ನೀವೇನಾದ್ರೂ ಸರಿರಾತ್ರಿಯವರೆಗೂ ಕೆಲಸ ಮಾಡೋ ರೂಢಿಯಿಟ್ಟುಕೊಂಡಿದ್ರೆ ನಿಮ್ಮನ್ನ ಥರ ಥರದ ಗೊಂದಲಗಳು ಮುತ್ತಿಕೊಂಡಿರುತ್ವೆ. ಯಾಕಂದ್ರೆ ಬೆಳಗ್ಗೆ ಬೇಗನೆ ಏಳಲಾರದ ಸ್ಥಿತಿ ಒಟಾರೆ ಬದುಕಿನ ಟೈಂ ಟೇಬಲ್ಲನ್ನೇ ಅದಲು ಬದಲು ಮಾಡಿರತ್ತೆ. ಯಾಕಂದ್ರೆ ನಮ್ಮಲ್ಲಿ ಬೆಳಗ್ಗೆ ಬೇಗನೆದ್ದು ದಿನಚರಿ ಆರಂಭಿಸೋದು ಜೀವನ ಕ್ರಮವಾಗಿ ಬಿಟ್ಟಿದೆ. ದಿನಾ ಬೆಳಗ್ಗೆ ಸೂರ್ಯೋದಯಕ್ಕಿಂತಲೂ ಮುಂಚೆ ಏಳೋದು ಸಾತ್ವಿಕ ವಿದ್ಯಮಾನ ಅಂತಲೂ ಬಿಂಬಿತವಾಗಿದೆ. ಇನ್ನುಳಿದಂತೆ ಅಧ್ಯಾತ್ಮಿಕವಾಗಿಯೂ ಬೆಳಗ್ಗೆ ಬೇಗನೆ ಏಳೋದರ ಮಹತ್ವದ ಬಗ್ಗೆ ಮಣಗಟ್ಟಲೆ ವಿವರಣೆಗಳಿದ್ದಾವೆ.

ಆದ್ರೆ ರಾತ್ರಿ ಕೆಲಸದ ಗುಂಗು ಹತ್ತಿಸಿಕೊಂಡವರಿಗೆ ಬದುಕಲ್ಲೇನೋ ಅಮೂಲ್ಯ ಕ್ಷಣಗಳು ಮಿಸ್ ಆದಂತೆ ಭಾಸವಾಗುತ್ತಿರುತ್ತೆ. ಬೆಳಗಿನ ಆ ಸ್ಫಟಿಕದಂಥಾ ವಾತಾವರಣಕ್ಕೆ ಕಣ್ತೆರೆಯುವ ಮುದ, ಎಳೇಯ ಸೂರ್ಯ ರಶ್ಮಿಗಳ ಹಿಮ್ಮೇಳದ ಆಹ್ಲಾದಗಳನ್ನೆಲ್ಲ ಮಿಸ್ ಮಾಡ್ಕೋತಿದ್ದೀವೇನೋ ಅನ್ನೋ ಭಾವ ಬಿಡದೇ ಕಾಡುತ್ತಿರುತ್ತೆ. ಇದು ಮಾನಸಿಕ ತೊಳಲಾಟವಾದ್ರೆ, ಮನೆಮಂದಿಯಿಂದ ದಿನಾ ಲೇಟಾಗಿ ಏಳ್ತಾರೆನ್ನೋ ಕಂಪ್ಲೇಟಂತೂ ಇದ್ದೇ ಇರುತ್ತೆ. ಇಂಥಾ ಸಂದರ್ಭದಲ್ಲಿ ಬದುಕು ಗೂಬೆಗಿಂತಲೂ ಕಡೆಯಾಗ್ತೇನೋ ಅಂತ ಕೊರಗ್ತಿರೋರಿಗೆ ಇಲ್ಲೊಂದು ಶುಭ ಸುದ್ದಿಯಿದೆ.

ಬೆಳಗ್ಗೆ ಬೇಗನೆದ್ದು ಮೈ ಮುರಿದು ಹಾರಾಡೋ ಆಕ್ಟೀವ್ ಹಕ್ಕಿಗಳಂಥವರಿಗಿಂತ, ರಾತ್ರಿಯಿಡೀ ಕೆಲಸ ಮಾಡೋ ಗೂಬೆಯಂಥವರಿಗೇ ಬುದ್ಧಿವಂತಿಕೆ ಜಾಸ್ತಿ. ಹಾಗಂತ ಒಂದು ಸಂಶೋಧನೆ ಸಾಬೀತು ಪಡಿಸಿದೆ. ಬೆಳಗ್ಗೆ ಬೇಗನೆದ್ದು ದಿನಚರಿ ಆರಂಭಿಸುವವರಿಗಿಂತ ರಾತ್ರಿ ಎಷ್ಟು ಹೊತ್ತಾದರೂ ಕೆಲಸ ಮಾಡೋ ಮಂದಿಗೆ ಐಕ್ಯೂ ಲೆವೆಲ್ ಜಾಸ್ತಿ ಅಂತ ಈ ಸಂಶೋಧನೆ ಹೇಳಿದೆ. ಅತ್ತ ನಿದ್ದೆಯಿಲ್ಲದೆ, ರಾತ್ರಿ ಹಗಲುಗಳ ವ್ಯತ್ಯಾಸವೂ ಗೊತ್ತಾಗದೆ ಇರೋ ಬುದ್ಧಿಯೆಲ್ಲ ಸವೆಯುತ್ತಿದೆ ಅನ್ನೋ ಕೊರಗಿಟ್ಟುಕೊಂಡೋರಿಗೆಲ್ಲ ಇದು ಪಕ್ಕಾ ರಿಲ್ಯಾಕ್ಸಿಂಗ್ ಸುದ್ದಿ.

