ಕನ್ನೇರಿ ಸೃಷ್ಟಿಸಿದ ಸಾಮಾಜಿಕ ಪರಿವರ್ತನೆಗೆ ಸಾಟಿಯಿಲ್ಲ!

ಒಂದು ಸಿನಿಮಾ ಗಟ್ಟಿಯಾದ ಕಂಟೆಂಟು ಹೊಂದಿದ್ದರೆ ಪ್ರಚಾರದ ಭರಾಟೆಯಾಚೆಗೂ ಜನಮಾನಸವನ್ನ ಸೆಳೆಯಬಲ್ಲದು ಎಂಬುದಕ್ಕೆ ಕನ್ನೇರಿ ತಾಜಾ ಉದಾಹರಣೆಯಾಗಿ ನಿಂತಿದೆ. ಯಾವತ್ತಿದ್ದರೂ ನೆಲಮೂಲದ, ನಮ್ಮ ನಡುವಿನ ಸಂಕಟಗಳಿಗೆ ಧ್ವನಿಯಾಗುವಂಥಾ ನೈಜ ಕಥಾನಕಗಳತ್ತ ಪ್ರೇಕ್ಷಕರು ಆಕರ್ಷಿತರಾಗುತ್ತಾರೆ. ಅಂಥಾದ್ದೇ ನೈಜ ಘಟನೆಯೊಂದಕ್ಕೆ ಕನ್ನಡಿ ಹಿಡಿದಿರುವ ಚಿತ್ರ ಕನ್ನೇರಿ. ಈ ಚಿತ್ರದಲ್ಲಿ ಪ್ರತೀ ಪಾತ್ರಗಳೂ ಪ್ರೇಕ್ಷಕರ ಪಾಲಿಗೆ ಸರ್‌ಪ್ರೈಸ್ ಆಗಿರಬೇಕೆಂಬಂತೆ ನಿರ್ದೇಶಕ ನೀನಾಸಂ ಮಂಜು ರೂಪಿಸಿದ್ದಾರೆ. ಅದೆಲ್ಲದರ ಫಲವೆಂಬಂತೆ ಕನ್ನೇರಿಯೀಯ ಯಶಸ್ವಿಯಾಗಿ ನೂರು ದಿನಗಳನ್ನು ದಾಟಿಕೊಂಡು ನೂರಾ ಐದನೇ ದಿನದ ಸಂಭ್ರಮವನ್ನು ಆಚರಿಸಿಕೊಂಡಿದೆ. ಸಿನಿಮಾ ಪಾಲಿಗೆ ಸಂಭ್ರಮವೆಂಬುದು ದಿನ, ವಾರಗಳಿಗೆ ಸೀಮಿತವಾಗಿರುವ ಈ ಘಳಿಗೆಯಲ್ಲಿ ಕನ್ನೇರಿ ದಾಖಲಿಸಿದ ಅಮೋಘ ಗೆಲುವಿದೆಯಲ್ಲಾ? ಅದು ಪ್ರತೀ ಸಿನಿಮಾ ಪ್ರೇಮಿಗಳನ್ನೂ ಥ್ರಿಲ್ ಆಗಿಸುವಂಥಾದ್ದು!

