ಕೇವಲ ಕನ್ನಡ ಚಿತ್ರರಂಗದ ವಿಚಾರದಲ್ಲಿ ಮಾತ್ರವಲ್ಲ; ಸಾಹಿತ್ಯಕ ವಲಯದಲ್ಲಿಯೂ ಮಹತ್ವದ್ದಾಗಿ ಗುರುತಿಸಿಕೊಂಡಿರುವ ಚಿತ್ರ (maavu bevu) `ಮಾವು ಬೇವು’. ಒಂದು ಬಗೆಯ ಚಿತ್ರಗಳ ಗುಂಗು ಹತಿರುವಾಗ, ಆ ಚೌಕಟ್ಟು ಮೀರಿದ ಚಿತ್ರವೊಂದು ತಯಾರಾಗಿದೆ ಎಂಬುದೇ ತಂಗಾಳಿ ತೀಡಿದಂಥಾ ಅನುಭೂತಿ. ಅಂಥಾದ್ದೊಂದು ದಿವ್ಯ ಭಾವವೀಗ ಸದಭಿರುಚಿಯ ಪ್ರೇಕ್ಷಕರ ಮೈ ಮನಸುಗಳನ್ನಾವರಿಸಿಕೊಂಡಿದೆ. ಅದೆಲ್ಲವೂ ಸಾಧ್ಯವಾಗಿರೋದು (suchendra prasad) ಸುಚೇಂದ್ರ ಪ್ರಸಾದ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ `ಮಾವು ಬೇವು’ ಚಿತ್ರದ ಮೂಲಕ. ಒಂದರ್ಥದಲ್ಲಿ ಇದು ಸದರಿ ಚಿತ್ರಕ್ಕೆ ಲಭಿಸಿರುವ ಆರಂಭಿಕ ಯಶವೆಂದರೂ ಅತಿಶಯವೇನಲ್ಲ. ಅಷ್ಟಕ್ಕೂ ಮಾವು ಬೇವು ಚಿತ್ರ ಆರಂಭವಾದ ರೀತಿ, ಅದಕ್ಕೆ ಕಾರಣವಾದ ಸ್ಫೂರ್ತಿ, ಅದಕ್ಕಾಗಿ ನಡೆದ ದಿಗ್ಗಜರ ಪ್ರಯತ್ನಗಳೆಲ್ಲವೂ ಸಮ್ಮೋಹಕ ಅಧ್ಯಾಯ. ಅದೆಲ್ಲವೂ ದೃಷ್ಯ ರೂಪ ಧರಿಸಿ ಸಾರ್ಥಕ್ಯಗೊಂಡಿದ್ದರಲ್ಲಿ (producer) ನಿರ್ಮಾಪಕರಾದ (s rajashekhar) ಎಸ್.ರಾಜಶೇಖರ್ ಅವರ ಪಾತ್ರ ನಿಜಕ್ಕೂ ಮಹತ್ತರವಾದದ್ದು!

ಸಿನಿಮಾ ನಿರ್ಮಾಣವೆಂಬುದೇ ಅಪ್ಪಟ ವಾಣಿಜ್ಯಕ ವ್ಯವಹಾರ. ಕಾಸು ಹಾಕಿ ದುಪ್ಪಟ್ಟಾಗಿ ವಾಪಾಸು ಪಡೆಯೋದರತ್ತಲೇ ಬಹುತೇಕರ ಕಣ್ಣು ನೆಟ್ಟಿರುತ್ತದೆ. ಬಹುಶಃ ಇಂಥಾ ಮನಃಸ್ಥಿತಿ ಮಾತ್ರವೇ ಇದ್ದಿದ್ದರೆ, ಖಂಡಿತವಾಗಿಯೂ ಕನ್ನಡ ಚಿತ್ರರಂಗ ಹೊಸತರತ್ತ ತೆರೆದುಕೊಳ್ಳಲು, ಪ್ರಯೋಗಗಳಿಗೆ ಒಡ್ಡಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಹೊಸತನ ಹೊದ್ದ, ಸಂದೇಶ ಸಾರುವ ಸದಭಿರುಚಿಯ ಸಿನಿಮಾಗಳನ್ನೇ ಗುರಿಯಾಗಿಸಿಕೊಂಡ ರಾಜಶೇಖರ್ ಥರದ ನಿರ್ಮಾಪಕರ ಬೆಂಬಲವಿಲ್ಲದೇ ಹೋಗಿದ್ದರೆ `ಮಾವು ಬೇವು’ ಚಿತ್ರ ಈ ಹಂತ ತಲುಪುವುದು ಕನಸಿನ ಮಾತಾಗುಳಿಯುತ್ತಿತ್ತು. ಎಸ್‍ಪಿ ಬಾಲಸುಬ್ರಹ್ಮಣ್ಯಂ, ಸಿ.ಅಶ್ವತ್ಥ್, ದೊಡ್ಡರಂಗೇಗೌಡರಂಥಾ ದಿಗ್ಗಜರ ಕನಸು ಕನಸಾಗಿಯೇ ಉಳಿದು ಹೋಗುತ್ತಿತ್ತು.

ಈ ಚಿತ್ರ ನಿರ್ಮಾಣದ ಪ್ರಸ್ತಾವ ಬಂದಾಗಲೇ ಅತ್ಯಂತ ಖುಷಿಯಿಂದ ನಿರ್ಮಾಣ ಮಾಡಲು ಒಪ್ಪಿಕೊಂಡಿದ್ದವರು ಎಸ್.ರಾಜಶೇಖರ್. ಆ ನಂತರದಲ್ಲಿ ಅಷ್ಟೇ ಕಕ್ಕುಲಾತಿಯಿಂದ ಸಿನಿಮಾ ನಿರ್ಮಾಣ ಮಾಡಿ ಮುಗಿಸಿದ ಧನ್ಯತಾ ಭಾವವೊಂದು ಅವರನ್ನಾವರಿಸಿಕೊಂಡಿದೆ. ಸ್ವತಃ ಉದ್ಯಮಿಯಾಗಿದ್ದರೂ, ಸಾಹಿತ್ಯ, ಸಿನಿಮಾಗಳ ಮೇಲೆ ಅತೀವ ವ್ಯಾಮೋಹ ಹೊಂದಿರುವವರು ರಾಜಶೇಖರ್. ಆ ಅಭಿರುಚಿಯಿಂದಲೇ ಮಾವು ಬೇವು ಚಿತ್ರವನ್ನು ಅವರು ಶ್ರೀ ಸಾಯಿ ಗಗನ್ ಪ್ರೊಡಕ್ಷನ್ಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣ ಮಾಡಿದ್ದಾರೆ. ಸಿನಿಮಾ ವಲಯದ ಬಗ್ಗೆ ಅಪಾರವಾದ ಒಲವಿಟ್ಟುಕೊಂಡಿದ್ದ ಅವರು, 2016ರಲ್ಲಿ ಶ್ರೀ ಸಾಯಿ ಗಗನ್ ಪ್ರೊಡಕ್ಷನ್ಸ್ ಎಂಬ ನಿರ್ಮಾಣ ಸಂಸ್ಥೆಯನ್ನು ಆರಂಭಿಸಿದ್ದರು. ಅದರ ಮೂಲಕ ಚೆಂದದ ಸಿನಿಮಾಗಳನ್ನು ನಿರ್ಮಾಣ ಮಾಡಬೇಕೆಂಬ ಗುರಿ ಹೊಂದಿದ್ದ ರಾಜಶೇಖರ್ ಅವರು ಸ್ವತಂತ್ರವಾಗಿ ನಿರ್ಮಾಣ ಮಾಡಿದ್ದ ಮೊದಲ ಚಿತ್ರ `ಲೈಫ್ 360’.

ಆ ನಂತರದಲ್ಲಿ 2019ರಲ್ಲಿ `ವೈಟ್’ ಎಂಬ ಚಿತ್ರವನ್ನು ರಾಜಶೇಖರ್ ನಿರ್ಮಣ ಮಾಡಿದ್ದರು. ನೇತ್ರದಾನದ ಬಗ್ಗೆ ಮಹತ್ತರವಾದ ಅಂಶಗಳನ್ನೊಳಗೊಂಡಿದ್ದ ಈ ಚಿತ್ರಕ್ಕೆ ಐ ಬ್ಯಾಂಕ್ ಆಫ್ ಇಂಡಿಯಾ ಸಾಥ್ ಕೊಟ್ಟಿತ್ತು. ಆ ಬಳಿಕ ಅವರ ಮುಂದೆ ಬಂದಿದ್ದು ಮಾವು ಬೇವು ಸಿನಿಮಾ. ಒಟ್ಟಾರೆಯಾಗಿ ಎಲ್ಲ ಕೋನಗಳಿಂದಲೂ ಹೊಸತನ ಹೊಂದಿದ್ದ ಈ ಚಿತ್ರ ಬದುಕಿಗೆ ಹತ್ತಿರಾದ ಅಂಶಗಳನ್ನೊಳಗೊಂಡಿದೆ ಅನ್ನಿಸಿದ್ದರಿಂದಲೇ ರಾಜಶೇಖರ್ ನಿರ್ಮಾಣ ಮಾಡಲು ಮುಂದಾಗಿದ್ದರಂತೆ. ಸುಚೇಂದ್ರ ಪ್ರಸಾದ್, ಜನಪ್ರಿಯ ಗೀತೆಗಳ ಗುಚ್ಛಕ್ಕೆ ದೃಷ್ಯ ರೂಪ ಕೊಡಲು ಸಜ್ಜುಗೊಂಡಿದ್ದ ರೀತಿಯೇ ಅವರಿಗೆ ಮೆಚ್ಚುಗೆಯಾಗಿತ್ತಂತೆ. ಬದುಕಿನ ಏರಿಳಿತದ ಜೊತೆಯಲ್ಲಿಯೇ, ಮೌಲ್ಯಗಳನ್ನು ಪರಿಚಯಿಸುವ ಗುಣ ಹೊಂದಿರುವ ಆ ಚಿತ್ರ, ಮಹತ್ವದ ಮೈಲಿಗಲ್ಲಾಗುತ್ತದೆಂಬ ನಂಬಿಕೆ ಮೂಡಿದ್ದರಿಂದಲೇ ಅವರು ಬಲು ಆಸ್ಥೆಯಿಂದ ನಿರ್ಮಾಣ ಮಾಡಿದ್ದಾರೆ.

