ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಹುಟ್ಟುಹಬ್ಬ ಹತ್ತಿರಾಗಿದೆ. ತಮ್ಮ ಆರಾಧ್ಯ ನಟನ ಅನುಪಸ್ಥಿತಿಯಲ್ಲಿ ಹುಟ್ಟುಹಬ್ಬ ಆಚರಿಸಬೇಕಾದ ಸಂಕಟವನ್ನು ಎದೆಯಲ್ಲಿಟ್ಟುಕೊಂಡೇ ಅಭಿಮಾನಿಗಳೆಲ ಪುನೀತ್ ಬರ್ತ್‍ಡೇಗೆ ಅಣಿಗೊಳ್ಳುತ್ತಿದ್ದಾರೆ. ಇದೇ ಹೊತ್ತಿನಲ್ಲಿ ಅಪ್ಪು ಕನಸಿನ ಕೂಸಿನಂತಿದ್ದ, ಅವರ ಭಿನ್ನ ಅಭಿರುಚಿಗಳ ಧ್ಯೋತಕದಂತಿದ್ದ ಗಂಧದ ಗುಡಿ ಸಾಕ್ಷ್ಯ ಚಿತ್ರ ಓಟಿಟಿಗೆ ಆಗಮಿಸೋ ಕ್ಷಣಗಳೂ ಹತ್ತಿರಾಗುತ್ತಿವೆ. ಅಪ್ಪು ಹುಟ್ಟಿದ ದಿನದಂದು ಅಂದರೆ, ಇದೇ ತಿಂಗಳ ಹದಿನೇಳರಿಂದ ಗಂಧದ ಗುಡಿ ಓಟಿಟಿ ಪ್ಲಾಟ್ ಫಾರ್ಮಿಗೆ ಎಂಟರಿ ಕೊಡಲಿದೆ. ಇನ್ನು ಮುಂದೆ ಕಣ್ಣಂಚು ದಾಟಿ ಗಂಧದ ಗುಡಿಯ ಕಾಡಿನಲ್ಲಿ ಲೀನವಾದ ಅಪ್ಪು ನೆನಪುಗಳನ್ನು ಬೆರಳ ಮೊನೆಯಲ್ಲಿಯೇ ನೇವರಿಸಬಹುದು; ಪದೇ ಪದೆ ಸಂಭ್ರಮಿಸಬಹುದು!

ಇದು ಆಧುನೀಕರಣದ ಭರಾಟೆಗೆ ಸಿಕ್ಕು ಕಾಡುಗಳೆಲ್ಲ ನಾಮಾವಶೇಷ ಹೊಂದುತ್ತಿರುವ ಕಾಲಮಾನ. ಮತ್ತೊಂದೆಡೆಯಿಂದ, ಅಳಿದುಳಿದ ಕಾಡುಗಳೂ ಕೂಡಾ ಮೋಜು ಮಸ್ತಿಯ ಕೇಂದ್ರವಾಗಿ, ಟ್ರಕ್ಕಿಂಗಿನ ಹೆಸರಲ್ಲಿ ಪ್ಲಾಸ್ಟಿಕ್ ತ್ಯಾಜ್ಯಗಳ ಡಂಪಿಂಗ್ ಯಾರ್ಡಿನಂತಾಗಿವೆ. ಇಂಥಾ ವಾತಾವರಣದಲ್ಲಿ, ಕರ್ನಾಟಕದ ಕಾಡು, ಮೇಡು ಪ್ರಾಕೃತಿಕ ಸೌಂದರ್ಯದತ್ತ ಫೋಕಸ್ಸು ಮಾಡುತ್ತಾ, ನಿರ್ದೇಶಕ ಅಮೋಘವರ್ಷರ ಜೊತೆ ಸಹಜವಾಗಿ ಹೆಜ್ಜೆ ಹಾಕುತ್ತಾ, ಕರುನಾಡ ಮಂದಿಗೆ ಬೇರೆಯದ್ದೇ ಜಗತ್ತೊಂದನ್ನು ಪರಿಚಯಿಸಿದ್ದವರು ಪುನೀತ್ ರಾಜ್‍ಕುಮಾರ್.

ಬಹುಶಃ ಸ್ಟಾರ್ ನಟನೊಬ್ಬ ಇಂಥಾ ಭಿನ್ನ ಪ್ರಯೋಗಗಳಿಗೆ ಒಡ್ಡಿಕೊಳ್ಳೋದೇ ಅಪರೂಪ. ಅಂಥಾದ್ದರಲ್ಲಿ ಪುನೀತ್ ಕಮರ್ಶಿಯಲ್ ಚೌಕಟ್ಟಿನಾಚೆ, ಸಾಮಾಜಿಕ ಕಳಕಳಿಯ ಭಾಗವಾಗಿದ್ದದ್ದು ಅಭಿಮಾನದಾಚೆಗೂ ಮೆಚ್ಚುಗೆ ಪಡೆದುಕೊಂಡಿತ್ತು. ದುರಂತವೆಂದರೆ, ಸಾಕ್ಷ್ಯಚಿತ್ರ ಬಿಡುಗಡೆಯ ಹೊಸ್ತಿಲಿನಲ್ಲಿರುವಾಗಲೇ ಪುನೀತ್ ರಾಜ್ ಕುಮಾರ್ ನಿಧನ ಹೊಂದಿದ್ದರು. ಬಹುವಾಗಿ ಇಷ್ಟಪಟ್ಟು ಭಾಗಿಯಾಗಿದ್ದ ಗಂಧದ ಗುಡಿಯೇ ಅಪ್ಪುವಿನ ಕೊನೇಯ ಸಿನಿಮಾ ಪಯಣವಾಗಿ ದಾಖಲಾಗಿತ್ತು. ಅಂಥಾದ್ದೊಂದು ಸೆಂಟಿಮೆಂಟಿನ ಕಾರಣಕ್ಕೇ ಗಂಧದಗುಡಿ ದೊಡ್ಡ ಮಟ್ಟದಲ್ಲಿ ಗೆದ್ದಿತ್ತು ಅಂದುಕೊಳ್ಳಬೇಕಿಲ್ಲ. ಅಪ್ಪು ನಮ್ಮ ಜೊತೆ ಇದ್ದಿದ್ದರೂ ಆ ಕ್ರೇಜ್ ಇದೇ ರೀತಿ ಇರುತ್ತಿತ್ತು. ಅಪ್ಪು ಇಲ್ಲದ ಈ ಘಳಿಗೆಯಲ್ಲಿ ಓಟಿಟಿಗೆ ಆಗಮಿಸುತ್ತಿರುವ ಗಂಧದಗುಡಿ ಒಂದು ಥ್ರಿಲ್ ಮೂಡಿಸಿರೋದಂತೂ ಸತ್ಯ!