ಇತ್ತೀಚಿನ ವರ್ಷಗಳಲ್ಲಿ ಸಿನಿಮಾವೊಂದು ನೂರರ ಗಡಿ ದಾಟಿಕೊಂಡಿದ್ದ ಉದಾಹರಣೆಗಳಿಲ್ಲ. ನೂರರ ಸಂಭ್ರಮವೆಂಬುದು ಮೆಲುಕು ಹಾಕಿ ಮುದಗೊಳ್ಳಬಹುದಾದಂಥಾ ಗತವೈಭವವಷ್ಟೇ ಎಂಬಂತಾಗಿತ್ತು. ನೆಲೆ ಕಂಡುಕೊಳ್ಳಲು ಕೋಟಿ ಕೋಟಿ ಬಜೆಟ್ಟಿನ ದೊಡ್ಡ ಚಿತ್ರಗಳೇ ತಿಣುಕಾಡುವ ಈ ಹೊತ್ತಿನಲ್ಲಿ ಕನ್ನೇರಿಯ ಗೆಲುವಿನ ಯಾನ ಭಿನ್ನವಾಗಿ ಕಾಣಿಸುತ್ತದೆ. ಹಾಗಂತ, ಕನ್ನೇರಿಯ ಹಾದಿಯೇನು ಆರಂಭದಿಂದಲೂ ಸುಗಮವಾಗಿರಲಿಲ್ಲ. ಬೆಂಗಳೂರಿನಂಥಾ ಪ್ರದೇಶಗಳಲ್ಲಿ ಈ ಚಿತ್ರ ನೆಲೆಗೊಳ್ಳುವುದೇ ಕಷ್ಟ ಎಂಬಂಥಾ ವಾತಾವರಣ ಸೃಷ್ಟಿಯಾಗಿತ್ತು. ನೋಡಿದವರೆಲ್ಲ ಬಹುವಾಗಿ ಮೆಚ್ಚಿಕೊಂಡರೂ ಕೂಡಾ ಸಿನಿಮಾ ಮಂದಿರಗಳಲ್ಲಿ ನೆಲೆ ಕಂಡುಕೊಳ್ಳುವುದು ಅಷ್ಟು ಸಲೀಸಿನ ಸಂಗತಿಯಾಗಿರಲಿಲ್ಲ. ಆದರೆ ಮೈಸೂರು ಮತ್ತು ಹೆಚ್‌ಡಿ ಕೋಟೆ ಭಾಗದ ಜನ ಈ ಸಿನಿಮಾವನ್ನು ಅಪ್ಪಿಕೊಂಡು ಕೊಂಡಾಡಿದ ಪರಿ ಯಾರಾದರೂ ಮೆಚ್ಚಿಕೊಳ್ಳುವಂತಿದೆ.

ಯಾವ ನೋವೇ ಆದರೂ ಅದನ್ನು ಅನುಭವಿಸಿದವರಿಗಷ್ಟೇ ಗಾಢವಾಗಿ ತಾಕುತ್ತದೆ. ಈ ಕಾರಣದಿಂದಲೇ ಕಾಡಿನಿಂದ ಎತ್ತಂಗಡಿಯಾಗಿ ನರಳುತ್ತಿರುವ ಮೈಸೂರು, ಹೆಚ್‌ಡಿ ಕೋಟೆ ಮುಂತಾದ ಭಾಗಗಳ ಜನ ಕನ್ನೇರಿಯನ್ನು ತಮ್ಮದೇ ಭವಣೆಗಳ ದೃಷ್ಯ ರೂಪಕದಂತೆ ಪರಿಭಾವಿಸಿಕೊಂಡು ನೋಡಿದರು. ಅದರಲ್ಲಿಯೂ ಇಂಥಾ ಸಾಮಾಜಿಕ ನೆಲೆಗಟ್ಟಿನ ಚಿತ್ರವೊಂದು ಸಮಾಜದ ಮೇಲೆ ಸಕಾರಾತ್ಮಕವಾಗಿ ಪರಿಣಾಮ ಬೀರುವಂತಾಗೋದೂ ಮಹಾ ವಗೆಲುವೇ. ಈ ನಿಟ್ಟಿನಲ್ಲಿ ನೋಡ ಹೋದರೆ ಕನ್ನೇರಿಗೆ ಬಹು ದೊಡ್ಡ ಗೆಲುವು ಲಭಿಸಿದೆ. ಹೆಚ್‌ಡಿ ಕೋಟೆ ಶಾಸಕ ಅನಿಲ್ ಚಿಕ್ಕಮಾದು ಅವರು ಈ ಚಿತ್ರವನ್ನು ನೋಡಿ ಪ್ರಭಾವಿತರಾಗಿದ್ದರು. ಅದಾಗಿ ಕೆಲವೇ ದಿನಗಳಲ್ಲಿ ಕನ್ನೇರಿಯಂಥಾದ್ದೇ ಕೇಸೊಂದು ಈ ಭಾಗದ ಜನರ ಮೇಲೆ ಅಮರಿಕೊಂಡಿತ್ತು. ಚಿಕ್ಕ ಮಾದು ವರು ತಾವೆ ಮುಂದೆ ನಿಂತು ಇಪ್ಪತ್ನಾಲಕ್ಕು ಗಂಟೆಗಳೊಳಗಾಗಿ ಆ ಕೇಸನ್ನು ತೆಗೆಸಿ ಹಾಕಿದ್ದರಂತೆ. ಕನ್ನೇರಿ ಪ್ರಭಾವಿಸಿದ ಪರಿಗೆ ಮತ್ಯಾವ ಸಾಕ್ಷಿ ಬೇಕು?

