actress ramola: ಕಿರುತೆರೆಯಲ್ಲಿ ಒಂದಷ್ಟು ಪ್ರಸಿದ್ಧಿ ಪಡೆಯುತ್ತಲೇ ಏಕಾಏಕಿ ಹಿರಿತೆರೆಗೆ ಲಗ್ಗೆಯಿಡೋದು ಅನೇಕ ನಟ ನಟಿಯರ ಮಹಾ ಕನಸು. ಆದರೆ, ಆ ಯೋಗ ಮಾತ್ರ ಅಷ್ಟು ಸಲೀಸಾಗಿ ಎಲ್ಲರಿಗೂ ದಕ್ಕುವಂಥಾದ್ದಲ್ಲ. ಆದರೆ, ಹಿರಿತೆರೆಯಲ್ಲಿ (film industry) ಮಿಂಚುವ ಸೆಳೆತವಿರುತ್ತದಲ್ಲಾ? ಅದು ನಾನಾ ಆಟ ಆಡಿಸುತ್ತೆ. ಕೆಲವರನ್ನು ಹತ್ತಿದ ಏಣಿಯನ್ನೇ ಒದ್ದು ಕೆಡವಿ ಬಿಡುವಂತೆಯೂ ಪ್ರೇರೇಪಿಸುತ್ತೆ. ಹಾಗೆ ತಿಮಿರು ತೋರಿಸಿ ಸೀರಿಯಲ್ಲುಗಳಿಂದ ಅರ್ಧಕ್ಕೇ ಎದ್ದು ಬಂದವರನೇಕರು ಹೇಳ ಹೆಸರಿಲ್ಲದಂತೆ ಮಾಯವಾಗಿದ್ದಾರೆ. ಇನ್ನೂ ಕೆಲ ಮಂದಿ ಗಾಂಧಿನಗರದ ಸಂದಿಗೊಂದಿಗಳಲ್ಲಿ ಅಂತರ್‍ಪಿಶಾಚಿಗಳಂತೆ ಅಂಡಲೆಯುತ್ತಿದ್ದಾರೆ. ಈ ಹುಡುಗಿ (ramola) ರಮೋಲಾ ಕನ್ನಡತಿ (kannadathi) ಎಂಬ ಹಿಟ್ ಸೀರಿಯಲ್ಲಿನಿಂದ ಇದ್ದಕ್ಕಿಂದಂತೆ ಮಾಯವಾಗಿ, ಸಿನಿಮಾದಲ್ಲಿ ಪ್ರತ್ಯಕ್ಷಳಾದಾಗ ಬಹುತೇಕರು ಈಕೆಯೂ ಸೋತವರ ಸಾಲಿಗೆ ಸೇರುತ್ತಾಳೆಂದೇ ಅಂದುಕೊಂಡಿದ್ದರು. ಆದರೆ, ಆಕೆಯೀಗ ಅಕ್ಷರಶಃ ಅವಕಾಶಗಳ ಒಡ್ಡೋಲಗದಲ್ಲಿ ಮಿಂಚಲಾರಂಭಿಸಿದ್ದಾಳೆ!

ವರ್ಷದ ಹಿಂದೆ ಕನ್ನಡತಿ ಅಂತೊಂದು ಧಾರಾವಾಹಿ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಿತ್ತು. ಪ್ರತಿಭಾನ್ವಿತ ನಟಿ ರಂಜನಿ ರಾಘವನ್ ಆ ಸೀರಿಯಲ್ಲಿನ ನಾಯಕಿಯಾಗಿ ನಟಿಸಿದ್ದಳು. ಆಕೆಗೆ ಸದಾ ಕಾಟ ಕೊಡುವ ಖಡಕ್ ವಿಲನ್ ಸಾನಿಯಾ ಆಗಿ ಕಾಣಿಸಿಕೊಂಡಿದ್ದಾಕೆ ರಮೋಲಾ. ಹಾಗೆ ನೋಡಿದರೆ, ಈ ಸೀರಿಯಲ್ಲು ರಂಜಿನಿ ರಾಘವನ್ ಪಾಲಿಗೆ ಮತ್ತಷ್ಟು ಖ್ಯಾತಿ ತಂದು ಕೊಟ್ಟಿತ್ತು. ರಮೋಲಾ ನಿರ್ವಹಿಸಿದ್ದ ಸಾನಿಯಾ ಎಂಬ ಪಾತ್ರ ರಂಜಿನಿಯನ್ನು ಸರಿಗಟ್ಟುವಂತೆ ಪ್ರಚಾರ ಪಡೆದುಕೊಂಡಿತ್ತು. ವಿಲನ್ ಪಾತ್ರದ ಮೂಲಕವೂ ರಮೋಲಾ ತನ್ನ ಕ್ಯೂಟ್ ಲುಕ್ಕು, ಅಭಿನಯದಿಂದ ಮನ ಗೆದ್ದಿದ್ದಳು.

ಆ ಸೀರಿಯಲ್ಲು ಖ್ಯಾತಿಯ ಉತ್ತುಂಗದಲ್ಲಿರುವಾಗಲೇ ರಮೋಲಾ ಸಾನಿಯಾ ಪಾತ್ರದಿಂದ ನಿರ್ಗಮಿಸಿದ್ದಳು. ಸಾಮಾನ್ಯವಾಗಿ ಇಂಥಾ ಪಾತ್ರಗಳಲ್ಲಿ ಮಿಂಚಿದ ಕಲಾವಿದರು ಬದಲಾವಣೆಯಾದಾಗ ಸ್ವಲ್ಪ ಸಮಯದ ನಂತರ ಪ್ರೇಕ್ಷಕರು ಹೊಸಬರಿಗೆ ಹಿಒಂದಿಕೊಳ್ಳುತ್ತಾರೆ. ಆದರೆ ಕನ್ನಡತಿ ಅಭಿಮಾನಿಗಳು ಮಾತ್ರ ಸಾನಿಯಾ ಪಾತ್ರಕ್ಕೆ ಸೂಟ್ ಆಗೋದು ರಮೋಲಾ ಮಾತ್ರ ಎಂಬ ನಿರ್ಧಾರಕ್ಕೆ ಬಂದು ಬಿಟ್ಟಿದ್ದರು. ಆದರೆ, ಅಂಥಾ ಯಶಸ್ವಿ ಪಾತ್ರ ಬಿಟ್ಟು ಹೋದ ರಮೋಲಾ ಚಿತ್ರರಂಗದಲ್ಲಿ ಬರಖತ್ತಾಗೋದು ಕಷ್ಟವಿದೆ ಎಂದೇ ಅನೇಕರು ಅಂದುಕೊಂಡಿದ್ದರು. ಅದರ ಬೆನ್ನಿಗೇ ಈಕೆ ರಿಚ್ಚಿ ಅಂತೊಂದು ಚಿತ್ರದಲ್ಲಿ ನಟಿಸುತ್ತಿದ್ದಾಳೆಂಬ ಸುದ್ದಿ ಬಂದಿತ್ತು. ಆ ಚಿತ್ರವೀಗ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ. ಅದಾಗಲೇ ರಮೋಲಾ ಮತ್ತೊಂದು ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾಳೆ.

