ಇತ್ತೀಚೆಗಂತೂ ಧರ್ಮ, ದೇವರು, ಬಣ್ಣಗಳನ್ನು ಸಾರಾಸಗಟಾಗಿ ಗುತ್ತಿಗೆಗೆ ತೆಗೆದುಕೊಂತಾಡುವವರ ಹಾವಳಿ ವಿಪರೀತಕ್ಕಿಟ್ಟುಕೊಂಡಿದೆ. ಹೀಗೆ ಕೆದರಿಕೊಂಡಿರುವ ಧರ್ಮದ ಪಿತ್ಥವೆಂಬುದು ದಿನ ದಿನಕ್ಕೂ ರೂಪಾಂತರ ಹೊಂದುತ್ತಾ ಮುಂದುವರೆಯುತ್ತಿದೆ. ಈಗ್ಗೆ ಒಂದಷ್ಟು ಕಾಲದಿಂದ ಶುರುವಾಗಿರುವ ಸಿನಿಮಾ ಬಾಯ್ಕಾಟ್ ಪ್ರವೃತ್ತಿ ಎಂಬುದು ಆ ಧರ್ಮದಮಲಿನ ಕೂಸೆಂಬುದರಲ್ಲಿ ಯಾವ ಸಂದೇಹವೂ ಇಲ್ಲ. ಬೆನ್ನ ಹುರಿಯೇ ನೆಟ್ಟಗಿಲ್ಲದ ಕೆಲ ಚಿತ್ರಗಳ ನೆಲಕಚ್ಚುತ್ತಲೇ ಈ ಬಾಯ್ಕಾಟ್ ವೀರರು ಅದು ನಮ್ಮದೇ ಪ್ರಭಾವ ಎಂಬಂತೆ ಕಾಲರ್ ಎಗರಿಸುತ್ತಾ ಬಂದಿದ್ದಾರೆ. ಆದರೆ ಶಾರೂಖ್ ಖಾನ್ ಮತ್ತು ದೀಪಿಕಾ ಪಡುಕೋಣೆ ನಟಿಸಿದ್ದ `ಪಠಾಣ್’ ವಿಚಾರದಲ್ಲಿ ಮಾತ್ರ ಬಾಯ್ಕಾಟ್ ಕಲ್ಚರಿನ ಅಸಲೀ ಶಕ್ತಿ ಜಗಜ್ಜಾಹೀರಾಗಿಬಿಟ್ಟಿದೆ!

ನಿಮಗೆ ಮರೆತು ಹೋಗಿರಲಿಕ್ಕಿಲ್ಲ; ಪಠಾಣ್ ವಿರುದ್ಧ ಸಮರ ಸಾರಲು ತುದಿಗಾಲಲ್ಲಿ ನಿಂತು ಕಾಯುತ್ತಿದ್ದವರಿಗೆ, ಆ ಸಿನಿಮಾ ಕಡೆಯಿಂದಲೇ ಒಂದು ಸರಿಕಟ್ಟಾದ ಸರಕು ಸಿಕ್ಕಂತಾಗಿತ್ತು. ಅದರ ಬೇಷರಮ್ ರಂಗ್ ಎಂಬ ವೀಡಿಯೋ ಸಾಂಗ್ ಹೊರ ಬಂದಿದ್ದೇ ಈ ಪಟಾಲಮ್ಮು ಮಗಿಬಿದ್ದುಬಿಟ್ಟಿತ್ತು. ಆ ಹಾಡಿನಲ್ಲಿ ಎಂದಿನಂತೆ ಶರ್ಟು ಬಿಚ್ಚಿ ನಿಂತಿದ್ದ ಶಾರೂಖ್ ಖಾನ್, ಲಂಗೋಟಿಯಂಥಾದ್ದೊಂದು ಬಟ್ಟೆ ಧರಿಸಿ ಶಾರೂಕ್‍ನನ್ನು ತಬ್ಬಿಕೊಂಡ ದೀಪಿಕಾ ಪಡುಕೋಣೆ… ಇಷ್ಟಾಗಿದ್ದರೆ ಮತ್ತೆ ಮತ್ತೆ ನೋಡಿ ಸುಖಿಸುತ್ತಿತ್ತೇನೋ ಆ ಪಟಾಲಮ್ಮು… ಆದರೆ, ಆ ಸಾಂಗಿನಲ್ಲಿ ದೀಪಿಕಾ ಧರಿಸಿದ್ದ ಲಂಗೋಟಿಯ ಬಣ್ಣ ಕೇಸರಿ ಎಂಬುದೇ ಅವುಗಳ ಆರ್ತನಾದಕ್ಕೆ ಕಾರಣವಾಗಿತ್ತು.

ಆ ನಂತರ ಏನೇನಾಗಿತ್ತೆಂಬುದೆಲ್ಲ ಕಣ್ಣ ಮುಂದಿದೆ. ಆದರೆ ಅಷ್ಟೆಲ್ಲ ಅಪಪ್ರಚಾರಗಳು ನಡೆದರೂ ಕೂಡಾ ದೀಪಿಕಾಪಡುಕೋಣೆ ಏನೆಂದರೆ ಏನೂ ತಲೆ ಕೆಡಿಸಿಕೊಂಡಂತಿರಲಿಲ್ಲ. ಈ ಪಲ್ಲಟದ ಬಗ್ಗೆ ಪ್ರತಿಕ್ರಿಯೆ ಕೊಡುವ ಗೋಜಿಗೂ ಹೋಗಿರಲಿಲ್ಲ. ಇದೀಗ ಪಠಾಣ್ ದೊಡ್ಡ ಮಟ್ಟದಲ್ಲಿ ಗೆದ್ದ ನಂತರ ಪ್ರತಿಕ್ರಿಯಿಸಿದ್ದಾಳೆ. ನಾವು ನಮ್ಮ ಮನೆಯಲ್ಲಿ ಕಲಿಸಿದ ಸಂಸ್ಕøತಿಯನ್ನು ಮೈಗೀಡಿಸಿಕೊಂಡಿದ್ದೇವೆ. ಕಷ್ಟಪಟ್ಟು ಬಂದು, ಒಂದಷ್ಟು ಮೌಲ್ಯಗಳೊಂದಿಗೆ ಬದುಕುತ್ತಿದ್ದೇವೆ. ಅದರ ಮುಂದೆ ಮಿಕ್ಕೆಲ್ಲವೂ ಗೌಣ ಎಂಬರ್ಥದಲ್ಲಿ ಮಾರ್ಮಿಕವಾಗಿ ಮಾತಾಡಿದ್ದಾಳೆ. ವಿಶೇಷವೆಂದರೆ, ಬಾಯ್ಕಾಟ್‍ಗೆ ಗುರಿಯಾಗಿದ್ದ ಪಠಾಣ್ ಇದೀಗ ಸಾವಿರ ಕೋಟಿಯ ಕ್ಲಬ್ ಸೇರಿಕೊಂಡಿದೆ!

The post ವ್ಯರ್ಥ ಪ್ರಲಾಪವಾಯ್ತು ಬಲಪಂಥೀಯರ ಬಾಯ್ಕಾಟ್ ಅಭಿಯಾನ? appeared first on ಶೋಧ ನ್ಯೂಸ್ - Shodha News.