The post ಮಧ್ಯರಾತ್ರಿಯಾದಲೂ ಮಲಗದವರಿಗೆ ಗುಡ್ ನ್ಯೂಸ್! appeared first on ಶೋಧ ನ್ಯೂಸ್ - Shodha News.

120 islands: ಈ ಜಗತ್ತಿನ ಅಷ್ಟೂ ಪ್ರೇಕ್ಷಣೀಯ ಸ್ಥಳಗಳನ್ನು ಕಾಲಿಗೆ ಚಕ್ರ ಕಟ್ಟಿಕೊಂಡಂತೆ ಸುತ್ತಿ ಬಿಡಬೇಕೆಂಬುದು ಹಲವರ ಮಹಾ ಕನಸು. ಈಗಿನ ಯುವ ಸಮೂಹವಂತೂ ಗಂಡು ಹೆಣ್ಣೆಂಬ ಬೇಧವಿಲ್ಲದೆ ಇಂಥಾ ಆಸೆಯನ್ನು ಬಚ್ಚಿಟ್ಟುಕೊಳ್ತಾರೆ. ಅದಕ್ಕೆಂದೇ ಸಾಕಷ್ಟು ಹಣವನ್ನೂ ಕೂಡಾ ಪ್ರತೀ ತಿಂಗಳು ಕೂಡಿಸಿಟ್ಟುಕೊಂಡು ಕಾಯುವವರೂ ಇದ್ದಾರೆ. ಆದರೆ ಅವರ ಅಂದಾಜಿಗೇ ನಿಲುಕದಂಥಾ ಅನೇಕ ಅಚ್ಚರಿದಾಯಕ ತಾಣಗಳು ಈ ಭೂಮಿಯ ಮೇಲೆ, ಸಾಗರಗಳ ಮೇಲಿದೆ. ಅದರಲ್ಲೊಂದಿಷ್ಟು ನೈಸಗೀಕ. ಮತ್ತೊಂದಷ್ಟು ಮಾನವ ನಿರ್ಮಿತ.

ಈಗ ಹೇಳ ಹೊರಟಿರೋದು ಅಂಥಾದ್ದೇ ಒಂದು ಅಚ್ಚರಿದಾಯಕ ದ್ವೀಪ ಸಮೂಹದ ಬಗ್ಗೆ. ದ್ವೀಪ ಸಮೂಹಗಳೆಂದರೇನೇ ಭೂಲೋಕದ ಸ್ವರ್ಗದಂಥವುಗಳು. ಸುತ್ತಲೂ ಕಣ್ಣ ನಿಲುಕಿಗೆ ಮೀರಿದಷ್ಟು ಜಲರಾಶಿ. ಅದರ ಮಧ್ಯೆ ಭೂಮಿಯ ತುಣುಕು. ಅದರ ಮೇಲೊಂದು ಸುಂದರ, ಸಮೃದ್ಧವಾದ ಊರು… ಇಂಥಾ ಗುಣ ಲಕ್ಷಣಗಳಿರೋ ದ್ವೀಪ ಅಂದ್ರೆ ಯಾರಿಗೇ ಆದರೂ ಇಷ್ಟವಾಗದಿರಲು ಸಾಧ್ಯವೇ ಇಲ್ಲ. ಆದರೆ ಅವು ಹೆಚ್ಚಾಗಿ ಸಿಂಗಲ್ ಆಗಿರುತ್ತವೆ. ಒಂದೇ ಕಡೆ ಒಂದಷ್ಟು ದ್ವೀಪಗಳು ಕಾಣೋದು ವಿರಳ.