ಆರಂಭಕಾಲದಲ್ಲಿ ಗಾಡಿಗಳಲ್ಲಿ ಜನರನ್ನು ಕರೆದುಕೊಂಡು ಹೋಗಿ ಚಿತ್ರ ನೋಡುವಂತೆ ಪ್ರೇರೇಪಿಸಲಾಗಿತ್ತು. ನಿರ್ದೇಶಕ ನೀನಾಸಂ ಮಂಜು ಹೊಸಾ ಬಗೆಯ ಪ್ರಚಾರದತ್ತ ಭಾರೀ ಗಮನ ಹರಿಸಿದ್ದರು. ಹಾಗೆ ನೋಡಿದ ಮಂದಿಯ ಬಾಯಿಂದ ಬಾಯಿಗೆ ಹರಡಿಕೊಂಡ ಸದಭಿಪ್ರಾಯವೇ ಕನ್ನೇರಿಯನ್ನು ನೂರು ದಿನದ ವರೆಗೂ ಕಾಲೂರಿ ನಿಲ್ಲುವಂತೆ ಮಾಡಿದೆ. ಶಾಸಕ ಅನಿಲ್ ಚಿಕ್ಕಮಾದು ಅವರನ್ನು ಕನ್ನೇರಿ ಅದ್ಯಾವ ಪರಿಯಾಗಿ ಪ್ರಭಾವಿಸಿದೆಯೆಂದರೆ, ಅವರೇ ಮುಂದೆ ನಿಂತು ಈ ಚಿತ್ರದ ನೂರನೇ ದಿನದ ಸಂಭ್ರಮವನ್ನು ಆಚರಿಸಿದ್ದಾರೆ. ಈ ಎಲ್ಲ ಕಾರಣಗಳಿಂದಾಗಿ ಕನ್ನೇರಿ ಯಶಸ್ವಿಯಾಗಿ ನೂರನೇ ದಿನವನ್ನು ದಾಟಿಕೊಂಡಿದೆ. ಈ ಮೂಲಕ ಹೊಸಾ ದಾಖಲೆ ಸೃಷ್ಟಿಸಿದೆ.

ನೀನಾಸಂ ಮಂಜು ಕೈಗೆತ್ತಿಕೊಂಡಿದ್ದ ಕಥಾ ವಸ್ತು, ನಿರೂಪಣೆ ಮಾಡಿದ್ದ ರೀತಿ, ಪಾತ್ರಗಳನ್ನು ಕಟ್ಟಿ ನಿಲ್ಲಿಸಿದ್ದ ಪರಿಗಳೆಲ್ಲವೂ ಕನ್ನೇರಿಯ ಪ್ಲಸ್ ಪಾಯಿಂಟುಗಳೇ. ಇಲ್ಲಿನ ಪ್ರತೀ ಪಾತ್ರಗಳೂ ಕೂಡಾ ಪ್ರೇಕ್ಷಕರನ್ನು ಕಾಡಿದ್ದವು. ಎಂಕೆ ಮಠ, ಅರ್ಚನಾ ಮಧುಸೂಧನ್, ಕರಿಸುಬ್ಬು, ಅನಿತಾ ಭಟ್, ಅರುಣ್ ಸಾಗರ್, ಸರ್ದಾರ್ ಸತ್ಯ ಮುಂತಾದವರೆಲ್ಲ ತಂತಮ್ಮ ಪಾತ್ರಗಳನ್ನು ಆವಾಹಿಸಿಕೊಂಡು ನಟಿಸಿದ್ದರು. ಅದೆಲ್ಲದರಿಂದಾಗಿ ಈ ಚಿತಚ್ರ ಸೂಪರ್ ಹಿಟ್ ಆಗಿದೆ. ಪರಭಾಷಾ ಚಿತ್ರಗಳ ಹಾವಳಿ, ದೊಡ್ಡ ಸಿನಿಮಾಗಳ ಭರಾಟೆಗಳೆಲ್ಲವನ್ನೂ ಮೀರಿಕೊಂಡು ನೂರನೇದಿನ ದಾಟಿಕೊಂಡಿದೆ. ಇದು ಕನ್ನಡ ಚಿತ್ರರಂಗದ ಪಾಲಿಗೆ ಒಳಿತಿನ ಸೂಚನೆಯಂತೆಯೇ ಕಾಣಿಸುತ್ತಿದೆ.

