ಅತ್ತ ದರ್ಶನ್ ನಿಂತರೂ, ಕುಂತರೂ ವಿವಾದವೇಳುತ್ತಿದೆ. ಹಾಗೆ ನೋಡಿದರೆ, ಕ್ರಾಂತಿ ಚಿತ್ರದ ಶುರುವಾತಿನಿಂದ ಹಿಡಿದು ಇಲ್ಲಿಯವರೆಗೂ ವಿವಾದಗಳ ಮೆರವಣಿಗೆಯೇ ಮೂಡಿಕೊಂಡಿದೆ. ಇದೀಗ ಇಂಥಾ ವಿವಾದವೆಂಬುದು ಕ್ರಾಂತಿಯ ನಾಯಕಿ ರಚಿತಾ ರಾಮ್ ಹೆಗಲೇರಿಕೊಂಡಿದೆ. ಒಂದು ವಿನಮ್ರವಾದ ತಪ್ಪೊಪ್ಪಿಗೆಯ ಮೂಲಕ ರಚಿತಾ ಇದೊಂದು ವಿವಾದದ ಸ್ವರೂಪ ಪಡೆಯೋದನ್ನು ತಡೆಯೋ ದಾರಿಗಳಿದ್ದವು. ಆದರಾಕೆ, ಹೆಗಲೇರಿದ್ದ ವಿವಾದವನ್ನು ಮೊಂಡು ಮಾತುಗಳ ಮೂಲಕ ಕೊಡವಿಕೊಳ್ಳಲು ನೋಡಿದಳು. ಅದರ ಫಲವಾಗಿಯೇ ಅದೀಗ ರಚಿತಾಳ ನೆತ್ತಿಗೇರಿ ಕೂರುವಂತಾಗಿದೆ!

ಸಾಮಾನ್ಯವಾಗಿ, ಸೆಲೆಬ್ರಿಟಿ ಅಂದುಕೊಂಡವರಿಗೆ ಸಾಮಾನ್ಯ ಜ್ಞಾನವಿರುವುದು ಕಡಿಮೆ. ಆದರೆ, ಪ್ರಸ್ತುತ ವಿದ್ಯಮಾನಗಳನ್ನು ಅರಿತುಕೊಂಡು, ಇತಿಹಾಸ, ದೇಶ, ಸಂವಿಧಾನ, ಕಾನೂನುಗಳ ಬಗ್ಗೆ ತೆಳುವಾಗಿಯಾದರೂ ಒಂದಷ್ಟು ತಿಳುವಳಿಕೆ ಹೊಂದಿರೋದು ಅವಶ್ಯಕ. ಅದರಲ್ಲಿಯೂ ಸಾರ್ವಜನಿಕವಾಗಿ ಮಾತಾಡುವಾಗ ಮೈ ತುಂಬಾ ಕಣ್ಣಾಗಿರುವ ಎಚ್ಚರ ಸಾಮಾಜಿಕ ಬದುಕಿನಲ್ಲಿ ಅತಿ ಮುಖ್ಯ. ಗ್ಲಾಮರ್‍ನತ್ತ ಮಾತ್ರವೇ ಗಮನ ಹರಿಸುವ ರಚಿತಾ ರಾಮ್‍ಗೆ ಅಂಥಾದ್ದರ ಗಂಧ ಗಾಳಿ ಇರುವಂತಿಲ್ಲ. ಇದ್ದಿದ್ದರೆ ಗಣರಾಜ್ಯೋತ್ಸವವನ್ನು ಮರೆತುಬಿಡಿ, ಕ್ರಾಂತಿ ನೋಡಿ ಎಂಬಂಥಾ ದಡ್ಡ ಹೇಳಿಕೆ ಆಕೆಯ ಕಡೆಯಿಂದ ತೂರಿ ಬರುತ್ತಿರಲಿಲ್ಲ.

ಸಾರ್ವಜನಿಕ ಸಮಾರಂಭದಲ್ಲಿ, ಅಭಿಮಾನಿಗಳ ಒಡ್ಡೋಲಗದಲ್ಲಿ ಮಾತಾಡುವಾಗ ನಾಲಗೆ ತೊಡರೋದು ಮಾಮೂಲು. ಆದರೆ ಸಂವಿಧಾನಕ್ಕೇ ಅಪಮಾನವಾಗುವಂಥಾ ಹೇಳಿಕೆಗಳು ಹೊರಬೀಳದಂತೆ ನೋಡಿಕೊಳ್ಳೋ ಎಚ್ಚರ ಅಪೇಕ್ಷಣೀಯ. ಯಾವಾಗ ರಚಿತಾ ಇಂಥಾದ್ದೊಂದು ಎಡವಟ್ಟು ಮಾಡಿಕೊಂಡಳೋ, ಆವಾಗಿನಿಂದಲೇ ಅದರ ವಿರುದ್ಧದ ಚರ್ಚೆ ಸಾಮಾಜಿಕ ಜಾಲತಾಣಗಳಲ್ಲಿ ಶುರುವಾಗಿತ್ತು. ಹಾಗಾದೇಟಿಗೆ ರಚಿತಾ ಆದ ತಪ್ಪಿಗೆ ಕ್ಷಮೆ ಕೇಳಿದ್ದರೆ ಅದು ಮುಂದುವರೆಯುತ್ತಿರಲಿಲ್ಲ. ಆದರಾಕೆ ನುಣುಚಿಕೊಳ್ಳಲು ನೋಡಿ, ಸಮರ್ಥಿಸಿಕೊಳ್ಳುವ ಧಾಟಿಯಲ್ಲಿ ಒದರಾಡಿದಳೇ ಹೊರತು, ಕ್ಷಮೆ ಯಾಚಿಸಲು ಮುಂದಾಗಿರಲಿಲ್ಲ.

ಅದರ ಫಲವಾಗಿಯೇ ಇದೀಗ ಮಂಡ್ಯ ಜಿಲ್ಲೆಯ ಮದ್ದೂರಿನಲ್ಲಿ ಗುಳಿಕೆನ್ನೆಯ ಮೇಲೊಂದು ಕೇಸು ಜಡಿದುಕೊಂಡಿದೆ. ಸಂವಿಧಾನಕ್ಕೆ ಅಪಮಾನವೆಸಗಿರೋ ರಚಿತಾಳನ್ನು ಗಡಿಪಾರು ಮಾಡಬ ಏಕು ಅಂತೆಲ್ಲ ದೂರುದಾರರು ಆಗ್ರಹಿಸಿದ್ದಾರೆ. ನಿಜ, ರಚಿತಾ ಮಾಡಿರೋದು ತಪ್ಪು. ಆಕೆಗೆ ಈ ಬಗ್ಗೆ ತಿಳಿ ಹೇಳಿ, ಇನ್ಯಾರೂ ಅಂಥಾ ತಪ್ಪು ಮಾಡದಂತೆ ನೋಡಿಕೊಳ್ಳುವ ಜರೂರತ್ತಿದೆ. ಹಾಗಂತ, ಇದನ್ನೇ ಮುಂದಿಟ್ಟುಕೊಂಡು ಆಕೆಯನ್ನು ಗಡಿಪಾರು ಮಾಡಬೇಕೆಂಬ ಆಗ್ರಹವಿದೆಯಲ್ಲಾ? ಅದು ಯಾಕೋ ಅತಿರೇಕವೆನ್ನಿಸುತ್ತದೆ.

ಇದೆಲ್ಲ ಏನೇ ಇದ್ದರೂ ಇಂಥಾ ಸೆಲೆಬ್ರಿಟಿಗಳು ಸಾಮಾಜಿಕ ಜವಾಬ್ದಾರಿಯನ್ನು ತುರ್ತಾಗಿ ಕಲಿಯಬೇಕಿದೆ. ತಾವು ಸೀಮೆಗಿಲ್ಲದ ಸೆಲೆಬ್ರಿಟಿಗಳೆಂಬ ಹಮ್ಮನ್ನು ನೆತ್ತಿಗೇರಿಸಿಕೊಳ್ಳುವ ಮುನ್ನ, ಈ ನೆಲದ ಕಾನೂನು ಕಟ್ಟಳೆಗಳ ಅಡಿಯಲ್ಲಿ ತಾವೂ ಸಾಮಾನ್ಯರೆಂಬ ಕನಿಷ್ಟ ಖಬರನ್ನಾದರೂ ಇಟ್ಟುಕೊಳ್ಳಬೇಕಿದೆ. ತಾವೇನು ಹೇಳಿದರೂ ನಡೆಯುತ್ತೆ. ಸಮರ್ಥಿಸಿಕೊಳ್ಳಲು ಅಭಿಮಾನಿಗಳಿದ್ದಾರೆಂಬ ಅಹಂಕಾರವನ್ನ ಧರಿಸಿಕೊಂಡರೆ, ಅದುವೇ ಜೈಲಿನ ಹಾದಿ ತೋರಿಸಿದರೂ ಅಚ್ಚರಿಯೇನಿಲ್ಲ. ರಚಿತಾ ರಾಮ್ ಒಂದಷ್ಟು ಅವಕಾಶಗಳನ್ನು ಪಡೆದುಕೊಂಡು ಮುಂದುವರೆಯುತ್ತಿದ್ದಾಳೆ. ಆಕೆಗೊಂದಷ್ಟು ಅಭಿಮಾನಿ ಬಳಗವಿದೆ. ಇದೆಲ್ಲವೂ ಮೆರೆದಾಟದ ಪರವಾನಗಿಯಲ್ಲ; ಜವಾಬ್ದಾರಿ ಹೆಚ್ಚಾದುದರ ಸಂಕೇತ ಎಂಬ ಪ್ರೌಢಿಮೆ ರಚಿತಾಗೆ ಲಭಿಸಲೆಂಬುದು ಹಾರೈಕೆ!

The post ಕ್ರಾಂತಿಯ ಗಡಿಬಿಡಿಯಲ್ಲೊಂದು ವಿವಾದ ಕಿಡಿ! appeared first on ಶೋಧ ನ್ಯೂಸ್ - Shodha News.