ಕೇವಲ ಚಂದ, ವೈಯ್ಯಾರಗಳಿದ್ದರೆ ಸಾಲದು; ಸಿಕ್ಕ ಪಾತ್ರಗಳನ್ನು ಆವಾಹಿಸಿಕೊಳ್ಳುವ ಕಸುವಿರುವ ಕಲಾವಿದರು ಮಾತ್ರವೇ ಕಿರುತೆರೆ, ಚಿತ್ರರಂಗದಲ್ಲಿ ಭದ್ರವಾದ ನೆಲೆ ಕಂಡುಕೊಳ್ಳಲು ಸಾಧ್ಯ. ಅಂಥಾ ಪ್ರತಿಭೆ ಖಂಡಿತವಾಗಿಯೂ ರಮೋಲಾಗಿದೆ. ಈಕೆ ಕನ್ನಡತಿ ಧಾರಾವಾಹಿ ಬಿಟ್ಟು ಬಂದಾಗ `ಆ ಹುಡುಗಿಗೆ ದುರಂಹಕಾರ ಹೆಚ್ಚು’ ಎಂಬಂಥಾ ರೂಮರುಗಳು ಹಬ್ಬಿಕೊಂಡಿದ್ದವು. ಆದರೆ, ಅದ್ಯಾವುದಕ್ಕೂ ತಲೆ ಕೆಡಿಸಿಕೊಳ್ಳದ ರಮೋಲ ಮೊದಲ ಚಿತ್ರವನ್ನು ಯಶಸ್ವಿಯಾಗಿ ಮುಗಿಸಿಕೊಂಡಿದ್ದಾಳೆ. ಆ ಚಿತ್ರದ ಭಾಗವಾಗಿದ್ದವರ ಟೀಮಿನ ಮತ್ತೊಂದು ಚಿತ್ರಕ್ಕೂ ಆಯ್ಕೆಯಾಗಿದ್ದಾಳೆ. ಚಿತ್ರ ತಂಡದಲ್ಲಿ ಆಕೆಯ ಬಗ್ಗೆ ಮೆಚ್ಚುಗೆಯಿದೆಯೇ ಹೊರತು, ಯಾವ ತಕರಾರುಗಳೂ ಇಲ್ಲ. ಈ ಹುಡುಗಿಯ ಸ್ಪೀಡು ನೋಡಿದರೆ, ನಿಸ್ಸಂದೇಹವಾಗಿ ಚಿತ್ರರಂಗದಲ್ಲಿ ನಾಯಕಿಯಾಗಿ ನೆಲೆ ಕಂಡುಕೊಳ್ಳುವಂತಿದೆ!

The post ramola: ಕಿರುತೆರೆಯ ವಿಲನ್ ಮುಂದೆ ಅವಕಾಶಗಳ ಮೆರವಣಿಗೆ! appeared first on ಶೋಧ ನ್ಯೂಸ್ - Shodha News.

ಹಾಸ್ಯ ನಟನಾಗಿ ಪ್ರಖ್ಯಾತಿ ಪಡೆದು, ಆ ನಂತರ ನಾಯಕ ನಟನಾಗಿಯೂ ನಗುವಿನ ಪಥದಲ್ಲಿಯೇ ಮುಂದುವರೆದಿದ್ದವರು ಕೋಮಲ್. ಒಂದಷ್ಟು ಕಾಲ ಅವರು ನೇಪಥ್ಯಕ್ಕೆ ಸರಿದಂತಾದಾಗ, ಅಪಾರ ಸಂಕ್ಯೆಯ ಪ್ರೇಕ್ಷಕರು ಕೋಮಲ್‍ರನ್ನು ಮಿಸ್ ಮಾಡಿಕೊಂಡಿದ್ದದ್ದು ನಿಜ. ಆದರೀಗ ಅವರು ಹೊಸಾ ಚೈತನ್ಯದಿಂದ ಮೈಕೊಡವಿಕೊಂಡು ಮೇಲೆದ್ದು ನಿಂತಿದ್ದಾರೆ. ಅವರು ನಟಿಸುತ್ತಿರುವ ಚಿತ್ರಗಳ ಬಗ್ಗೆ ಸುದ್ದಿಯಾಗುತ್ತಲೇ, ನಟಿಸಿಯಾಗಿರುವ ಸಿನಿಮಾಗಳೂ ಕೂಡಾ ಸಂಚಲನ ಸೃಷ್ಟಿಸುತ್ತಿವೆ. ಅದರ ಭಾಗವಾಗಿಯೇ ಇದೀಗ `ಉಂಡೆನಾಮ’ ಎಂಬ ಶೀರ್ಷಿಕೆಯ ಸಿನಿಮಾ ಕೂಡಾ ಪ್ರೇಕ್ಷಕರ ಆಸಕ್ತಿ ಕೇಂದ್ರಕ್ಕೆ ಬಂದು ನಿಂತಿದೆ. ಸದ್ದೇ ಇಲ್ಲದೆ ಚಿತ್ರೀಕರಣಗೊಂಡಿದ್ದ ಉಂಡೆನಾಮ ಇದೇ ಏಪ್ರಿಲ್ 14ರಂದು ತೆರೆಗಾಣಲಿದೆ.

ಈ ಶೀರ್ಷಿಕೆ, ಕೋಮಲ್ ಕಾಂಬಿನೇಷನ್ ಮತ್ತು ನಿರ್ದೇಶಕರ ಹಿನ್ನೆಲೆಗಳೆಲ್ಲವನ್ನೂ ಒಟ್ಟುಗೂಡಿಸಿ ನೋಡಿದರೆ, ಉಂಡೆನಾಮದ ಮೂಲಕ ಭರ್ಜರಿ ನಗುವಿನ ಹಬ್ಬದ ಮುನ್ಸೂಚನೆ ಸಿಗುತ್ತಿದೆ. ಅಂದಹಾಗೆ ಇದು ಕೆ.ಎಲ್ ರಾಜಶೇಖರ್ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆ ಬರೆದು ನಿರ್ದೇಶನ ಮಾಡಿರುವ ಚಿತ್ರ. ರಾಜಶೇಖರ್ ಸೃಜನ್ ಲೋಕೇಶ್ ಸಾರಥ್ಯದ ಮಜಾ ಟಾಕೀಸ್ ಶೋ ಮೂಲಕ ಹೆಚ್ಚು ಪ್ರಚಲಿತಕ್ಕೆ ಬಂದಿದ್ದವರು. ಆ ಶೋನ ಮೊದಲ ಸೀಜನ್ನಿನ ಇನ್ನೂರರಷ್ಟು ಎಪಿಸೋಡ್‍ಗಳಿಗೆ ಸ್ಕ್ರಿಪ್ಟ್ ಸಿದ್ಧಪಡಿಸಿದ್ದವರು ಇದೇ ರಾಜಶೇಖರ್. ಅದೇ ಶೋನಲ್ಲಿ ನಟಿಸುವ ಮೂಲಕವೂ ಅವರು ಅಪಾರ ಜನಪ್ರಿಯತೆ ಪಡೆದುಕೊಂಡಿದ್ದರು.

ಹಾಗಿದ್ದ ಮೇಲೆ ರಾಜಶೇಖರ್ ನಿರ್ದೇಶನ ಮಾಡಿರುವ ಉಂಡೆನಾಮ, ನಗುವಿನ ಪರಿಷೆಯನ್ನೇ ಸೃಷ್ಟಿಸೋದರಲ್ಲಿ ಯಾವ ಅನುಮಾನವೂ ಇಲ್ಲ. ಇತ್ತೀಚೆಗಷ್ಟೇ ಶರಣ್. ನೆನಪಿರಲಿ ಪ್ರೇಂ, ಶ್ರುತಿ, ಸಾಧು ಕೋಕಿಲಾ, ರಾಗಿಣಿ ದ್ವಿವೇದಿ ಮುಂತಾದವರು ಉಂಡೆನಾಮ ಟೈಟಲ್ ರಿವೀಲ್ ಮಾಡಿದ್ದರು. ಇನ್ನು ಹಂತ ಹಂತವಾಗಿ ಪೋಸ್ಟರ್, ಟೀಸರ್, ಟ್ರೈಲರ್ ಮತ್ತು ಹಾಡುಗಳನ್ನು ಬಿಡುಗಡೆ ಮಾಡುವ ಮೂಲಕ ಕೌತುಕದ ಕಾವೇರಿಸಲು ಚಿತ್ರತಂಡ ಅಣಿಗೊಳ್ಳುತ್ತಿದೆ. ದಶಕಗಳಿಂದೀಚೆಗೆ ಕಿರುತೆರೆಯಲ್ಲಿ ಧಾರಾವಾಹಿಗಳ ಎಪಿಸೋಡ್ ನಿರ್ದೇಶಕರಾಗಿ, ಅಮ್ಮ ಐ ಲವ್ ಯೂ, ರಾಬರ್ಟ್, ವಿಕ್ಟರಿ2, ತ್ರಿಬಲ್ ರೈಡಿಂಗ್ ಮುಂತಾದ ಚಿತ್ರಗಳಿಗೆ ಡೈಲಾಗ್ ಬರೆದು ಸೈ ಅನ್ನಿಸಿಕೊಂಡಿರುವವರು ರಾಜಶೇಖರ್. ಹಾಗಿರುವಾಗ ಉಂಡೆನಾಮದ ಬಗ್ಗೆ ಸಹಜವಾಗಿಯೇ ಕುತೂಹಲ ಮೂಡಿಕೊಳ್ಳುತ್ತೆ.

