ಮನಸಿಗೂ ನೇರವಾಗಿ ನಾಟಿಕೊಳ್ಳುವಂತೆ ದೃಷ್ಯ ಕಟ್ಟುವಲ್ಲಿ ನಿರ್ದೇಶಕರು ನಿಜಕ್ಕೂ ಭರವಸೆ ಮೂಡಿಸುತ್ತಾರೆ. ಮೆಚ್ಚುಗೆಗೆ ಪಾತ್ರರಾಗುತ್ತಾರೆ. ಇಲ್ಲಿನ ಪ್ರತೀ ಪಾತ್ರಗಳೂ ಕಾಡುತ್ತವೆ. ನಮ್ಮ ನಡುವಿನ ವಾಸ್ತವಿಕ ವಾತಾವರಣಕ್ಕೆ ತಾಳೆಯಾಗುತ್ತವೆ.

ಇನ್ನು ನಟನೆಯ ವಿಚಾರಕ್ಕೆ ಬಂದರೆ ಒಬ್ಬರನ್ನೊಬ್ಬರು ಮೀರಿಸುವಂತೆ ಕಲಾವಿದರೆಲ್ಲ ಅಭಿನಯಿಸಿದ್ದಾರೆ. ವಿಶೇಷವಾಗಿ ಶ್ರೀನಗರ ಕಿಟ್ಟಿ ಹೇಗೆ ನಟಿಸಿರಬ ಹುದೆಂಬ ಕುತೂಹಲ ಎಲ್ಲರಲ್ಲಿತ್ತು. ಅವರೊಳಗಿನ ನಿಜವಾದ ಕಲಾವಿದನಿಲ್ಲಿ ಮುಗ್ದ ಗೌಳಿಯಾಗಿ ಮನಗೆಲ್ಲುತ್ತಾನೆ. ಥೇಟು ಗೂಳಿಯಂತೆ ಅಬ್ಬರಿಸಿ ಅಚ್ಚರಿ ಮೂಡಿಸುತ್ತಾನೆ. ಒಂದಷ್ಟು ಕಾಲದಿಂದ ಮರೆಗೆ ಸರಿದಂತಿದ್ದ ಕಿಟ್ಟಿ ಪಾಲಿಗೆ ಇದೊಂದು ಮಹತ್ವದ ಚಿತ್ರ. ಅವರು ದೊಡ್ಡ ಮಟ್ಟದಲ್ಲಿಯೇ ಗೌಳಿಯ ನಂತರ ಮಿಂಚುವ ಎಲ್ಲ ಲಕ್ಷಣಗಳೂ ಗೋಚರಿಸುತ್ತಿವೆ. ಇನ್ನುಳಿದಂತೆ ಪೊಲೀಸ್ ಅಧಿಕಾರಿಯಾಗಿ ನಟಿಸಿರುವ ಶರತ್ ಲೋಹಿತಾಶ್ವರದ್ದೂ ಕೂಡಾ ಗಮನಾರ್ಹ ನಟನೆ. ಕಳೆದೇ ಹೋದಂತಿದ್ದ ಪಾವನಾಗಿಲ್ಲಿ ಒಂದೊಳ್ಳೆ ಪಾತ್ರ ಸಿಕ್ಕಿದೆ. ಅದನ್ನಾಕೆ ಚೆಂದಗೆ ನಟಿಸಿದ್ದಾಳೆ. ಗೌಳಿಯ ಚಿಕ್ಕಪ್ಪನಾಗಿ ನಟಿಸಿದ ರಂಗಾಯಣ ರಘು ಬಹು ಕಾಲದ ನಂತರ ಹೊಸಾ ಲುಕ್ಕಿನಲ್ಲಿ ಮತ್ತೆ ಪ್ರೇಕ್ಷಕರ ಮನಗೆದ್ದಿದ್ದಾರೆ.

ಒಟ್ಟಾರೆಯಾಗಿ, ಒಂದಷ್ಟು ಅತೀ ಅನ್ನಿಸುವಂಥಾ ಅಬ್ಬರ, ತರ್ಕಕ್ಕೆ ನಿಲುಕದ ಕೆಲವಾರು ಸಂಗತಿಗಳಾಚೆಗೂ ಗೌಳಿ ಇಷ್ಟವಾಗುವಂತಿದೆ. ಥಿಯೇಟರ್ ಫೀಲ್ ಅನ್ನು ಮೊಗೆಮೊಗೆದು ಕೊಡುವಂತಿರುವ ಗೌಳಿ ಮೇಕಿಂಗ್‍ನಲ್ಲೂ ಗಮನ ಸೆಳೆಯುತ್ತದೆ. ಅದರ ಸಂಪೂರ್ಣ ಕ್ರೆಡಿಟ್ಟು ನಿರ್ಮಾಪಕ ರಘು ಸಿಂಗಂ ಅವರಿಗೆ ಸಲ್ಲುತ್ತದೆ. ಒಳ್ಳೆ ಕಲಾವಿದನಾದರೂ ಸರಿಯಾದ್ದೊಂದು ಬ್ರೇಕ್ ಸಿಗದೆ ಪರಿತಪಿಸುತ್ತಿದ್ದವರು ಶ್ರೀನಗರ ಕಿಟ್ಟಿ. ಅವರ ನಸೀಬು ಗೌಳಿಯ ಮೂಲಕ ಕಳೆಗಟ್ಟಿಕೊಂಡರೆ ಅದರಲ್ಲಿ ಅಚ್ಚರಿಯೇನೂ ಇಲ್ಲ. ನವ ನಿರ್ದೇಶಕ ಸೂರಾ ಕೂಡಾ ಕನ್ನಡ ಚಿತ್ರರಂಗಕ್ಕೆ ಹೊಸಾ ದಿಕ್ಕು ತೋರಬಲ್ಲ ಪ್ರತಿಭೆ ಎಂಬುದೂ ಈ ಮೂಲಕ ಸಾಬೀತಾಗಿದೆ. ಎಲ್ಲ ವರ್ಗದ ಪ್ರೇಕ್ಷಕರಿಗೂ ಇಷ್ಟವಾಗಬಲ್ಲ ಗೌಳಿಯನ್ನು ನೀವೂ ಒಮ್ಮೆ ಕಣ್ತುಂಬಿಕೊಳ್ಳಿ!

The post ಮುಗ್ಧ ಜೀವಗಳ ನೆತ್ತರು ಬೆರೆತ ಕಣ್ಣ ಹನಿಗಳಿವೆ ಇಲ್ಲಿ! appeared first on ಶೋಧ ನ್ಯೂಸ್ - Shodha News.

ಅನಂತ್ ನಾಗ್ ಒಂದು ಸಿನಿಮಾದಲ್ಲಿ ನಟಿಸುತ್ತಾರೆಂದರೆ, ತಮ್ಮ ಪಾತ್ರದ ಬಗ್ಗೆ ಖುದ್ದು ಅವರೇ ಒಳ್ಳೆ ಮಾತುಗಳನ್ನಾಡುತ್ತಾರೆಂದರೆ ಆ ಚಿತ್ರದ ಬಗೆಗೊಂದು ಕುತೂಹಲ ಮೂಡದಿರಲು ಸಾಧ್ಯವೇ? ಈ ಕಾರಣದಿಂದಲೇ ಒಂದಷ್ಟು ನಿರೀಕ್ಷೆ ಹುಟ್ಟುಹಾಕಿದ್ದ ಚಿತ್ರ ತಿಮ್ಮಯ್ಯ ಆಂಡ್ ತಿಮ್ಮಯ್ಯ. ಇದು ಸಂಜಯ್ ಶರ್ಮಾ ನಿರ್ದೇಶನದಲ್ಲಿ ಮೂಡಿ ಬಂದಿರೋ ಚಿತ್ರ. ಇದು ಅವರ ಪಾಲಿಗೆ ಮೊದಲ ಸಿನಿಮಾವಾದ್ದರಿಂದ ಸಹಜವಾಗಿಯೇ ಪ್ರೇಕ್ಷಕರು ಮಹತ್ತರವಾದದ್ದೇನನ್ನೋ ಬಯಸಿದ್ದರು. ಹಾಗೆ ಹುಟ್ಟಿಕೊಂಡಿದ್ದ ಹತ್ತಾರು ಭಾವಗಳ ಒಡ್ಡೋಲಗದಲ್ಲಿ ತಿಮ್ಮಯ್ಯ ಆಂಡ್ ತಿಮ್ಮಯ್ಯ ಚಿತ್ರ ತೆರೆಗಂಡಿದೆ. ಏನೋ ಅಂದುಕೊಂಡು ಸಿನಿಮಾ ಮಂದಿರಗಳಿಗೆ ನುಗ್ಗಿದ ಮಂದಿ ಮುಖದಲ್ಲೀಗ ಅಯೋಮಯ ಛಾಯೆಯೊಂದು ಅಳಿಸಲಾಗದಂತೆ ಉಳಿದುಬಿಟ್ಟಿದೆ!