ಒಂದು ಕಾರ್ಗತ್ತಲ ಸನ್ನಿವೇಷದಲ್ಲಿ ಬೆಳಕಿನ ಸಣ್ಣ ಮಿಣುಕೊಂದು ಹೊತ್ತಿಕೊಂಡಂತಿದೆ. ಸದ್ಯ ದರ್ಶನ್ ಅವರಿಗೆ ಹೊಸಪೇಟೆಯಲ್ಲೆದುರಾದ ದುರಾದೃಷ್ಟಕರ ಸನ್ನಿವೇಷದ ಹಿನ್ನೆಲೆಯಲ್ಲಿ ಅಂಥಾದ್ದೊಂದು ಪವಾಡ ಸೃಷ್ಟಿಯಾಗೋ ಲಕ್ಷಣಗಳು ದಟ್ಟವಾಗಿಯೇ ಗೋಚರಿಸಲಾರಂಭಿಸಿವೆ. ಸಾವಿರ ಕಷ್ಟಕೋಟಲೆಗಳನ್ನೇ ಮೆಟ್ಟಿಲಾಗಿಸಿಕೊಂಡು ಗೆದ್ದು ತೋರಿಸಿರುವವರು ದರ್ಶನ್. ಅವರ ಮೇಲೆ ಚಪ್ಪಲಿ ತೂರುವಂಥಾ ವಿಕೃತಿ ನಡೆದಿರೋದರ ವಿರುದ್ಧ ಒಂದಿಡೀ ಚಿತ್ರಂಗವೇ ಒಂದಾಗಿದೆ. ಶಿವಣ್ಣ ಸೇರಿದಂತೆ ಅನೇಕರು ಈ ಘಟನೆಯನ್ನು ಖಂಡಿಸಿದ್ದಾರೆ. ಹೀಗೆ ಚಿತ್ರರಂಗದ ಮಂದಿಯೆಲ್ಲ ಒಂದು ಕಡೆಯಿಂದ ದರ್ಶನ್ ಬೆಂಬಲಕ್ಕೆ ನಿಲ್ಲುತ್ತಿರುವಾಗಲೇ, ಪ್ರೇಕ್ಷಕರ ಚಿತ್ತ ಕಿಚ್ಚಾ ಸುದೀಪ್ ಅವರತ್ತ ನೆಟ್ಟುಕೊಂಡಿತ್ತು. ಕಡೆಗೂ ಅವರು ತಮ್ಮ ಒಂದು ಕಾಲದ ಗೆಳೆಯನ ಬೆಂಬಲಕ್ಕೆ ನಿಂತಿದ್ದಾರೆ. ಈ ಮೂಲಕ ಈ ಘಟನೆಗೆ ತೀವ್ರವಾದ ವಿರೋಧ ವ್ಯಕ್ತಪಡಿಸಿದ್ದಾರೆ.

ಈ ಬಗ್ಗೆ ಸುದೀರ್ಘವಾದ ಬರಹದ ಮೂಲಕ ಸುದೀಪ್ ಟ್ವೀಟ್ ಮಾಡಿದ್ದಾರೆ. ಅದರಲ್ಲಿ ಗೆಳೆಯ ದರ್ಶನ್ ಚಿತ್ರರಂಗಕ್ಕೆ ಕೊಟ್ಟ ಕೊಡುಗೆ ಮತ್ತು ಅವರು ಮೇಲೆದ್ದು ನಿಂತ ರೀತಿಯ ಬಗ್ಗೆ ಅಭಿಮಾನ ಪೂರ್ವಕವಾಗಿ ಕೆಲ ವಿಚಾರಗಳನ್ನು ಹಂಚಿಕೊಂಡಿದ್ದಾರೆ. ಅಭಿಮಾನದ ಹೆಸರಲ್ಲಿ ಅತಿರೇಕದಿಂದ ವರ್ತಿಸುವವರಿಗೂ ಕೂಡಾ ಸೌಜನ್ಯದ ಚೌಕಟ್ಟಿನಲ್ಲಿಯೇ ತಿಳಿ ಹೇಳಿದ್ದಾರೆ. ಎಲ್ಲೋ ಒಂದು ಕಡೆ, ಸ್ಟಾರ್ ವಾರ್ ಎಂಬುದು ಹಿಂದೆಂದೂ ಕಂಡು ಕೇಳರಿಯದಂತೆ ಮೇರೆ ಮೀರುತ್ತದೇನೋ ಎಂಬ ಆತಂಕ ಎಲ್ಲರಲ್ಲಿಯೂ ಮನೆಮಾಡಿತ್ತು. ಆದರೆ ಸುದೀಪ್‍ರಂಥಾ ನಟರು ದರ್ಶನ್ ಬೆಂಬಲಕ್ಕೆ ನಿಂತಿರುವ ಪರಿ, ಶಿವಣ್ಣ ಹಿರೀಕನ ಸ್ಥಾನದಲ್ಲಿ ನಿಂತು ಮಾತಾಡಿರುವ ರೀತಿಗಳೆಲ್ಲವೂ ಮತ್ತೆ ಕನ್ನಡ ಚಿತ್ರರಂಗ ಒಗ್ಗಟ್ಟಿನಿಂದ ಜೊತೆಯಾಗಿ ಹೆಜ್ಜೆ ಹಾಕೋ ಶುಭ ಸೂಚನೆ ನೀಡಿದಂತಿದೆ.

ಕಿಚ್ಚ ಸುದೀಪ್ ದರ್ಶನ್ ವಿಚಾರದಲ್ಲಿ ಪ್ರತಿಕ್ರಿಯಿಸಿರುವ ರೀತಿಗೆ, ಅವರು ಮಂಡಿಸಿರುವ ಪ್ರೌಢ ವಿಚಾರಗಳಿಗೆ ಎಲ್ಲ ದಿಕ್ಕುಗಳಿಂದಲೂ ಉತ್ತಮ ಪ್ರತಿಕ್ರಿಯೆಗಳು ಕೇಳಿ ಬರುತ್ತಿವೆ. ಹೀಗೆ ಸಾಥ್ ಕೊಟ್ಟ ವಿಚಾರದಲ್ಲಿಯೂ ಮನಬಂದಂತೆ ಕಮೆಂಟು ಮಾಡೋ ಹಲಾಲುಟೋಪಿಗಳಿದ್ದಾರಲ್ಲಾ? ಅಂಥವರನ್ನು ಎಲ್ಲ ನಟರೂ ತಹಬಂದಿಯಲ್ಲಿ ಇಟ್ಟುಕೊಳ್ಳುವಂತಾದರೆ, ಖಂಡಿತವಾಗಿಯೂ ಮುಂದೆಂದೂ ಇಂಥಾ ಅತಿರೇಕಗಳ ನಡೆಯಲು ಸಾಧ್ಯವಿಲ್ಲ. ಈ ನಿಟ್ಟಿನಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಮತ್ತು ಕಿಚ್ಚ ಸುದೀಪ್ ಸೇರಿದಂತೆ ಎಲ್ಲ ನಟರೂ ತಂತಮ್ಮ ಅಭಿಮಾನಿ ಬಳಗವನ್ನು ಹಿಡಿತದಲ್ಲಿಟ್ಟುಕೊಳ್ಳುವ ಜರೂರತ್ತಿದೆ.

ಇದೆಲ್ಲ ಹಾಗಿರಲಿ, ಇದೀಗ ಕಿಚ್ಚಾ ಸುದೀಪ್ ಮತ್ತು ದರ್ಶನ್ ಬಹುಕಾಲದ ನಂತರ ಮತ್ತೆ ಒಂದಾಗುವ ಮುನ್ಸೂಚನೆಯಂತೂ ಸಿಕ್ಕಿದೆ. ಈ ಇಬ್ಬರು ನಟರ ಅಭಿಮಾನಿಗಳೂ ಕೂಡಾ ಸಾಕಷ್ಟು ವಿಚಾರಗಳಲ್ಲಿ ಶರಂಪರ ಕಿತ್ತಾಡಿಕೊಂಡಿದ್ದರು. ಆದರೆ ಆ ಕಿತ್ತಾಟಗಳ ನಡುವೆಯೂ ಈ ನಟರಿಬ್ಬರು ಮತ್ತೆ ಒಂದಾಗಬೇಕೆಂಬ ಇಂಗಿತ ಅಭಿಮಾನಿ ವಲಯದಲ್ಲಿ ಇದ್ದೇ ಇತ್ತು. ಆಗಾಗ ಈ ಬಗ್ಗೆ ಚರ್ಚೆಗಳಂತೂ ನಡೆಯುತ್ತಾ ಬಂದಿವೆ. ಇನ್ನೇನು ಇವರಿಬ್ಬರೂ ಒಂದಾಗುತ್ತಾರೆಂಬ ಬಗ್ಗೆ ಅಂತೆಕಂತೆಗಳು ಕೇಳಿ ಬರುತ್ತಿದ್ದವು. ಆದರೆ, ಅದೇಕೋ ಆ ಕಾಲ ಇದುವರೆಗೂ ಕೂಡಿ ಬಂದಿರಲಿಲ್ಲ. ಹಾಗೆ ಈ ನಟರಿಬ್ಬರೂ ಮತ್ತೆ ಒಂದಾಗಲೆಂಬ ಆಶಯ ಅಭಿಮಾನದಾಚೆಗೂ ಹಬ್ಬಿಕೊಂಡಿರೋದು ಸುಳ್ಳೇನಲ್ಲ.

