ಬಹುತೇಕ ಎಲ್ಲ ಪಕ್ಷಗಳಲ್ಲೀಯೂ ಇದೀಗ ಟಿಕೆಟ್ ಹಂಚಿಕೆಯ ಬೇಗುದಿ ಮೇರೆ ಮೀರಿಕೊಂಡಿದೆ. ಬಿಜೆಪಿಯಂತೂ (bjp) ಸದ್ಯಕ್ಕೆ ಅಂಥಾ ಅಸಹನೆಗಳ ದಾವಾನಲವಾಗಿ ಬದಲಾಗಿ ಬಿಟ್ಟಿದೆ. ಸೂಕ್ಷ್ಮವಾಗಿ ಗಮನಿಸಿದರೆ, ಚುನಾವಣೆಯ ಸಂಧಿ ಕಾಲದಲ್ಲಿ ಮಾತ್ರವೇ ಎಚ್ಚೆತ್ತುಕೊಳ್ಳುವ ಜಾಯಮಾನದ ಜೆಡೆಎಸ್‍ನೊಳಗೂ (jds) ಈ ಬಾರಿ ಟಿಕೆಟ್‍ಗಾಗಿನ ಕೋಲಾಹಲ ಜೋರಾಗಿದೆ. ಬಹುಶಃ (devegowda) ದೇವೇಗೌಡರ ಕುಟುಂಬದ ಹೊರಗಿನ ಮಂದಿ ಹೀಗೆ ಟಿಕೆಟಿಗಾಗಿ ಮುಸುಕಿನ ಗುದ್ದಾಟ ನಡೆಸಿದ್ದರೆ ಅದಕ್ಕೆ ಈ ಪರಿಯಾಗಿ ಪ್ರಾಶಸ್ತ್ಯ ಸಿಗುತ್ತಿರಲಿಲ್ಲವೇನೋ… ಆದರೆ, ಅಲ್ಲೀಗ ಅಣ್ಣ ತಮ್ಮನ ನಡುವೆ, ಅತ್ತಿಗೆ ನಾದಿನಿಯರ ನಡುವೆ ಕಾದಾಟ ಶುರುವಾಗಿದೆ!

ಇದರ ಭಾಗವಾಗಿಯೇ ಭವಾನಿ ರೇವಣ್ಣ ಬಹು ಹಿಂದಿನಿಂದಲೇ ಜೋರು ಧ್ವನಿಯಲ್ಲಿ ಅಖಾಡಕ್ಕಿಳಿದಿದ್ದರು. ಹೀಗೆ ಅಣ್ಣ ತಮ್ಮ, ಅವರ ಹೆಂಡಿರು ಮಕ್ಕಳಿಗೆಲ್ಲ ಟಿಕೆಟು ಕೊಟ್ಟು ಕೊಟ್ಟೇ ಜೆಡಿಎಸ್ ಇದ್ದ ನೆಲೆಯನ್ನೂ ಕಳೆದುಕೊಂಡು ಬರುತ್ತಿದೆ. ಹಾಗೇನಾದರೂ ಈ ಬಾರಿ ಹಾಸನ ಕ್ಷೇತ್ರದಿಂದ ಭವಾನಿ ರೇವಣ್ಣಗೆ ಟಿಕೇಟು ಕೊಟ್ಟಿದ್ದರೆ, ಅದು ಜೆಡಿಎಸ್‍ಗೆ ಮತ್ತಷ್ಟು ಹಿನ್ನಡೆ ತಂದೊಡ್ಡುತ್ತಿತ್ತು. ವಿರೋಧಿ ಪಾಳೆಯಕ್ಕೆ ಆಡಿಕೊಳ್ಳಲೊಂದು ಅಸ್ತ್ರ ಖುದ್ದು ಜೇಡಿಎಸ್ ಕಡೆಯಿಂದಲೇ ಸಿದ್ಧವಾದಂತಾಗುತ್ತಿತ್ತು. ಈ ವಿಚಾರದಲಿ ಕುಮಾರಸ್ವಾಮಿ ಆರಂಭದಿಂದಲೇ ನಾಜೂಕಿನ ನಡೆ ಅನುಸರಿಸಿಕೊಂಡು ಬಂದಿದ್ದಾರೆ. ಕಡೆಯೂ ಆ ಜಾಣ ನಡೆಯ ಅಂತಿಮ ಫಲಿತಾಂಶ ಹೊರ ಬಂದು, ಅದನ್ನು ಕಂಡು ವಿರೋಧಿ ಪಡೆಯೇ ಅವಾಕ್ಕಾಗಿಬಿಟ್ಟಿದೆ!

