ನಮ್ಮಲ್ಲಿರೋದು ಪ್ರಜಾಪ್ರಭುತ್ವ, ಇಲ್ಲಿ ಪ್ರಜೆಗಳೇ ಪ್ರಭುಗಳು ಎಂಬಿತ್ಯಾದಿ ಸವಕಲು ಸ್ಲೋಗನ್ನುಗಳಿವೆಯಲ್ಲಾ? ಅದೇನಿದ್ದರೂ ಜನಪ್ರತಿನಿಧಿಗಳೆಂಬೋ ಫಟಿಂಗರ ನಾಲಿಗೆ ಕೆರೆತ ನಿವಾರಿಸುವ ಮೂಲಿಕೆಯಾಗಿಯಷ್ಟೇ ಬಳಕೆಯಾಗುತ್ತಿದೆ. ಜನರಿಂದ ಆಯ್ಕೆಯಾಗಿ ಅಧಿಕಾರ ಕೇಂದ್ರ ತಲುಪಿಕೊಂಡ ಖಾದಿಗಳು, ಪಟ್ಟಾಗಿ ಕೂತು ಓದಿ ಅಧಿಕಾರಿಗಳಾದವರ ಬೂಟುಗಾಲುಗಳ ಪ್ರಮುಖ ಗುರಿ ಈ ನೆಲದ ಬಾಯಿ ಸತ್ತ ಮುಗ್ಧರೇ ಎಂಬುದು ಕರಾಳ ಸತ್ಯ. ಈ ಮಾತಿಗೆ ಅಪವಾದವೆಂಬಂತಿರುವ ಜನಪ್ರತಿನಿಧಿಗಳು, ಅಧಿಕಾರಿಗಳಿರಬಹುದಾದರೂ ಅಂಥವರ ಧ್ವನಿಗೂ ಇಲ್ಲಿ ಕಿಮ್ಮತ್ತಿಲ್ಲ. ಇಂಥಾ ದುಷ್ಟ ವ್ಯವಸ್ಥೆಯ ನಗ್ನ ಸತ್ಯವೊಂದಕ್ಕೆ ದೃಷ್ಯ ರೂಪ ಬಂದಂತಿರೋ ಚಿತ್ರ `ಗೌಳಿ’. ದೊಡ್ಡ ಮಟ್ಟದಲ್ಲಿ ಭರವಸೆ ಮೂಡಿಸಿದ್ದ ಈ ಸಿನಿಮಾವೀಗ ಬಿಡುಗಡೆಗೊಂಡಿದೆ!

ಅಷ್ಟಕ್ಕೂ ಗೌಳಿ ಈ ಪರಿಯಲ್ಲಿ ನಿರೀಕ್ಷೆ ಮೂಡಿಸಿರೋದರ ಹಿಂದೆ ನಾನಾ ಕಾರಣಗಳಿದ್ದವು. ಒಂದು ಕಡೆಯಲ್ಲಿ ಬಿಸಿ ನೆತ್ತರ ಹುಡುಗ ಸೂರ, ಹಸಿ ಹಸೀ ಕಥೆಯೊಂದರ ಸಾರಥ್ಯ ವಹಿಸಿದ ಸುಳಿವು, ಆರಕ್ಕೇರದೆ ಮೂರಕ್ಕಿಳಿಯದ ಸ್ಥಿತಿಯಲ್ಲಿದ್ದ ಶ್ರೀನಗರ ಕಿಟ್ಟಿಯ ರಗಡ್ ಲುಕ್ಕು ಮತ್ತು ಒಂದೇ ಏಟಿಗೆ ಪ್ಯಾನಿಂಡಿಯಾ ಮಟ್ಟ ಮುಟ್ಟುವಂತಿದ್ದ ಮೇಕಿಂಗ್ ವೈಖರಿ… ಹೀಗೆ ಹೆಜ್ಜೆ ಹೆಜ್ಜೆಗೂ ಸಂಚಲನ ಸೃಷ್ಟಿಸುತ್ತಾ ಸಾಗಿ ಬಂದಿದ್ದ ಈ ಚಿತ್ರಕ್ಕೆ ಚೆಂದದ ಓಪನಿಂಗ್ ಸಿಕ್ಕಿದೆ. ಒಂದಷ್ಟು ಕೊರತೆಗಳಾಚೆಗೂ ಇಷ್ಟವಾಗುವಂತೆ ಮೂಡಿ ಬಂದಿರುವ ಗೌಳಿ ನೆಲದ ಘಮಲಿನ ಕಥೆಯ ಜೊತೆ ಗುಟುರು ಹಾಕಿದ್ದಾನೆ!