ಈ ಹಿಂದೆ ಖುದ್ದು ಅಂಬರೀಷ್ ಅವರೇ ಸಂಧಾನಕ್ಕೆ ಯತ್ನಿಸಿದ್ದರೂ ಕೂಡಾ ಕಿಚ್ಚಾ ಸುದೀಪ್ ಮತ್ತು ದರ್ಶನ್‍ರನ್ನು ಒಂದು ಮಾಡಲು ಸಾಧ್ಯವಾಗಿರಲಿಲ್ಲ. ಕನ್ನಡ ಚಿತ್ರರಂಗದ ಮಟ್ಟಿಗೆ ಸುದೀಪ್ ಹಾಗೂ ದರ್ಶನ್ ದೈತ್ಯ ಶಕ್ತಿಗಳಿದ್ದಂತೆ. ಆ ಎರಡು ಶಕ್ತಿಗಳು ದೂರಾಗುವಂತೆ ಅನೇಕರು ಆರಂಭದಿಂದಲೂ ಹುಳಿ ಹಿಂಡುತ್ತಲೇ ಬಂದಿದ್ದಾರೆ. ಎರಡೂ ಕಡೆಗಳಲ್ಲಿ ಚೆಂದಗಿದ್ದುಕೊಂಡು, ರೂಮರ್ ಹಬ್ಬಿಸೋ ಆಲ್ಕಾಟಿಗಳ ಬಗ್ಗೆ ಈ ಇಬ್ಬರು ನಟರೂ ಎಚ್ಚರ ವಹಿಸಿರಲಿಲ್ಲ. ಹೀಗೆ ಅಂತಃಪುರದಲ್ಲಿಯೇ ತಂದಿಕ್ಕುವವರ ದಂಡು ಹೆಚ್ಚಾದ್ದರಿಂದಲೇ ಸುದೀಪ್ ಹಾಗೂ ದರ್ಶನ್ ನಡುವೆ ಕಂದಕ ಸೃಷ್ಟಿಯಾಗಿತ್ತು ಅನ್ನುವವರೂ ಇದ್ದಾರೆ.

ಇದೆಲ್ಲ ಏನೇ ಇದ್ದರೂ ಇದೀಗ ಮುನಿಸು ಮರೆತು ಮತ್ತೆ ಒಂದಾಗುವ ಕಾಲ ಹತ್ತಿರ ಬಂದಂತಿದೆ. ಅದು ಕನ್ನಡ ಚಿತ್ರರಂಗದ ಮಟ್ಟಿಗೆ ನಿಜಕ್ಕೂ ಒಳಿತಿನ ಬೆಳವಣಿಗೆ. ಈ ದಿಸೆಯಲ್ಲಿ ಖುದ್ದು ದರ್ಶನ್ ಆತ್ಮ ವಿಮರ್ಶೆ ಮಾಡಿಕೊಂಡು, ತನ್ನ ಸುತ್ತ ಏನು ನಡೆಯುತ್ತಿದೆ? ಅದಕ್ಕೆ ಹೇಗೆ ಪ್ರತಿಕ್ರಿಯಿಸಬೇಕೆಂಬುದರ ಬಗ್ಗೆ ಸೌಜನ್ಯದಿಂದ ಆಲೋಚಿಸುವ ತುರ್ತೂ ಇದೆ. ಅದೇ ರೀತಿ, ಈ ಪ್ರಕರಣದಲ್ಲಿ ಅಜಾತಶತ್ರು ಅಪ್ಪುವಿಗೆ ಅವಮಾನವಾಗದಂತೆ ನೋಡಿಕೊಳ್ಳುವ ಜವಾಬ್ದಾರಿಯೂ ಎಲ್ಲರ ಮೇಲಿದೆ. ಒಟ್ಟಾರೆಯಾಗಿ ಕಿಚ್ಚ ಮತ್ತು ದರ್ಶನ್ ಬಹುಕಾಲದ ಮುನಿಸು ಮರೆತು ಮತ್ತೆ ಜೊತೆಯಾಗೋ ಕಾಲ ಹತ್ತಿರದಲ್ಲಿದೆ. ಅದಕ್ಕಿಂತ ಖುಷಿಯ ಸಂಗತಿ ಬೇರೇನಿದೆ?

The post ಮತ್ತೆ ಒಂದಾಗಲಿದೆಯಾ ಸ್ಟಾರ್ ಜೋಡಿ? appeared first on ಶೋಧ ನ್ಯೂಸ್ - Shodha News.

ಕರ್ನಾಟಕದಲ್ಲಿ ಮತ್ತೊಮ್ಮೆ ಕೆಲಸಕ್ಕೆ ಬಾರದ ಸ್ಟಾರ್ ವಾರ್ ಮುನ್ನೆಲೆಗೆ ಬಂದಿದೆ. ಹೊಸಪೇಟೆಯಲ್ಲಿ ನಡೆದ ಕ್ರಾಂತಿ ಚಿತ್ರದ ಹಾಡಿನ ಬಿಡುಗಡೆ ಸಮಾರಂಭದಲ್ಲಿ ನಡೆಬಾರದ್ದು ನಡೆದು ಹೋಗಿದೆ. ಅಲ್ಲಿ ನೆರೆದಿದ್ದ ಜನಸ್ತೋಮದ ನಡುವೆ ಯಾವನೋ ತಲೆಮಾಸಿದವನೊಬ್ಬ ದರ್ಶನ್‍ಗೆ ಗುರಿಯಿಟ್ಟು ಚಪ್ಪಲಿ ಎಸೆದಿದ್ದಾನೆ. ಇದೀಗ ಅದರ ಹಿಂಚುಮುಂಚಿನ ಘಟನಾವಳಿಗಳ ಬಗ್ಗೆ ವ್ಯಾಪಕ ಚರ್ಚೆಗಳು ನಡೆಯಲಾರಂಭಿಸಿವೆ. ಹಾಗಾದರೆ, ಇದರ ಹಿಂದಿರೋ ಹಿಕ್ಮತ್ತುಗಳೇನು? ಇದರಲ್ಲಿ ಅಪ್ಪು ಅಭಿಮಾನಿಗಳ ಪಾತ್ರವಿದೆಯಾ? ಅಭಿಮಾನಿಗಳ ಹೆಸರಿನಲ್ಲಿ ರಾಜಕೀಯ ಹಿತಾಸಕ್ತಿ ಕೆಲಸ ಮಾಡಿದೆಯಾ? ಈ ಹಿಂದೆ ದರ್ಶನ್ ಅದೃಷ್ಟ ಲಕ್ಷ್ಮಿಯ ವಿಚಾರದಲ್ಲಿ ಆಡಿದ್ದೊಂದು ಮಾತು ವಿವಾದವೆಬ್ಬಿಸಿತ್ತಲ್ಲಾ? ಅದರ ಬಗ್ಗೆ ಕುದ್ದುಹೋಗಿದ್ದ ಪಟಾಲಮ್ಮೊಂದು ಈ ಮೂಲಕ ದರ್ಶನ್ ವಿರುದ್ಧ ಸೇಡು ತೀರಿಸಿಕೊಂಡಿತಾ… ಹೀಗೆ ಪ್ರಶ್ನೆಗಳ ಸರಮಾಲೆಯೇ ಇದೆ. ಸದ್ಯಕ್ಕೆ ದಿಕ್ಕು ದಿಕ್ಕುಗಳಲ್ಲಿಯೂ ನಾನಾ ಬಗೆಯ ಉತ್ತರಗಳು ಚೆದುರಿ ಬಿದ್ದಂತೆ ಭಾಸವಾಗುತ್ತಿದೆ.

ಸ್ಟಾರ್‍ವಾರ್, ಅಭಿಮಾನ, ಅಸಮಾಧಾನಗಳೆಲ್ಲ ಏನೇ ಇದ್ದರೂ ಕಲಾವಿದನೊಬ್ಬನಿಗೆ ಈ ಪರಿಯಾಗಿ ಅವಮಾನಿಸೋದು ಖಂಡಿತವಾಗಿಯೂ ಸರಿಯಲ್ಲ. ದರ್ಶನ್ ಮಾತ್ರವಲ್ಲ; ಯಾವ ನಟ, ನಟಿಯರ ಮೇಲೂ ಇಂಥಾದ್ದೊಂದು ಪ್ರಹಾರವಾಗೋದನ್ನು ಯಾರೊಬ್ಬರೂ ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಹಾಗೊಂದುವೇಳೆ ಅದನ್ನೂ ಸಮರ್ಥಿಸಿಕೊಂಡರೆ, ಅಂಥವರನ್ನು ಮನುಷ್ಯರೆಂದು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ಮೇಲು ನೋಟಕ್ಕೆ ದರ್ಶನ್ ಒರಟೊರಟಾಗಿ ಕಾಣಿಸಬಹುದು. ಅವರ ನೇರವಾದ ಮಾತುಗಳೇ ವಿವಾದಗಳಿಗೂ ಕಾರಣವಾಗಿರಬಹುದು. ಒಮ್ಮೊಮ್ಮೆ ಆತ ಫಿಲ್ಟರಿಲ್ಲದೆ ಮನಬಂದಂತೆ ಮಾತಾಡುವ ಮೂಲಕ ತನಗ್ಯಾರೂ ಎದುರುನಿಲ್ಲುವಂತಿಲ್ಲ ಎಂಬಂತೆ ಮಾತಾಡೋದು ಅಹಮ್ಮಿಕೆಯ ಪರಮಾವಧಿಯಂತೆ ಕಾಣಿಸಬಹುದು. ಆದರೆ, ದರ್ಶನ್ ನಡೆದು ಬಂದಿರೋ ದಾರಿ, ಕ್ಲಾಪ್ ಬಾಯ್ ಆಗಿದ್ದುಕೊಂಡು ಸೂಪರ್ ಸ್ಟಾರ್ ಆಗಿ ಬೆಳೆದು ನಿಂತ ಪರಿಗಳಿವೆಯಲ್ಲಾ? ಅವುಗಳಿಗೆ ಯಾರೂ ಅಗೌರವ ತೋರುವಂತಿಲ್ಲ.