ರಾಜಶೇಖರ್ ಅವರ ಉತ್ಸಾಹ ಕಂಡು, ಸುಚೇಂದ್ರ ಪ್ರಸಾದ್ ಅವರ ಮೇಲಿನ ಗೌರವದಿಂದ ಲಹರಿ ವೇಲು ಕೂಡಾ ಈ ಚಿತ್ರಕ್ಕೆ ಸಾಥ್ ನೀಡಿದ್ದಾರೆ. ಇದು ರಾಜಶೇಖರ್ ಅವರ ಉತ್ಸಾಹ ನೂರ್ಮಡಿಸುವಂತೆ ಮಾಡಿದೆ. ಸುಚೇಂದ್ರ ಪ್ರಸಾದ್ ಅದ್ಭುತವಾದ ಕಥೆ ಸೃಷ್ಟಿಸಿ, ಅದಕ್ಕೆ ತಕ್ಕುದಾದ ಕಲಾವಿದರನ್ನು ಹುಡುಕಿ, ಒಂದಿಡೀ ಚಿತ್ರವನ್ನು ದೃಷ್ಯ ಕಾವ್ಯವಾಗಿಸಿದ ರೀತಿಯ ಬಗ್ಗೆ ರಾಜಶೇಖರ್ ಅವರಲ್ಲೊಂದು ಅಸೀಮ ಮೆಚ್ಚುಗೆ ಇದೆ. ಈ ಸಿನಿಮಾ ಮೂಲಕ ಒಂದು ಸತ್ಸಂಗವೇ ದಕ್ಕಿದ ಆತ್ಮ ತೃಪ್ತಿಯೂ ಅವರಲ್ಲಿದೆ. ಇದೆಲ್ಲದರಿಂದಾಗಿಯೇ ರಾಜಶೇಖರ್ ಅವರು ತಮ್ಮ ತಂದೆಯ ಹುಟ್ಟುಹಬ್ಬವಾದ ಏಪ್ರಿಲ್ ಇಪ್ಪತ್ತೊಂದರಂದೇ ಈ ಸಿನಿಮಾವನ್ನು ತೆರೆಗಾಣಿಸಲು ತೀರ್ಮಾನಿಸಿದ್ದಾರೆ. ಅದು ಮಾವು ಬೇವು ಚಿತ್ರದ ಬಗ್ಗೆ ಅವರಲ್ಲಿರುವ ಪ್ರೀತಿಗೊಂದು ಉದಾಹರಣೆಯಷ್ಟೇ.

ಮೂಲತಃ ಬೆಂಗಳೂರಿನವರೇ ಆಗಿರುವ ಎಸ್. ರಾಜಶೇಖರ್ ಪ್ರೌಢ ಶಿಕ್ಷಣವನ್ನು ನ್ಯಾಷನಲ್ ಹೈಸ್ಕೂಲಿನಲ್ಲಿ ಮುಗಿಸಿಕೊಂಡು, ವಿಜಯಾ ಕಾಲೇಜಿನಲ್ಲಿ ಕಾಮರ್ಸ್ ವಿಷಯದಲ್ಲಿ ಡಿಗ್ರಿಯನ್ನು ಡಿಸ್ಟಿಂಕ್ಷನಿನಲ್ಲಿ ಪಾಸು ಮಾಡಿಕೊಂಡಿದ್ದ ಪ್ರತಿಭಾವಂತ. ಆ ನಂತರದ ದಿನಗಳಲ್ಲಿ ಬದುಕಿನ ಪಥದಲ್ಲಿ ಗಂಭೀರವಾಗಿ ಹೆಜ್ಜೆಯಿಡುತ್ತಾ ಸಾಗಿ ಬಂದಿದ್ದ ಅವರು, ಕಷ್ಟಪಟ್ಟು ಬದುಕು ಕಟ್ಟಿಕೊಂಡಿದ್ದಾರೆ. 2014ರಲ್ಲಿ ವಿಜಯಾ  ವಾಣಿಜ್ಯ ಅಲ್ಮಿಯ ಫೌಂಡರ್ ಟ್ರಸ್ಟಿಯಾಗಿ ಕಾರ್ಯ ನಿರ್ವಹಿಸಿ, ಸಹಪಾಠಿಗಳ ಪ್ರೀತಿಯ ಒತ್ತಾಸೆಯ ಫಲವಾಗಿ ಆರು ವರ್ಷಗಳ ಕಾಲ ಕಾರ್ಯನಿರ್ವಹಿಸಿದ್ದರು. ಆ ನಂತರದಲ್ಲಿ ಎರಡು ವರ್ಷಗಳ ಕಾಲ ಫಾಸ್ಟ್ ಪ್ರೆಸಿಡೆಂಟ್ ಆಗಿಯೂ ಜವಾಬ್ದಾರಿ ನಿಭಾಯಿಸಿದ್ದರು. ಈ ಅವಧಿಯಲ್ಲಿ ನಾನಾ ಬಗೆಯ ಸಾರ್ಥಕ ಕ್ಷಣಗಳನ್ನು ತಮ್ಮದಾಗಿಸಿಕೊಂಡ ತುಂಬ ಖುಷಿ ರಾಜಶೇಖರ್ ಅವರಲ್ಲಿದೆ. ಇದೆಲ್ಲದರ ಜೊತೆಗೆಹಲವಾರು ವಿದ್ಯಾ ಸಂಸ್ಥೆಗಳ ಟ್ರಸ್ಟಿಯಾಗಿ, ಅಧ್ಯಕ್ಷರಾಗಿ ಅಕ್ಷರ ಸೇವೆಯನ್ನೂ ಮಾಡುತ್ತಾ ಬಂದಿರುವ ರಾಜಶೇಖರ್, ತಮ್ಮ ತಾಯಿಯ ಹೆಸರಿನಲ್ಲೇ ಸರ್ವಮಂಗಲ ಚಾರಿಟಬಲ್ ಎಂಬ ಫ್ಯಾಮಿಲಿ ಟ್ರಸ್ಟ್ ಅನ್ನೂ ಮುನ್ನಡೆಸುತ್ತಿದ್ದಾರೆ. ಈ ಮೂಲಕ ಅನೇಕ ಸಮಾಜಮುಖಿ ಕೆಲಸ ಕಾರ್ಯಗಳಲ್ಲಿಯೂ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ.

ಹೀಗೆ ರತಿಯೊಂಉ ವಿಚಾರದಲ್ಲಿಯೂ ಭಿನ್ನವಾಗಿ ಕಾಣಿಸುವ ರಾಜಶೇಖರ್, ನಿಸ್ಸಂದೇಹವಾಗಿಯೂ ಕನ್ನಡ ಚಿತ್ರರಂಗಕ್ಕೆ ಹೊಸಾ ದಿಕ್ಕು ತೋರುವ ಕಸುವಿರುವ ನಿರ್ಮಾಪಕರು. ಅವರೊಳಗೆ ವ್ಯವಹಾರದಾಚೆಗಿನ ಸಿನಿಮಾ ಪ್ರೇಮವೊಂದು ಪ್ರವಹಿಸದೇ ಇದ್ದಿದ್ದರೆ ಈವತ್ತಿಗೆ ಮಾವು ಬೇವು ಇತ್ರ ಮೈ ಕೈ ತುಂಬಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಈ ಸಿನಿಮಾ ಬಿಡುಗಡೆಯಾದ ನಂತರವೂ ಮತ್ತೊಂದಷ್ಟು ಒಳ್ಳೆ ಕಂಟೆಂಟಿನ ಸಿನಿಮಾಗಳನ್ನು ನಿರ್ಮಾಣ ಮಾಡಬೇಕೆಂಬ ಮಹದಾಸೆ ರಾಜಶೇಖರ್ ಅವರಲ್ಲಿದೆ. ನಿರ್ಮಾಣದ ವಿಚಾರದಲ್ಲಿ ಅತ್ಯಂತ ಶಿಸ್ತು ರೂಢಿಸಿಕೊಂಡಿರುವ ಅವರು, ಇನ್ನು ಮುಂದೆ ಎರಡು ವರ್ಷಕ್ಕೊಂದಾದರೂ ಸಿನಿಮಾ ನಿರ್ಮಾಣ ಮಾಡುವ ಗುರಿ ಹೊಂದಿದ್ದಾರೆ. ಅವರ ಕಡೆಯಿಂದ ಇನ್ನೊಂದಷ್ಟು ಸಿನಿಮಾಗಳ ನಿರ್ಮಾಣವಾಗಲಿ, ದೊಡ್ಡ ಮಟ್ಟದಲ್ಲಿ ಯಶ ಕಾಣಲೆಂಬುದು ಹಾರೈಕೆ!