ಆದ್ರೆ ಪೆರು ದೇಶದಲ್ಲಿ ನಿಜಕ್ಕೂ ಅಚ್ಚರಿ ಅನ್ನಿಸುವಂಥಾ, ಕಣ್ಣಿಗೆ ಹಬ್ಬವಾದಂಥಾ ದ್ವೀಪ ಸಮೂಹವೊಂದಿದೆ. ಅಲ್ಲಿ ಒಂದಲ್ಲ, ಎರಡಲ್ಲ ಬರೋಬ್ಬರಿ ನೂರಾ ಇಪ್ಪತ್ತರಷ್ಟು ದ್ವೀಪಗಳ ಸಮೂಹವೇ ಇದೆ. ಅವೆಲ್ಲವೂ ನೀರ ಮೇಲೆ ತೇಲಾಡುತ್ತಿರುತ್ತವೆ. ಆ ದ್ವೀಪದಲ್ಲಿಯೇ ಅಂಗಡಿ ಸೇರಿದಂತೆ ಒಂದಷ್ಟು ಸವಲತ್ತುಗಳಿದ್ದಾವೆ. ಬೇಕಂದಾಗಲೆಲ್ಲ ಮೀನು ಹಿಡಿಯುತ್ತಾ ಅದನ್ನು ತಮ್ಮ ತಮ್ಮಲ್ಲೇ ಮಾರಾಟ ಮಾಡಿಕೊಳ್ಳುತ್ತಾ ಅಲ್ಲಿನ ಜನ ಸ್ವರ್ಗದಂಥಾ ಬದುಕನ್ನು ತಮ್ಮದಾಗಿಸಿಕೊಡಿದ್ದಾರೆ.

The post 120 islands: ಆ ದೇಶದಲ್ಲಿ ನೂರಾ ಇಪ್ಪತ್ತು ದ್ವೀಪಗಳು ಒಟ್ಟಿಗೆ ತೇಲುತ್ವೆ! appeared first on ಶೋಧ ನ್ಯೂಸ್ - Shodha News.

ಈಗ ಎಲ್ಲೆಲ್ಲಿಯೂ ಮಾಲ್ ಸಂಸ್ಕೃತಿ ಹಬ್ಬಿಕೊಂಡಿದೆ. ಆಗತಾನೇ ಕೊಯ್ದ ಹಣ್ಣು ತರಕಾರಿ ಬೀದಿ ಬದಿಯಲ್ಲಿದ್ರೆ ಜನ ಅದ್ರತ್ತ ತಿರುಗಿಯೂ ನೋಡೋದಿಲ್ಲ. ದೊಡ್ಡ ದೊಡ್ಡ ಮಾಲ್‌ಗಳಲ್ಲಿ ಹಣ್ಣು ತರಕಾರಿ ಕೊಂಡರೇನೋ ಅಂಥವ್ರಿಗೆಲ್ಲ ಸಮಾಧಾನ. ಕಲಾತ್ಮಕವಾಗಿ ಜೋಡಿಸಿರುವ, ನಾನಾ ವ್ಯಾಪಾರೀ ಹಕೀಕತ್ತುಗಳಿಗೇ ಜನರ ಮನಸು ಸೋಲುತ್ತೆ. ಅಂಥಾ ಹೈಫೈ ಮಳಿಗೆಗಳಿಂದ ತಂದರೇನೇ ಹಣ್ಣು ಸೇರಿದಂತೆ ಎಲ್ಲವೂ ಫ್ರೆಶ್ ಆಗಿರುತ್ತೆಂಬ ನಂಬಿಕೆ ಹಲವರಲ್ಲಿದೆ.

ಆದ್ರೆ ಈಗ ಹೊರ ಬಿದ್ದಿರೋ ಒಂದು ಸುದ್ದಿ ಅಂಥಾ ನಂಬಿಕೆಗಳನ್ನೆಲ್ಲ ಶುದ್ಧ ಭ್ರಮೆಯನ್ನಾಗಿಸಿದೆ. ಆರೋಗ್ಯ ಕಾಳಜಿ ಹೊಂದಿರುವವ ಪಾಲಿನ ಮೆಚ್ಚಿನ ಹಣ್ಣು ಆಪಲ್. ದಿನಾ ಒಂದು ಸೇಬು ತಿಂದರೆ ಅನಾರೋಗ್ಯದಿಂದ ದೂರ ಇರಬಹುದೆಂಬ ನಾಣ್ನುಡಿಯೇ ಇದೆ. ಅದರಲ್ಲಿ ಸತ್ಯವಿರೋದೂ ಹೌದು. ಪ್ರತಿಯೊಂದನ್ನೂ ಲಾಭಕ್ಕೆ ಬಳಸಿಕೊಳ್ಳೋ ವ್ಯಾಪಾರಿ ಬುದ್ಧಿ ಸೇಬನ್ನು ಬಿಡೋದುಂಟೇ? ಆದ್ದರಿಂದಲೇ ಆಪಲ್ ವ್ಯಾಪಾರಿಗಳು ತಾಜಾತನದ ವಿಚಾರದಲ್ಲಿ ಗ್ರಾಹಕರನ್ನು ಸಲೀಸಾಗಿ ಯಾಮಾರಿಸುತ್ತಿದ್ದಾರಂತೆ.