ಅಷ್ಟಕ್ಕೂ ದರ್ಶನ್ ಯಾರ ನೆರಳಿನಲ್ಲಿಯೋ, ಯಾರ ಹೆಸರು ಹೇಳಿಕೊಂಡೋ ಬೆಳೆದವರಲ್ಲ. ತಂದೆ ಪ್ರಸಿದ್ಧ ಕಲಾವಿದನಾಗಿದ್ದರೂ, ಓರ್ವ ಸಾಮಾನ್ಯ ಹುಡುಗ ಅನುಭವಿಸುವ ಎಲ್ಲ ಅವಮಾನಗಳನ್ನೂ ನುಂಗಿಕೊಂಡು ಮೇಲೆದ್ದು ನಿಂತವರು ದರ್ಶನ್. ಹಾಗೆ ಹಂತ ಹಂತವಾಗಿ ಬೆಳೆದು ಬಂದ ದರ್ಶನ್ ಇದೀಗ ಕರ್ನಾಟಕದಲ್ಲಿ ಅತೀ ಹೆಚ್ಚು ಅಭಿಮಾನಿಗಳನ್ನ ಹೊಂದಿರುವ ನಟನೆಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಹೀಗೆ ಕಡುಗಷ್ಟದಿಂದ ಬೆಳೆದು ಬಂದ ನಟನೊಬ್ಬನಿಗೆ ಚಪ್ಪಲಿ ಎಸೆದು ಅವಮಾನಿಸೋದಿದೆಯಲ್ಲಾ? ಅದು ಕೇವಲ ದರ್ಶನ್ ಒಬ್ಬರಿಗೆ ಮಾಡಿದ ಅವಮಾನವಲ್ಲ; ಕರುನಾಡಿನ ಕಲಾ ಪರಂಪರೆಗೇ ಮಾಡಿರುವ ಅವಮಾನ.

ಯಾವಾಗ ಹೊಸಪೇಟೆಯಲ್ಲಿ ದರ್ಶನ್ ಕಡೆಗೆ ಚಪ್ಪಲಿ ತೂರಿ ಬಂತೋ, ಆ ಕ್ಷಣದಿಂದ ದರ್ಶನ್ ಮತ್ತು ಪುನೀತ್ ಅಭಿಮಾನಿಗಳ ನಡುವೆ ಸಮರ ಶುರುವಾಗಿದೆ. ಮೇಲುನೋಟಕ್ಕೆ ಇದು ಅಪ್ಪು ಅಭಿಮಾನಿಗಳ ಕಡೆಯಿಂದಾದ ಕೃತ್ಯ ಎಂಬುದನ್ನು ಬಿಂಬಿಸಲು ಶತ ಪ್ರಯತ್ನಗಳಾಗುತ್ತಿವೆ. ಪವರ್ ಸ್ಟಾರ್ ಪುನೀತ್ ರಾಜ್‍ಕುಮಾರ್ ಮರೆಯಾಗಿ ವರ್ಷ ಕಳೆದಿದೆ. ಬಹುಶಃ ಅವರಿಂದು ನಮ್ಮ ನಡುವಲ್ಲಿದ್ದಿದ್ದರೆ ಖಂಡಿತವಾಗಿಯೂ ಮಮ್ಮಲ ಮರುಗುತ್ತಿದ್ದರು. ಅಷ್ಟಕ್ಕೂ ಇಂಥಾದ್ದೊಂದು ಕೃತ್ಯದ ಹೊಣೆಯನ್ನು ಅವರ ಅಭಿಮಾನಿಗಳ ಹೆಗಲಿಗೆ ರವಾನಿಸುವ ಕುಕೃತ್ಯಗಳೂ ನಡೆಯುತ್ತಿರಲಿಲ್ಲವೇನೋ…

ಹಾಗಾದರೆ, ಇದು ಉನ್ಮಾದದಲ್ಲಿದ್ದ ಅಪ್ಪು ಅಭಿಮಾನಿಗಳ ಕೃತ್ಯವಾ? ಅಭಿಮಾನದ ಹೆಸರಿನಲ್ಲಿ ಇಂಥಾದ್ದೊಂದು ದುರಾದೃಷ್ಟಕರ ಸನ್ನಿವೇಶ ಸೃಷ್ಟಿಯಾಯಿತಾ ಅಂತ ನೋಡ ಹೋದರೆ, ಮತ್ತೊಂದು ಆಯಾಮದ ವಿದ್ಯಮಾನಗಳು ತಣ್ಣಗೆ ನಡೆದಿರಬಹುದಾದ ಸೂಚನೆಗಳು ಸಿಗುತ್ತವೆ. ಅದರಲ್ಲಿ ರಾಜಕೀಯ, ಸೈಂದ್ಧಾತಿಕ ಪ್ರತಿರೋಧಗಳೂ ನುಸುಳಿಕೊಂಡಿರುವ ಅನುಮಾನ ಹುಟ್ಟುತ್ತದೆ. ಇತ್ತೀಚೆಗಷ್ಟೇ ದರ್ಶನ್ ಸಂದರ್ಶನವೊಂದರಲ್ಲಿ ಆಡಿದ್ದ ಮಾತುಗಳು ವಿವಾದಕ್ಕೀಡಾಗಿದ್ದವು. ಅದೃಷ್ಟ ಲಕ್ಷಮಿಯನ್ನು ಬಟ್ಟೆ ಬಿಚ್ಚಿ ಬೆಡ್ ರೂಮಿನಲ್ಲಿ ಕೂರಿಸಿಕೊಳ್ಳಬೇಕು ಎಂಬಂಥಾ ಮಾತುಗಳು ಅವರ ಕಡೆಯಿಂದ ತೂರಿ ಬಂದಿದ್ದವು. ಹಾಗಾದಾಕ್ಷಣವೇ ಸಂಸ್ಕøತಿಯನ್ನು ಗುತ್ತಿಗೆ ತೆಗೆದುಕೊಂಡಂತಾಡುವ ಬಿಜೆಪಿ ಪ್ರಣೀತ ಮನಃಸ್ಥಿತಿಗಳು ಮುಗಿಬಿದ್ದಿದ್ದವು.

ಹಿಂದೂ ದೇವತೆಯ ಬಗ್ಗೆ ಮಾತಾಡಿದ ದರ್ಶನ್‍ಗೆ ಟಾಂಗ್ ಕೊಡಲು ಆ ಪಡೆ ಅಭಿಮಾನಿಗಳನ್ನು ಬಳಸಿಕೊಂಡಿತಾ? ಆ ಪಡೆಯೇ ದರ್ಶನ್ ಅವರತ್ತ ಚಪ್ಪಲಿ ತೂರಿ ಅದನ್ನು ಅಪ್ಪು ಅಭಿಮಾನಿಗಳ ತಲೆಗೆ ಕಟ್ಟುವ ಪ್ರಯತ್ನ ನಡೆಸಿತಾ? ಇದರ ಹೊಣೆಯನ್ನು ಬಿಜೆಪಿ ಸಚಿವ ಆನಂದ್ ಸಿಂಗ್ ಕಡೆಯ ಮಂದಿ ವಹಿಸಿಕೊಂಡಿದ್ದರಾ ಅಂತೆಲ್ಲ ಅನುಮಾನಗಳು ಕಾಡಲಾರಂಭಿಸಿವೆ. ಇದು ಎಲ್ಲ ನಟರ ಅಭಿಮಾನಿಗಳ ಪಾಲಿಗೂ ಕೂಡಾ ಎಚ್ಚರದ ಕರೆಗಂಟೆ. ಯಾಕೆಂದರೆ, ಅಭಿಮಾನದ ಹೆಸರಲ್ಲಿ ಹೀಗೆ ಬಡಿದಾಟಕ್ಕಿಳಿದರೆ, ಅದರಲ್ಲಿ ಯಾರೋ ಬೇಳೆ ಬೇಯಿಸಿಕೊಳ್ಳುತ್ತಾರೆ. ಯಾರೋ ಕಿತ್ತಾಡಿಕೊಳ್ಳುತ್ತಾರೆ. ಇನ್ಯಾರಿಗೋ ಅವಮಾನವಾಗಿ, ಮತ್ಯಾರೋ ಫಾಯಿದೆ ಗಿಟ್ಟಿಸಿಕೊಳ್ಳುತ್ತಾರೆ. ಅದಕ್ಕೆ ಅವಕಾಶ ಕೊಡಬಾರದೆಂದರೆ, ಅಭಿಮಾನಿಗಳೆಲ್ಲ ಸ್ಟಾರ್ ವಾರ್ ಎಂಬ ಭ್ರಮೆಯಿಂದ ಹೊರಬರೋದೊಂದೇ ದಾರಿ!

ಈ ಚಪ್ಪಲಿ ಎಸೆತದ ಹಿಂದೆ ಯಾರೇ ಇದ್ದರೂ ಇದೊಂದು ಖಂಡನಾರ್ಹ ಘಟನೆ. ಇದರ ಹಿಂದೆ ಯಾರಿದ್ದಾರೆ? ಅವರ ಮನಸಲ್ಲಿ ಎಂಥಾ ಅಜೆಂಡಾಗಳಿದ್ದಾವೆ, ಆ ಕಿಡಿಗೇಡಿಗಳನ್ನು ಪ್ರೇರೇಪಿಸಿದವರ್ಯಾರೆಂಬ ಬಗ್ಗೆ ಅಮೂಲಾಗ್ರ ತನಿಖೆಯಾಗಬೇಕಿದೆ. ಸದ್ಯಕ್ಕೆ ಶಿವರಾಜ್ ಕುಮಾರ್ ಸೇರಿದಂತೆ ಎಲ್ಲರೂ ದರ್ಶನ್ ಬೆಂಬಲಕ್ಕೆ ನಿಂತಿದ್ದಾರೆ. ಕಿಚ್ಚಾ ಸುದೀಪ್ ಕೂಡಾ ಬಹುಕಾಲದ ಮುನಿಸು ಮರೆತು ಕುಚಿಕ್ಕು ಗೆಳೆಯನ ಪರವಾಗಿ ಮಾತಾಡಿದ್ದಾರೆ. ಹೀಗೆ ಎಲ್ಲ ನಟರೂ ಒಂದಾಗಿ, ಅಭಿಮಾನಿಗಳನ್ನೂ ಒಂದುಗೂಡಿಸಿದರೆ ಖಂಡಿತವಾಗಿಯೂ ಇಂಥಾ ಕೃತ್ಯಗಳು ಮರುಕಳಿಸೋದಿಲ್ಲ. ಇನ್ನೆಂದೂ ಇಂಥಾ ಘಟನೆಗಳು ನಡೆಯದಿರಲಿ, ಕಕ್ಷಗಳ ಸರಮಾಲೆಗಳನ್ನೇ ಕಂಡುಂಡು ಸಾಧಿಸಿ ತೋರಿಸಿದ ದರ್ಶನ್‍ರಂಥಾ ನಟರು ಘಾಸಿಗೊಳ್ಳದಿರಲೆಂಬ ಹಾರೈಕೆ ನಮ್ಮದು…

The post ತೂರಿ ಬಂದ ಚಪ್ಪಲಿಗೆ ಅಂಟಿಕೊಂಡಿದೆಯಾ ರಾಜಕೀಯ ಹುನ್ನಾರ? appeared first on ಶೋಧ ನ್ಯೂಸ್ - Shodha News.