ಅನಂತ್ ನಾಗ್ ಲೆಜೆಂಡರಿ ನಟ. ಎಂಥಾ ಪಾತ್ರಕ್ಕಾದರೂ ಬೆರಗಾಗುವಂತೆ ಜೀವ ತುಂಬಬಲ್ಲ ಕಲಾವಿದ. ಇಂಥಾ ನಟರನ್ನು ಪ್ರಧಾನವಾಗಿಟ್ಟುಕೊಂಡು ಸಿನಿಮಾ ಮಾಡುವಾಗ ನಿರ್ದೇಶಕನಾದವನು ಎಲ್ಲ ಕೋನಗಳಿಂದಲೂ ಎಚ್ಚರವಹಿಸಬೇಕಾಗುತ್ತೆ. ಯಾಕೆಂದರೆ, ಕೊಂಚ ಯಾಮಾರಿದರೂ ಕೂಡಾ ಅದು ಆ ನಟನಿಗೆ ಅಪಮಾನಿಸಿದಂತಾಗುತ್ತೆ. ಆದರೆ, ಆ ನವನಿರ್ದೇಶಕ ಸಂಜಯ್ ಶರ್ಮಾ ಆ ಹಾದಿಯಲ್ಲಿ ಖಂಡಿತಾ ಎಡವಿದ್ದಾರೆ. ಒಂದಷ್ಟು ಚೆಂದಗಿದ್ದ ಕಥೆಯ ಸೂತ್ರವನ್ನು ಸಮರ್ಥವಾಗಿ ನಿಭಾಯಿಸೋದರಲ್ಲಿ ಸೋತಂತೆ ಕಾಣುತ್ತಾರೆ. ಅದರ ಫಲವಾಗಿ ಒಂದಿಡೀ ಸಿನಿಮಾವೇ ಸೊರಗಿದ ಸ್ಥಿತಿಯಲ್ಲಿ ಪ್ರೇಕ್ಷಕರನ್ನು ಮುಖಾಮುಖಿಯಾಗಿದೆ.

ಒಂದಷ್ಟು ಫ್ರೆಶ್ ಆಗಿಯೇ ಸಿನಿಮಾ ತೆರೆದುಕೊಳ್ಳುತ್ತದೆ. ಒಂದಷ್ಟು ಭರವಸೆ ಮೂಡಿಸುವಂತೆ ದಿಗಂತನ ಎಂಟ್ರಿಯೂ ಆಗುತ್ತೆ. ಫಾರಿನ್ನಿಗೆ ಹೋಗಿ ಬ್ಯುಸಿನೆಸ್ ಮಾಡಬೇಕಂದುಕೊಳ್ಳೋ ನಾಯಕನಿಗೆ, ಆದಾಯ ಮೂಲವಾಗಿ ಕಾಣಿಸೋದು ಕೊಡಗಿನಲ್ಲಿರೋ ತಾತನ ಒಡೆತನದೊಂದು ಕೆಫೆ. ಅದನ್ನು ಮಾರಿ ಫಾರಿನ್ನಿಗೆ ತೆರಳೋ ನಿರ್ಧಾರ ಮಾಡೋ ನಾಯಕ ಕೊಡಗಿಗೆ ಬಂದಿಳಿಯುತ್ತಾನೆ. ಆ ನಂತರದಲ್ಲಿ ಕೊಡಗಿನ ವಾತಾವರಣದಲ್ಲಿ ಕಥೆ ಗರಿಬಿಚ್ಚಿಕೊಳ್ಳುತ್ತೆ. ಅಲ್ಲಿಯೇ ರಂಗುರಂಗಾದ ಅನಂತ್ ನಾಗ್ ಪಾತ್ರ ಅನಾವರಣವಾಗುತ್ತೆ. ಹಾಗೆ ಮುಚ್ಚಿ ಹೋಗಿದ್ದ ಕೆಫೆಯನ್ನು ಮಾರಲು ಬಂದ ನಾಯಕನ ಸುತ್ತಾ ಹಲವು ಪದರುಗಳಲ್ಲಿ ಕಥೆ ತೆರೆದುಕೊಳ್ಳುತ್ತೆ. ಇದೇ ಹೊತ್ತಿನಲ್ಲಿ ತಾನು ಪ್ರೀತಿಸಿದ್ದ ಹುಡುಗಿಯೊಂದಿಗಿನ ಎಂಗೇಜ್‍ಮೆಂಟು, ಹಾಗೆ ಕಮಿಟ್ ಆದ ಮೇಲೂ ಹಲವಾರು ವರ್ಷಗಳ ನಂತರ ಕಂಡ ಪಕ್ಕದ್ಮನೆ ಹುಡುಗಿಯೊಂದಿಗಿನ ಲವ್ವು… ಆ ನಂತರ ಏನಾಗುತ್ತೆ? ನಾಯಕ ಕೆಫೆ ಮಾರುತ್ತಾನಾ? ಅವನ ಲವ್ ಲೈಫ್ ಏನಾಗುತ್ತೆ ಅನ್ನೋದು ನಿಜವಾದ ಕುತೂಹಲ. ಆದರೆ, ಅದನ್ನು ನಿರೂಪಣೆ ಮಾಡಿರುವ ರೀತಿ, ದೃಷ್ಯ ಕಟ್ಟಿರುವ ಪರಿ ಮಾತ್ರ ಜಾಳು ಜಾಳು!

ನಿರ್ದೇಶಕ ಸಂಜಯ್ ಶರ್ಮಾ ಜಾಹೀರಾತು ಕ್ಷೇತ್ರದಲ್ಲಿರುವವರಂತೆ. ಹೆಚ್ಚೇನೂ ಬೇಡ, ಜಾಹೀರಾತಿನ ಚುರುಕುತನ, ಹೇಳಬೇಕಾದ್ದನ್ನು ಪರಿಣಾಮಕಾರಿಯಾಗಿ ಹೇಳುವ ಗುಣಗಳನ್ನಾದರೂ ಅಳವಡಿಸಿಕೊಂಡಿದ್ದರೆ ಈ ಚಿತ್ರ ಬೇರೆಯದ್ದೇ ಲೆವೆಲ್ಲಿನಲ್ಲಿರುತ್ತಿತ್ತು. ಆದರೆ, ಅವರು ಇದನ್ನೊಂದು ಕೆಫೆಯ ಇಂಟೀರಿಯರ್ ಡಿಸೈನಿನ ಜಾಹೀರಾತೆಂಬಂತೆ ರೂಪಿಸಿದ್ದಾರೆ. ಯಾಕಂದ್ರೆ, ಬಹುಪಾಲು ಚಿತ್ರ ಕೆಫೆಯ ಸುತ್ತಲೇ ಗಿರಕಿ ಹೊಡೆಯುತ್ತೆ. ಕೆಫೆಯ ಮೇಲಾಟದ ನಡುವೆ ಬಡಪಾಯಿ ಪ್ರೇಕ್ಷಕರು ಎದೆಯಲ್ಲಿ ಕಫ ಕಟ್ಟಿಕೊಂಡಂತಾಗಿ ನರಳುತ್ತಾರೆ. ಪ್ರತೀ ಸೀನುಗಳೂ ಕೂಡಾ ಪ್ರೇಕ್ಷಕರಲ್ಲೊಂದು ಕೊರತೆ ಉಳಿಸುತ್ತಾ, ಅದುವರೆಗೆ ನೋಡಿದ ದೃಷ್ಯಗಳನ್ನೆಲ್ಲ ಮನಸಿಂದ ಅಳಿಸುತ್ತಾ ಸಾಗುತ್ತವೆ. ಇದುವೇ ಈ ಸಿನಿಮಾದ ಪ್ರಧಾನ ಹಿನ್ನಡೆ.

ದಿಗಂತ್, ಐಂದ್ರಿತಾ ರೇ ಸೇರಿದಂತೆ ಯಾವ ಪಾತ್ರಗಳೂ ಮನಸಿಗೆ ತಾಕುವುದಿಲ್ಲ. ಯಾವ ದೃಷ್ಯಗಳೂ ಕೂಡಾ ಪರದೆ ದಾಟಿ ಬಂದು ಪ್ರೇಕ್ಷಕರನ್ನು ಮುಟ್ಟುವಂತಿಲ್ಲ. ನಿರ್ದೇಶಕರು ಏನೋ ಮಾಡಲು ಹೋಗಿ, ಕಥೆಯ ಸೂತ್ರ ಕೈತಪ್ಪಿ ಹತಾಶರಾಗಿ ದೃಷ್ಯ ಕಟ್ಟಿದಂತೆ ಭಾಸವಾಗುತ್ತೆ. ಇನ್ನುಳಿದಂತೆ, ಅದೇನು ದಿಗಂತ್ ಇಂಥಾ ಪಾತ್ರಗಳನ್ನು ಬಯಸುತ್ತಾನೋ, ಅಥವಾ ವಿಧಿಯೇ ಆತನಿಗಾಗಿ ಇಂಥಾ ಪಾತ್ರಗಳನ್ನು ಸೃಷ್ಟಿಸುತ್ತದೋ ಭಗವಂತನೇ ಬಲ್ಲ. ಆತ ಪಾತ್ರದಲ್ಲಾಗಲಿ, ನಟನೆಯಲ್ಲಾಗಲಿ ಯಾವ ಹೊಸತನವೂ ಇಲ್ಲ. ಅದು ದಿಗಂತನ ದೌರ್ಭಾಗ್ಯವೋ, ಪ್ರೇಕ್ಷಕರದ್ದೋ ಅಂತೊಂದು ಗೊಂದರ ಸಿನಿಮಾದ ಸಿಕ್ಕುಗಳಂತೆಯೇ ಕಾಡುತ್ತೆ. ನಿರ್ದೇಶಕರಿಗೆ ಪುರಸೊತ್ತಿರಲಿಲ್ಲವೋ ಅಥವಾ ಮೂಡಿರಲಿಲ್ಲವೋ… ಈ ಚಿತ್ರದಲ್ಲಿ ಸಂಭಾಷಣೆಗಳೇ ಸಪ್ಪೆ ಸಪ್ಪೆ. ಇಲ್ಲಿನ ಡೈಲಾಗುಗಳು `ನೀವ್ ನೀವೇ ಮಾತಾಡ್ಕಳಿ’ ಅಂತ ಕಲಾವಿದರಿಗೆ ಕೇಳಿಕೊಂಡು ಸೃಷ್ಟಿಯಾದಂತಿವೆ.