ಪಟ್ಟಣದ ಚಹರೆಗಳ ಸೋಂಕಿಲ್ಲದೆ ಮೈತುಂಬಿಕೊಂಡಿರುವ ಊರುಗಳು ಕರ್ನಾಟಕದಲ್ಲಿ ಸಾಕಷ್ಟಿವೆ. ಕಾಡಿಗೆ ಆತುಕೊಂಡಂತಿರುವ ಭೂಭಾಗಗಳಲ್ಲಿ ತಮ್ಮದೇ ವೃತ್ತಿ ಮಾಡುತ್ತಾ, ಬದುಕಲು ಬೇಕಾಗುವಷ್ಟೇ ಕಾಸು ಹೊಂದಿಸಿಕೊಂಡು, ಇದ್ದುದರಲ್ಲಿಯೇ ಹಸನಾಗಿ ಬದುಕೋ ಬುಡಕಟ್ಟು ಜನಾಂಗಗಳೂ ಇದ್ದಾವೆ. ಆ ಸಾಲಿನಲ್ಲಿ ಉತ್ತರ ಕನ್ನಡ ಜಿಲ್ಲೆಯ ಯಲ್ಲಾಪುರ ಸೀಮೆಯಲ್ಲಿರುವ ಗೌಳಿಗರೂ ಸೇರಿಕೊಳ್ಳುತ್ತಾರೆ. ದನ, ಕರು, ಎಮ್ಮೆಗಳ ಸಾಕಾಣಿಕೆ ಮತ್ತು ಹಾಲು ಮಾರಾಟವೇ ಈ ಜನರ ಜೀವನದ ಮೂಲ. ಅಂಥಾ ಜನಾಂಗದ ಕಥನವನ್ನ ಮನಮುಟ್ಟುವಂತೆ ಕಟ್ಟಿ ಕೊಡುವಲ್ಲಿ ನಿರ್ದೇಶಕ ಸೂರ ಗೆದ್ದಿದ್ದಾರೆ. ಇದುವರೆಗಿನ ಕೆಲ ಸುಳಿವುಗಳ ಆಧಾರದಲ್ಲಿ ಗೌಳಿ ಎಂಬುದೊಂದು ರಗಡ್ ಕಥಾನಕ ಅಂದುಕೊಂಡು ಸಿನಿಮಾ ಮಂದಿರ ಹೊಕ್ಕವರಿಗೆ ಹಾಯಾದೊಂದು ಸರ್‍ಪ್ರೈಸ್ ಎದುರಾಗುತ್ತೆ. ಯಾಕೆಂದರೆ, ಕಣ್ಣಿಗೆ ಹಬ್ಬವಾಗಿ ಮನಸಿಗಿಳಿದು ಬಿಡುವ ವಾತಾವರಣದ ಹಿನ್ನೆಲೆಯಲ್ಲಿ ಸಾಂಸಾರಿಕ ಕಥೆಯೊಂದು ಗರಿಬಿಚ್ಚಿಕೊಳ್ಳುತ್ತೆ. ಗಂಡ ಹೆಂಡತಿ, ಪುಟ್ಟದೊಂದು ಕೂಸು ಮತ್ತು ಚಿಕ್ಕಪ್ಪನ ಪಾತ್ರಗಳ ಸುತ್ತ ಕದಲುವುವ ಮೊದಲಾರ್ಧ, ಅಧಿಕಾರಸ್ಥ ದುಷ್ಟರ ಕಾಕದೃಷ್ಟಿ ಬೀಳುವ ಮೂಲಕ ಮಹತ್ತರ ತಿರುವು ಪಡೆದುಕೊಳ್ಳುತ್ತೆ.

ಯಾವ ಕೆಡುಕಿನ ಪಸೆಯೂ ಇಲ್ಲದ ಆ ಊರಲ್ಲಿ ನಡೆಯೋ ಯುವತಿಯೊಬ್ಬಳ ಮೇಲಿನ ಅತ್ಯಾಚಾರ, ಪೊಲೀಸ್ ಅಧಿಕಾರಿಯ ದಬ್ಬಾಳಿಕೆ, ಗೌಳಿಯ ರೂಪವಂತ ಮಡದಿಯ ಮೇಲೇ ಕಣ್ಣಿಡುವಂಥಾ ಖಾಖಿಯೊಳಗಿನ ಕೀಚಕ ಬುದ್ಧಿ… ಒಟ್ಟಾರೆಯಾಗಿ ನೋಡ ನೋಡುತ್ತಲೇ ಕಥೆ ಮತ್ತೊಂದು ಆಯಾಮದತ್ತ ಹೊರಳಿಕೊಳ್ಳುತ್ತೆ. ತಾನಾಯಿತು ತನ್ನ ಪುಟ್ಟ ಜಗತ್ತಾಯಿತು ಎಂಬಂತಿದ್ದ ಮುಗ್ಧ ಗೌಳಿಗೆ ಗೂಳಿಯಾಗದೆ ಬೇರೆ ದಾರಿ ಉಳಿಯೋದಿಲ್ಲ. ಹಾಗೆ ಗೂಳಿಯಾದ ಗೌಳಿ ದುಷ್ಟತನದ ಪಕ್ಕೆಗೆ ಗುಮ್ಮುತ್ತಾನೆ. ಈ ಹಂತದಲ್ಲಿ ಯಥೇಚ್ಛವಾಗಿ ಮಾಸ್ ದೃಷ್ಯಾವಳಿಗಳು ರಂಗೇರುತ್ತವೆ. ಅಲ್ಲಿ ಕಣ್ಣೀರು ಜಿನುಗುತ್ತದೆ. ಅದಕ್ಕೆ ನೆತ್ತರು ಬೆರೆಯುತ್ತದೆ. ಔಭಾವ ತೀವ್ರತೆಯಲ್ಲಿ ದೃಷ್ಯಗಳು ತೋಯುತ್ತವೆ. ಅಂಥಾ ಆದ್ರ್ರ ಭಾವಗಳೆಲ್ಲವೂ ಒಂದಿನಿತೂ ಮುಕ್ಕಾಗದಂತೆ ನೋಡುಗರ ಮನಸಿಗೆ ಸೀದಾ ದಾಟಿಕೊಳ್ಳುತ್ತವೆ. ಅದನ್ನೇ ಗೌಳಿಯ ನಿಜವಾದ ಸಾರ್ಥಕತೆ ಎನ್ನಲಡ್ಡಿಯಿಲ್ಲ!