The post life story: ಸದಭಿರುಚಿಯ ಚಿತ್ರಗಳೇ ರಾಜಶೇಖರ್ ಅವರ ಪ್ರಧಾನ ಆಧ್ಯತೆ! appeared first on ಶೋಧ ನ್ಯೂಸ್ - Shodha News.

ಕಡಲ ತೀರದ ಭಾರ್ಗವ ಚಿತ್ರ ತೆರೆಗಾಣಲು ಕ್ಷಣಗಣನೆ ಆರಂಭವಾಗಿದೆ. ಒಂದಿಡೀ ಚಿತ್ರತಂಡದ ಪರಿಶ್ರಮ ಸಾರ್ಥಕಗೊಳ್ಳುವ ಘಳಿಗೆಯೂ ಹತ್ತಿರಾಗುತ್ತಿದೆ. ಈ ಹೊತ್ತಿನಲ್ಲಿ ಕಡಲ ತೀರದ ಭಾರ್ಗವನ ಒಡಲಲ್ಲಿರಬಹುದಾದ ಕಥೆಗಳು, ಆ ಬಿಂದುವಿನಿಂದ ಗರಿಗೆದರಿಕೊಳ್ಳಲಿರೋ ಪಾತ್ರಗಳ ಸುತ್ತಾ ಒಂದಷ್ಟು ಚರ್ಚೆಗಳಾಗುತ್ತಿವೆ. ಐದು ಬಹುಮುಖ್ಯ ಪಾತ್ರಗಳ ಸುತ್ತ ಸುತ್ತುವ, ರೋಚಕ ತಿರುವುಗಳನ್ನು ಹೊಂದಿರುವ ಈ ಸಿನಿಮಾದಲ್ಲಿ ರಂಗಭೂಮಿಯಲ್ಲಿ ಹದಗೊಂಡಿರುವ ಅಪರೂಪದ ಪ್ರತಿಭೆ ರಾಘವ್ ನಾಗರಾಜ್ ಕೂಡಾ ಒಂದು ಪಾತ್ರವಾಗಿದ್ದಾರೆ. ಆ ಪಾತ್ರವೇ ತನ್ನ ವೃತ್ತಿ ಬದುಕಿಗೆ ಹೊಸಾ ದಿಕ್ಕು ತೋರಲಿದೆಯೆಂಬಂಥಾ ಗಾಢ ನಂಬುಗೆಯೂ ಅವರಲ್ಲಿದೆ.

ಇದು ಪನ್ನಗ ಸೋಮಶೇಖರ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚಿತ್ರ. ಈಗಾಗಲೇ ಟೀಸರ್, ಟ್ರೈಲರ್ ಮೂಲಕ ಇದರ ಕಸುವೇನೆಂಬುದರ ಸ್ಪಷ್ಟ ಸೂಚನೆಗಳು ಸಿಕ್ಕಿವೆ. ಅದರ ಮೂಲಕವೇ ಒಂದಷ್ಟು ಪಾತ್ರಗಳ ಚಹರೆಗಳೂ ಗೋಚರಿಸಿವೆ. ಅದರಲ್ಲಿ ರಾಘವ್ ನಾಗರಾಜ್ ನಟಿಸಿರುವ ಪಾತ್ರವೂ ಸೇರಿಕೊಂಡಿದೆ. ಈಗಾಗಲೇ ಹಲವಾರು ಸೀರಿಯಲ್ಲುಗಳಲ್ಲಿ ನಟಿಸಿ, ನಾಯಕರಾಗಿಯೂ ನೆಲೆ ಕಂಡುಕೊಳ್ಳುವ ಸನ್ನಾಹದಲ್ಲಿರುವವರು ರಾಘವ್. ಸಾಮಾನ್ಯವಾಗಿ, ರಂಗಭೂಮಿಯ ಹಿನ್ನೆಲೆಯಿಂದ ಬಂದವರಿಗೆ ಎಂಥಾ ಪಾತ್ರವನ್ನಾದರೂ ಆವಾಹಿಸಿಕೊಳ್ಳುವ ಸಾಮಥ್ರ್ಯ ದಕ್ಕಿರುತ್ತದೆಂಬ ನಂಬಿಕೆ ಇದೆ. ಅಂಥಾ ರಂಗಭೂಮಿಯ ಸಾಹಚರ್ಯವನ್ನೇ ತನ್ನ ನಟನೆಯ ಶಕ್ತಿಯಾಗಿಸಿಕೊಂಡವರು ರಾಘವ್ ನಾಗರಾಜ್!

ಇದೊಂದು ಸೈಕಾಲಾಜಿಕಲ್ ಥ್ರಿಲ್ಲರ್ ಕಥಾನಕವನ್ನೊಳಗೊಂಡಿರುವ ಚಿತ್ರ. ನಿಮಗೆಲ್ಲ ಗೊತ್ತಿಲ್ಲದಿರುವಂಥಾದ್ದೇನಲ್ಲ; ಈ ಮನಸಿಗೆ ಸಂಬಂಧಿಸಿದ ವ್ಯಾಧಿಗಳು ಅಕ್ಷರಶಃ ಸಮುದ್ರವಿದ್ದಂತೆ. ಅಂಥಾ ಸಮುದ್ರದಾಳಕ್ಕೆ ಇಳಿದು, ಎಲ್ಲರಿಗೂ ಹೊಸತೆನ್ನಿಸುವ ಅಚ್ಚರಿಗಳೊಂದಿಗೆ ನಿರ್ದೇಶಕರು ಈ ಸಿನಿಮಾದ ಕಥೆ ಹೆಣೆದಿದ್ದಾರೆ. ಹಾಗಿರುವಾಗ, ಅದರ ಪಾತ್ರಗಳೂ ಕೂಡಾ ವಿಶೇಷವಾಗಿರದಿರಲು ಸಾಧ್ಯವೇ? ರಾಘವ್ ನಿರ್ವಹಿಸುವ ಪಾತ್ರವೂ ನಾನಾ ಶೇಡುಗಳನ್ನು, ನಿಗೂಢಗಳನ್ನು ಒಂದಿದೆಯಂತೆ. ಪ್ರತೀ ಪಾತ್ರಗಳೂ ಸವಾಲಿನದ್ದಾಗಿರಬೇಕೆಂಬ ಇಂಗಿತವೊಂದು ರಾಘವ್‍ರೊಳಗಿತ್ತಲ್ಲಾ? ಅದಕ್ಕೆ ಸಿಕ್ಕಿದ ವರದಂಥಾ ಅಂಶಗಳನ್ನು ಸದರಿ ಪಾತ್ರ ಒಳಗೊಂಡಿದೆಯಂತೆ. ಮೂರು ಭಿನ್ನ ಶೇಡುಗಳ ಈ ಪಾತ್ರವನ್ನು ಜೀವಿಸಿ ನಟಿಸಿದ ಆತ್ಮತೃಪ್ತಿ ರಾಘವ್‍ರಲ್ಲಿದೆ.

ಹೀಗೆ ಕಡಲ ತೀರದ ಭಾರ್ಗವನ ಭಾಗವಾಗಿರುವ ರಾಘವ್ ನಾಗರಾಜ್ ಮೂಲತಃ ಮಲೆನಾಡಿನ ಹೆಬ್ಬಾಗಿಲಿನಂಥಾ ಶಿವಮೊಗ್ಗೆಯ ಆಯನೂರಿನವರು. ಅಲ್ಲಿ ಹುಟ್ಟಿ ಬೆಂಗಳೂರಿನೇ ಬೆಳೆದಿದ್ದರೂ ಊರ ಕಡೆಗಿನ ನಂಟನ್ನು ಇನ್ನೂ ಕಾಪಿಟ್ಟುಕೊಂಡಿರುವವರು. ಶಾಲಾ ಕಾಲೇಜು ದಿನಗಳಲ್ಲಿಯೇ ಸಾಂಸ್ಕøತಿಕ ಚಟುವಟಿಕೆಗಳಲ್ಲಿ ಮುಂದಿದ್ದ ರಾಘವ್, ತಾವೇ ಬರೆದು, ನಿರ್ದೇಶನ ಮಾಡಿ ನಾನಾ ನಾಟಕಗಳಲ್ಲಿ ಅಭಿನಯಿಸುತ್ತಾ ಸಹಪಾಠಿಗಳ ನಡುವೆ ಶೈನಪ್ ಆಗಿದ್ದರು. ಹಾಗೆ ಸಾಗಿ ಬಂದು, ಓದು ಮುಗಿಸುವ ಹೊತ್ತಿಗೆಲ್ಲ ನಟನಾಗಬೇಕೆಂಬ ಗುರಿಯನ್ನೇ ನೆಚ್ಚಿಕೊಂಡಿದ್ದರು. ಹಾಗೊಂದು ಅಚಲ ನಿರ್ಧಾರ ತಳೆದ ಬಳಿಕ ಅವರಿಗೆ ಸಿಕ್ಕಿದ್ದು ರಂಗಭೂಮಿಯ ನಂಟು.

