ಕರ್ನಾಟಕದ ಬಹುಭಾಗಗಳಲ್ಲಿ ಯಶಸ್ವಿಯಾಗಿ ರೋಡ್ ಶೋಗಳನ್ನು ನಡೆಸಿದ್ದ ಬನಾರಸ್ ಹೀರೋ ಝೈದ್ ಖಾನ್ ಇದೀಗ ಕನ್ನಡ ರಾಜ್ಯೋತ್ಸವದ ಸಂಭ್ರಮದಲ್ಲಿ ಮಿಂದೇಳುತ್ತಿದ್ದಾರೆ. ವಿಶೇಷವೆಂದರೆ, ಸದಾ ಭಾಷೆ ಮತ್ತು ಗಡಿ ವಿವಾದದಿಂದ ಸದ್ದು ಮಾಡುವ ಬೆಳಗಾವಿಯ ನೆಲದಲ್ಲಿಯೇ ಕನ್ನಡ ರಾಜ್ಯೋತ್ಸವದಲ್ಲಿ ಭಾಗಿಯಾಗಿದ್ದಾರೆ. ಈ ನಿಮಿತ್ತವಾಗಿ ಬೆಳಗಾವಿಗೆ ಬಂದಿಳಿದ ಝೈದ್ ಖಾನ್ ಅವರಿಗೆ ಬೆಳಗಾವಿ ಸೀಮೆಯ ಕನ್ನಡಪರ ಸಂಘಟನೆಗಳ ಒಕ್ಕೂಟದ ವತಿಯಿಂದ ಅದ್ದೂರಿ ಸ್ವಾಗತ ಕೋರಲಾಯ್ತು. ಈ ಸಂದರ್ಭದಲ್ಲಿ ಕನ್ನಡಪರ ಹೋರಾಟಗಾರರಾದ ಮನ್ಸೂರ್, ಕನ್ನಡ ರಕ್ಷಣಾ ವೇದಿಕೆಯ ರಾಜು ಕಲ್ಲೂರ್ ಮುಂತಾದವರು ಹಾಜರಿದ್ದರು.

ಆ ನಂತರದಲ್ಲಿ ಬೆಳಗಾವಿ ಜಿಲ್ಲೆಯ ಜಯಕರ್ನಾಟಕ ಜನಪರ ವೇದಿಕೆ ವತಿಯಿಂದ ಹಮ್ಮಿಕೊಳ್ಳಲಾಗಿದ್ದ ಅರವತ್ತೇಳನೇ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರಮದಲ್ಲಿಯೂ ಬನಾರಸ್ ಹೀರೋ ಝೈದ್ ಖಾನ್ ಅವರಿಗೆ ಗೌರವ ಲಭಿಸಿತ್ತು. ಆ ಕಾರ್ಯಕ್ರಮದ ವೇದಿಕೆಗೆ ಝೈದ್‌ರನ್ನು ಪ್ರೀತಿಯಿಂದ ಬರಮಾಡಿಕೊಂಡು, ಸನ್ಮಾನಿಸಲಾಯಿತು. ಅದಾದ ಬಳಿಕ ಕನ್ನಡ ರಾಜ್ಯೋತ್ಸವದ ಅಂಗವಾಗಿ ಬೆಳಗಾವಿಯ ಕನ್ನಡ ಪರ ಸಂಘಟನೆಗಳು ಬೃಹತ್ ಪಾದಯಾತ್ರೆಯನ್ನು ಆರಂಭಿಸಿದ್ದವು. ಅದರಲ್ಲಿಯೂ ಝೈದ್ ಖಾನ್ ಉತ್ಸಾಹದಿಂದ ಹೆಜ್ಜೆ ಹಾಕಿದರು.

ಬೆಳಗಾವಿಯಲ್ಲಿ ಕನ್ನಡ ರಾಜ್ಯೋತ್ಸವದ ಆಚರಣೆ ನಿಜಕ್ಕೂ ಭಿನ್ನವಾಗಿ ನೆರವೇರಿದೆ. ಇದೇ ಸಂದರ್ಭದಲ್ಲಿ ಈ ಸೀಮೆಯ ಕನ್ನಡಪರ ಮನಸುಗಳೆಲ್ಲ ಒಂದುಗೂಡಿ ಹತ್ತು ಸಾವಿರ ಮೀಟರ್ ಕನ್ನಡ ಧ್ವಜ ಪ್ರದರ್ಶನ ನಡೆಸಿ ಗಿನ್ನಿಸ್ ದಾಖಲೆ ಬರೆಯಲಾಯ್ತು. ಈ ಕಾರ್ಯಕ್ರಮದ ನೇತೃತ್ವವನ್ನು ಕಿರಣ್ ಮಾಳೆನವರ್ ಮತ್ತು ಸುನೀಲ್ ವಹಿಸಿಕೊಂಡಿದ್ದರು. ಈ ಕಾರ್ಯಕ್ರಮದಲ್ಲಿ ಬನಾರಸ್ ಹೀರೋ ಝೈದ್ ಖಾನ್ ಪಾಲ್ಗೊಂಡಿದ್ದರು. ಈ ಸಂದರ್ಭದಲ್ಲಿ ಗಡಿನಾಡು ಕನ್ನಡ ಸಂಘದ ಅಧ್ಯಕ್ಷರಾದ ಸೈಯದ್ ಮನ್ಸೂರ್, ಪ್ರಸಿದ್ಧ ವಕೀಲರಾದ ತೌಫಿಕ್ ಮೊಯಿನುದ್ದೀನ್, ಡಾ. ಆಸಿಫ್ ಮೊಕಾಶಿ, ಸಂತೋಷ್ ಕಾಮತ್, ಕನ್ನಡ ಸೇನೆಯ ರಾಜು ಹಾಗೂ ಹುಬ್ಬಳಿಯ ಯುವ ನಾಯಕ ರಶೀದ್ ಹಾಗೂ ಆಯೂಬ್ ಉಪಸ್ಥಿತರಿದ್ದರು.

ಬೆಳಗಾವಿ ಕನ್ನಡ ರಾಜ್ಯೋತ್ಸವದ ಸಂಭ್ರಮದಲ್ಲಿ ಅಕ್ಷರಶಃ ಕಂಗೊಳಿಸಿತ್ತು. ಅದೆಲ್ಲದರಲ್ಲಿಯೂ ಬನಾರಸ್ ನಾಯಕ ನಟ ಝೈದ್ ಖಾನ್ ಭಾಗಿಯಾಗಿದ್ದು ನಿಜವಾದ ವಿಶೇಷ. ಈ ಸಂದರ್ಭದಲ್ಲಿ ವೀರನಾರಿ ಕಿತ್ತೂರು ರಾಣಿ ಚೆನ್ನಮ್ಮ ವೃತ್ತದಲ್ಲಿ ಚೆನ್ನಮ್ಮನ ಪ್ರತಿಮೆಗೆ ಮಾಲಾರ್ಪಣೆ ಮಾಡಿ, ಪತ್ರಿಕಾಗೋಷ್ಟಿ ನಡೆಸಲಾಯ್ತು. ಅದರಲ್ಲಿ ಬನಾರಸ್ ಹೀರೋ ಝೈದ್ ಖಾನ್ ಮತ್ತು ಅನೇಕ ಕನ್ನಡಪರ ಸಂಘಟನೆಗಳ ಮುಖಂಡರು ಪಾಲ್ಗೊಂಡಿದ್ದರು.

ಇದೇ ಹೊತ್ತಿನಲ್ಲಿ ಕರ್ನಾಟಕ ರಕ್ಷಣಾ ವೇದಿಕೆ ಪ್ರವೀಣ್ ಶೆಟ್ಟಿ ಬಣದ ವತಿಯಿಂದ ಅದ್ದೂರಿ ರಾಜ್ಯೋತ್ಸವ ಕಾರ್ಯಕ್ರಮ ನಡೆಯಿತು. ಈ ಕಾರ್ಯಕ್ರಮಕ್ಕೆ ಝೈದ್ ಖಾನ್‌ರನ್ನು ಆಹ್ವಾನಿಸಲಾಗಿತ್ತು. ಝೈದ್ ಕನ್ನಡತನದ ಮೇಲಿನ ಪ್ರೀತಿಯಿಂದಲೇ ಅದರಲ್ಲಿ ಪಾಲ್ಗೊಂಡಿದ್ದರು. ಈ ಕಾರ್ಯಕ್ರಮದ ನೇತೃತ್ವವನ್ನು ವಾಜೀದ್ ಅಹ್ಮದ್ ಹಿರೇಗುಡಿ, ಕನ್ನಡ ಪರ ಹೋರಾಟಗಾರ ಮಹಾಂತೇಶ್ ರಂಗತಿಮಠ ಸೇರಿದಂತೆ ಅನೇಕ ಕನ್ನಡಪರ ಹೋರಾಟಗಾರರು ವಹಿಸಿಕೊಂಡಿದ್ದರು.

ಬೆಳಗಾವಿಯಲ್ಲಿ ನಡೆದ ಇಷ್ಟೆಲ ಕಾರ್ಯಕ್ರಮಗಳ ಮೂಲಕ ಬನಾರಸ್ ಹೀರೋ ಝೈದ್ ಖಾನ್ ಕನ್ನಡದ ಕಂಪು ಪಸರಿಸುವ ಕಾರ್ಯ ನಡೆಸಿದರು. ಅತ್ಯಂತ ಅಚ್ಚುಕಟ್ಟಾಗಿ ನಡೆದ ಈ ಎಲ್ಲ ಕಾರ್ಯಕ್ರಮಗಳ ಉಸ್ತುವಾರಿಯನ್ನು ಗಡಿನಾಡು ಕನ್ನಡ ಸಂಘದ ಅಧ್ಯಕ್ಷರಾದ ಸೈಯದ್ ಮನ್ಸೂರ್, ಕನ್ನಡ ಸೇನೆಯ ರಾಜು ಕೋಲಾರ, ಪ್ರಸಿದ್ಧ ವಕೀಲರಾದ ತೌಫಿಕ್ ಮೊಯಿನುದ್ದೀನ್, ಅಯೂಬ್ ಪಾರ್ಕನಳ್ಳಿ, ಡಾ,. ಆಸಿಫ್ ಮೊಕಾಶಿ, ಸಂತೋಷ್ ಕಾಮತ್, ಇಷಾಕ್ ನಿಪ್ಪಾಣಿ, ಹುಬ್ಬಳ್ಳಿ ಕಾಂಗ್ರೆಸ್ ಮುಖಂಡ ರಶೀದ್ ಮುಂತಾದವರು ವಹಿಸಿಕೊಂಡಿದ್ದರು. ಇದೆಲ್ಲದರ ಮೇಲುಸ್ತುವಾರಿಯನ್ನು ರಾಹುಲ್ ಗಾಂಧಿ ಸಾರಥ್ಯದ ಭಾರತ್ ಜೋಡೋ ಯಾತ್ರೆಯ ಉಸ್ತುವಾರಿ ಹೊತ್ತಿದ್ದ ಡಾ ಶಕೀಲ್ ನವಾಜ್ ಹೊತ್ತು, ಸಮರ್ಥವಾಗಿ ನೆರವೇರಿಸಿದರು.

The post ಕನ್ನಡತನದೊಂದಿಗೆ ಬೆರೆತ ಬನಾರಸ್ ಘಮ! appeared first on ಶೋಧ ನ್ಯೂಸ್ - Shodha News.

ಸಿನಿಮಾ ಹಾಡೊಂದಕ್ಕಾಗಿ ಮೈ ತುಂಬಾ ಬೆರಗು ತುಂಬಿಕೊಂಡು ಕಾಯೋದಿದೆಯಲ್ಲಾ? ಕನ್ನಡ ಚಿತ್ರರಂಗದ ಇದುವರೆಗಿನ ಹಾದಿಯ ತುಂಬಾ ಅಂಥಾದ್ದೊಂದು ರೋಮಾಂಚಕ ಸನ್ನಿವೇಶಗಳ ಗಂಧ ಹರಡಿಕೊಂಡಿದೆ. ಸಿನಿಮಾ ರಂಗ ಒಂದಷ್ಟು ಮಜಲುಗಳನ್ನು ಸವರಿಕೊಂಡು ಬಂದು, ಈವತ್ತಿಗೆ ಯಶದ ಪರ್ವದತ್ತ ಹೊರಳಿಕೊಂಡಿದೆ. ಈ ಯಾನದಲ್ಲಿ ಹಾಡುಗಳಿಗಾಗಿ ಕಾಯುವ, ಎದೆಗೆ ತಾಕಿಸಿಕೊಂಡು ಸಂಭ್ರಮಿಸುವ ಖುಷಿ ಮಾತ್ರ ಸವಕಲಾಗದೆ ಹಾಗೇ ಉಳಿದುಕೊಂಡಿದೆ. ಅಂಥಾದ್ದೊಂದು ನವಿರು ಭಾವಗಳನ್ನು ಮತ್ತೊಮ್ಮೆ ತೀವ್ರವಾಗಿಸಿದ ಖ್ಯಾತಿ ನಿಸ್ಸಂದೇಹವಾಗಿಯೂ ಜಯತೀರ್ಥ ನಿರ್ದೇಶನದ ಬನಾರಸ್ ಚಿತ್ರಕ್ಕೆ ಸಲ್ಲುತ್ತದೆ. ಮಾಯಗಂಗೆ ಅಂತೊಂದು ಹಾಡಿನ ಮೂಲಕ ಮನಗೆದ್ದಿದ್ದ ಬನಾರಸ್ ಕಡೆಯಿಂದೀಗ, ಬೆಳಕಿನ ಕವಿತೆ ಎಂಬ ಮುದ್ದಾದ ಹಾಡು ಬಿಡುಗಡೆಗೊಂಡಿದೆ.