ನಿಜ, ಇಲ್ಲಿನ ಒಂದಷ್ಟು ಸನ್ನಿವೇಷಗಳನ್ನು ಬೇರೆಯದ್ದೇ ರೀತಿಯಲ್ಲಿ ನಿಭಾಯಿಸಬಹುದೆನ್ನಿಸುತ್ತೆ. ಆದರೆ ಅಂಥಾ ಕಂಪ್ಲೇಂಟುಗಳನ್ನೆಲ್ಲ ಮರೆಮಾಚುವಂತೆ ನಿರ್ದೇಶಕ ಸೂರ ಆಯಕಟ್ಟಿನ ಜಾಗಳಲ್ಲಿ ಮ್ಯಾಜಿಕ್ಕು ಮಾಡಿದ್ದಾರೆ. ಒಂದಿಡೀ ಕಥೆ ತೀವ್ರತೆ ಕಳೆದುಕೊಳ್ಳದಂತೆ ನೋಡಿಕೊಂಡಿರುವ ರೀತಿ, ಈ ಕ್ಷಣಕ್ಕೂ ಪ್ರಸ್ತುತವೆನ್ನಿಸುವಂತೆ, ಆಕ್ರೋಶವೆಂಬುದು ಪಾತ್ರಗಳ ಕಣ್ಣಿಂದ ನೋಡುಗರ ಮನಸಿಗೂ ನೇರವಾಗಿ ನಾಟಿಕೊಳ್ಳುವಂತೆ ದೃಷ್ಯ ಕಟ್ಟುವಲ್ಲಿ ನಿರ್ದೇಶಕರು ನಿಜಕ್ಕೂ ಭರವಸೆ ಮೂಡಿಸುತ್ತಾರೆ. ಮೆಚ್ಚುಗೆಗೆ ಪಾತ್ರರಾಗುತ್ತಾರೆ. ಇಲ್ಲಿನ ಪ್ರತೀ ಪಾತ್ರಗಳೂ ಕಾಡುತ್ತವೆ. ನಮ್ಮ ನಡುವಿನ ವಾಸ್ತವಿಕ ವಾತಾವರಣಕ್ಕೆ ತಾಳೆಯಾಗುತ್ತವೆ.