ಕನ್ನಡವೂ ಸೇರಿದಂತೆ ನಾನಾ ಭಾಷೆಗಳಲ್ಲಿ ಬಾಲ ನಟಿಯರಾಗಿ ನಟಿಸಿದ್ದವರನೇಕರು ದೊಡ್ಡ ಮಟ್ಟದಲ್ಲಿ ಹೆಸರು ಮಾಡಿದ್ದಾರೆ. ಮತ್ತೆ ಕೆಲವರು ಪತ್ತೆಯೇ ಇಲ್ಲದಂತೆ ಎಲ್ಲೆಲ್ಲೋ ಕಳೆದು ಹೋಗಿದ್ದಾರೆ. ಹಾಗೆ ಬಾಲ ನಟಿಯಾಗಿ ಎಂಟ್ರಿ ಕೊಟ್ಟು, ಚಾಲ್ತಿಯಲ್ಲಿರುವವರ ಪೈಕಿ ತಮಿಳಿನಲ್ಲಿ ಒಂದಷ್ಟು ಪ್ರಸಿದ್ಧಿ ಪಡೆದುಕೊಂಡಿರುವ ಅನಿಕಾ ಸುರೇಂದ್ರನ್ ಕೂಡಾ ಸೇರಿಕೊಳ್ಳುತ್ತಾಳೆ. ಬಹುಶಃ ಅನಿಕಾ ಸುರೇಂದ್ರನ್ ಅಂದರೆ ಬೇರೆ ಭಾಷೆಯ ಮಂದಿಗೆ ಗುರುತು ಹತ್ತುವುದು ತುಸು ಕಷ್ಟವೇನೋ… ಆದರೆ, ಅಜಿತ್ ನಟನೆಯ ವಿಶ್ವಾಸಂ ಚಿತ್ರದಲ್ಲಿ ಅವರ ಮಗಳಾಗಿ ನಟಿಸಿದ್ದ ಪುಟ್ಟ ಹುಡುಗಿ ಅಂದರೆ ಎಲ್ಲರಿಗೂ ಗುರುತು ಹತ್ತೀತು!

ಈ ಹುಡುಗಿಯ ಬಗ್ಗೆ ಈಗ ಪ್ರಸ್ತಾಪಿಸುತ್ತಿರೋದಕ್ಕೂ ಕಾರಣವಿದೆ. ಅನಿಕಾ ಸುರೇಂದ್ರನ್ ಈಗ ದೊಡ್ಡವಳಾಗಿದ್ದಾಳೆ. ಸಿನಿಮಾ ನಾಯಕಿಯಾಗುವ ಮಟ್ಟಕ್ಕೆ ಬೆಳೆದು ನಿಂತಿದ್ದಾಳೆ. ಓ ಮೈ ಡಾರ್ಲಿಂಗ್ ಎಂಬ ಪ್ರೇಮ ಕಥೆಯಾಧಾರಿತ ತೆಲುಗು ಚಿತ್ರದಲ್ಲಿ ನಾಯಕಿಯಾಗಿ ನಟಿಸುತ್ತಿದ್ದಾಳೆ. ಈ ಮೊದಲ ಚಿತ್ರದಲ್ಲಿಯೇ ಮೈ ಚಳಿ ಬಿಟ್ಟು ಕಿಸ್ಸಿಂಗ್ ಸೀನ್‍ನಲ್ಲಿ ಕಾಣಿಸಿಕೊಳ್ಳುವ ಮೂಲಕ ದೊಡ್ಡ ಮಟ್ಟದಲ್ಲಿಯೇ ಸುದ್ದಿಯಾಗಿದ್ದಾಳೆ. ಈ ಕಿಸ್ಸಿಂಗ್ ಸೀನ್ ಬಗ್ಗೆ ಪಕ್ಕಾ ಬೋಲ್ಡ್ ಆಗಿ ಮಾತಾಡುವ ಮೂಲಕ ಎಲ್ಲರಲ್ಲಿಯೂ ಅಚ್ಚರಿ ಮೂಡಿಸಿದ್ದಾಳೆ!

ಭಾಸ್ಕರ್ ದಿ ರಾಸ್ಕಲ್ ಚಿತ್ರದಲ್ಲಿ ನಯನತಾರಾ ಮಗಳಾಗಿಯೂ ನಟಿಸಿದ್ದ ಅನಿಕಾ ಪ್ರತಿಭಾವಂತ ಕಲಾವಿದೆ. ಈವರೆಗೂ ಬಾಲ ನಟಿಯಾಗಿ ನಿರ್ವಹಿಸಿರುವ ಪಾತ್ರಗಳ ಮೂಲಕವೇ ಅದು ಸಾಬೀತಾಗಿದೆ. ಇಂಥಾ ಹುಡುಗಿ ಒಂದು ಸಿನಿಮಾ ನಾಯಕಿಯಾಗುತ್ತಾಳೆಂದರೆ ಯಾರಿಗಾದರೂ ಆ ಬಗ್ಗೆ ಕುತೂಹಲ ಮೂಡಿಕೊಳ್ಳುತ್ತದೆ. ಈ ಸಿನಿಮಾ ವಿಚಾರದಲ್ಲಿ ಹೇಳೋದಾದರೆ, ಕಥೆಯಲ್ಲಿಯೇ ರೊಮ್ಯಾಂಟಿಕ್ ಟಚ್ ಇದೆಯಂತೆ. ಅದರಲ್ಲಿರುವ ಕಿಸ್ಸಿಂಗ್ ಸೀನ್ ಬಗ್ಗೆ ಮೊದಲು ನಿರ್ದೇಶಕರು ಹೇಳಿದಾಗಲೂ ಆಕೆಗೆ ಏನೂ ಅನ್ನಿಸಿರಲಿಲ್ಲವಂತೆ. ಚಿತ್ರೀಕರಣದಲ್ಲಿಯೂ ಬಿಡುಬೀಸಾಗಿ ನಟಿಸಿದ್ದ ಆಕೆಗೆ ಅದೊಂದು ಪಾತ್ರವಷ್ಟೇ. ಆದ್ದರಿಂದ ಅಂಥಾ ಸೀನುಗಳ ಬಗ್ಗೆ ವಿಶೇಷವಾಗಿ ಏನೂ ಅನ್ನಿಸಲು ಸಾಧ್ಯವಿಲ್ಲ ಅಂದಿದ್ದಾಳೆ ಅನಿಕಾ!

The post ಓ ಮೈ ಡಾರ್ಲಿಂಗ್ ಅಂದವಳದ್ದು ಪಕ್ಕಾ ಬೋಲ್ಡ್ ಕ್ಯಾರೆಕ್ಟರ್! appeared first on ಶೋಧ ನ್ಯೂಸ್ - Shodha News.

ಸೀರಿಯಲ್ ಹುಡುಗಿಯ ರಿಯಲ್ ಕಹಾನಿ!
ಜೊತೆಜೊತೆಯಲಿ ಅಂತೊಂದು ಧಾರಾವಾಹಿ ಕನ್ನಡ ಕಿರುತೆರೆ ಜಗತ್ತಿನಲ್ಲಿ ಮೂಡಿಸಿರುವ ಛಾಪು ನಿಜಕ್ಕೂ ಅಪರೂಪದ್ದು. ಅವಕಾಶವಿಲ್ಲದೆ ಅಂಡಲೆಯುತ್ತಿದ್ದ ಅನಿರುದ್ಧ ಈ ಸೀರಿಯಲ್ ಮೂಲಕ ಸ್ಟಾರ್‍ಗಿರಿ ಪಡೆದುಕೊಂಡಿದ್ದ. ಅತ್ತೆ ಸೊಸೆ ಜಗಳ, ಜಡೆಗಳ ನಡುವಿನ ಕಿತಾಪತಿ ಮತ್ತು ಬ್ಯಾರಲ್‍ಗಟ್ಟಲೆ ಕಣ್ಣೀರು… ಇವಿಷ್ಟರ ಸುತ್ತಲೇ ಸುತ್ತುತ್ತಿದ್ದ ಸೀರಿಯಲ್ ಜಗತ್ತಿಗೆ ಜೊತೆ ಜೊತೆಯಲಿ ಧಾರಾವಾಹಿ ಹೊಸಾ ಆವೇಗ ತಂದುಕೊಟ್ಟಿತ್ತು. ಇಂಥಾ ಧಾರಾವಾಹಿಯ ಮೂಲಕ ನಾಯಕಿಯಾಗಿ ಎಂಟ್ರಿ ಕೊಟ್ಟಿದ್ದಾಕೆ ಮಂಗಳೂರು ಸೀಮೆಯ ಹುಡುಗಿ ಮೇಘಾ ಶೆಟ್ಟಿ. ಹಾಗೆ ಈ ಹುಡುಗಿಗೆ ಅನು ಸಿರಿಮನೆ ಎಂಬ ಅಪರೂಪದ ಪಾತ್ರವೊಂದು ಸಿಕ್ಕಿಬಿಟ್ಟಿತ್ತು.