ಇದೆಲ್ಲದರಾಚೆಗೆ ಇಡೀ ಸಿನಿಮಾವನ್ನು ಒಂದಷ್ಟು ಸಹತ್ವಾಗಿಸೋದು ಅನಂತ್ ನಾಗ್ ಅವರ ಪಾತ್ರ. ಎಲ್ಲ ಮಿತಿಗಳಾಚೆಗೂ ಅನಂತ್ ಆ ಪಾತ್ರಕ್ಕೆ ತಮ್ಮದೇ ಶೈಲಿಯಲ್ಲಿ ಜೀವ ತುಂಬಿದ್ದಾರೆ. ಆ ಮೂಲಕ ಒಂದಿಡೀ ಚಿತ್ರಕ್ಕೆ ಜೀವಕಳೆ ತುಂಬೋ ಪ್ರಯತ್ನ ಮಾಡಿದ್ದಾರೆ. ಪ್ಲಸ್ ಪಾಯಿಂಟಿಗಾಗಿ ತಡಕಾಡಿದರೆ, ಹಾಡುಗಳೂ ಕೂಡಾ ಪ್ರಧಾನವಾಗಿ ಕಣ್ಮುಂದೆ ಬರುತ್ತವೆ. ಬಹುತೇಕ ಹಾಡುಗಳು ಚೆನ್ನಾಗಿವೆ. ನಿಖರವಾಗಿ ಹೇಳಬೇಕೆಂದರೆ, ಈ ಚಿತ್ರ ನಿರ್ದೇಶಕನ ಸೂತ್ರ ಮೀರಿ ಹರಡಿಕೊಂಡಂತಿದೆ. ಪ್ರೇಕ್ಷಕರಂತೂ ಪ್ರತೀ ಘಟ್ಟದಲ್ಲಿಯೂ ತಿಮ್ಮಯ್ಯಾ ಆಡ್ ತಿಮ್ಮಯ್ಯ ಜೀವ ತಿನ್ಬೇಡಿ ದಮ್ಮಯ್ಯ ಎಂಬಂತೆ ನರಳುವಂತಾಗುತ್ತೆ. ಕಾಂತಾರ ನಂತರ ಜನ ಮತ್ತೆ ಸಿನಿಮಾ ಮಂದಿರಗಳತ್ತ ನುಗ್ಗುತ್ತಿದ್ದಾರೆ. ಚಿತ್ರರಂಗದ ಪಾಲಿಗಿದು ಒಳ್ಳೆ ಬೆಳವಣಿಗೆ. ಆದರೆ ತಿಮ್ಮಯ್ಯ ಆಂಡ್ ತಿಮ್ಮಯ್ಯ ಉತ್ಸಾಹದಲ್ಲಿರೋ ಪ್ರೇಕ್ಷಕರನ್ನು ಅಕ್ಷರಶಃ ಬೆಚ್ಚಿಬೀಳಿಸಿದೆ!

The post ಇದು ದಿಗಂತನ ದೌರ್ಭಾಗ್ಯ! appeared first on ಶೋಧ ನ್ಯೂಸ್ - Shodha News.

ಸ್ಥಿತಿವಂತರ ಮನೆ ಮಕ್ಕಳು ಸಿನಿಮಾರಂಗಕ್ಕೆ ಬಂದಾಕ್ಷಣ ಮೊದಲು ತೂರಿ ಬರುವುದೇ ಮೂದಲಿಕೆ. ಇತ್ತ ಗಾಂಧಿನಗರದ ಗಲ್ಲಿಯಗುಂಟ ನಾನಾ ಸರ್ಕಸ್ಸು ನಡೆಸೋ ಮಂದಿಯ ಸಂತೆ ನೆರೆದಿರುವಾಗ, ಹಣವಂತರ ಮಕ್ಕಳು ಸಲಾಸಾಗಿ ಬಂದು ಮೆರೆಯುತ್ತಾರೆಂಬುದು ಅಂಥಾದ್ದೊಂದು ಮನಃಸ್ಥಿತಿಗೆ ಕಾರಣವಾಗಿದ್ದಿರಬಹುದು. ಅದು ಒಂದು ಮಟ್ಟಿಗೆ ನಿಜವೆನ್ನಿಸಿದರೂ, ತಯಾರಿ ಮತ್ತು ನಟನೆಯ ಮೂಲಕ ಅಂಥಾ ಮನಃಸ್ಥಿತಿಯನ್ನು ಸುಳ್ಳೆಂದು ಸಾಬೀತು ಮಾಡಿದ ಒಂದಷ್ಟು ಪ್ರತಿಭೆಗಳಿದ್ದಾವೆ. ಆ ಸಾಲಿನಲ್ಲಿ ಬನಾರಸ್ ಹೀರೋ ಝೈದ್ ಖಾನ್ ನಿಸ್ಸಂದೇಹವಾಗಿಯೂ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಇಂದು ಬಿಡುಗಡೆಯಾಗಿರೋ ಜಯತೀರ್ಥ ನಿರ್ದೇಶನದ ಬನಾರಸ್ ಚಿತ್ರ ನೋಡಿದ ಪ್ರತಿಯೊಬ್ಬರೂ ಕೂಡಾ ಅಂಥಾದ್ದೊಂದು ಸಕಾರಾತ್ಮಕ ಪ್ರತಿಕ್ರಿಯೆ ವ್ಯಕ್ತ ಪಡಿಸುತ್ತಿದ್ದಾರೆ. ಒಟ್ಟಾರೆ ಕಥೆ ಮತ್ತು ಆ ಪಾತ್ರಕ್ಕೆ ಝೈದ್ ಖಾನ್ ಜೀವ ತುಂಬಿರುವ ರೀತಿಯನ್ನು ಪ್ರೇಕ್ಷಕರು ಮನದುಂಬಿ ಮೆಚ್ಚಿಕೊಳ್ಳುತ್ತಿದ್ದಾರೆ.

ಯಾವಾಗ ಬನಾರಸ್ ಚಿತ್ರ ಹಾಡುಗಳ ಮೂಲಕವೇ ಕಳೆಗಟ್ಟಿಕೊಳ್ಳಲಾರಂಭಿಸಿತ್ತೋ, ಆ ಕಾಲಘಟ್ಟದಲ್ಲಿಯೇ ಒಂದಷ್ಟು ವಿದ್ಯಮಾನಗಳೂ ಜರುಗಿದ್ದವು. ಆ ಭೂಮಿಕೆಯಲ್ಲಿಯೇ ಒಂದಷ್ಟು ಮಂದಿ ಬಾಯ್ಕಾಟ್ ಬನಾರಸ್ ಅಂತೆಲ್ಲ ಬಾಯಿಬಡಿದುಕೊಳ್ಳಲಾರಂಭಿಸಿದ್ದರಲ್ಲಾ? ಅಂಥವರೇ ಈ ಚಿತ್ರದ ಬಗ್ಗೆ ವ್ಯಾಪಕವಾಗಿ ಅಪಪ್ರಚಾರ ಶುರುವಿಟ್ಟುಕೊಂಡಿದ್ದರು. ಅದುವೇ ಬನಾರಸ್ ಬಗ್ಗೆ ಮತ್ತೊಂದಷ್ಟು ಕೋನಗಳಲ್ಲಿ ಚರ್ಚೆ ನಡೆಯಲು ಕಾರಣವಾಗಿತ್ತು. ಇದೆಲ್ಲ ಏನೇ ಇದ್ದರೂ ಹಾಡು ಮತ್ತು ಟ್ರೈಲರ್‌ನಲ್ಲಿಯೇ ಝೈದ್ ನಟನೆಯ ಝಲಕ್ಕುಗಳು ಜಾಹೀರಾಗಿ, ಆ ಬಗ್ಗೆ ಒಂದಷ್ಟು ನಿರೀಕ್ಷೆಗಳು ಮೂಡಿಕೊಂಡಿದ್ದವು. ಅದೆಲ್ಲವನ್ನೂ ತೃಪ್ತಗೊಳಿಸುವಂತೆ ಬನಾರಸ್ ಮೂಡಿ ಬಂದಿದೆ.ಇದೊಂದು ಟೈಮ್ ಟ್ರಾವೆಲಿಂಗ್ ಅಥವಾ ಟೈಮ್ ಲೂಪ್ ಕಾನ್ಸೆಪ್ಟಿನ ಸಿನಿಮಾ ಎಂಬ ವಿಚಾರ ಈ ಹಿಂದೆಯೇ ಜಾಹೀರಾಗಿತ್ತು. ಬನಾರಸ್‌ನ ಮೋಹಕ ವಾತಾವರಣದಲ್ಲಿ ಭಿನ್ನವಾಗಿ ಹಬ್ಬಿಕೊಳ್ಳುವ ಪ್ರೀತಿಯೂ ಸೇರಿದಂತೆ, ನಾನಾ ಕೊಂಬೆ ಕೋವೆಗಳ ಕಥಾನಕದೊಂದಿಗೆ ಬನಾರಸ್ ಎಲ್ಲರಿಗೂ ಹಿಡಿಸುವಂತೆ ರೂಪುಗೊಂಡಿದೆ. ಅಗರ್ಭ ಶ್ರೀಮಂತರ ಮನೆ ಹುಡುಗ ಸಿದ್ಧಾರ್ಥ್ ಸಿಂಹನಾಗಿ ಝೈದ್ ನಟಿಸಿದ್ದರೆ, ಚಿಕ್ಕಪ್ಪನ ದೇಖಾರೇಖಿಯಲ್ಲಿರುವ ಅಪ್ಪ ಅಮ್ಮನಿಲ್ಲದ ತಬ್ಬಲಿ ಜೀವವಾಗಿ, ಹಾಡುಗಾರ್ತಿಯಾಗಿ ದನಿ ಎಂಬ ಪಾತ್ರದಲ್ಲಿ ಸೋನಲ್ ಕಾಣಿಸಿಕೊಂಡಿದ್ದಾರೆ. ಇವರಿಬ್ಬರೂ ಬನಾರಸ್‌ನಲ್ಲಿ ಹೇಗೆ ಸಂಧಿಸುತ್ತಾರೆ, ವಿರುದ್ಧ ದಿಕ್ಕಿನ ಎರಡು ಜೀವಗಳ ನಡುವೆ ಹೇಗೆ ಪ್ರೀತಿ ಅಂಕುರಿಸುತ್ತೆ? ಅದಕ್ಕೆ ಟೈಮ್ ಟ್ರಾವೆಲಿಂಗ್ ಹೇಗೆ ಕಾರಣವಾಗುತ್ತೆ? ಒಂದಿಡೀ ಸಿನಿಮಾ ಯಾವ್ಯಾವ ದಿಕ್ಕುಗಳತ್ತ ಹೊರಳಿಕೊಳ್ಳುತ್ತೆ ಎಂಬುದೇ ಬನಾರಸ್‌ನ ಅಸಲೀ ಹೂರಣ. ಅದನ್ನು ನಿರ್ದೇಶಕ ಜಯತೀರ್ಥ ಒಂದು ರೋಚಕ ಅನುಭವ ದಕ್ಕುವಂತೆ ಕಟ್ಟಿ ಕೊಟ್ಟಿದ್ದಾರೆ.