ಸೇಬು ಸರ್ವ ಋತುಗಳಲ್ಲಿಯೂ ದುಬಾರಿ ಬೆಲೆ ಕಾಯ್ದಿಟ್ಟುಕೊಂಡಿರೋ ಹಣ್ಣು. ಅದೆಷ್ಟೇ ತಾಜಾ ಹಣ್ಣನ್ನ ತಂದ್ರೂ ದಿನ ಕಳೆಯೋದರೊಳಗದು ಮುರುಟಿಕೊಳ್ಳುತ್ತೆ. ಫ್ರಿಡ್ಜಲ್ಲಿಟ್ಟು ತಿನ್ನೋದೂ ಕೂಡಾ ಅಪಾಯಕಾರಿಯೇ ಅನ್ನೋ ನಂಬಿಕೆ ಹಲವರಲ್ಲಿದೆ. ಆದ್ರೆ ಮಾಲ್‌ಗಳಿಂದ ನೀವು ಕೊಂಡು ತರೋ ಸೇಬು ಒಂದು ವರ್ಷದಷ್ಟು ಹಳತಾಗಿರುತ್ತೆಂಬ ಸತ್ಯವನ್ನ ವರದಿಯೊಂದು ಬಯಲು ಮಾಡಿಬಿಟ್ಟಿದೆ.

ವರ್ಷದ ಕೊನೇಯ ಹೊತ್ತಿಗೆ ಕುಯಿಲು ಮಾಡಿದ ಆಪಲ್‌ಗಳನ್ನ ವ್ಯಾಪಾರಿಗಳು ಖರೀದಿಸ್ತಾರೆ. ನಂತರ ಅದನ್ನ ಹಲವಾರು ಪ್ರಕ್ರಿಯೆಗಳಿಗೊಳಪಡಿಸಿ ಕೋಲ್ಡ್ ಸ್ಟೋರೇಜಿನಲ್ಲಿಡ್ತಾರೆ. ಆ ನಂತರದಲ್ಲಿ ಹೆಚ್ಚು ಕಾಸು ಬರೋ ಕಾಲ ನೋಡಿಕೊಂಡು ಮಾರುಕಟ್ಟೆಗೆ ಬಿಡ್ತಾರೆ. ನೀವು ಒಂದಲ್ಲ ಒಂದು ಸೀಜನ್ನಿನಲ್ಲಿ ಸಾಕಷ್ಟು ಹಳೇ ಆಪಲ್ ಅನ್ನು ತಿನ್ನದಿರಲು ಸಾಧ್ಯವೇ ಇಲ್ಲ. ಯಾಕಂದ್ರೆ ಮಾಲ್‌ಗಳಲ್ಲಿ ಹೊಳೆಯುತ್ತಾ ಕಣ್ಸೆಳೆಯೋ ಆಪಲ್‌ಗಳಲ್ಲಿ ಬಹುತೇಕವುಗಳು ಇಂಥಾ ಕೋಲ್ಡ್ ಸ್ಟೋರೇಜಿನ ಕೂಸುಗಳೇ. ಅವುಗಳನ್ನು ಕಿತ್ತು ಕಡಿಮೆಯೆಂದರೂ ಒಂದು ವರ್ಷ ಕಳೆದಿರುತ್ತೆ!

The post ನೀವು ತಿನ್ನೋ ಆಪಲ್ ಖಂಡಿತಾ ಫ್ರೆಶ್ ಅಲ್ಲ! appeared first on ಶೋಧ ನ್ಯೂಸ್ - Shodha News.

ಈವತ್ತು ಇಡೀ ಜಗತ್ತು ಅಂಗೈಲಿರುವಂತೆಯೇ ಫೀಲ್ ಆಗುವಂಥಾ ವಾತಾವರಣವಿದೆ. ಈ ಆಧುನಿಕ ಜಗತ್ತಿನಲ್ಲೀಗ ಯಾವುದೂ ನಿಗೂಢವಾಗುಳಿದಿಲ್ಲ. ನಮಗೆಲ್ಲ ಯಾವ ವಿಚಾರಗಳೂ ವಿಸ್ಮಯ ಅನ್ನಿಸೋದಿಲ್ಲ. ಹೀಗೆ ಎಲ್ಲ ತಂತ್ರಜ್ಞಾನಗಳೂ ಖುಲ್ಲಂಖುಲ್ಲ ಆಗಿರೋ ಈ ಘಳಿಗೆಯಲ್ಲಿಯೂ ಕೆಲವೊಂದು ವಿಚಾರಗಳು ಮಾತ್ರ ಯಥಾಪ್ರಕಾರ ಆಕರ್ಷಣೆ ಉಳಿಸಿಕೊಂಡಿವೆ. ಅದರಲ್ಲಿ ಇದೀಗ ವಿಶ್ವದ ತುಂಬೆಲ್ಲ ಹಾರಾಡಿಕೊಂಡಿರೋ ವಿಮಾನಗಳದ್ದು ಅಗ್ರ ಸ್ಥಾನ.