ಯಾಕೆಂದರೆ, ಹಾಸನದಲ್ಲಿ ದೇವೇಗೌಡರ ಕುಟುಂಬದಾಚೆಗೆ ಸ್ವರೂಪ್‍ಗೆ ಜೆಡಿಎಸ್ ಟಿಕೇಟ್ ಖಾತರಿಗೊಳಿಸಲಾಗಿದೆ. ಇನ್ನೇನು ಭವಾನಿಗೇ ಅಲ್ಲಿನ ಟಿಕೇಟು ಫಿಕ್ಸ್ ಅಂದುಕೊಂಡಿದ್ದವರಿಗೆಲ್ಲ ಅಚ್ಚರಿಯಾಗಿದೆ. ಆದರೆ, ಹಾಸನ ಕೈ ತಪ್ಪಿದರೂ, ಯಾವ ಕ್ಷೇತ್ರದಲ್ಲಾದರೂ ಟಿಕೇಟು ಸಿಗದಿದ್ದರೆ ಭವಾನಿ ಸುಮ್ಮನಿರುವಂತೆ ಕಾಣುತ್ತಿಲ್ಲ. ಆಕೆಯ ಪರವಾಗಿ ರೇವಣ್ಣ ಕೂಡಾ ಅನಿವಾರ್ಯವಾಗಿ ಬಂಡೇಳುವ ಸಾಧ್ಯತೆಗಳಿವೆ. ದೇವೇಗೌಡರ ಅಂತಃಪುರದ ಮೂಲಗಳ ಪ್ರಕಾರ, ಅದಕ್ಕೂ ಕೂಡಾ ಈಗಾಗಲೇ ಕಾರ್ಯ ತಂತ್ರ ರೆಡಿಯಾಗಿದೆ. ಒಂದುವೇಳೆ, ಭವಾನಿ ಕಣಕ್ಕಿಳಿಯುತ್ತೇನೆಂದು ರಚ್ಚೆ ಹಿಡಿದರೆ ಮೈಸೂರಿನ ಚಾಮರಾಜ ಕ್ಷೇತ್ರದಿಂದ ಟಿಕೇಟು ಕೊಡಲು ತಯಾರಿ ನಡೆದಿದೆ. ಅಂತೂ ಟಿಕೆಟ್ ಭೂಮಿಕೆಯ ಕೌಟುಂಬಿಕ ಕಲಹವನ್ನು ಕುಮ್ಮಿ ಅತ್ಯಂತ ನಾಜೂಕಿನಿಂದಲೇ ಪರಿಹರಿಸಿದ್ದಾರೆ!

The post bhavani revanna: ಕುಟುಂಬದ ಸೆರಗಲ್ಲೀಗ ಅಸಹನೆಯ ಕೆಂಡ! appeared first on ಶೋಧ ನ್ಯೂಸ್ - Shodha News.

ಕಡೆಗೂ ಅಳೆದೂ ತೂಗಿ (bjp) ಬಿಜೆಪಿಯ ಅಭ್ಯರ್ಥಿಗಳ ಪಟ್ಟಿ ಬಿಡುಗಡೆಗೊಂಡಿದೆ. ಹೊಸಾ ಮುಖಗಳಿಗೆ ಮಣೆ ಹಾಕುವ ನೆರಳಿನಲ್ಲಿ. (rss) ಆರೆಸೆಸ್ ಆಣತಿಯೇ ಪ್ರಧಾನವಾಗಿ ಕೆಲಸ ಮಾಡಿರೋದು ಕೂಡಾ ಮೇಲು ನೋಟಕ್ಕೇ ಗೋಚರಿಸಿದೆ. (congress) ಕಾಂಗ್ರೆಸ್ ಮಂದಿಗೆ ಟಾಂಗ್ ಕೊಡುವ ನೆಪದಲ್ಲಿ ಕೆಲವರನ್ನು ವ್ಯವಸ್ಥಿತವಾಗಿ ಹಣಿಸು, ಮೂಲೆಗುಂಪು ಮಾಡುವ ಹುನ್ನಾರಗಳೂ ಕೂಡಾ ಗಮನ ಸೆಳೆದಿವೆ. ಕೆಲ ಮಂದಿಯನ್ನಂತೂ ಅವರಿಗಿಷ್ಟವಿಲ್ಲದಿದ್ದರೂ ಎತ್ತಿ ಯಾರೆದುರೋ ನಿಲ್ಲಿಸಿದಂತೆಯೂ ಭಾಸವಾಗುತ್ತಿದೆ. ಅಂಥಾ ಹರಕೆಯ ಕುರಿಗಳ ಸಾಲಿನಲ್ಲಿ ಮುಂಚೂಣಿಯಲ್ಲಿರುವವರು (v. somanna) ವಿ. ಸೋಮಣ್ಣ. ಅಧಿಕಾರದಾಸೆಯಿಂದಲೇ ಕಮಲವನ್ನು ಎದೆಗವುಚಿಕೊಂಡಿದ್ದ ಸೋಮಣ್ಣನೀಗ, ಈ ಬಾರಿಯ ಚುನಾವಣೆಯೇ ತನ್ನ ರಾಜಕೀಯ ಬದುಕಿನ ಕೊನೇಯ ಕಣವಾಗುತ್ತದೇನೋ ಎಂಬಂಥಾ ಭಯದಲ್ಲಿದ್ದಾರೆ. ಇದೆಲ್ಲದಕ್ಕೂ ಕಾರಣವಾಗಿರೋದು ಖುದ್ದು (bjp) ಬಿಜೆಪಿ ನಾಯಕರ ರಣತಂತ್ರಗಳೇ!