ಆತ ಅಂತರ್ಮುಖಿ. ಸಂಗೀತ ನಿರ್ದೇಶಕನಾಗಿ ಎಲ್ಲರಲ್ಲೊಂದು ಅಚ್ಚರಿ ಮೂಡಿಸಿದ್ದರೂ ಈ ಆಸಾಮಿ ಪಕ್ಕಾ ಮೂಡಿ. ಹೆಂಡತಿಯ ಜೊತೆಗೊಂದು ಫೋಟೋಗೆ ಪೋಸು ಕೊಡಲೂ ಕೊಸರಾಡುವ ಸಂಕೋಚ ಸ್ವಭಾವ… ಇಷ್ಟೆಲ್ಲ ಗುಣ ಲಕ್ಷಣಗಳನ್ನ ವಿವರಿಸುತ್ತಾ ಹೋದರೆ, ಖಂಡಿತವಾಗಿಯೂ ಕೇಳುಗರ ಮನಸಲ್ಲಿ ಒಂದು ಸ್ಪಷ್ಟವಾದ ಚಿತ್ರ ಮೂಡಿಕೊಳ್ಳುತ್ತೆ. ಅದು ಕನ್ನಡ ಚಿತ್ರರಂಗ ಕಂಡ ಪ್ರತಿಭಾನ್ವಿತ ಸಂಗೀತ ನಿರ್ದೇಶಕ ವಿ. ಹರಿಕೃಷ್ಣ ಅವರದ್ದು!

ಯೋಗರಾಜ್ ಭಟ್ಟರ ಯಬುಡಾ ತಬುಡಾ ಶೈಲಿಗೆ ಸಂಗೀತದ ಒಗ್ಗರಣೆ ಹಾಕುತ್ತಲೇ ಫೇಮಸ್ ಆಗಿದ್ದವರು ಹರಿಕೃಷ್ಣ. ಯಾವುದೇ ಸಂಗೀತ ನಿರ್ದೇಶಕನ ಹಾಡಿಗಾಗಿ ಜನ ಕಾದು ಕೂರೋದಿದೆಯಲ್ಲಾ? ಅದು ಅತ್ಯಂತ ಅಪರೂಪದ ವಿದ್ಯಮಾನ. ಅಂಥಾದ್ದನ್ನು ಸಾಧ್ಯವಾಗಿಸಿದವರು ನಿಜಕ್ಕೂ ಗೆದ್ದಂತೆಯೇ. ಈ ನಿಟ್ಟಿನಲ್ಲಿ ಹೇಳೋದಾದರೆ, ಹರಿಕೃಷ್ಣ ಸಂಗೀತ ನಿರ್ದೇಶಕರಾಗಿ ದೊಡ್ಡ ಮಟ್ಟದಲ್ಲಿಯೇ ಗೆದ್ದಿದ್ದಾರೆ. ಅಂಥಾ ಹರಿ, ಖ್ಯಾತಿಯ ಉತ್ತುಂಗದಲ್ಲೇ, ಏಕಾಏಕಿ ಸಿನಿಮಾ ನಿರ್ದೇಶನದತ್ತ ಹೊರಳಿಕೊಳ್ಳುತ್ತಾರೆಂದರೆ ಅಚ್ಚರಿ ಮೂಡದಿರಲು ಸಾಧ್ಯವೇ?

ಅಂಥಾದ್ದೊಂದು ಅಚ್ಚರಿ ಯಜಮಾನ ಚಿತ್ರದ ಸಂದರ್ಭದಲ್ಲಿಯೇ ಎದುರಾಗಿತ್ತು. ಯಾಕೆಂದರೆ, ಆ ಸಂದರ್ಭದಲ್ಲಿ ನಿರ್ದೇಶಕರ ತಂಡದಲ್ಲಿ ಹರಿ ಕೂಡಾ ಒಬ್ಬರಾಗಿ ಗುರುತಿಸಿಕೊಂಡಿದ್ದರು. ಅದು ದೊಡ್ಡ ಕನಸೊಂದಕ್ಕೆ ಹರಿ ನಡೆಸುತ್ತಿರೋ ತಾಲೀಮೆಂಬ ಅಂದಾಜು ಯಾರೆಂದರೆ ಯಾರಿಗೂ ಇರಲಿಲ್ಲ. ಹಾಗೆ ಯಜಮಾನ ಚಿತ್ರದ ಘಳಿಗೆಯಲ್ಲಿಯೇ ಹರಿ ನಿರ್ಮಾಪಕರಾದ ಬಿ ಸುರೇಶ್ ಮತ್ತು ಶೈಲಜಾ ನಾಗ್ ಅವರ ಮನಗೆದ್ದಿದ್ದರು. ಆ ಹೊತ್ತಿನಲ್ಲಿಯೇ ಹರಿ ಕ್ರಾಂತಿ ಚಿತ್ರಕ್ಕೆ ಸನ್ನದ್ಧರಾಗಿ ಬಿಟ್ಟಿದ್ದರು.

ಸಾಮಾನ್ಯವಾಗಿ, ಬಿ ಸುರೇಶ್ ಮತ್ತು ಶೈಲಜಾ ನಾಗ್ ಪ್ರತಿಯೊಂದರಲ್ಲಿಯೂ ಭಲೇ ಕಟ್ಟುನಿಟ್ಟು. ಒಂದಂಶ ಇಷ್ಟವಾಗದಿದ್ದರೆ ಅದನ್ನು ಯಾವ ಕಾರಣಕ್ಕೂ ಒಪ್ಪಿಕೊಳ್ಳುವ ಜಾಯಮಾನ ಈ ದಂಪತಿಗಳದ್ದಲ್ಲ. ಹಾಗಿರುವಾಗ ಅವರೇ ಹರಿಯ ನಿರ್ದೇಶನದ ಕಸುವನ್ನು ನಂಬಿದ್ದಾರೆಂದರೆ, ಅದು ಸಾಮಾನ್ಯದ ಸಂಗತಿಯೇನಲ್ಲ. ಈ ವಿಚಾರವೇ ಹರಿ ಅದೆಂಥಾ ತಯಾರಿಯೊಂದಿಗೆ ಕ್ರಾಂತಿಯನ್ನು ರೂಪಿಸಿದ್ದಾರೆಂಬುದಕ್ಕೆ ಸಾಕ್ಷಿಯಂತಿದೆ.

ಹರಿಕೃಷ್ಣ ತಮ್ಮ ಕೆಲಸದ ಬಗ್ಗೆ ಪೋಸು ಕೊಡುವವರಲ್ಲ. ಈ ಹಿಂದೆ ಸಂಗೀತ ನಿರ್ದೇಶಕರಾಗಿದ್ದ ಕಾಲದಲ್ಲಿಯೂ ಅವರು ಹಾಗೆಯೇ ಇದ್ದರು. ನಿರ್ದೇಶಕರಾಗಿರೋ ಈ ಹೊತ್ತಿನಲ್ಲಿಯೂ ಮೌನ ಧರಿಸಿಯೇ ಓಡಾಡಿಕೊಂಡಿದ್ದಾರೆ. ಅಷ್ಟಕ್ಕೂ ಖುದ್ದು ದರ್ಶನ್ ಅವರೇ ಹರಿಯ ನಿರ್ದೇಶನವನ್ನ ಮೆಚ್ಚಿಕೊಂಡಿದ್ದಾರೆ. ಅವರ ಸಾರಥ್ಯದ ಕ್ರಾಂತಿ ತಮ್ಮ ವೃತ್ತಿ ಬದುಕಿನ ಮೈಲಿಗಲ್ಲಾಗುತ್ತದೆ ಎಂಬಂಥಾ ನಂಬಿಕೆ ಇಟ್ಟುಕೊಂಡಿದ್ದಾರೆ. ಒಟ್ಟಾರೆಯಾಗಿ, ಕ್ರಾಂತಿಯ ಮೂಲಕ ಹರಿಕೃಷ್ಣರ ಪ್ರತಿಭೆಯ ಮತ್ತೊಂದು ಮಜಲು ಅನಾವರಣಗೊಳ್ಳಲಿದೆ. ಅದು ಎಲ್ಲರನ್ನೂ ಚಕಿತಗೊಳಿಸೋದರಲ್ಲಿ ಯಾವ ಸಂದೇಹವೂ ಇಲ್ಲ.

The post ಕ್ರಾಂತಿ ನಿರ್ದೇಶನದ ಹಿಂದಿದೆ ಅಚ್ಚರಿಯ ಕಹಾನಿ! appeared first on ಶೋಧ ನ್ಯೂಸ್ - Shodha News.