ರಂಗ ದೇಗುಲ, ನಾಟಕ ಮನೆ ಮುಂತಾದ ತಂಡಗಳಲ್ಲಿ ಸಕ್ರಿಯರಾಗಿದ್ದ ರಾಘವ್, ನಟನೆಯಲ್ಲಿ ಎಷ್ಟು ಸಾಧ್ಯವೋ ಅಷ್ಟು ಪಳಗಿಕೊಂಡಿದ್ದರು. ಆ ನಂತರ ಶುರುವಾದದ್ದು ಅವಕಾಶಗಳ ಬೇಟೆ. ಈ ಹಾದಿಯಲ್ಲಿ ಸಾಕಷ್ಟು ಕಷ್ಟ, ನಿರಾಸೆಗಳನ್ನು ಕಂಡುಂಡರೂ ಕೂಡಾ, ನಟನೆಯ ಶಕ್ತಿ ಎಂಬುದು ಅವರ ಕೈ ಹಿಡಿದಿತ್ತು. ಅದರ ಫಲವಾಗಿಯೇ ಮಾಸ್ಟರ್ ಆನಂದ್ ನಿರ್ದೇಶನದಲ್ಲಿ ಮೂಡಿ ಬರುತ್ತಿದ್ದ ಎಸ್‍ಎಸ್‍ಎಲ್‍ಸಿ ನನ್ಮಕ್ಳು ಎಂಬ ಧಾರಾವಾಹಿಯ ಪುಟ್ಟ ಪಾತ್ರವೊಂದು ಅವರಿಗೆ ಸಿಕ್ಕಿತ್ತು. ಅದರಲ್ಲಿಯೇ ಚೆಂದಗೆ ನಟಿಸುತ್ತಾ, ಗಮನ ಸೆಳೆಯುತ್ತಾ ಮುಂದುವರೆದಿದ್ದ ರಾಘವ್ ಏನಿಲ್ಲವೆಂದರೂ ಮೂವತ್ತಕ್ಕೂ ಹೆಚ್ಚ ಧಾರಾವಾಹಿಗಳಲ್ಲಿ ನಟಿಸಿ ಸೈ ಅನ್ನಿಸಿಕೊಂಡಿದ್ದಾರೆ.

ಧಾರಾವಾಹಿಯ ನಟನೆಯ ಯಾನವನ್ನೂ ಕೂಡಾ, ನಾಯಕನಾಗೋ ಹಾದಿಯ ಪಯಣವನ್ನಾಗಿ ಪರಿಗಣಿಸಿದ್ದ ರಾಘವ್, ಆ ನಂತರ ನಾಯಕ ನಟನಾಗುವ ನಿಟ್ಟಿನಲ್ಲಿ ನಿರ್ಣಾಯಕವಾಗಿ ಪ್ರಯತ್ನಿಸಲಾರಂಭಿಸಿದ್ದರು. ಕಡೆಗೂ ಶ್ರೀನಾಥ್ ವಸಿಷ್ಟ ನಿರ್ದೇಶನದ ಮಂಥನ ಎಂಬ ಚಿತ್ರದಲ್ಲಿ ನಾಯಕನ ಗೆಳೆಯನ ಪಾತ್ರ ಸಿಕ್ಕಿತ್ತು. ಆ ಚಿತ್ರದಲ್ಲಿ ದಿಲೀಪ್ ರಾಜ್ ನಾಯಕನಾಗಿ ನಟಿಸಿದ್ದರು. ಅದಾದ ಬಳಿಕ ಗೋಲ್ಡನ್ ಸ್ಟಾರ್ ಗಣೇಶ್ ನಟಿಸಿದ್ದ ಕೂಲ್ ಚಿತ್ರದಲ್ಲಿ ಪುಟ್ಟದೊಂದು ಪಾತ್ರ ಸಿಕ್ಕಿತ್ತು. ಪ್ರಜ್ವಲ್ ದೇವರಾಜ್ ನಟನೆಯ ಗೋಕುಲ ಕೃಷ್ಟ, ಭದ್ರ ಮುಂತಾದ ಚಿತ್ರಗಳಲ್ಲಿ ಒಂದಷ್ಟು ಪ್ರಾಧಾನ್ಯತೆ ಇರುವ ಪಾತ್ರಗಳೂ ರಾಘವ್‍ಗೆ ಸಿಕ್ಕಿದ್ದವು.

ನಂತರ ಗೂಳಿಹಟ್ಟಿ ಎಂಬ ಚಿತ್ರದ ಐದು ಮಂದಿ ನಾಯಕರಲ್ಲೊಬ್ಬರಾಗಿ ರಾಘವ್ ನಟಿಸಿದ್ದರು. ಡಯಾನಾ ಹೌಸ್ ಮೂಲಕ ಪೂರ್ಣ ಪ್ರಮಾಣದಲ್ಲಿ ನಾಯಕರಾಗಿದ್ದ ರಾಘವ್, ತರುವಾಯಹಫ್ತಾ ಚಿತ್ರದಲ್ಲಿಯೂ ನಾಯಕರಲ್ಲೊಬ್ಬರಾಗಿ ಕಾಣಿಸಿಕೊಂಡಿದ್ದರು. ಸದ್ಯಕ್ಕೀಗ ಐಯಾಮ್ ಪ್ರೆಗ್ನೆಂಟ್ ಎಂಬ ಚಿತ್ರದಲ್ಲಿಯೂ ರಾಘವ್ ಮುಖ್ಯ ಪಾತ್ರವೊಂದರಲ್ಲಿ ನಟಿಸಿದ್ದಾರೆ. ಈ ನಡುವೆ ತೆಲುಗು ಚಿತ್ರರಂಗಕ್ಕೂ ಎಂಟ್ರಿ ಕೊಟ್ಟು, ನಾಯಕನಾಗಿ ನಟಿಸುತ್ತಿದ್ದಾರೆ. ಆ ಚಿತ್ರದ ಚಿತ್ರೀಕರಣವೀಗ ಚಾಲ್ತಿಯಲ್ಲಿದೆ. ಇದೆಲ್ಲದರಾಚೆಗೆ ಕಡಲ ತೀರದ ಭಾರ್ಗವ ರಾಘವ್ ಬದುಕಿನ ಬಹುಮುಖ್ಯ ಚಿತ್ರ. ಅದು ಗೆಲಲುವ ಮೂಲಕ ರಾಘವ್ ಅವರಿಗೂ ಗೆಲುವಾಗಲೆಂಬುದು ಹಾರೈಕೆ!

The post ಕಡಲ ತೀರದ ಭಾರ್ಗವ ಚಿತ್ರದಲ್ಲಿದೆ ಖಡಕ್ ಪಾತ್ರ! appeared first on ಶೋಧ ನ್ಯೂಸ್ - Shodha News.

ಭರತ್ ನಟನೆ ಕಂಡು ಅಚ್ಚರಿಗೀಡಾಗಿದ್ದರು ಅಪ್ಪು!
ಸಿನಿಮಾ ಎಂಬ ಮಾಯೆಯ ಸೆಳೆತವೇ ಅಂಥಾದ್ದು. ನಿಜವಾಗಿಯೂ ಎದೆಯೊಳಗೆ ಕಲೆಯ ಬಗ್ಗೆ ಆಸಕ್ತಿ ಅಂತೊಂದಿದ್ದರೆ, ಅದು ಅದೆಷ್ಟು ಗಾವುದ ದೂರದಲ್ಲಿದ್ದರೂ ಬರಸೆಳೆದು ಅಪ್ಪಿಕೊಳ್ಳುತ್ತೆ. ನಿಜವಾದ ಪ್ರತಿಭೆ, ಪರಿಶ್ರಮವಿದ್ದರಂತೂ ಕೊಂಚ ಕಾಡಿಸಿಕೊಂಡಾದರೂ ಗೆಲುವೆಂಬುದು ನಿಕ್ಕಿ. ನೀವೊಮ್ಮೆ ಕನ್ನಡ ಚಿತ್ರರಂಗದತ್ತ ಸೂಕ್ಷ್ಮವಾಗೊಮ್ಮೆ ಕಣ್ಣು ಹಾಯಿಸಿದರೂ ಈ ಮಾತುಗಳು ನಿಜವೆನ್ನಿಸುತ್ತೆ. ಅಂಥಾದ್ದೊಂದು ಮಾಯಕ ಅಸ್ತಿತ್ವದಲ್ಲಿಲ್ಲದೇ ಹೋಗಿದ್ದರೆ, ಅದೆಷ್ಟೋ ಪ್ರತಿಭೆಗಳು ಬದುಕಿನ ಯಾವುದೋ ಜಂಜಾಟದಲ್ಲಿ ಕಳೇದುಹೋಗಿ ಬಿಡುವ ಅಪಾಯವಿತ್ತು. ಇದೀಗ ಬಿಡುಗಡೆಗೆ ಸಜ್ಜಾಗಿ ನಿಂತಿರುವ `ಕಡಲ ತೀರದ ಭಾರ್ಗವ’ ಚಿತ್ರದ ನಿರ್ಮಾಪಕ ಕಂ ನಾಯಕ ಭರತ್ ಗೌಡರ ಬದುಕಿನ ಹಾದಿಯತ್ತ ಒಮ್ಮೆ ಕಣ್ಣು ಹಾಯಿಸಿದರೆ, ನಿಮಗೂ ಕೂಡಾ ಮೇಲ್ಕಂಡ ಮಾತುಗಳಿಗೊಂದು ಹೊಸಾ ಪುರಾವೆ ಸಿಕ್ಕಂತೆ ಭಾಸವಾದೀತು!