The post ನೆಲಮೂಲದ ಕಥೆ ದಕ್ಕಿದ ಅಮೋಘ ಗೆಲುವು! appeared first on ಶೋಧ ನ್ಯೂಸ್ - Shodha News.

ಕಾಡುವ ಕಥೆಯೊಂದು ಎಲ್ಲರೆದೆಯಲ್ಲಿ ಹಾಡಾದ ಸೋಜುಗ!
ಈ ನೆಲದ ಸೊಗಡಿನ ಸಿನಿಮಾಗಳನ್ನು ಕನ್ನಡದ ಪ್ರೇಕ್ಷಕರು ಕಡೆಗಣಿಸಿದ ಉದಾಹರಣೆಗಳೇ ಇಲ್ಲ. ಇಂಥಾ ಕಥೆಯನ್ನೊಳಗೊಂಡು ಯಾವುದೇ ಹೈಪುಗಳಿಲ್ಲದೆ ತೆರೆಕಂಡ ಚಿತ್ರಗಳು ಭರಪೂರ ಪ್ರದರ್ಶನ ಕಂಡು, ಅದ್ಭುತವೆಂಬಂಥ ಗೆಲುವು ದಾಖಲಿಸಿದ ಉದಾಹರಣೆಗಳು ಸಾಕಷ್ಟಿದ್ದಾವೆ. ಆ ಸಾಲಿಗೆ ನೀನಾಸಂ ಮಂಜು ನಿರ್ದೇಶನದ ಕನ್ನೇರಿ ಚಿತ್ರವೂ ಸೇರಿಕೊಂಡಿದೆ. ಈ ಸಿನಿಮಾ ಸಾಕಷ್ಟು ಎಡರು ತೊಡರುಗಳನ್ನು ದಾಟಿಕೊಂಡು ಯಶಸ್ಸಿನತ್ತ ಮುನ್ನುಗ್ಗಿದೆ. ಎಲ್ಲರೂ ಅಚ್ಚರಿ ಪಡುವಂತೆ, ಖುಷಿಗೊಳ್ಳುವಂತೆ ಯಶಸ್ವೀ ಪ್ರದರ್ಶನದ ಎಪ್ಪತೈದು ದಿನಗಳನ್ನು ಪೂರೈಸಿಕೊಂಡಿದೆ. ಈ ಮೂಲಕ ಚಿತ್ರತಂಡದ ಶ್ರಮ ಸಾರ್ಥಕವಾಗಿದೆ. ಇದೇ ಖುಷಿಯಲ್ಲಿ ಪತ್ರಿಕಾ ಗೋಷ್ಟಿ ನಡೆಸಿರುವ ಚಿತ್ರತಂಡ ಸಂತಸ ಹಂಚಿಕೊಂಡಿದೆ.