The post ಕಣ್ಣಂಚು ದಾಟಿ ಕಾಡಲ್ಲಿ ಲೀನವಾಯ್ತು ಅಪ್ಪು ನೆನಪು! appeared first on ಶೋಧ ನ್ಯೂಸ್ - Shodha News.

ಕನ್ನಡ ಚಿತ್ರರಂಗವೀಗ ಗೆಲುವಿನ ನಾಗಾಲೋಟದಲ್ಲಿದೆ. ಎಲ್ಲರ ಚಿತ್ರವೂ ಸ್ಟಾರ್‍ಗಳ ಸಿನಿಮಾಗಳತ್ತ ನೆಟ್ಟುಕೊಂಡು, ಪ್ಯಾನಿಂಡಿಯಾ ಕನವರಿಕೆಯಲ್ಲಿ ಬಹುತೇಕರು ಕಳೆದು ಹೋಗಿದ್ದಾರೆ. ಅದರ ನಡುವಲ್ಲಿಯೇ ಸೀಮಿತ ಚೌಕಟ್ಟಿನಲ್ಲಿಯೂ ಪ್ರೇಕ್ಷಕರ ಅಭಿರುಚಿಯನ್ನು ಕಾಪಿಟ್ಟುಕೊಳ್ಳುವಂಥಾ ಭಿನ್ನ ಪ್ರಯತ್ನಗಳು ಒಂದರ ಹಿಂದೊಂದರಂತೆ ನಡೆಯುತ್ತಿವೆ. ಹೀಗೆ ಪಕ್ಕಾ ಕಮರ್ಶಿಯಲ್ ಸಿನಿಮಾಗಳ ಶಕೆಯೊಂದು ಆರಂಭವಾಗಿರುವ ಈ ಹೊತ್ತಿನಲ್ಲಿ, ಒಂದಷ್ಟು ಸಿನಿಮಾ ಪ್ರೇಮಿಗಳು ಕಾದಂಬರಿ ಆಧಾರಿತ ಸೂಕ್ಷ್ಮ ಕಥಾನಕಗಳನ್ನು ಕನವರಿಸುತ್ತಿದ್ದಾರೆ. ಅಂಥ ಸದಬಿರುಚಿಯ ಪ್ರೇಕ್ಷಕರೆಲ್ಲ ಖುಷಿಗೊಳ್ಳುವಂತೆ `ಚೌಕಬಾರ’ ಎಂಬ ಸಿನಿಮಾವೊಂದು ರೂಪುಗೊಂಡು, ಬಿಡುಗಡೆಗೆ ತಯಾರಾಗಿ ನಿಂತಿದೆ!

ಅಂದಹಾಗೆ, ಚೌಕಬಾರ ಚಿತ್ರ ಹಂತ ಹಂತವಾಗಿ ಸುದ್ದಿ ಮಾಡುತ್ತಾ, ಈಗಾಗಲೇ ಪ್ರೇಕ್ಷಕರನ್ನು ತನ್ನತ್ತ ಸೆಳೆದುಕೊಂಡಿದೆ. ವಿಶೇಷವೆಂದರೆ, ತೊಂಭತ್ತರ ದಶಕದ ಆರಂಭ ಕಾಲದಿಂದಲೂ ಕಿರುತೆರೆಯಲ್ಲಿ ಸ್ಟಾರ್‍ಗಿರಿ ಪಡೆದುಕೊಂಡಿದ್ದ ವಿಕ್ರಮ್ ಸೂರಿ ಈ ಸಿನಿಮಾವನ್ನು ನಿರ್ದೇಶಕನ ಮಾಡಿದ್ದಾರೆ. ಅವರ ಮಡದಿ ನಮಿತಾ ರಾವ್ ನಿರ್ಮಾಣದೊಂದಿಗೆ, ನಾಯಕಿಯಾಗಿಯೂ ನಟಿಸಿದ್ದಾರೆ. ಕಿರುತೆರೆಯಲ್ಲಿ ಸ್ಟಾರ್ ಜೋಡಿ ಅಂತಲೇ ಹೆಸರಾಗಿರುವ ಈ ದಂಪತಿ ಚೌಕಬಾರದೊಂದಿಗೆ ಸಿನಿಮಾ ನಿರ್ಮಾಣ ಕ್ಷೇತ್ರಕ್ಕೂ ಪಾದಾರ್ಪಣೆ ಮಾಡಿದ್ದಾರೆ. ಬದುಕಿನ ಸೂಕ್ಷ್ಮ ಪದರುಗಳನ್ನು ತೆರೆದಿಡುವ, ಭಾವನಾತ್ಮಕ ಅಂಶಗಳನ್ನೊಳಗೊಂಡಿರುವ ಚೆಂದದ ಸಿನಿಮಾವೊಂದನ್ನು ರೂಪಿಸಿದ ತುಂಬು ಖುಷಿ ಈ ದಂಪತಿಯ ಕಣ್ಣುಗಳಲ್ಲಿ ಕುಣಿದಾಡುತ್ತಿದೆ.