ಮೊದಲಾರ್ಧದಲ್ಲಿ ಬನಾರಸ್‌ನ ಸಮ್ಮೊಹಕ ಪರಿಸರದಲ್ಲಿ ಕಥೆ ಘಟಿಸುತ್ತದೆ. ನಾಯಕ ನಾಯಕಿಯ ಬೊಗಸೆಯಲ್ಲರಳೋ ಪ್ರೀತಿ ನಾನಾ ರಂಗು ಹೊದ್ದು ಹೊಮ್ಮುತ್ತೆ. ನಿಮಿಷಗಳ ಕಾಲ ವೇಗವಾಗಿ ಚಲಿಸಿ, ಒಂ<ದು ಪ್ರೇಮಕಥಾನಕವಾಗಿಯಷ್ಟೇ ನೋಡುಗರ ಮನಸಿನಲ್ಲಿ ತಿದಿಯೊತ್ತುವ ಹೊತ್ತಿಗೆಲ್ಲ ಇಂಟರ್‌ವಲ್ ಎದುರಾಗುತ್ತೆ. ಒಂದಿಡೀ ಬನಾರಸ್‌ನ ನೈಜ ತಾಕತ್ತಿನ ದರ್ಶನವಾಗೋದೇ ದ್ವಿತೀಯಾರ್ಧದಲ್ಲಿ. ಅಲ್ಲಿ ಒಂದರ ಹಿಂದೊಂದರಂತೆ ಟ್ವಿಸ್ಟುಗಳು, ಸರ್‌ಪ್ರೈಸುಗಳು ಯಥೇಚ್ಛವಾಗಿ ಸಿಗುತ್ತವೆ. ಕಣ್ಣೆದುರಲ್ಲಿಯೇ, ಕಲ್ಪನೆ ಮೀರಿ ಚಹರೆ ಬದಲಿಸೋ ದೃಷ್ಯಗಳಲ್ಲಿ ಪ್ರೇಕ್ಷಕರು ಕಳೆದು ಹೋಗುವಂತಾಗುತ್ತೆ. ಒಂದರೆಕ್ಷಣವೂ ಬೋರು ಹೊಡೆಸದಂತೆ, ಆಚೀಚೆ ಆಲೋಚಿಸಲೂ ಆಸ್ಪದ ಕೊಡದಂಥಾ ಆವೇಗದಲ್ಲಿ ಜಯತೀರ್ಥ ಬನಾರಸ್ ಅನ್ನು ಕಟ್ಟಿಕೊಟ್ಟಿದ್ದಾರೆ.

ಪ್ರಧಾನವಾಗಿ ನವ ನಟ ಝೈದ್ ಖಾನ್ ಅಭಿನಯವೂ ಕೂಡಾ ಬನಾರಸ್‌ನ ಹೈಲೈಟ್ ಪಾಯಿಂಟುಗಳಲ್ಲೊಂದಾಗಿ ದಾಖಲಾಗುತ್ತದೆ. ಝೈದ್ ತಮ್ಮ ಸುತ್ತಾ ಹಬ್ಬಿಕೊಂಡಿದ್ದ ಗುಮಾನಿಗಳೆಲ್ಲ ಮಾಯವಾಗುವಂತೆ ಚೆಂದಗೆ ನಟಿಸಿದ್ದಾರೆ. ಆ ನಟನೆಯಲ್ಲಿಯೇ ಅವರೆಷ್ಟು ತಯಾರಿ ನಡೆಸಿಕೊಂಡಿದ್ದಾರೆಂಬ ಅಂಶವೂ ಇಣುಕುತ್ತದೆ. ಅದರಲ್ಲಿ ಜಯತೀರ್ಥ ಪಾಲಿರೋದನ್ನು ಉಪೇಕ್ಷಿಸಲು ಸಾಧ್ಯವಿಲ್ಲ. ಇನ್ನುಳಿದಂತೆ ಸೋನಲ್ ಮೊಂತೇರೋ ಪಾತ್ರ ಮತ್ತು ನಟನೆ ಕೂಡಾ ಮನಸಲ್ಲುಳಿಯುತ್ತೆ. ಪ್ರತಿಭಾವಂತ ನಟ ಸುಜಯ್ ಶಾಸ್ತ್ರಿ ಇಲ್ಲಿ ಬಹುಮುಖ್ಯವಾಗಿರುವ ಶಂಭು ಎಂಬ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ದೇವರಾಜ್ ನಾಯಕನ ತಂದೆಯಾಗಿ ನಟಿಸಿದ್ದರೆ, ಅಚ್ಯುತ್ ಕುಮಾರ್ ಕೂಡಾ ಪ್ರಧಾನ್ಯತೆ ಇರೋ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಅದೆಲ್ಲವೂ ಬನಾರಸ್‌ನ ನೈಜ ಶಕ್ತಿ ಎಂಬುದು ಸತ್ಯ.

ಇತ್ತೀಚಿನ ದಿನಗಳಲ್ಲಿ ಎಲ್ಲದರಲ್ಲಿಯೂ ರಾಜಕೀಯ ಬೆರೆಸುವ ಹೀನ ಬುದ್ಧಿ ಅತಿಯಾಗಿದೆ. ಕಲಾವಿದರ ಜಾತಿ ಧರ್ಮ ಹಿನ್ನೆಲೆ ಹುಡುಕಿ ಬಾಯ್ಕಾಟ್ ಮಾಡೋದು ಕೂಡಾ ಒಂದಷ್ಟು ಮಂದಿಗೆ ಕಸುಬಾಗಿ ಬಿಟ್ಟಿದೆ. ಅದೆಲ್ಲವೂ ಮಾಡಲು ಕ್ಯಾಮೆ ಇಲ್ಲದವರ ವ್ಯರ್ಥ ಪ್ರಲಾಪ ಅನಮ್ನೋದು ಬನಾರಸ್ ನೋಡಿದ ಯಾರಿಗಾದರೂ ಅರ್ಥವಾಗುತ್ತೆ. ಯಾಕೆಂದರೆ, ಝೈದ್ ಖಾನ್ ಅದೆಲ್ಲವನ್ನೂ ಮೀರಿಕೊಂಡಂತೆ ಚೆಂದಗೆ ನಟಿಸಿದ್ದಾರೆ. ಇನ್ನೂ ಒಂಚೂರು ಪ್ರಯತ್ನ ಪಟ್ಟರೆ ನಾಯಕನಾಗಿ ನೆಲೆ ಕಂಡುಕೊಳ್ಳುವ ಭರವಸೆಯನ್ನೂ ಮೂಡಿಸಿದ್ದಾರೆ. ಒಟ್ಟಾರೆಯಾಗಿ, ಬನಾರಸ್ ಒಂದು ಭಿನ್ನ ಅನುಭೂತಿ ನೀಡುವ ಚಿತ್ರ. ಅದರ ಒಟ್ಟಾರೆ ಓಘದ ಮುಂದೆ ಸಣ್ಣಪುಟ್ಟ ಕೊರತೆಗಳೆಲ್ಲವೂ ಗೌಣ ಅನ್ನಿಸುತ್ತೆ. ಒಂದಿಡೀ ಚಿತ್ರ ಅಜನೀಶ್ ಲೋಕನಾರ್ಥರ ಮಾಂತ್ರಿಕ ಸಂಗೀತ ಸಂಯೋಜನೆಯಲ್ಲಿ ಮೂಡಿ ಬಂದಿರೋ ಚೆಂದದ ಹಾಡುಗಳಂತೆಯೇ ಕಾಡುತ್ತೆ. ಇದು ಖಂಡಿತವಠಾಗಿಯೂ ಎಲ್ಲ ಅಭಿರುಚಿಯ ಪ್ರೇಕ್ಷಕರಿಗೂ ಹಿಡಿಸುವಂಥಾ ಅಪರೂಪದ ಚಿತ್ರ!

The post ಬಾಯ್ಕಾಟ್ ಎಂಬುದು ಅರ್ಥವಿಲ್ಲದ ವ್ಯರ್ಥ ಪ್ರಲಾಪ! appeared first on ಶೋಧ ನ್ಯೂಸ್ - Shodha News.