ಆಕಾಶದಲ್ಲಿ ವಿಮಾನದ ಸೌಂಡು ಕೇಳಿದರೆ ಪುಟ್ಟ ಮಕ್ಕಳಂತೆ ಅದರತ್ತ ನೋಡುವಂಥ ಬೆರಗು ಈಗಲೂ ಉಳಿದು ಹೋಗಿದೆ. ಮೋಡದ ಮುದ್ದೆ ಸೀಳಿಕೊಂಡು ಪುಟ್ಟ ಹಕ್ಕಿಯಂತೆ ಹಾರಾಡೋ ದೈತ್ಯ ವಿಮಾನ ಎವರ್‍ಗ್ರೀನ್ ಆಕರ್ಷಣೆ. ಅದೆಷ್ಟೋ ಸಾವಿರ ಮೈಲಿಗಳಷ್ಟು ಎತ್ತರದಲ್ಲಿ ವಿಮಾನ ಚಲಾಯಿಸೋ ಪೈಲಟ್ ಅಂತೂ ದೇವಮಾನವನಂತೆಯೇ ಕಾಣ್ತಾನೆ. ಹಾಗೆ ವಿಮಾನಗಳು ಹೇಗೆ ಹಾರಾಡ್ತಾವೆ, ಅವುಗಳನ್ನ ಪೈಲಟ್ ಹೇಗೆ ಗಮ್ಯ ಸೇರಿಸ್ತಾನನ್ನೋದೆಲ್ಲ ಕುತೂಹಲದ ಸಂಗತಿಗಳೇ.

ಹಾಗೆ ಆ ಪಾಟಿ ಗಾತ್ರದ ವಿಮಾನವನ್ನು ವಿಶ್ವದ ನಾನಾ ದೇಶಗಳಿಗೆ ಮುಟ್ಟಿಸ್ತಾನಲ್ಲಾ ಪೈಲಟ್? ಅದರ ಹಿಂದೆ ಮುನ್ನೂರು ಪದಗಳದ್ದೊಂದು ಸಪರೇಟ್ ಆದ ಭಾಷೆಯ ಪಾತ್ರವೂ ಇದೆ. ಪ್ರತೀ ಪೈಲಟ್‍ಗಳೂ ಅದನ್ನು ಕರತಲಾಮಲಕ ಮಾಡಿಕೊಂಡಿರ್ತಾರೆ. ಪೈಲಟ್‍ಗಳು ಮತ್ತು ತಾಂತ್ರಿಕ ವರ್ಗದ ಸಂಭಾಷಣೆ ಅದೇ ಭಾಚೆಯಲ್ಲಿ ನಡೆಯುತ್ತೆ. ಅದರಿಂದಲೇ ವಿಮಾನಗಳು ಯಾವುದೇ ಅವಘಡಗಳಾಗದಂತೆ ಯಶಸ್ವಿಯಾಗಿ ಹಾರಾಡ್ತಾವೆ. ಆ ಮುನ್ನೂರು ಪದಗಳಿರೋ ವಿಶೇಷ ಭಾಷೆಗೆ ಆವಿಯೇಷನ್ ಇಂಗ್ಲೀಷ್ ಅಂತಾರೆ.

The post ಪೈಲಟ್ ಆಗಬೇಕಂದ್ರೆ ಅದೊಂದು ಭಾಷೆ ಗೊತ್ತಿರಲೇ ಬೇಕು! appeared first on ಶೋಧ ನ್ಯೂಸ್ - Shodha News.

ಒಂದು ಕಡೆಯಲ್ಲಿ ಮೂಢ ನಂಬಿಕೆಗಳು ಈ ಸಮಾಜದ ಆಳದಲ್ಲಿ ಬೇರೂರಿಕೊಂಡಿವೆ. ಅದರ ವಿಡುದ್ಧ ಸಾಕಷ್ಟು ವರ್ಷಗಳಿಂದಲೂ ನಾನಾ ಜಾಗೃತಿಗಳು ಅವ್ಯಾಹತವಾಗಿ ನಡೆಯುತ್ತಿವೆ. ಇದೇ ಸಮಾಜದ ಮತ್ತೊಂದು ಮಗ್ಗುಲಲ್ಲಿ ಪ್ರಾಕೃತಿಕ ಅಚ್ಚರಿಗಳು, ನಾಸ್ತಿಕ ನಂಬಿಕೆಗಳು ಎಲ್ಲವಕ್ಕೂ ಸವಾಲೊಡ್ಡುವಂತೆ ಪ್ರಜ್ವಲಿಸುತ್ತಲೇ ಇದ್ದಾವೆ. ಹುಡುಕಿದರೆ ನಮ್ಮಲ್ಲಿ ವಿಜ್ಞಾನಕ್ಕೇ ನೇರ ಸವಾಲೆಸೆಯುವಂಥಾ, ಬರಿಗಣ್ಣಿಗೆ ಕಾಣಿಸಿದ್ದನ್ನು ನಂಬಲು ಸಾಧ್ಯವಾಗದಂಥಾ ಅಚ್ಚರಿಗಳಿದ್ದಾವೆ.