ಹಾಗಾದರೆ, ಉಂಡೆನಾಮ ಯಾವ ಥರದ ಕಥೆ ಹೊಂದಿಗೆ ಎಂಬಂಥಾ ಪ್ರಶ್ನೆ ಕಾಡೋದು ಸಹಜ. ಎರಡನೇ ಲಾಕ್‍ಡೌನ್ ಸಮಯದಲ್ಲಿ ಶುರುವಾಗಿದ್ದ ಉಂಡೆನಾಮ, ಲಾಕ್‍ಡೌನ್ ಅವಧಿಯಲ್ಲಿ ಹೀಗೆ ನಡೆದರೆ ಹೇಗೆಂಬ ಕಲ್ಪನೆಯ ಮೂಸೆಯಲ್ಲರಳಿದ ಮಜವಾದ ಕಥಾನಕವನ್ನೊಳಗೊಡಿದೆಯಂತೆ. ನಟ ಕೋಮಲ್‍ಗೆ ಇಲ್ಲಿ ಇದುವರೆಗಿನ ಅಷ್ಟೂ ಪಾತ್ರಗಳಿಗಿಂದ ಭಿನ್ನವಾದ ರೋಲ್ ಇದೆಯಂತೆ. ಅವರಿಗೆ ಉಂಡೆನಾಮದ ಮೂಲಕವೇ ಸರಿಯಾದ್ದೊಂದು ಬ್ರೇಕ್ ಸಿಗುವ ಎಲ್ಲ ಲಕ್ಷಣಗಳೂ ದಟ್ಟವಾಗಿಯೇ ಗೋಚರಿಸುತ್ತಿವೆ. ಲವಲವಿಕೆಯ ಕಥೆ, ಚೇತೋಹಾರಿ ನಿರೂಪಣೆ ಮತ್ತು ಚೆಂದದ ಪಾತ್ರಗಳೊಂದಿಗೆ ಉಂಡೆನಾಮ ಕಳೆಗಟ್ಟಿಕೊಂಡಿದೆಯೆಂಬ ಭರವಸೆ ಚಿತ್ರತಂಡದಲ್ಲಿದೆ.

ಇದು ಎನ್.ಕೆ ಸ್ಟುಡಿಯೋಸ್ ಬ್ಯಾನರಿನಡಿಯಲ್ಲಿ ಸಿ.ನಂದಕಿಶೋರ್ ನಿರ್ಮಾಣ ಮಾಡಿಕರುವ ಚಿತ್ರ. ಕೆ.ಎಲ್ ರಾಜು ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶನ ಮಾಡಿರುವ ಈ ಚಿತ್ರದಲ್ಲಿ ಕೋಮಲ್‍ಗೆ ಹರೀಶ್ ರಾಜ್, ಧನ್ಯಾ ಬಾಲಕೃಷ್ಣ, ಅಪೂರ್ವ, ತಬಲಾ ನಾಣಿ, ವೈಷ್ಣವಿ, ತನಿಷಾ ಕುಪ್ಪಂಡ, ಬ್ಯಾಂಕ್ ಜನಾರ್ಧನ್ ಮುಂತಾದವರು ನಟಿಸಿದ್ದಾರೆ. ಶ್ರೀಧರ್ ಸಂಭ್ರಮ್ ಸಂಗೀತ ನಿರ್ದೇಶನ, ನವೀನ್ ಕುಮಾರ್ ಛಾಯಾಗ್ರಹಣ, ಕೆ.ಎಂ ಪ್ರಕಾಶ್ ಸಂಕಲನವಿದೆ. ಇನ್ನೇನು ಉಂಡೆನಾಮ ಪ್ರೇಕ್ಷಕರ ಮುಂದೆ ಬರಲು ದಿನಗಣನೆ ಶುರುವಾಗಿದೆ. ಅಂತೂ ಈ ಸಿನಿಮಾದ ಬಗ್ಗೆ ತಾನೇತಾನಾಗಿ ಪ್ರೇಕ್ಷಕರ ವಲಯದಲ್ಲಿ ಚರ್ಚೆಗಳು ಶುರುವಾಗಿವೆ. ಅದುವೇ ಗಾಢ ನಿರೀಕ್ಷೆಯಾಗಿಯೂ ಹರಳುಗಟ್ಟಿಕೊಳ್ಳುತ್ತಿದೆ.

The post ಇದು ಮಜಾ ಟಾಕೀಸ್ ಖ್ಯಾತಿಯ ರಾಜಶೇಖರ್ ನಿರ್ದೇಶನದ ಚಿತ್ರ! appeared first on ಶೋಧ ನ್ಯೂಸ್ - Shodha News.

ರಾಜ್ಯದಲ್ಲೀಗ ಉರಿಗೌಡ ಮತ್ತು ನಂಜೇಗೌಡನೆಂಬ ಕಲ್ಪಿತ ವೀರರ ಕಥನಗಳು ಎಗ್ಗಿಲ್ಲದೆ ಹರಿದಾಡುತ್ತಿವೆ. ಈ ಬಗ್ಗೆ ವಾಟ್ಸಪ್ ಯುನಿರ್ಸಿಟಿಯ ಕಸುಬಿಲ್ಲದ ಸಂಶೋಧಕರೊಂದಷ್ಟು ಮಂದಿ ಎಗ್ಗಿಲ್ಲದೆ ಸಂಶೋಧನೆ ನಡೆಸುತ್ತಿದ್ದಾರೆ. ರಾಜಕೀಯ ನೆರಳಿನಲ್ಲಿ ಹಾಯಾಗಿರುವ ಮತ್ತೊಂದಷ್ಟು ಮಂದಿ, ಅದಕ್ಕೆ ಪೂರಕವಾದ ಆಕರ ವಿಚಾರಗಳನ್ನು ಹರಿಯಬಿಡುತ್ತಿದ್ದಾರೆ. ಸನ್ಮಾನ್ಯ ಸಿ.ಟಿ ರವಿಯಂತೂ ಥೇಟು ಇತಿಹಾಸ ತಜ್ಞನಂತೆ ದಿನಕ್ಕೊಂದೊಂದು ವಿಚಾರಗಳನ್ನು ಹರಿಯಬಿಡುತ್ತಿದ್ದಾರೆ. ಹೀಗೆ ಬಿಜೆಪಿ ಮಂದಿ ಚುನಾವಣಾ ದಾಳವಾಗಿಸಿಕೊಂಡಿದ್ದ ಉರಿ ಗೌಡ, ನಂಜೇಗೌಡ ಯಾರು? ಅಷ್ಟಕ್ಕೂ ಅವರು ವೀರರಾ? ಅವರಿಬ್ಬರೂ ಟಿಪ್ಪು ಸುಲ್ತಾನನನ್ನು ಕೊಂದಿದ್ದ ನಿಜವಾ? ಹೀಗೇ ನಾನಾ ದಿಕ್ಕಿನಲ್ಲಿ ಚರ್ಚೆಗಳು ಚಾಲ್ತಿಯಲ್ಲಿವೆ!