ಇನ್ನು ನಟನೆಯ ವಿಚಾರಕ್ಕೆ ಬಂದರೆ ಒಬ್ಬರನ್ನೊಬ್ಬರು ಮೀರಿಸುವಂತೆ ಕಲಾವಿದರೆಲ್ಲ ಅಭಿನಯಿಸಿದ್ದಾರೆ. ವಿಶೇಷವಾಗಿ ಶ್ರೀನಗರ ಕಿಟ್ಟಿ ಹೇಗೆ ನಟಿಸಿರಬ ಹುದೆಂಬ ಕುತೂಹಲ ಎಲ್ಲರಲ್ಲಿತ್ತು. ಅವರೊಳಗಿನ ನಿಜವಾದ ಕಲಾವಿದನಿಲ್ಲಿ ಮುಗ್ದ ಗೌಳಿಯಾಗಿ ಮನಗೆಲ್ಲುತ್ತಾನೆ. ಥೇಟು ಗೂಳಿಯಂತೆ ಅಬ್ಬರಿಸಿ ಅಚ್ಚರಿ ಮೂಡಿಸುತ್ತಾನೆ. ಒಂದಷ್ಟು ಕಾಲದಿಂದ ಮರೆಗೆ ಸರಿದಂತಿದ್ದ ಕಿಟ್ಟಿ ಪಾಲಿಗೆ ಇದೊಂದು ಮಹತ್ವದ ಚಿತ್ರ. ಅವರು ದೊಡ್ಡ ಮಟ್ಟದಲ್ಲಿಯೇ ಗೌಳಿಯ ನಂತರ ಮಿಂಚುವ ಎಲ್ಲ ಲಕ್ಷಣಗಳೂ ಗೋಚರಿಸುತ್ತಿವೆ. ಇನ್ನುಳಿದಂತೆ ಪೊಲೀಸ್ ಅಧಿಕಾರಿಯಾಗಿ ನಟಿಸಿರುವ ಶರತ್ ಲೋಹಿತಾಶ್ವರದ್ದೂ ಕೂಡಾ ಗಮನಾರ್ಹ ನಟನೆ. ಕಳೆದೇ ಹೋದಂತಿದ್ದ ಪಾವನಾಗಿಲ್ಲಿ ಒಂದೊಳ್ಳೆ ಪಾತ್ರ ಸಿಕ್ಕಿದೆ. ಅದನ್ನಾಕೆ ಚೆಂದಗೆ ನಟಿಸಿದ್ದಾಳೆ. ಗೌಳಿಯ ಚಿಕ್ಕಪ್ಪನಾಗಿ ನಟಿಸಿದ ರಂಗಾಯಣ ರಘು ಬಹು ಕಾಲದ ನಂತರ ಹೊಸಾ ಲುಕ್ಕಿನಲ್ಲಿ ಮತ್ತೆ ಪ್ರೇಕ್ಷಕರ ಮನಗೆದ್ದಿದ್ದಾರೆ.

ಒಟ್ಟಾರೆಯಾಗಿ, ಒಂದಷ್ಟು ಅತೀ ಅನ್ನಿಸುವಂಥಾ ಅಬ್ಬರ, ತರ್ಕಕ್ಕೆ ನಿಲುಕದ ಕೆಲವಾರು ಸಂಗತಿಗಳಾಚೆಗೂ ಗೌಳಿ ಇಷ್ಟವಾಗುವಂತಿದೆ. ಥಿಯೇಟರ್ ಫೀಲ್ ಅನ್ನು ಮೊಗೆಮೊಗೆದು ಕೊಡುವಂತಿರುವ ಗೌಳಿ ಮೇಕಿಂಗ್‍ನಲ್ಲೂ ಗಮನ ಸೆಳೆಯುತ್ತದೆ. ಅದರ ಸಂಪೂರ್ಣ ಕ್ರೆಡಿಟ್ಟು ನಿರ್ಮಾಪಕ ರಘು ಸಿಂಗಂ ಅವರಿಗೆ ಸಲ್ಲುತ್ತದೆ. ಒಳ್ಳೆ ಕಲಾವಿದನಾದರೂ ಸರಿಯಾದ್ದೊಂದು ಬ್ರೇಕ್ ಸಿಗದೆ ಪರಿತಪಿಸುತ್ತಿದ್ದವರು ಶ್ರೀನಗರ ಕಿಟ್ಟಿ. ಅವರ ನಸೀಬು ಗೌಳಿಯ ಮೂಲಕ ಕಳೆಗಟ್ಟಿಕೊಂಡರೆ ಅದರಲ್ಲಿ ಅಚ್ಚರಿಯೇನೂ ಇಲ್ಲ. ನವ ನಿರ್ದೇಶಕ ಸೂರಾ ಕೂಡಾ ಕನ್ನಡ ಚಿತ್ರರಂಗಕ್ಕೆ ಹೊಸಾ ದಿಕ್ಕು ತೋರಬಲ್ಲ ಪ್ರತಿಭೆ ಎಂಬುದೂ ಈ ಮೂಲಕ ಸಾಬೀತಾಗಿದೆ. ಎಲ್ಲ ವರ್ಗದ ಪ್ರೇಕ್ಷಕರಿಗೂ ಇಷ್ಟವಾಗಬಲ್ಲ ಗೌಳಿಯನ್ನು ನೀವೂ ಒಮ್ಮೆ ಕಣ್ತುಂಬಿಕೊಳ್ಳಿ!