ಭರತ್ ಗೌಡ ಎಂಬ ಹೆಸರು ಈಗಾಗಲೇ ಚಿತ್ರರಂಗದಲ್ಲಿ ಮೆಲುವಾಗಿ ಸಂಚಲನ ಶುರುವಿಟ್ಟುಕೊಂಡಿದೆ. ಟೀಸರ್ ಮತ್ತು ಟ್ರೈಲರ್ ಮೂಲಕವೇ ಭರತ್ ಅಂಥಾದ್ದೊಂದು ಭರವಸೆಯನ್ನು ಸಿನಿಮಾ ಪ್ರೇಮಿಗಳಲ್ಲಿ ಪ್ರತಿಷ್ಟಾಪಿಸಿದ್ದಾರೆ. ಸಿನಿಮಾ ಅಂದಮೇಲೆ ಒಂದೊಂದು ಜವಾಬ್ದಾರಿಗಳನ್ನು ನಿಭಾಯಿಸೋದೇ ಕಷ್ಟ. ಅಂಥಾದ್ದರಲ್ಲಿ ನಿರ್ಮಾಣದೊಂದಿಗೆ, ನಾಯಕ ನಟನಾಗಿಯೂ ನಟಿಸೋದಿದೆಯಲ್ಲಾ? ಅದೊಂದು ಸಾಹಸ. ಅದನ್ನು ತುಸು ಪ್ರಯಾಸವೆನಿಸಿದರೂ ಲೀಲಾಜಾಲವಾಗಿ ಜಯಿಸಿಕೊಂಡ ಖುಷಿ ಭರತ್‍ರಲ್ಲಿದೆ. ಪ್ರಚಾರದ ಪಟ್ಟುಗಳನ್ನು ಅನುಸರಿಸದಿದ್ದರೂ ಕೂಡಾ, ತಾನೇ ತಾನಾಗಿ ಈ ಸಿನಿಮಾ ಜನಮಾನಸವನ್ನು ತಲುಪಿಕೊಂಡ ರೀತಿಯ ಬಗ್ಗೆ ಅವರಲ್ಲೊಂದು ಬೆರಗು ಬೆರೆತ ಖುಷಿಯಿದೆ. ಅದು ಒಂದಿಡೀ ಚಿತ್ರತಂಡದಲ್ಲೂ ಪ್ರತಿಫಲಿಸುತ್ತಿದೆ.

ಚಿಕ್ಕಮಗಳೂರಿನ ಮಲ್ಲೇನಹಳ್ಳಿ ಸೀಮೆಯ ರೈತಾಪಿ ಕುಟುಂಬದಿಂದ ಬಂದವರು ಭರತ್ ಗೌಡ. ಹುಟ್ಟಿದೂರು, ಮಂಗಳೂರು ಅಂತೆಲ್ಲ ವ್ಯಾಸಂಗ ಮುಗಿಸಿಕೊಂಡಿದ್ದ ಅವರಿಗೆ, ಓದಿನ ಕಾಲದಲ್ಲಿಯೇ ವಿಪರೀತ ಸಿನಿಮಾ ವ್ಯಾಮೋಹವಿತ್ತು. ಅದರ ನಡುವೆಯೇ ಬ್ಯುಸಿನೆಸ್ ನಡೆಸಿ ಯಶಸ್ವಿಯಾಗಬೇಕೆಂಬ ಆಳವಾದ ಹಂಬಲಿಕೆಯೂ ಇತ್ತು. ಓದೆಲ್ಲ ಮುಗಿಸಿಕೊಂಡ ನಂತರ ಬೆಂಗಳೂರು ಸೇರಿಕೊಂಡು, ತಮ್ಮಿಷ್ಟದ ಬ್ಯುಸಿನೆಸ್ ಕ್ಷೇತ್ರವನ್ನು ಆರಿಸಿಕೊಂಡಿದ್ದ ಭರತ್, ಶ್ರಮ ವಹಿಸಿ ಕನಸನ್ನು ನನಸಾಗಿಸಿಕೊಂಡಿದ್ದರು. ಅವರೊಳಗೆ ಬೆಚ್ಚಗಿದ್ದ ಸಿನಿಮಾ ಕನಸು ಕೂಡಾ ಆ ಹಂತದಲ್ಲಿ ಗರಿಗೆದರಲಾರಂಭಿಸಿತ್ತು. ಸಿಕ್ಕ ಪಾತ್ರಗಳನ್ನು ಬಳಸಿಕೊಂಡು ನಟನಾಗಿ ನೆಲೆ ಕಂಡುಕೊಳ್ಳಬೇಕೆಂಬ ಇರಾದೆಯಿಂದ ಅವಕಾಶದ ಬೇಟೆಗೆ ಅಣಿಯಾಗಲಾರಂಭಿಸಿದ್ದರು.

ಕಡೆಗೂ ಕನಸುಗಾರ ರವಿಚಂದ್ರನ್ ನಟನೆಯ ದಶರಥ ಸಿನಿಮಾ ಮೂಲಕ ನಟನಾಗುವ ಭರತ್ ಕನಸಿಗೆ ಗರಿ ಮೂಡಿಕೊಂಡಿತ್ತು. ಆ ಚಿತ್ರದಲ್ಲಿ ಅವರು ಪುಟ್ಟದೊಂದು ಪಾತ್ರವನ್ನು ನಿರ್ವಹಿಸಿದ್ದರು. ಅದರಲ್ಲಿಯೇ ಚೆಂದಗೆ ನಟಿಸುವ ಮೂಲಕ ಗಮನ ಸೆಳೆಯುವಲ್ಲಿಯೂ ಯಶಸ್ವಿಯಾಗಿದ್ದರು. ಆ ಪಾತ್ರದ ದೆಸೆಯಿಂದಲೇ ಮತ್ತೊಂದಷ್ಟು ನಟನೆಯ ಅವಕಾಶಗಳೂ ಅವರತ್ತ ಸಾಗಿ ಬರಲಾರಂಭಿಸಿದ್ದವು. ಈ ನಡುವೆ ಒಂದೊಳ್ಳೆ ಕಥೆ, ತಂಡ ಸಿಕ್ಕಿದರೆ ತಾವೇ ಮುಖ್ಯಪಾತ್ರದಲ್ಲಿ ನಟಸಬೇಕೆಂಬ ಬಯಕೆಯೊಂದು ಭರತ್‍ರೊಳಗೆ ಹಬೆಯಾಡಲಾರಂಭಿಸಿತ್ತು. ಅದಾಗಲೇ ಸ್ನೇಹಿತರಾಗಿದ್ದ ನಿರ್ದೇಶಕ ಪನ್ನಗ ಸೋಮಶೇಖರ್ ಒಂದೊಳ್ಳೆ ಕಥೆ ಮಾಡಿಕೊಂಡಿದ್ದರೂ ಕೂಡಾ, ನಿರ್ಮಾಣ ಮಾಡೋರ್ಯಾರೆಂಬ ಯಕ್ಷ ಪ್ರಶ್ನೆಯೊಂದು ಆ ಸ್ನೇಹಿತರ ಬಳಗವನ್ನು ಬಹುವಾಗಿ ಕಾಡಿತ್ತು.

ನಿಮಗೆ ಗೊತ್ತಿಲ್ಲದ ವಿಚಾರವೇನಲ್ಲ; ಹೊಸಬರ ತಂಡಗಳಖು ಅದೆಂಥಾ ಕಥೆ ರೆಡಿ ಮಾಡಿಟ್ಟುಕೊಂಡರೂ ನಿರ್ಮಾಪಕರನ್ನು ಒಲಿಸಿಕೊಳ್ಳುವುದು ಕಷ್ಟ. ಅದರ ಅರಿವು ಭರತ್ ಮತ್ತವರ ಸ್ನೇಹಿತರಿಗೂ ಆಗಿತ್ತು. ಆ ನಂತರ ತಮ್ಮ ತಂಡ ಮತ್ತು ಕಥೆಯ ಕಸುವಿನ ಮೇಲೆ ನಂಬಿಕೆಯಿಟ್ಟು ಈ ಸಿನಿಮಾಗೆ ಗೆಳೆಯ ವರುಣ್ ಜೊತೆ ಸೇರಿ ತಾವೇ ಬಂಡವಾಳ ಹೂಡಲು ಭರತ್ ತೀರ್ಮಾನಿಸಿದ್ದರು. ಆ ನಂತರದಲ್ಲಿ ನಿರ್ದೇಶಕ ಪನ್ನಗ ಸೋಮಶೇಖರ್ ಕಥೆಯನ್ನು ಮತ್ತಷ್ಟು ಬಿಗಿಯಾಗಿಸಿ, ಪಾತ್ರಗಳನ್ನು ಹೊಳಪಾಗಿಸಿ ಚಿತ್ರೀಕರಣಕ್ಕಿಳಿದಿದ್ದರು. ಈ ನಡುವೆ ಆಗಾಗ ಕೊರೋನಾ ಪೀಡೆ ಅಡ್ಡಗಾಲು ಹಾಕಿದರೂ ಲೆಕ್ಕಿಸದೆ ಒಂದಿಡೀ ಚಿತ್ರದ ಚಿತ್ರೀಕರಣ ಸುಸೂತ್ರವಾಗಿ ನಡೆದಿತ್ತು. ಈ ಮೂಲಕ ಭರತ್ ಅವರ ಬಹುಕಾಲದ ಕನಸೊಂದು ದೃಷ್ಯರೂಪ ಧರಿಸಿದಂತೆ ಕಣ್ಮುಂದೆ ನಿಂತಿತ್ತು.