ಇದೇ ಹೊತ್ತಿನಲ್ಲಿ ಸದ್ದೇ ಇಲ್ಲದೆ ಉರಿಗೌಡ ಮತ್ತು ನಂಜೇಗೌಡನ ಇರುವಿಕೆಗೆ ಅಧಿಕೃತ ಮುದ್ರೆಯೊತ್ತಿವ ಕೆಲಸವೂ ನಡೆದಿತ್ತು; ಅವರಿಬ್ಬರ ಬಗೆಗೊಂದು ಸಿನಿಮಾ ಮಾಡುವ ತಯಾರಿಯೊಂದಿಗೆ. ಒಂದು ಕಲ್ಪಿತ ಕಥೆಯನ್ನು ನಿಜ ಇತಿಹಾಸವೆಂಬಂತೆ ಬಿಂಬಿಸುವುದು, ಆ ಮೂಲಕ ಜನಮಾನಸದಲ್ಲಿ ಸುಳ್ಳನ್ನು ಸತ್ಯವೆಂಬಂತೆ ಪ್ರತಿಷ್ಠಾಪಿಸುವುದೆಲ್ಲ ಅಕ್ಷಮ್ಯ ಅಪರಾಧ. ಆದರೆ, ಅದೇಕೋ ಈ ಬಿಜೆಪಿ ಮಂದಿ ಮಾತ್ರ ಆಗಾಗ ಕಪೋಲ ಕಲ್ಪಿತ ಸರಕುಗಳನ್ನು ಕೈಗೆತ್ತಿಕೊಳ್ಳುತ್ತಾರೆ. ಆ ಮೂಲಕ ತಮ್ಮ ಆಡಳಿತ ವೈಫಲ್ಯವನ್ನು ಬಚ್ಚಿಟ್ಟುಕೊಳ್ಳಲು ಪ್ರಯತ್ನಿಸುತ್ತಾರೆಂಬ ಆರೋಪವಿದೆ. ಆರಂಭದಲ್ಲಿ ವಿರೋಧ ಪಕ್ಷಗಳ ಅಭಿಪ್ರಾಯದಂತಿದ್ದ ಆ ಆರೋಪಗಳೀಗ, ಸಾರ್ವಜನಿಕರನ್ನೂ ಆವರಿಸಿಕೊಂಡಿದೆ.

ಚುನಾವಣೆಯ ಹೊಸ್ತಿಲಲ್ಲಿ ಬಿಜೆಪಿಯನ್ನು ಅಂಥಾದ್ದೊಂದುಬ ಸಂದಿಗ್ಧ ಸ್ಥಿತಿಗೆ ತಳ್ಳಿದ್ದರಲ್ಲಿ ಉರಿಗೌಡ ಮತ್ತು ನಂಜೇಗೌಡರ ಪಾಲು ಬೆಟ್ಟದಷ್ಟಿದೆ. ಯಾವಾಗ, ಸಿ.ಟಿ ರವಿಯೆಂಬ ಆಸಾಮಿ ಪದೇ ಪದೆ ಈ ಎರಡು ಹೆಸರುಗಳನ್ನಿಟ್ಟುಕೊಂಡು ಪುಂಗಲು ಶುರುವಿಟ್ಟರೋ, ಆಗ ಅದೊಂದು ವಿವಾದದ ಸ್ವರೂಪ ಪಡೆದುಕೊಂಡಿತ್ತು. ಚುನಾವಣೆಯ ಹಂತದಲ್ಲಿ ಉರಿಗೌಡ ಮತ್ತು ನಂಜೇಗೌಡರನ್ನು ಮತ್ತಷ್ಟು ಮುನ್ನೆಲೆಗೆ ತರುವ ಸಲುವಾಗಿಯೇ ಸಿನಿಮಾಕ್ಕೂ ತಯಾರಿ ನಡೆದಿತ್ತು. ಕುರುಕ್ಷೇತ್ರದಂಥಾ ಸಿನಿಮಾ ಮಾಡಿ ಜಯಿಸಿಕೊಂಡಿದ್ದ ಮುನಿರತ್ನ ಸಿಟಿ ರವಿಯ ಪುಂಗಿಗೆ ಮನಸಾರೆ ತಲೆದೂಗಿದ್ದರು.

ಹಾಗೆ ರವಿಯ ಪ್ರವರ ಕೇಳಿ ಬಂದವರೇ, ಉರಿಗೌಡ ಮತ್ತು ನಂಜೇಗೌಡರೆಂಬ ವೀರರ ಬಗ್ಗೆ ಸಿನಿಮಾ ಮಾಡೋದಾಗಿ ಘೋಷಣೆ ಮಾಡಿ ಬಿಟ್ಟಿದ್ದರು. ಅಷ್ಟರಲ್ಲಿ ಅವರಿಗೆ ನಿರ್ಮಲಾನಂದ ಶ್ರೀಗಳಿಂದ ಬುಲಾವು ಬಂದಿದೆ. ಹಾಗೆ ಸ್ವಾಮಿಗಳ ಮುಂದೆ ಹೋಗಿ ಕೂತ ಮುನಿತ್ನಗೆ ಜ್ಞಾನೋದಯವಾಗಿದೆ. ಯಾಕೆಂದರೆ, ನಿರ್ಮಲಾನಂದರು ಅತ್ಯಂತ ನಿಷ್ಟುರವಾಗಿ, ನ್ಯಾಯಸಮ್ಮತವಾಗಿ ಮಾತಾಡಿದ್ದಾರೆ. ಕಲ್ಪಿಸಿಕೊಂಡು ಬರೆಯೋದು ಕಾದಂಬರಿಯಾಗುತ್ತದೇ ಹೊರತು ಇಹಿತಾಸವಾಗಲಾರದೆಂಬ ಕಾಮನ್‍ಸೆನ್ಸಿನ ಪಾಠ ಮಾಡಿದ್ದಾರೆ. ಇದರೊಂದಿಗೆ ಸಿಟಿ ರವಿ ಬಿಟ್ಟಿದ್ದ ಹಾವು ಹೇಳ ಹೆಸರಿಲ್ಲದಂತೆ ಮಾಯವಾಗಿದೆ. ಹಾಗೆ ಹೊರ ಬಂದ ಮುನಿರತ್ನ, ಇನ್ನು ಮುಂದೆ ಉರಿಗೌಡ ನಂಜೇಗೌಡರ ಬಗ್ಗೆ ಸಿನಿಮಾ ಮಾಡೋದಿರಲಿ; ಆ ಹೆಸರನ್ನೂ ಎತ್ತೋದಿಲ್ಲ ಎಂಬರ್ಥದಲ್ಲಿ ಮಾತಾಡಿದ್ದಾರೆ.

ಅಲ್ಲಿಗೆ ಸುಳ್ಳನ್ನೇ ಸತ್ಯವೆಂಬಂತೆ ಒದರುತ್ತಾ ಬಂದಿದ್ದ ರವಿಗೆ ಮುಖಭಂಗವಾದಂತಾಗಿದೆ. ಅದರ ಜೊತೆಗೆ ಒಂದು ಕಂಟಕವೂ ಕಳೆದಂತಾಗಿದೆ. ಯಾಕೆಂದರೆ. ಕಾಶ್ಮೀರ್ ಫೈಲ್‍ನಂಥಾ ಸಿನಿಮಾದ ಮೂಲಕ ಒನ್‍ಸೈಡೆಡ್ ವಿಚಾರ ಮಂಡಿಸಿ, ಬಿಜೆಪಿ ಬೇಳೆ ಬೇಯಿಸಿಕೊಂಡಿದೆ ಎಂಬಂಥಾ ಆರೋಪವಿದೆ. ನಂಜೇಗೌಡ ಉರಿಗೌಡರ ವಿಚಾರದಲ್ಲಿ ಪೂರಕ ದಾಖಲೆ ಒದಗಿಸುವ ಯೋಗ್ಯತೆ ಇಲ್ಲದ ಮಂದಿ, ಸಿನಿಮಾ ಮೂಲಕ ಆ ಕಲ್ಪಿತ ಪಾತ್ರಗಳಿಗೊಂದು ಕಾಯಕಲ್ಪ ಕೊಡಲು ಮುಂದಾಗಿದ್ದರು. ಅದಕ್ಕೀಗ ನಿರ್ಮಲಾನಂದರ ಸಾನಿಧ್ಯದಲ್ಲಿ ಬ್ರೇಕ್ ಬಿದ್ದಿದೆ. ಈ ಮೂಲಕ ಬಿಜೆಪಿಗರ ಸುಳ್ಳುಗಳು ಮಂಡ್ಯ ಸೀಮೆಯ ಒಕ್ಕಲಿಗರು ಎಚ್ಚೆತ್ತುಕೊಂಡಿದ್ದಾರೆ. ಇಂಥಾ ಸುಳ್ಳಿನ ಸಾರಥ್ಯದಲ್ಲಿ ಚುನಾವಣೆ ಗೆಲ್ಲುವ ಭ್ರಮೆ ಹೊಂದಿದ್ದ ಬಿಜೆಪಿಗೆ ಹಿನ್ನಡೆಯಾಗಿದೆ. ಬಿಜೆಪಿ ಪಾಳೆಯದ ಭಯಾನಕ ಇತಿಹಾಸ ತಜ್ಞರಾದ ಸಿ.ಟಿ ರವಿ ಸಾಹೇಬರು ಅದೇಕೋ ಥಂಡಾ ಹೊಡೆದಂತಿದ್ದಾರೆ!

