ಕಳೆದ ವರ್ಷದ ಕಡೇಯ ಭಾಗದಿಂದ ಮೊದಲ್ಗೊಂಡು, ಇಲ್ಲಿಯ ವರೆಗೂ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಾ, ಅಡಿಗಡಿಗೆ ಪ್ರೇಕ್ಷಕರನ್ನು ಸೆಳೆಯುತ್ತಾ ಸಾಗಿ ಬಂದಿದ್ದ ಚಿತ್ರ `ಪೆಂಟಗನ್’. ಖ್ಯಾತ ನಿರ್ದೇಶಕ ಗುರು ದೇಶಪಾಂಡೆ ತಮ್ಮದೇ ಸ್ವಂತ ಬ್ಯಾನರಿನಡಿಯಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಹೊಸತನದ ಕಥೆಗಳಿಗೆ ದೃಷ್ಯರೂಪ ಕೊಡುವ ಸದುದ್ದೇಶದೊಂದಿಗೆ ನಿರ್ಮಾಣ ಸಂಸ್ಥೆ ಆರಂಭಿಸಿದ್ದ ಗುರು ದೇಶಪಾಂಡೆ ಅವರ ಇಂಗಿತವನ್ನು ಸಾರ್ಥಕಗೊಳಿಸುವಂತೆ ಮೂಡಿ ಬಂದಿರುವ ಚಿತ್ರ `ಪೆಂಟಗನ್’. ಇದೀಗ ಈ ಚಿತ್ರದ ಪೊಗದಸ್ತಾದ ಟ್ರೈಲರ್ ಲಾಂಚ್ ಆಗಿದೆ. ನಿಗಿನಿಗಿಸುತ್ತಿದ್ದ ನಿರೀಕ್ಷೆಗಳೆಲ್ಲ ಖುಷಿಗೊಂಡು ಧಗಧಗಿಸುವಂತೆ ಮಾಡುವ ಕಂಟೆಂಟಿನ ಸುಳಿವೊಂದು, ಈ ಟ್ರೈಲರ್ ಮೂಲಕ ಸ್ಪಷ್ಟವಾಗಿಯೇ ಸಿಕ್ಕಿದೆ!

ಅದೆಂಥಾದ್ದೇ ಅಲೆಯಿರಲಿ; ಒಂದೊಳ್ಳೆ ಕಂಟೆಂಟು ಹೊಂದಿರುವ, ಪ್ರಯೋಗಾತ್ಮಕ ಗುಣಗಳಿಂದ ಮೈ ಕೈ ತುಂಬಿಕೊಂಡಿರುವ ಸಿನಿಮಾಗಳತ್ತ ಕತ್ತನಡ ಪ್ರೇಕ್ಷಕರು ಸದಾ ಕಾಲವೂ ಕಣ್ಣಿಟ್ಟಿರುತ್ತಾರೆ. ಅಂಥಾ ಚಿತ್ರಗಳನ್ನು ವಿಶೇಷವಾದ ಅಕ್ಕರಾಸ್ಥೆಗಳಿಂದ ಗೆಲ್ಲಿಸುತ್ತಾರೆ. ಈ ಮಾತಿಗೆ ಉದಾಹರಣೆಯಂಥಾ ಅದೆಷ್ಟೋ ಚಿತ್ರಗಳಿದ್ದಾವೆ. ಆ ಸಾಲಿಗೆ ಪೆಂಟಗನ್ ಕೂಡಾ ಸೇರ್ಪಡೆಗೊಳ್ಳುವಂಥಾ ಸ್ಪಷ್ಟ ಕುರುಹುಗಳು ಈ ಟ್ರೈಲರ್ ಮೂಲಕ ನಿಖರವಾಗಿಯೇ ಗೋಚರಿಸಿವೆ. ಸಾಮಾನ್ಯವಾಗಿ ಒಂದು ಸಿನಿಮಾದಲ್ಲಿ ಒಂದೇ ಕಥೆಯಿರೋದು ಮಾಮೂಲು. ಆದರೆ ಪೆಂಟಗನ್ ಐದು ಭಿನ್ನ ಕಥಾನಕಗಳ ಗುಚ್ಛ. ಆ ಐದೂ ಕಥೆಗಳನ್ನು ಕುತೂಹಲ ಮೂಡುವಂತೆ ಟ್ರೈಲರ್‍ನಲ್ಲಿ ಕಟ್ಟಿ ಕೊಡುವುದಿದೆಯಲ್ಲಾ? ಅದೊಂದು ಸಾಹಸ. ಗುರು ದೇಶಪಾಂಡೆ ಸಾರಥ್ಯದಲ್ಲಿ ಆ ಸಾಹಸವನ್ನು ಸಮರ್ಥವಾಗಿಯೇ ಮಾಡಲಾಗಿದೆ.