ದರ್ಶನ್ ಅಭಿನಯದ ಬಹುನಿರೀಕ್ಷಿತ ಚಿತ್ರ ಕ್ರಾಂತಿ. ಅತ್ತ ಮೀಡಿಯಾಗಳು ಮುನಿಸಿಕೊಂಡಿದ್ದರೂ ಕೂಡಾ, ಖುದ್ದು ಅಭಿಮಾನಿಗಳೇ ಈ ಸಿನಿಮಾದ ಪ್ರಚಾರದ ಜವಾಬ್ದಾರಿ ಹೊತ್ತುಕೊಂಡಿದ್ದಾರೆ. ಮೀಡಿಯಾ ಮುನಿಸಿನಾಚೆಗೂ ಕ್ರಾಂತಿ ನಿಜಕ್ಕೂ ಕ್ರಾಂತಿ ಮಾಡಲಿದೆ ಎಂಬಂಥಾ ಗಾಢ ನಂಬಿಕೆಯೊಂದು ಅಭಿಮಾನಿ ವಲಯದಲ್ಲಿದೆ. ಮೀಡಿಯಾಗಳಿಗೆ ಸೆಡ್ಡು ಹೊಡೆದು ನಿಂತಿರುವ ದರ್ಶನ್‌ಗೂ ಕೂಡಾ ಅಂಥಾದ್ದೊಂದು ನಂಬಿಕೆ ಬಲವಾಗಿರುವಂತಿದೆ.

ಈ ಸಿನಿಮಾದ ಕಥೆ ಏನು? ಅದರಲ್ಲಿ ದರ್ಶನ್ ಯಾವ ಥರದ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ ಎಂಬಿತ್ಯಾದಿ ಪ್ರಶ್ನೆಗಳು ಎಲ್ಲರಲ್ಲಿಯೂ ಇವೆ. ಆದರೆ, ಆ ಬಗ್ಗೆ ಸಣ್ಣದೊಂದು ವಿವರವೂ ಜಾಹೀರಾಗದಂತೆ ಚಿತ್ರತಂಡ ಪಹರೆ ಕಾಯುತ್ತಾ ಬಂದಿದೆ. ಇದೆಲ್ಲದರ ನಡುವೆ ಮೊನ್ನೆ ನಡೆದ ಪತ್ರಿಕಾ ಗೋಷ್ಟಿಯಲ್ಲಿ ಖುದ್ದು ದರ್ಶನ್ ಕಥಾ ಎಳೆಯ ಬಗ್ಗೆ ಸೂಕ್ಷ್ಮ ವಿಚಾರವೊಂದನ್ನು ಹಂಚಿಕೊಂಡಿದ್ದಾರೆ.

ಈ ಸಮಾಜದಲ್ಲಿ ಮೇರೆ ಮೀರಿಕೊಂಡಿರುವ ಖಾಸಗಿ ಶಾಲೆಗಳ ಎಜುಕೇಷನ್ ಮಾಫಿಯಾ ಸುತ್ತ ಕ್ರಾಂತಿಯ ಕಥೆಯಿರೋ ಸುಳಿವನ್ನು ದರ್ಶನ್ ಮಾತುಗಳೇ ಸಾಬೀತುಪಡಿಸಿವೆ. ಅತ್ತ ಬಿ. ಸುರೇಶ್ ನಿರ್ಮಾಣ ಮಾಡುತ್ತಿರೋದರಿಂದ ಈ ಸಿನಿಮಾ ನಿಜಕ್ಕೂ ಕ್ರಾಂತಿಕಾರಕ ಕಥೆ ಹೊಂದಿದೆ ಎಂಬ ನಂಬಿಕೆ ಈಗಾಗಲೇ ಬಲಗೊಂಡಿದೆ. ಈ ಮೂಲಕ ದರ್ಶನ್ ಎಲ್ಲರಿಗೂ ಇಷ್ಟವಾಗುವ, ಮಹತ್ತರ ಬದಲಾವಣೆಗೆ ಸ್ಫೂರ್ತಿಯಾಗುವ ಪಾತ್ರದಲ್ಲಿ ಕಾಣಿಸಿಕೊಂಡಿರೋದಂತೂ ಸತ್ಯ!

The post ದುಷ್ಟ ವ್ಯವಸ್ಥೆಗೆ ಸೆಡ್ಡು ಹೊಡೆದ ಕ್ರಾಂತಿ! appeared first on ಶೋಧ ನ್ಯೂಸ್ - Shodha News.

ಝೈದ್ ಖಾನ್ ನಾಯಕನಾಗಿ ನಟಿಸಿರೋ ಪ್ಯಾನಿಂಡಿಯಾ ಚಿತ್ರ ಬನಾರಸ್. ಐದು ಭಾಷೆಗಳಲ್ಲಿ ತಯಾರಾಗಿರುವ ಈ ಸಿನಿಮಾ ಪ್ರಭೆಯೀಗ ದೇಶದ ಉದ್ದಗಲಕ್ಕೂ ಹಬ್ಬಿಕೊಂಡಿದೆ. ಎತ್ತ ಕಣ್ಣು ಹಾಯಿಸಿದರೂ ಬನಾರಸ್ ಬಗೆಗಿನ ಕ್ರೇಜ್, ಹಾಯೆನಿಸುವಂಥಾ ನಿರೀಕ್ಷೆಗಳೇ ಕಾಣಿಸುತ್ತಿವೆ. ಅಷ್ಟರಮಟ್ಟಿಗೆ ಬನಾರಸ್ ಪ್ರೇಕ್ಷಕರೆಲ್ಲರ ಆಸಕ್ತಿ ಕೇಂದ್ರದ ಮುನ್ನೆಲೆಗೆ ಬಂದು ನಿಂತಿದೆ. ಇನ್ನೇನು ಈ ಚಿತ್ರ ನವೆಂಬರ್ ನಾಲಕ್ಕರಂದು ತೆರೆಗಾಣಲಿದೆ. ಈ ಹೊತ್ತಿನಲ್ಲಿ ಅದ್ದೂರಿಯಾದ, ಅರ್ಥಪೂರ್ಣವಾದ ಪ್ರೀ ರಿಲೀಸ್ ಇವೆಂಟ್ ಒಂದನ್ನು ಚಿತ್ರತಂಡ ಆಯೋಜಿಸಿದೆ. ಇದೇ 22ನೇ ತಾರೀಕು ಶನಿವಾರದಂದು ಸಂಜೆ 7.30ಕ್ಕೆ ಹುಬ್ಬಳ್ಳಿಯ ರೈಲ್ವೇ ಸ್ಪೋರ್ಟ್ಸ್ ಗ್ರೌಂಡ್‌ನಲ್ಲಿ ಈ ಕಾರ್ಯಕ್ರಮ ಅದ್ದೂರಿಯಾಗಿ ನಡೆಯಲಿದೆ. ವಿಶೇಷವೆಂದರೆ, ಅದರಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಭಾಗಿಯಾಗಲಿದ್ದಾರೆ.

ಆರಂಭದಿಂದಲೂ ಬನಾರಸ್ ಹೀರೋ ಝೈದ್ ಖಾನ್‌ಗೆ ಸ್ಟಾರ್ ನಟರೊಬ್ಬರ ನೆರಳಿದೆ ಎಂಬರ್ಥದ ಸುದ್ದಿಗಳು ಹರಿದಾಡುತ್ತಿದ್ದವು. ಬನಾರಸ್‌ಗೆ ಆ ನಟನ ಬೆಂಬಲ ಇರಲಿದೆ ಅಂತೆಲ್ಲ ಗಾಂಧಿನಗರದಲ್ಲಿ ಮಾತುಕತೆಗಳು ನಡೆದಿದ್ದವು. ಇದೀಗ ಆ ಸ್ಟಾರ್ ನಟ ಯಾರೆಂಬುದು ಜಾಹೀರಾಗಿದೆ. ನಟನಾಗಬೇಕೆಂಬ ಆಸೆ ಮೂಡಿಕೊಂಡಾಕ್ಷಣವೇ ಅದಕ್ಕಾಗಿನ ತಯಾರಿ ಆರಂಭಿಸಿದ್ದ ಝೈದ್, ಒಂದಷ್ಟು ನಟರ ಸಾಂಗತ್ಯವನ್ನೂ ದಕ್ಕಿಸಿಕೊಂಡಿದ್ದರು. ಅದರಲ್ಲಿಯೂ ವಿಶೇಷವಾಗಿ ದರ್ಶನ್ ಅವರ ಸಲಹೆ ಸೂಚನೆಗಳನ್ನು ಪಡೆದುಕೊಂಡೇ ಮುಂದುವರೆಯುತ್ತಿದ್ದರು. ಬನಾರಸ್ ಚಿತ್ರದ ವಿಚಾರದಲ್ಲಿಯೂ ದರ್ಶನ್ ಮಾರ್ಗದರ್ಶನ ಇದ್ದೇ ಇದೆ.

ಝೈದ್ ಖಾನ್ ಮೇಲೆ ಅತೀವ ಪ್ರೀತಿ ಹೊಂದಿರೋ ದರ್ಶನ್, ಅದರ ಭಾಗವಾಗಿಯೇ ಬನಾರಸ್ ಪ್ರೀ ರಿಲೀಸ್ ಇವೆಂಟ್‌ನಲ್ಲಿ ಭಾಗಿಯಾಗಲು ಒಪ್ಪಿಕೊಂಡಿದ್ದಾರೆ. ಅವರ ಆಗಮನವೇ ಬನಾರಸ್ ಜಾತ್ರೆಗೆ ಮತ್ತಷ್ಟು ಮೆರುಗು ತಂದು ಕೊಡಲಿದೆ. ಆ ದಿನ ದರ್ಶನ್ ಮಾತ್ರವಲ್ಲದೇ, ವಿನೋದ್ ಪ್ರಭಾಕರ್, ಚಿಕ್ಕಣ್ಣ, ಅಭಿಷೇಕ್ ಅಂಬರೀಶ್ ಮುಂತಾದ ನಟರೂ ಪಾಲ್ಗೊಳ್ಳಲಿದ್ದಾರೆ. ಜಯತೀರ್ಥ ನಿರ್ದೇಶನದ ಬನಾರಸ್ ಈಗಾಗಲೇ ಕರ್ನಾಟಕದಾದ್ಯಂತ ಪ್ರೇಕ್ಷಕರನ್ನು ಸೆಳೆದುಕೊಂಡಿದೆ. ಇನ್ನೆನು ಬಿಡುಗಡೆಗೆ ಕೆಲವೇ ಕೆಲ ದಿನಗಳು ಮಾತ್ರ ಬಾಕಿ ಇರುವಾಗಲೇ ಚಿತ್ರತಂಡ ಈ ಇವೆಂಟ್ ಅನ್ನು ಆಯೋಜಿಸಿದೆ. ಅದು ಬನಾರಸ್ ಪ್ರಭೆ ಮತ್ತಷ್ಟು ಪ್ರಜ್ವಲಿಸುವಂತೆ ಮಾಡಲಿದೆ ಅನ್ನೋದರಲ್ಲಿ ಯಾವ ಸಂದೇಹವೂ ಇಲ್ಲ.