ಕಡಲ ತೀರದ ಭಾರ್ಗವದಲ್ಲಿ ತಮ್ಮ ಪಾತ್ರದ ಬಗ್ಗೆ ಭರತ್ ಅವರಿಗೆ ಅತೀವ ಭರವಸೆ ಇದೆ. ಯಾಕೆಂದರೆ, ವಿಶಿಷ್ಟವಾದ ಕಥಾನಕವನ್ನೊಳಗೊಂಡಿರುವ ಈ ಚಿತ್ರದಲ್ಲಿ ಭರತ್ ಅವರ ಪಾತ್ರವೂ ಭಿನ್ನವಾಗಿದೆ. ಒಂದಷ್ಟು ತಯಾರಿಯಿಲ್ಲದೆ, ಬೇರೆಯದ್ದೇ ತೆರನಾದ ತಾಲೀಮು ನಡೆಸದೆ ಅದನ್ನು ಆವಾಹಿಸಿಕೊಳ್ಳುವುದು ಕಷ್ಟವಿತ್ತು. ಆ ಪಾತ್ರದ ರೂಪುರೇಷೆಗಳನ್ನು ಅರ್ಥ ಮಾಡಿಕೊಂಡು, ಅದಕ್ಕೆ ಬೇಕಾದಂತೆ ಒಗ್ಗಿಕೊಳ್ಳುವ ಕಸರತ್ತಿಗೆ ಒಂದಷ್ಟು ತಿಂಗಳುಗಳು ಸವೆದಿದ್ದವು. ಆ ಪರಿಶ್ರಮವೆಲ್ಲವೂ ತೆರೆ ಮೇಲೆ ಸಾರ್ಥಕ್ಯ ಕಂಡಿದೆ ಎಂಬಂಥಾ ತೃಪ್ತ ಭವವೊಂದೀಗ ಭರತ್‍ರಲ್ಲಿ ನೆಲೆ ನಿಂತಿದೆ. ಸೂಕ್ಷ್ಮ ಎಳೆಗಳೊಂದಿಗೆ, ಒಳಸುಳಿಗಳೊಂದಿಗೆ ಸಾಗುವ ಈ ಸೈಕಾಲಾಜಿಕಲ್ ಥ್ರಿಲ್ಲರ್ ತನ್ನ ವೃತ್ತಿ ಬದುಕಿನ ದಿಕ್ಕು ಬದಲಾಯಿಸಲಿದೆ ಎಂಬ ತುಂಬು ನಂಬುಗೆಯೂ ಅವರಲ್ಲಿದೆ.

ವಿಶೇಷವೆಂದರೆ, ಪುನೀತ್ ರಾಜ್ ಕುಮಾರ್ ಕೂಡಾ ಭರತ್ ಅವರ ನಟನೆ ನೋಡಿ ಮೆಚ್ಚಿಕೊಂಡಿದ್ದರು. ಆ ಪಾತ್ರದ ಎನರ್ಜಿ, ಹಾವಭಾವಗಳನ್ನು ಅದು ಹೇಗೆ ಕಲಿತಿರೆಂಬಂತೆ ಅಚ್ಚರಿಯಿಂದ ಅಪ್ಪು ಪ್ರಶ್ನಿಸಿದ್ದರಂತೆ. ಭರತ್ ಪಾಲಿಗೆ ಅದೊಂದು ಪ್ರಶಸ್ತಿ ಮತ್ತು ಭರವಸೆ ಇದ್ದಂತೆ. ಅಪ್ಪು ಅಭಿಪ್ರಾಯವೇ ಈ ಸಿನಿಮಾ ನೋಡಿದ ಪ್ರತೀ ಪ್ರೇಕ್ಷಕರಲ್ಲಿಯೂ ಮೂಡಿಕೊಳ್ಳಲಿದೆ ಎಂಬ ಭರವಸೆಯೂ ಅವರಲ್ಲಿದೆ. ತಮ್ಮ ಬ್ಯುಸಿನೆಸ್, ಸಿನಿಮಾಗಳ ನಡುವೆ ಫಿಟ್ನೆಸ್‍ನತ್ತಲೂ ಪ್ರೀತಿ ಇಟ್ಟುಕೊಂಡಿರುವ ಭರತ್, ತಮ್ಮ ದೇಹವನ್ನೂ ಹೀರೋಗಿರಿಗೆ ಒಗ್ಗಿಸಿಕೊಂಡಿದ್ದಾರೆ. ಅದು ಈ ಸಿನಿಮಾದ ಮಟ್ಟಿಗೂ ಉಪಕಾರಿಯಾಗಿದೆ. ಫಿಟ್ನೆಸ್ ಕ್ಲಾಸ್‍ಗಳನ್ನೂ ನಡೆಸುತ್ತಿರುವ ಭರತ್, ವ್ಯಹಾರದಾಚೆಗೆ ದೈಹಿಕ ಕಸರತ್ತುಗಳ ಅರಿವು ಮೀಡಿಸಲು ಪ್ರಯತ್ನಿಸುತ್ತಿದ್ದಾರೆ. ಇದೆಲ್ಲದರಾಚೆಗೆ ಕಡಲ ತೀರದ ಭಾರ್ಗವ ಮೂಲಕ ಅವರ ಬದುಕು ಮುಖ್ಯ ಬಿಂದುವಿನತ್ತ ಹೊರಳಿಕೊಂಡಿದೆ. ಈ ಸಿನಿಮಾ ಇದೇ ಮಾರ್ಚ್ 3ರಂದು ರಾಜ್ಯಾದ್ಯಂತ ತೆರೆಗಾಣುತ್ತಿದೆ. ಅದು ಪ್ರೇಕ್ಷಕರಿಗೆಲ್ಲ ಹಿಡಿಸಿ ಗೆಲುವಾಗಲಿ, ಭರತ್ ನಾಯಕ ನಟನಾಗಿ ನೆಲೆ ಕಂಡುಕೊಳ್ಳಲೆಂಬುದು ಸಿನಿ ಶೋಧ ಹಾರೈಕೆ!

The post ಕಡಲ ತೀರದ ಭಾರ್ಗವ ಭರತ್ ಗೌಡ ಮನದಾಳ! appeared first on ಶೋಧ ನ್ಯೂಸ್ - Shodha News.

ಪಾದರಸದಂಥಾ ಹುಡುಗಿಗೆ ರಫ್ ಆಂಡ್ ಟಫ್ ಪಾತ್ರ ಸಿಕ್ಕ ಖುಷಿ!

ಒಂದು ಆಸೆ ಉತ್ಕಟ ವ್ಯಾಮೋಹವಾಗಿ, ಬದುಕಿನ ಪರಮೋಚ್ಛ ಗುರಿಯಾಗಿ ಎದೆಗಿಳಿದು ಬೇರು ಬಿಟ್ಟರೆ ಖಂಡಿತಾ ಮುಂದೊಂದು ದಿನ ಅದು ಚಿಗುರಿ, ಕನಸೆಲ್ಲವೂ ಸಾಕಾರಗೊಳ್ಳುತ್ತವೆ. ಎಲ್ಲೆಲ್ಲಿಯೋ ಚದುರಿ ಹೋಗ ಬೇಕಿದ್ದ ಬದುಕು ತಂತಾನೇ ಗುರಿಯ ನೇರಕ್ಕೆ ಬಂದು ನಿಲ್ಲುತ್ತದೆ. ಸದ್ಯ ಸಿನಿಮಾ ರಂಗದಲ್ಲಿ ಈ ಮಾತಿಗೆ ಅನ್ವರ್ಥ ಎಂಬಂಥಾ ಅನೇಕ ಸಜೀವ ಸಾಕ್ಷಿಗಳಿದ್ದಾವೆ. ಆ ಸಾಲಿನಲ್ಲಿ ಸೇರ್ಪಡೆಯಾಗುವಂಥಾ ನವ ಪ್ರತಿಭೆ ರಚನಾ ಇಂದರ್. ರಚನಾ ಲವ್ ಮಾಕ್ಟೈಲ್ ಎಂಬ ಸೂಪರ್ ಹಿಟ್ ಮೂವಿಯ ಮೂಲಕವೇ ಕರುನಾಡ ತುಂಬೆಲ್ಲ ಮನೆಮಾತಾದವರು. ಹೆಂಗೆ ನಾವೂ ಅನ್ನುತ್ತಲೇ ಕನ್ನಡದ ಚಿತ್ರಪ್ರೇಮಿಗಳ ಮನಸನ್ನಾವರಿಸಿಕೊಂಡಿದ್ದ ರಚನಾ ಇದೀಗ ಹರಿಕಥೆ ಅಲ್ಲ ಗಿರಿಕಥೆ ಚಿತ್ರದ ಮೂಲಕ ಎರಡನೇ ಹೆಜ್ಜೆ ಎತ್ತಿಟ್ಟಿದ್ದಾರೆ. ಈ ಚಿತ್ರದಲ್ಲಿಯೂ ಬಯಸದೇ ಬಂದ ಭಾಗ್ಯವೆಂಬಂತೆ ಡಿಫರೆಂಟ್ ಆದೊಂದು ಪಾತ್ರ ಸಿಕ್ಕಿರುವ ಖುಷಿ ರಚನಾರಲ್ಲಿದೆ.