ಮೇಘಾ ಶೆಟ್ಟಿಗೆ ಮೊದಲ ಹೆಜ್ಜೆಯಲ್ಲಿಯೇ ಸಿಕ್ಕ ಪಾತ್ರದ ಕಿಮ್ಮತ್ತಿದೆಯಲ್ಲಾ? ಅದು ಅನೇಕರಿಗೆ ಹೊಟ್ಟೆ ಉರಿ ತರಿಸಿದ್ದರೂ ಅಚ್ಚರಿಯೇನಲ್ಲ. ಮಧ್ಯಮವರ್ಗದ ತಲ್ಲಣಗಳನ್ನು ಹೊದ್ದುಕೊಂಡೇ, ನಡುವಯಸ್ಸು ದಾಟಿದವನೊಂದಿಗೆ ಲವ್ವಲ್ಲಿ ಬೀಳೋ ಪಾತ್ರವದು. ಆ ಪಾತ್ರ ಏನು ಬೇಡುತ್ತದೋ, ಅದಕ್ಕೆ ಹೇಳಿಮಾಡಿಸಿದಂಥಾ ನಟನೆ, ಸ್ನಿಗ್ಧ ಸೌಂದರ್ಯ ಹೊಂದಿದ್ದಾಕೆ ಮೇಘಾ ಶೆಟ್ಟಿ. ನೋಡ ನೋಡುತ್ತಲೇ ಸದರಿ ಧಾರಾವಾಹಿ ಜನಪ್ರಿಯತೆಯ ಉತ್ತುಂಗಕ್ಕೇರಿತ್ತು. ಅನಿರುದ್ಧ ಆರ್ಯವರ್ಧನ್ ಆಗಿ ಫೇಮಸ್ ಆಗುತ್ತಲೇ, ಮೇಘಾ ಅನು ಸಿರಿಮನೆಯಾಗಿ ಕಿರುತೆರೆ ಪ್ರೇಕ್ಷಕರ ಮನಗೆದ್ದಿದ್ದಳು.

ಜೊತೆಜೊತೆಯಲಿ ಧಾರಾವಾಹಿ ಹೀಗೆ ಪ್ರಸಿದ್ಧಿ ಪಡೆದಿದ್ದರ ಹಿಂದೆ ನಿರ್ದೇಶಕ ಆರೂರು ಜಗದೀಶ್ ಶ್ರಮವಿತ್ತು. ಪ್ರತಿಭೆಯಿತ್ತು. ಅದರಲ್ಲಿ ಪ್ರತಿಭಾನ್ವಿತರ ತಂಡವೊಂದರ ಪಾಲೂ ಕೂಡಾ ಇತ್ತು. ಆದರೆ, ಯಾವಾಗ ಅನಿರುದ್ಧ ಆರ್ಯವರ್ಧನ್ ಆಗಿ ಮಿಂಚಲಾರಂಭಿಸಿದನೋ, ಆಗ ಆತನ ತಿಮಿರು ಮೆಲ್ಲಗೆ ತಿಲ್ಲಾನವಾಡಲಾರಂಭಿಸಿತ್ತು. ಜೊತೆ ಜೊತೆಯಲಿ ಧಾರಾವಾಹಿಯಿಂದಲೇ ಕಲಾವಿದನಾಗಿ ಮರುಜನ್ಮ ಪಡೆದಿದ್ದವನು ಅನಿರುದ್ಧ. ಆದರೆ, ಬರಬರುತ್ತಾ ಆ ಧಾರಾವಾಹಿ ಬರಖತ್ತಾಗಿದ್ದೇ ತನ್ನಿಂದ ಎಂಬಂಥಾ ಅಹಮ್ಮಿಕೆಯನ್ನ ಪ್ರದರ್ಶಿಸಲಾರಂಭಿಸಿದ್ದ. ಆ ಮೇಲೆ ನಡೆದ ಪ್ರವರಗಳೆಲ್ಲವೂ ಕನ್ನಡಿಗರ ಕಣ್ಣಮುಂದಿದೆ.

ಗಮನೀಯ ವಿಚಾರವೆಂದರೆ, ಹಾಗೆ ಅಹಂ ಪ್ರದರ್ಶಿಸುತ್ತಾ ಮೆರೆಯಲಾರಂಭಿಸಿದ ಅನಿರುದ್ಧನ ಮಗ್ಗುಲಲ್ಲಿ ಈ ಹುಡುಗಿ ಮೇಘಾ ಶೆಟ್ಟಿ ಕೂಡಾ ಕಾಣಿಸಿಕೊಂಡಿದ್ದಳು. ಆ ಹೊತ್ತಿಗೆಲ್ಲ ಅನು ಸಿರಿಮನೆಯಾಗಿ ಸಿಕ್ಕ ಗೆಲುವಿನ ನಶೆ ಆಕೆಯ ನೆತ್ತಿಗೇರಿಕೊಂಡಿತ್ತು. ಒಂದು ಹಂತದಲ್ಲಿ ನೇಮು, ಫೇಮು ತಂದುಕೊಟ್ಟಿದ್ದ ಆ ಧಾರಾವಾಹಿಗೆ ಬೆನ್ನು ಹಾಕಿ, ಚಿತ್ರರಂಗದತ್ತ ಹೊರಳಿಕೊಳ್ಳುವ ತಯಾರಿಯನ್ನೂ ನಡೆಸಿದ್ದಳು. ಆ ನಂತರ ನಾನಾ ರಂಪಾಟವಾಗಿ ಮತ್ತೆ ಧಾರಾವಾಹಿಗೆ ಮರಳಿದ್ದಳು. ಹೀಗೆ ಮೊದಲ ಹೆಜ್ಜೆಯಲ್ಲಿಯೇ ಗೆಲುವಿನ ಅಮಲಿನಲ್ಲಿ ಮಿಂದೆದ್ದಿದ್ದ ಮೇಘಾ ಶೆಟ್ಟಿ ಇದೀಗ ಚಿತ್ರರಂಗದಲ್ಲಿಯೂ ನಾಯಕಿಯಾಗಿ ಬ್ಯುಸಿಯಾಗಿದ್ದಾಳೆ.