ರೀಮೇಕೆಂಬ ಸತ್ಯ ಮುಚ್ಚಿಡಲು ಕಾರಣವೇನು?
ಮಾನ್ಸೂನ್ ರಾಗ… ಹೀಗೊಂದು ಸಿನಿಮಾ ಅಣಿಗೊಳ್ಳುತ್ತಿರುವ ವಿಚಾರ ಕೇಳಿಯೇ ಪ್ರೇಕ್ಷಕರೆಲ್ಲ ಥ್ರಿಲ್ ಆಗಿ ಹೋಗಿದ್ದರು. ನಂತರ ಹೆಸರಿಗೆ ತಕ್ಕುದಾದ ಆರ್ಧ್ರ ಛಾಯೆ ಹೊಂದಿದ್ದ ಪೋಸ್ಟರುಗಳು ಕಂಡ ಮೇಲಂತೂ ಪ್ರೇಕಲ್ಷಕರು ನಿರೀಕ್ಷೆಯ ಅಗ್ಗಿಷ್ಠಿಕೆಯ ಮುಂದೆ ನಿಂತು ಬೆಚ್ಚಗಾಗಲಾರಂಭಿಸಿದ್ದರು; ಈ ಸಿನಿಮಾ ಬಗ್ಗೆ ಇನ್ನೂ ಹೆಚ್ಚೆಚ್ಚು ಮಾಹಿತಿ ಪಡೆಯಲು ಕಾತರರಾಗಿದ್ದರು. ಅದರಲ್ಲಿಯೂ ವಿಶೇಷವಾಗಿ, ವಿಲನ್ ಆಗಿ ಅಬ್ಬರಿಸಿ ಸದ್ದು ಮಾಡಿದ್ದ ಡಾಲಿ ಧನಂಜಯ್ ಹೀರೋ ಆಗಿ, ಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆಂಬ ಸುಳಿವು ಸಿಕ್ಕಿದ್ದೇ ಮಾನ್ಸೂನಿನ ಹನಿಗಳು ಪ್ರತೀ ಮನಸುಗಳಲ್ಲಿಯೂ ತೊಟ್ಟಿಕ್ಕಲು ಶುರುವಿಟ್ಟುಕೊಂಡಿತ್ತು. ಒಟ್ಟಾರೆಯಾಗಿ ಇದೊಂದು ಭಿನ್ನ ಕಥಾನಕ, ಮಾನ್ಸೂನಿನಲ್ಲಿ ತೋಯ್ದ ಗಹನವಾದ ಕಥೆ ಇದರೊಳಗಿದೆ ಎಂಬೆಲ್ಲ ನಂಬಿಕೆಗಳು ತಂತಾನೇ ಮೂಡಿಕೊಂಡಿದ್ದವು. ಆದರೆ ಮಾನ್ಸೂನಿನ ಮೊದಲ ಮಳೆಯ ಮಣ್ಣ ಘಮಲಿನಂಥಾದ್ದೇ ತಾಜಾ ಅನುಭೂತಿಯ ನಿರೀಕ್ಷೆಯೊಂದಿಗೆ ಸಿನಿಮಾ ಮಂದಿರ ಹೊಕ್ಕ ಮಂದಿಗೆ ಎದುರಾಗಿರೋದು, ಮುಗ್ಗಲು ಹಿಡಿದ ಕಮಟು ಮತ್ತು ಲಯ ತಪ್ಪಿದ ರಾಗ!

ನಿಮಗೆಲ್ಲ ಗೊತ್ತಿಲ್ಲದಿರುವುದೇನಲ್ಲ; ಮಳೆ ಅಂದರೇನೇ ವಿಭಿನ್ನ ಅನುಭೂತಿ. ಆದರೆ ಒಂದೇ ಸಮನೆ ಬಿಟ್ಟೂಬಿಡದಂತೆ ಮಳೆ ಜಿಬುರುತ್ತಲೇ ಇದ್ದರೆ ಅದೂ ಕೂಡಾ ಒಂದು ಹಂತದಲ್ಲಿ ರೇಜಿಗೆ ಮೂಡಿಸುತ್ತೆ. ಮನಸು ಮಂಕಾಗಿ ಮುಗ್ಗಲು ಹಿಡಿದಂತಾಗುತ್ತೆ. ಎಸ್.ರವೀಂದ್ರನಾಥ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ, ಇಂದು ಬಿಡುಗಡೆಗೊಂಡಿರುವ ಮಾನ್ಸೂನ್ ರಾಗದ್ದೂ ಕೂಡಾ ಅದೇ ಕಥೆ. ಇದರೊಳಗೆರ ಮಳೆಯ ಹಿಮ್ಮೇಳದಲ್ಲಿ ನಾಲಕ್ಕು ಮಧುರವಾದ ಪ್ರೇಮ ಕಥಾನಕಗಳಿವೆ. ಅವು ಒಂದಕ್ಕೊಂದು ಭಿನ್ನವಾಗಿಯೂ, ಪೂರಕವಾಗಿರುವ ಸ್ಥಿತಿಯಲ್ಲಿ ಹಿಡಿಸುವಂತಿವೆ. ಮಾನ್ಸೂನಿನ ಮಾಯೆಯೊಂದಿಗೇ ತೆರೆದುಕೊಳ್ಳುವ ಇಡೀ ಸಿನಿಮಾವನ್ನು ಮಳೆಯ ಇರುವಿಕೆಯಲ್ಲಿಯೇ ಸೆರೆ ಹಿಡಿಯ.ಲಾಗಿದೆ. ಇಂಥಾ ಜಿಟಿ ಜಿಟಿ ಮಳೆಯ ಹಿಮ್ಮೇಳದಲ್ಲಿ ಮಂಧ್ರವಾಗಿ ಕದಲುವ ಕಥೆ ಪ್ರೇಮದ ನಾನಾ ಮಜಲುಗಳನ್ನು ಪ್ರೇಕ್ಷಕರ ಮುಂದೆ ತೆರೆದಿಡುತ್ತದೆ.

ನಟನೆಯ ವಿಚಾರಕ್ಕೆ ಬಂದರೆ ಡಾಲಿಯದ್ದು ಎಂದಿನಂತೆಯೇ ಅದ್ಭುತ ಅನ್ನಿಸುವಂಥಾ ಪ್ರದರ್ಶನ. ಹಾಗೆ ನೋಡಿದರೆ, ಈವರೆಗೆ ನಿರ್ವಹಿಸಿದ್ದ ಅಷ್ಟೂ ಪಾತ್ರಗಳಿಗಿಂತಲೂ ಭಿನ್ನವಾದ ಛಾಯೆಯಲ್ಲಿ ಧನಂಜಯ್ ಕಾಣಿಸಿಕೊಂಡಿದ್ದಾರೆ. ಇನ್ನು ವೇಶ್ಯೆಯ ಪಾತ್ರವನ್ನು ತನ್ಮಯತೆಯಿಂದ ನಿಭಾಯಿಸಿರುವ ರಚಿತಾ ರಾಮ್‌ಳನ್ನು ಕೂಡಾ ಮೆಚ್ಚಿಕೊಳ್ಳದಿರಲಾಗೋದಿಲ್ಲ. ಇದರೊಂದಿಗೆ ಅಚ್ಚಯುತ್ ಕುಮಾರ್, ಸುಹಾಸಿನಿ ಅವರ ಪಾತ್ರಗಳೂ ಕೂಡಾ ಪೂರಕವಾಗಿ ಮೂಡಿ ಬಂದಿವೆ. ಆದರೆ, ಕಥೆ ತೆರೆದುಕೊಳ್ಳುತ್ತಾ ಹೋದಂತೆಲ್ಲ ಇದು ತೆಲುಗಿನ ಕೇರಾಫ್ ಕಂಚಾಲಪಾಲೆಂ ಚಿತ್ರದ ನಕಲೆಂಬುದು ಕೂಡಾ ನಿಖರವಾಗಿಯೇ ಜಾಹೀರಾಗುತ್ತಾ ಹೋಗುತ್ತದೆ. ಗಮನೀಯ ಅಂಶವೆಂದರೆ, ಆರಂಭದಿಂದ ಇಲ್ಲಿಯವರೆಗೂ ನಿರ್ದೇಶಕರಾಗಲಿ, ನಿರ್ಮಾಪಕರಾಗಲಿ ಇದೊಂದು ರೀಮೇಕ್ ಚಿತ್ರ ಅಂತ ಅಪ್ಪಿತಪ್ಪಿಯೂ ಹೇಳಿರಲಿಲ್ಲ. ಅದೇಕೇ ಹಾಗೆ ಮಾಡಿದರೆಂಬುದನ್ನು ಚಿತ್ರತಂಡವೇ ವಿವರಿಸಬೇಕಿದೆ.