ಅಂಥಾ ಅಚ್ಚರಿಗಳಲ್ಲಿ ಹಿಮಾಚಲ ಪ್ರದೇಶದಲ್ಲಿರೋ ಜ್ವಾಲಾಜಿ ಮಾತಾ ಮಂದಿರ ಪ್ರಮುಖವಾದದ್ದು. ಇದು ಭಾರತೀಯ ಆಧ್ಯಾತ್ಮಿಕ ವಲಯದಲ್ಲಿಯೇ ಪ್ರಧಾನವಾದ ಶಕ್ತಿ ಪೀಠಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿದೆ. ಸಾಮಾನ್ಯವಾಗಿ ಯಾವುದೇ ದೇವಸ್ಥಾನಗಳಲ್ಲಿತಯಾದ್ರೂ ದೇವರ ವಿಗ್ರಹಗಳಿಗೆ ಪೂಜೆ ಸಲ್ಲಿಸಲಾಗುತ್ತೆ. ಆದರೆ ಈ ದೇವಳದಲ್ಲಿ ಒಂದು ಬೆಂಕಿಯ ಜ್ವಾಲೆಯನ್ನೇ ಆರಾಧಿಸಲಾಗುತ್ತೆ.

ಹಾಗಂತ ಅದು ಮನುಷ್ಯರ್ಯಾರೋ ಹಚ್ಚಿಟ್ಟ ದೀಪವಲ್ಲ. ದೊಂದಿಯೂ ಅಲ್ಲ. ಅದು ಅದೆಷ್ಟೋ ಶತಮಾನಗಳ ಹಿಂದಿನಿಂದಲೂ ಸಣ್ಣ ಕಿಂಡಿಯ ಮೂಲಕ ಭೂಗರ್ಭದಿಂದ ಹೊರ ಹೊಮ್ಮುತ್ತಿರೋ ಜ್ವಾಲೆ. ಇದರ ಮಗ್ಗುಲಲ್ಲಿಯೇ ಕುದಿಯೋ ನೀರಿನ ಒರತೆಯೂ ಇದೆ ಅನ್ನೋದು ಈ ಸ್ಥಳದ ಮತ್ತೊಂದು ವಿಶೇಷ. ಈ ಜ್ವಾಲೆಯನ್ನು ವೈಜ್ಞಾನಿಕವಾಗಿ ವಿಶ್ಲೇಷಣೆ ಮಾಡೋ ಸಾಕಷ್ಟು ಪ್ರಯತ್ನಗಳು ನಡೆದಿವೆ. ಇದು ದೈವ ಪವಾಡವಲ್ಲ, ಪ್ರಾಕೃತಿಕ ವಿಸ್ಮಯ ಮಾತ್ರ ಎಂದೂ ಹೇಳಲಾಗುತ್ತಿದೆ. ಆದರೆ ಅದ್ಯಾವುದೂ ಜ್ವಾಲಾ ಮಾತೆಯ ಕಾರಣನೀಕಗಳನ್ನು ಮಂಕಾಗಿಸಿಲ್ಲ. ಈ ಹಿಂದೆ ಅಕ್ಬರನ ಕಾಲದಲ್ಲಿಯೂ ಈ ಜ್ವಾಲೆಯನ್ನು ನಂದಿಸಲು ಪ್ರಯತ್ನ ಪಟ್ಟಿದ್ದನಂತೆ. ಆದರೆ ಅದೇನೇ ಸರ್ಕಸ್ಸು ನಮಡೆಸಿದರೂ ಈ ಜ್ವಾಲೆ ಜಗ್ಗದೆ ಉರಿಯುತ್ತಲೇ ಇದೆ.

The post ಆ ದೇವಸ್ಥಾನದಲ್ಲಿ ಉರಿಯೋ ಜ್ವಾಲೆಯನ್ನ ಯಾರಿಂದಲೂ ಆರಿಸಲಾಗಿಲ್ಲ! appeared first on ಶೋಧ ನ್ಯೂಸ್ - Shodha News.

