ಝೈದ್ ಖಾನ್ ನಾಯಕನಾಗಿ ನಟಿಸಿರುವ ಬನಾರಸ್ ಇದೀಗ ದೇಶಾದ್ಯಂತ ಯಶಸ್ವೀ ಪ್ರದರ್ಶನ ಕಾಣುತ್ತಿದೆ. ಎಲ್ಲ ಅಡೆತಡೆಗಳನ್ನೂ ಮೀರಿಕೊಂಡು, ಈ ಚಿತ್ರವೀಗ ಕರ್ನಾಟಕದಲ್ಲಿಯೂ ಗಟ್ಟಿಯಾಗಿ ಕಾಲೂರಿ ನಿಂತಿದೆ. ಈ ಮೂಲಕ ಝೈದ್ ಖಾನ್ ಭರವಸೆಯ ನಾಯಕನಾಗಿಯೂ ಹೊರಹೊಮ್ಮಿದ್ದಾರೆ. ಇದೊಂದು ರೀತಿಯಲ್ಲಿ ರೋಮಾಂಚಕ ಗೆಲುವೆಂದರೂ ಅತಿಶಯವೇನಲ್ಲ. ಇದು ಸಾಧ್ಯವಾಗಿದ್ದು ಹೇಗೆ? ಎಲ್ಲವನ್ನೂ ಗೌಣವಾಗಿಸಿದಂತೆ ಬನಾರಸ್ ಪ್ರೇಕ್ಷಕರನ್ನು ಈ ರೀತಿಯಲ್ಲಿ ಸೆಳೆಯುವಂತೆ ಮಾಡಿದ ಮಾಯೆ ಯಾವುದು ಅಂತೆಲ್ಲ ನೋಡಹೋದರೆ ಬನಾರಸ್‌ನ ಸಮ್ಮೋಹಕ ಹಾಡುಗಳ ಸಾಲು ಎದುರುಗೊಳ್ಳುತ್ತೆ!

ಹಾಡುಗಳು ಗೆದ್ದರೆ ಸಿನಿಮಾವೂ ಗೆಲ್ಲುತ್ತೆ ಅನ್ನೋದು ಸಿನಿಮಾ ರಂಗದ ಹಳೇ ಫಾರ್ಮುಲಾ. ಆದರೆ, ಅದು ಕಾಲಕಾಲಕ್ಕೆ ನಿಜವಾಗುತ್ತಾ, ಮತ್ತಷ್ಟು ಹೊಳಪುಗಟ್ಟಿಕೊಂಡು ಮುಂದುವರೆಯುತ್ತಿದೆ. ಹಾಗೆ ಹಾಡುಗಳ ಒಡ್ಡೋಲಗದಲ್ಲಿಯೇ ಗೆಲುವು ದಾಖಲಿಸಿದ ಚಿತ್ರಗಳ ಸಾಲಿನಲ್ಲಿ ಬನಾರಸ್ ಕೂಡಾ ತನ್ನದೇ ಆದ ಸ್ಥಾನ ಗಿಟ್ಟಿಸಿಕೊಂಡಿದೆ. ಆರಂಭಿಕವಾಗಿ ಬನಾರಸ್ ಅಚ್ಚರಿಯಂತೆ ಪ್ರೇಕ್ಷಕರೆಲ್ಲರ ಮನಸಿಗೆ ತಾಕಿದ್ದೇ ಮಾಯಗಂಗೆ ಎಂಬ ಹಾಡಿನ ಮೂಲಕ. ಅದು ಟ್ರೆಂಡಿಂಗ್‌ನಲ್ಲಿರುವಾಗಲೇ ಲಾಂಚ್ ಆಗಿದ್ದದ್ದು ಬೆಳಕಿನ ಕವಿತೆ ಎಂಬ ಹಾಡು. ಹಾಗೆ ಬನಾರಸ್ ಬಿಡುಗಡೆಗೊಂಡ ನಂತರದಲ್ಲಿ ಹಾಡುಗಳ ಬಗ್ಗೆ ಯಾವ ರೇಂಜಿಗೆ ಕ್ರೇಜ್ ಮೂಡಿಕೊಂಡಿದೆಯೆಂದರೆ, ಕನ್ನಡವೂ ಸೇರಿದಂತೆ ಐದು ಭಾಷೆಗಳಲ್ಲಿ ಈ ಹಾಡಿಗೀಗ ಏಳು ಮಿಲಿಯನ್ನಿಗೂ ಅಧಿಕ ವೀಕ್ಷಣೆ ಸಿಕ್ಕಿದೆ.