ಹಾಡಿಗಿರುವ ಶಕ್ತಿಯನ್ನು ಸಮರ್ಥವಾಗಿ ಬಳಿಸಿಕೊಳ್ಳೋದೂ ಒಂದು ಕಲೆ. ನಿರ್ದೇಶಕ ಜಯತೀರ್ಥ ಆರಂಭದಿಂದ ಇಲ್ಲಿಯ ವರೆಗೂ ಆ ನಿಟ್ಟಿನಲ್ಲಿ ಸೈ ಅನ್ನಿಸಿಕೊಂಡು ಬಂದಿದ್ದಾರೆ. ಬನಾರಸ್ ವಿಚಾರದಲ್ಲಿ ಅಜನೀಶ್ ಲೋಕನಾಥ್ ಸಾಥ್ ಸಿಕ್ಕಿರೋದರಿಂದ ಹಾಡುಗಳಿಗೆ ಮತ್ತಷ್ಟು ಆವೇಗ ಬಂದಂತಾಗಿದೆ. ಅದೇ ಹಾದಿಯಲ್ಲಿ ರೂಪುಗೊಂಡಿರುವ ಬೆಳಕಿನ ಕವಿತೆ ಹಾಡು, ಸಂಜಿತ್ ಹೆಗ್ಡೆ ಮತ್ತು ಸಂಗೀತಾ ರವೀಂದ್ರನಾಥ್ ಕಂಠದಲ್ಲಿ ಅದ್ಭುತವಾಗಿ ಮೂಡಿ ಬಂದಿದೆ. ಒಂದೇ ಸಲಕ್ಕೆ ಎಂಥವರನ್ನಾದರೂ ವಶಪಡಿಸಿಕೊಳ್ಳ ಬಲ್ಲ ಮಾಂತ್ರಿಕತೆ ಹೊಂದಿರೋ ಈ ವೀಡಿಯೋ ಸಾಂಗ್ ಅತ್ಯಂತ ಕಡಿಮೆ ಅವಧಿಯಲ್ಲಿಯೇ ಹೆಚ್ಚೆಚ್ಚು ವೀಕ್ಷಣೆ ಪಡೆದುಕೊಂಡು ಮುನ್ನುಗ್ಗುತ್ತಿದೆ. ಈ ವೀಡಿಯೋ ಸಾಂಗ್ ಇಷ್ಟು ಆಕರ್ಷಕವಾಗಿ ಮೂಡಿ ಬಂದಿರೋದರಲ್ಲಿ ನೃತ್ಯ ನಿರ್ದೇಶಕ ಎ ಹರ್ಷ ಅವರ ಪಾಲೂ ಇದೆ. ಕಲಾ ನಿರ್ದೇಶನ ಮಾಡಿರುವ ಅರುಣ್ ಸಾಗರ್ ಕೈಚಳಕವೂ ಗಮನ ಸೆಳೆಯುವಂತಿದೆ.

ಈವರೆಗೆ ಬಂದಿರುವ ಹಾಡುಗಳನ್ನು ಆಸ್ವಾದಿಸಿದ್ದವರೆಲ್ಲ ಬೆಳಕಿನ ಕವಿತೆಗಾಗಿ ತೀವ್ರವಾಗಿಯೇ ಹಂಬಲಿಸಿದ್ದರು. ಇದೀಗ ಅದೆಲ್ಲವನ್ನೂ ಸಾರ್ಥಕಗೊಳಿಸುವಂತೆ ‘ಬೆಳಕಿನ ಕವಿತೆ ಬೆರಗಿಗೆ ಸೋತೆ ಬೆಳದಿಂಗಳೇ ಮೆರವಣಿಗೆ’ ಎಂಬ ಈ ಹಾಡು ಮೂಡಿ ಬಂದಿದೆ. ಈ ಮೂಲಕ ಅಜನೀಶ್ ಲೋಕನಾಥ್ ನಿಜಕ್ಕೂ ಮತ್ತೊಮ್ಮೆ ತಮ್ಮ ಕೈಚಳಕ ತೋರಿಸಿದ್ದಾರೆ. ಜನರೆಲ್ಲ ಯಾವ ನಿರೀಕ್ಷೆಯಿಟ್ಟುಕೊಂಡು ಕಾದಿದ್ದರೋ, ಅದೆಲ್ಲವೂ ಬೆಳದಿಂಗಳೇ ಎದೆಗಿಳಿದಂಥಾ ಈ ಹಾಡಿನ ಮೂಲಕ ಸಾರ್ಥಕ್ಯ ಕಂಡಿದೆ. ಕೇವಲ ಸಾಹಿತ್ಯ, ಸಂಗೀತದ ವಿಚಾರದಲ್ಲಿ ಮಾತ್ರವಲ್ಲ; ದೃಶ್ಯ ವೈಭವದ ವಿಚಾರದಲ್ಲಿಯೂ ಈ ವೀಡಿಯೋ ಸಾಂಗ್ ಗಮನ ಸೆಳೆಯುವಂತಿದೆ. ತಾಜಾತನ ಮತ್ತು ರೋಮಾಂಚಕ ಸನ್ನಿವೇಶಗಳಲ್ಲಿ ಅದ್ದಿ ತೆಗೆದಂಥಾ ದೃಶ್ಯಗಳ ನಡುವೆ ಝೈ ಖಾನ್ ಮತ್ತು ಸೋನಲ್ ಮೊಂತೇರೋ ಅಕ್ಷರಶಃ ಮಿಂಚಿದ್ದಾರೆ.

ಈ ಬೆಳಕಿನ ಕವಿತೆಯೊಂದಿಗೆ ಚಿತ್ರ ಸಾಹಿತಿ ಡಾ. ವಿ ನಾಗೇಂದ್ರ ಪ್ರಸಾದ್ ಕೂಡಾ ಮಿಂಚಿದ್ದಾರೆಂಬುದು ಸತ್ಯ. ಕನ್ನಡ ಚಿತ್ರರಂಗದ ಮಟ್ಟಿಗೆ ನಾಗೇಂದ್ರ ಪ್ರಸಾದ್ ಭಿನ್ನ ನೆಲೆಯ ಗೀತ ಸಾಹಿತಿ. ಯಾವ ಪ್ರಾಕಾರದ ಹಾಡಿಗಾದರೂ ಸೈ ಎಂಬಂಥಾ ಮನೋಭಾವದ ಅವರು, ಅದೆಲ್ಲದರಲ್ಲಿಯೂ ಗೆಲುವು ಕಂಡಿದ್ದಾರೆ. ಈವತ್ತಿಗೆ ಬನಾರಸ್‌ನ ಮಾಯಗಂಗೆ ಈ ಪರಿಯಾಗಿ ಕ್ರೇಜ್ ಹುಟ್ಟು ಹಾಕಿರೋದರ ಹಿಂದೆ ನಾಗೇಂದ್ರ ಪ್ರಸಾದರ ಪಾತ್ರವೂ ಬಹಳಷ್ಟಿದೆ. ಅವರೇ ಸೃಷ್ಟಿಸಿರುವ ಬೆಳಕಿನ ಕವಿತೆ ಕೂಡಾ ಅಂಥಾದ್ದೇ ದಾಖಲೆ ಸೃಷ್ಟಿಸೋದರಲ್ಲಿ ಯಾವ ಸಂದೇಹವೂ ಇಲ್ಲ. ಒಟ್ಟಾರೆಯಾಗಿ, ಈ ಹಾಡು ಬನಾರಸ್‌ನ ಜೀವಾಳವನ್ನು ಸಂಗೀತದ ಸಾಂಗತ್ಯದಲ್ಲಿ ಸಮರ್ಥವಾಗಿಯೇ ಪ್ರೇಕ್ಷಕರತ್ತ ದಾಟಿಸಿದೆ. ಇನ್ನೇನು ಬಿಡುಗಡೆಗೆ ಕೆಲ ದಿನಗಳಷ್ಟೇ ಬಾಕಿ ಇರುವ ಈ ಹೊತ್ತಿನಲ್ಲಿ, ಬೆಳಕಿನ ಕವಿತೆಯ ಮೂಲಕ ಅವರ್ಣನೀಯ ಬೆರಗೊಂದು ಎಲ್ಲರ ಮನಸಿಗಂಟಿಕೊಂಡಿದೆ!

The post ಇದು ಸದಾ ಕಾಡುವ ಬೆಳಕಿನ ಕವಿತೆ! appeared first on ಶೋಧ ನ್ಯೂಸ್ - Shodha News.

ಬನಾರಸ್ ಚಿತ್ರದ ಮೂಲಕ ನಾಯಕನಾಗಿ ಪ್ಯಾನಿಂಡಿಯಾ ಮಟ್ಟದಲ್ಲಿ ಎಂಟ್ರಿ ಕೊಡುತ್ತಿರುವವರು ಝೈದ್ ಖಾನ್. ಈ ಚಿತ್ರ ಬಿಡುಗಡೆಗೆ ಇನ್ನು ಕೆಲವೇ ಕೆಲ ದಿನಗಳು ಮಾತ್ರವೇ ಬಾಕಿ ಉಳಿದುಕೊಂಡಿವೆ. ಈ ಹೊತ್ತಿಗೆಲ್ಲಾ ಝೈದ್ ಯಾವುದೇ ತಟವಟಗಳಿಲ್ಲದ ತಮ್ಮ ನಡವಳಿಕೆಯ ಮೂಲಕವೇ ಎಲ್ಲರ ಇಷ್ಟದ ಹೀರೋ ಆಗಿ ಹೊರಹೊಮ್ಮಿದ್ದಾರೆ. ಅದಕ್ಕೆ ಕಾರಣವಾಗಿರೋದು ಎಲ್ಲವನ್ನೂ ಜಾತಿ ಧರ್ಮಗಳ ಭೂಮಿಕೆಯಲ್ಲಿ ನೋಡುವಂಥಾ ಇಂದಿನ ಕಾಲಘಟ್ಟದಲ್ಲಿ ಝೈದ್ ಖಾನ್ ಮುಂದುವರೆಯುತ್ತಿರುವ ರೀತಿಯಷ್ಟೇ. ಇದೀಗ ಬೇರೆ ರಾಜ್ಯಗಳಲ್ಲಿ ಬನಾರಸ್ ಪ್ರಚಾರ ಕಾರ್ಯದಲ್ಲಿ ತೊಡಗಿಸಿಕೊಂಡಿರುವ ಝೈದ್, ಆ ಹಾದಿಯಲ್ಲೆದುರಾಗೋ ದೇವಸ್ಥಾನಗಳಿಗೆಲ್ಲ ಭೇಟಿ ಕೊಟ್ಟು ಭಕ್ತಿ ಭಾವದಿಂದ ನಡೆದುಕೊಳ್ಳುತ್ತಿದ್ದಾರೆ. ಬಹುಶಃ ಅಂಥಾದ್ದೊಂದು ಸಹಜವಾದ ನಡವಳಿಕೆಯ ಫಲವಾಗಿಯೇ ಏನೋ… ಝೈದ್‌ಗೆ ಕುಂಭ ಮೇಳದ ಸಂದರ್ಭದಲ್ಲಿ ನಡೆಯುವ ಗಂಗಾರತಿಯಲ್ಲಿ ಭಾಗಿಯಾಗೋ ಸದವಕಾಶ ಕೂಡಿ ಬಂದಿದೆ.