ಒಂದೇ ಕಲ್ಲಿನಲ್ಲಿ ಎರಡು ಹಕ್ಕಿ ಹೊಡೆದು ವೀರಾಧಿ ವೀರರಂತೆ ಪೋಸು ಕೊಡುತ್ತಲೇ, ಎಸೆದ ಕಲ್ಲು ಎದೆ ಮೇಲೆ ಬಿದ್ದಾಗ ಕುಂಯ್ಯೋ ಅನ್ನಲೂ ಆಗದೆ, ನೋವು ತಡೆದುಕೊಳ್ಳುವ ಶಕ್ತಿಯೂ ಇಲ್ಲದೆ ಮುಲುಕ್ಯಾಡುವುದು ಬಿಜೆಪಿಗರ ಜಾಯಮಾನ. ಅತ್ತ ಕಾಂಗ್ರೆಸ್ ಮಂದಿ ಶಾಮನೂರು ಶಿಶಂಕರಪ್ಪರಂಥಾ ಮುದಿ ಆಸಾಮಿಗಳಿಗೆ ಟಿಕೆಟು ಕೊಡುತ್ತಲೇ, ಇತ್ತ ಬಿಜೆಪಿ ಮಂದಿ ವಯಸ್ಸಾದ ವಟುಗಳನ್ನು ಮುಲಾಜಿಲ್ಲದೆ ಮನೆಗೆ ಕಳಿಸುತ್ತಿದೆ. ಸಾಕ್ಷಾತ್ತು ಈಶ್ವರಪ್ಪನಿಗೇ ಅಂಥಾ ನಿಷ್ಠುರತೆಯ ಬಾಸುಂಡೆ ಬಿದ್ದಿದೆ. ಬಹುಶಃ ಬಿಜೆಪಿ ಮಂದಿಯಿಂದ ಇಂಥಾದ್ದೊಂದು ನಡೆಯನ್ನು ಯಾರೆಂದರೆ ಯಾರೂ ನಿರೀಕ್ಷಿಸಿರಲಿಕ್ಕಿಲ್ಲ.