The post ಇದರ ಬಗ್ಗೆ ಇತಿಹಾಸ ತಜ್ಞ ಸಿ.ಟಿ ರವಿ ಏನಂತಾರೆ?! appeared first on ಶೋಧ ನ್ಯೂಸ್ - Shodha News.

ನವರಸ ನಾಯಕ ಜಗ್ಗೇಶ್ ಸಹೋದರ ಕೋಮಲ್ ಕುಮಾರನ ಲಕ್ಕು ಕುದುರುವ ಲ್ಷಣಗಳು ಸಣ್ಣಗೆ ಹೊಳೆಯಲಾರಂಭಿಸಿವೆ. ಹಾಸ್ಯ ಕಲಾವಿದನಾಗಿ ಬಹು ಬೇಡಿಕೆಯಲ್ಲಿರುವಾಗಲೇ, ಹೀರೋ ಆಗುವ ತಲುಬು ಹತ್ತಿಸಿಕೊಂಡು ಹೊರಟಿದ್ದವರು ಕೋಮಲ್. ಆತ ಹಾಗೊಂದು ನಿರ್ಧಾರ ಪ್ರಕಟಿಸಿದಾಗ ಬಹುತೇಕರು `ಈ ಆಸಾಮಿಗಿದು ಬೇಕಿತ್ತಾ’ ಅಂದುಕೊಂಡಿದ್ದರು. ಆ ನಂತರದಲ್ಲಿ ಕೋಮಲ್ ಒಂದಷ್ಟು ಸಿನಿಮಾಗಳಲ್ಲಿ ನಟಿಸಿದ್ದರಾದರೂ ಪುಷ್ಕಳವಾದೊಂದು ಗೆಲುವು ಸಿಕ್ಕಿರಲಿಲ್ಲ. ಪ್ರೇಕ್ಷಕರು ಕೋಮಲನನ್ನು ಹೀರೋ ಆಗಿ ಅರಗಿಸಿಕೊಳ್ಳುವಂಥಾ ಮನಸು ಮಾಡಲಿಲ್ಲ. ಆ ನಂತರದ ಅಜ್ಞಾತವಾಸ, ಪಡಿಪಾಟಲುಗಳಲ್ಲಿ ಕಳೆದು ಹೋಗಿದ್ದ ಕೋಮಲ್ ಇದೀಗ ಮತ್ತೊಂದಷ್ಟು ಭರವಸೆ, ಹುರುಪು ತುಂಬಿಕೊಂಡು ಪ್ರತ್ಯಕ್ಷರಾಗಿದ್ದಾರೆ!

ಇನ್ನೇನು ನೇಪಥ್ಯಕ್ಕೆ ಸರಿದೇ ಬಿಟ್ಟರು ಎಂಬಂತಿದ್ದ ಕೋಮಲ್, ಕೊರೋನಾ ಕಾಲಘಟ್ಟದ ಒಂದಷ್ಟು ನೋವುಗಳನ್ನುಂಡು ಮತ್ತೆ ಮೇಲೆದ್ದು ನಿಂತಿದ್ದಾರೆ. ಅದರ ಭಾಗವಾಗಿಯೇ ಒಂದೆರಡು ಸಿನಿಮಾಗಳಲ್ಲಿ ಮತ್ತೆ ನಾಯಕನಾಗಿ ನಟಿಸುತ್ತಿರುವ ಅವರೀಗ, ಮತ್ತೊಂದು ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ. ಆ ಚಿತ್ರಕ್ಕೆ `ಯಲಾ ಕುನ್ನಿ’ ಎಂಬ ಟೈಟಲ್ ಕೂಡಾ ನಿಕ್ಕಿಯಾಗಿದೆ. ಯಲಾ ಕುನ್ನಿ ಎಂಬ ಡೈಲಾಗು ಕೇಳುತ್ತಲೇ ಥಟ್ಟನೆ ಕನ್ನಡ ಸಿನಿಮಾ ಪ್ರೇಮಿಗಳಿಗೆಲ್ಲ ವಜ್ರಮುನಿ ನೆನಪಾಗುತ್ತಾರೆ. ಅವರ ಕೆಂಡದಂಥಾ ಕಣ್ಣುಗಳು, ಅದಕ್ಕೊಪ್ಪುವ ಮುಖ ಚರ್ಯೆಗಳೆಲ್ಲ ಕಣ್ಮುಂದೆ ಹಾದು ಹೋಗುತ್ತವೆ. ಈ ಸಿನಿಮಾಕ್ಕೂ, ವಜ್ರಮುನಿಯವರಿಗೂ ಸಂಬಂಧವಿದೆಯಾ ಅನ್ನುವಾಗಲೇ `ಮೇರಾ ನಾಮ್ ವಜ್ರಮುನಿ’ ಎಂಬ ಟ್ಯಾಗ್ ಲೈನ್ ಗಮನ ಸೆಳೆಯುತ್ತದೆ.

ಅಂದಹಾಗೆ, ಇದು ಸೌಭಾಗ್ಯ ಸಿನಿಮಾಸ್ ಲಾಂಛನದಲ್ಲಿ ಮಹೇಶ್ ಗೌಡ ನಿರ್ಮಾಣ ಮಾಡುತ್ತಿರುವ ಚಿತ್ರ. ಓಂಪ್ರಕಾಶ್ ರಾವ್, ಮುಸ್ಸಂಜೆ ಮಹೇಶ್ ಮುಂತಾದ ನಿರ್ದೇಶಕರ ಜೊತೆ ಕೆಲಸ ಮಾಡಿರುವ ಎನ್.ಆರ್ ಪ್ರದೀಪ್ ಈ ಚಿತ್ರವನ್ನು ನಿರ್ದೇಶನ ಮಾಡಲಿದ್ದಾರೆ. ವಿಶೇಷವಾದ ಕಥೆ ಮತ್ತು ಈವರೆಗೆ ಮಾಡದಿರುವಂಥಾ ಪಾತ್ರ ಸಿಕ್ಕ ಖುಷಿ ಕೋಮಲ್‍ಗಿದೆ. ಎಂಭತ್ತರ ದಶಕದಲ್ಲಿ ನಡೆಯೋ ರೆಟ್ರೋ ಶೈಲಿಯ ಈ ಕಥೆಗಾಗಿ, ಮೈಸೂರು, ಶ್ರೀರಂಗಪಟ್ಟಣ ಮುಂತಾದೆಡೆಗಳಲ್ಲಿ ಚಿತ್ರೀಕರಣ ನಡೆಯಲಿದೆಯಂತೆ. ಮುಸುರಿ ಕೃಷ್ಣಮೂರ್ತಿ ಅವರ ಮಗ ಜಯಸಿಂಹ ಮುಸುರಿ, ಮಹಾಂತೇಶ್ ಮತ್ತು ಜಗ್ಗೇಶ್ ಕಿರಿಯ ಮಗ ಯತಿರಾಜ್ ಪ್ರಧಾನ ಪಾತ್ರಗಳಲ್ಲಿ ನಟಿಸಲಿದ್ದಾರಂತೆ. ಹೀಗೆ ವಜ್ರಮುನಿಯಾಗ ಹೊರಟಿರುವ ಕೋಮಲ್‍ಗೆ ಈ ಮೂಲಕವಾದರೂ ಜಯ ಸಿಗಲೆಂಬುದು ಹಾರೈಕೆ!