ಗಮನೀಯ ಅಂಶವೆಂದರೆ, ಸಿನಿಮಾ ಬಿಡುಗಡೆಯಾದ ತರುವಾಯ, ಬನಾರಸ್ ಹಾಡುಗಳ ವೀಕ್ಷಣೆ ಗಣನೀಯ ಮಟ್ಟದಲ್ಲಿ ಏರುಗತಿ ಕಂಡಿದೆ. ಬೆಳಕಿನ ಕವಿತೆ ಹಾಡಂತೂ ಸಾಹಿತ್ಯ ಮಾತ್ರವಲ್ಲದೇ, ದೃಷ್ಯಗಳ ಮೂಲಕವೂ ಪ್ರೇಕ್ಷಕರನ್ನು ಸೆಳೆದಿತ್ತು. ಅರುಣ್ ಸಾಗರ್ ಕಲಾ ನಿರ್ದೇಶನ ಮತ್ತು ಎ ಹರ್ಷ ಅವರ ಕೋರಿಯೋಗ್ರಫಿ ಆ ಹಾಡಿಗೆ ಬೇರೆಯದ್ದೇ ರೀತಿಯ ಮೆರುಗು ನೀಡಿತ್ತು. ವಿ ನಾಗೇಂದ್ರ ಪ್ರಸಾದ್ ಅವರಂತೂ ಈ ಹಾಡಿಗೆ ಎಲ್ಲರಿಗೂ ಇಷ್ಟವಾಗುವಂಥಾ ಸಾಹಿತ್ಯವನ್ನೊದಗಿಸಿದ್ದರು. ಈ ಮೂಲಕ ಬೆಳಕಿನ ಕವಿತೆ ಸಾರ್ವಕಾಲಿಕ ಇಷ್ಟದ ಗೀತೆಯಾಗಿ ಹೊರಹೊಮ್ಮಿತ್ತು. ಕೇವಲ ಬೆಳಕಿನ ಕವಿತೆ ಮಾತ್ರವಲ್ಲ; ಬನಾರಸ್‌ನ ಪ್ರತೀ ಹಾಡುಗಳೂ ಸದಾ ಕಾಲವೂ ಉಳಿಯುವಂತೆ ಮೂಡಿ ಬಂದಿವೆ. ಈ ಪಲ್ಲಟದಿಂದ ನಿರ್ದೇಶಕ ಜಯತೀರ್ಥ, ಝೈದ್ ಖಾನ್, ಸೋನಲ್ ಸೇರಿದಂತೆ ಒಂದಿಡೀ ಚಿತ್ರತಂಡವೇ ಖುಷಿಗೊಂಡಿದೆ.

The post ಮಾಗಗಂಗೆಗೆ ಬೆಳಕಿನ ಕವಿತೆಯ ಮುಂಬೆಳಕು! appeared first on ಶೋಧ ನ್ಯೂಸ್ - Shodha News.

ಸಿನಿಮಾ ಹಾಡೊಂದಕ್ಕಾಗಿ ಮೈ ತುಂಬಾ ಬೆರಗು ತುಂಬಿಕೊಂಡು ಕಾಯೋದಿದೆಯಲ್ಲಾ? ಕನ್ನಡ ಚಿತ್ರರಂಗದ ಇದುವರೆಗಿನ ಹಾದಿಯ ತುಂಬಾ ಅಂಥಾದ್ದೊಂದು ರೋಮಾಂಚಕ ಸನ್ನಿವೇಶಗಳ ಗಂಧ ಹರಡಿಕೊಂಡಿದೆ. ಸಿನಿಮಾ ರಂಗ ಒಂದಷ್ಟು ಮಜಲುಗಳನ್ನು ಸವರಿಕೊಂಡು ಬಂದು, ಈವತ್ತಿಗೆ ಯಶದ ಪರ್ವದತ್ತ ಹೊರಳಿಕೊಂಡಿದೆ. ಈ ಯಾನದಲ್ಲಿ ಹಾಡುಗಳಿಗಾಗಿ ಕಾಯುವ, ಎದೆಗೆ ತಾಕಿಸಿಕೊಂಡು ಸಂಭ್ರಮಿಸುವ ಖುಷಿ ಮಾತ್ರ ಸವಕಲಾಗದೆ ಹಾಗೇ ಉಳಿದುಕೊಂಡಿದೆ. ಅಂಥಾದ್ದೊಂದು ನವಿರು ಭಾವಗಳನ್ನು ಮತ್ತೊಮ್ಮೆ ತೀವ್ರವಾಗಿಸಿದ ಖ್ಯಾತಿ ನಿಸ್ಸಂದೇಹವಾಗಿಯೂ ಜಯತೀರ್ಥ ನಿರ್ದೇಶನದ ಬನಾರಸ್ ಚಿತ್ರಕ್ಕೆ ಸಲ್ಲುತ್ತದೆ. ಮಾಯಗಂಗೆ ಅಂತೊಂದು ಹಾಡಿನ ಮೂಲಕ ಮನಗೆದ್ದಿದ್ದ ಬನಾರಸ್ ಕಡೆಯಿಂದೀಗ, ಬೆಳಕಿನ ಕವಿತೆ ಎಂಬ ಮುದ್ದಾದ ಹಾಡು ಬಿಡುಗಡೆಗೊಂಡಿದೆ.