ಮಣಿ ಆರ್ ರಾವ್ ಬರೆದಿರುವ ಭಾವನಾ ಎಂಬ ಕಾದಂಬರಿ ಸಾಹಿತ್ಯ ಲೋಕದ ಗಮನ ಸೆಳೆದಿತ್ತು. ಅದನ್ನು ಬಹುವಾಗಿ ಮೆಚ್ಚಿಕೊಂಡ ವಿಕ್ರಮ್ ಸೂರಿ ಅದಕ್ಕೆ ದೃಷ್ಯ ರೂಪ ಕೊಡಲು ಮುಂದಾಗಿದ್ದರು. ಮಡದಿ ನಮಿತಾರ ಒತ್ತಾಸೆಯ ಮೇರೆಗೆ ತಾವೇ ಹೋಂ ಬ್ಯಾನರ್ ತೆರೆದು, ಆ ಮೂಲಕವೇ ನಿರ್ಮಾಣದ ಸಾಹಸಕ್ಕೂ ತಮ್ಮನ್ನು ತಾವು ಒಡ್ಡಿಕೊಂಡಿದ್ದಾರೆ. ಭಾವನಾತ್ಮಕ ಅಂಶಗಳನ್ನು ಒಳಗೊಂಡಿರುವ ಈ ಚಿತ್ರ ಎಲ್ಲ ವರ್ಗದ ಪ್ರೇಕ್ಷಕರಿಗೂ ಹಿಡಿಸುವಂತೆ ಮೂಡಿ ಬಂದಿದೆಯಂತೆ. ಈ ಮೂಲಕ ಕಿರುತೆರೆಯ ಸ್ಟಾರ್ ಜೋಡಿ ಮತ್ತೆ ಹಿರಿತೆರೆಯಲ್ಲಿ ಅದೃಷ್ಟ ಪರೀಕ್ಷೆಗಿಳಿದಿದೆ. ಖುದ್ದ ಡಾ.ರಾಜ್‍ಕುಮಾರ್ ಅವರಿಂದಲೇ ಮೆಚ್ಚುಗೆ ಪಡೆದುಕೊಂಡಿದ್ದ ಪ್ರತಿಭೆ ನಮಿತಾ ಇಲ್ಲಿ ಚೆಂದದ ಪಾತ್ರವೊಂದನ್ನು ನಿರ್ವಹಿಸಿದ್ದಾರೆ. ಚೌಕಬಾರ ಫೆಬ್ರವರಿ ತಿಂಗಳಲ್ಲಿ ತೆರೆಗಾಣಲಿದೆ. ವಿಶೇಷವೆಂದರೆ, ಈ ಚಿತ್ರದ ಆಡಿಯೋ ಲಾಂಚ್ ಅನ್ನು ಪುನೀತ್ ರಾಜ್‍ಕುಮಾರ್ ಮಾಡಿದ್ದರು. ಸಿನಿಮಾದ ಬಗ್ಗೆ ಭರವಸೆಯ ಮಾತುಗಳನ್ನಾಡಿ ಶುಭ ಹಾರೈಸಿದ್ದರು.

ಕಾದಂಬರಿ ಆಧಾರಿತ ಚಿತ್ರಗಳೆಂದರೇನೇ ಪ್ರೇಕ್ಷಕರ ಮನಸಲ್ಲೊಂದು ಆಹ್ಲಾದದ ಛಳುಕು ಮೂಡಿಕೊಳ್ಳುತ್ತೆ. ಅದ್ಯಾವ ಬಗೆಯ ಸಿನಿಮಾಗಳ ಭರಾಟೆಯಿದ್ದರೂ ಕಾದಂಬರಿ ಆಧಾರಿತ ಚಿತ್ರಗಳ ಫ್ಲೇವರ್ ಮಾತ್ರ ಈವತ್ತಿಗೂ ತಗಾಜಾ ಅನುಭೂತಿಯನ್ನು ಕಾಪಿಟ್ಟುಕೊಂಡಿದೆ. ಅಂಥಾ ಪ್ರೇಕ್ಷಕ ವರ್ಗವನ್ನು ಸಂತೃಪ್ತಗೊಳಿಸುವ ಗುಣಗಳೊಂದಿಗೆ ರೂಪುಗೊಂಡಿರುವ ಚಿತ್ರ ಚೌಕಬಾರ. ನಟನಾಗಿ ಈಗಾಗಲೇ ಬಲು ಪ್ರಸಿದ್ಧಿ ಪಡೆದುಕೊಂಡಿರುವ ವಿಕ್ರಮ್ ಸೂರಿ ನಿರ್ದೇಶಕನಾಗಿ ಈ ಮೂಲಕ ಎರಡನೇ ಬಾರಿ ಪ್ರೇಕ್ಷಕರನ್ನು ಮುಖಾಮುಖಿಯಾಗುತ್ತಿದ್ದಾರೆ. ಸಾಕಷ್ಟು ತಯಾರಿ ಮಾಡಿಕೊಂಡೇ ಈ ಚಿತ್ರವನ್ನು ರೂಪಿಸಿರುವ ಅವರಿಗೆ, ಚೌಕಬಾರ ಜನಮನ ಸೆಳೆಯುತ್ತದೆಂಬಂಥಾ ತುಂಬು ನಂಬಿಕೆ ಇದೆ. ಇದರ ಕಂಟೆಂಟು, ತಯಾರುಗೊಂಡಿರುವ ರೀತಿಯನ್ನೆಲ್ಲ ಗಮನಿಸಿದರೆ ಅದು ನಿಜವಾಗೋ ಲಕ್ಷಣಗಳೇ ಮಿರುಗಿದಂತೆ ಭಾಸವಾಗುತ್ತಿದೆ.