ಅದು ಪೆಂಟಗನ್ ಟ್ರೈಲರಿನ ನಿಜವಾದ ಸಾರ್ಥಕ್ಯ. ಇಲ್ಲಿ ಐದು ಕಥೆಗಳನ್ನು ಗುರು ದೇಶಪಾಂಡೆಯೂ ಸೇರಿದಂತೆ ಐವರು ನಿರ್ದೇಶಕರು ನಿರ್ದೇಶನ ಮಾಡಿದ್ದಾರೆ. ಆ ಕಥೆಗಳೆಲ್ಲದರ ಬಗ್ಗೆ ಈವರೆಗೆ ಸಣ್ಣ ಸಣ್ಣ ಸುಳಿವುಗಳನ್ನು ಬಿಟ್ಟು ಕೊಡಲಾಗಿತ್ತು. ಇದೀಗ ಈ ಟ್ರೈಲರಿನಲ್ಲಿ ಒಂದಕ್ಕೊಂದು ತಟಿಕೆ ಹಾಕಿಕೊಂಡಂಥಾ, ಅಗಾಧ ಪ್ರಮಾಣದಲ್ಲಿ ರೋಮಾಂಚನ ಮೂಡಿಸುವ ರೀತಿಯಲ್ಲಿ ಕಟ್ಟಿ ಕೊಡಲಾಗಿದೆ. ಈ ಮೂಲಕವೇ ಈ ಐದೂ ಕಥನಗಳು ಒಂದನ್ನೊಂದು ಮೀರಿಸುವಂತಿವೆ ಎಂಬ ನಂಬಿಕೆಯೂ ಮೂಡಿಕೊಂಡಿದೆ. ಇದರಲ್ಲಿನ ಪಾತ್ರಗಳು ಅಚ್ಚರಿ ಮೂಡಿಸುತ್ತವೆ. ಎಲ್ಲ ವರ್ಗಗಳಿಗೂ ಇಷ್ಟವಾಗುವ, ಎಲ್ಲರನ್ನೂ ಸೆಳೆಯುವ ಗುಣ ಕಥೆಯಲ್ಲಿ ಅಡಕವಾಗಿರುವ ಅಂಶ ವಿಶೇಷವಾಗಿ ಸೆಳೆಯುತ್ತದೆ.