ನಾವು ಯಾವುದನ್ನು ಸಾಧ್ಯವೇ ಇಲ್ಲ ಅಂತ ತೀರ್ಮಾನಿಸಿಕೊಂಡಿರುತ್ತೇವೋ, ನಾವು ಯಾವುದನ್ನು ಊಹಿಸಿಕೊಳ್ಳಲೂ ಸಾಧ್ಯವಿಲ್ಲವೋ ಅಂಥವನ್ನೆಲ್ಲ ಸಾಧ್ಯವಾಗಿಸೋ ಛಾತಿ ಪ್ರಕೃತಿಗಿದೆ. ಅದಕ್ಕೆ ಉದಾಹರಣೆ ಎಂಬಂತೆ ತುಂಬಾನೇ ವಿಚಿತ್ರ ಅನ್ನಿಸುವಂಥಾ ಪ್ರಾಣಿ ಪಕ್ಷಿಗಳು, ಒಂದಷ್ಟು ಪ್ರದೇಶಗಳೂ ನಮ್ಮ ಸುತ್ತಲಿವೆ. ಅಂಥಾ ಪ್ರಕೃತಿಯ ಮಾಯೆಗೆ ಊಸರವಳ್ಳಿಯೊಂದು ಸೂಕ್ತ ಉದಾಹರಣೆ. ಅದು ನೋಡ ನೋಡುತ್ತಲೇ ದೇಹದ ಬಣ್ಣ ಬದಲಿಸೋದಕ್ಕೆ ಫೇಮಸ್ಸು. ಆದರೆ ತಣ್ಣಗೆ ಹರಿಯೋ ನದಿಯೊಂದು ಬಣ್ಣ ಬದಲಿಸುತ್ತೆ ಅಂದ್ರೆ ನಂಬ್ತೀರಾ?

ಊಸರವಳ್ಳಿ ಕ್ಷಣಕ್ಕೊಂದು ಬಣ್ಣ ಬದಲಿಸುತ್ತೆ. ಅದಕ್ಕೇ ಪ್ರತಿಸ್ಪರ್ಧೆ ಕೊಡುವಂತೆ ಅದೊಂದು ನದಿ ಬಣ್ಣ ಬದಲಾಯಿಸಿಕೊಳ್ಳುತ್ತದೆಯಂತೆ. ಅದು ಕ್ರಿಸ್ಟಲ್ ರಿವರ್. ಅದಿರೋದು ದಕ್ಷಿಣ ಅಮೆರಿಕಾದ ಕೊಲಂಬೋದಲ್ಲಿ. ಆ ನದಿಯ ವಿಶೇಷತೆಯನ್ನು, ಬಣ್ಣದ ಬೆರಗುಗಳನ್ನು ಕಣ್ತುಂಬಿಕೊಳ್ಳಲೆಂದೇ ಸಾಕಷ್ಟು ಸಂಖ್ಯೆಯಲ್ಲಿ ಪ್ರವಾಸಿಗರು ಆಗಮಿಸುತ್ತಾರೆ. ತದೇಕಚಿತ್ತದಿಂದ ಆ ನದಿಯ ನೀರನ್ನೇ ದಿಟ್ಟಿಸುತ್ತಾ ಅದರ ಬಣ್ಣ ಬದಲಾಗೋ ಪರಿ ಕಂಡು ತಮ್ಮನ್ನು ತಾವೇ ಚಿವುಟಿ ನೋಡಿಕೊಳ್ಳುವಷ್ಟರ ಮಟ್ಟಿಗೆ ರೋಮಾಂಚಿತರಾಗ್ತಾರೆ.

ಒಂದು ಮಟ್ಟಿಗೆ ದೊಡ್ಡದಾದ ಆ ನದಿ ನಿಜಕ್ಕೂ ಸಜೀವ ನಿಗೂಢ. ಆ ನದಿ ನೀರ ಬಣ್ಣಗಳು ಕಣ್ಣ ಮುಂದೆಯೇ ಬದಲಾಗುತ್ತವೆ. ಆದರೂ ಅದು ನಿಗೂಢದಂತೆ ಕಾಡುತ್ತದೆ. ಅಂದಹಾಗೆ ಸದರಿ ನದಿ ಕೆಂಪು, ಹಳದಿ, ನೀಲಿ ಸೇರಿದಂತೆ ಐದು ಬಣ್ಣಗಳನ್ನು ಬದಲಾಯಿಸುತ್ತೆ. ಹಾಗಂತ ವರ್ಷ ಪೂರ್ತಿಯೂ ಈ ಬಣ್ಣಗಳ ಲಾಸ್ಯ ನೋಡಲು ಸಿಗೋದಿಲ್ಲ. ಸೆಪ್ಟೆಂಬರ್ ತಿಂಗಳಿಂದ ನವೆಂಬರ್ ವರೆಗೆ ಮಾತ್ರವೇ ಈ ನದಿ ಬಣ್ಣ ಬದಲಿಸುತ್ತೆ. ಮಿಕ್ಕುಳಿದ ತಿಂಗಳುಗಳಲ್ಲಿ ಇತರೇ ನದಿಗಳಂತೆಯೇ ಕಾಣಿಸುತ್ತದೆಯಂತೆ.

The post ಆ ನದಿ ಕಣ್ಣೆದುರೇ ಬಣ್ಣ ಬದಲಿಸುತ್ತೆ! appeared first on ಶೋಧ ನ್ಯೂಸ್ - Shodha News.