ಅದರಿಂದಾಗೋ ಪರಿಣಾಮಗಳೇನು ಎಂಬುದಕ್ಕಿಂತಲೂ, ಏಕಾಏಕಿ ತಂತಮ್ಮ ಭದ್ರ ಕೋಟೆಗಳಿಂದ ಎತ್ತೆಸೆಯಲ್ಪಟ್ಟವರ ಪಾಡೇನೆಂಬುದೇ ವಿಶ್ಲೇಷಣೆಗೆ ಅರ್ಹವಾದ ತುರ್ತಿನ ವಿಚಾರ. ಅದರಲ್ಲಿಯೂ ಹಿರಿಯ ರಾಜಕಾರಣಿಯಾಗಿ ಗುರುತಿಸಿಕೊಂಡು, ಆಗಾಗ ಲಿಂಗಾಯತ ನಾಯಕನಾಗುವ ಉಮೇದು ತೋರಿಸಿದ್ದ ಸೋಮಣ್ಣನ ಸದ್ಯದ ಸ್ಥಿತಿಯಂತೂ ಶೋಚನೀಯವಾಗಿದೆ. ಇದೀಗ ಸೋಮಣ್ಣನಿಗೆ ವರುಣಾ ಮತ್ತು ಚಾಮರಾಜನಗರ ಕ್ಷೇತ್ರಗಳಿಂದ ಟಿಕೇಟು ಕೊಡಲಾಗಿದೆ. ಬಿಜೆಪಿಗರೇ ಆಗಿರುವ ಅನೇಕ ಮಂದಿ ಟಿಕೆಟು ಸಿಗದೆ ಒದ್ದಾಡುತ್ತಿದ್ದಾರೆ. ಬಕೀಟುಗಟ್ಟಲೆ ಕಣ್ಣೀರು ಸುರಿಸುತ್ತಾ ದುರಂತ ನಾಯಕರಂತೆ ಪೋಸು ಕೊಡುತ್ತಿದ್ದಾರೆ. ಅಂಥಾದ್ದರಲ್ಲಿ ಸೋಮಣ್ಣನಿಗೆ ಎರಡೆರಡು ಕ್ಷೇತ್ರಗಳಲ್ಲಿ ಟಿಕೇಟು ಸಿಕ್ಕಿರೋದು, ಅವರ ಶಕ್ತಿಯ ಸಂಕೇತ ಅಂತ ಮೇಲು ನೋಟಕ್ಕೆ ಅನ್ನಿಸಬಹುದು. ಇಲ್ಲಿ ಈ ಕ್ಷಣಕ್ಕೆ ಬೀಸೋ ದೊಣ್ಣೆಯಿಂದ ಪಾರಾಗಿ, ಅದೇ ದೊಣ್ಣೆಯನ್ನು ಅಗೋಚರವಾಗಿ ಸೋಮಣ್ಣನತ್ತ ಎಸೆಯುವ ಜಾಣ ನಡೆಯೂ ಗಮನಾರ್ಹವೇ!

ಸಿಟಿ ರವಿಯಂಥವರ ನಾಲಗೆಯ ಪ್ರಭಾವದಿಂದ ಬಿಜೆಪಿ ಲಿಂಗಾಯತ ವಿರೋಧಿಯಾಗಿ ಬಿಂಬಿಸಿಕೊಳ್ಳುವ ಭಯದ ವಾತಾವರಣ ನಿರ್ಮಾಣವಾಗಿತ್ತು. ಅದು ನಿಮಗೆಲ್ಲ ನೆನಪಿರಬಹುದು. ಅದೆಲ್ಲವನ್ನೂ ಶಮನ ಮಾಡುವ ಸಲುವಾಗಿಯೇ ಸೋಮಣ್ಣನಿಗೆ ಎರಡೆರಡು ಕ್ಷೇತ್ರಗಳಲ್ಲಿ ಪ್ರಾತಿನಿಧ್ಯ ಕೊಡಲಾಗಿದೆ. ಇಲ್ಲಿ ಗಮನಿಸಲೇಬೇಕಾದ ಒಂದಷ್ಟು ವಿಚಾರಗಳಿದ್ದಾವೆ. ವರುಣಾದಲ್ಲಿ ಸಿದ್ದರಾಮಯ್ಯಗೆ ಸೆಡ್ಡು ಹೊಡೆಯುವ ಸರ್ಕಸ್ಸು ಬಿಜೆಪಿ ಪಾಳೆಯದಲ್ಲಿ ಈ ಹಿಂದಿನಿಂದಲೂ ಚಾಲ್ತಿಯಲ್ಲಿದೆ. ಅಲ್ಲಿ ಯಡಿಯೂರಪ್ಪನ ಮಗನನ್ನೇ ಕಣಕ್ಕಿಳಿಸಿ ಮಜಾ ನೋಡುವ ಆಟವನ್ನೂ ಬಿಜೆಪಿಯ ಒಂದು ಬಣ ಕಟ್ಟಿತ್ತು. ಆದರೆ ಚತುರ ರಾಜಕಾರಣಿ ಯಡ್ಡಿ ನಾಜೂಕಿನಿಂದಲೇ ಮಗನನ್ನು ಆ ಕಂಟಕದಿಂದ ಪಾರುಗಾಣಿಸಿದ್ದಾರೆ. ಅದರ ಬೆನ್ನಿಗೇ ವರುಣಾ ಎಂಬ ಬಲಿ ಪೀಠಕ್ಕೆ ಸೋಮಣ್ಣನನ್ನು ಸದ್ದಿಲ್ಲದೆ ಎಳೆ ತರಲಾಗಿದೆ!