ಕನ್ನಡ ಚಿತ್ರರಂಗದ ಅಸಲೀ ತಾಕತ್ತೇನೆಂಬುದೀಗ ಇಡೀ ದೇಶಕ್ಕೇ ಗೊತ್ತಾಗಿದೆ. ಬರೀ ಪ್ಯಾನಿಂಡಿಯಾ ಲೇಬಲ್ಲಿನ ಚಿತ್ರಗಳು ಮಾತ್ರವಲ್ಲ; ಕರ್ನಾಟಕಕ್ಕೆ ಮಾತ್ರವೇ ಸೀಮಿತವಾಗಿ ತಯಾರುಗೊಂಡ ಚಿತ್ರಗಳೂ ಕೂಡಾ ರಾಷ್ಟರಮಟ್ಟದಲ್ಲಿ ಸದ್ದು ಮಾಡುತ್ತಿವೆ. ಕೋಟಿ ಕೋಟಿ ಬಾಚಿಕೊಳ್ಳುವ ಮೂಲಕ ಎಲ್ಲರನ್ನೂ ನಿಬ್ಬೆರಗಾಗಿಸುವಂತಿವೆ. ಅದಕ್ಕೊಂದು ತಾಜಾ ಉದಾಹರಣೆ ಕಾಂತಾರ. ಇದೀಗ ಶ್ರೀನಗರ ಕಿಟ್ಟಿ ಅಭಿನಯದ ಗೌಳಿ ಚಿತ್ರದ ಮೂಲಕ ಆ ಸಮ್ಮೋಹಕ ಇತಿಹಾಸ ಮರುಕಳಿಸಲಿದೆಯಾ? ಈ ನೆಲದ ಘಮಲಿನ ನೈಜ ಕಥಾನಕವನ್ನೊಳಗೊಂಡಿರುವ ಗೌಳಿ ರಾಷ್ಟ್ರ ಮಟ್ಟದಲ್ಲಿ ಕಮಾಲ್ ಮಾಡಲಿದೆಯಾ? ಇಂಥಾ ಅನೇಕ ನೆಲೆಯಲ್ಲಿ ಪ್ರಶ್ನೆಗಳು ಮೂಡಿಕೊಂಡಿವೆ. ಈ ಸಿನಿಮಾದ ಟೀಸರ್ ನೋಡಿದವರೆಲ್ಲರ ಮನಸಲ್ಲಿ ಹೌದೆಂಬ ಉತ್ತರ ಗಟ್ಟಿಯಾಗಿ ಬೇರೂರಿಕೊಂಡಿದೆ!

ಯಾವುದೇ ಪ್ರಚಾರದ ಗಿಮಿಕ್ಕುಗಳಿಲ್ಲದೆ, ತೆರೆಗಾಣುವ ಹಾದಿಯಲ್ಲಿ ಯಾವ ಕಾರ್ಯತಂತ್ರಗಳನ್ನೂ ಅನುಸರಿಸದೆ, ತಾನೇತಾನಾಗಿ ಚಿತ್ರವೊಂದು ಈ ಪರಿಯಾಗಿ ಭರವಸೆ ಮೂಡಿಸೋದಿದೆಯಲ್ಲಾ? ಅದು ಅಪರೂಪದ ಗೆಲುವೊಂದರ ಸ್ಪಷ್ಟ ಸೂಚನೆ. ಈ ನಿಟ್ಟಿನಲ್ಲಿ ನೋಡೋದಾದರೆ, ಗೌಳಿ ಈ ಹೊಸಾ ಸಂವತ್ಸರವನ್ನು ಅಮೋಘ ಗೆಲುವಿನ ಮೂಲಕ ಸಂಪನ್ನಗೊಳಿಸುವ ಲಕ್ಷಣಗಳು ಸ್ಪಷ್ಟವಾಗಿಯೇ ಗೋಚರಿಸುತ್ತಿವೆ. ಈ ಮೂಲಕ ಯುವ ನಿರ್ದೇಶಕ ಸೂರಾ ಕನ್ನಡ ಚಿತ್ರರಂಗದ ಘನತೆಯನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯುವ ಶುಭ ಸೂಚನೆಗಳೂ ಕಾಣಿಸಲಾರಂಭಿಸಿವೆ. ಇಂಥಾ ಎಲ್ಲ ನಿರೀಕ್ಷೆ, ಭರವಸೆಗಳಿಗೆ ಕಾರಣವಾಗಿರೋದು ಗೌಳಿಯ ನೈಜ ಆಂತರ್ಯ, ಗಟ್ಟಿತನ ಎಂಬುದೇ ಚಿತ್ರಪ್ರೇಮಿಗಳೆಲ್ಲರ ಪಾಲಿಗೆ ಸಂಭ್ರಮದ ಸಂಗತಿ.