ಈಕೆ ಗೋಲ್ಡನ್ ಸ್ಟಾರ್ ಗಣೇಶ್‍ಗೆ ನಾಯಕಿಯಾಗಿ ನಟಿಸಿರೋ ತ್ರಿಬಲ್ ರೈಡಿಂಗ್ ಚಿತ್ರ ಬಿಡುಗಡೆಗೊಂಡಿದೆ. ಗಣೇಶನ ಮಾಮೂಲಿ ವರಸೆಯ ಸಿನಿಮಾಗಳಲ್ಲೊಂದಾಗಿ ಅದು ದಾಖಲಾಗಿದ್ದೂ ಆಗಿದೆ. ಸಿದ್ಧಸೂತ್ರಗಳ ಪರಿಧಿಯಲ್ಲಿ ರೂಪುಗೊಂಡಿರುವ ಈ ಚಿತ್ರ ಪ್ರೇಕ್ಷಕರಿಗೆ ಅಷ್ಟಾಗಿ ಹಿಡಿಸಿದಂತಿಲ್ಲ. ನಾಯಕಿಯಾಗಿ ಆರಂಭಿಕ ಹೆಜ್ಜೆಯಲ್ಲಿಯೇ ಹೀಗೆ ಮುಗ್ಗರಿಸಿಸಿದ್ದರೂ ಕೂಡಾ ಮೇಘಾ ಶೆಟ್ಟಿಯ ಮೆರೆದಾಟ ಮಾತ್ರ ಜೋರಾಗಿದೆ ಅಂತೊಂದು ಆರೋಪ ಗಾಂಧಿನಗರದ ಗಲ್ಲಿಯಗುಂಟ ಇಟ್ಟಾಡುತ್ತಿದೆ. ಇದು ಮೇಘಾ ಪಾಲಿಗೆ ಮೊದಲ ಚಿತ್ರ. ಅದು ಹೇಳಿಕೊಳ್ಳುವಂಥಾ ಗೆಲುವನ್ನೂ ಕಂಡಿಲ್ಲ. ಆದರೆ, ಈ ಮೇಘಾ ಮಾತ್ರ ಹತ್ತಾರು ಹಿಟ್ ಸಿನಿಮಾಗಳಲ್ಲಿ ನಟಿಸಿದ ನಟಿಯರನ್ನೂ ಸೈಡು ಹೊಡೆಯುವಂತೆ ಪೋಸು ಕೊಡುತ್ತಿದ್ದಾಳೆಂಬ ಅಸಹನೆಯೂ ಗಾಂಧಿ ನಗರದಲ್ಲೀಗ ಹಬೆಯಾಡುತ್ತಿದೆ.

ಹಾಗೆ ನೋಡಿದರೆ, ತ್ರಿಬಲ್ ರೈಡಿಂಗ್ ಸ್ಕಿಡ್ ಆದ ನಂತರವೂ ಮೇಘಾ ಶೆಟ್ಟಿಯ ಮುಂದೆ ಒಂದಷ್ಟು ಅವಕಾಶಗಳಿದ್ದಾವೆ. ಈಗಾಗಲೇ ಡಾರ್ಲಿಂಗ್ ಕೃಷ್ಣ ನಾಯಕನಾಗಿರೋ ದಿಲ್ ಪಸಂದ್ ಸೇರಿದಂತೆ ಮೂರ್ನಾಲಕ್ಕು ಸಿನಿಮಾಗಳಲ್ಲಿ ಆಕೆ ನಾಯಕಿಯಾಗಿ ನಟಿಸಿದ್ದಾಳೆ. ಇನ್ನೊಂದಷ್ಟು ಆಫರ್‍ಗಳೂ ಆಕೆಯ ಮುಂದೆ ಎಡತಾಕುತ್ತಿವೆ. ನಿಖರವಾಗಿ ಹೇಳಬೇಕೆಂದರೆ, ನಟಿಯಾಗಿ ಬೆಳೆಯಬಹುದಾದ ವಿಫುಲ ಅವಕಾಶಗಳು ಮೇಘಾ ಮುಂದಿವೆ. ಆದರೆ, ಅದಕ್ಕೆಲ್ಲ ಆಕೆಯೊಳಗಿರೋ ಅಹಮ್ಮಿಕೆಯೇ ಅಡ್ಡಗಾಲಾಗೋ ಲಕ್ಷಣಗಳೂ ಕೂಡಾ ದಟ್ಟವಾಗಿಯೇ ಗೋಚರಿಸುತ್ತಿವೆ!

ಯಾಕೆಂದರೆ, ಸೋಲಿನ ಸವಾಲಿಗೆ ಎದೆಗೊಟ್ಟು ಮೇಲೆದ್ದು ನಿಲ್ಲೋದು ಎಷ್ಟು ಕಷ್ಟವೋ, ಗೆಲುವೊಂದನ್ನು ಸಂಭಾಳಿಸೋದೂ ಕೂಡಾ ಅಷ್ಟೇ ರಿಸ್ಕಿನ ವಿಚಾರ. ಅದು ಕೆಲವರಿಗೆ ಮಾತ್ರವೇ ಸಿದ್ಧಿಸಬಹುದಾದ ಕಲೆ ಎಂದರೂ ಅತಿಶಯವೇನಲ್ಲ. ಅದರಲ್ಲಿಯೂ ಪವಾಡವೆಂಬಂತೆ ಅವಕಾಶ ಪಡೆದು, ಪ್ರಸಿದ್ಧರಾದ ಮೇಘಾಳಂಥಾ ಎಳಸು ಮನಸ್ಥಿತಿಗಂತೂ ಆ ಕಲೆ ಸುಲಭಕ್ಕೆ ನಿಲುಕುವಂಥಾದ್ದಲ್ಲ. ಅಲ್ಲಿ ಶುಭ್ರ ವಿಧೇಯತೆ ಮಿನುಗಬೇಕಾದ ಜಾಗವನ್ನು, ನಿಗಿನಿಗಿಸೋ ಅಹಮ್ಮಿಕೆ ಆವರಿಸಿಕೊಳ್ಳುತ್ತೆ. ಅದುವೇ ತಾನು ಸೀಮೆಗಿಲ್ಲದ ಸೆಲೆಬ್ರಿಟಿ ಎಂಬ ಭಾರದ ಕರೀಟವನ್ನು ಹೊತ್ತು ತಿರುಗುವಂತೆ ಮಾಡುತ್ತೆ. ಹಾಗೆ ಸುತ್ತಾಡಿ ಸುಸ್ತಾಗಿ ವಿಶ್ರಾಂತಿ ಪಡೆಯಲು ಕೂತಾಗ, ಸುತ್ತಲ ಜಗತ್ತು ಎದ್ದು ಗಾವುದ ದೂರ ಹೆಜ್ಜೆ ಹಾಕಿರುತ್ತೆ. ಅವಕಾಶಗಳೆಲ್ಲವೂ ಯಾರದ್ದೋ ಪಾಲಾಗಿ ಮನೆ ಸೇರಿಕೊಳ್ಳುವ ಅವಸ್ಥೆ ಬಂದರೂ ಅಚ್ಚರಿಯೇನಿಲ್ಲ.

ಯಾಕೋ ಮೇಘಾ ಶೆಟ್ಟಿ ಅಂಥಾದ್ದೊಂದು ಅಪಾಯದ ಅಂಚಿನಲ್ಲಿ ನಿಂತಿಕರುವಂತೆ ಭಾಸವಾಗುತ್ತಿದೆ. ಹೀಗೆ ಗೆಲುವಿನ ನಶೆಯನ್ನು ನೆತ್ತಿಗಡರಿಸಿಕೊಂಡ ಅದೆಷ್ಟೋ ನಟ ನಟಿಯರು ಹೇಳ ಹೆಸರಿಲ್ಲದಂತೆ ಮಾಯವಾಗಿದ್ದಾರೆ. ಅವಕಾಶವೆಂಬ ಮಾಯೆ ಅಂಥವರನ್ನು ಕೈಗೆಟುಕದೆ ಸತಾಯಿಸಿದೆ. ಹಾಗಿರುವಾಗ ಧಾರಾವಾಹಿ ಗೆಲುವಿನ ಭ್ರಮೆಯಲ್ಲಿರುವ ಮೇಘಾಳಿಗೂ ಅಂಥಾ ಅಪಾಯ ತಪ್ಪಿದ್ದಲ್ಲ. ಆಕೆ ಕಿರೀಟವನ್ನು ಕೆಳಗಿಳಿಸಿ, ಗೆಲುವಿನ ಭ್ರಮೆ ಕಳಚಿ ಮುಂದುವರೆದರೆ ಭವಿಷ್ಯ ಉಜ್ವಲವಾದೀತೇನೋ. ಇದೇ ತ್ರಿಬಲ್ ರೈಡಿಂಗ್ ಚಿತ್ರದಲ್ಲಿ ಅದಿತಿ ಕೂಡಾ ನಾಯಕಿಯಾಗಿ ನಟಿಸಿದ್ದಾರೆ. ಆಕೆ ಅದಾಗಲೇ ಅಪರೂಪದ ನಟಿಯಾಗಿ ಗುರುತಿಸಿಕೊಂಡಿರುವವರು. ಅದೇ ಹೊತ್ತಿನಲ್ಲಿ ಯಾವುದಕ್ಕೂ ಉಬ್ಬದ ಪ್ರೌಢಿಮೆಯನ್ನೂ ರೂಡಿಸಿಕೊಂಡಿರುವಾಕೆ. ಅದಿತಿಯ ವರ್ತನೆಗೂ, ಮೇಘಾಳ ವರಸೆಗೂ ಅಜಗಜಾಂತರ ವ್ಯತ್ಯಾಸವಿದೆ. ಒಂಚೂರು ಎಚ್ಚರ ತಪ್ಪಿದರೂ ಅನಿರುದ್ಧನಿಗೆ ಜೋಡಿಯಾಗಿ ಮತ್ಯಾವುದೋ ಧಾರಾವಾಹಿಯಲ್ಲಿ ನಟಿಸೋ ಅವಕಾಶವೊಂದೇ ಮೇಘಾ ಪಾಲಿಗುಳಿದರೂ ಅಚ್ಚರಿಯೇನಿಲ್ಲ. ಹಾಗಾಗದಿರಲೆಂಬುದು ಹಾರೈಕೆ!