ಒಟ್ಟಾರೆಯಾಗಿ, ಪೆಂಟಗನ್ ಕಡೆಯಿಂದ ಬಂದಿರೋದು ಈ ವರ್ಷದ ಅತ್ಯಂತ ಪ್ರಾಮಿಸಿಂಗ್ ಅನ್ನಬಹುದಾದ ಟ್ರೈಲರ್. ಇದು ಎಲ್ಲ ವರ್ಗದ ಪ್ರೇಕ್ಷಕರನ್ನೂ ಕೂಡಾ ಬೇಷರತ್ತಾಗಿ ಸಿನಿಮಾ ಮಂದಿರದತ್ತ ಸೆಳೆಯುವಷ್ಟು ಶಕ್ತವಾಗಿದೆ. ಬಿಡುಗಡೆಗೊಂಡ ಬಳಿಕ ಅತ್ಯಂತ ಕಡಿಮೆ ಅವಧಿಯಲ್ಲಿಯೇ ಹೆಚ್ಚೆಚ್ಚು ವೀಕ್ಷಣೆ, ಪ್ರೋತ್ಸಾಹದ ಮಾತುಗಳನ್ನೂ ಸಹ ಈ ಟ್ರೈಲರ್ ತನ್ನದಾಗಿಸಿಕೊಳ್ಳುತ್ತಿದೆ. ಅಂದಹಾಗೆ, ಇಲ್ಲಿನ ಐದು ಕಥೆಗಳನ್ನು ಶಿವಾಜಿ ಸುರತ್ಕಲ್ ಖ್ಯಾತಿಯ ಆಕಾಶ್ ಶ್ರೀವತ್ಸ, ಚಂದ್ರಮೋಹನ್, ರಾಘು ಶಿವಮೊಗ್ಗ, ಕಿರಣ್ ಕುಮಾರ್ ಮತ್ತು ಗುರು ದೇಶಪಾಂಡೆ ತಲಾ ಒಂದೊಂದು ಕಥಾನಕಗಳನ್ನು ನಿರ್ದೇಶನ ಮಾಡಿದ್ದಾರೆ. ಘಟಾನುಘಟಿ ಕಲಾವಿದರ ತಾರಾಂಗಣ, ಪ್ರತಿಭಾನ್ವಿತ ತಂತ್ರಜ್ಞರ ಸಾಥ್‍ನೊಂದಿಗೆ ಪೆಂಟಗನ್ ತಯಾರುಗೊಂಡಿದೆ. ಅದರ ಅಸಲೀ ಖದರ್ ಏನೆಂಬುದನ್ನು ಸದರಿ ಟ್ರೈಲರ್ ಪರಿಣಾಮಕಾರಿಯಾಗಿ ತೋರಿಸಿಕೊಟ್ಟಿದೆ!

The post ಗುರು ದೇಶಪಾಂಡೆ ಮ್ಯಾಜಿಕ್ ಮಾಡೋ ನಿಖರ ಮುನ್ಸೂಚನೆ! appeared first on ಶೋಧ ನ್ಯೂಸ್ - Shodha News.

ಒಂದಷ್ಟು ಪ್ರಯೋಗ, ಪ್ರತೀ ಹೆಜ್ಜೆಯಲ್ಲಿಯೂ ಪಡಿಮೂಡಿಕೊಳ್ಳುವ ಹೊಸತನವಿಲ್ಲದೇ ಹೋದರೆ ಚಿತ್ರರಂಗವೆಂಬುದು ಅಕ್ಷರಶಃ ನಿಂತ ನೀರಿನಂತಾಗಿ ಬಿಡುತ್ತೆ. ಖುಷಿಯ ಸಂಗತಿಯೆಂದರೆ, ಇಲ್ಲಿನ ಕ್ರಿಯಾಶೀಲ ಮನಸುಗಳು ಆಗಾಗ ಚೌಕಟ್ಟಿನಾಚೆಗೆ ಹೊರಳಿಕೊಳ್ಳುತ್ತವೆ; ಮಹತ್ತರವಾದುದೇನನ್ನೋ ಪ್ರೇಕ್ಷಕರ ಮುಂದಿಟ್ಟು ಅಚ್ಚರಿ ಮೂಡಿಸುತ್ತವೆ. ಅಂಥಾ ಕ್ರಿಯಾಶೀಲ ಮನಸುಗಳ ಯಾದಿಯಲ್ಲಿ ನಿಸ್ಸಂದೇಹವಾಗಿಯೂ ನಿರ್ದೇಶಕ ಗುರು ದೇಶಪಾಂಡೆ ಸೇರಿಕೊಳ್ಳುತ್ತಾರೆ. ಸಿನಿಮಾ ಶಾಲೆ ತೆರೆದು ಹೊಸಾ ಪ್ರತಿಭೆಗಳಿಗೆ ಅವಕಾಶ ಮಾಡಿಕೊಡುತ್ತಲೇ, ಹೊಸಾ ಆಲೋಚನೆ ಬಿತ್ತುತ್ತಿರುವ ಗುರು ದೇಶಪಾಂಡೆ ಇದೀಗ `ಪೆಂಟಗನ್’ ಅಂತೊಂದು ಅಚ್ಚರಿಯೊಂದಿಗೆ ಪ್ರೇಕ್ಷಕರನ್ನು ಮುಖಾಮುಖಿಯಾಗುವ ಸನ್ನಾಹದಲ್ಲಿದ್ದಾರೆ.