The post ಇದು ಕಿರುತೆರೆಯ ಸ್ಟಾರ್ ಜೋಡಿಯ ಭಿನ್ನ ಯಾನ! appeared first on ಶೋಧ ನ್ಯೂಸ್ - Shodha News.

ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಭೌತಿಕವಾಗಿ ಮರೆಯಾಗಿ ವರ್ಷವೊಂದು ಉರುಳಿ ಹೋಗಿದೆ. ಕಳೆದ ವರ್ಷ ಸರಿಯಾಗಿ ಈ ಸಮಯಕ್ಕೆ ಹಬ್ಬಿಕೊಂಡಿದ್ದ ಸೂತಕ, ದಿಕ್ಕುದೆಸೆಗಳಿಲ್ಲದೆ ಹರಿದಿದ್ದ ಕಣ್ಣೀರ ಕೋಡಿ ಮತ್ತು ಪ್ರೀತಿಯ ಅಪ್ಪುವನ್ನು ಮರಳಿ ಪಡೆಯುವ ಕೋರಿಕೆಗಳೆಲ್ಲವೂ ಇನ್ನೂ ಹಸಿಯಾಗಿವೆ. ಈ ಕ್ಷಣಕ್ಕೂ ಇಲ್ಲೇ ಎಲ್ಲೋ ಹೋಗಿರೋ ಅಪ್ಪು ಮರಳಿ ಬರಬಹುದೆಂಬಂಥಾ ಭಾವುಕತೆಯ ಪಸೆ ಕೋಟಿ ಮನಸುಗಳಲ್ಲಿ ಹಾಗೆಯೇ ಉಳಿದುಕೊಂಡಿದೆ. ಈ ಹಂತದಲ್ಲಿ ಪುನೀತ್‌ರನ್ನು ನಾನಾ ರೀತಿಯಲ್ಲಿ ಸ್ಮರಿಸಿಕೊಳ್ಳುತ್ತಾ, ಅವರ ಪ್ರಾಂಜಲ ನಗುವನ್ನು ಧ್ಯಾನಿಸುತ್ತಾ ಅಭಿಮಾನಿ ಬಳಗವೂ ಸಮಾಧಾನಿಸಿಕೊಳ್ಳುತ್ತಿದೆ. ಇದೆಲ್ಲದರ ನಡುವಲ್ಲಿಯೇ ಮಗು ಮನಸಿನ ಅಪ್ಪವನ್ನು ಅಷ್ಟು ಬೇಗನೆ ಕಸಿದುಕೊಂಡ ವಿಧಿಯೆಡೆಗಿನ ಕೋಪವೂ ಕೂಡಾ ಕೆಂಡಗಟ್ಟಿಕೊಂಡು ಸುಡಲಾರಂಭಿಸಿದೆ.

ಪಾದರಸದಂಥಾ ವ್ಯಕ್ತಿತ್ವ ಹೊಂದಿದ್ದ ಪುನೀತ್ ಯಾನ ಅರ್ಧ ಹಾದಿಯಲ್ಲಿಯೇ ಕೊನೆಗೊಂಡಿದೆ. ಅವೊಳಗಿದ್ದ ಅದೆಷ್ಟೋ ಕನಸುಗಳೂ ಕೂಡಾ ಅವರೊಂದಿಗೇ ಮಣ್ಣಲ್ಲಿ ಮಣ್ಣಾಗಿ ಹೋಗಿವೆ. ಅಪ್ಪು ಅದೆಂಥಾ ಜೀವನಪ್ರೀತಿ ಹೊಂದಿದ್ದರು, ಆಸು ಪಾಸಿನಲ್ಲಿ ಸುಳಿಯುವ ಜೀವಗಳನ್ನು ಅದೆಷ್ಟು ತೀವ್ರವಾಗಿ ಪ್ರೀತಿಸುತ್ತಿದ್ದರೆಂಬುದು ಎಲ್ಲರಿಗೂ ಗೊತ್ತಿರುವ ವಿಚಾರವೇ. ಆದರೆ, ಪುನೀತ್ ತಮ್ಮ ಕನಸುಗಳನ್ನೂ ಕೂಡಾ ಅಷ್ಟೇ ತೀವ್ರವಾಗಿ ಪ್ರೀತಿಸುತ್ತಿದ್ದರು. ಅವರು ತೀರಾ ಹತ್ತಿರದವರ ಬಳಿಯೇ ತಮ್ಮ ಕನಸುಗಳ ಬಗ್ಗೆ, ಮುಂದಿನ ಹೆಜ್ಜೆಗಳ ಬಗ್ಗೆ ಹೇಳಿಕೊಳ್ಳುತ್ತಿದ್ದದ್ದು ಅಪರೂಪ. ಯಾಕೆಂದರೆ, ಪುನೀತ್ ಪ್ರತೀ ಕ್ಷಣವೂ ತಮ್ಮ ಕನಸುಗಳ ಸಾಕಾರಕ್ಕಾಗಿ ಕಾರ್ಯಪ್ರವೃತ್ತರಾಗಿರುತ್ತಿದ್ದರು.