The post ಆಕೆಯ ಮೇಲಿರೋ ಆರೋಪಗಳೆಲ್ಲ ನಿಜವೇ? appeared first on ಶೋಧ ನ್ಯೂಸ್ - Shodha News.

ನಟ ನಟಿಯರ ಖಾಸಗೀ ಬದುಕಿನ ಬಗ್ಗೆ ಜನಸಾಮಾನ್ಯರಲ್ಲೊಂದು ಕುತೂಹಲ ಸದಾ ಇದ್ದೇ ಇರುತ್ತದೆ. ಈ ಕಾರಣದಿಂದಲೇ ಇವರ ಬದುಕುಗಳು ಆಗಾಗ ರೂಮರ್‌ಗಳಿಗೂ ಆಹಾರವಾಗುತ್ತಲೇ ಇರುತ್ತದೆ. ಆದರೆ ಇಲ್ಲಿನ ಬಹುತೇಕರ ವೈಯಕ್ತಿಕ ಬದುಕು ಅಧ್ವಾನವೆದ್ದುಬಿಟ್ಟಿರುತ್ತೆ. ಇಲ್ಲಿ ಪ್ರೀತಿ, ಪ್ರೇಮ, ಸಂಸಾರ ಸೇರಿದಂತೆ ಯಾವುದೂ ಕೂಡಾ ಹೆಚ್ಚು ದಿನ ಬಾಳಿಕೆ ಬರುವುವಂಥಾದದ್ದಲ್ಲ ಎಂಬ ಮಾತಿದೆ. ಇದಕ್ಕೆ ಅಪವಾದದಂತೆ ಕೆಲವರಿರೋದು ಹೌದಾದರೂ ಮತ್ತುಳಿದವರ ಕಥೆಗಳು ಅದಕ್ಕೆ ಪೂರಕವಾಗಿವೆ. ಅದರಲ್ಲಿಯೂ ನಟಿಯರಂತೂ ಗುಟ್ಟಾಗಿ ಮದುವೆಯಾಗಿ ಸಂಸಾರ ನಡೆಸೋದರಲ್ಲಿ ಫೇಮಸ್ಸು. ಇಲಿಯಾನಾ ಮದುವೆಯಾದ ಸುದ್ದಿ ಇತ್ತೀಚೆಗೆ ಡಿವೋರ್ಸ್ ರೂಮರ್‌ನೊಂದಿಗೇ ಜಾಹೀರಾಗಿತ್ತು. ಇದೀಗ ಮೈನಾ ಖ್ಯಾತಿಯ ನಿತ್ಯಾ ಮೆನನ್ ಸುತ್ತಲೂ ಮದವೆ ವಿಚಾರವಾಗಿ ಅಂಥಾದ್ದೇ ರೂಮರ್ ಹಬೆಯಾಡಲಾರಂಭಿಸಿದೆ.

ನಿತ್ಯಾ ಮೆಲನನ್ ಮೂಲ ಕೇರಳದವಳೇ ಆದರೂ ಕನ್ನಡದ ಹುಡುಗಿ. ಕನ್ನಡದ ನಟಿಯರೇ ಕನ್ನಡದಲ್ಲಿ ಮಾತಾಡಲು ತಿಮಿರು ತೋರಿಸುವ ಈ ದಿನಮಾನದಲ್ಲಿ ಅರಳು ಹುರಿದಂತೆ ಸ್ಪಷ್ಟವಾಗಿಯೇ ಕನ್ನಡ ಮಾತಾಡೋ ನಿತ್ಯಾ ಕನ್ನಡಿಗರಿಗೆ ಅಚ್ಚುಮೆಚ್ಚಿನ ನಟಿ. ವಿವಾದಗಳಿಂದ ಸಾಕಷ್ಟು ದೂರವಿರಲು ಪ್ರಯತ್ನಿಸುತ್ತಲೇ ಸಿನಿಮಾ ಮೂಲಕ ಮಾತ್ರವೇ ಸದ್ದು ಮಾಡುತ್ತಾ ಬಂದಿದ್ದಾಕೆ ನಿತ್ಯಾ ಮೆನನ್. ಅಫೇರುಗಳ ವಿಚಾರದಲ್ಲಿಯೂ ಸಹ ಈಕೆಯ ಸುತ್ತಾ ರೂಮರ್‌ಗಳು ಹರಿದಾಡಿದಂತಿಲ್ಲ. ಆದರೀಗ ನಿತ್ಯಾ ಮೆನನ್ ಗುಟ್ಟಾಗಿ ಮದುವೆಯಾಗಿ ಸಂಸಾರ ನಡೆಸುತ್ತಿದ್ದಾಳೆಂಬ ವಿಚಾರವೊಂದು ಕೇರಳದ ತುಂಬಾ ಸುದ್ದಿಯಾಗುತ್ತಿದೆ.

ಕಳೆದ ಕೆಲ ತಿಂಗಳಿಂದಲೇ ನಿತ್ಯಾ ಗುಟಾಗಿ ಮದುವೆಯಾಗಿದ್ದಾಳೆಂಬ ಬಗ್ಗೆ ಕೇರಳದಲ್ಲಿ ಗುಲ್ಲೆದ್ದಿತ್ತು. ಇದೀಗ ಅಲ್ಲಿನ ಪತ್ರಿಕೆಯೊಂದು ನಿತ್ಯಾ ಬಗ್ಗೆ ಬರಹ ಪ್ರಕಟಿಸಿದೆ. ಅದರಲ್ಲಿ ಲೇಖಕರು ಶ್ರೀಮತಿ ನಿತ್ಯಾ ಮೆನನ್ ಎಂದು ಉಲ್ಲೇಖಿಸಿದ್ದಾರೆ. ಇದು ಇಡೀ ಬರವಣಿಗೆಯಲ್ಲಿ ಆಗಾಗ ರಿಪೀಟಾಗಿದೆ. ಈ ಕಾರಣದಿಂದ ನಿತ್ಯಾ ಗುಟ್ಟಾಗಿ ಮದುವೆಯಾಗಿದ್ದಾಳೆಂಬ ಗಾಳಿ ಸುದ್ದಿಗೆ ಮತ್ತಷ್ಟು ರೆಕ್ಕೆ ಪುಕ್ಕ ಮೂಡಿಕೊಂಡಂತಾಗಿದೆ. ಆದರೆ ಈಬಗ್ಗೆ ನಿತ್ಯಾ ಇದುವರೆಗೂ ಪ್ರತಿಕ್ರಿಯಿಸಿಲ್ಲ. ನಿತ್ಯಾ ಕನ್ನಡದಲ್ಲಿ ಮೈನಾ, ಕೋಟಿಗೊಬ್ಬ ಮುಂತಾದ ಅನೇಕ ಚಿತ್ರಗಳಲ್ಲಿ ನಟಿಸಿದ್ದಾಳೆ. ಕೇರಳದಲ್ಲಿಯಂತೂ ಆಕೆ ಥರ ಥರದ ಪಾತ್ರಗಳನ್ನು ನಿರ್ವಹಿಸೋ ಮೂಲಕ ಪ್ರತಿಭಾವಂತ ನಟಿಯಾಗಿ ಗುರುತಿಸಿಕೊಂಡಿದ್ದಾಳೆ. ಇದೀಗ ಆಕೆ ಮದುವೆ ಮ್ಯಾಟರಿನ ಮೂಲಕ ಭಾರೀ ಸುದ್ದಿಯಲ್ಲಿದ್ದಾಳೆ.