ಅಷ್ಟಕ್ಕೂ ಗೌಳಿ ಚಿತ್ರೀಕರಣ ಆರಂಭವಾದಾಗಿನಿಂದಲೂ ಒಂದಲ್ಲ ಒಂದು ರೀತಿಯಲ್ಲಿ ಸುದ್ದಿ ಮಾಡುತ್ತಲೇ ಸಾಗಿ ಬಂದಿದೆ. ಇದರ ಫಸ್ಟ್ ಲುಕ್ಕಿನಲ್ಲಿಯೇ ಹೊಸತನದ ಛಾಯೆ ಲಕಲಕಿಸಿತ್ತು. ವಿಶೇಷವೆಂದರೆ, ಈ ಸಿನಿಮಾ ಮೂಲಕ ಶ್ರೀನಗರ ಕಿಟ್ಟಿ ಮತ್ತೆ ಪ್ರೇಕ್ಷಕರನ್ನು ಮುಖಾಮುಖಿಯಾಗಲಿದ್ದಾರೆ. ಎಲ್ಲವೂ ಇದ್ದರೂ ಅದೇಕೋ ಪುಷ್ಕಳ ಗೆಲುವೊಂದು ಕಿಟ್ಟಿಯ ಪಾಲಿಗೆ ಮರೀಚಿಕೆಯಾಗಿ ಬಿಟ್ಟಿತ್ತು. ಒಂದು ಬ್ರೇಕ್‍ಗಾಗಿ, ವೃತ್ತಿ ಬದುಕು ಮತ್ತೆ ಕಳೆಗಟ್ಟಿಕೊಳ್ಳುವ ಕ್ಷಣಗಳಿಗಾಗಿ ಕಾದು ಕೂತಿದ್ದ ಕಿಟ್ಟಿ ಪಾಲಿಗೆ ವರವಾಗಿ ಸಿಕ್ಕ ಚಿತ್ರ ಗೌಳಿ. ಬಹುಶಃ ಇದರಲ್ಲಿನ ಕಿಟ್ಟಿಯ ಗೆಟಪ್ಪು ನೋಡಿದ ಯಾವ ನಟರಿಗಾದರೂ ಈ ಪಾತ್ರ ತನಗೆ ಸಿಗಬೇಕಿತ್ತೆಂಬಂಥಾ ಆಸೆ ಮೂಡದಿರಲು ಸಾಧ್ಯವಿಲ್ಲ. ಈಗಿರುವ ವಾತಾವರಣ, ಈ ಸಿನಿಮಾ ತಯಾರುಗೊಂಡಿರುವ ರೀತಿಗಳನ್ನೆಲ್ಲ ಗಮನಿಸಿದರೆ, ಖಂಡಿತವಾಗಿಯೂ ಕಿಟ್ಟಿ ವೃತ್ತಿಬದುಕಿಗೆ ಗೌಳಿ ಹೊಸಾ ಆವೇಗ ತಂದುಕೊಡಲಿದೆ ಎಂಬುದರಲ್ಲಿ ಯಾವ ಸಂದೇಹವೂ ಇಲ್ಲ.

ಟೀಸರ್ ಮೂಲಕವೇ ಇಷ್ಟೆಲ್ಲ ಭಾವಗಳನ್ನ ಮೂಡಿಸಿರುವ ಗೌಳಿ ಪ್ಯಾನಿಂಡಿಯಾ ಮಟ್ಟದಲ್ಲಿ ಕಮಾಲ್ ಮಾಡೋ ಸೂಚನೆಗಳಿವೆ. ಟೀಸರ್‍ನಲ್ಲಿಯೇ ಇದರ ಮೇಕಿಂಗ್, ಅದ್ದೂರಿತನಗಳ ಬಗ್ಗೆ ವ್ಯಾಪಕ ಮೆಚ್ಚುಗೆ ವ್ಯಕ್ತವಾಗಿತ್ತು. ಈವತ್ತು ಗೌಳಿ ಬಗ್ಗೆ ಪಡಿಮೂಡಿಕೊಂಡಿರೋ ಎಲ್ಲ ಪಾಸಿಟಿವ್ ಟಾಕ್‍ಗಳ ಹಿಂದಿರೋ ಶಕ್ತಿ ನಿರ್ಮಾಪಕರಾದ ರಘು ಸಿಂಗಂ ಎಂದರೆ ತಪ್ಪೇನಲ್ಲ. ಸಾಮಾನ್ಯವಾಗಿ ಬಹುತೇಕ ನಿರ್ಮಾಪಕರು ಜನಪ್ರಿಯ ಮಾದರಿಗಳು ಮತ್ತು ಗೆದ್ದ ಹೀರೋಗಳನ್ನಿಟ್ಟುಕೊಂಡು ರೇಸಿಗೆ ನಿಲ್ಲುವ ಉಮೇದು ಹೊಂದಿರುತ್ತಾರೆ. ಆದರೆ ನೆಲಮೂಲದ ಭಿನ್ನ ಕಥಾನಕವನ್ನು ಎದೆಗವುಚಿಕೊಂಡು ಪೊರೆಯುವ ಮನಸಿರುವವರ ಸಂಖ್ಯೆ ವಿರಳವಾಗಿದೆ. ಆ ಸಾಲಿಗೆ ನಿರಾಯಾಸವಾಗಿ ಸೇರಿಸಬಹುದಾಗ ಅಭಿರುಚಿ ಹೊಂದಿರುವವರು ರಘು ಸಿಂಗಂ!