ಹಾಗಾದರೆ, ಅಪ್ಪು ಎದೆಯಲ್ಲಿಯೇ ಉಳಿದು ಹೋದ, ಅವರೊಂದಿಗೇ ಮಣ್ಣಾಗಿ ಹೋದ ಕನಸುಗಳ್ಯಾವುವು ಅಂತ ನೋಡ ಹೋದರೆ ಆರಂಭದಲ್ಲಿಯೇ ಅಂತ್ಯ ಕಂಡ ಒಂದಷ್ಟು ಸಿನಿಮಾಗಳು ನೆನಪಾಗುತ್ತವೆ. ಸಿನಿಪ್ರೇಮಿಗಳಲ್ಲೊಂದು ಬೆರಗು ಮೂಡಿಸಿದ್ದ ಪವನ್ ಕುಮಾರ್ ನಿರ್ದೇಶನದ ದ್ವಿತ್ವ ಚಿತ್ರ ನೆನಪಾಗುತ್ತೆ. ಸ್ಟಾರ್‌ಡಮ್, ಇಮೇಜು ಅಂತೆಲ್ಲ ನೋಡದೆ, ಪ್ರಯೋಗಾತ್ಮಕ ತುಡಿತ ಹೊಂದಿದ್ದವರು ಪುನೀತ್. ಅದಿಲ್ಲದೆ ಹೋಗಿದ್ದರೆ ಅವರು ಖಂಡಿತವಾಗಿಯೂ ದ್ವಿತ್ವದಂಥಾ ಭಿನ್ನ ಕಥಾನಕವನ್ನು ಒಪ್ಪಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಬಹುಶಃ ಪುನೀತ್ ಇಂದು ನಮ್ಮೊಂದಿಗಿದ್ದಿದ್ದರೆ, ದ್ವಿತ್ವ ಕೂಡಾ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡಲಾರಂಭಿಸುತ್ತಿತ್ತು. ಅದು ಪ್ಯಾನಿಂಡಿಯಾ ಲೆವೆಲ್ಲಿನಲ್ಲಿ ಹವಾ ಸೃಷ್ಟಿಸಿದ್ದರೂ ಅಚ್ಚರಿಯೇನಿಲ್ಲ.

ಕೇವಲ ದ್ವಿತ್ವ ಮಾತ್ರವಲ್ಲ; ಮತ್ತೊಂದಷ್ಟು ಸಿನಿಮಾಗಳೂ ಆರಂಭದಲ್ಲಿಯೇ ಅಂತ್ಯ ಕಂಡಿವೆ. ಪುನೀತ್ ಬದುಕಿದ್ದಿದ್ದರೆ, ಈ ವರ್ಷ ಒಂದರ ಹಿಂದೊಂದರಂತೆ ವಿಭಿನ್ನ ಬಗೆಯ ಸಿನಿಮಾಗಳು ಸಂಚಲನ ಸೃಷ್ಟಿಸುತ್ತಿದ್ದವು. ಹಾಗಂತ, ಪುನೀತ್ ಕನಸುಗಳು ಆ ಪರಿಧಿಗೆ ಮಾತ್ರವೇ ಸೀಮಿತವಾದವುಗಳಲ್ಲ. ಪಿಆರ್‌ಕೆ ಸಂಸ್ಥೆಯ ಮೂಲಕ ಇನ್ನೂ ಒಂದಷ್ಟು ಹೊಸಾ ಬಗೆಯ ಸಿನಿಮಾಗಳನ್ನು ಮಾಡಿ, ಹೊಸಬರ ಬೆನ್ತಟ್ಟುವ ನಿಟ್ಟಿನಲ್ಲಿ ಅಪ್ಪು ಕಾರ್ಯೋನ್ಮುಖರಾಗಿದ್ದರು. ಹೊಸ ಪ್ರತಿಭಾವಂತರ ಪಾಲಿಗೆ ಪುನೀತ್ ಸಾರಥ್ಯದ ಪಿಆರ್‌ಕೆ ಮಹಾ ಭರವಸೆಯಂತಿತ್ತು. ಅದನ್ನೀಗ ಅಶ್ವಿನಿ ಮುಂದುವರೆಸುತ್ತಿದ್ದಾರಾದರೂ, ಪುನೀತ್ ಆಲೋಚನೆಗಳನ್ನು ಗ್ರಹಿಸಿಕೊಂಡು ಅದಕ್ಕೆ ತಕ್ಕುದಾಗಿ ಮುಂದುವರೆಯೋದು ತುಸು ಸವಾಲಿನ ಸಂಗತಿಯಾಗಿಯೇ ಕಾಣಿಸುತ್ತದೆ.