The post ವಜ್ರಮುನಿಯ ದಯೆಯಿಂದಾದರೂ ಗೆಲುವು ದಕ್ಕಬಹುದಾ? appeared first on ಶೋಧ ನ್ಯೂಸ್ - Shodha News.

ಸದ್ಯಕ್ಕೆ ಸಾಲು ಸಾಲು ಸಿನಿಮಾಗಳಲ್ಲಿ ನಟಿಸುತ್ತಾ, ಅತ್ಯಂತ ಬ್ಯುಸಿಯಾಗಿರುವ ನಟರಲ್ಲಿ ನೀನಾಸಂ ಸತೀಶ್ ಕೂಡಾ ನಿಸ್ಸಂದೇಹವಾಗಿ ಸೇರಿಕೊಳ್ಳುತ್ತಾರೆ. ಆರಂಭದಲ್ಲಿ ಸಣ್ಣಪುಟ್ಟ ಪಾತ್ರಗಳನ್ನು ಮಾಡುತ್ತಾ, ನೋಡ ನೋಡುತ್ತಲೇ ಮುಖ್ಯ ನಾಯಕನಾಗಿ ಬೆಳೆದು ನಿಂತ ನೀನಾಸಂ ಸತೀಶ್‍ರದ್ದು ಸ್ಫೂರ್ತಿದಾಯಕ ವ್ಯಕ್ತಿತ್ವವೂ ಹೌದು. ಈ ಹಾದಿಯಲ್ಲಿ ಹಿಂತಿರುಗಿ ನೋಡಲೂ ಪುರಸೊತ್ತಿಲ್ಲದಂತೆ ಬ್ಯುಸಿಯಾಗಿರುವ ಅವರೀಗ ಏಕಕಾಲದಲ್ಲಿಯೇ ಮೂರು ಚಿತ್ರಗಳಲ್ಲಿ ನಾಯಕನಾಗಿದ್ದಾರೆ. ಇದೇ ಹೊತ್ತಿನಲ್ಲಿ ನಿರ್ದೇಶಕ ದುನಿಯಾ ಸೂರಿ ಗರಡಿ ಸೇರಿಕೊಳ್ಳುವ ಮೂಲಕ ಮತ್ತೊಂದು ಮಹತ್ವದ ಚಿತ್ರ ಆರಂಭವಾಗಿರುವ ಸುಳಿವು ನೀಡಿದ್ದಾರೆ!

ನೀನಾಸಂ ಸತೀಶ್ ಸುಕ್ಕಾ ಸೂರಿಯ ಪಕ್ಕದಲ್ಲಿ ನಿಂತಿರೋ ಫೋಟೋವೊಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿತ್ತು. ಆ ಹಿನ್ನೆಲೆಯಲ್ಲಿ ಹತ್ತಾರು ದಿಕ್ಕಿನಿಂದ ಒಂದಷ್ಟು ಚರ್ಚೆಗಳು ಹುಟ್ಟಿಕೊಂಡಿದ್ದವು. ಕಡೇಗೂ ಈ ಬಗ್ಗೆ ಖುದ್ದು ಸತೀಶ್ ಅವರೇ ಸ್ಪಷ್ಟೀಕರಣ ಕೊಟ್ಟಿದ್ದಾರೆ. ಅದರನ್ವಯ ಹೇಳೋದಾದರೆ, ಸತೀಶ್ ಮತ್ತು ಸೂರಿ ಕಾಂಬಿನೇಷನ್ನಿನಲ್ಲೊಂದು ಸಿನಿಮಾ ಶುರುವಾಗೋದು ಪಕ್ಕಾ. ಹಾಗಂತ ಈ ಹೊಸಾ ಸಿನಿಮಾವನ್ನು ಸೂರಿ ನಿರ್ದೇಶನ ಮಾಡುತ್ತಿಲ್ಲ. ಬದಲಾಗಿ, ಅವರ ಗರಡಿಯಲ್ಲಿ ಬಹುಕಾಲದಿಂದ ಪಳಗಿಕೊಂಡಿರುವ ಪ್ರತಿಭಾನ್ವಿತ ಹುಡುಗ ಸುರೇಶ್ ನಿರ್ದೇಶನ ಮಾಡುತ್ತಿದ್ದಾರೆ. ಒಂದಿಡೀ ಚಿತ್ರ ಪಕ್ಕಾ ಸೂರಿ ಶೈಲಿಯಲ್ಲೇ ಮೂಡಿ ಬರಲಿದೆ. ಯಾಕೆಂದರೆ, ಶಿಷ್ಯನ ಸಾರಥ್ಯದ ಈ ಚಿತ್ರವನ್ನು ಪ್ರತೀ ಹಂತದಲ್ಲಿಯೂ ಜೊತೆಗಿದ್ದು ಪೊರೆಯುವ ಭರವಸೆಯನ್ನು ಸೂರಿ ಕೊಟ್ಟಿದ್ದಾರೆ.

ಹಾಗಾದರೆ, ಈ ಚಿತ್ರದ ವಿಶೇಷತೆಗಳೇನೆಂಬ ಕುತೂಹಲ ಮೂಡಿಕೊಳ್ಳೋದು ಸಹಜ. ಇದು ಪಕ್ಕಾ ರಾ ಸಬ್ಜೆಕ್ಟಿನ ಆಕ್ಷನ್ ಸಿನಿಮಾ. ನೀನಾಸಂ ಸತೀಶ್ ಪಾಲಿಗಿದು ಹೊಸಾ ಜಾನರ್. ಅವರು ಈ ಹಿಂದೆ ಎಂದೂ ಇಂಥಾ ಪಾತ್ರದಲ್ಲಿ ಕಾಣಿಸಿಕೊಂಡಿರಲಿಲ್ಲವಂತೆ. ಸೂರಿ ಫ್ಲೇವರಿನ ಈ ಕಥೆಯನ್ನು ಬಹುವಾಗಿ ಇಷ್ಟಪಟ್ಟೇ ಅವರು ನಟಿಸಲು ಒಪ್ಪಿಕೊಂಡಿದ್ದಾರೆ. ವರ್ಷದಿಂದೀಚೆಗೆ ನಟನಾಗಿ ಹೊಸಾ ಆಯಾಮಗಳತ್ತ ತೆರೆದುಕೊಳ್ಳುತ್ತಿರುವವರು ನೀನಾಸಂ ಸತೀಶ್. ಆ ಹಾದಿಯಲ್ಲವರಿಗೆ ಭರಪೂರ ಗೆಲುವು ದಕ್ಕಿದೆ. ಇದೀಗ ಸೂರಿ ನೆರಳಿನಲ್ಲಿ ಶುರುವಾಗಲಿರೋ ಈ ಸಿನಿಮಾ ಮೂಲಕ ಸತೀಶ್ ಹೊಸಾ ಲುಕ್ಕಿನಲ್ಲಿ ಪ್ರೇಕ್ಷಕರ ಮುಂದೆ ಬಂದು ಅಚ್ಚರಿ ಮೂಡಿಸಲಿದ್ದಾರೆ!

The post ತಯಾರಾಗುತ್ತಿದೆ ಪಕ್ಕಾ ಸೂರಿ ಫ್ಲೇವರಿನ ಚಿತ್ರ! appeared first on ಶೋಧ ನ್ಯೂಸ್ - Shodha News.