ಈಗೊಂದಷ್ಟು ದಿನಗತಳಿಂದ ಝೈದ್ ಖಾನ್ ಕಾಲಿಗೆ ಚಕ್ರ ಕಟ್ಟಿಕೊಂಡಂತೆ ಬಿಡುವಿರದೆ ಸುತ್ತುತ್ತಿದ್ದಾರೆ. ಬನಾರಸ್ ಬಿಡುಗಡೆಗೆ ಕೆಲವೇ ದಿನಗಳು ಮಾತ್ರ ಬಾಕಿ ಉಳಿದಿರುವ ಈ ಹೊತ್ತಿನಲ್ಲಿ, ಎಲ್ಲವೂ ಸಾರ್ಥಕ್ಯ ಕಾಣುವಂತೆ ಮಾಡಲು ಶ್ರಮಿಸುತ್ತಿದ್ದಾರೆ. ಗಮನೀಯ ಅಂಶವೆಂದರೆ, ಈ ಹಾದಿಯಲ್ಲಿ ಸಿಗುವ ಧಾರ್ಮಿಕ ಕ್ಷೇತ್ರಗಳಿಗೆಲ್ಲ ಝೈದ್ ಜಾತಿ ಮತಗಳ ಹಂಗಿಲ್ಲದೆ ಭೇಟಿ ನೀಡಿ ಭಕ್ತಿಯಿಂದ ನಮಿಸುತ್ತಿದ್ದಾರೆ. ಈ ಮೂಲಕ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗಿರುವ ಜೋಡಿಯೀಗ ಪ್ರಚಾರ ಕಾರ್ಯದ ನಿಮಿತ್ತವಾಗಿಯೇ ವಾರಾಣಸಿಗ ಅಂಗಳ ತಲುಪಿಕೊಂಡಿದೆ. ಇಲ್ಲಿಯೇ ಒಂದಷ್ಟು ಸ್ಮರಣೀಯ ಕ್ಷಣಗಳಿಗೆ ಸಾಕ್ಷಿಯಾಗಿದೆ.

ಈ ಸಂದರ್ಭದಲ್ಲಿ ಝೈದ್ ಖಾನ್ ಮತ್ತು ಸೋನಲ್ ಮೊಂತೇರೋ ಗಂಗಾರತಿಯಲ್ಲಿ ಪಾಲ್ಗೊಂಡರು. ವಿಧಿವಿಧಾನಗಳಿಗೆ ತಕ್ಕುದಾಗಿ ಅದರಲ್ಲಿ ಪಾಲ್ಗೊಂಡು ಭಕ್ತಿ ಭಾವದಲ್ಲಿ ಮಿಂದೆದ್ದಿದ್ದಾರೆ. ಗಂಗಾರತಿಗೆ ಧಾರ್ಮಿಕವಾಗಿ ಮಹತ್ವವಿದೆ. ಅದು ಕೋಟ್ಯಂತರ ಜನರ ಭಕ್ತಿ ಭಾವಗಳ ಆಚರಣೆ. ಅದರಲ್ಲಿ ಭಾಗಿಯಾಗುವ ಅವಕಾಶ ಬನಾರಸ್ ಹೀರೋ ಝೈದ್ ಖಾನ್ ಮತ್ತು ನಾಯಕಿ ಸೋನಲ್ ಮೊಂತೇರೋ ಅವರುಗಳಿಗೆ ಅದಾಗಿಯೇ ಒಲಿದು ಬಂದಿದೆ. ಎಲ್ಲ ನಂಬಿಕೆಗಳನ್ನೂ ಗೌರವಿಸುವ, ಅಷ್ಟೇ ಆಪ್ತವಾಗಿ ಆಚರಿಸುವ ಮನೋಭಾವದ ಝೈದ್ ಖಾನ್ ತಲ್ಲೀನರಾಗಿ ಗಂಗಾರತಿಯಲ್ಲಿ ಪಾಲ್ಗೊಂಡಿದ್ದಾರೆ. ಅಂಥಾದ್ದೊಂದು ಧನ್ಯತಾ ಭಾವದೊಂದಿಗೆ ಮತ್ತೆ ಬನಾರಸ್ ಪ್ರಚಾರ ಕಾರ್ಯಕ್ಕೆ ಮರಳಿದ್ದಾರೆ.

ಇದೇ ಹೊತ್ತಿನಲ್ಲಿ ಮತ್ತೊಂದು ಅಚ್ಚರಿದಾಯಕ ಅವಕಾಶ ಕೂಡಾ ಬನಾರಸ್ ಜೋಡಿಗೆ ಕೂಡಿ ಬಂದಿದೆ. ವಾರಾಣಸಿಯಲ್ಲಿ ನಡೆಯುತ್ತಿರುವ ಪ್ರಪ್ರಥಮ ಮಣಿಕರ್ಣಿಕಾ ಫಿಲಂ ಫೆಸ್ಟಿವಲ್‌ನಲ್ಲಿಯೂ ಬನಾರಸ್ ಜೋಡಿ ಭಾಗಿಯಾಗಿದ್ದೊಂದು ಅವಿಸ್ಮರಣೀಯ ಕ್ಷಣ. ಆ ಕಾರ್ಯಕ್ರಮವನ್ನು ಬಾಲಿವುಡ್‌ನ ಹಿರಿಯ ನಟ ಸಂಜಯ್ ಮಿಶ್ರಾ ಉದ್ಘಾಟಿಸಿದ್ದಾರೆ. ಬಳಿಕ ಬಲು ಪ್ರೀತಿಯಿಂದ ಅವರೇ ಖುದ್ದಾಗಿ ಬನಾರಸ್ ಜೋಡಿಯನ್ನು ಸನ್ಮಾನಿಸಿದ್ದಾರೆ. ಒಟ್ಟಾರೆ ಚಿತ್ರದ ಬಗ್ಗೆ ಒಳ್ಳೆ ಮಾತುಗಳನ್ನಾಡಿ, ಗೆಲುವಾಗಲೆಂದು ಹಾರೈಸಿದ್ದಾರೆ. ಸಂಜಯ್ ಮಿಶ್ರಾ ಬಾಲಿವುಡ್ ಚಿತ್ರಗಳಲ್ಲಿ ನಟಿಸಿರುವ ಪ್ರತಿಭಾವಂತ ಹಿರಿಯ ನಟ. ದೂರದರ್ಶನವೂ ಸೇರಿದಂತೆ ಅನೇಕ ಭೂಮಿಕೆಗಳಲ್ಲಿ ಪ್ರಸಿದ್ಧಿ ಪಡೆದುಕೊಂಡಿರುವ ಮಿಶ್ರಾ ಬನಾರಸ್ ಬಗ್ಗೆ ಭರವಸೆಯ ಮಾತುಗಳನ್ನಾಡಿದ್ದಾರೆ. ಅದು ನವನಾಯಕ ಝೈದ್ ಖಾನ್ ಅವರಿಗೆ ಹೊಸಾ ಹುರುಪು ತುಂಬಿದೆ.

ಈ ಸಿನಿಮಾ ಫೆಸ್ಟಿವಲ್ ವಾರಾಣಸಿಯಲ್ಲಿ ಇದೇ ಮೊದಲ ಬಾರಿಗೆ ನಡೆಯುತ್ತಿದೆ. ಆ ವೇದಿಕೆಯಲ್ಲಿಯೇ ಝೈದ್ ಖಾನ್ ಮತ್ತು ಸೋನಲ್ ಮೊಂತೇರೋ ಅವರುಗಳಿಗೆ ಸನ್ಮಾನ ಸಿಗುವ ಮೂಲಕ ಬನಾರಸ್ ಚಿತ್ರಕ್ಕೆ ವ್ಯಾಪಕ ಪ್ರಚಾರ ಸಿಕ್ಕಂತಾಗಿದೆ. ಅಷ್ಟಕ್ಕೂ ವಾರಾಣಸಿಯ ವಾತಾವರಣವೇ ಒಂದಿಡೀ ಬನಾರಸ್ ಚಿತ್ರದ ಜೀವಾಳ. ಒಂದು ಅಮೋಘವಾದ ಪ್ರೇಮ ಕಥಾನಕ ಮತ್ತೊಂದಷ್ಟು ಬೆರಗುಗಳೊಂದಿಗೆ ಗಂಗೆಯ ತಟದಿಂದಲೇ ಗರಿಬಿಚ್ಚಿಕೊಳ್ಳುತ್ತದೆ. ಇದೀಗ ಅದೇ ನೆಲದಲ್ಲಿ, ಸಿನಿಮಾ ಹಬ್ಬದಲ್ಲಿ ಸನ್ಮಾನಿಸಿಕೊಳ್ಳುವ ಸದಾವಕಾಶ ಝೈದ್ ಪಾಲಿಗೆ ಕೂಡಿ ಬಂದಿದೆ. ಅದೇ ಹುರುಪಿನೊಂದಿಗೆ ಝೈದ್ ಮತ್ತಷ್ಟು ಆವೇಗದಿಂದ ಬನಾರಸ್ ಪ್ರಚಾರ ಕಾರ್ಯ ಆರಂಭಿಸಿದ್ದಾರೆ. ಹೋದಲ್ಲೆಲ್ಲ ಇಂಥಾದ್ದೇ ಪ್ರೀತ್ಯಾಧರಗಳು ಅವರನ್ನರಸಿ ಬರುತ್ತಿವೆ. ಇಂಥಾ ಸಕಾರಾತ್ಮಕ ವಾತಾವರಣದಲ್ಲಿ, ಭಾರೀ ಕ್ರೇಜ್‌ನ ಒಡ್ಡೋಲಗದಲ್ಲಿ, ಬನಾರಸ್ ಇದೇ ನವೆಂಬರ್ ನಾಲಕ್ಕರಂದು ಅದ್ದೂರಿಯಾಗಿ ತೆರೆಗಾಣುತ್ತಿದೆ.

The post ಮಣಿಕರ್ಣಿಕಾ ಫಿಲಂ ಫೆಸ್ಟಿವಲ್‌ನಲ್ಲಿ ಸನ್ಮಾನದ ಪುಳಕ! appeared first on ಶೋಧ ನ್ಯೂಸ್ - Shodha News.

ಝೈದ್ ಖಾನ್ ನಾಯಕನಾಗಿ ನಟಿಸಿರುವ ಪ್ಯಾನಿಂಡಿಯಾ ಚಿತ್ರ ಬನಾರಸ್. ಒಂದು ಯಶಸ್ವೀ ಸಿನಿಮಾ ಹೇಗೆಲ್ಲ ಸದ್ದು ಮಾಡಬಹುದೋ, ಆ ದಿಕ್ಕಿನಲ್ಲೆಲ್ಲ ವ್ಯಾಪಕವಾಗಿ ಸುದ್ದಿ ಮಾಡುತ್ತಾ ಬನಾರಸ್ ಬಿಡುಗಡೆಯ ಹಾದಿಯಲ್ಲಿದೆ. ಸಾಮಾನ್ಯವಾಗಿ ಪ್ಯಾನಿಂಡಿಯಾ ಮಟ್ಟದಲ್ಲಿ ಯಾವ ಸಿನಿಮಾವನ್ನಾದರೂ ನೆಲೆಗಾಣಿಸಬೇಕೆಂದರೆ, ಅದರಲ್ಲಿ ವಿತರಣೆಯ ಜವಾಬ್ದಾರಿ ಪಡೆಯುವ ಸಂಸ್ಥೆಗಳ ಪಾತ್ರವೂ ಬಹು ಮುಖ್ಯವಾಗುತ್ತದೆ. ಈ ವಿಚಾರದಲ್ಲಿ ಬನಾರಸ್‌ನದ್ದು ಯಶಸ್ವೀ ಯಾನ. ಯಾಕೆಂದರೆ, ನಾನಾ ಭಾಷೆಗಳಲ್ಲಿ ಈಗಾಗಲೇ ಸೂಪರ್ ಹಿಟ್ ಸಿನಿಮಾಗಳನ್ನು ವಿತರಿಸಿ ಸೈ ಅನ್ನಿಸಿಕೊಂಡಿರುವ ಸಂಸ್ಥೆಗಳೇ ಬನಾರಸ್ ಸಾರಥ್ಯ ವಹಿಸಿಕೊಂಡಿವೆ. ಇದೀಗ ಅಖಂಡ ತಮಿಳುನಾಡಿನಲ್ಲಿ ಬನಾರಸ್ ಅನ್ನು ತೆರೆಗಾಣಿಸುವ ಜವಾಬ್ದಾರಿಯನ್ನು ಪ್ರತಿಷ್ಠಿತ ವಿತರಣಾ ಸಂಸ್ಥೆಯಾಗಿರುವ ಶಕ್ತಿ ಫಿಲಂ ಫ್ಯಾಕ್ಟರಿ ವಹಿಸಿಕೊಂಡಿದೆ.