ಈಗಾಗಲೇ ಟೀಸರ್ ಮೂಲಕ ಸಂಚಲನ ಮೂಡಿಸಿರುವ ಈ ಚಿತ್ರದ ಲಿರಿಕಲ್ ವೀಡಿಯೋ ಸಾಂಗ್ ಒಂದು ಇದೀಗ ಬಿಡುಗಡೆಗೊಂಡಿದೆ. ಪ್ರತೀ ಸಿನಿಮಾಗಳಲ್ಲಿಯೂ ಹಾಡುಗಳಿಗೆ ವಿಶೇಷವಾದ ಪ್ರಾಶಸ್ತ್ಯ ಕೊಡುತ್ತಾ ಬಂದಿರುವ ಗುರು ದೇಶಪಾಂಡೆ, ಪೆಂಟಗನ್ ವಿಚಾರದಲ್ಲಿಯೂ ಅದನ್ನು ಮುಂದುವರೆಸಿದ್ದಾರೆ. `ಬಾ ಹೊರಗೆ ಬಾ’ ಅಂತ ಶುರುವಾಗೋ ಈ ಹಾಡಿನ ಸಾಹಿತ್ಯ. ಅದರ ಹಿನ್ನೆಲೆಯಲ್ಲಿ ಕದಲುವ ದೃಷ್ಯಗಳು ಮತ್ತು ಎಂಥವರನ್ನೂ ಅರೆಕ್ಷಣದಲ್ಲಿಯೇ ಆವರಿಸಿಕೊಳ್ಳಬಲ್ಲ ಸಂಗೀತವನ್ನು ಆಸ್ವಾದಿಸಿದವರೆಲ್ಲ ಥ್ರಿಲ್ ಆಗಿದ್ದಾರೆ. ಬಹುಶಃ ಅದುವೇ ಪೆಂಟಗನ್ ಬಗೆಗಿನ ನಿರೀಕ್ಷೆಯನ್ನು ಮತ್ತಷ್ಟು ತೀವ್ರವಾಗಿಸೋದರಲ್ಲಿ ಯಾವ ಸಂದೇಹವೂ ಇಲ್ಲ.