ಪ್ರತಿಭೆ ಮತ್ತು ಪೊರಿಶ್ರಮವೆಂಬುದಿದ್ದರೆ, ಚಿತ್ರರಂಗದಲ್ಲಿನ ಪುಟ್ಟ ಹೆಜ್ಜೆಯೂ ರಾಜಮಾರ್ಗವಾಗಿ ಬದಲಾಗಿ ಬಿಡುತ್ತೆ. ಅವಕಾಶಗಳ ಹಿಂದೆ ಅವಕಾಶಗಳ ಸಂತೆ ನೆರೆದು ಮತ್ಯಾವುದೋ ಎತ್ತರಕ್ಕೇರಿಸುತ್ತೆ. ಈ ಮಾತಿಗೆ ಉದಾಹರಣೆಯಂಥಾ ಒಂದಷ್ಟು ಪ್ರತಿಭಾನ್ವಿತರು ಕನ್ನಡ ಚಿತ್ರರಂಗದಲ್ಲಿದ್ದಾರೆ. ಆ ಯಾದಿಯಲ್ಲಿ ಇತ್ತೀಚಿನ ಸೇರ್ಪಡೆಯಂತಿರುವವರು ಧರ್ಮಣ್ಣ ಕಡೂರು. ರಾಮಾ ರಾಮಾ ರೇ ಎಂಬ ಚಿತ್ರದ ಮೂಲಕ ನಟನಾಗಿ ಎಡಂಟ್ರಿ ಕೊಟ್ಟಿದ್ದ ಧರ್ಮಣ್ಣ, ಆ ನಂತರದಲ್ಲಿ ಅನೇಕ ಚಿತ್ರಗಳಲ್ಲಿ ಕಾಮಿಡಿ ನಟನಾಗಿ ಮಿಂಚಿದ್ದರು. ಇದೀಗ ಅವರ ಮುಂದೆ ಅಕ್ಷರಶಃ ರಾಜಯೋಗ ಅವತರಿಸಿದೆ!

ಸಿಕ್ಕ ಪಾತ್ರಗಳನ್ನು ಕಣ್ಣಿಗೊತ್ತಿಕೊಂಡು ನಟಿಸೋ ಮನಃಸ್ಥಿತಿ ಹೊಂದಿರುವವರು ಧರ್ಮಣ್ಣ. ರಾಮಾ ರಾಮಾ ರೇ ಚಿತ್ರದಲ್ಲಿ ಈ ಹುಡುಗ ನಟಿಸಿದ್ದ ಪರಿ ಕಂಡು ಚಿತ್ರಪ್ರೇಮಿಗಳೆಲ್ಲ ಅಚ್ಚರಿಗೊಂಡಿದ್ದರು. ಭಿನ್ನ ಬಗೆಯದ್ದಾಗಿದ್ದ ಆ ಚಿತ್ರದ ಜೀವಾಳವೇ ಈ ಪಾತ್ರ ಎಂಬಷ್ಟರ ಮಟ್ಟಿಗೆ ಧರ್ಮಣ್ಣನ ಖ್ಯಾತಿ ಹಬ್ಬಿಕೊಂಡಿತ್ತು. ಹಾಗೆ ರಾಮ ರಾಮಾ ರೇ ಚಿತ್ರದಲ್ಲಿನ ಆ ಪಾತ್ರ ಕಂಡವರೆಲ್ಲ, ಈ ಹುಡುಗ ನಟನಾಗಿ ನೆಲೆ ಕಂಡುಕೊಳ್ಳುತ್ತಾನೆಂಬ ಭವಿಷ್ಯ ನುಡಿದಿದ್ದರು. ಅದು ನಿಜವಾಗಿ ವರ್ಷಗಳೇ ಕಳೆದಿವೆ. ಕಾಮಿಡಿ ಪಾತ್ರಗಳಲ್ಲಿ ಬ್ಯುಸಿಯಿರುವಾಗಲೇ ಧರ್ಮಣ್ಣ `ರಾಜಯೋಗ’ ಅಂತೊಂದು ಸಿನಿಮಾ ಮೂಲಕ ಹೀರೋ ಆಗಿಬಿಟ್ಟಿದ್ದಾರೆ!

ಈಗಾಗಲೇ ಕಿರುತೆರೆಯಲ್ಲಿ ಒಂದಷ್ಟು ವರ್ಷಗಳಿಂದ ಪಳಗಿಕೊಂಡಿರುವ ಲಿಂಗರಾಜ ಉಚ್ಚಂಗಿ ದುರ್ಗ ನಿರ್ದೇಶನದಲ್ಲಿ ಮೂಡಿ ಬರಲಿರುವ ಚಿತ್ರ ರಾಜಯೋಗ. ಹಾಗಾದರೆ ಈ ಚಿತ್ರದ ಕಥೆ ಏನು? ಅದು ಯಾವ ಜಾನರಿನದ್ದೆಂಬ ಕುತೂಹಲ ಸಹಜವಾಗಿಯೇ ಕಾಡುತ್ತದೆ. ಈ ಬಗ್ಗೆ ಚಿತ್ರ ತಂಡ ಒಂದಷ್ಟು ವಿಚಾರಗಳನ್ನು ಹಂಚಿಕೊಂಡಿದೆ. ಆ ಪ್ರಕಾರವಾಗಿ ಹೇಳೋದಾದರೆ, ರಾಜಯೋಗ ಕಾಮಿಡಿ ಮತ್ತು ಎಮೋಷನಲ್ ಅಂಶಗಳನ್ನು ಹದವಾಗಿ ಬೆರೆಸಿರುವ ಚೆಂದದ ಕಥೆಯನ್ನೊಳಗೊಂಡಿದೆ. ಈ ಮೂಲಕ ಹೀರೋ ಆಗಿರುವ ಧರ್ಮಣ್ಣಗೆ ಸ್ಪೆಷಲ್ಲೆಂಬಂಥಾ ಪಾತ್ರವೇ ಸಿಕ್ಕಿದೆಯಂತೆ. ಅಂತೂ ರಾಜಯೋಗದ ಮೂಲಕ ಧರ್ಮಣ್ಣ ಪ್ರತಿಭೆಯ ಮಗ್ಗುಲು ಪರಿಚಯವಾಗಲಿದೆ!

ಶ್ರೀರಾಮನಾಥನ್ ಪ್ರೊಡಕ್ಷನ್ಸ್ ಬ್ಯಾನರಿನಡಿಯಲ್ಲಿ ಸ್ನೇಹಿರು ಸೇರಿ ಈ ಚಿತ್ರಕ್ಕೆ ಬಂಡವಾಳ ಹೂಡಿದ್ದಾರೆ. ಅದಾಗಲೇ ರಾಜಯೋಗ ಎಪ್ಪತ್ತು ಭಾಗದಷ್ಟು ಚಿತ್ರೀಕರಣ ಮುಗಿಸಿಕೊಂಡಿದೆ. ಈ ಹೊತ್ತಿನಲ್ಲಿ ಒಂದಿಡೀ ಸಿನಿಮಾದ ಸಾರವನ್ನು ಹಿಡಿದಿಟ್ಟುಕೊಂಡಂಥಾ ಪೋಸ್ಟರ್ ಒಂದನ್ನು ಬಿಡುಗಡೆಗೊಳಿಸಲಾಗಿದೆ. ಉಳಿಕೆ ಮಾಹಿತಿಗಳು ಇಷ್ಟರಲ್ಲಿಯೇ ಜಾಹೀರಾಗಲಿದೆ. ಸಾಮಾನ್ಯವಾಗಿ ಒಂದಷ್ಟು ಹಾಸ್ಯ ಪಾತ್ರಗಳಲ್ಲಿ ಕಾಣಿಸಿಕೊಳ್ಳುತ್ತಲೇ ಕೆಲವರಿಗೆ ನಾಯಕನಾಗೋ ಆಸೆ ಚಿಗುರುತ್ತದೆ. ಆದರೆ ಅಂಥಾ ಯಾವ ಗೋಜಿಗೂ ಹೋಗದೆ ಸಿಕ್ಕ ಪಾತ್ರಗಳಲ್ಲಿ ಖುಷಿ ಕಂಡುಕೊಂಡಿದ್ದವರು ಧರ್ಮಣ್ಣ. ಈ ಅವಕಾಶ ಅವರಿಗೆ ತಾನೇ ತಾನಾಗಿ ಒಲಿದು ಬಂದಿದೆ. ರೈತಾಪಿ ವರ್ಗದಿಂದ ಬಂದು, ಕಡುಗಷ್ಟದಿಂದ ನೆಲೆ ಕಂಡುಕೊಂಡಿರುವ ಧರ್ಮಣ್ಣನಿಗೆ ಒಳ್ಳೆಯದ್ದಾಗಲಿ, ಅವರು ನಾಯಕನಾಗಿಯೂ ಯಶಸ್ವಿಯಾಗಲೆಂದು `ಸಿನಿ ಶೋಧ’ ಹಾರೈಸುತ್ತದೆ…