ಒಂದುವೇಳೆ ರೀಮೇಕ್ ಸೂತ್ರಗಳಿಗನುಗುಣವಾಗಿ, ಅದಕ್ಕೆ ತಕ್ಕುದಾಗಿ ಭಟ್ಟಿ ಇಳಿಸಿದ್ದರೂ ಮಾನ್ಸೂನ್ ರಾಗಕ್ಕೊಂದು ಬೇರೆಯದ್ದೇ ಮುದ ಇರುತ್ತಿತ್ತೇನೋ. ಆದರೆ ನಿರ್ದೇಶಕರು ಅದನ್ನು ಬೇರೊಂದು ಸ್ವರೂಪದಲ್ಲಿ ಕಟ್ಟಿ ಕೊಡಲು ಹೆಣಗುತ್ತಾ, ಒರಿಜಿನಲ್ ಪರಿಣಾಮಗಳನ್ನು ಮುಸುಕಾಗಿಸಿದ್ದಾರೆ; ಈ ಮೂಲಕ ಆ ಸರ್ಕಸ್ಸಿನಲ್ಲಿ ಸೋತಿದ್ದಾರೆ. ಅಂಥಾ ಹಳವಂಡದಲ್ಲಿಯೇ ಕಟ್ಟಿರುವ ದೃಷ್ಯಗಳೆಲ್ಲವೂ ಒಂದಷ್ಟು ಶ್ರೀಮಂತಿಕೆಯಾಚೆಗೂ ಬಡಕಲಾದಂತೆ ಗೋಚರಿಸುತ್ತವೆ. ಪ್ರೇಮ ಮತ್ತು ಮಳೆ ಎಂಬುದಿದೆಯಲ್ಲಾ? ಅದೊಂದು ಸಾರ್ವಕಾಲಿಕವಾದ ಅದ್ಭುತ ಕಾಂಬಿನೇಷನ್ನು. ಅದನ್ನು ಪರಿಣಾಮಕಾರಿಯಾಗಿ ಕಟ್ಟಿಕೊಡುವಲ್ಲಿ ನಿರ್ದೇಶಕರು ನಿಸ್ಸಂದೇಹವಾಗಿ ಸೋತಿದ್ದಾರೆ. ಆದ್ದರಿಂದಲೇ ಪರಿಣಾಮಕಾರಿಯಾಗಬಹುದಾದ ದೃಷ್ಯಗಳೂ ಅದರಿಂದ ವಂಚಿತವಾಗಿವೆ. ಇದೆಲ್ಲದರಿಂದಾಗಿ, ಬೇಕಿಲ್ಲದಾಗ ಹನಿಯೋ ಒಲ್ಲದ ಮಳೆಯಲ್ಲಿ ನೆಂದಾಗ ನೆತ್ತಿಗೇರಿಕೊಳ್ಳೋ ಅತೃಪ್ತ ಭಾವವೊಂದು ಮಾತ್ರವೇ ಸಿನಿಮಾ ನೋಡಿದವರಲ್ಲಿ ಉಳಿದು ಹೋಗುತ್ತದೆ.

ಇದು ರೀಮೇಕ್ ಎಂಬ ವಿಚಾರ ಫಸ್ಟ್ ಶೋ ಪ್ರದರ್ಶನಗೊಂಡಾಗಲೇ ಎಲ್ಲರಿಗೂ ಗೊತ್ತಾಗಿದೆ. ಒಂದು ವೇಳೆ ಮೊದಲೇ ಈ ಬಗ್ಗೆ ಪ್ರಸ್ತಾಪಿಸಿದ್ದರೂ ಅಂಥಾ ಪರಿಣಾಮವೇನೂ ಬೀರುತ್ತಿರಲಿಲ್ಲವೇನೋ. ಆದರೂ ನಿರ್ದೇಶಕರು ಯಾಕೆ ಅದನ್ನು ಬಚ್ಚಿಟ್ಟರೆಂಬ ವಿಚಾರ ಇನ್ನೂ ನಿಗೂಢ. ಯಾವಾಗ ಇದು ರೀಮೇಕ್ ಅಂತ ಪ್ರೇಕ್ಷಕರಿಗೆ ಗೊತ್ತಾಯ್ತೋ, ಆಗಲೇ ಕೆಲ ಮಾಧ್ಯಮಗಳಲ್ಲಿಯೂ ಈ ಬಗ್ಗೆ ಗುಲ್ಲೆದ್ದಿದೆ. ನಿರ್ದೇಶಕರು ಮೂಲ ಕಥೆಯನ್ನು ನೇಟಿವಿಟಿಗೆ ಹೊಂದಿಸುವ ಹೆಸರಲ್ಲಿ, ಅದನ್ನು ಸ್ವಂತದ್ದೆಂದು ಬಿಂಬಿಸಿಕೊಳ್ಳಲು ನೋಡಿದರಾ? ಹೇಗೋ ಮಾಡಿ ಇದು ಸರ‍್ವಂತದ್ ಪ್ರಶ್ ಕಥೆ ಅಂತ ಮೈಲೇಜು ಗಿಟ್ಟಿಸಿಕೊಳ್ಳುವ ಅಂದಾಜು ಹಾಕಿದ್ದಾರಾ ಗೊತ್ತಿಲ್ಲ. ಆದರೆ ಈ ನಕಲು ಸರಕೂ ಕೂಡಾ ಎಲ್ಲ ಇದ್ದೂ ಏನೂ ಇಲ್ಲದಂತಿರೋದೇ ದುರಂತದ ವಿಚಾರ!

The post ಒಲ್ಲದ ಮಳೆಯಲ್ಲಿ ನೆಂದ ಒದ್ದೊದ್ದೆ ಅಸಹನೆಯೊಂದೇ ಖಾಯಂ! appeared first on ಶೋಧ ನ್ಯೂಸ್ - Shodha News.

ನೋವೆಲ್ಲವೂ ಇಲ್ಲಿ ನಗುವಾಗಿದೆ!
ಕೆಲವೊಮ್ಮೆ ಪ್ರೇಕ್ಷಕರಲ್ಲಿದ್ದ ಅಗಾಧ ನಿರೀಕ್ಷೆ ಸಿನಿಮಾ ಮಂದಿರಗಳಲ್ಲಿ ಮಂಕಾಗುತ್ತೆ. ಅಪರೂಪಕ್ಕೆಂಬಂತೆ ನಿರೀಕ್ಷೆಯನ್ನು ಮೀರಿದ ಅಚ್ಚರಿಗಳು ದೊಡ್ಡ ಪರದೆಯ ಮೇಲೆ ಅಚಾನಕ್ಕಾಗಿ ಸರಿದಾಡುತ್ತವೆ. ಅಂಥಾದ್ದೊಂದು ಅನುಭೂತಿಯನ್ನು ಬೇಷರತ್ತಾಗಿ ಕಟ್ಟಿಕೊಟ್ಟಿರುವ ಚಿತ್ರ ವೀಲ್‌ಚೇರ್ ರೋಮಿಯೋ. ಟ್ರೈಲರ್ ಸೇರಿದಂತೆ ಒಂದಷ್ಟು ರೀತಿಯಲ್ಲಿ ಅದಾಗಲೇ ಪ್ರೇಕ್ಷಕರು ರೋಮಿಯೋನ ಮೋಡಿಗೀಡಾಗಿದ್ದರು. ಈ ಚಿತ್ರದಲ್ಲೇನೋ ಗಹನವಾದದ್ದಿದೆ ಎಂಬ ಭಾವ ಎಲ್ಲರೊಳಗೂ ಮೂಡಿಕೊಂಡಿತ್ತು. ಇದೆಲ್ಲದರ ಒಡ್ಡೋಲಗದಲ್ಲೀಗ ವೀಲ್ ಚೇರ್ ರೋಮಿಯೋ ಪತ್ಯಕ್ಷವಾಗಿದ್ದಾನೆ. ತಾವು ಎಣಿಸಿದ್ದಕ್ಕಿಂತಲೂ ವಿಸ್ತಾರವಾದ ಹರವುಳ್ಳ, ಅತ್ಯಂತ ಮಜವಾಗಿ ಮೂಡಿ ಬಂದಿರುವ ಈ ಚಿತ್ರವನ್ನು ನೋಡಿ ಪ್ರೇಕ್ಷಕರೆಲ್ಲ ಫಿದಾ ಆಗಿದ್ದಾರೆ.

ಸಾಮಾನ್ಯವಾಗಿ ಕಥೇ ಎಂಥಾದ್ದೇ ಇದ್ದರೂ ಹೀರೋ ಮಾತ್ರ ಹೀಗೀಗೇ ಇರಬೇಕೆಂಬ ಸಿದ್ಧ ಸೂತ್ರ ನಮ್ಮಲ್ಲಿ ಚಾಲ್ತಿಯಲ್ಲಿದೆ. ಅದನ್ನು ಬ್ರೇಕ್ ಮಾಡುವಂಥಾ ಸಿನಿಮಾಗಳು ವಿರಳವಾಗಿ ಬಂದಿವೆ. ಅದರಲ್ಲಿಯೂ ಈಗಿನ ವಾತಾವರಣದಲ್ಲಿ ಹೀರೋ ಪಾತ್ರವನ್ನು ಅದಕ್ಕೆ ವಿರುದ್ಧವಾಗಿ ಕಟ್ಟಿ ಕೊಡುವುದಕ್ಕೆ ಗುಂಡಿಗೆ ಇರಬೇಕು. ಆ ಪಾತ್ರಕ್ಕೆ ಜೀವ ತುಂಬುವುದಕ್ಕೂ ಗಟ್ಟಿತನದ ಕಲಾಪ್ರೇಮವಿರಬೇಕು. ಈ ನಿಟ್ಟಿನಲ್ಲಿ ನೋಡೋದಾದರೆ ಹೀರೋ ಪಾತ್ರವನ್ನು ವೀಲ್‌ಚೇರ್‌ನಲ್ಲಿ ಕೂರಿಸಿಯೂ ನಿರ್ದೇಶಕ ನಟರಾಜ್ ಗೆದ್ದಿದ್ದಾರೆ. ಇಮೇಜು ಮುಂತಾದವನ್ನೆಲ್ಲ ಮಡಚಿಟ್ಟು ವೀಲ್‌ಚೇರ್‌ನಲ್ಲಿ ಕೂತೇ ಯಾನ ಮಾಡಿದರೂ ರಾಮ್ ಚೇತನ್ ಕೂಡಾ ಗೆದ್ದಿದ್ದಾರೆ. ನಿಖರವಾಗಿ ಹೇಳಬೇಕೆಂದರೆ ಸಂಭಾಷಣೆ, ಪಾತ್ರಪೋಷಣೆ, ಕಥೆ ಸೇರಿದಂತೆ ಎಲ್ಲ ವಿಭಾಗಗಳಲ್ಲಿಯೂ ವೀಲ್ ಚೇರ್ ರೋಮಿಯೋ ಬೇರೆಯದ್ದೇ ರೀತಿಯಲ್ಲಿ ಭಾಷ್ಯ ಬರೆದಿದೆ.