ರಘು ಮೂಲತಃ ಉದ್ಯಮಿ. ಆದರೆ, ಆರಂಭ ಕಾಲದಿಂದಲೂ ಅಪಾರವಾದ ಸಿನಿಮಾ ಪ್ರೇಮ ಹೊಂದಿದ್ದ ರಘು, 2009ರ ಸುಮಾರಿಗೆ ನಿರ್ಮಾಣ ವಿಭಾಗದ ಮೂಲಕ ಚಿತ್ರರಂಗಕ್ಕೆ ಎಂಟ್ರಿ ಕೊಟ್ಟಿದ್ದರು. ಆ ನಂತರ ಒಂದಷ್ಟು ಸಿನಿಮಾಗಳ ನಿರ್ಮಾಣದಲ್ಲಿ ಭಾಗಿಯಾಗುತ್ತಾ, ತಮ್ಮೊಳಗಿನ ಕನ ಸು ನನಸಾಗಿಸೋದರತ್ತ ತುಡಿಯುತ್ತಿದ್ದ ಅವರ ಪಾಲಿಗೆ ಅಚಾನಕ್ಕಾಗಿ ಎದುರಾದವರು ಯುವ ನಿರ್ದೇಶಕ ಸೂರ. ಹಾಗೆ ನೋಡಿದರೆ, ಸಿನಿಮಾ ನಿರ್ಮಾಣ ಎಂಬುದೂ ಕೂಡಾ ಒಂದು ಉದ್ಯಮವೇ. ಹಾಗಂತ ನಿರ್ಮಾಪಕರಿಗೆ ವ್ಯವಹಾರದಾಚೆಯ ಪ್ರೀತಿ ಇಲ್ಲದೇ ಹೋದರೆ ಚೆಂದದ ಸಿನಿಮಾಗಳು ರೂಪುಗೊಳ್ಳಲು ಸಾಧ್ಯವಾಗೋದಿಲ್ಲ. ಹೀಗಿದ್ದರೂ ಕೂಡಾ ನಿರ್ಮಾಣದ ವಿಚಾರದಲ್ಲಿಯೂ ಭಿನ್ನ ಅಭಿರುಚಿ ಇಟ್ಟುಕೊಂಡು, ಮಾಡಿದರೆ ಇಂಥಾ ಸಿನಿಮಾ ನಿರ್ಮಾಣ ಮಾಡಬೇಕೆಂಬಂಥಾ ನಿಖರ ಗುರಿ ಹೊಂದಿರುವವರು ಕಡಿಮೆ. ಆದರೆ, ರಘು ಸಿಂಗಂ ಅವರ ದಾರಿಯೇ ಬೇರೆ!

ನೈಜ ಘಟನೆ ಆಧರಿಸಿದ, ರಗಡ್ ಸಿನಿಮಾವೊಂದನ್ನು ನಿರ್ಮಾಣ ಮಾಡಬೇಕೆಂಬುದು ರಘು ಅವರ ಬಹು ವರ್ಷಗಳ ಕನಸಾಗಿತ್ತು. ಆ ಪ್ರಯತ್ನದಲ್ಲಿದ್ದ ಅವರನ್ನು ಭೇಟಿಯಾಗಿ, ಒಂದೇ ಏಟಿಗೆ ಸೆಳೆಯುವಂಥಾ ರಾ ಕಥಾನಕವೊಂದನ್ನು ತೆರೆದಿಟ್ಟವರು ಪ್ರತಿಭಾನ್ವಿತ ಯುವ ನಿರ್ದೇಶಕ ಸೂರ. ಅದು ನೈಜ ಚಿತ್ರಣವೇ ಆವಿರ್ಭವಿಸಿದಂತಿದ್ದ ಕಥೆ. ಸಿರಸಿಗೆ ಆತುಕೊಂಡಂತಿರುವ ಯಲ್ಲಾಪುರ ಭಾಗದವರಾದ ಸೂರ, ಅಲ್ಲಿ ನೆಲೆಸಿರುವ ಗೌಳಿ ಸಮುದಾಯದ ನಡುವೆ ನಡೆದ ನೈಜ ಘಟನಾವಳಿಗಳಿಗೆ ಸಿನಿಮಾ ರೂಪ ನೀಡಿದ್ದರು. ಅದನ್ನು ಕೇಳಿ ಥ್ರಿಲ್ ಆದ ರಘು ಸಿಂಗಂ ಆ ಕ್ಷಣವೇ ನಿರ್ಮಾಣ ಮಾಡಲು ಒಪ್ಪಿಗೆ ಸೂಚಿಸಿದ್ದರಂತೆ. ಆ ನಂತರ ಗೌಳಿ ಎಂಬ ರಗಡ್ ಶೀರ್ಷಿಕೆ ಫಿಕ್ಸಾಗಿ, ಅದಕ್ಕೆ ಶ್ರೀನಗರ ಕಿಟ್ಟಿ ನಾಯಕನಾಗಿ ನಿಕ್ಕಿಯಾಗಿ, ಉಳಿಕೆ ಪಾತ್ರ ವರ್ಗದ ಆಯ್ಕೆ ಕಾರ್ಯಗಳೆಲ್ಲವೂ ಖುದ್ದು ರಘು ಅವರ ಸಮ್ಮುಖದಲ್ಲಿಯೇ ಫೈನಲ್ ಆಗಿದ್ದವು.