ಇದೆಲ್ಲಕ್ಕಿಂತ ಮುಖ್ಯವಾಗಿ, ಪುನೀತ್ ರಾಜ್‌ಕುಮಾರ್ ವಿಚಾರದಲ್ಲಿ ಗಮನ ಸೆಳೆಯೋದು ಅವರೊಳಗೆ ಅತೀವವಾಗಿದ್ದ ಅಣ್ಣಂದಿರ ಮೇಲಿನ ಪ್ರೀತಿ. ರಾಘವೇಂದ್ರ ರಾಜ್‌ಕುಮಾರ್ ಮತ್ತು ಶಿವಣ್ಣನ ಪಾಲಿಗೆ ಅಪ್ಪು ಸದಾ ಮಗುವಾಗಿದ್ದವರು. ಶಿವಣ್ಣನನ್ನೂ ತೀವ್ರವಾಗಿ ಹಚ್ಚಿಕೊಳ್ಳುತ್ತಾ, ಅವರ ನಟನಾ ಬದುಕನ್ನು ಸ್ಫೂರ್ತಿಯಾಗೆ ತೆಗೆದುಕೊಂಡಿದ್ದವರು ಅಪ್ಪು. ಶಿವಣ್ಣನ ಎನರ್ಜಿ ಲೆವೆಲ್ಲಿನ ಬಗ್ಗೆ ಓರ್ವ ಅಭಿಮಾನಿಯಂತೆಯೇ ಅಚ್ಚರಿ ಮತ್ತು ಆರಾಧನೆ ಹೊಂದಿದ್ದ ಅಪ್ಪು, ಶಿವಣ್ಣನಿಗಾಗಿ ಸಿನಿಮಾವೊಂದನ್ನು ನಿರ್ದೇಶನ ಮಾಡೋ ಕನಸಿಟ್ಟುಕೊಂಡಿದ್ದರು. ಅದು ಪುನೀತ್ ಪಾಲಿಗೆ ಮಹಾ ಕನಸು. ಈ ಬಗ್ಗೆ ಆಪ್ತರ ಬಳಿ ಆಗಾಗ ಹೇಳಿಕೊಳ್ಳುತ್ತಲೂ ಇದ್ದರಂತೆ. ಹಾಗೆಯೇ ಬಾಯಿಂದ ಬಾಯಿಗೆ ದಾಟಿಕೊಂಡು ಅದು ಮಾಧ್ಯಮಗಳಲ್ಲಿಯೂ ಸುದ್ದಿಯಾಗಿತ್ತು. ಆದರೆ ಆ ಬಗ್ಗೆ ಹೆಚ್ಚೇನೂ ಅವರು ಹೇಳಿಕೊಂಡಿರಲಿಲ್ಲ. ಅದರ ಬಗ್ಗೆ ಅದೆಷ್ಟು ಆಕರ್ಷಿತರಾಗಿದ್ದರೆಂದರೆ, ತಮ್ಮ ಬ್ಯುಸಿ ಶೆಡ್ಯೂಲಿನ ನಡುವೆಯೇ ಪ್ರತೀ ದಿನ ಆ ಸಿನಿಮಾಕ್ಕಾಗಿ ತಯಾರಿ ನಡೆಸುತ್ತಿದ್ದರಂತೆ. ಆದರೆ ವಿಧಿಯಾಟವೇ ಬೇರೆಯದ್ದಿತ್ತು. ಅಂಥಾ ಹತ್ತಾರು ಕನಸುಗಳ ಸಮೇತ ಅದು ಎಲ್ಲರ ಪ್ರೀತಿಯ ಅಪ್ಪುವನ್ನು ಕಿತ್ತುಕೊಂಡಿದೆ.

The post ಶಿವಣ್ಣನ ಮೇಲೆ ಅದೆಂಥಾ ಪ್ರೀತಿಯಿತ್ತು! appeared first on ಶೋಧ ನ್ಯೂಸ್ - Shodha News.

ಎಲ್ಲವನ್ನೂ ಪ್ರಾಂಜಲ ನಗುವಿನಿಂದಲೇ ಎದುರುಗೊಳ್ಳುತ್ತಾ, ಬಾಗಿ ನಡೆಯೋದನ್ನೇ ವ್ಯಕ್ತಿತ್ವದ ಶಕ್ತಿಯಾಗಿಸಿಕೊಂಡಿದ್ದವರು ಪುನೀತ್ ರಾಜ್ ಕುಮಾರ್. ತಂದೆಯ ಗುಣಗಳನ್ನೆಲ್ಲ ಎರಕ ಹೊಯ್ದುಕೊಂಡಂತಿದ್ದ ಅಪ್ಪು, ಅಭಿಮಾನದಾಚೆಗೂ ಒಂದಿಡೀ ಕರುನಾಡನ್ನು ಆವರಿಸಿಕೊಂಡಿದ್ದ ದೈತ್ಯ ಶಕ್ತಿ. ಸದಾ ಉತ್ಸಾಹದ ಚಿಲುಮೆಯಂತಿರುತ್ತಿದ್ದ ಅಪ್ಪು ಸಣ್ಣದೊಂದು ಸುಳಿವೂ ನೀಡದೆ ನಿಶ್ಚಲವಾಗಿ ಒಂದು ವರ್ಷ ಕಳೆದಿದೆ. ಬಹುಶಃ ಇನ್ನೊಂದಷ್ಟು ವರ್ಷಗಳು ಕಳೆದರೂ ಕೂಡಾ ನಮ್ಮೆಲ್ಲರ ಮನಸುಗಳಲ್ಲಿ ಆ ಆಘಾತ ಹಸಿಯಾಗಿರುತ್ತದೇನೋ… ಎಲ್ಲವೂ ಕಣ್ಣೆದುರಲ್ಲಿಯೇ ನಡೆದು ಹೋದರೂ ಯಾವುದನ್ನೂ ನಂಬದ ಸ್ಥಿತಿಯೊಂದು ಎಲ್ಲರೊಳಗಿದೆ. ಸಾಮಾನ್ಯವಾಗಿ ಸಾವೊಂದು ಶೂನ್ಯ ವಾತಾವರಣ ಸೃಷ್ಟಿಸುತ್ತೆ. ಇಷ್ಟದ ಜೀವವೊಂದು ಇನ್ನಿಲ್ಲವಾದಾಗ, ಎಂದೂ ತುಂಬಲಾರದಂಥಾ ಖಾಲಿತನವೊಂದು ಎದೆತಬ್ಬಿಕೊಳ್ಳುತ್ತೆ. ಆದರೆ, ಪುನೀತ್ ರಾಜ್‌ಕುಮಾರ್ ಅಗಲಿಕೆಯ ವಿಚಾರದಲ್ಲಿ ಅದೆಲ್ಲವೂ ಅದಲು ಬದಲಾಗಿದೆ!