ನಿರ್ದೇಶಕ ನೀನಾಸಂ ಮಂಜು ರಂಗಭೂಮಿಯಲ್ಲಿ ಹದಗೊಂಡ ಪ್ರತಿಭೆ. ಹಲವಾರು ವರ್ಷಗಳಕಾಲ ರಂಗಭೂಮಿಯಲ್ಲಿ ಸಕ್ರಿಯರಾಗಿದ್ದುಕೊಂಡು ಈಗಾಗಲೇ ಅವರು ಹಿರಿತೆರೆಯಲ್ಲಿಯೂ ನಿರ್ದೇಶಕನಾಗಿ ನೆಲೆ ಕಂಡುಕೊಂಡಿದ್ದಾರೆ. ಸಾಮಾನ್ಯವಾಗಿ ರಂಗಭೂಮಿಯಿಂದ ಬಂದವರ ಬಗ್ಗೆ ಚಿತ್ರರಂಗದಲ್ಲಿ ವಿಶೇಷವಾದ ಆಸ್ಥೆ, ಅಕ್ಕರೆಗಳಿವೆ. ಯಾಕೆಂದರೆ ಗಟ್ಟಿ ಪ್ರತಿಭೆಗಳು ಚಿತ್ರರಂಗಕ್ಕೆ ಆಗಮಿಸೋದು ರಂಗಭೂಮಿಯಿಂದಲೇ. ಕನ್ನೇರಿಯ ಭರಪೂರ ಗೆಲುವಿನ ಮೂಲಕ ನೀನಾಸಂ ಮಂಜು ಆ ನಂಬಿಕೆಯನ್ನು ಮತ್ತಷ್ಟು ಬಲಗೊಳಿಸಿದ್ದಾರೆ.

ಅಷ್ಟಕ್ಕೂ ಈ ಚಿತ್ರ ಆರಂಭದಿಂದಲೂ ತಾನೇತಾನಾಗಿ ಸದ್ದು ಮಾಡಿದ್ದೇ ತನ್ನ ಭಿನ್ನ ಕಥಾನಕದ ಸುಳಿವಿನ ಮೂಲಕ. ನಮ್ಮ ನಡುವೆಯೇ ನಡೆಯುತ್ತಿರುವ, ನಾವು ಅಷ್ಟಾಗಿ ಪರಿಗಣಿಸದ ಕಥೆಯೊಂದನ್ನು ಆಯ್ಕೆ ಮಾಡಿಕೊಳ್ಳುವಲ್ಲಿಯೇ ನೀನಾಸಂ ಮಂಜು ಆರಂಭಿಕ ಗೆಲುವು ಪಡೆದುಕೊಂಡಿದ್ದಾರೆ. ಅದರ ಫಲವಾಗಿಯೇ ಈ ಚಿತ್ರ ಪ್ರತೀ ಸನ್ನಿವೇಶಗಳಲ್ಲಿಯೂ ನೋಡುಗರ ಆಳಕ್ಕಿಳಿದಿದೆ. ಕಣ್ಣಾಲಿಗಳನ್ನು ತೇವಗೊಳಿಸಿ ಕಾಡಿದೆ. ಆ ಕಾರಣದಿಂದಲೇ ಕನ್ನೇರಿ ಗೆಲುವಿನ ಬೆನ್ನೇರಿ ಯಶಸ್ವಿಯಾಗಿ ಎಪ್ಪತೈದು ದಿನಗಳನ್ನು ಪೂರೈಸಿಕೊಂಡಿದೆ. ನೂರರತ್ತ ನವೋತ್ಸಾಹದಿಂದ ದಾಪುಗಾಲಿಡುತ್ತಿದೆ.