The post ಕಿಚ್ಚನ ಹುಡುಗಿಯ ಮೇಲೊಂದು ಗುಮಾನಿ! appeared first on ಶೋಧ ನ್ಯೂಸ್ - Shodha News.

ಕುಟುಂಬ ಸಮೇತರಾಗಿ ಕೂತು ನೋಡುವಂಥಾ ಥರ ಥರದ ಪಾತ್ರಗಳ ಮೂಲಕ ಬೆಳ್ಳಿತೆರೆಯನ್ನು ಶ್ರೀಮಂತಗೊಳಿಸಿದ್ದವರು ನಟಿ ಪ್ರೇಮಾ. ಅವರ ಹೆಸರು ಕೇಳಿದರೂ ಪುಳಕಿತರಾಗಿ, ಪ್ರೇಮಾ ನಟಿಸಿದ ಚಿತ್ರಗಳನ್ನು ನೆನಪು ಮಾಡಿಕೊಂಡು ಮದಗೊಳ್ಳುವ ಕೋಟ್ಯಂತರ ಅಭಿಮಾನಿಗಳು ಕರುನಾಡಿನಲ್ಲಿದ್ದಾರೆ. ಹಾಗೆ ಪ್ರೇಕ್ಷಕರ ಪ್ರೀತಿ ಸಂಪಾದಿಸಿಕೊಂಡು, ತಮ್ಮದೇ ಆದ ಅಭಿಮಾನಿ ವರ್ಗವೊಂದನ್ನು ಸೃಷ್ಟಿಸಿಕೊಂಡಿದ್ದವರು ಪ್ರೇಮಾ. ತೊಂಭತ್ತರ ದಶಕದಲ್ಲಿ ಮುಖ್ಯನಾಯಕಿಯಾಗಿ ಮಿಂಚಿ ಸ್ಟಾರ್ ನಟರೊಂದಿಗೆ ತೆರೆಹಂಚಿಕೊಂಡಿದ್ದ ಅವರು ದಶಕಗಳ ಕಾಲ ಆ ಅಲೆಯನ್ನು ಹಾಗೆಯೇ ಕಾಪಿಟ್ಟುಕೊಂಡಿದ್ದರು. ಆ ನಂತರದಲ್ಲಿ ಒಂದು ಸುದೀರ್ಘವಾದ ಗ್ಯಾಪ್‌ನ ನಂತರ ಆಗಾಗ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದ ಪ್ರೇಮಾ, ಇದೀಗ ಹೊಸಾ ಆವೇಗದೊಂದಿಗೆ, ಹೊಸಾ ಬಗೆಯ ಪಾತ್ರದೊಂದಿಗೆ ವೆಡ್ಡಿಂಗ್ ಗಿಫ್ಟ್ ಚಿತ್ರದ ಮೂಲಕ ಮತ್ತೆ ಮರಳಿದ್ದಾರೆ.

ವಿಕ್ರಂ ಪ್ರಭು ನಿರ್ಮಾಣ ಮಾಡಿ ನಿರ್ದೇಶಿಸಿರುವ ವೆಡ್ಡಿಂಗ್ ಗಿಫ್ಟ್ ಒಂದಷ್ಟು ಕಾತರ ಮೂಡಿಸಿರೋದಕ್ಕೆ ಪ್ರೇಮಾ ಪುನರಾಗಮನವೂ ಪ್ರಧಾನ ಕಾರಣ. ಪ್ರೇಮಾ ಆರಂಭ ಕಾಲದಿಂದಲೂ ಕುಟುಂಬ ಸಮೇತರಾಗಿ ಕೂತು ನೋಡುವಂಥಾ ಪಾತ್ರಗಳಲ್ಲಿ ನಟಿಸುತ್ತಾ ಬಂದಿದ್ದಾರೆ. ಬಲು ತೂಕದ ಪಾತ್ರಗಳನ್ನೇ ಆವಾಹಿಸಿಕೊಳ್ಳುತ್ತಾ ಪ್ರೇಕ್ಷಕರಿಗೆ ಹತ್ತಿರಾಗಿದ್ದಾರೆ. ಹಾಗಿರುವಾಗ ರೀ ಎಂಟ್ರಿಯ ಈ ಹೊತ್ತಿನಲ್ಲಿ ಎಂತೆಂಥಾದ್ದೋ ಪಾತ್ರ ನಿರ್ವಹಿಸುವ ಮನಸ್ಥಿತಿ ಅವರಿಗಿಲ್ಲ. ಕಥೆ ಚೆನ್ನಾಗಿರಬೇಕು. ಪಾತ್ರವೂ ಅದಕ್ಕೆ ತಕ್ಕುದಾಗಿರೋದರ ಜೊತೆಗೆ ಸಾಮಾಜಿಕ ಸಂದೇಶವನ್ನೂ ಕೊಡುವಂತಿರಬೇಕೆಂಬುದು ಪ್ರೇಮಾರ ಬಯಕೆ. ಅದನ್ನು ಪೂರೈಸುವಂತೆ ಸಿಕ್ಕ ಚಿತ್ರ ವೆಡ್ಡಿಂಗ್ ಗಿಫ್ಟ್.

ವಿಕ್ರಂ ಪ್ರಭು ಕಥೆಯ ಎಳೆಯನ್ನು ಹೇಳಿದಾಕ್ಷಣವೇ ಅದು ಪ್ರೇಮಾರನ್ನು ತಾಕಿತ್ತಂತೆ. ಅದರಲ್ಲಿರುವ ಪ್ರಯೋಗಾತ್ಮಕ ಗುಣ, ಕಥೆಯೊಳಗೇ ಅಡಕವಾಗಿರುವಂಥಾ ಸಾಮಾಜಿಕ ಕಾಳಜಿ ಮತ್ತು ತಮ್ಮ ಪಾತ್ರದ ಮಹತ್ವಗಳೆಲ್ಲವೂ ಅವರನ್ನು ಸೆಳೆದಿದ್ದವಂತೆ. ಈ ಕಾರಣದಿಂದಲೇ ಬೇರೇನೂ ಯೋಚಿಸದೆ ಪ್ರೇಮಾ ನಟಿಸಲು ಒಪ್ಪಿಕೊಂಡು ಬಿಟ್ಟಿದ್ದರಂತೆ. ಆ ನಂತರದಲ್ಲಿ ಅವರು ಈ ಕಥೆಯ ಮೇಲಿಟ್ಟಿದ್ದ ನಂಬಿಕೆ ಮುಕ್ಕಾಗದಂತೆ ಅದು ದೃಷ್ಯ ರೂಪಕ್ಕಿಳಿದಿದೆಯೆಂಬ ಖುಷಿ ಪ್ರೇಮಾರಲ್ಲಿದೆ. ಕ್ಯಾಮೆರಾ ವರ್ಕ್ ಸೇರಿದಂತೆ ಒಂದಿಡೀ ಚಿತ್ರ ರೂಪುಗೊಂಡಿದ್ದರ ಬಗ್ಗೆ ಅವರು ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ. ವೆಡ್ಡಿಂಗ್ ಗಿಫ್ಟ್ ಮೂಲಕ ತಾವು ಮತ್ತೊಮ್ಮೆ ಪ್ರೇಕ್ಷಕರನ್ನು ಭಿನ್ನ ಪಾತ್ರದ ಮೂಲಕ ಮುಖಾಮುಖಿಯಾಗುತ್ತಿರುವ ಖುಷಿಯೂ ಅವರಲ್ಲಿದೆ.