ಅದೇನೇ ಸರ್ಕಸ್ಸು ನಡೆಸಿದರೂ ಈ ಬಾರಿ ವರುಣಾ ಕ್ಷೇತ್ರದಲ್ಲಿ ಸೋಮಣ್ಣ ಸಿದ್ದುಗೆ ಸೆಡ್ಡು ಹೊಡೆಯೋದು ಕಷ್ಟವಿದೆ. ಕಣಕ್ಕೆ ಕಾಲಿಡುವ ಮುನ್ನವೇ ಸೋಲೆಂಬುದು ಖಾತರಿಯಾದಂತಿದೆ. ವರುಣಾದಲ್ಲಿ ಸೋತರೆ ಚಾಮರಾಜನಗರ ಇದೆಯಲ್ಲಾ ಅಂತನ್ನಿಸಬಹುದು. ಆ ಕ್ಷೇತ್ರದ ಆಂತರ್ಯವನ್ನೊಮ್ಮೆ ಪರಾಮರ್ಶಿಸಿದರೆ, ಚಾಮರಾಜನಗರದಲ್ಲಿಯೂ ಸೋಮಣ್ಣನಿಗೆ ಪರಿಸ್ಥಿತಿ ಸಲೀಸಾಗಿಲ್ಲ. ಯಾಕೆಂದರೆ, ಅಲ್ಲಿ ಪುಟ್ಟರಂಗಶೆಟ್ಟಿ ಆಳವಾಗಿ ಬೇರೂರಿಕೊಂಡಿದ್ದಾರೆ. ಆತ ಆ ಕ್ಷೇತ್ರದ ಪ್ರಭಾವೀ ಮುಖಂಡ. ಆತನನ್ನು ಬೆಂಗಳೂರಿನಿಂದ ಬಂದ ಸೋಮಣ್ಣ ಅಷ್ಟು ಸುಲಭಕ್ಕೆ ಮಣಿಸಲು ಸಾಧ್ಯವಿಲ್ಲ. ಅಲ್ಲಿಗೆ ಎರಡೂ ಕ್ಷೇತ್ರಗಳಲ್ಲಿಯೂ ಸೋಮಣ್ಣನಿಗೆ ಅಕ್ಷರಶಃ ಅಗ್ನಿ ಪರೀಕ್ಷೆ ಎರುರಾಗಲಿರೋದು ಪಕ್ಕಾ!

ಒಂದು ಮೂಲದ ಪ್ರಕಾರ ನೋಡೋದಾದರೆ, ಮಗ ಅರುಣ್ನನ್ನು ನೆಲೆಗಾಣಿಸುವ ಪುತ್ರ ವ್ಯಾಮೋಹವೇ ಸೋಮಣ್ಣನಿಗೆ ಖೆಡ್ಡಾ ತೋಡಿತೇನೋ ಎಂಬಂಥಾ ಭಾವ ಮೂಡಿಕೊಳ್ಳುತ್ತೆ. ಯಾಕೆಂದರೆ, ಗೋವಿಂದ ರಾಜನಗರದಲ್ಲಿ ಅರುಣ್‍ಗೆ ಟಿಕೇಟು ಕೊಡಿ ಅಂತ ಬೇಡಿಕೆ ಇಟ್ಟಿದ್ದ ಸೋಮಣ್ಣ, ತಿಪಟೂರಿನತ್ತ ಕಣ್ಣಿಟ್ಟಿದ್ದರಂತೆ. ಆದರೆ ಅದನ್ನು ಮನಗಂಡ ಕೆಲ ಮುಖಂಡರು ಸೋಮಣ್ಣನನ್ನು ವರುಣಾದ ಬಲಿ ಪೀಠಕ್ಕೆ ಎಳೆದೊಯ್ದಿದ್ದಾರೆ. ಅತ್ತ ಗೋವಿಂದರಾಜನಗರದಲ್ಲಿ ಅರುಣ್‍ಗೆ ಟಿಕೆಟು ಸಿಕ್ಕರೂ ಆತ ಬಚವಾಗೋದು ಕಷ್ಟ. ಇತ್ತ ಎರಡೂ ಕ್ಷೇತ್ರಗಳಲ್ಲಿ ಖುದ್ದು ಸೋಮಣ್ಣನೇ ಜೈಸಿಕೊಳ್ಳೋದು ಡೌಟಿದೆ. ಈ ಎಲ್ಲ ದಿಕ್ಕಿನಿಂದ ನೋಡಿದರೆ, ಈ ಚುನಾವಣಾ ಫಲಿತಾಂಶ ಸೋಮಣ್ಣನ ರಾಜಕೀಯ ಬದುಕಿಗೆ ಫುಲ್ ಸ್ಟಾಪ್ ಇಡುವ ಲಕ್ಷಣಗಳೇ ಢಾಳಾಗಿವೆ. ಈ ವಿಚಾರದಲ್ಲಿ ಯಡ್ಡಿ ಪಾಳೆಯ ಒಂದೇ ಕಲ್ಲಿಗೆ ಎರಡು ಹಕ್ಕಿ ಹೊಡೆದದ್ದಂತೂ ಖರೇ!