ಕಾಡನ್ನೇ ಜೀವದ ಭಾಗದಂತೆ ಹಚ್ಚಿಕೊಂಡು, ಅದನ್ನೇ ಉಸಿರಾಗಿಸಿಕೊಂಡ ಜೀವಗಳ ಆತ್ಮ ಮರ್ಮರ ಈ ಕಥೆಯ ಪ್ರಧಾನ ಅಂಶ. ಕಾಡು ಬಿಟ್ಟು ಬೇರೇನೂ ಅರಿಯದೆ, ಕೇವಲ ಉಪ್ಪು, ಮೆಣಸಿನಂತಾ ಅಗತ್ಯ ವಸ್ತುಗಳಿಗೆ ಮಾತ್ರವೇ ನಾಡಿನೊಂದಿಗೆ ಸಂಪರ್ಕವಿಟ್ಟುಕೊಂಡ ಜನರವರು. ನಿಜಕ್ಕೂ ಒಂದಷ್ಟಾದರೂ ಕಾಡುಗಳು ಯಥಾ ಪ್ರಕಾರ ಉಳಿದುಕೊಂಡಿದ್ದಾವೆಂದರೆ ಅದರಲ್ಲಿ ಈ ಕಾಡಿನ ಮಕ್ಕಳ ಪಾತ್ರ ದೊಡ್ಡದಿದೆ. ಆದರೆ ಕಾಡು ಉಳಿಸುವ ಜೋಕು ಮಾಡುತ್ತಲೇ ಆಳೋ ಸರ್ಕಾರಗಳು ಈ ಜೀವಗಳನ್ನು ಒಕ್ಕಲೆಬ್ಬಿಸುತ್ತಿವೆ. ಹಾಗೆ ನಾಡಿಗೆ ತಳ್ಳಲ್ಪಟ್ಟ ನಂತರದಲ್ಲಿ ಕಾಡಿನ ಮಕ್ಕಳು ಎಂತೆಂಥಾ ಸಂದರ್ಭಗಳನ್ನು ಎದುರಿಸುತ್ತಾರೆ? ಯಾವ್ಯಾವ ಬಗೆಯ ದುಷ್ಟ ಶಕ್ತಿಗಳು ಅವರನ್ನು ಕಾಡುತ್ತವೆಂಬ ಆಂತರ್ಯ ಈ ಚಿತ್ರದ್ದು. ಅದನ್ನು ನೀನಾಸಂ ಮಂಜು ಕಟ್ಟಿ ಕೊಟ್ಟಿರುವ ರೀತಿಯೇ ಸಮ್ಮೋಹಕವಾಗಿದೆ.

ಇದರೊಳಗಿನ ಪಾತ್ರಗಳೂ ಕೂಡಾ ನೋಡುಗರ ಆಳಕ್ಕಿಳಿದಿವೆ. ಕಾಡಿನ ಯಜಮಾನ ಬೊಮ್ಮಜ್ಜನಾಗಿ ನಟಿಸಿರುವ ಎಂ.ಕೆ ಮಠ್ ಅವರ ಅಮೋಘ ನಟನೆ ಪ್ರೇಕ್ಷಕರ ಮನಗೆದ್ದಿದೆ. ಮೊದಲ ಪ್ರಯತ್ನವಾದರೂ ಅರ್ಚನಾ ಮಧುಸೂಧನ್ ನಟಿಸಿರುವ ರೀತಿ ಮೆಚ್ಚುಗೆಗೆ ಪಾತ್ರವಾಗಿದೆ. ಇನ್ನುಳಿದಂತೆ ಅನಿತಾ ಭಟ್, ಅರುಣ್ ಸಾಗರ್, ಕರಿಸುಬ್ಬು ಪಾತ್ರಗಳೂ ನೋಡುಗರನ್ನು ಕಾಡುತ್ತಿವೆ. ಒಟ್ಟಾರೆಯಾಗಿ ಎಲ್ಲರಿಗೂ ತಾಕುವ ಜಾಣ್ಮೆಯೊಂದಿಗೆ ನೀನಾಸಂ ಮಂಜು ಈ ಚಿತ್ರವನ್ನು ಕಟ್ಟಿ ಕೊಟ್ಟಿದ್ದಾರೆ. ಚಿತ್ರವೊಂದು ವಾರಗಳಾಚೆಗೆ ಕಾಲೂರಿ ನಿಲ್ಲುವುದೇ ಕಷ್ಟ ಎಂಬಂಥಾ ಈ ಹೊತ್ತಿನಲ್ಲಿ ಕನ್ನೇರಿಯ ಗೆಲುವು ಮೈಲಿಗಲ್ಲಿನಂತೆಯೇ ಕಾಣಿಸುತ್ತದೆ. ಈ ಚಿತ್ರ ನೂರರ ಸಂಭ್ರಮವನ್ನೂ ಆಚರಿಸುವಂತಾಗಲೆಂದು ಹಾರೈಸೋಣ.

The post ಗೆಲುವಿನ ಬೆನ್ನೇರಿದ ಕನ್ನೇರಿಗೆ 75ರ ಸಂಭ್ರಮ! appeared first on ಶೋಧ ನ್ಯೂಸ್ - Shodha News.