ಭಾಗಮಂಡಲದಲ್ಲಿ ಹುಟ್ಟಿ, ಬೆಂಗಳೂರಿನಲ್ಲಿ ಬೆಳೆದು ಅಲ್ಲಿಯೇ ವಿದ್ಯಾಭ್ಯಾಸವನ್ನೂ ಮುಂದುವರೆಸುತ್ತಿರುವ ರಚನಾ ಇದೀಗ ಎಂಬಿಎ ವಿದ್ಯಾರ್ಥಿನಿ. ಈ ಘಳಿಗೆಯಲ್ಲಿ ತನ್ನ ಬದುಕು ಅರಳೋದೇನಿದ್ದರೂ ಸಿನಿಮಾದಲ್ಲಿಯೇ ಎಂಬ ವಿಚಾರ ರಚನಾಗೆ ಪಕ್ಕಾ ಆಗಿದೆ. ಮನೆಯಲ್ಲಿ ಕಲಾಸಕ್ತಿ ಇದ್ದರೂ ಮಗಳು ಚೆಂದಗೆ ಓದಿ, ಆ ಆಧಾರದಲ್ಲಿಯೇ ಒಂದು ಕೆಲಸ ಗಿಟ್ಟಿಸಿಕೊಂಡು ನೆಲೆ ಕಂಡುಕೊಳ್ಳಲೆಂಬ ಮಾಮೂಲಿ ಇರಾದೆಯಿತ್ತು. ಅದಕ್ಕೆ ತಕ್ಕುದಾದ ವಾತಾವರಣವೇ ರಚನಾರ ಮನೆಯಲ್ಲಿತ್ತು. ಆರಂಭದಿಂದ ಇತ್ತೀಚಿನ ವರ್ಷದ ವರೆಗೂ ಓದು ಬಿಟ್ಟು ಬೇರೇನೂ ಯೋಚಿಸದಂಥಾ ಸ್ಥಿತಿ. ಅದರ ನಡುವೆಯೇ ನಟಿಯಾಗಬೇಕೆಂಬ ಆಸೆ ರಚನಾರೊಳಗೆ ಮೊಳೆತುಕೊಂಡಿದ್ದು, ಅಚಾನಕ್ಕಾಗಿ ತಾಯಿಯ ಕಡೆಯಿಂದಲೂ ಅದಕ್ಕೆ ಪ್ರೋತ್ಸಾಹ ಸಿಕ್ಕು ನಟನಾ ತರಬೇತಿ ಕೇಂದ್ರಕ್ಕೆ ಸೇರಿಸಿದ್ದ ಮತ್ತು ಒಂದರ ಹಿಂದೊಂದರಂತೆ ಅದ್ಭುತ ಅವಕಾಶಗಳು ಸಿಕ್ಕಿದ್ದೆಲ್ಲವೂ ಈ ಹುಡುಗಿಯ ಬದುಕಿನಲ್ಲಿ ಘಟಿಸಿದ ಪವಾಡಗಳೇ!

ರಚನಾ ಇಂದರ್ ಸಾಗಿ ಬಂದ ಹಾದಿಯ ಬಗ್ಗೆ ಹೇಳೋದಕ್ಕಿಂತ ಮೊದಲು, ಖುದ್ದು ಅವರೇ ಥ್ರಿಲ್ ಆಗಿರುವ ಹರಿಕಥೆ ಅಲ್ಲ ಗಿರಿಕಥೆ ಚಿತ್ರದ ಪಾತ್ರದ ಬಗ್ಗೆ ಹೇಳುವುದೊಳಿತು. ಲವ್ ಮಾಕ್ಟೈಲ್ ರಚನಾ ಪಾಲಿಗೆ ಮೊದಲ ಚಿತ್ರ. ಅದಾದ ನಂತರ ಅದೇ ಜನಪ್ರಿಯತೆಯನ್ನು ಮುಂದುವರೆಸಿಕೊಂಡು ಹೋಗುವಂಥಾ ಇರಾದೆ, ಅನಿವಾರ್ಯತೆ ಸಹಜವಾಗಿಯೇ ಇತ್ತು. ಆ ಹೊತ್ತಿಗೆಲ್ಲ ರಿಶಬ್ ಶೆಟ್ಟರ ಟೀಮು ಹರಿಕಥೆ ಅಲ್ಲ ಗಿರಿಕಥೆ ಚಿತ್ರಕ್ಕೆ ರೆಡಿಯಾಗಿ ನಾಯಕಿಯ ಪಾತ್ರಕ್ಕೆ ಪ್ರತಿಭೆಯ ಶೋಧದಲ್ಲಿ ನಿರತವಾಗಿತ್ತು. ಸೋಶಿಯಲ್ ಮೀಡಿಯಾ ಹಾಗೂ ಆಕ್ಟಿಂಗ್ ಅಕಾಡೆಮಿಯ ಕಡೆಯಿಂದ ರಚನಾಗೂ ಆ ಬಗ್ಗೆ ತಿಳಿದಿತ್ತು. ಇನ್ನೇನು ಹೋಗಿ ಆಡಿಷನ್‌ನಲ್ಲಿ ಪಾಲ್ಗೊಳ್ಳಬೇಕೆಂಬ ಹೊತ್ತಿನಲ್ಲಿ ಸಿನಿಮಾ ತಂಡದಿಂದಲೇ ರಚನಾಗೆ ಕರೆ ಬಂದಿತ್ತು.

ಅದಾದ ನಂತರ ರಚನಾ ಆಡಿಷನ್ನಿನಲ್ಲಿ ಪಾಲ್ಗೊಂಡು ಆಯ್ಕೆಯಾಗಿದ್ದರು. ಅವರ ಪಾಲಿಗೆ ಅಸಲೀ ಥ್ರಿಲ್ ಒಂದು ಎದುರುಗೊಂಡಿದ್ದು ತಾನು ನಿರ್ವಹಿಸಲಿರೋ ಪಾತ್ರದ ಚಹರೆಗಳ ಬಗ್ಗೆ ವಿವರಿಸಿ ಹೇಳಿದಾಗಲೇ. ಆ ವಿವರಣೆಯಲ್ಲಿಯೇ ಇದು ಪಕ್ಕಾ ಡಿಫರೆಂಟಾಗಿರೋ ಪಾತ್ರವೆಂಬ ಕುರುಹು ಸ್ಪಷ್ಟವಾಗಿತ್ತು. ರಚನಾರನ್ನು ಹಾಗೆ ಥ್ರಿಲ್‌ಗೀಡು ಮಾಡಿದ್ದು ಗಿರಿಜಾ ಎಂಬ ಮಧ್ಯಮ ವರ್ಗದ ರಫ್ ಆಂಡ್ ಟಫ್ ಪಾತ್ರ. ಅದನ್ನು ತಾನು ಆವಾಹಿಸಕೊಳ್ಳಬೇಕೆಂಬುದೇ ರಚನಾರೊಳಗೆ ಖುಷಿ ಮೂಡಿಸಿತ್ತು. ಆರಂಭಿಕವಾಗಿಯೇ ಆ ಪಾತ್ರ ಡಿಫರೆಂಟಾಗಿದ್ದರೂ ಆ ನಂತರದಲ್ಲಿಯೂ ಅದಕ್ಕೊಂದಷ್ಟು ಹೊಸಾ ಆಯಾಮಗಳನ್ನು ಕೊಡಲಾಗಿತ್ತು. ಅಂದಹಾಗೆ ಗಿರಿಜೆ ಮಧ್ಯಮ ವರ್ಗದಲ್ಲಿ ಹುಟ್ಟಿದ ತಾಯಿಲ್ಲದ ಕೂಸು. ಅಪ್ಪ ಮತ್ತು ಅಣ್ಣನ ನೆರಳಲ್ಲಿ ಬಿಂದಾಸ್ ಆಗಿ ಬೆಳೆದ ಹುಡುಗಿ. ಹೆಣ್ತನದ ಭಾವಗಳು ಬಾಹ್ಯವಾಗಿ ಹೊಮ್ಮದ ಆ ಪಾತ್ರದ ಮಟ್ಟಿಗೆ ಹೆಣ್ತನವೆಂಬುದು ಗುಪ್ತಗಾಮಿನಿ. ಒಂದಷ್ಟು ತಯಾರಿಯೊಂಗೆ ಆ ಪಾತ್ರಕ್ಕೆ ಜೀವ ತುಂಬಿದ ತೃಪ್ತಿ ರಚನಾರಲ್ಲಿದೆ.