ಹಾಡಿಗಿರುವ ಶಕ್ತಿಯನ್ನು ಸಮರ್ಥವಾಗಿ ಬಳಿಸಿಕೊಳ್ಳೋದೂ ಒಂದು ಕಲೆ. ನಿರ್ದೇಶಕ ಜಯತೀರ್ಥ ಆರಂಭದಿಂದ ಇಲ್ಲಿಯ ವರೆಗೂ ಆ ನಿಟ್ಟಿನಲ್ಲಿ ಸೈ ಅನ್ನಿಸಿಕೊಂಡು ಬಂದಿದ್ದಾರೆ. ಬನಾರಸ್ ವಿಚಾರದಲ್ಲಿ ಅಜನೀಶ್ ಲೋಕನಾಥ್ ಸಾಥ್ ಸಿಕ್ಕಿರೋದರಿಂದ ಹಾಡುಗಳಿಗೆ ಮತ್ತಷ್ಟು ಆವೇಗ ಬಂದಂತಾಗಿದೆ. ಅದೇ ಹಾದಿಯಲ್ಲಿ ರೂಪುಗೊಂಡಿರುವ ಬೆಳಕಿನ ಕವಿತೆ ಹಾಡು, ಸಂಜಿತ್ ಹೆಗ್ಡೆ ಮತ್ತು ಸಂಗೀತಾ ರವೀಂದ್ರನಾಥ್ ಕಂಠದಲ್ಲಿ ಅದ್ಭುತವಾಗಿ ಮೂಡಿ ಬಂದಿದೆ. ಒಂದೇ ಸಲಕ್ಕೆ ಎಂಥವರನ್ನಾದರೂ ವಶಪಡಿಸಿಕೊಳ್ಳ ಬಲ್ಲ ಮಾಂತ್ರಿಕತೆ ಹೊಂದಿರೋ ಈ ವೀಡಿಯೋ ಸಾಂಗ್ ಅತ್ಯಂತ ಕಡಿಮೆ ಅವಧಿಯಲ್ಲಿಯೇ ಹೆಚ್ಚೆಚ್ಚು ವೀಕ್ಷಣೆ ಪಡೆದುಕೊಂಡು ಮುನ್ನುಗ್ಗುತ್ತಿದೆ. ಈ ವೀಡಿಯೋ ಸಾಂಗ್ ಇಷ್ಟು ಆಕರ್ಷಕವಾಗಿ ಮೂಡಿ ಬಂದಿರೋದರಲ್ಲಿ ನೃತ್ಯ ನಿರ್ದೇಶಕ ಎ ಹರ್ಷ ಅವರ ಪಾಲೂ ಇದೆ. ಕಲಾ ನಿರ್ದೇಶನ ಮಾಡಿರುವ ಅರುಣ್ ಸಾಗರ್ ಕೈಚಳಕವೂ ಗಮನ ಸೆಳೆಯುವಂತಿದೆ.