ಈಗಾಗಲೇ ಕರ್ನಾಟಕ, ಕೇರಳ ಮತ್ತು ಉತ್ತರ ಭಾರತದ ಬನಾರಸ್ ವಿತರಣಾ ಹಕ್ಕುಗಳು ಖ್ಯಾತ ಸಂಸ್ಥೆಗಳ ಪಾಲಾಗಿವೆ. ಈ ಮೂಲಕವೇ ಆ ರಾಜ್ಯಗಳಲ್ಲಿ ಬನಾರಸ್ ಸುದ್ದಿ ಕೇಂದ್ರದಲ್ಲಿರುವಾಗಲೇ, ತಮಿಳುನಾಡಿನ ದಿಕ್ಕಿನಿಂದ ಈ ಶುಭ ಸಮಾಚಾರ ಜಾಹೀರಾಗಿದೆ. ಹೀಗೆ ಶಕ್ತಿ ಫಿಲಂ ಫ್ಯಾಕ್ಟರಿ ಬನಾರಸ್ ವಿತರಣಾ ಹಕ್ಕುಗಳನ್ನು ಖರೀದಿಸಿದ ಸುದ್ದಿ ಹೊರಬೀಳುತ್ತಲೇ, ಅಲ್ಲಿನ ಚಿತ್ರಪ್ರೇಮಿಗಳ ಚಿತ್ತ ತಾನೇತಾನಾಗಿ ಬನಾರಸ್ ನತ್ತ ವಾಲಿಕೊಂಡಿದೆ. ಯಾಕೆಂದರೆ, ಅತ್ಯಂತ ಅಚ್ಚುಕಟ್ಟಾಗಿ ಸಿನಿಮಾಗಳನ್ನು ಪ್ರೇಕ್ಷಕರಿಗೆ ತಲುಪಿಸುವಲ್ಲಿ ಶಕ್ತಿ ಫಿಲಂ ಫ್ಯಾಕ್ಟರಿ ಹೆಸರುವಾಸಿಯಾಗಿದೆ. ಈ ಸಂಸ್ಥೆಯ ಕಡೆಯಿಂದ ತೆರೆಗಂಡ ಅದೆಷ್ಟೋ ಚಿತ್ರಗಳು ಸೂಪರ್ ಹಿಟ್ಟಾಗಿವೆ. ಈ ಕಾರಣದಿಂದಲೇ ಬನಾರಸ್ ಬಗೆಗಿನ ನಿರೀಕ್ಷೆ ತಮಿಳುನಾಡಿನಾದ್ಯಂತ ತಾರಕಕ್ಕೇರಿದೆ.

ಜಯತೀರ್ಥ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಬನಾರಸ್ ಈಗಾಗಲೇ ಹಾಡುಗಳು ಮತ್ತು ಟ್ರೈಲರ್ ಮೂಲಕ ತನ್ನದೇ ಆದ ಸ್ಥಾನ ಗಿಟ್ಟಿಸಿಕೊಂಡಿದೆ. ಇವೆಲ್ಲವುಗಳ ಮೂಲಕವೇ ಬಹುನಿರೀಕ್ಷಿತ ಚಿತ್ರವೆಂಬ ಹೆಗ್ಗಳಿಕೆಯನ್ನೂ ತನ್ನದಾಗಿಸಿಕೊಂಡಿದೆ. ಜಯತೀರ್ಥ ಮಧುರವಾದ ಪ್ರೇಮಕಥಾನಕಗಳಿಗೆ, ಅಚ್ಚರಿದಾಯಕ ನಿರೂಪಣಾ ಶೈಲಿಗೆ ಹೆಸರಾಗಿರುವ ನಿರ್ದೇಶಕ. ಬನಾರಸ್ ಮೂಲಕ ಅವರು ಮತ್ತೊಂದು ಆಯಾಮದ ಕಥೆ ಹೇಳಹೊರಟಿರೋದು ಈಗಾಗಲೇ ಪಕ್ಕಾ ಆಗಿದೆ. ಇಷ್ಟೊಂದು ವಿಶೇಷತೆಗಳಿರೋದರಿಂದಲೇ ಪ್ರತಿಷ್ಠಿತ ಸಂಸ್ಥೆಗಳು ಪ್ರಶಂಶೆಯೊಂದಿಗೆ ಬನಾರಸ್ ವಿತರಣಾ ಹಕ್ಕುಗಳನ್ನು ಪಡೆದುಕೊಂಡಿವೆ. ಇಂಥಾ ಸಕಾರಾತ್ಮಕ ವಾತಾವರಣದಲ್ಲಿ ದಾಪುಗಾಲಿಡುತ್ತಿರುವ ಬನಾರಸ್, ಇದೇ ನವೆಂಬರ್ ನಾಲಕ್ಕನೇ ತಾರೀಕಿನಂದು ದೇಶಾದ್ಯಂತ ತೆರೆಗಂಡು ಮ್ಯಾಜಿಕ್ ಮಾಡಲಿದೆ!

The post ತಮಿಳುನಾಡಲ್ಲಿ ಬನಾರಸ್‌ಗೆ ಶಕ್ತಿ ಫಿಲಂ ಫ್ಯಾಕ್ಟರಿ ಸಾಂಗತ್ಯ! appeared first on ಶೋಧ ನ್ಯೂಸ್ - Shodha News.

ಹ್ಯಾಂಡ್ಸಮ್ ಹೀರೋ ಝೈದ್ ಖಾನ್ ಬನಾರಸ್ ಮೂಲಕ ಪ್ರೇಕ್ಷಕರನ್ನು ಮುಖಾಮುಖಿಯಾಗುಲು ಇನ್ನು ಕೆಲವೇ ಕೆಲ ದಿನಗಳು ಮಾತ್ರ ಬಾಕಿ ಉಳಿದುಕೊಂಡಿವೆ. ಅದಾಗಲೇ ಈ ಸಿನಿಮಾದ ಪ್ರಭೆ ದೇಶದ ಉದ್ದಗಲಕ್ಕೂ ಸಮ್ಮೋಹಕವಾಗಿ ಹಬ್ಬಿಕೊಳ್ಳುತ್ತಿದೆ. ಅತ್ತ ಝೈದ್ ಖಾನ್ ಅತ್ಯುತ್ಸಾಹದಿಂದ ಬೇರೆ ಬೇರೆ ರಾಜ್ಯಗಳನ್ನು ಸುತ್ತುತ್ತಾ, ಪ್ರಚಾರದಲ್ಲಿ ಭಾಗಿಯಾಗಿದ್ದಾರೆ. ಮಾಧ್ಯಮ ಸಂದರ್ಶನವೂ ಸೇರಿದಂತೆ ಕೆಲವಾರು ಚಟುವಟಿಕೆಗಳಲ್ಲಿ ಸಕ್ರಿಯರಾಗಿದ್ದಾರೆ. ಅದೇ ಹೊತ್ತಿನಲ್ಲಿ ಮತ್ತೊಂದು ದಿಕ್ಕಿನಿಂದ ಬನಾರಸ್ ಬಗೆಗಿನ ಬೆರಗಾಗುವಂಥಾ ಒಂದಷ್ಟು ವಿಚಾರಗಳು ಒಂದರ ಹಿಂದೊಂದರಂತೆ ಜಾಹೀರಾಗುತ್ತಿದ್ದಾವೆ. ಕರ್ನಾಟಕ ಮತ್ತು ಕೇರಳಗಳಲ್ಲಿ ಬನಾರಸ್ ವಿತರಣಾ ಹಕ್ಕು ಡಿ ಬೀಟ್ಸ್ ಹಾಗೂ ಮಲಕುಪ್ಪಡಮ್ ಪಾಲಾದ ಸುದ್ದಿಯ ಬೆನ್ನಲ್ಲಿಯೇ ಹಿಂದಿಯ ವಿತರಣಾ ಹಕ್ಕು ಯಾರ ಪಾಲಾಗಲಿದೆ ಅಂತೊಂದು ಪ್ರಶ್ನೆ ಮೂಡಿಕೊಂಡಿತ್ತು. ಅದಕ್ಕೀಗ ಉತ್ತರ ಸಿಕ್ಕಿದೆ!

ಬನಾರಸ್ ಹೇಳಿಕೇಳಿ ಪ್ಯಾನಿಂಡಿಯಾ ಚಿತ್ರ. ಆದ್ದರಿಂದಲೇ ಉತ್ತರ ಭಾರತದ ತುಂಬೆಲ್ಲ ಸಮರ್ಥವಾಗಿ ಬಿಡುಗಡೆಯಾಗುವಂತೆ ನೋಡಿಕೊಳ್ಳಲೇ ಬೇಕಾದ ಅನಿವಾರ್ಯತೆ ಇದೆ. ಯಾಕೆಂದರೆ, ಒಟ್ಟಾರೆ ಗೆಲುವಿನಲ್ಲಿ ಉತ್ತರದ ಪಾಲು ದೊಡ್ಡದಿದೆ. ಈ ಸಂಬಂಧವಾಗಿ ಬನಾರಸ್ ಚಿತ್ರತಂಡ ಅತ್ಯಂತ ಎಚ್ಚರದ ಹೆಜ್ಜೆಯನ್ನಿಟ್ಟಿತ್ತು. ಕಡೆಗೂ ಉತ್ತರ ಭಾರತದ ವಿತರಣಾ ಹಕ್ಕು ಪನೋರಮಾ ಸಂಸ್ಥೆಯ ಪಾಲಾಗಿದೆ. ಈ ಮೂಲಕ ಬನಾರಸ್‌ಗೆ ಮತ್ತಷ್ಟು ಖದರ್ ಸಿಕ್ಕಂತಾಗಿದೆ. ಯಾಕೆಂದರೆ, ಪನೋರಮಾ ಎಂಬುದು ಉತ್ತರ ಭಾರತದಾದ್ಯಂತ ತನ್ನದೇ ಆದ ಛಾಪು ಮೂಡಿಸಿರುವ ಪ್ರತಿಷ್ಠಿತ ಸಂಸ್ಥೆ. ಈವರೆಗೂ ಸ್ಟಾರ್ ನಟರನೇಕರ ಸೂಪರ್ ಹಿಟ್ ಸಿನಿಮಾಗಳು ಪನೋರಮಾ ಕಡೆಯಿಂದಲೇ ತೆರೆಕಂಡಿವೆ. ಇಂಥಾ ಸಂಸ್ಥೆ ಬನಾರಸ್ ವಿತರಣೆಯ ಜವಾಬ್ದಾರಿ ಹೊತ್ತುಕೊಂಡಿರೋದರಿಂದ ಈ ಸಿನಿಮಾದ ಕಿಮ್ಮತ್ತು ಮತ್ತಷ್ಟು ಹೆಚ್ಚಿಕೊಂಡಂತಾಗಿದೆ.

ವಿಶೇಷವೆಂದರೆ, ಖ್ಯಾತ ಬಾಲಿವುಡ್ ನಟ ಅಜಯ್ ದೇವಗನ್ ಕೂಡಾ ಈ ಸಂಸ್ಥೆಯ ಪಾಲುದಾರರಾಗಿದ್ದಾರೆ. ಒಂದಷ್ಟು ಸಿನಿಮಾಗಳೊಂದಿಗೆ ವ್ಯವಹಾರ ನಡೆಯುವಾಗ ಖುದ್ದು ಅಜಯ್ ದೇವಗನ್ ಅದರ ದೇಖಾರೇಖಿ ನೋಡಿಕೊಳ್ಳುತ್ತಾರೆ. ಈ ಸಂಸ್ಥೆಯ ಕಡೆಯಿಂದ ಸಿನಿಮಾವೊಂದು ಬಿಡುಗಡೆಗೊಳ್ಳೋದು ಸಲೀಸಿನ ಸಂಗತಿಯಲ್ಲ. ಅದು ನಿಜಕ್ಕೂ ಪ್ರತಿಷ್ಠೆಯ ಸಂಗತಿ. ಯಾಕೆಂದರೆ, ಎಲ್ಲ ಬಗೆಯಲ್ಲಿಯೂ ಪರಿಪೂರ್ಣವಾಗಿರುವ, ಗೆಲುವಿನ ಲಕ್ಷಣಗಳನ್ನು ಹೊಂದಿರುವ ಚಿತ್ರಗಳನ್ನು ಮಾತ್ರವೇ ಈ ಸಂಸ್ಥೆ ತನ್ನದಾಗಿಸಿಕೊಳ್ಳುತ್ತೆ. ಇದೀಗ ಬನಾರಸ್ ವಿತರಣಾ ಹಕ್ಕೂ ಪನೋರಮಾ ಪಾಲಾಗಿರೋದೇ, ಈ ಚಿತ್ರದೆಡೆಗಿನ ನಿರೀಕ್ಷೆ ಉತ್ತರದಾದ್ಯಂತ ಹಬ್ಬಿಕೊಳ್ಳುವಂತೆ ಮಾಡಿದೆ.