ಇಲ್ಲಿ ನಿರ್ದೇಶಕರು ಆಯ್ಕೆ ಮಾಡಿಕೊಂಡಿರುವ ಕಥಾ ಎಳೆಯೇ ವಿಭಿನ್ನವಾಗಿದೆ. ಪ್ರತೀ ಪಾತ್ರಗಳನ್ನು, ಪ್ರತೀ ಹಂಹಗಳಲ್ಲಿಯೂ ರೂಪಿಸಿದ ರೀತಿಯಿದೆಯಲ್ಲಾ? ಅದು ಒಟ್ಟಾರೆ ಸಿನಿಮಾದ ನೈಜ ಶಕ್ತಿ. ರಾಮ್ ಚೇತನ್ ಇಲ್ಲಿ ಉಲ್ಲಾಸ್ ಎಂಬ ಪಾತ್ರಕ್ಕೆ ಜೀವ ತುಂಬಿದ್ದಾರೆ. ಅದು ಹುಟ್ಟಿನಿಂದಲೇ ಮೂಳೆಸಂಬಂಧಿ ಕಾಯಿಲೆಯಿಂದ ಬಳಲುತ್ತಾ ಕಾಲುಗಳ ಸ್ವಾಧೀನ ಕಳೆದುಕೊಂಡ ಪಾತ್ರ. ತನ್ನ ಕೆಲಸಗಳನ್ನು ತಾನೇ ಮಾಡಿಕೊಳ್ಳಲಾರದ ಸ್ಥಿತಿ ಉಲ್ಲಾಸನದ್ದು. ಇಂಥಾ ಅಮ್ಮನಿಲ್ಲದ ಕೂಸನ್ನು ಹೆಜ್ಜೆ ಹೆಜ್ಜೆಯಲ್ಲಿಯೂ ನೆರಳಾಗಿ ಪೊರೆಯುವ ತಂದೆಯಾಗಿ ಸುಚೇಂದ್ರ ಪ್ರಸಾದ್ ಅವರದ್ದು ಅದ್ಭುತ ನಟನೆ. ಹೀಗೆ ವಿಕಲಾಂಗನಾಗಿ ಹುಟ್ಟಿದ ಉಲ್ಲಾಸ್ ಬುದ್ಧಿ ಬಲಿತ ಮೇಲೂ ವೀಲ್‌ಚೇರಿಗೇ ಅಂಟಿ ಕೂರಬೇಕಾದ ದುಃಸ್ಥಿತಿ.

ಯಾರಾದರೂ ಬಂದು ಸಪೋರ್ಟು ಮಾಡದಿದ್ದರೆ ಮಿಸುಕಾಡಲೂ ಆಗದಂಥಾ ಉಲ್ಲಾಸನೊಳಗೆ ಅಪ್ಪನ ಕಾರಣದಿಂದಲೇ ಉತ್ಸಾಹದ ಬುಗ್ಗೆ ಪುಟಿಯುತ್ತಿರುತ್ತೆ. ಆನರ ಕಣ್ಣಿನಲ್ಲಿ ಹೇಗೇ ಕಂಡರೂ ತನ್ನ ಮಗನನ್ನು ಬಿಂದಾಸ್ ಆಗಿರುವಂತೆ ಬೆಳೆಸಿದ ಅಪ್ಪನಿಗೆ ಬದುಕೇ ಒಂದು ಸವಾಲು. ಆದರೆ ನಿಜವಾದ ಸವಾಲೆದುರಾಗೋದು ಮಗ ವಯಸ್ಸಿಗೆ ಬಂದಾಗ. ಆ ಹಂತದಲ್ಲಿ ಆತನಿಗೊಂದು ಮದುವೆ ಮಾಡಬೇಕೆಂದು ಪಟ್ಟ ಪ್ರಯತ್ನಗಳೆಲ್ಲವೂ ನೀರಿನ ಮೇಲೆ ಹೋಮ ಮಾಡಿದಂತಾಗುತ್ತೆ. ಅದಾದ ನಂತರದಲ್ಲಿ ಕಥೆ ನಿರೀಕ್ಷೆಯಾಚೆಗೆ ಹೊರಳಿಕೊಳ್ಳುತ್ತೆ. ನಮಗೆಲ್ಲ ಪರಿಚಯವಿಲ್ಲದ ಮನೋಲೋಕವನ್ನು ಹಸಿ ಹಸಿಯಾಗಿ ತಂದು ಎದುರಿಗಿಡುತ್ತೆ. ವಿಕ್ಷಿಪ್ತ ಜಗತ್ತೊಂದರ ಇಕ್ಕೆಲದಲ್ಲಿ ದೇವತೆಯಂಥವಳೊಬ್ಬಳು ವೀಲ್‌ಚೇರ್ ರೋಮಿಯೋನನ್ನು ಎದುರುಗೊಳ್ಳುತ್ತಾಳೆ. ಅಲ್ಲಿ ಪ್ರೀತಿಯಾಗುತ್ತಾ? ಮಗನಿಗೆ ಮದುವೆ ಮಾಡಲೆತ್ನಿಸಿ ಸೋತ ಅಪ್ಪ ಮುಂದೇನು ಮಾಡುತ್ತಾನೆ? ರೋಮಿಯೋಗೆ ಪ್ರೀತಿ ದಕ್ಕುತ್ತಾ? ಮುಂತಾದ ಪ್ರಶ್ನೆಗಳಿಗೆ ಸಿನಿಮಾ ಮಂದಿರದಲ್ಲಿಯೇ ಮಜವಾದ ಉತ್ತರಗಳಿದ್ದಾವೆ.

ಇದು ವಿಶಾಲವಾದ ಹರವುಳ್ಳ ಕಥೆ. ಅದು ಒಂದಿನಿತೂ ಅಸ್ತವ್ಯಸ್ಥವಾಗದಂತೆ ಕಟ್ಟಿಕೊಟ್ಟಿರೋದೇ ಈ ಸಿನಿಮಾದ ಹೆಚ್ಚುಗಾರಿಕೆ. ಒಂದೆಳೆ ತಪ್ಪಿದರೂ ಕಥೆ ಎತ್ತೆತ್ತಲೋ ಹೊಯ್ದಾಡಿ ಹಿಡಿತ ತಪ್ಪುವ ಅಪಾಯಗಳಿದ್ದವು. ಅದೆಲ್ಲವನ್ನೂ ಜಾಣ್ಮೆಯಿಂದ ದಾಟಿಕೊಂಡಿರುವ ನಿರ್ದೇಶಕ ನಟರಾಜ್ ಮೊದಲ ಪ್ರಯತ್ನದಲ್ಲಿಯೇ ಗೆದ್ದಿದ್ದಾರೆ. ಹಾಗೆ ನೋಡಿದರೆ ಅವರು ಹೊಸೆದಿರುವ ಕಥೆಯೇ ವಿಶೇಷವಾದದ್ದು. ಒಂದು ಸಿನಿಮಾ ಹೀರೋ ಅಂದರೆ ಒಂದಷ್ಟು ಚೌಕಟ್ಟಿನಲ್ಲಿ ಬಂಧಿಯಾದ ಕಲ್ಪನೆಗಳಿರುತ್ತವೆ. ಕಟ್ಟುಮಸ್ತಾಗಿರಬೇಕು, ಎದುರಿಗೆ ನೂರು ಜನ ಬಂದರೂ ಬಡಿದು ಬಿಸಾಕಬೇಕೆಂಬುದೆಲ್ಲ ಆ ಸಿದ್ಧಸೂತ್ರದ ಕಾನ್ಸೆಪ್ಟುಗಳು. ಆದರೆ ಇಲ್ಲಿನ ಹೀರೋ ವೀಲ್‌ಚೇರ್ ಬಿಟ್ಟು ಕಡೇಯ ತನಕವೂ ಆಚೀಚೆ ಕದಲುವುದಿಲ್ಲ. ಇಡೀ ಕಥೆಯೇ ಅದನ್ನು ಬಳಸಿಕೊಂಡು ಸಾಗುತ್ತದೆ. ಆದರೆ ಅದೊಂದು ಕೊರತೆಯಲ್ಲ; ಅದುವೇ ನಿಜವಾದ ಶಕ್ತಿ ಎಂಬುದು ಸಿನಿಮಾ ನೋಡಿದ ಪ್ರತಿಯೊಬ್ಬರಿಗೂ ಅರ್ಥವಾಗುತ್ತದೆ.