ಈವರೆಗೆ ಬಂದಿರುವ ಹಾಡುಗಳನ್ನು ಆಸ್ವಾದಿಸಿದ್ದವರೆಲ್ಲ ಬೆಳಕಿನ ಕವಿತೆಗಾಗಿ ತೀವ್ರವಾಗಿಯೇ ಹಂಬಲಿಸಿದ್ದರು. ಇದೀಗ ಅದೆಲ್ಲವನ್ನೂ ಸಾರ್ಥಕಗೊಳಿಸುವಂತೆ ‘ಬೆಳಕಿನ ಕವಿತೆ ಬೆರಗಿಗೆ ಸೋತೆ ಬೆಳದಿಂಗಳೇ ಮೆರವಣಿಗೆ’ ಎಂಬ ಈ ಹಾಡು ಮೂಡಿ ಬಂದಿದೆ. ಈ ಮೂಲಕ ಅಜನೀಶ್ ಲೋಕನಾಥ್ ನಿಜಕ್ಕೂ ಮತ್ತೊಮ್ಮೆ ತಮ್ಮ ಕೈಚಳಕ ತೋರಿಸಿದ್ದಾರೆ. ಜನರೆಲ್ಲ ಯಾವ ನಿರೀಕ್ಷೆಯಿಟ್ಟುಕೊಂಡು ಕಾದಿದ್ದರೋ, ಅದೆಲ್ಲವೂ ಬೆಳದಿಂಗಳೇ ಎದೆಗಿಳಿದಂಥಾ ಈ ಹಾಡಿನ ಮೂಲಕ ಸಾರ್ಥಕ್ಯ ಕಂಡಿದೆ. ಕೇವಲ ಸಾಹಿತ್ಯ, ಸಂಗೀತದ ವಿಚಾರದಲ್ಲಿ ಮಾತ್ರವಲ್ಲ; ದೃಶ್ಯ ವೈಭವದ ವಿಚಾರದಲ್ಲಿಯೂ ಈ ವೀಡಿಯೋ ಸಾಂಗ್ ಗಮನ ಸೆಳೆಯುವಂತಿದೆ. ತಾಜಾತನ ಮತ್ತು ರೋಮಾಂಚಕ ಸನ್ನಿವೇಶಗಳಲ್ಲಿ ಅದ್ದಿ ತೆಗೆದಂಥಾ ದೃಶ್ಯಗಳ ನಡುವೆ ಝೈ ಖಾನ್ ಮತ್ತು ಸೋನಲ್ ಮೊಂತೇರೋ ಅಕ್ಷರಶಃ ಮಿಂಚಿದ್ದಾರೆ.

ಈ ಬೆಳಕಿನ ಕವಿತೆಯೊಂದಿಗೆ ಚಿತ್ರ ಸಾಹಿತಿ ಡಾ. ವಿ ನಾಗೇಂದ್ರ ಪ್ರಸಾದ್ ಕೂಡಾ ಮಿಂಚಿದ್ದಾರೆಂಬುದು ಸತ್ಯ. ಕನ್ನಡ ಚಿತ್ರರಂಗದ ಮಟ್ಟಿಗೆ ನಾಗೇಂದ್ರ ಪ್ರಸಾದ್ ಭಿನ್ನ ನೆಲೆಯ ಗೀತ ಸಾಹಿತಿ. ಯಾವ ಪ್ರಾಕಾರದ ಹಾಡಿಗಾದರೂ ಸೈ ಎಂಬಂಥಾ ಮನೋಭಾವದ ಅವರು, ಅದೆಲ್ಲದರಲ್ಲಿಯೂ ಗೆಲುವು ಕಂಡಿದ್ದಾರೆ. ಈವತ್ತಿಗೆ ಬನಾರಸ್‌ನ ಮಾಯಗಂಗೆ ಈ ಪರಿಯಾಗಿ ಕ್ರೇಜ್ ಹುಟ್ಟು ಹಾಕಿರೋದರ ಹಿಂದೆ ನಾಗೇಂದ್ರ ಪ್ರಸಾದರ ಪಾತ್ರವೂ ಬಹಳಷ್ಟಿದೆ. ಅವರೇ ಸೃಷ್ಟಿಸಿರುವ ಬೆಳಕಿನ ಕವಿತೆ ಕೂಡಾ ಅಂಥಾದ್ದೇ ದಾಖಲೆ ಸೃಷ್ಟಿಸೋದರಲ್ಲಿ ಯಾವ ಸಂದೇಹವೂ ಇಲ್ಲ. ಒಟ್ಟಾರೆಯಾಗಿ, ಈ ಹಾಡು ಬನಾರಸ್‌ನ ಜೀವಾಳವನ್ನು ಸಂಗೀತದ ಸಾಂಗತ್ಯದಲ್ಲಿ ಸಮರ್ಥವಾಗಿಯೇ ಪ್ರೇಕ್ಷಕರತ್ತ ದಾಟಿಸಿದೆ. ಇನ್ನೇನು ಬಿಡುಗಡೆಗೆ ಕೆಲ ದಿನಗಳಷ್ಟೇ ಬಾಕಿ ಇರುವ ಈ ಹೊತ್ತಿನಲ್ಲಿ, ಬೆಳಕಿನ ಕವಿತೆಯ ಮೂಲಕ ಅವರ್ಣನೀಯ ಬೆರಗೊಂದು ಎಲ್ಲರ ಮನಸಿಗಂಟಿಕೊಂಡಿದೆ!

The post ಇದು ಸದಾ ಕಾಡುವ ಬೆಳಕಿನ ಕವಿತೆ! appeared first on ಶೋಧ ನ್ಯೂಸ್ - Shodha News.