ಪ್ರೇಮಾ ಒಂದಷ್ಟು ವರ್ಷಗಳ ಕಾಲ ಕಾಲ ತೆರೆಮರೆಯಲ್ಲಿದ್ದರಲ್ಲಾ? ಅವರಿಗೆ ಅವಕಾಶಗಳ ತತ್ವಾರವಾಗಿದೆ ಅಂತೆಲ್ಲ ಒಂದಷ್ಟು ಮಂದಿ ಸುದ್ದಿ ಹಬ್ಬಿಸಿದ್ದರು. ಆದರೆ ಅಸಲೀ ಕಥೆ ಬೇರೆಯದ್ದೇ ಇದೆ. ಬೇರೆ ಭಾಷೆಗಳಲ್ಲಿ ಬ್ಯುಸಿಯಾಗಿದ್ದ ಪ್ರೇಮಾರ ಮುಂದೆ ಕನ್ನಡದಲ್ಲಿಯೂ ದಂಡಿ ದಂಡಿ ಅವಕಾಶಗಳು ಬರುತ್ತಿದ್ದವು. ಆದರೆ ಅದಾಗಲೇ ಸ್ಟಾರ್ ನಟಿಯಾಗಿ ಗುರುತಿಸಿಕೊಂಡು, ಘನತೆಯಿರುವ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದ ಅವರಿಗೆ ಯಾವ್ಯಾವುದೋ ಚಿತ್ರಗಳಲ್ಲಿ ನಟಿಸೋದು ಸುತಾರಾಂ ಇಷ್ಟವಿರಲಿಲ್ಲ. ಅಷ್ಟಕ್ಕೂ ಪ್ರೇಮಾ ತಮ್ಮ ಚಿತ್ರದಲ್ಲಿ ನಟಿಸಿದರೆ ಮೈಲೇಜು ಸಿಗುತ್ತದೆಂದು ಕಾದು ಕೂತಿದ್ದ ಒಂದಷ್ಟು ಮಂದಿಗೆ, ಪ್ರೇಮಾರ ಘನತೆ, ಗೌರವಕ್ಕೆ ತಕ್ಕುದಾದ ಪಾತ್ರ ಸೃಷ್ಟಿಸಬೇಕೆಂಬ ಪರಿವೆ ಇರಲಿಲ್ಲ. ಅಂಥಾದ್ದರ ಬಗ್ಗೆ ಯಾವ ಮರುಕ, ಕಂಪ್ಲೇಂಟುಗಳನ್ನೂ ಇಟ್ಟುಕೊಳ್ಳದ ಪ್ರೇಮಾರಿಗೆ ವೆಡ್ಡಿಂಗ್ ಗಿಫ್ಟ್ ಚಿತ್ರದಲ್ಲಿ ವಕೀಲೆಯಾಗೋ ಅವಕಾಶ ಕೂಡಿ ಬಂದಿದೆ. ಪ್ರೇಮಾ ನಟಿಸಲು ಒಪ್ಪಿಕೊಂಡಿರೋದೇ ಈ ಚಿತ್ರದ ಕಥೆ ಭಿನ್ನವಾಗಿದೆ ಎಂಬುದರ ಸ್ಪಷ್ಟ ಸಂಕೇತ.

ಪ್ರೇಮಾ ಈ ಚಿತ್ರದ ಮೂಲಕ ಮತ್ತೆ ಬಂದಿರೋದರಿಂದ ಕನ್ನಡದ ಪ್ರೇಕ್ಷಕರು ನಿಜಕ್ಕೂ ಥ್ರಿಲ್ ಆಗಿದ್ದಾರೆ. ೧೯೯೫ರಲ್ಲಿ ಸವ್ಯಸಾಚಿ ಎಂಬ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ನಟಿಯಾಗಿ ಎಂಟ್ರಿ ಕೊಟ್ಟಿದ್ದವರು ಪ್ರೇಮಾ. ಈ ಚೆಂದದ ಹುಡುಗಿಯನ್ನು ಆ ನಂತರದ ದಿನಗಳಲ್ಲಿ ಕನ್ನಡದ ಚಿತ್ರಪ್ರೇಮಿಗಳೆಲ್ಲ ಆರಾಧಿಸಿದ ಪರಿಯೇ ಅದ್ಭುತ. ಕನ್ನಡದಲ್ಲಿ ಸಕ್ರಿಯರಾಗಿದ್ದುಕೊಂಡು ಮಲೆಯಾಳಂ ಸೇರಿದಂತೆ ನಾನಾ ಭಾಷೆಗಳಲ್ಲಿ ನಟಿಸುತ್ತಾ, ದಕ್ಷಿಣ ಭಾರತೀಯ ಚಿತ್ರರಂಗದಲ್ಲವರು ದೊಡ್ಡ ಹೆಸರು ಮಾಡಿದ್ದಾರೆ. ಓಂ ಚಿತ್ರದ ಅಮೋಘ ನಟನೆಗಾಗಿ ರಾಜ್ಯ ಪ್ರಶಸ್ತಿಯನ್ನೂ ಪಡೆದುಕೊಂಡಿರುವ ಪ್ರೇಮಾ ಕನ್ನಡ ಚಿತ್ರರಂಗದ ನಿಜವಾದ ಆಸ್ತಿ. ಅವರಿಗಾಗಿ ಚೆಂದದ, ಸದಭಿರುಚಿಯ, ಸಾಮಾಜಿಕ ಸಂದೇಶದ ಪಾತ್ರಗಳು ಸೃಷ್ಟಿಯಾದರೆ ಮತ್ತೆ ಪ್ರೇಮಾ ಕನ್ನಡದಲ್ಲಿ ಮಿಂಚೋದರಲ್ಲಿ ಯಾವ ಸಂದೇಹವೂ ಇಲ್ಲ. ಅದಕ್ಕೆ ವೆಡ್ಡಿಂಗ್ ಗಿಫ್ಟ್ ಚಿತ್ರ ಶ್ರೀಕಾರ ಹಾಕಲಿ, ಅವರ ವೃತ್ತಿ ಬದುಕು ಮತ್ತೆ ಪ್ರಜ್ವಲಿಸಲೆಂದು ಹಾರೈಸೋಣ…

The post ವಕೀಲೆಯಾಗಿದ್ದೇ ಒಂದು ವಿಶಿಷ್ಟ ಅನುಭವ! appeared first on ಶೋಧ ನ್ಯೂಸ್ - Shodha News.