ಇದು ಬನಾರಸ್ ಪಾಲಿಗೆ ನಿಜಕ್ಕೂ ಆರಂಭಿಕ ಗೆಲುವೆಂಬುದರಲ್ಲಿ ಎರಡು ಮಾತಿಲ್ಲ. ಕನ್ನಡದತ್ತ ಪ್ರಧಾನವಾಗಿ ಗಮನ ಹರಿಸಿದ್ದ ಬನಾರಸ್ ಚಿತ್ರತಂಡದ ಪಾಲಿಗೆ, ಉತ್ತರದಲ್ಲಿ ಪಾದವೂರೋದೂ ಕೂಡಾ ಮುಖ್ಯವಾಗಿತ್ತು. ಈ ಸಂಬಂಧವಾಗಿ ಹಲವಾರು ದಿನಗಳಿಂದಲೂ ಮಾತುಕತೆಗಳು ನಡೆಯುತ್ತಿದ್ದವು. ಇದೀಗ ಎಲ್ಲವೂ ಸ್ಪಷ್ಟವಾಗಿದೆ. ಈ ವಿದ್ಯಮಾನದಿಂದ ನಿರ್ಮಾಪಕ ತಿಲಕ್ ರಾಜ್ ಬಲ್ಲಾಳ್, ನಾಯಕ ನಟ ಝೈದ್ ಖಾನ್, ನಿರ್ದೇಶಕ ಜಯತೀರ್ಥ ಸೇರಿದಂತೆ ಒಂದಿಡೀ ಚಿತ್ರತಂಡವೇ ಖುಷಿಗೊಂಡಿದೆ. ಅಂದಹಾಗೆ, ಈ ಚಿತ್ರ ನವೆಂಬರ್ ನಾಲಕ್ಕನೇ ತಾರೀಕಿನಂದು ದೇಶಾದ್ಯಂತ ಅದ್ದೂರಿಯಾಗಿ ತೆರೆಗಾಣಲಿದೆ. ಕರ್ನಾಟಕದಲ್ಲಿಯೂ ಅತೀ ಹೆಚ್ಚಿನ ಚಿತ್ರಮಂದಿರಗಳಲ್ಲಿ ಬನಾರಸ್ ಅನ್ನು ಬತೆರೆಗಾಣಿಸಲು ಡಿ ಬೀಟ್ಸ್‌ಯೋಜನೆ ಹಾಕಿಕೊಂಡಿದೆ.

The post ಉತ್ತರ ಭಾರತದ ವಿತರಣಾ ಹಕ್ಕು ಪನೋರಮಾ ಮಡಿಲಿಗೆ! appeared first on ಶೋಧ ನ್ಯೂಸ್ - Shodha News.

ಹ್ಯಾಂಡ್ಸಮ್ ಹೀರೋ ಝೈದ್ ಖಾನ್ ನಾಯಕನಾಗಿ ಎಂಟ್ರಿಕೊಡುತ್ತಿರುವ ಬಹುನಿರೀಕ್ಷಿತ ಚಿತ್ರ ಬನಾರಸ್. ಜಯತೀರ್ಥ ನಿರ್ದೇಶನದಲ್ಲಿ ಮೂಡಿ ಬಂದಿರೋ ಈ ಸಿನಿಮಾ ಬಿಡುಗಡೆಗೆ ದಿನಗಣನೆ ಆರಂಭವಾಗಿದೆ. ಈ ಹೊತ್ತಿನಲ್ಲಿ ನಾನಾ ದಿಕ್ಕಿನಲ್ಲಿ ಈ ಚಿತ್ರದ ಬಗ್ಗೆ ಪ್ರೇಕ್ಷಕರ ವಲಯದಲ್ಲಿ ವ್ಯಾಪಕ ಚರ್ಚೆಗಳು ಹುಟ್ಟುಕೊಂಡಿವೆ. ಅದೆಲ್ಲದರ ಒಡ್ಡೋಲಗದಲ್ಲಿ ದಿನದಿಂದ ದಿನಕ್ಕೆ ಶೈನಪ್ ಆಗುತ್ತಾ ಸಾಗುತ್ತಿರುವ ಬನಾರಸ್ ಕಡೆಯಿಂದ ಒಂದರ ಹಿಂದೊಂದರಂತೆ ಖುಷಿಯ ಸಂಗತಿಗಳು ಜಾಹೀರಾಗುತ್ತಿವೆ. ಕೇರಳದ ಪ್ರಖ್ಯಾತ ಸಂಸ್ಥೆ ಬನಾರಸ್ ವಿತರಣಾ ಹಕ್ಕು ಖರೀದಿಸಿದ ಸುದ್ದಿ ಹೊರ ಬಿದ್ದ ಬೆನ್ನಲ್ಲಿಯೇ, ಕರ್ನಾಟಕದಲ್ಲಿ ವಿತರಣಾ ಹಕ್ಕುಗಳನ್ನು ಯಾವ ಸಂಸ್ಥೆ ಪಡೆದುಕೊಳ್ಳುತ್ತೆ ಅಂತೊಂದು ಪ್ರಶ್ನೆ ಮೂಡಿಕೊಂಡಿತ್ತು. ಅದಕ್ಕೀಗ ನಿಖರವಾದ ಉತ್ತರ ಸಿಕ್ಕಿದೆ!

ಶೈಲಜಾ ನಾಗ್ ಮತ್ತು ಬಿ ಸುರೇಶ್ ಒಡೆತನದ ಡಿ ಬೀಟ್ಸ್, ಬನಾರಸ್ ಚಿತ್ರದ ವಿತರಣಾ ಹಕ್ಕುಗಳನ್ನು ಖರೀದಿಸಿದೆ. ಈ ಸಂಸ್ಥೆಯ ಮೂಲಕವೇ ನವೆಂಬರ್ ನಾಲಕ್ಕರಂದು ಬನಾರಸ್ ಕರ್ನಾಟಕದ ಉದ್ದಗಲಕ್ಕೂ ಅದ್ದೂರಿಯಾಗಿ ಬಿಡುಗಡೆಗೊಳ್ಳಲಿದೆ. ಡಿ ಬೀಟ್ಸ್ ಕರ್ನಾಟಕದ ಮಟ್ಟಿಗೆ ಪ್ರತಿಷ್ಠಿತ ಸಂಸ್ಥೆ. ಅದರ ಕಡೆಯಿಂದ ಈಗಾಗಲೇ ಒಂದಷ್ಟು ಹಿಟ್ ಸಿನಿಮಾಗಳು ವಿತರಣೆಯಾಗಿವೆ. ಅಷ್ಟಕ್ಕೂ ಈ ಸಂಸ್ಥೆ ಎಲ್ಲ ದಿಕ್ಕಿನಿಂದಲೂ ಪರಾಮಾರ್ಶಿಸದ ಹೊರತಾಗಿ ಯಾವುದೇ ಸಿನಿಮಾಗಳ ವಿತರಣಾ ಹಕ್ಕುಗಳನ್ನು ಖರೀದಿಸೋದಿಲ್ಲ. ಅಂಥಾದ್ದೊಂದು ಗುಣಮಟ್ಟವನ್ನು ಕಾಯ್ದುಕೊಂಡಿರೋದರಿಂದಲೇ ಆ ಸಂಸ್ಥೆಯ ಕಡೆಯಿಂದ ಬಿಡುಗಡೆಯಾಗೋ ಚಿತ್ರ ಹಿಟ್ ಆಗುತ್ತೆಂಬ ನಂಬಿಕೆ ಮೂಡಿಕೊಂಡಿದೆ. ಇದುವೇ ಬನಾರಸ್ ಬಗೆಗಿನ ನಿರೀಕ್ಷೆ ಮತ್ತಷ್ಟು ನಿಗಿನಿಗಿಸುವಂತೆ ಮಾಡಿರೋದು ಸತ್ಯ.

ಇದೀಗ ಕರ್ನಾಟಕ ಮತ್ತು ಕೇರಳ ರಾಜ್ಯಗಳಲ್ಲಿ ಬನಾರಸ್ ಬಿಡುಗಡೆಯ ಹಾದಿ ಸುಗಮನವಾಗಿದೆ. ಇನ್ನುಳಿದ ಭಾಷೆಗಳಲ್ಲಿಯೂ ಕೂಡಾ ವಿತರಣಾ ಹಕ್ಕುಗಳನ್ನು ಪಡೆದುಕೊಳ್ಳಲು ಖ್ಯಾತ ಸಂಸ್ಥೆಗಳು ರೇಸಿನಲ್ಲಿವೆ. ದಿನದೊಪ್ಪೊತ್ತಿನಲ್ಲಿಯೇ ಆ ಬಗೆಗಿನ ಒಂದಷ್ಟು ಮಾಹಿತಿಗಳು ಹೊರಬೀಳಲಿವೆ. ಸದ್ಯ ನಾಯಕ ಝೈದ್ ಖಾನ್ ಪರಭಾಷೆಗಳಲ್ಲಿ ಬನಾರಸ್ ಪ್ರಚಾರ ಕಾರ್ಯದಲ್ಲಿ ಬ್ಯುಸಿಯಾಗಿದ್ದಾರೆ. ಸೋನಲ್ ಮೊಂತೇರೋ ಕೂಡಾ ಅವರಿಗೆ ಜೊತೆಯಾಗಿದ್ದಾರೆ. ಇದರೊಂದಿಗೆ ಟ್ರೈಲರ್ ಮತ್ತು ಹಾಡುಗಳು ಹಬ್ಬಿಸಿದ್ದ ಕ್ರೇಜ್ ಮತ್ತಷ್ಟು ತೀವ್ರಗೊಂಡಂತಾಗಿದೆ. ಇದೆಲ್ಲದರ ನಡುವೆ, ಬಿಡುಗಡೆಯ ಹೊಸ್ತಿಲಿನಲ್ಲಾಗುತ್ತಿರುವ ಸಕಾರಾತ್ಮಕ ಪಲ್ಲಟಗಳಿಂದ ನಿರ್ಮಾಪಕ ತಿಲಕ್ ಬಲ್ಲಾಳ್ ಸೇರಿದಂತೆ ಒಂದಿಡೀ ಚಿತ್ರತಂಡ ಖುಷಿಗೊಂಡಿದೆ.

The post ಕರುನಾಡಲ್ಲಿ ಅದ್ದೂರಿ ಬಿಡುಗಡೆಯ ಜವಾಬ್ದಾರಿ! appeared first on ಶೋಧ ನ್ಯೂಸ್ - Shodha News.

ಕನ್ನಡ ಚಿತ್ರರಂಗದ ಪಾಲಿಗೀಗ ಅಕ್ಷರಶಃ ಸಕಾರಾತ್ಮಕ ಪರ್ವವೊಂದು ಆರಂಭವಾಗಿದೆ. ಇದೀಗ ಚಿತ್ರರಂಗದತ್ತ ತಣ್ಣಗೊಮ್ಮೆ ಕಣ್ಣು ಹಾಯಿಸಿದರೆ ಹಾಯೆನಿಸುವಂಥಾ ವಾತಾವರಣವೇ ಮೇಳೈಸಿಕೊಂಡಿದೆ. ಬಿಡುಗಡೆಗೆ ಸಜ್ಜಾಗಿ ನಿಂತಿರುವ ಒಂದಷ್ಟು ಚಿತ್ರಗಳನ್ನು ಗಮನಿಸಿದರಂತೂ, ಒಂದರ ಹಿಂದೊಂದರಂತೆ ಹಿಟ್ ಆಗಬಲ್ಲ ಸಿನಿಮಾಗಳೇ ಸರತಿಯಲ್ಲಿ ನಿಂತಂತಿವೆ. ವಿಶೇಷವೆಂದರೆ, ಆ ಸಾಲಿನಲ್ಲಿ ಝೈದ್ ಖಾನ್ ನಾಯಕನಾಗಿ ನಟಿಸಿರುವ ಬನಾರಸ್ ಕೂಡಾ ಸೇರಿಕೊಂಡಿದೆ. ಜಯತೀರ್ಥ ನಿರ್ದೇಶನದ ಈ ಚಿತ್ರ ಈಗಾಗಲೇ ಟ್ರೈಲರ್‌ನೊಂದಿಗೆ ವ್ಯಾಪಕ ಪ್ರಚಾರ, ಅದಕ್ಕೆ ತಕ್ಕುದಾದ ನಿರೀಕ್ಷೆ ಮೂಡಿಸಿದೆ. ವಾರದ ಹಿಂದೆ ಬಿಡುಗಡೆಗೊಂಡಿದ್ದ ಬನಾರಸ್ ಟ್ರೈಲರ್ ಈಗ ಹತ್ತು ಮಿಲಿಯನ್ ವೀಕ್ಷಣೆಗಳಾಚೆಗೆ ದಾಪುಗಾಲಿಡಲಾರಂಭಿಸಿದೆ.