ಆ ನಂತರದಲ್ಲಿ ತಿಂಗಳುಗಟ್ಟಲೆ ಶಿರಸಿ, ಯಲ್ಲಾಪುರ ಸೀಮೆಯಲ್ಲಿ ಚಿತ್ರೀಕರಣವಾದ ಅನುಭವ ರಘು ಸಿಂಗಂ ಅವರ ಮನಸಲ್ಲಿ ರೋಮಾಂಚಕ ಅನುಭೂತಿಯಂತೆ ಅಚ್ಚೊತ್ತಿದೆ. ಅವರು ಹಣಕಾಸಿನ ಅಂಕೆಯಿಲ್ಲದೆ, ಈ ಚಿತ್ರವನ್ನು ಅದ್ದೂರಿಯಾಗಿ ನಿರ್ಮಾಣ ಮಾಡಿದ್ದಾರೆ. ಪ್ಯಾನಿಂಡಿಯಾ ಲೆವೆಲ್ಲಿನಲ್ಲಿ ಹವಾ ಸೃಷ್ಟಿಸಲು ಏನು ಬೇಕೋ ಅದೆಲ್ಲವನ್ನೂ ವ್ಯವಸ್ಥೆ ಮಾಡಿಸಿದ್ದಾರೆ. ನಿರ್ದೇಶಕ ಸೂರ ಆರಂಭದಲ್ಲಿ ಮಾತು ಕೊಟ್ಟಿದ್ದಕ್ಕಿಂತಲೂ ಒಂದಷ್ಟು ಪಟ್ಟು ಹೆಚ್ಚು ಪರಿಣಾಮಕಾರಿಯಾಗಿ ಗೌಳಿಯನ್ನು ರೂಪಿಸಿದ್ದಾರೆಂಬ ಮೆಚ್ಚುಗೆ ರಘು ಅವರಲ್ಲಿದೆ. ಇದೀಗ ಚಿತ್ರೀಕ,ರಣವನ್ನೆಲ್ಲ ಮುಗಿಸಿಕೊಂಡಿರುವ ಗೌಳಿ ಸೆನ್ಸಾರ್‍ನತ್ತ ಮುಖ ಮಾಡಿ ನಿಂತಿದೆ.

ಇನ್ನೇನು ಶೀಘ್ರದಲ್ಲಿಯೇ ಟ್ರೈಲರ್ ಲಾಂಚ್ ಮಾಡಲು ರಘು ಸಿಂಗಂ ತಯಾರಾಗುತ್ತಿದ್ದಾರೆ. ಫೆಬ್ರವರಿ ಅಥವಾ ಮಾರ್ಚ್ ತಿಂಗಳಲ್ಲಿ ಗೌಳಿಯನ್ನು ತೆರೆಗಾಣಿಸುವ ಯೋಚನೆಯೂ ಅವರಲ್ಲಿದೆ. ಒಟ್ಟಾರೆಯಾಗಿ ಒಂದು ಅಪರೂಪದ ರಗಡ್ ಸಿನಿಮಾ ಮಾಡಿರುವ ಆತ್ಮತೃಪ್ತಿ ಮತ್ತು ಅದು ದೊಡ್ಡ ಮಟ್ಟದಲ್ಲಿ ಗೆಲುವು ಕಾಣುತ್ತದೆಂಬ ಅಚಲ ಆತ್ಮವಿಶ್ವಾಸ ಅವರಲ್ಲಿದೆ. ಸದ್ಯಕ್ಕೆ ಪ್ರೇಕ್ಷಕರ ನಡುವೆ ಗೌಳಿ ಹುಟ್ಟು ಹಾಕಿರುವ ಕ್ರೇಜ್ ನೋಡಿದರೆ, ಗೌಳಿಗೆ ರೋಮಾಂಚಕ ಗೆಲುವು ಸಿಗುವುದು ಗ್ಯಾರೆಂಟಿ ಎಂಬಂತಿದೆ. ಈ ಚಿತ್ರದ ಮೂಲಕ ಕನಸುಗಾರ, ಸಾಹಸಿ ನಿರ್ಮಾಪಕ ಕನ್ನ ಡ ಚಿತ್ರರಂಗಕ್ಕೆ ಸಿಕ್ಕಂತಾಗಿದೆ. ಗೌಳಿ ದೊಡ್ಡ ಮಟ್ಟದ ಗೆಲುವು ಕಾಣಲಿ. ರಘು ಸಿಂಗಂ ಇನ್ನೂ ಅನೇಕ ಭಿನ್ನ ಬಗೆಯ ಯಶಸ್ವೀ ಚಿತ್ರಗಳನ್ನು ನಿರ್ಮಾಣ ಮಾಡಲೆಂಬುದು ಹಾರೈಕೆ!