The post ಹುಬ್ಬಳ್ಳಿಯಲ್ಲಿ ನಡೆಯಲಿದೆ ಬನಾರಸ್ ಜಾತ್ರೆ! appeared first on ಶೋಧ ನ್ಯೂಸ್ - Shodha News.

ಕನ್ನಡ ಚಿತ್ರರಂಗದ ಯಶಸ್ವೀ ಯುವ ನಿರ್ಮಾಪಕರ ಸಾಲಿನಲ್ಲಿ ಮುಂಚೂಣಿಯಲ್ಲಿರುವ ಹೆಸರು ತರುಣ್ ಶಿವಪ್ಪ ಅವರದ್ದು. ಸಿನಿಮಾ ನಿರ್ಮಾಣ ಕೂಡಾ ಅತೀವವಾದ ಶ್ರದ್ಧೆ ಮತ್ತು ವ್ಯಾವಹಾರಿಕ ಅಂಶಗಳಾಚೆಗಿನ ಆಸಕ್ತಿ ಬೇಡುವ ಕೆಲಸ. ಅದು ಮೈಗೂಡದೇ ಹೋಗಿದ್ದರೆ ಖಾಕಿ, ಮಾಸ್ ಲೀಡರ್, ವಿಕ್ಟರಿ೨, ರೋಸ್‌ನಂಥಾ ಯಶಸ್ವೀ ಚಿತ್ರಗಳನ್ನು ನಿರ್ಮಾಣ ಮಾಡಿ ಸೈ ಅನ್ನಿಸಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಅಂಥಾ ಶ್ರದ್ಧೆಯನ್ನು ದಕ್ಕಿಸಿಕೊಂಡು ಸಿನಿಮಾಗಳನ್ನು ನಿರ್ಮಾಣ ಮಾಡಿರುವ ತರುಣ್ ಶಿವಪ್ಪ ಇತ್ತೀಚೆಗೆ ಸಿನಿಮಾ ಸ್ಕೂಲ್ ಆರಂಭಿಸಿದ್ದರು. ಎಲ್ಲ ಥರದಲ್ಲಿಯೂ ಸನ್ನದ್ಧಗೊಂಡ ಪ್ರತಿಭೆಗಳನ್ನು ಚಿತ್ರರಂಗಕ್ಕೆ ಕೊಡುಗೆಯಾಗಿ ಕೊಡಮಾಡುವ ಸದುದ್ದೇಶದಿಂದ ಈ ಸಿನಿಮಾ ಸ್ಕೂಲ್ ಆರಂಭವಾಗಿತ್ತು. ಇದೀಗ ಅದರ ಮತ್ತೊಂದು ಆರಂಭವಾಗಲು ತಯಾರಿ ಶುರುವಾಗಿದೆ. ಪ್ರವೇಶಾತಿ ಪ್ರಕ್ರಿಯೆಯೂ ಸಹ ಶುರುವಾಗಿದೆ.

ಸಾಮಾನ್ಯವಾಗಿ ಸಿನಿಮಾ ಕನಸು ಸೋಕದ ಮನಸುಗಳೇ ವಿರಳ. ಯಾವುದಾದರೊಂದು ಬಗೆಯಲ್ಲಿ ಸಿನಿಮಾ ರಂಗದಲ್ಲಿ ಏನಾದರೂ ಸಾಧಿಸಬೇಕೆಂಬುದು ಹಲವರ ಕನಸಾಗಿರುತ್ತದೆ. ದುರಂತವೆಂದರೆ, ಬದುಕಿನ ಅನಿವಾರ್ಯತೆಗಳ ತಿರುಗಣಿಗೆ ಸಿಕ್ಕು ಅಂಥವರೊಂದಷ್ಟು ಮಂದಿ ಕನಸಿನ ಸಮೇತ, ಕುಹುಗಳೂ ಸಿಗದಂತೆ ಮಾಯವಾಗಿ ಬಿಟ್ಟಿರುತ್ತಾರೆ. ಹಾಗೆ ಎಲ್ಲೋ ಕಳೆದು ಹೋದವರಲ್ಲಿ ನಿಜವಾಗಿ ಪ್ರತಿಭಾವಂತರು ಇರಲಿಕ್ಕೂ ಸಾಕು. ಮತ್ತೆ ಕೆಲ ಮಂದಿಗೆ ಸನ್ನದ್ಧವಾಗಿ ಚಿತ್ರರಂಗ ಪ್ರವೇಶಕ್ಕೆ ಮಾರ್ಗಗಳೇ ಸಿಗುವುದಿಲ್ಲ. ಅಂಥವರೆಲ್ಲರಿಗೂ ಆಸರೆಯಾಗಬಲ್ಲ, ಅವರ ಆಸಕ್ತಿಗೆ ನೀರೆರೆದು ಪೋಶಿಸಿ ಚಿತ್ರರಂಗದಲ್ಲಿ ಕಾರ್ಯನಿರ್ವಹಿಸಲು ಅನುವು ಮಾಡಿಕೊಡಬಲ್ಲ ಶಕ್ತಿ ಸಿನಿಮಾ ಸ್ಕೂಲಿಗಿದೆ. ಸಿನಿಮಾ ಬಗ್ಗೆ ಆಸೆ ಹೊಂದಿರುವ ಯಾರ ಕನಸೂ ಕಮರಬಾರದು, ಯಾವ ಪ್ರಭಾನ್ವಿತರೂ ಬದುಕಿನ ಸಿಕ್ಕುಗಳಲ್ಲಿ ಸಿಲುಕಿ ಮರೆಯಾಗಬಾರದೆಂಬ ಮಹದುದ್ದೇಶದಿಂದ ಈ ಸಿನಿಮಾ ಸ್ಕೂಲ್ ಆರಂಭವಾಗಿದೆ.

ಪ್ರತಿಯೊಂದು ಹಂತದಲ್ಲಿಯೂ ಪರಿಣಿತರಿಂದ ತರಬೇತಿ ಕೊಡಿಸಿ, ರಂಗಭೂಮಿಯ ಮಟ್ಟದಿಂದಲೇ ಕಲಿಕೆಗೆ ಅವಕಾಶ ಮಾಡಿಕೊಡುವ ಅಪರೂಪದ ಕಾನ್ಸೆಪ್ಟು ಸಿನಿಮಾ ಸ್ಕೂಲ್‌ನದ್ದು. ಸಿನಿಮಾ ರಂಗಕ್ಕೆ ಹೇಗೋ ಪ್ರವೇಶ ಪಡೆದು, ಅಲ್ಲಿ ಕಲಿಕೆಗೆಂದೇ ಒಂದಷ್ಟು ವರ್ಷಗಳನ್ನು ಮೀಸಲಿಡುವ ಬದಲು, ಸರ್ವರೀತಿಯಿಂದಲೂ ತಯಾರಾದ ಪ್ರತಿಭೆಗಳನ್ನು ಚಿತ್ರರಂಗಕ್ಕೆ ಕೊಡಮಾಡುವ ಉದ್ದೇಶವೂ ಈ ಸಿನಿಮಾ ಶಾಲೆಗಿದೆ. ಈಗಾಗಲೇ ಇಲ್ಲಿ ಕಲಿತ ವಿದ್ಯಾರ್ಥಿಗಳ ಚಿತ್ರರಂಗದ ನಾನಾ ವಿಭಾಗಗಳಲ್ಲಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಅದರೊಲ್ಲೋರ್ವ ಹುಡುಗ ‘ದಂಡಿ’ ಎಂಬ ಚಿತ್ರವೊಂದನ್ನು ನಿರ್ದೇಶನ ಮಾಡಿದ್ದಾನೆ. ಅದು ಅಂತಾರಾಷ್ಟ್ರೀಯ ಫಿಲಂ ಫೆಸ್ಟಿವಲ್‌ನಲ್ಲಿ ಪ್ರಥಮ ಪ್ರಶಸ್ತಿಯನ್ನು ಬಾಚಿಕೊಂಡಿದೆ. ಇದು ಸಿನಿಮಾ ಸ್ಕೂಲ್‌ನ ಅಸಲೀ ಕಸುವಿಗೆ ಸಾಕ್ಷಿ.

ಸಿನಿಮಾ ಕಲಿಕೆ ಮಾಡಬೇಕೆಂದಿರುವ ಎಲ್ಲ ವರ್ಗದವರ ಆಶೋತ್ತರಗಳಿಗೆ ಅನುಕೂಲವಾಗುವಂತೆ ಸಿನಿಮಾ ಸ್ಕೂಲ್‌ನಲ್ಲಿ ಮೂರು ಬಗೆಯ ಕೋರ್ಸ್‌ಗಳನ್ನು ರೂಪಿಸಲಾಗಿದೆ. ಅದರಲ್ಲಿನ ಒಂದು ಬಗೆಯ ಕೋರ್ಸ್ ಪೂರ್ಣಾವಧಿಯಲ್ಲಿ ಹಾಜರಾಗಿ ಕಲಿಯುವ ಉದ್ದೇಶ ಹೊಂದಿರುವಂಥ ಅಭ್ಯರ್ಥಿಗಳಿಗಾಗಿ ಸಿದ್ಧಪಡಿಸಲಾಗಿದೆ. ಸೋಮವಾರದಿಂದ ಶುಕ್ರವಾರದವರೆಗೆ ಬೆಳಗ್ಗೆ ಹತ್ತರಿಂದ ಸಂಜೆ ನಾಲಕ್ಕು ಗಂಟೆಯವರೆಗೆ ಈ ಬ್ಯಾಚಿನ ತರಗತಿಗಳು ಎರಡು ತಿಂಗಳ ಕಾಲ ನಡೆಯಲಿವೆ. ಆದರೆ, ಬದುಕಿಗಾಗಿ ಯಾವುದೋ ಕೆಲಸ ಮಾಡುತ್ತಾ, ಸಿನಿಮಾ ಕನಸು ಹೊತ್ತವರಿಗೆ ಪೂರ್ಣಾವಧಿ ಕೋರ್ಸಿನಲ್ಲಿ ಪಾಲ್ಗೊಳ್ಳುವ ಅವಕಾಶ ಸಿಕ್ಕುವುದಿಲ್ಲ. ಅವರಿಗೆಂದೇ ಸಂಜೆ ತರಗತಿಗಳನ್ನು ರೂಪಿಸಲಾಗಿದೆ. ಈ ತರಗತಿಗಳು ಸಂಜೆ ಆರಂರಿಂದ, ರಾತ್ರಿ ಒಂಬತ್ತರವರೆಗಿನ ಈ ಕೋರ್ಸ್‌ಗಳು ಮೂರು ತಿಂಗಳ ಕಾಲಾವಧಿಯನ್ನು ಹೊಂದಿದೆ.