ಜಯತೀರ್ಥ ಚಿತ್ರವೆಂದ ಮೇಲೆ ಅದರತ್ತ ಕುತೂಹಲವೊಂದು ಹರಳುಗಟ್ಟಿಕೊಂಡು ಬಿಡುತ್ತೆ. ಯಾವಾಗ ಮಾಯಗಂಗೆ ಎಂಬ ಹಾಡು ಬಿಡುಗಡೆಗೊಂಡು ಇದೊಂದು ಪ್ರೇಮ ಕಥಾನಕ ಎಂಬ ವಿಚಾರ ಜಾಹೀರಾಯಿತೋ, ಆ ಕ್ಷಣದಿಂದಲೇ ನಿರೀಕ್ಷೆ ನೂರ್ಮಡಿಸಿತ್ತು. ಬನಾರಸ್ ಅನ್ನು ಪ್ರೇಕ್ಷಕರ ಆಸಕ್ತಿ ಕೇಂದ್ರದಲ್ಲಿ ಪ್ರತಿಷ್ಟಾಪಿಸಿದ್ದರ ಹಿಂದೆ ಮಾಯಗಂಗೆಯ ಪಾಲು ಬಹಳಷ್ಟಿದೆ. ಆ ಹಾಡಿನ ಮೂಲಕವೇ ಸಮ್ಮೋಹಕ ದಾಖಲೆ ಬರೆದಿದ್ದ ಬನಾರಸ್, ಟ್ರೈಲರ್ ಮೂಲಕ ಮತ್ತೆ ಮುನ್ನೆಲೆಗೆ ಬಂದು ನಿಂತಿದೆ. ಈ ಸಿನಿಮಾ ದೊಡ್ಡ ಮಟ್ಟದಲ್ಲಿ ಬಗೆಲುವು ದಾಖಲಿಸುತ್ತೆ, ಕನ್ನಡ ಚಿತ್ರರಂಗದ ಘನತೆಯನ್ನು ಮತ್ತೆ ಜಗತ್ತಿನ ಮುಂದೆ ಎತ್ತಿ ಹಿಡಿಯುತ್ತೆ ಎಂಬಂಥಾ ಗಾಢ ನಂಬಿಕೆ ಅಷ್ಟದಿಕ್ಕುಗಳತ್ತಲೂ ವ್ಯಾಪಿಸಿಕೊಂಡಿದೆ.

ವಾರದ ಹಿಂದೆ ಕ್ರೇಜಿಸ್ಟಾರ್ ರವಿಚಂದ್ರನ್ ಮತ್ತು ಬಾಲಿವುಡ್ ನಟ ಅರ್ಬಾಜ್ ಖಾನ್ ಸಮ್ಮುಖದಲ್ಲಿ ಬನಾರಸ್ ಟ್ರೈಲರ್ ಬಿಡುಗಡೆಗೊಂಡಿತ್ತು. ಈ ಟ್ರೈಲರ್ ನೋಡಿದ ಕ್ರೇಜಿಸ್ಟಾರ್ ಬಹುವಾಗಿ ಮೆಚ್ಚಿಕೊಂಡಿದ್ದರು. ನವ ನಾಯಕ ಝೈದ್ ಖಾನ್ ನಟನೆ ಮತ್ತು ಅದರ ಹಿಂದಿರುವ ಎಫರ್ಟ್‌ಗಳನ್ನೆಲ್ಲ ಮನಸಾರೆ ಕೊಂಡಾಡಿದ್ದರು. ದಿನದೊಪ್ಪತ್ತಿನಲ್ಲಿಯೇ ಕನಸುಗಾರನ ಮೆಚ್ಚುಗೆಗಳಿಗೆ ಕನ್ನಡವೂ ಸೇರಿದಂತೆ ಅನೇಕ ಭಾಷೆಗಳಿಂದ ಸಹಮತ ಕೇಳಿಬರಲಾರಂಭಿಸಿತ್ತು. ಅದರ ಫಲವಾಗಿಯೇ ಏಳೂ ಭಾಷೆಗಳಲ್ಲಿ ಈ ಟ್ರೈಲರ್‌ಗೆ ಮಿಲಿಯನ್ನುಗಟ್ಟಲೆ ವೀವ್ಸ್‌ಗಳು ಸಿಕ್ಕಿವೆ. ಅದು ಈ ಕ್ಷಣಕ್ಕೂ ಅತ್ಯಂತ ವೇಗವಾಗಿ ಏರುಗತಿ ಕಾಣುತ್ತಾ ಮುಂದುವರೆಯುತ್ತಿದೆ.

ಬನಾರಸ್ ಏಳು ಭಾಷೆಗಳಲ್ಲಿ ಏಕಕಾಲಕ್ಕೆ ತಯಾರುಗೊಂಡಿರುವ ಪ್ಯಾನಿಂಡಿಯಾ ಸಿನಿಮಾ. ಗಮನೀಯ ಸಂಗತಿಯೆಂದರೆ, ಝೈದ್ ಖಾನ್ ಮೊದಲ ಹೆಜ್ಜೆಯಲ್ಲಿಯೇ ಪ್ಯಾನಿಂಡಿಯಾ ಲೆವೆಲ್ಲಿನಲ್ಲಿ ನಾಯಕನಾಗಿ ಎಂಟ್ರಿ ಕೊಡುತ್ತಿದ್ದಾರೆ. ಇದು ಯಾವ ನಟರ ಪಾಲಿಗಾದರೂ ಅಕ್ಷರಶಃ ಸವಾಲಿನ ಸಂಗತಿ. ಅದಕ್ಕೆ ಸಾಕಷ್ಟು ಪೂರ್ವ ತಯಾರಿ ಬೇಕಾಗುತ್ತದೆ. ಅಂಥಾ ಸರ್ವ ತಯಾರಿಯನ್ನೂ ಮಾಡಿಕೊಂಡೇ ಝೈದ್ ಅಖಾಡಕ್ಕಿಳಿದಿದ್ದಾರೆ. ಆರಂಭದಲ್ಲಿ ಅವರ ಹಿನ್ನೆಲೆಯ ಕಾರಣದಿಂದ ಒಂದಷ್ಟು ಮಂದಿ ಕುಹಕವಾಡಿದ್ದದ್ದು ನಿಜ. ಆದರೆ ಟ್ರೈಲರ್ ನೋಡಿದ ಪ್ರತಿಯೊಬ್ಬರಿಗೂ ಕೂಡಾ ಝೈದ್ ಖಾನ್ ಬನಾರಸ್ ಚಿತ್ರಕ್ಕಾಗಿ ಮಾಡಿಕೊಂಡಿರುವ ತಯಾರಿ ಎಂಥಾದ್ದೆಂಬುದರ ಅರಿವಾಗಿದೆ. ನೋಡಿದವರೆಲ್ಲ ಝೈದ್ ಬಗ್ಗೆ ವೀಶೆಷವಾಗಿ ಭರವಸೆಯ ಮಾತುಗಳನ್ನಾಡುತ್ತಿದ್ದಾರೆ. ಅಂದಹಾಗೆ, ಬನಾರಸ್ ಇದೇ ನವೆಂಬರ್ ನಾಲಕ್ಕರಂದು ಬಿಡುಗಡೆಗೊಳ್ಳಲಿದೆ.

The post ನವನಾಯಕ ಝೈದ್ ಖಾನ್ ಬಗ್ಗೆ ನಿಗಿನಿಗಿಸಿತು ನಿರೀಕ್ಷೆ! appeared first on ಶೋಧ ನ್ಯೂಸ್ - Shodha News.

ಝೈದ್ ಖಾನ್ ನಾಯಕನಾಗಿ ನೆಲೆಗೊಳ್ಳೋ ಲಕ್ಷಣ!
ಒಂದು ಸಿನಿಮಾ ಹೇಗೆ ಹಂತ ಹಂತವಾಗಿ ಪ್ರೇಕ್ಷಕರ ಮನಸಿಗೆ ಹತ್ತಿರಾಗಬಹುದು, ಹೇಗೆಲ್ಲ ಜನಮಾನಸವನ್ನು ಇಡಿಯಾಗಿ ಆವರಿಸಿಕೊಳ್ಳಬಹುದೆಂಬುದಕ್ಕೆ ಇತ್ತೀಚಿನ ತಾಜಾ ನಿದರ್ಶನವಾಗಬಲ್ಲ ಚಿತ್ರ ಬನಾರಸ್. ಅಷ್ಟಕ್ಕೂ ಒಡಲೊಳಗೆ ಗಟ್ಟಿಯಾದುದ್ದೇನನ್ನೋ ಬಚ್ಚಿಟ್ಟುಕೊಂಡ ಚಿತ್ರವೊಂದು ಮಾತ್ರವೇ ಹೀಗೆ ಸದ್ದು ಮಾಡಲು ಸಾಧ್ಯ. ಅಂಥಾದ್ದೊಂದು ಅಚಲವಾದ ಭರವಸೆಯನ್ನು ಪ್ರೇಕ್ಷಕರ ಮನಸಲ್ಲಿ ಪ್ರತಿಷ್ಟಾಪಿಸಿದ್ದ ಬನಾರಸ್, ಈಗಾಗಲೇ ಹಾಡಿನ ಮೂಲಕ ಮಾಡಿರುವ ಮೋಡಿ ಸಣ್ಣದೇನಲ್ಲ. ಇದೆಲ್ಲದರಿಂದಾಗಿ ಬನಾರಸ್‌ನ ಮತ್ತಷ್ಟು ಅಚ್ಚರಿಗಳನ್ನು ಕಣ್ತುಂಬಿಕೊಳ್ಳಲು ಪ್ರೇಕ್ಷಕರು ಕಾತರರಾಗಿದ್ದರು; ಟ್ರೈಲರ್‌ಗಾಗಿ ಕಾದು ಕೂತಿದ್ದರು. ಕಡೆಗೂ ಆ ಕ್ಷಣವೀಗ ಕೂಡಿ ಬಂದಿದೆ. ಬನಾರಸ್‌ನ ಬಹುನಿರೀಕ್ಷಿತ ಟ್ರೈಲರ್ ಬಿಡುಗಡೆಗೊಂಡಿದೆ!

ಗಂಗೆಯ ಸೆರಗಿಂದ ಗರಿಬಿಚ್ಚಿಕೊಳ್ಳುವ ಈ ಟ್ರೈಲರ್ ಗಹನವಾದ ಕಥೆಯೊಂದರ ಸುಳಿವನ್ನು ನಿಖರವಾಗಿಯೇ ಬಿಟ್ಟು ಕೊಟ್ಟಿದೆ. ಅದ್ಭುತ ಪ್ರೇಮಕಥಾನಕದ ಜೊತೆ ಜೊತೆಗೇ, ಮೈನವಿರೇಳಿಸೋ ಅಂಶಗಳೊಂದಿಗೆ ಮೂಡಿ ಬಂದಿರುವ ಈ ಟ್ರೈಲರ್ ಒಂದೇ ಸಲಕ್ಕೆ ಎಲ್ಲ ವರ್ಗದ ಪ್ರೇಕ್ಷಕರಿಗೂ ಹಿಡಿಸುವಂತಿದೆ. ಪ್ರೇಮವೆಂಬುದು ಎಷ್ಟು ಸಲ ದೃಷ್ಯಕ್ಕೆ ಒಗ್ಗಿಸಿದರೂ ಮಾಸಲಾಗದ ಮಾಯೆ. ಅದರಲ್ಲಿಯೂ ನವಿರುಪ್ರೇಮವನ್ನು ಸಿನಿಮಾ ಫ್ರೇಮಿನಲ್ಲಿ ವಿಭಿನ್ನವಾಗಿ ಹಿಡಿದಿಡುವಲ್ಲಿ ಜಯತೀರ್ಥ ನಿಸ್ಸೀಮರು. ಬನಾರಸ್ ವಿಚಾರದಲ್ಲಿಯೂ ಅವರ ನಿರ್ದೇಶನ ಮತ್ತೆ ಗೆಲ್ಲುವ ಸ್ಪಷ್ಟ ಕುರುಹುಗಳು ಕಾಣಿಸಿವೆ. ನವಿರಾದ ಭಾವವೊಂದನ್ನು ಎದೆಗೆ ನಾಟಿಸುತ್ತಲೇ, ಮೈ ನಡುಗುವ ಅಂಶಗಳೂ ಬನಾರಸ್ ಒಳಗಿದೆ ಎಂದೆ ಸಂದೇಶವನ್ನು ಸದರಿ ಟ್ರೈಲರ್ ಪರಿಣಾಮಕಾರಿಯಾಗಿಯೇ ದಾಟಿಸಿದೆ.