ಯಾಕೆಂದರೆ, ಅಪ್ಪು ನಮ್ಮ ನಡುವಲ್ಲಿಲ್ಲ ಅನ್ನೋದನ್ನ ಈ ಕ್ಷಣಕ್ಕೂ ಯಾರಿಗೂ ಒಪ್ಪಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಇಲ್ಲೇ ಎಲ್ಲೋ ಸಂಚಾರ ತೆರಳಿರೋ ಅಪ್ಪು ಬ್ಯುಸಿಯಾಗಿಬಿಟ್ಟಿದ್ದಾರೆಂಬ ಭಾವವೇ ಎಲ್ಲರೊಳಗೂ ನೆಲೆ ನಿಂತು ಬಿಟ್ಟಿದೆ. ಆ ನಂಬಿಕೆ ಯಾವ ಘಳಿಗೆಯಲ್ಲಿಯೂ ಕದಲಲು ಸಾಧ್ಯವೇ ಇಲ್ಲ. ಬದುಕಿದ್ದಷ್ಟೂ ದಿನ, ಪ್ರತೀ ಕ್ಷಣಗಳನ್ನೂ ಸಂಭ್ರಮಿಸುತ್ತಾ ಉಸಿರಾಡಿದ್ದವರು ಪುನೀತ್. ಸ್ಟಾರ್‌ವಾರ್ ಮುಂತಾದ ಭ್ರಮೆಯ ಬಡಿದಾಟಗಳಾಚೆಗೆ, ಪ್ರೀತಿಯನ್ನು ಮಾತ್ರವೇ ಹಂಚುತ್ತಾ ಸಾಗಿದ್ದು ಅಪ್ಪು ಸ್ಪೆಷಾಲಿಟಿ. ತಾನಿರುವಲ್ಲೆಲ್ಲ ದೈವಿಕ ನಗುವಿನ ಗಂಧ ಹರಡುತ್ತಿದ್ದ ಅಪ್ಪು ಅಂದರೆ ಇಷ್ಟಪಡದವರೇ ಇರಲಿಲ್ಲ. ಇಂಥಾ ವ್ಯಕ್ತಿತ್ವದಿಂದಲೇ ಅಭಿಮಾನದಾಚೆಗೂ ಆಪ್ತರಾಗಿದ್ದವರು ಪುನೀತ್ ರಾಜ್‌ಕುಮಾರ್.

ಓರ್ವ ನಟ ಸಿನಿಮಾಗಳ ಮೂಲಕ ಒಂದಷ್ಟು ಅಭಿಮಾನಿ ಬಳಗ ಹೊಂದಿರೋದು, ಅವರ ಪಾಲಿಗೆ ದೇವರೆನ್ನಿಸಿಕೊಳ್ಳೋದೆಲ್ಲ ಮಾಮೂಲು. ಆದರೆ, ಓರ್ವ ನಟ ಸಿನಿಮಾದಾಗೆಗೆ ತನ್ನ ವ್ಯಕ್ತಿತ್ವದಿಂದಾಗಿ ಇಡೀ ನಾಡನ್ನೇ ಆವರಿಸಿಕೊಳ್ಳೋದಿದೆಯಲ್ಲಾ? ಅದು ನಿಜಕ್ಕೂ ಅದ್ಭುತ. ಅಂಥಾದ್ದೊಂದು ಅದ್ಭುತಕ್ಕೆ ಸಾರ್ವಕಾಲಿಕ ಸಾಕ್ಷಿಯಂತಿರುವವರು ಅಪ್ಪು. ಕೆಲ ಮಂದಿ ಸಣ್ಣಪುಟ್ಟ ಸಹಾಯ ಮಾಡಿ ಬೆಟ್ಟದಷ್ಟು ಪೋಸು ಕೊಡುತ್ತಾರೆ. ಆದರೆ ಬೆಟ್ಟದಷ್ಟು ಸಾಮಾಜಿಕ ಕೆಲಸ ಕಾರ್ಯ ಮಾಡಿದರೂ ಚಿಟಿಕೆಯಷ್ಟನ್ನೂ ತೋರ್ಪಡಿಸಿಕೊಳ್ಳದೇ ಮುಂದುವರೆದದ್ದು ಅಪ್ಪು ಉಳಿಸಿ ಹೋದ ಬಹುದೊಡ್ಡ ಆದರ್ಶ ಅಂದರೂ ತಪ್ಪೇನಲ್ಲ.