ಇದೀಗ ದಕ್ಷಿಣ ಭಾರತದ ಚಿತ್ರಗಳನೇಕವು ದೇಶ ವಿದೇಶಗಳಲ್ಲಿ ಸದ್ದು ಮಾಡುತ್ತಿವೆ. ಭಾರತೀಯ ಚಿತ್ರ ರಂಗವೆಂದರೆ ಬಾಲಿವುಡ್ ಮಾತ್ರ ಎಂಬಂತೆ ಬಿಂಬಿಸಿಕೊಳ್ಳುತ್ತಿದ್ದ ಮಂದಿ ಈ ಬೆಳವಣಿಗೆಗಳ ವಿರುದ್ಧ ಕುದ್ದು ಹೋಗಿದ್ದಾರೆ. ಆದರೆ ಕ್ವಾಲಿಟಿ ಕಂಟೆಂಟಿನ ಮೂಲಕವಷ್ಟೇ ಸಾಬೀತಾಗಬೇಕಿರೋ ಈ ವಿಚಾರದ ಮುಂದೆ ಒಣ ಮಾತುಗಳು, ದೌಲತ್ತಿನ ಹೇಳಿಕೆಗಳೆಲ್ಲವೂ ಮಂಕು ಹೊಡೆಯುತ್ತಿವೆ. ಒಂದು ಕಾಲದಲ್ಲಿ ದಕ್ಷಿಣ ಭಾರತೀಯ ಚಿತ್ರರಂಗಗಳನ್ನು ಕಾಲ ಕಸಕ್ಕಿಂತಲೂ ಕಡೆಯಾಗಿ ನೋಡುತ್ತಿದ್ದವರೆಲ್ಲ ಪ್ರತಿಭೆಯ ಮೂಲಕವೇ ಕಂಡು ಬರುತ್ತಿರುವ ಪ್ರತಿರೋಧಗಳನ್ನು ಕಂಡು ಕಂಗಾಲಾಗಿದ್ದಾರೆ. ಹೀಗೆ ಭಾಷೆ ಭಾಷೆಗಳ ನಡುವೆ ಸಿನಿಮಾ ಮಾಧ್ಯಮದಲ್ಲಿಯೂ ಬೆಂಕಿ ಬಿದ್ದಿರುವ ಈ ಘಳಿಗೆಯಲ್ಲಿ ಪ್ರಸ್ತುತ ಸನ್ನಿವೇಶದ ಬಗ್ಗೆ ಮಂಗಳೂರು ಮೂಲದ ನಟಿ ಪೂಜಾ ಹೆಗ್ಡೆ ತನ್ನ ಅಭಿಪ್ರಾಯ ಮಂಡಿಸಿದ್ದಾಳೆ.

ಹಿಂದಿ ಮತ್ತು ದಕ್ಷಿಣ ಭಾರತೀಯ ಚಿತ್ರಗಳ ಬಗ್ಗೆ ಇದೀಗ ಚರ್ಚೆಗಳು ನಡೆಯುತ್ತಿವೆಯಲ್ಲಾ? ಈ ಬಗ್ಗೆ ಪೂಜಾ ಹೆಗ್ಡೆ ಬಿಡುಬೀಸಾಗಿ ಮಾತಾಡಿದ್ದಾಳೆ. ನಾವೆಲ್ಲರೂ ಒಂದೇ ದೇಶದವರು ಮತ್ತು ಇದು ಎಲ್ಲವೂ ಒಗ್ಗೂಡಿರುವ ಭಾರತೀಯ ಚಿತ್ರರಂಗ ಎಂಬ ಅಭಿಪ್ರಾಯ ಹೊರಹಾಕಿದ್ದಾಳೆ. ಹೀಗಹೆ ಭಾಷೆಗಳ ಆಧಾರದಲ್ಲಿ ಇಬ್ಬಾಗವಾಗೋದನ್ನು ನಿಲ್ಲಿಸಬೇಕು. ಇದೆಲ್ಲವನ್ನೂ ಮೀರಿ ಎಲ್ಲ ಭಾಷೆಗಳ ಚಿತ್ರರಂಗದ ಮಂದಿಯೂ ಭಾರತೀಯ ಚಿತ್ರರಂಗವೆಂಬ ಪರಿಕಲ್ಪನೆಯ ಅಡಿಯಲ್ಲಿ ಮುಂದುವರೆಯಬೇಕು ಎಂಬ ಅನಿಸಿಕೆಯನ್ನೂ ಕೂಡಾ ಪೂಜಾ ಚರ್ಚೆಯೊಂದರಲ್ಲಿ ಹಂಚಿಕೊಂಡಿದ್ದಾಳೆ.

ಮಂಗಳೂರಿನ ಹುಡುಗಿ ಪೂಜಾ ಹೆಗ್ಡೆಯೀಗ ದಕ್ಷಿಣ ಭಾರತೀಯ ಚಿತ್ರರಂಗದಲ್ಲಿ ಬಹು ಬೇಡಿಕೆಯ ನಟಿಯಾಗಿ ಮಿಂಚುತ್ತಿದ್ದಾಳೆ. ಬಾಲಿವುಡ್ ಸ್ಟಾರ್ ಹೃತಿಕ್ ರೋಷನ್ ಜೋಡಿಯಾಗಿ ಮೊಹೆಂಜದಾರೋ ಚಿತ್ರದ ಮೂಲಕ ಬಾಲಿವುಡ್‌ಗೆ ಎಂಟ್ರಿ ಕೊಟ್ಟಿದ್ದ ಪೂಜಾ ಈಗ ತೆಲುಗಿನಲ್ಲಿ ಬಹಳಷ್ಟು ಅವಕಾಶಗಳೊಂದಿಗೆ ಸ್ಟಾರ್ ನಟಿಯಾಗಿ ಗುರುತಿಸಿಕೊಂಡಿದ್ದಾಳೆ. ಮಂಗಳೂರು ಮೂಲದ ಕನ್ನಡದ ಹುಡುಗಿ ಪೂಜಾ ಚಿತ್ರವೊಂದಕ್ಕೆ ಪಡೆಯುತ್ತಿರೋ ಸಂಭಾವನೆ ಎಂಥವರೂ ಅಚ್ಚರಿಗೀಡಾಗುವಂತಿದೆ.

ಪೂಜಾ ಇದೀಗ ಬೇರೊಂದು ಚಿತ್ರವನ್ನು ಒಪ್ಪಿಕೊಂಡಿದ್ದಾಳೆ. ಆ ಚಿತ್ರಕ್ಕಾಗಿ ಪಡೆದುಕೊಂಡಿರೋ ಸಂಭಾವನೆಯ ಮೂಲಕವೇ ಪೂಜಾ ಸದ್ದು ಮಾಡಿದ್ದಾಳೆ. ಅದಕ್ಕಾಗಿ ಈಕೆ ಪಡೆದುಕೊಂಡಿರೋದು ಭರ್ತಿ ಒಂದು ಕೋಟಿ. ಕನ್ನಡದ ಹುಡುಗಿಯ ಈ ಖದರ್ ಕಂಡು ತೆಲುಗು ನಟಿಯರೇ ಹೌಹಾರುವಂತಾಗಿದೆ. ಮಹೇಶ್ ಬಾಬು ಸೇರಿದಂತೆ ಹಲವಾರು ಸ್ಟಾರ್ ನಟರೊಂದಿಗೆ ನಟಿಸಿರೋ ಪೂಜಾ ಮಹರ್ಶಿ ಚಿತ್ರದ ಮೂಲಕವೂ ಹೆಸರು ಮಾಡಿದ್ದಳು. ಈಗಂತೂ ಆಕೆಯ ಬೇಡಿಕೆ ಏರಿಕೊಳ್ಳುತ್ತಲೇ ಇದೆ. ಆದ್ದರಿಂದಲೇ ತೆಲುಗು ಬಿಟ್ಟು ಬೇರ‍್ಯಾವ ಭಾಷೆಗಳತ್ತಲೂ ಪೂಜಾ ಹೊರಳಿ ನೋಡುತ್ತಿರಲಿಲ್ಲ. ಈಗ ಮತ್ತೆ ಮೆಲ್ಲಗೆ ಬಾಲಿವುಡ್ ಸಿನಿಮಾಗಳತ್ತ ಮುಖ ಮಾಡಿರುವ ಪೂಜಾಳ ಈ ಹೇಳಿಕೆಯ ಬಗ್ಗೆಯೂ ನಾನಾ ದಿಕ್ಕಿನ ಚರ್ಚೆಗಳು, ಮೆಚ್ಚುಗೆಯ ಮಾತುಗಳು ಕೇಳಿ ಬರುತ್ತಿವೆ.

The post ನಾವು ಇಬ್ಬಾಗವಾಗಬಾರದು ಅಂದಳು ಪೂಜಾ ಹೆಗ್ಡೆ! appeared first on ಶೋಧ ನ್ಯೂಸ್ - Shodha News.