ಈ ಟ್ರೈಲರ್ ನೋಡಿದ ಪ್ರತಿಯೊಬ್ಬರಲ್ಲಿಯೂ ಬನಾರಸ್‌ನೆಡೆಗಿನ ಕೌತುಕ ಆಯಾಚಿತವಾಗಿ ಆವರಿಸಿಕೊಳ್ಳುತ್ತೆ. ಈ ಚಿತ್ರದಲ್ಲಿ ಝೈದ್ ಖಾನ್ ಎಂಥಾ ಪಾತ್ರ ಮಾಡಿದ್ದಾರೆ? ಸೋನಲ್ ಮೊಂತೇರೋ ಪಾತ್ರದ ಚಹರೆಗಳೇನು? ಒಟ್ಟಾರೆ ಕಥೆ ಯಾವ ಬಗೆಯದ್ದು? ಹೀಗೆ ನಾನಾ ಆಯಾಮಗಳಲ್ಲಿ ಪ್ರಶ್ನೆಗಳು ಚಿಗಿತುಕೊಂಡಿದ್ದವು. ಅದೆಲ್ಲದಕ್ಕೂ ಈ ಟ್ರೈಲರ್‌ನಲ್ಲಿ ಉತ್ತರಗಳಿದ್ದಾವೆ. ಹಾಗೆ ಸಿಕ್ಕ ಜವಾಬುಗಳೇ ಮತ್ತೊಂದಷ್ಟು ದಿಕ್ಕುಗಳಲ್ಲಿ ಚರ್ಚೆ ಹುಟ್ಟುಹಾಕುವಂತಿರೋದು ಈ ಟ್ರೈಲರ್‌ನ ನಿಜವಾದ ಹೆಚ್ಚುಗಾರಿಕೆ. ಅದರಲ್ಲಿಯೂ ವಿಶೇಷವಾಗಿ, ಝೈದ್ ಖಾನ್ ಈ ಸಿನಿಮಾ ಮೂಲಕವೇ ನಾಯಕನಾಗಿ ಎಂಟರಿ ಕೊಡುತ್ತಿದ್ದಾರೆ. ಆದ್ದರಿಂದ ಅವರ ಪಾತ್ರದ ಸುತ್ತಲೇ ಕುತೂಹಲವೆಂಬುದು ಗಿರಕಿ ಹೊಡೆಯುತ್ತಿತ್ತು. ಅವರು ಲವರ್ ಬಾಯ್ ಸೇರಿದಂತೆ, ನಾನಾ ಶೇಡುಗಳಿರುವ ಚೆಂದದ ಪಾತ್ರಕ್ಕೆ ಜೀವ ತುಂಬಿದ್ದಾರೆಂಬ ವಿಚಾರವನ್ನೂ ಈ ಟೃಲರ್ ಜಾಹೀರಾಗಿಸಿದೆ.

ಬನಾರಸ್ ಪ್ಯಾನಿಂಡಿಯಾ ಚಿತ್ರ. ಆ ಗತ್ತು ಗೈರತ್ತು ಮತ್ತು ಜವಾಬ್ದಾರಿಗಳನ್ನು ಸಮರ್ಥವಾಗಿ ನಿಭಾಯಿಸುವಂತೆ ಈ ಚಿತ್ರದ ಕಥೆಯಿದೆ ಎಂಬ ವಿಚಾರವೂ ಈ ಟ್ರೈಲರ್ ನೋಡಿದವರಿಗೆಲ್ಲ ಮನದಟ್ಟಾಗುತ್ತದೆ. ಝೈದ್ ಖಾನ್ ನಿಸ್ದಸಂಶಯವಾಗಿಯೂ ಸಮರ್ಥ ನಾಯಕನಾಗಿ ನೆಲೆ ಕಂಡುಕೊಳ್ಳುತ್ತಾರೆಂಬ ನಂಬಿಕೆ ಕೂಡಾ ತಾನೇ ತಾನಾಗಿ ಮೂಡಿಕೊಳ್ಳುತ್ತೆ. ಯಾಕೆಂದರೆ, ಅವರಲ್ಲೊಬ್ಬ ಪಳಗಿದ ಕಲಾವಿದ ಪ್ರತಿಯೊಬ್ಬರಿಗೂ ಗೋಚರಿಸಿದ್ದಾನೆ. ಒಟ್ಟಾರೆಯಾಗಿ ತಿಲಕ್ ರಾಜ್ ಬಲ್ಲಾಳ್ ನಿರ್ಮಾಣದ ಬನಾರಸ್, ಸರ್ವ ರೀತಿಯಲ್ಲಿಯೂ ಶ್ರೀಮಂತವಾಗಿ ಮೂಡಿ ಬಂದಿದೆ. ಅದು ಕನ್ನಡ ಮಾತ್ರವಲ್ಲದೇ, ಬೇರೆ ಭಾಷೆಗಳಲ್ಲಿಯೂ ಗೆಲುವಿನ ಭಾಷ್ಯ ಬರೆಯುತ್ತದೆಂಬ ನಂಬಿಕೆಯನ್ನು ಈ ಟ್ರೈಲರ್ ಗಟ್ಟಿಯಾಗಿಸಿದೆ!

The post ಬಿಡುಗಡೆಯಾದ ಟ್ರೈಲರ್ ಭರವಸೆ ಮೂಡಿಸಿತು! appeared first on ಶೋಧ ನ್ಯೂಸ್ - Shodha News.

ಎಲ್ಲವೂ ನಿರೀಕ್ಷೆಯಂತೆಯೇ ಘಟಿಸುತ್ತಿರುವ ಅಪಾರ ಖುಷಿ ಬನಾರಸ್ ಚಿತ್ರತಂಡವನ್ನು ತಬ್ಬಿಕೊಂಡಿದೆ. ಓರ್ವ ನವ ನಾಯಕನ ಚಿತ್ರವೊಂದು ಈ ಪರಿಯಾಗಿ, ತಾನೇತಾನಾಗಿ ಸೌಂಡು ಮಾಡಲು ಸಾಧ್ಯವಾ ಅತೊಂದು ಅಚ್ಚರಿ ಮೂಡುವಂತೆ ಬನಾರಸ್ ಟಾಕ್ ಕ್ರಿಯೇಟ್ ಮಾಡುತ್ತಿದೆ. ಗಮನೀಯ ಅಂಶವೆಂದರೆ, ಇಂಥಾದ್ದೊಂದು ಸಕಾರಾತ್ಮಕ ವಾತಾವರಣಕ್ಕೆ ಕಾರಣವಾಗಿರೋದು ಚೆಂದದ ಹಾಡುಗಳ ಹಂಗಾಮಾ. ಇತ್ತೀಚೆಗಷ್ಟೇ ಬಿಡುಗಡೆಗೊಂಡಿದ್ದ ಮಾಯಗಂಗೆ ಎಂಬ ಹಾಡನ್ನು ಬಹುತೇಕರು ಮತ್ತೆ ಮತ್ತೆ ಕೇಳುತ್ತಾ ಸುಖಿಸುತ್ತಿದ್ದಾರೆ. ಈ ಕಾರಣದಿಂದಲೇ ಅದು ದೊಡ್ಡ ಮಟ್ಟದಲ್ಲಿ ಟ್ರೆಂಡ್ ಸೆಟ್ ಮಾಡಿದೆ. ಆ ಮೆಲೋಡಿಯ ಮಾಧುರ್ಯವಿನ್ನೂ ಚಾಲ್ತಿಯಲ್ಲಿರುವಾಗಲೇ, ಟಪ್ಪಾಂಗುಚ್ಚಿ ಶೈಲಿಯ ಮತ್ತೊಂದು ಲಿರಿಕಲ್ ವೀಡಿಯೋ ಸಾಂಗ್ ಬಿಡುಗಡೆಗೊಂಡಿದೆ.

ನಿರ್ದೇಶಕ ಜಯತೀರ್ಥ ಸಿನಿಮಾ ಅಂದ ಮೇಲೆ ಅಲ್ಲಿ ಮತ್ತೆ ಮತ್ತೆ ಕೇಳುವಂಥಾ ಹಾಡುಗಳ ಹಾಜರಿ ಇದ್ದೇ ಇರುತ್ತದೆ. ಹಾಗೊಂದು ನಂಬಿಕೆ ಪ್ರೇಕ್ಷಕ ವಲಯದಲ್ಲಿ ಪಡಿಮೂಡಿಕೊಂಡಿದೆ. ಆ ನಂಬಿಕೆ ಬನಾರಸ್ ಮೂಲಕ ಮತ್ತಷ್ಟು ಹೊಳಪುಗಟ್ಟಿಕೊಂಡಿದೆ. ಈ ಹಿಂದೆ ಮಾಯಗಂಗೆ ಹಾಡು ಬರೆದಿದ್ದ ವಿ. ನಾಗೇಂದ್ರ ಪ್ರಸಾದ್ ಅವರೇ ಈಗ ಬಿಡುಗಡೆಯಾಗಿರೋ ಟ್ರೋಲ್ ಸಾಂಗಿಗೂ ಸಾಹಿತ್ಯ ಒದಗಿಸಿದ್ದಾರೆ. ಈಗಿನ ದಿನಮಾನದ ಟ್ರೆಂಡಿಗೆ ತಕ್ಕುದಾದಂಥಾ ಸಾಹಿತ್ಯವಿರೋ ಈ ಹಾಡಿಗೆ ಸಂಗೀತ ಸಂಯೋಜನೆ ಮಾಡಿರುವ ಅಜನೀಶ್ ಲೋಕನಾಥ್ ಅವರೇ ಸದರಿ ಹಾಡಿಗೆ ಧ್ವನಿಯಾಗಿದ್ದಾರೆ. ಒಟ್ಟಾರೆಯಾಗಿ ಒಂದೇ ಸಲಕ್ಕೆ ಇಷ್ಟವಾಗುವ ರೀತಿಯಲ್ಲಿದು ಮೂಡಿ ಬಂದಿದೆ. ನಿಸ್ಸಂದೇಹವಾಗಿ ಈ ಹಾಡೂ ಕೂಡಾ ಟ್ರೆಂಡ್ ಸೆಟ್ ಮಾಡೋದು ಪಕ್ಕಾ.

ವಿಶೇಷವಾಗಿ, ಈ ಹಾಡಿನಲ್ಲಿ ಝೈದ್ ಖಾನ್ ಗಮನ ಸೆಳೆಯುತ್ತಾರೆ. ಅವರ ಪಾತ್ರದ ಪ್ರಧಾನ ಶೇಡೊಂದು ಈ ಮೂಲಕವೇ ಜಾಹೀರಾದಂತಿದೆ. ಸಾಮಾನ್ಯವಾಗಿ ಹಣವಂತರ ಮಕ್ಕಳು ಹೀರೋ ಆದಾಗ ಅದೊಂದು ಥರದ ಮೂದಲಿಕೆಯೇ ಮೊದಲು ಕಾಣ ಸಿಗುತ್ತೆ. ಆದರೆ, ಬೇಕಾದಂಥಾ ಕಲಿಕೆ, ಸಮರ್ಪಣಾ ಮನೋಭಾವ ಇಲ್ಲದ ಯಾರನ್ನೂ ಸಿನಿಮಾ ಜಗತ್ತು ಅಪ್ಪಿಕೊಳ್ಳೋದಿಲ್ಲ. ಯಾಕೆಂದರೆ ಕಲೆಗೆ ಕಾಸಿನ ನಂಟಿಲ್ಲ. ಅದಕ್ಕಿರೋದು ಪ್ರತಿಭೆ, ಪರಿಶ್ರಮಗಳ ಪರಿಚಯವಷ್ಟೇ. ಇದನ್ನು ನಿಖರವಾಗಿಯೇ ಅರ್ಥೈಸಿಕೊಂಡಿದ್ದ ಝೈದ್ ಖಾನ್, ನಟನಾಗಲು ಸಾಕಷ್ಟು ಶ್ರಮ ವಹಿಸಿದ್ದಾರೆ. ಎಲ್ಲದರಲ್ಲಿಯೂ ಪಳಗಿಕೊಂಡಿದ್ದಾರೆ. ಅದರ ಲಕ್ಷಣಗಳು ಹಾಡುಗಳ ಮೂಲಕ ಸ್ಪಷ್ಟವಾಗಿಯೇ ಗೋಚರಿಸಿವೆ.