ಇನ್ನು ಈ ಚಿತ್ರ ಬಹುವಾಗಿ ಹಿಡಿಸೋದಕ್ಕೆ ಪ್ರಧಾನ ಕಾರಣವಾಗಿ ಕಾಣಿಸುವುದು ಪಂಚಿಂಗ್ ಡೈಲಾಗುಗಳು. ಸ್ವತಃ ಡೈಲಾಗ್ ರೈಟರ್ ಆಗಿ ಪ್ರೇಕ್ಷಕರ ನಾಡಿ ಮಿಡಿತ ಅರಿತಿರುವ ನಟರಾಜ್, ಈ ಚಿತ್ರದ ಸಂಭಾಷಣೆಯ ಜವಾಬ್ದಾರಿಯನ್ನು ಗುರು ಕಷ್ಯಪ್ ಅವರಿಗೆ ವಹಿಸಿದ್ದರು. ಇಲ್ಲಿನ ಕೆಲ ಡೈಲಾಗ್‌ಗಳಿಗಾಗಿ ಮೂರು ತಿಂಗಳಷ್ಟು ಕಾದಿರೋದಾಗಿ ನಿರ್ದೇಶಕರು ಆರಂಭಿಕವಾಗಿಯೇ ಹೇಳಿಕೊಂಡಿದ್ದರು. ಆ ಕಾಯುವಿಕೆಯಿಲ್ಲಿ ಸಾರ್ಥಕಗೊಂಡಂತಿದೆ. ಯಾಕೆಂದರೆ, ಈ ಚಿತ್ರದ ಪ್ರಧಾನ ಆಕರ್ಷಣೆಗಳಲ್ಲಿ ಡೈಲಾಗ್ ಕೂಡಾ ಒಂದಾಗಿ ಸೇರಿಕೊಂಡಿದೆ. ಪಂಚಿಂಗ್ ಡೈಲಾಗುಗಳೆಂದರೆ ಡಬಲ್ ಮೀನಿಂಗ್ ಎಂಬುದರಾಚೆಗೆ ಇಲ್ಲಿನ ಡೈಲಾಗುಗಳು ಬೇರೆಯದ್ದೇ ರೀತಿಯಲ್ಲಿ ಮೋಡಿ ಮಾಡುತ್ತವೆ. ಆ ಕಾಮಿಡಿಯಲ್ಲಿ ಗಾಂಭೀರ‍್ಯವಿದೆ, ದಟ್ಟ ವಾಸ್ತವವಿದೆ. ಅದನ್ನು ಪ್ರಚುರ ಪಡಿಸಿರುವ ಎಲ್ಲ ಕಲಾವಿದರೂ ಪ್ರತೀ ಫ್ರೇಮುಗಳಲ್ಲಿಯೂ ಪ್ರೇಕ್ಷಕರ ಮನಸಿಗೆ ಲಗ್ಗೆಯಿಡುತ್ತಾರೆ.

ಇದೆಲ್ಲದರೊಂದಿಗೆ ಬಹುವಾಗಿ ಕಾಡುವಂತೆ ಮೂಡಿ ಬಂದಿರೋದು ಹೀರೋ ಪಾತ್ರ. ಆ ಪಾತ್ರವನ್ನು ರಾಮ್ ಚೇತನ್ ಅಕ್ಷರಶಃ ಒಳಗಿಳಿಸಿಕೊಂಡು ನಟಿಸಿದ್ದಾರೆ. ಅಷ್ಟಕ್ಕೂ ಆ ಪಾತ್ರವನ್ನು ಆಯ್ಕೆ ಮಾಡಿಕೊಳ್ಳುವ ಮೂಲಕವೇ ಅವರು ಗೆದ್ದಿದ್ದಾರೆ. ಇದೀಗ ವೀಲ್ ಚೇರ್ ರೋಮಿಯೋ ಆಗಿ ವೀಲ್‌ಚೇರಿಗಂಟಿಕೊಂಡೇ ಸಿನಿಮಾ ಪೂರ್ತಿ ನಟಿಸಿರುವ ರಾಮ್ ಚೇತನ್ ಎಲ್ಲರನ್ನೂ ಆವರಿಸಿಕೊಳ್ಳುತ್ತಾರೆ. ಅವರ ಸ್ಟಿಲ್ಲುಗಳನ್ನು ನೋಡಿದವರೇ ಹೀರೋ ನಿಜವಾಗಿಯೂ ಅಂಗವಿಕಲ ಅಂದುಕೊಂಡಿದ್ದರೂ ಅಚ್ಚರಿಯೇನಿಲ್ಲ. ಆ ಹಾವಭಾವ, ಸೂಕ್ಷ್ಮ ಮಿಸುಕಾಟ, ಆಂಗಿಕ ಅಭಿನಯ… ಇದೆಲ್ಲದರಲ್ಲಿಯೂ ರಾಮ್ ಚೇತನ್ ಫುಲ್ ಮಾರ್ಕ್ಸ್ ಪಡೆದುಕೊಳ್ಳುತ್ತಾರೆ. ಇನ್ನುಳಿದಂತೆ ನಾಯಕಿಯಾಗಿ ಮಯೂರಿ ನಿರ್ವಹಿಸಿರುವ ಪಾತ್ರವಂತೂ ತನ್ನದೇ ರೀತಿಯಲ್ಲಿ ಕಾಡುತ್ತದೆ. ಇದು ಆ ನಟಿಯ ಪಾಲಿಗೆ ಮೈಲಿಗಲ್ಲಿನಂಥಾ ಪಾತ್ರ ಎಂಬುದರಲ್ಲಿ ಯಾವ ಸಂಶಯವೂ ಇಲ್ಲ.

ನಿರ್ದೇಶಕರು ಈ ಚಿತ್ರದ ಎಲ್ಲ ಪಾತ್ರಗಳನ್ನೂ ಕೂಡಾ ಕಾಡುವಂತೆ, ಕಚಗುಳಿ ಇಡುವಂತೆ ಕಟ್ಟಿ ಕೊಟ್ಟಿದ್ದಾರೆ. ಅದರಲ್ಲಿಯೂ ರಂಗಾಯಣ ರಘು ನಿರ್ವಹಿಸಿರುವ ಜಾಕ್ ಮಾಮಾ ಎಂಬ ಪಾತ್ರವಂತೂ ಬಗೆ ಬಗೆಯಲ್ಲಿ ಕಾಡುವಂತಿದೆ. ಕೆಲ ಸಂದರ್ಭಗಳಲ್ಲಿ ರಂಗಾಯಣ ರಘು ಅವರಿಗೆ ಒಂದೇ ಥರದ ಪಾತ್ರಗಳು ಸಿಗುತ್ತಿವೆ ಅನ್ನಿಸೋದುಂಟು. ಅವರ ಮ್ಯಾನರಿಸಂನಲ್ಲಿಯೂ ಸಹ ಏಕತಾನತೆ ಹಣಕಿಹಾಕಿದ್ದೂ ಇದೆ. ಆದರೆ ಇದರಲ್ಲಿ ಹೊಸಾ ಬಗೆಯ ಪಾತ್ರವಾಗಿ ರಘು ಅಚ್ಚರಿ ಮೂಡಿಸಿದ್ದಾರೆ. ಸುಚೇಂದ್ರ ಪ್ರಸಾದ್, ತಬಲಾ ನಾಣಿ ಪಾತ್ರಗಳೂ ಕೂಡಾ ಹಾಗೆಯೇ ಮೂಡಿ ಬಂದಿವೆ.

ಒಟ್ಟಾರೆಯಾಗಿ ನಿರ್ದೇಶಕ ನಟರಾಜ್ ಮೊದಲ ಪ್ರಯತ್ನದಲ್ಲಿಯೇ ಪ್ರೇಕ್ಷಕರೆಲ್ಲರ ಮನ ಗೆದ್ದಿದ್ದಾರೆ. ಯಾವ ಪ್ರಾಕಾರದ ಚಿತ್ರಗಳನ್ನಾದರೂ ನಿರ್ದೇಶನ ಮಾಡಲು ನಟರಾಜ್ ಅರ್ಹರೆಂಬ ಭಾವ ಸಿನಿಮಾ ನೋಡಿದ ಯಾರಲ್ಲಿಯಾದರೂ ಮೂಡಿಕೊಳ್ಳದಿರಲು ಸಾಧ್ಯವೇ ಇಲ್ಲ. ದಶಕಗಳಿಗೂ ಹೆಚ್ಚು ಕಾಲದ ಅನುಭವ ಮತ್ತು ವಿಶಿಷ್ಟವಾದೊಂದು ಕಥಾನಕದ ಮೂಲಕ ಅವರ ಸರ್ವರನ್ನೂ ತಾಕಿದ್ದಾರೆ. ಒಂದು ಸಿನಿಮಾ ಗೆಲ್ಲಬೇಕೆಂದರೆ ಯಾವ್ಯಾಯ ಕ್ವಾಲಿಟಿಗಳಿರಬೇಕೋ ಅದೆಲ್ಲವನ್ನೂ ಬೆರೆಸಿಯೇ ನಟರಾಜ್ ಈ ಚಿತ್ರವನ್ನು ರೂಪಿಸಿದ್ದಾರೆ. ಅಂತೂ ಇದುವರೆಗೆ ನಿರ್ದೇಶನದ ನಾನಾ ವಿಭಾಗಗಳಲ್ಲಿ ಕಾರ್ಯ ನಿರ್ವಹಿಸಿ, ಸಂಭಾಷಣೆಕಾರರಾಗಿ ಗೆದ್ದಿದ್ದ ನಟರಾಜ್ ನಿರ್ದೇಶಕರಾಗಿಯೂ ಗೆಲುವು ದಾಖಲಿಸಿದ್ದಾರೆ. ಅವರು ಮುಂದಿನ ದಿನಗಳಲ್ಲಿ ಯಶಸ್ವೀ ನಿರ್ದೇಶಕನಾಗಿ ನೆಲೆಗಾಣುವ ಕುರುಹುಗಳು ಸ್ಪಷ್ಟವಾಗಿಯೇ ಗೋಚರಿಸುತ್ತಿವೆ. ವೀಲ್‌ಚೇರ್ ರೋಮಿಯೋ ಖಂಡಿತವಾಗಿಯೂ ನೀವೆಲ್ಲ ನೋಡಬೇಕಾದ ಚಿತ್ರ.

The post ಹೀರೋ ವೀಲ್‌ಚೇರ್‌ನಲ್ಲಿದ್ದರೂ ಗೆದ್ದು ನಿಂತರು ನಟರಾಜ್! appeared first on ಶೋಧ ನ್ಯೂಸ್ - Shodha News.