The post ಪ್ರತಿಭಾನ್ವಿತ ಹಳ್ಳಿ ಹುಡುಗನೀಗ ಹೀರೋ! appeared first on ಶೋಧ ನ್ಯೂಸ್ - Shodha News.

ದುನಿಯಾ ಸೂರಿ ನಿರ್ದೇಶನದ `ಕೆಂಡಸಂಪಿಗೆ’ ಚಿತ್ರದ ಮೂಲಕ ನಟಿಯಾಗಿ ಆಗಮಿಸಿದ್ದವರು ಮಾನ್ವಿತಾ. ಅದು ಪಕ್ಕಾ ಸೂರಿ ಫ್ಲೇವರಿನ ಚಿತ್ರ. ಚೆಂದದ ನಿರೂಪಣೆ, ಎಲ್ಲರಿಗೂ ತಾಕುವ ಕಥೆ ಮತ್ತು ಬಹುಕಾಲ ಮನಸಲ್ಲುಳಿಯುವ ಪಾತ್ರಗಳೊಂದಿಗೆ ಕೆಂಡಸಂಪಿಗೆ ಕಂಪು ಬೀರಿತ್ತು. `ಇಂತಿ ನಿನ್ನ ಪ್ರೀತಿಯ’ ಎಂಬ ನವಿರಾದ ಕಥನದ ನಂತರದಲ್ಲಿ ಹಳೇ ಪಾತ್ರ ಹಳೇ ಕಬುಣ ಎಂಬಂಥಾ ಜಾಡು ಹಿಡಿದಿದ್ದ ಸೂರಿ, ಕೆಂಡಸಂಪಿಗೆ ಮೂಲಕ ಮತ್ತೆ ಹಳೇ ಜಾಡು ಹಿಡಿದಿದ್ದರು. ಈ ಮೂಲಕ ನಾಯಕಿಯಾಗಿ ಪಾದಾರ್ಪಣೆ ಮಾಡಿ, ಪ್ರೇಕ್ಷಕರನ್ನೆಲ್ಲ ಸೆಳೆದುಕೊಂಡಿದ್ದಾಕೆ ಮಾನ್ವಿತಾ ಕಾಮತ್!

ಅದೇಕೋ, ಆ ನಂತರದಲ್ಲಿ ಹೇಳಿಕೊಳ್ಳುವಂಥಾ ಗೆಲುವು ಆಕೆಯ ಕೈ ಹಿಡಿದಿರಲಿಲ್ಲ. ಮಂಗಳೂರು ಸೀಮೆಯಲ್ಲಿ ಒಂದು ಕಾಲಕ್ಕೆ ರೇಡಿಯೋ ಜಾಕಿಯಾಗಿದ್ದ ಮಾನ್ವಿತಾಗೆ, ಮತ್ತದೇ ವೃತ್ತಿ ಗಟ್ಟಿ ಎಂಬಂಥಾ ಸ್ಥಿತಿಯೂ ನಿರ್ಮಾಣಗೊಂಡಿತ್ತು.Á ನಂತರದಲ್ಲಿ ಅದೇ ಸೂರಿ `ಟಗರು’ ಮೂಲಕ ಮತ್ತೆ ಮಿಂಚಿದ್ದರಲ್ಲಾ? ಆ ಸಿನಿಮಾದ ನಾಯಕಿಯಾಗಿ ಮಾನ್ವಿತಾಗೆ ಮತ್ತೊಂದು ಬ್ರೇಕ್ ಸಿಕ್ಕಿತ್ತು. ಆದರೆ, ಅಂಥಾದ್ದೊಂದು ಗೆಲುವಿನ ಬಳಿಕವೂ ಆಕೆಯ ವೃತ್ತಿ ಬದುಕು ಟೇಕಾಫ್ ಆಗಲೇ ಇಲ್ಲ. ಅದೇನೂ ದುರಾದೃಷ್ಟವೋ, ವೈಯಕ್ತಿಕ ಬದುಕಿನ ಸಮಸ್ಯೆಯೋ ಗೊತ್ತಿಲ್ಲ; ಮಾನ್ವಿತಾ ಈಗೊಂದಷ್ಟು ವರ್ಷಗಳಿಂದ ನೇಪಥ್ಯಕ್ಕೆ ಸರಿದು ಬಿಟ್ಟಿದ್ದರು. ಇದೀಗ ಸುದೀರ್ಘ ವನವಾಸದ ನಂತರ ಆಕೆ ಮತ್ತೊಂದು ಗೆಟಪ್ಪಿನ ಮೂಲಕ ಸದ್ದು ಮಾಡಿದ್ದಾರೆ!

ಲಕ್ಷಣವಾಗಿ ಸೀರೆಯುಟ್ಟು, ಕೈಲಿ ಪುಸ್ತಕ ಹಿಡಿದುಕೊಂಡು ಮಕ್ಕಳಿಗೆ ಪಾಠ ಮಾಡೋ ಗೆಟಪ್ಪಿನ ಮಾನ್ವಿತಾರ ಫೋಟೋ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡಲಾರಂಭಿಸಿದೆ. ಈಕೆ ಏನಾದರೂ ಅವಕಾಶ ಸಿಗದೆ ಹೊಸಾ ವೃತ್ತಿ ಆರಂಭಿಸಿದರಾ ಅಂದರೆ, ಅದು ಹೊಸಾ ಸಿನಿಮಾವೊಂದಕ್ಕಾಗಿನ ಗೆಟಪ್ಪೆಂಬ ವಿಚಾರ ಜಾಹೀರಾಗುತ್ತದೆ. ಒಂದು ಮೂಲದ ಪ್ರಕಾರ ಮಾನ್ವಿತಾ ಚಿತ್ರವೊಂದನ್ನು ಒಪ್ಪಿಕೊಂಡಿದ್ದಾರೆ. ಈ ಬಾರಿ ಆಕೆಗೆ ಇದುವರೆಗಿನ ಅಷ್ಟೂ ಪಾತ್ರಗಳಿಗಿಂತ ಭಿನ್ನವಾದ ಪಾತ್ರವೇ ಸಿಕ್ಕಿದೆ. ಸದ್ಯಕ್ಕೆ ಈ ಫೋಟೋಗಳ ಸುತ್ತ ಊಹಾಪೋಹಗಳು ಚಾಲ್ತಿಯಲ್ಲಿವೆ. ಇಷ್ಟರಲ್ಲಿಯೇ ಆ ಸಿನಿಮಾ ಬಗೆಗಿನ ನಿಖರ ಮಾಹಿತಿಗಳು ಜಾಹೀರಾಗಲಿವೆ.

The post ಮಲೆನಾಡು ಹುಡುಗಿಯ ವಿಶಿಷ್ಟ ಗೆಟಪ್! appeared first on ಶೋಧ ನ್ಯೂಸ್ - Shodha News.