ಇದು ಕನ್ನಡ ಚಿತ್ರರಂಗದ ಪಾಲಿಗೆ ಹೊಸತನದ ಶಖೆಯೊಂದು ಆರಂಭವಾಗಿರುವ ಕಾಲ. ಅದನ್ನು ಮತ್ತಷ್ಟು ತೀವ್ರವಾಗಿಸುವಂತೆ ಬನಾರಸ್ ಮೂಡಿ ಬಂದಿದೆ. ಇದು ಏಕಕಾಲದಲ್ಲಿಯೇ ಐದು ಭಾಷೆಗಳಲ್ಲಿ ತಯಾರುಗೊಂಡಿರುವ ಪ್ಯಾನಿಂಡಿಯಾ ಚಿತ್ರ. ಇದೇ ನವೆಂಬರ್ ನಾಲಕ್ಕರಂದು ತೆರೆಗಾಣಲಿರುವ ಬನಾರಸ್ ಅನ್ನು ತಿಲಕ್ ರಾಜ್ ಬಲ್ಲಾಳ್ ಬಲು ಆಸ್ಥೆಯಿಂದ ನಿರ್ಮಾಣ ಮಾಡಿದ್ದಾರೆ. ಸೋನಲ್ ಮಂತೇರೋ ಮಹತ್ವದ ಚಹರೆಗಳಿರುವ ಪಾತ್ರದಲ್ಲಿ, ನಾಯಕಿಯಾಗಿ ನಟಿಸಿದ್ದಾರೆ. ಇನ್ನುಳಿದಂತೆ ಸುಜಯ್ ಶಾಸ್ತ್ರಿ, ದೇವರಾಜ್, ಅಚ್ಯುತ್ ಕುಮಾರ್, ಸಪ್ನಾ ರಾಜ್, ಬರ್ಖತ್ ಅಲಿ ಮುಂತಾದವರು ಪ್ರಧಾನ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಭರ್ಜರಿ ಕಥಾನಕದೊಂದಿಗೆ ಈ ಸಿನಿಮಾ ತಿಂಗಳೊಪ್ಪತ್ತಿನಲ್ಲಿಯೇ ಪ್ರೇಕ್ಷಕರ ಮುಂದೆ ಅವತರಿಸಲಿದೆ.

The post ಟ್ರೆಂಡಿಂಗ್ ಹಾದಿಯಲ್ಲಿ ಲಿರಿಕಲ್ ವೀಡಿಯೋ ಸಾಂಗ್! appeared first on ಶೋಧ ನ್ಯೂಸ್ - Shodha News.

ದೇವರೂರಿನ ದಾರಿಹೋಕನ ಮೋಹಕ ಪ್ರೇಮಕಥೆ!
ಝೈದ್ ಖಾನ್ ನಾಯಕನಾಗಿ ಆಗಮಿಸುತ್ತಿರುವ ಬಹುನಿರೀಕ್ಷಿತ ಚಿತ್ರ ಬನಾರಸ್. ಜಯತೀರ್ಥ ನಿರ್ದೇಶನದ ಈ ಸಿನಿಮಾ ಟೈಟಲ್ ಲಾಂಚ್ ಆದಂದಿನಿಂದಲೇ ನಾನಾ ಥರದಲ್ಲಿ ನಿರೀಕ್ಷೆ ಮೂಡಿಸಿತ್ತು. ಆ ನಂತರದಲ್ಲಿ ಕಲಾವಿದನ ಕುಂಚದಲ್ಲರಳಿದ ಅಮೂರ್ತ ಚಿತ್ತಾರದಂಥಾ ಪೋಸ್ಟರ್‌ಗಳ ಮೂಲಕ ಬನಾರಸ್ ಸೃಷ್ಟಿಸಿದ್ದ ಸಂಚಲನವಿದೆಯಲ್ಲಾ? ಅದು ಸಾಮಾನ್ಯವಾದುದೇನಲ್ಲ. ಆ ಬಳಿಕ ತನ್ನ ಪಾಡಿಗೆ ತಾನು ಚಿತ್ರೀಕರಣದಲ್ಲಿ ತಲ್ಲೀನವಾಗಿ, ಚಿತ್ರೀಕರಣ ಪೂರೈಸಿಕೊಂಡಿರುವ ಬನಾರಸ್ ಇದೀಗ ಚೆಂದದ ಹಾಡೊಂದರ ಮೂಲಕ ಚರ್ಚೆ ಹುಟ್ಟು ಹಾಕಿದೆ. ಪ್ರೇಮವೆಂಬೋ ಧ್ಯಾನವನ್ನು, ದೈವೀಕ ಸುಗಂಧದಲ್ಲಿ ಸುತ್ತುವರೆದಂತಿರೋ ಈ ಹಾಡೀಗ ಟ್ರೆಂಡಿಂಗ್‌ನಲ್ಲಿದೆ. ಹೆಚ್ಚೆಚ್ಚು ವೀಕ್ಷಣೆ ಪಡೆದುಕೊಳ್ಳುತ್ತಾ ದಾಖಲೆಯ ಹಾದಿಯತ್ತ ದಾಪುಗಾಲಿಡುತ್ತಿದೆ.

ಜಯತೀರ್ಥ ಒಂದು ಸಿನಿಮಾವನ್ನು ಕೈಗೆತ್ತಿಕೊಂಡರೆಂದರೆ ಸಹಜವಾಗಿಯೇ ಅದರತ್ತ ಪ್ರೇಕ್ಷಕರ ಚಿತ್ತ ಕದಲಿಬಿಡುತ್ತೆ. ಅದರಲ್ಲಿಯೂ ಬನಾರಸ್ ಒಂದು ವಿಶಿಷ್ಟ ಪ್ರೇಮ ಕಾವ್ಯವೆಂಬಂಥಾ ಸುಳಿವು ಸಿಕ್ಕಾಕ್ಷಣವೇ ಭರವಸೆ ಇಮ್ಮಡಿಗೊಂಡಿತ್ತು. ಯಾಕೆಂದರೆ ಅಂತಾರಾಜ್ಯ ಪ್ರೇಮ್‌ಕಹಾನಿಯ ಕಥೆ ಹೊಂದಿದ್ದ ಒಲವೇ ಮಂದಾರ ಚಿತ್ರವನ್ನು ಜಯತೀರ್ಥ ನಿರ್ದೇಶನ ಮಾಡಿದ್ದ ಪರಿಯೇ ಅಂಥಾದ್ದಿದೆ. ಬನಾರಸ್‌ನಲ್ಲಿಯೂ ಕೂಡಾ ಅದೆಲ್ಲವನ್ನೂ ಮೀರಿಸುವ ಪ್ರೇಮಕಥೆ ಇದೆ ಎಂಬುದಕ್ಕೆ ಈಗ ಬಿಡುಗಡೆಗೊಂಡಿರೋ ಮಾಯಗಂಗೆ ಹಾಡಿಗಿಂತಲೂ ಬೇರೆ ಸಾಕ್ಷಿ ಬೇಕಿಲ್ಲ. ಮಾಯಗಂಗೆ ಮಾಯಗಂಗೆ ಮೌನಿಯಾದಳೇ ಅಂತ ಗಂಗೆಯ ತಟದಿಂದ ತೆರೆದುಕೊಳ್ಳುವ ಈ ಹಾಡು ಒಂದೇ ಸಲಕ್ಕೆ ಮನಸಿಗೆ ತಾಕುತ್ತದೆ. ಆ ಸಂಗೀತ ಒಳಗಿಳಿದು, ಸಾಹಿತ್ಯವೂ ಅಲ್ಲಿಯೇ ಜಿನುಗಲಾರಂಭಿಸುತ್ತದೆ. ಅಷ್ಟರ ಮಟ್ಟಿಗೆ ಈ ಹಾಡು ಪರಿಣಾಮಕಾರಿಯಾಗಿ ಮೂಡಿ ಬಂದಿದೆ.

ಇಂಥಾದ್ದೊಂದು ಸಾಹಿತ್ಯವನ್ನು ಕಥೆಗೆ ಪೂರಕವಾಗಿ ರಚಿಸಿ, ಅಚ್ಚರಿ ಮೂಡಿಸಿದವರು ವಿ. ನಾಗೇಂದ್ರ ಪ್ರಸಾದ್. ಅವರು ಆಗಾಗ ಇಂಥಾ ಸಾಲುಗಳ ಮೂಲಕ ಪ್ರೇಕ್ಷಕರನ್ನು ಮುಖಾಮುಖಿಯಾಗುತ್ತಿರುತ್ತಾರೆ. ಅವರ ಇದುವರೆಗಿನ ಹಿಟ್ ಲಿಸ್ಟುಗಳಲ್ಲಿ ಈ ಹಾಡೂ ಕೂಡಾ ನಿಸ್ಸಂಶಯವಾಗಿ ದಾಖಲಾಗುತ್ತದೆ. ಇನ್ನುಳಿದಂತೆ ಸಂಗೀತ ನಿರ್ದೇಶಕ ಅಜನೀಶ್ ಲೋಕನಾಥ್ ಸಂಗೀತವೂ ಮೋಹಕವಾಗಿದೆ. ಇದೆಲ್ಲವೂ ಗಂಗೆಯ ಸೆರಗಿನ ಸುಂದರ ವಾತಾವರಣದಲ್ಲಿ ಮತ್ತಷ್ಟು ಚೆಂದಗಂಡಿದೆ. ಈ ಹಾಡಿನ ದೃಷ್ಯಗಳ ಮೂಲಕವೇ ಕಥೆಯ ಬಗೆಗೊಂದು ಕುತೂಹಲ ಮೊಳೆಯುವಂತೆ ಮಾಡೋ ಜಾಣ್ಮೆಯನ್ನೂ ನಿರ್ದೇಶಕರು ತೋರಿಸಿದ್ದಾರೆ. ಒಟ್ಟಾರೆಯಾಗಿ ಈ ಹಾಡು ಇತ್ತೀಚಿನ ದಿನಗಳಲ್ಲಿ ಹೊಸಾ ಫೀಲ್ ಹುಟ್ಟಿಸುವ ಮೂಲಕ ಎಲ್ಲರಿಂದಲೂ ಗುನುಗುನಿಸಿಕೊಳ್ಳುತ್ತಿದೆ.

ಈ ಮೂಲಕ ನಾಯಕ ಝೈದ್ ಖಾನ್ ಲವರ್ ಬಾಯ್ ಆಗಿ ಕಂಗೊಳಿಸಿದ್ದಾರೆ. ಇದರೊಂದಿಗೆ ಕನ್ನಡ ಚಿತ್ರರಂಗಕ್ಕೊಬ್ಬ ಹ್ಯಾಂಡ್ಸಂಮ್ ಹೀರೋನ ಎಂಟ್ರಿಯಾದಂತಾಗಿದೆ. ಆತನಿಗೆ ನಾಯಕಿಯಾಗಿ ಕರಾವಳಿಯ ಹುಡುಗಿ ಸೋನಲ್ ಮಂತೇರೋ ಸಾಥ್ ಕೊಟ್ಟಿದ್ದಾರೆ. ಈ ಚಿತ್ರವನ್ನು ಬಲು ಪ್ರೀತಿಯಿಂದ ತಿಲಕ್ ರಾಜ್ ಬಲ್ಲಾಳ್ ನಿರ್ಮಾಣ ಮಾಡಿದ್ದಾರೆ. ದೇವರಾಜ್, ಸುಜಯ್ ಶಾಸ್ತ್ರಿ, ಅಚ್ಯುತ್ ಕುಮಾರ್ ಮುಂತಾದವರ ದೊಡ್ಡ ತಾರಾಗಣ ಈ ಚಿತ್ರಕ್ಕಿದೆ. ಕೆ.ಎಂ ಪ್ರಕಾಶ್ ಸಂಕಲನ, ಅದ್ವೈತ್ ಗುರುಮೂರ್ತಿ ಛಾಯಾಗ್ರಹಣ, ಡಿಫರೆಂಟ್ ಡ್ಯಾನಿ ಸಾಹಸ, ರಘು ನಿಡುವಳ್ಳಿ ಸಂಭಾಷಣೆಗಳಿಂದ ಬನಾರಸ್ ಕಳೆಗಟ್ಟಿಕೊಂಡಿದೆ. ಈಗ ಬಿಡುಗಡೆಯಾಗಿರೋ ಮಾಯಗಂಗೆ ಹಾಡು ಹಿಂದಿ ಸೇರಿದಂತೆ ಒಂದಷ್ಟು ಭಾಷೆಗಳಲ್ಲಿಯೂ ಹಂತ ಹಂತವಾಗಿ ಬಿಡುಗಡೆಗೊಳ್ಳಲಿದೆ. ಐದು ಭಾಷೆಗಳಲ್ಲಿ ತಯಾರಾಗಿರುವ ಪ್ಯಾನಿಂಡಿಯಾ ಸಿನಿಮಾ ಬನಾರಸ್ ಇದೀಗ ಬಿಡುಗಡೆಯ ಹಾದಿಯಲ್ಲಿದೆ.

The post ಲವರ್ ಬಾಯ್ ಆಗಿ ಕಂಗೊಳಿಸಿದ ಝೈದ್ ಖಾನ್! appeared first on ಶೋಧ ನ್ಯೂಸ್ - Shodha News.