ಪುನೀತ್‌ರಂಥಾ ಸ್ಟಾರ್ ನಟರ ಸುತ್ತ ಅಭಿಮಾನದ ಪ್ರಭೆ ಇರುತ್ತೆ. ಹಾಗೆ ಆರಾಧಿಸುವ ಪ್ರತೀ ಜೀವಗಳ ಪಾಲಿಗೂ ಅಪ್ಪು ಒಂಥಾರಾ ಆದರ್ಶ. ಸದಾ ಜೊತೆಗಿರುವ ಶಕ್ತಿ. ಅಂಥಾ ಶಕ್ತಿಯೇ ಏಕಾಏಕಿ ಮಾಯವಾಗಿ ಬಿಡುತ್ತದೆಯೆಂದರೆ, ಅದನ್ನು ಅರಗಿಸಿಕೊಳ್ಳೋದು ಅಷ್ಟು ಸಲೀಸಿನ ಸಂಗತಿಯಲ್ಲ. ಅಂಥಾದ್ದೊಂದು ಆಘಾತ ಅಪ್ಪು ಅಭಿಮಾನಿಗಳನ್ನೆಲ್ಲ ಕಾಡುತ್ತದೆ. ಸದಾ ಕಾಲವೂ ಕಾಡುತ್ತಲೇ ಇರುತ್ತದೆ. ಅದು ಈಗ ಕರ್ನಾಟಕದ ಪ್ರತೀ ಮನಸುಗಳಿದಾ ಡಾಟಿಕೊಂಡಿದೆ. ವಿಶೇಷವೆಂದರೆ, ಎಲ್ಲರೊಳಗಿನ ದುಃಖವೀಗ ಅಪ್ಪು ಮುಖದಲ್ಲಿ ಮಿನುಗುತ್ತಿದ್ದ ಮಂದಹಾಸವಾಗಿ ರೂಪಾಂತರಗೊಂಡಿದೆ. ಹಿಂದಿಗಿಂತಲೂ ತೀವ್ರವಾಗಿ ಆ ಮಂದಹಾಸವನ್ನು ಧ್ಯಾನಿಸುತ್ತಾ, ಅಪ್ಪು ಎಲ್ಲೂ ಹೋಗಿಲ್ಲ ಎಂಬ ಸುಳ್ಳನ್ನೇ ಮನಸಾರೆ ನಂಬುತ್ತಾ ಮುಂದುವರೆಯುತ್ತಿದ್ದಾರೆ. ಇಂಥಾದ್ದೊಂದು ಸಂಕಟ ಹುಟ್ಟಿಕೊಂಡ ಈ ದಿನ, ಆ ಕ್ಷಣಗಳು ಮಾತ್ರ ಪ್ರತೀ ವರ್ಷವೂ ಹೀಗೆ ಸಣ್ಣ ಕರುಳಿಗೆ ಸೂಜಿ ಚುಚ್ಚಿದಂಥಾ ಭಾವ ಮೂಡಿಸುತ್ತಲೇ ಇರುತ್ತೆ. ಎಲ್ಲರ ಎದೆಗಿಳಿದಿರೋ ಆ ನಗುವಿಗೆ ಎಂದಿಗೂ ಸಾವಿಲ್ಲ. 

ಇಂಥಾ ಹಠಾತ್ ನಿರ್ಗಮನವನ್ನು ತಡೆದುಕೊಳ್ಳೋದು ಕಷ್ಟವೇ. ಸಾವೆಂಬುದು ಯಾವ ದಿಕ್ಕಿನಲ್ಲಿ, ಹೇಗೆಲ್ಲ ಹಿಂಡಿ ಹಾಕುತ್ತದೆಂದು ಹೇಳಲು ಬರುವುದಿಲ್ಲ. ಅದು ಅವುಡುಗಚ್ಚಿ ನಡೆದಷ್ಟೂ ದುಃಖ ಒತ್ತರಿಸುವಂತೆ ಮಾಡುತ್ತೆ. ಮರೆತು ಮುನ್ನಡೆಯುತ್ತೇಂದರೂ ಮತ್ತೆ ಕರುಳು ಹಿಂಡಿ ಕಾಡಿಸುತ್ತೆ. ಆದರೆ, ಒಂದು ಅಗಾಧ ಅನುಭವದ ಮೂಸೆಯಲ್ಲಿ ಮಾತ್ರವೇ ಇಂಥಾ ನಿರ್ಗಮನವನ್ನು ಭರಿಸಿಕೊಳ್ಳುವ ಶಕ್ತಿ ದಕ್ಕಬಹುದೇನೋ. ಈವರೆಗೂ ಒಂದಷ್ಟು ಮಹಾನುಭಾವರು, ಕವಿಗಳು, ಸಾವನ್ನು ದಿಟ್ಟಿಸುವ ದೃಷ್ಟಿಕೋನ ಬದಲಾಯಿಸುವಂಥಾ, ಒಂದು ಸಮಾಧಾನವನ್ನು ಎದೆತುಂಬುವಂಥಾ ಪ್ರಯತ್ನಗಳನ್ನು ಮಾಡಿದ್ದಾರೆ. ಅಂಥವರ ಕಾಲಿನಲ್ಲಿ ಕವಿ, ದಾರ್ಶನಿಕ ಜಲಾಲುದ್ದೀನ್ ರೂಮಿ ಕೂಡಾ ಪ್ರಮುಖ ಕವಿ. ತನ್ನ ಕವಿತೆಗಳ ಮೂಲಕವೇ ಬದುಕಿನ ನಾನಾ ಮಜಲುಗಳನ್ನು ಅಚ್ಚರಿದಾಯಕವಾಗಿ ಬೊಗಸೆಗಿಡಬಲ್ಲ ರೂಮಿ, ಸಾವಿನ ಬಗ್ಗೆಯೂ ಅರ್ಥವತ್ತಾಗಿ ಬರೆದಿದ್ದಾನೆ. ಅದನ್ನು ಕನ್ನಡದ ಪ್ರತಿಭಾನ್ವಿತ ಹಿರಿಯ ಕವಿಗಳಲ್ಲೊಬ್ಬರಾಗಿರುವ ಚಿದಂಬರ ನರೇಂದ್ರ ಸೊಗಸಾಗಿ ಅನುವಾದಿಸಿದ್ದಾರೆ. ಅಪ್ಪು ಇಲ್ಲದ ನಿರ್ವಾತವನ್ನು ಅಪ್ಪಿಕೊಂಡ ಮನಸುಗಳು ಇದನ್ನೊಮ್ಮೆ ಓದಿದರೆ ಸಮಾಧಾನವೊಂದು ತಾನೇತಾನಾಗಿ ಸ್ಫುರಿಸೀತೇನೋ…

– ರೂಮಿ.

The post ಕಣ್ಣಂಚಿಗಿಳಿವ ನೆನಪೊಂದೇ ಶಾಶ್ವತ! appeared first on ಶೋಧ ನ್ಯೂಸ್ - Shodha News.