ಅದರಲ್ಲೂ ಕೆಲ ಮಂದಿಗೆ ಈ ಸಂಜೆ ತರಗತಿಗಳಲ್ಲಿ ಪಾಲ್ಗೊಳ್ಳುವ ಅವಕಾಶವೂ ಇರುವುದಿಲ್ಲ. ಅಂಥವರ‍್ಯಾರೂ ಮರುಗಬೇಕಿಲ್ಲ. ಯಾಕೆಂದರೆ, ಸಿನಿಮಾ ಸ್ಕೂಲ್‌ನಲ್ಲಿ ವೀಕೆಂಡ್ ತರಗತಿಗಳು ಅವರಿಗೆಂದೇ ರೂಪುಗೊಂಡಿವೆ. ಶನಿವಾರ ಅರ್ಧ ದಿನ ಮತ್ತು ಭಾನುವಾರದಂದು ಬೆಳಗ್ಗೆ ಹತ್ತರಿಂದ ಸಂಜೆ ಐದರವರೆಗೆ ಈ ಕ್ಲಾಸುಗಳು ನಡೆಯಲಿವೆ. ಕಲಿಕೆಗೆ ಕಡಿಮೆ ಕಾಲಾವಕಾಶ ಇರೋದರಿಂದ ಈ ಕೋರ್ಸನ್ನು ನಾಲಕ್ಕು ತಿಂಗಳ ಕಾಲ ನಡೆಸಲು ತೀರ್ಮಾನಿಸಲಾಗಿದೆ. ಹೀಗೆ ರೂಪಿಸಲ್ಪಟ್ಟಿರುವ ಪ್ರತೀ ಕೋರ್ಸಿನಲ್ಲಿಯೂ ವಿದ್ಯಾರ್ಥಿಗಳನ್ನು ಪ್ರತಿಯೊಂದು ವಿಚಾರದಲ್ಲಿಯೂ ತಯಾರುಗೊಳಿಸಲೊಂದು ಪರಿಣಿತರ ತಂಡ ರೆಡಿಯಾಗಿದೆ. ಸಿನಿಮಾ ರಂಗದಲ್ಲಿ ನಾನಾ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದವರೇ ಇಲ್ಲಿ ಪಾಠ ಮಾಡಲಿರೋದು ನಿಜವಾದ ವಿಶೇಷ.

ಬ್ರೀಥ್, ವಾಯ್ಸ್, ಮೈಂಡ್ ಎಮೋಷನ್ಸ್, ಬಾಡಿ ಗ್ಯಾಂಗ್ವೇಜ್ ಸೇರಿದಂತೆ ಆರಂಭಿಕ ಕಲಿಕೆಗಳಿರುತ್ತವೆ. ಆ ನಂತರದಲ್ಲಿ ರಂಗಭೂಮಿಯ ವಾತಾವರಣವನ್ನು ಅಭ್ಯರ್ಥಿಗಳಿಗೆ ಸೃಷ್ಟಿಸಿ ಕೊಡಲಾಗುತ್ತದೆ. ಅದರಲ್ಲಿ ಒಂದಷ್ಟು ಪರಿಣತಿ ಹೊಂದಿದ ನಂತರ ಸಿನಿಮಾ ಸ್ಕೂಲ್ ಕಡೆಯಿಂದಲೇ ಬೀದಿ ನಾಟಕವೊಂದನ್ನು ರೂಪಿಸಿ, ಅದರಲ್ಲಿ ನಟಿಸಲು ಅವಕಾಶ ಮಾಡಿಕೊಡಲಾಗುತ್ತದೆ. ಈ ಹಂತ ದಾಟಿಕೊಂಡ ಅಭ್ಯರ್ಥಿಗಳು ಸರ್ವ ರೀತಿಯಿಂದಲೂ ಪರಿಪಕ್ವವಾದ ನಂತರದಲ್ಲಿ ಕ್ಯಾಮೆರಾ ಎದುರಿಸುವ ಬಗೆಯನ್ನು ಕಲಿಸಲಾಗುತ್ತದೆ. ಇದರ ಜೊತೆ ಜೊತೆಗೇ ಡ್ಯಾನ್ಸ್, ಮಾಡಡೆಲಿಂಗ್‌ನಂಥಾದ್ದನ್ನೂ ಕಲಿಸಲಾಗುತ್ತದೆ. ಫೋಟೋ ಶೂಟ್, ಮೇಕಪ್ ಹಾಗೂ ಆಡಿಷನ್ನುಗಳಿಗೆ ರೆಡಿಯಾಗೋ ಬಗೆಯನ್ನೂ ಹೇಳಿ ಕೊಡಲಾಗುತ್ತದೆ. ಹೀಗೆ ಕೋರ್ಸಿನ ಅಂತಿಮ ಘಟ್ಟ ತುಲುಪಿಕೊಂಡಾದ ಮೇಲೆ ಸಿನಿಮಾ ಸ್ಕೂಲ್ ಕಡೆಯಿಂದಲೇ ಒಂದು ಕಿರುಚಿತ್ರವನ್ನು ನಿರ್ಮಿಸಿ ಅದರಲ್ಲಿ ನಟಿಸಲು ಅವಕಾಶ ಮಾಡಿ ಕೊಡಲಾಗುತ್ತದೆ.

ಹೀಗೆ ತರಬೇತಿ ಪಡೆದ ನಂತರವೂ ಸಿನಿಮಾಗಳಲ್ಲಿ ಅವಕಾಶ ಹುಡುಕೋದೊಂದು ಸಾಹಸ. ಸಿನಿಮಾ ಸ್ಕೂಲ್‌ನಲ್ಲಿ ಕಲಿತ ಅಭ್ಯರ್ಥಿಗಳು ಅಂಥಾ ಯಾವುದೇ ಪಡಿಪಾಟಲುಗಳನ್ನೂ ಅನುಭವಿಸುವ ಪ್ರಮೇಯ ಬರುವುದಿಲ್ಲ. ಯಾಕೆಂದರೆ, ತರುಣ್ ಶಿವಪ್ಪ ಸಾರಥ್ಯದ ತರುಣ್ ಟಾಕೀಸ್‌ನಲ್ಲಿಯೇ ಹಲವಾರು ಚಿತ್ರಗಳು ನಿರ್ಮಾಣಗೊಳ್ಳುತ್ತವೆ. ಇನ್ನೊಂದಷ್ಟು ಸಿನಿಮಾಗಳು ಸರತಿಯಲ್ಲಿವೆ. ಈ ಸಿನಿಮಾ ಸ್ಕೂಲಿನಲ್ಲಿ ಕಲಿತವರಿಗೆ ಅವರವರ ಆಸಕ್ತಿಗನುಗುಣವಾಗಿ ತಮ್ಮ ಸಿನಿಮಾಗಳಲ್ಲಿಯೇ ಅವಕಾಶ ಕೊಡಲು ತರುಣ್ ಶಿವಪ್ಪ ಮುಂದಾಗಿದ್ದಾರೆ. ಒಟ್ಟಾರೆಯಾಗಿ ಹೇಳಬೇಕೆಂದರೆ, ಸಿನಿಮಾ ಸ್ಕೂಲಿನ ತಳಹದಿಯೇ ಭಿನ್ನವಾಗಿದೆ. ಅದು ಎಲ್ಲ ವರ್ಗದ ಆಕಾಂಕ್ಷಿಗಳಿಗೂ ನಿಲುಕುವಂತಿದೆ. ನಿಮಗೂ ಈ ಬಗ್ಗೆ ಆಸಕ್ತಿ ಇದ್ದರೆ ಈಗಲೇ ಹೆಸರು ನೋಂದಾಯಿಸಿಕೊಂಡು ಪ್ರವೇಶ ಪಡೆಯಬಹುದಾಗಿದೆ. ಆಸಕ್ತರು #40, ಎರಡನೇ ಮಹಡಿ, ನಮ್ಮೂರ ತಿಂಡಿ ಹತ್ತಿರ, ಎನ್ ಜಿ ಇ ಎಫ್ ಲೇಔಟ್ ಪಾರ್ಕ್ ಎದುರು, ನಾಗರಬಾವಿ ಬೆಂಗಳೂರು- 560072. ಮೊ: 92069 20689… ಆಸಕ್ತರು ಈ ವಿಳಾಸದಲ್ಲಿರುವ ಸಿನಿಮಾ ಸ್ಕೂಲ್ ಅನ್ನು ಸಂಪರ್ಕಿಸಬಹುದು.

The post ತರುಣ್ ಶಿವಪ್ಪ ಸಾರಥ್ಯದ ಸಿನಿಮಾ ಸ್ಕೂಲ್‌ನ ಹೊಸಾ ಬ್ಯಾಚ್ ಶುರು! appeared first on ಶೋಧ ನ್ಯೂಸ್ - Shodha News.