The post political news: ಒಂದೇ ಕಲ್ಲಿಗೆ ಎರಡು ಹಕ್ಕಿ ಹೊಡೆದ ಯಡ್ಡಿ ಗ್ಯಾಂಗ್! appeared first on ಶೋಧ ನ್ಯೂಸ್ - Shodha News.

ರಾಜ್ಯದಲ್ಲೀಗ ಉರಿಗೌಡ ಮತ್ತು ನಂಜೇಗೌಡನೆಂಬ ಕಲ್ಪಿತ ವೀರರ ಕಥನಗಳು ಎಗ್ಗಿಲ್ಲದೆ ಹರಿದಾಡುತ್ತಿವೆ. ಈ ಬಗ್ಗೆ ವಾಟ್ಸಪ್ ಯುನಿರ್ಸಿಟಿಯ ಕಸುಬಿಲ್ಲದ ಸಂಶೋಧಕರೊಂದಷ್ಟು ಮಂದಿ ಎಗ್ಗಿಲ್ಲದೆ ಸಂಶೋಧನೆ ನಡೆಸುತ್ತಿದ್ದಾರೆ. ರಾಜಕೀಯ ನೆರಳಿನಲ್ಲಿ ಹಾಯಾಗಿರುವ ಮತ್ತೊಂದಷ್ಟು ಮಂದಿ, ಅದಕ್ಕೆ ಪೂರಕವಾದ ಆಕರ ವಿಚಾರಗಳನ್ನು ಹರಿಯಬಿಡುತ್ತಿದ್ದಾರೆ. ಸನ್ಮಾನ್ಯ ಸಿ.ಟಿ ರವಿಯಂತೂ ಥೇಟು ಇತಿಹಾಸ ತಜ್ಞನಂತೆ ದಿನಕ್ಕೊಂದೊಂದು ವಿಚಾರಗಳನ್ನು ಹರಿಯಬಿಡುತ್ತಿದ್ದಾರೆ. ಹೀಗೆ ಬಿಜೆಪಿ ಮಂದಿ ಚುನಾವಣಾ ದಾಳವಾಗಿಸಿಕೊಂಡಿದ್ದ ಉರಿ ಗೌಡ, ನಂಜೇಗೌಡ ಯಾರು? ಅಷ್ಟಕ್ಕೂ ಅವರು ವೀರರಾ? ಅವರಿಬ್ಬರೂ ಟಿಪ್ಪು ಸುಲ್ತಾನನನ್ನು ಕೊಂದಿದ್ದ ನಿಜವಾ? ಹೀಗೇ ನಾನಾ ದಿಕ್ಕಿನಲ್ಲಿ ಚರ್ಚೆಗಳು ಚಾಲ್ತಿಯಲ್ಲಿವೆ!