ಹೀಗೆ ಈವತ್ತಿಗೆ ರಿಶಭ್ ಶೆಟ್ಟಿ ನಾಯಕನಾಗಿ ನಟಿಸಿರುವ, ಕರಣ್ ಅನಂತ್ ಮತ್ತು ಅನಿರುದ್ಧ್ ಮಹೇಶ್ ನಿರ್ದೇಶನದ ಹರಿಕಥೆ ಅಲ್ಲ ಗಿರಿಕಥೆ ಚಿತ್ರದ ಗಿರಿಜೆಯಾಗಿ ಸದ್ದು ಮಾಡುತ್ತಿರುವ ರಚನಾ ಇಂದರ್ ಚಿತ್ರರಂಗದಲ್ಲಿ ನೆಲೆಯೂರಿ ನಿಲ್ಲಬಹುದಾದ ಗಟ್ಟಿ ಪ್ರತಿಭೆ. ಇಂಗ್ಲಿಷ್ ಮೀಡಿಯಂನಲ್ಲಿ ಕೇಂದ್ರ ಪಠ್ಯ ಪರಿಕ್ರಮದಲ್ಲಿ ಓದುತ್ತಾ ಬಂದಿದ್ದ ರಚನಾ ಪಾಲಿಗೆ ಬೇರ‍್ಯಾವುದರತ್ತಲೂ ಗಮನ ಹರಿಸುವಂಥಾ ಅವಕಾಶವೇ ಇರಲಿಲ್ಲ. ಓದು ಮತ್ತು ಓದು ಮಾತ್ರವೇ ಅವರ ಪಾಲಿನ ಪ್ರಪಂಚ. ಅಂಥಾ ವಾತಾವರಣದಲ್ಲಿಯೂ ರಚನಾರ ಮನಸು ಬಣ್ಣದ ಲೋಕದ ಸುತ್ತಾ ಗಿರಕಿ ಹೊಡೆದು, ಅವರೊಳಗೆ ನಟಿಯಾಗಬೇಕೆಂಬ ಕನಸೊಂದು ಪರ್ಮನೆಂಟಾಗಿ ಪ್ರತಿಷ್ಠಾಪಿತಗೊಂಡಿದ್ದೊಂದು ಅಚ್ಚರಿಯೇ!

ಹೆತ್ತರಿಗೆ ತಮ್ಮ ಮಗಳು ಓದಿನ ದಿಕ್ಕಿನಲ್ಲಿಯೇ ನೆಲೆ ಕಂಡುಕೊಳ್ಳಬೇಕೆಂಬ ಆಸೆ. ಸಾಮಾನ್ಯವಾಗಿ ಮನೆ ಮಂದಿಗೆ ಇಂಥಾ ಆಕಾಂಕ್ಷೆ ಇದ್ದರೂ ಶಾಲಾ ಕಾಲೇಜು ವಾತಾವರಣದಲ್ಲಿಯಾದರೂ ಒಂದಷ್ಟು ಸಾಂಸ್ಕೃತಿಕ ಚಟುವಟಿಕೆಯ ವಾತಾವರಣವಿರುತ್ತದೆ. ಆದರೆ ರಚನಾ ಪಾಲಿಗೆ ಅದೂ ಕೂಡಾ ಮರೀಚಿಕೆಯಾಗಿತ್ತು. ಅಂತೂ ಕಾಲೇಜು ದಿನಗಳಲ್ಲಿ ಶೇಕ್ಸ್‌ಪಿಯರನ ಇಂಗ್ಲಿಷ್ ನಾಟಕವೊಂದರಲ್ಲಿ ಲೀಡ್ ರೋಲ್ ಮಾಡುವ ಅವಕಾಶವೊಂದು ರಚನಾ ಪಾಲಿಗೆ ಒಲಿದು ಬಂದಿತ್ತು. ತಾನು ನಟಿಯಾಗಬೇಕೆಂಬ ಆಸೆ ಅವರೊಳಗೆ ಆಳವಾಗಿ ಬೇರೂರಿದ್ದು ಆವಾಗಿನಿಂದಲೇ. ಈ ವಿಚಾರವನ್ನು ಆಕೆ ಅಮ್ಮನ ಬಳಿ ಹೇಳಿಕೊಂಡಿದ್ದರು. ತನ್ನಾಸೆ ಬೇರೆಯದ್ದೇ ಇದ್ದರೂ ಮಗಳ ಇಚ್ಛೆಗೆ ಅಡ್ಡಗಾಲಾಗಬಾರದೆಂಬ ಕಾರಣದಿಂದ ಅಮ್ಮ ರಚನಾರನ್ನು ನಟನಾ ತರಬೇತಿ ಶಾಲೆಯೊಂದಕ್ಕೆ ಸೇರಿಸಿದ್ದರು.

ಬಹುಶಃ ಹಾಗೆ ನವರಸ ನಟನಾ ಅಕಾಡೆಮಿಗೆ ಸೇರಿಕೊಳ್ಳದೇ ಹೋಗಿದ್ದರೆ ನಟಿಯಾಗಬೇಕೆಂಬ ಕನಸು ಕನಸಾಗಿಯೇ ಉಳಿದು ಬಿಡುತ್ತಿತ್ತೇನೋ. ಹಾಗೆ ಒಂದಷ್ಟು ಕಾಲ ನಟನಾ ತರಬೇತಿಯಿಂದ ನಟನೆಯ ನಾನಾ ಪಟ್ಟುಗಳನ್ನು ಕಲಿತುಕೊಂಡಿದ್ದ ರಚನಾಗೆ ಬಯಸದೆಯೇ ಅಚ್ಚರಿಯೊಂದು ಕಾದಿತ್ತು. ಆ ನಟನಾ ತರಬೇತಿ ಶಾಲೆಯ ಸಾಮಾಜಿಕ ಜಾಲತಾಣದ ಗ್ರೂಪ್ ಒಂದಿತ್ತು. ಅದರಲ್ಲಿ ಅದೊಂದು ದಿನ ಲವ್ ಮಾಕ್ಟೈ.ಲ್ ಚಿತ್ರದ ಆಡಿಷನ್ ಬಗೆಗಿನ ವಿವರಗಳು ಕಾಣಿಸಿದ್ದವು. ಖ್ಯಾತ ಕೊರಿಯೋಗ್ರಾಫರ್ ಮಾಲೂರು ಶ್ರೀನಿವಾಸ್ ಮಾರ್ಗದರ್ಶನದಂತೆ ರಚನಾ ಆ ಆಡಿಷನ್ನಿನಲ್ಲಿ ಪಾಲ್ಗೊಂಡಿದ್ದರು. ಆ ಮೂಲಕವೇ ಚೆಂದದ ಪಾತ್ರವೊಂದು ಅವರ ಪಾಲಿಗೆ ಒಲಿದು ಬಂದಿತ್ತು. ಹೆಂಗೆ ನಾವೂ ಅನ್ನುತ್ತಲೇ ಭಾರೀ ಪಬ್ಲಿಸಿಟಿ ಪಡೆದುಕೊಂಡಿದ್ದ ರಚನಾ ಇದೀಗ ಅಚ್ಚರಿದಾಯಕವಾಗಿಯೇ ಹರಿಕಥೆ ಅಲ್ಲ ಗಿರಿಕಥೆ ಚಿತ್ರದ ಗಿರಿಜೆಯಾಗಿ ಮಿಂಚಲಣಿಯಾಗಿದ್ದಾರೆ.

ಹೀಗೆ ಒಂದರ ಹಿಂದೊಂದರಂತೆ ಅವಕಾಶಗಳನ್ನು ಪಡೆದುಕೊಳ್ಳುತ್ತಿರುವ ರಚನಾ ಮುಖ್ಯ ನಾಯಕಿಯಾಗಿ ನೆಲೆ ಕಂಡುಕೊಳ್ಳುವ ಲಕ್ಷಣಗಳಿದ್ದಾವೆ. ಹರಿಕಥೆ ಅಲ್ಲ ಗಿರಿಕಥೆಯ ಪಾತ್ರ ತನ್ನ ವೃತ್ತಿ ಬದುಕಿನ ದಿಕ್ಕು ಬದಲಾಯಿಸುತ್ತದೆಂಬ ಗಾಢ ನಂಬಿಕೆಯೂ ಅವರಲ್ಲಿದೆ. ಈ ಹೊತ್ತಿನಲ್ಲಿಯೇ ಅವರ ಮುಂದೆ ಮತ್ತೊಂದಷ್ಟು ಅವಕಾಶಗಳಿವೆ. ಈಗಾಗಲೇ ಅವರು ಶಶಾಂಕ್ ನಿರ್ದೇಶನದ ಲವ್ ೩೬೦ ಎಂಬ ಸಿನಿಮಾದಲ್ಲಿ ನಟಿಸಿದ್ದಾರೆ. ಆ ಚಿತ್ರ ಇನ್ನೇನು ತೆರೆಗಾಣಲಿದೆ. ಕಿಸ್ ಚಿತ್ರದ ಪ್ರೊಡ್ಯೂಸರ್ ನಿರ್ಮಾಣ ಮಾಡುತ್ತಿರುವ ಚಿತ್ರವನ್ನೂ ಅವರು ಒಪ್ಪಿಕೊಂಡಿದ್ದಾರೆ. ಹೆಚ್ಚೇನು ತಲೆ ಕೆಡಿಸಿಕೊಳ್ಳದೆ ಸಿಕ್ಕ ಪಾತ್ರವನ್ನು ಸಮರ್ಥವಾಗಿ ನಿಭಾಯಿಸಬೇಕು, ಆ ಮೂಲಕ ವೃತ್ತಿ ಬದುಕನ್ನು ಸಾರ್ಥಕ ಪಡಿಸಿಕೊಳ್ಳಬೇಕೆಂಬ ಸ್ಪಷ್ಟ ನಿಲುವಿನ ರಚಾನಾಗೆ ಒಳಿತಾಗಲೆಂದು ಹಾರೈಸೋಣ…

The post ಹರಿಕಥೆ ಅಲ್ಲ ಗಿರಿಕಥೆಯ ನಾಯಕಿಯ ಬಣ್ಣದ ಹೆಜ್ಜೆ! appeared first on ಶೋಧ ನ್ಯೂಸ್ - Shodha News.