ಪ್ರತಿಯೊಂದು ವಿಚಾರದಲ್ಲಿಯೂ ಸಿನಿಮಾದ ಆಂತರ್ಯದ ಬಗ್ಗೆ ಪ್ರೇಕ್ಷಕರನ್ನು ಸೆಳೆಯುವುದು, ಕಥೆಯ ಬಗ್ಗೆ ಅನೂಹ್ಯ ಕಲ್ಪನೆಯೊಂದು ನೋಡುಗರ ಮನಸಲ್ಲಿ ತಾನೇ ತಾನಾಗಿ ಬೆಳೆಯುವಂತೆ ನೋಡಿಕೊಳ್ಳುವುದು ನಿರ್ದೇಶಕನೊಬ್ಬನ ಅಸಲೀ ಕಸುಬುದಾರಿಕೆ. ಈ ಹಾಡಿನ ವಿಚಾರದಲ್ಲಿಯೂ ಗುರು ದೇಶಪಾಂಡೆ ಅದನ್ನು ಧಾರಾಳವಾಗಿಯೇ ಪ್ರದರ್ಶಿಸಿದ್ದಾರೆ. ಯಾಕೆಂದರೆ, ಇಲ್ಲಿನ ದೃಷ್ಯಗಳೇ ಒಂದಿಡೀ ಕಥೆಯ ಆತ್ಮವನ್ನು ಬಚ್ಚಿಟ್ಟುಕೊಂಡಂತಿವೆ. ಅವುಗಳ ಮೂಲಕವೇ ಪಾತ್ರಗಳು ತೆರೆದುಕೊಳ್ಳುತ್ತವೆ. ಇದರಲ್ಲಿ ಪ್ರಕಾಶ್ ಬೆಳವಾಡಿ ನಟಿಸಿರೋ ಕಥೆಯ ಹೊಳಹುಗಳು ತೆರೆದುಕೊಳ್ಳುತ್ತವೆ. ಒಟ್ಟಾರೆಯಾಗಿ ಹಾಡು ಮುಗಿದಾಕ್ಷಣವೇ ನೋಡುಗರ ಮನಸಲ್ಲೊಂದು ಕೌತುಕದ ದೊಂದಿ ಹೊತ್ತಿಕೊಳ್ಳುತ್ತೆ. ಅದುವೇ ಈ ಲಿರಿಕಲ್ ವೀಡಿಯೋದ ನಿಜವಾದ ಸಾರ್ಥಕ್ಯ!

ಪೆಂಟಗನ್ ಎಂಬುದು ಪಕ್ಕಾ ಕಮರ್ಶಿಯಲ್ ಅಂಶಗಳನ್ನೊಳಗೊಂಡಿರುವ ಪ್ರಯೋಗಾತ್ಮಕ ಸಿನಿಮಾ. ಇದರೊಳಗೆ ಐದು ಕಥೆಗಳಿವೆ. ಅದರಲ್ಲೊಂದು ಕಥೆಯ ಸಾರಥ್ಯವನ್ನು ಖುದ್ದು ಗುರು ದೇಶಪಾಂಡೆ ಅವರೇ ವಹಿಸಿಕೊಂಡಿದ್ದಾರೆ. ಅದರಲ್ಲಿನ ಕನ್ನಡ ಪರ ಹೋರಾಟಗಾರನ ಪಾತ್ರಕ್ಕೆ ಕಿಶೋರ್ ಜೀವ ತುಂಬಿದ್ದಾರೆ. ಅದರ ಒಂದಷ್ಟು ತುಣುಕುಗಳು ಈಗಾಗಲೇ ಜಾಹೀರಾಗಿ, ವಿವಾದ ಹುಟ್ಟುಹಾಕಿದ್ದೂ ನಡೆದಿದೆ. ಇನ್ನುಳಿದಂತೆ, ಮಿಕ್ಕ ನಾಲಕ್ಕು ಭಿನ್ನ ಕಥೆಗಳನ್ನು ಶಿವಾಜಿ ಸುರತ್ಕಲ್ ಚಿತ್ರದ ಮೂಲಕ ಸದ್ದು ಮಾಡಿದ್ದ ಆಕಾಶ್ ಶ್ರೀವತ್ಸ, ಚಂದ್ರಮೋಹನ್, ರಾಘು ಶಿವಮೊಗ್ಗ ಮತ್ತು ಕಿರಣ್ ಕುಮಾರ್ ನಿರ್ದೇಶನ ಮಾಡಿದ್ದಾರೆ. ಗುರು ದೇಶಪಾಂಡೆ ತಮ್ಮ ಜಿ ಸಿನಿಮಾಸ್ ಬ್ಯಾನರಿನಡಿಯಲ್ಲಿಯೇ ಪೆಂಟಗನ್ ಅನ್ನು ನಿರ್ಮಾಣ ಮಾಡಿದ್ದಾರೆ.

The post ಲಿರಿಕಲ್ ವೀಡಿಯೋ ಸಾಂಗ್‍ನಲ್ಲಿದೆ ಕಥೆಯ ಆತ್ಮ! appeared first on ಶೋಧ ನ್ಯೂಸ್ - Shodha News.