ಇದೇ ಹೊತ್ತಿನಲ್ಲಿ ಸದ್ದೇ ಇಲ್ಲದೆ ಉರಿಗೌಡ ಮತ್ತು ನಂಜೇಗೌಡನ ಇರುವಿಕೆಗೆ ಅಧಿಕೃತ ಮುದ್ರೆಯೊತ್ತಿವ ಕೆಲಸವೂ ನಡೆದಿತ್ತು; ಅವರಿಬ್ಬರ ಬಗೆಗೊಂದು ಸಿನಿಮಾ ಮಾಡುವ ತಯಾರಿಯೊಂದಿಗೆ. ಒಂದು ಕಲ್ಪಿತ ಕಥೆಯನ್ನು ನಿಜ ಇತಿಹಾಸವೆಂಬಂತೆ ಬಿಂಬಿಸುವುದು, ಆ ಮೂಲಕ ಜನಮಾನಸದಲ್ಲಿ ಸುಳ್ಳನ್ನು ಸತ್ಯವೆಂಬಂತೆ ಪ್ರತಿಷ್ಠಾಪಿಸುವುದೆಲ್ಲ ಅಕ್ಷಮ್ಯ ಅಪರಾಧ. ಆದರೆ, ಅದೇಕೋ ಈ ಬಿಜೆಪಿ ಮಂದಿ ಮಾತ್ರ ಆಗಾಗ ಕಪೋಲ ಕಲ್ಪಿತ ಸರಕುಗಳನ್ನು ಕೈಗೆತ್ತಿಕೊಳ್ಳುತ್ತಾರೆ. ಆ ಮೂಲಕ ತಮ್ಮ ಆಡಳಿತ ವೈಫಲ್ಯವನ್ನು ಬಚ್ಚಿಟ್ಟುಕೊಳ್ಳಲು ಪ್ರಯತ್ನಿಸುತ್ತಾರೆಂಬ ಆರೋಪವಿದೆ. ಆರಂಭದಲ್ಲಿ ವಿರೋಧ ಪಕ್ಷಗಳ ಅಭಿಪ್ರಾಯದಂತಿದ್ದ ಆ ಆರೋಪಗಳೀಗ, ಸಾರ್ವಜನಿಕರನ್ನೂ ಆವರಿಸಿಕೊಂಡಿದೆ.

ಚುನಾವಣೆಯ ಹೊಸ್ತಿಲಲ್ಲಿ ಬಿಜೆಪಿಯನ್ನು ಅಂಥಾದ್ದೊಂದುಬ ಸಂದಿಗ್ಧ ಸ್ಥಿತಿಗೆ ತಳ್ಳಿದ್ದರಲ್ಲಿ ಉರಿಗೌಡ ಮತ್ತು ನಂಜೇಗೌಡರ ಪಾಲು ಬೆಟ್ಟದಷ್ಟಿದೆ. ಯಾವಾಗ, ಸಿ.ಟಿ ರವಿಯೆಂಬ ಆಸಾಮಿ ಪದೇ ಪದೆ ಈ ಎರಡು ಹೆಸರುಗಳನ್ನಿಟ್ಟುಕೊಂಡು ಪುಂಗಲು ಶುರುವಿಟ್ಟರೋ, ಆಗ ಅದೊಂದು ವಿವಾದದ ಸ್ವರೂಪ ಪಡೆದುಕೊಂಡಿತ್ತು. ಚುನಾವಣೆಯ ಹಂತದಲ್ಲಿ ಉರಿಗೌಡ ಮತ್ತು ನಂಜೇಗೌಡರನ್ನು ಮತ್ತಷ್ಟು ಮುನ್ನೆಲೆಗೆ ತರುವ ಸಲುವಾಗಿಯೇ ಸಿನಿಮಾಕ್ಕೂ ತಯಾರಿ ನಡೆದಿತ್ತು. ಕುರುಕ್ಷೇತ್ರದಂಥಾ ಸಿನಿಮಾ ಮಾಡಿ ಜಯಿಸಿಕೊಂಡಿದ್ದ ಮುನಿರತ್ನ ಸಿಟಿ ರವಿಯ ಪುಂಗಿಗೆ ಮನಸಾರೆ ತಲೆದೂಗಿದ್ದರು.

ಹಾಗೆ ರವಿಯ ಪ್ರವರ ಕೇಳಿ ಬಂದವರೇ, ಉರಿಗೌಡ ಮತ್ತು ನಂಜೇಗೌಡರೆಂಬ ವೀರರ ಬಗ್ಗೆ ಸಿನಿಮಾ ಮಾಡೋದಾಗಿ ಘೋಷಣೆ ಮಾಡಿ ಬಿಟ್ಟಿದ್ದರು. ಅಷ್ಟರಲ್ಲಿ ಅವರಿಗೆ ನಿರ್ಮಲಾನಂದ ಶ್ರೀಗಳಿಂದ ಬುಲಾವು ಬಂದಿದೆ. ಹಾಗೆ ಸ್ವಾಮಿಗಳ ಮುಂದೆ ಹೋಗಿ ಕೂತ ಮುನಿತ್ನಗೆ ಜ್ಞಾನೋದಯವಾಗಿದೆ. ಯಾಕೆಂದರೆ, ನಿರ್ಮಲಾನಂದರು ಅತ್ಯಂತ ನಿಷ್ಟುರವಾಗಿ, ನ್ಯಾಯಸಮ್ಮತವಾಗಿ ಮಾತಾಡಿದ್ದಾರೆ. ಕಲ್ಪಿಸಿಕೊಂಡು ಬರೆಯೋದು ಕಾದಂಬರಿಯಾಗುತ್ತದೇ ಹೊರತು ಇಹಿತಾಸವಾಗಲಾರದೆಂಬ ಕಾಮನ್‍ಸೆನ್ಸಿನ ಪಾಠ ಮಾಡಿದ್ದಾರೆ. ಇದರೊಂದಿಗೆ ಸಿಟಿ ರವಿ ಬಿಟ್ಟಿದ್ದ ಹಾವು ಹೇಳ ಹೆಸರಿಲ್ಲದಂತೆ ಮಾಯವಾಗಿದೆ. ಹಾಗೆ ಹೊರ ಬಂದ ಮುನಿರತ್ನ, ಇನ್ನು ಮುಂದೆ ಉರಿಗೌಡ ನಂಜೇಗೌಡರ ಬಗ್ಗೆ ಸಿನಿಮಾ ಮಾಡೋದಿರಲಿ; ಆ ಹೆಸರನ್ನೂ ಎತ್ತೋದಿಲ್ಲ ಎಂಬರ್ಥದಲ್ಲಿ ಮಾತಾಡಿದ್ದಾರೆ.

ಅಲ್ಲಿಗೆ ಸುಳ್ಳನ್ನೇ ಸತ್ಯವೆಂಬಂತೆ ಒದರುತ್ತಾ ಬಂದಿದ್ದ ರವಿಗೆ ಮುಖಭಂಗವಾದಂತಾಗಿದೆ. ಅದರ ಜೊತೆಗೆ ಒಂದು ಕಂಟಕವೂ ಕಳೆದಂತಾಗಿದೆ. ಯಾಕೆಂದರೆ. ಕಾಶ್ಮೀರ್ ಫೈಲ್‍ನಂಥಾ ಸಿನಿಮಾದ ಮೂಲಕ ಒನ್‍ಸೈಡೆಡ್ ವಿಚಾರ ಮಂಡಿಸಿ, ಬಿಜೆಪಿ ಬೇಳೆ ಬೇಯಿಸಿಕೊಂಡಿದೆ ಎಂಬಂಥಾ ಆರೋಪವಿದೆ. ನಂಜೇಗೌಡ ಉರಿಗೌಡರ ವಿಚಾರದಲ್ಲಿ ಪೂರಕ ದಾಖಲೆ ಒದಗಿಸುವ ಯೋಗ್ಯತೆ ಇಲ್ಲದ ಮಂದಿ, ಸಿನಿಮಾ ಮೂಲಕ ಆ ಕಲ್ಪಿತ ಪಾತ್ರಗಳಿಗೊಂದು ಕಾಯಕಲ್ಪ ಕೊಡಲು ಮುಂದಾಗಿದ್ದರು. ಅದಕ್ಕೀಗ ನಿರ್ಮಲಾನಂದರ ಸಾನಿಧ್ಯದಲ್ಲಿ ಬ್ರೇಕ್ ಬಿದ್ದಿದೆ. ಈ ಮೂಲಕ ಬಿಜೆಪಿಗರ ಸುಳ್ಳುಗಳು ಮಂಡ್ಯ ಸೀಮೆಯ ಒಕ್ಕಲಿಗರು ಎಚ್ಚೆತ್ತುಕೊಂಡಿದ್ದಾರೆ. ಇಂಥಾ ಸುಳ್ಳಿನ ಸಾರಥ್ಯದಲ್ಲಿ ಚುನಾವಣೆ ಗೆಲ್ಲುವ ಭ್ರಮೆ ಹೊಂದಿದ್ದ ಬಿಜೆಪಿಗೆ ಹಿನ್ನಡೆಯಾಗಿದೆ. ಬಿಜೆಪಿ ಪಾಳೆಯದ ಭಯಾನಕ ಇತಿಹಾಸ ತಜ್ಞರಾದ ಸಿ.ಟಿ ರವಿ ಸಾಹೇಬರು ಅದೇಕೋ ಥಂಡಾ ಹೊಡೆದಂತಿದ್ದಾರೆ!

The post ಇದರ ಬಗ್ಗೆ ಇತಿಹಾಸ ತಜ್ಞ ಸಿ.ಟಿ ರವಿ ಏನಂತಾರೆ?! appeared first on ಶೋಧ ನ್ಯೂಸ್ - Shodha News.