ಸಾವೆಂಬುದು ಮನುಷ್ಯ ಜೀವನದ ಅಂತಿಮ ನಿಲ್ದಾಣ. ಹುಟ್ಟಿನಿಂದ ಸಾವಿನವರೆಗಿನ ಪಯಣವನ್ನು ಸಾರ್ಥಕಗೊಳಿಸಿಕೊಳ್ಳೋದಿದೆಯಲ್ಲಾ? ಅದು ಮನುಷ್ಯ ಜನುಮದ ಶ್ರೇಷ್ಠ ಸಾಧನೆ. ಆದರೆ ಮನುಷ್ಯ ಮಾತ್ರರಿಗೆ ಬದುಕಿಗಿಂತಲೂ ಸಾವೇ ಹೆಚ್ಚಾಗಿ ಕಾಡುತ್ತೆ. ಅದರಾಚೆಗಿನ ಆಗು ಹೋಗುಗಳತ್ತ ಸದಾ ಮನಸು ಗಿರಕಿ ಹೊಡೆಯುತ್ತೆ. ಸಾವಿನ ನಂತರ ಏನೂ ಇಲ್ಲದ ಶುಷ್ಕ ವಾತಾವರಣವಿರುತ್ತಾ? ಅಥವಾ ಆ ನಂತರವೂ ಒಂದು ಅಗೋಚರ ಬದುಕಿರುತ್ತಾ ಎಂಬುದೂ ಸೇರಿದಂತೆ ಸಹಸ್ರಾರು ಪ್ರಶ್ನೆಗಳಿದ್ದಾವೆ. ಇಂಥಾ ದ್ವಂದ್ವಗಳೇ ಸಾವಿನ ನಂತರದಲ್ಲಿ ಬದುಕಿರೋ ವ್ಯಕ್ತಿಗಳ ನಡುವೆ ಚಿತ್ರವಿಚಿತ್ರವಾದ ನಂಬಿಕೆಗಳು ಮೇಳೈಸುತ್ತವೆ.

ಭಾರತದಲ್ಲಿಯೂ ಸೆಂಟಿಮೆಂಟುಗಳಿಗೇನೂ ಕೊರತೆಯಿಲ್ಲ. ಅದು ಸಾವಿನಾಚೆಗೂ ಮೈ ಚಾಚಿಕೊಂಡಿದೆ. ನಮ್ಮ ಸುತ್ತ ಯಾರೇ ಸತ್ತರೂ ನಾವು ಮಣ್ಣು ಮಾಡಿ ಮರೆತು ಕೂರೋದಿಲ್ಲ. ಸದಾ ಕಾಲವೂ ಅವರನ್ನ ನೆನಪಿಸಿಕೊಳ್ಳುತ್ತೇವೆ. ಆಗಾಗ ಎಡೆ ಹಾಕಿ ಇಲ್ಲದವರನ್ನು ಊಟಕ್ಕೆ ಕರೆಯುತ್ತೇವೆ. ನಂತರ ಅವರ ಆತ್ಮ ಊಟ ಮಾಡಿ ಎದ್ದು ಹೋಯಿತೆಂದು ನಂಬಿ ನಿರಾಳವಾಗುತ್ತೇವೆ. ಆದರೆ, ರೋಮನ್ನರು ಮಾತ್ರ ಇಂಥಾ ಸೆಂಟಿಮೆಂಟಿನ ಉತ್ತುಂಗದಲ್ಲಿದ್ದಾರೆ. ಅಲ್ಲಿರೋ ನಂಬಿಕೆಗಳನ್ನ ನೋಡಿದರೆ ಯಾರಿಗೇ ಆದರೂ ಹಾಗನ್ನಿಸದಿರಲು ಸಾಧ್ಯವೇ ಇಲ್ಲ.

ರೋಮನ್ನರಲ್ಲಿ ಸತ್ತವರನ್ನು ಸಮಾಧಿ ಮಾಡೋ ಪದ್ಧತಿ ಸಾರ್ವತ್ರಿಕವಾಗಿದೆ. ಆದರೆ ಸಮಾಧಿ ಮಾಡೋ ರೀತಿ ಮಾತ್ರ ತುಂಬಾನೇ ಭಿನ್ನ. ಹಾಗೆ ಮಣ್ಣು ಮಾಡಿದ ಮೇಲೆ ಇಟ್ಟಿಗೆ ಸಿಮೆಂಟಿನ ಕಟ್ಟೆ ಮಾಡಿದಾಗಲೂ ಸಮಾಧಿಯೊಳಗೆ ಕನೆಕ್ಷನ್ನು ಇರುವಂತೆ ಒಂದು ಕೊಳವೆಯನ್ನು ಇಡಲಾಗುತ್ತದೆ. ಆ ಕೊಳವೆಯ ಮೂಲಕ ಸತ್ತವರ ರಕ್ತ ಸಂಬಂಧಿಗಳು ಆಗಾಗ ವೈನು, ಜೇನುತುಪ್ಪ ಮುಂತಾದವುಗಳನ್ನ ಬಿಡುತ್ತಲೇ ಇರುತ್ತಾರಂತೆ. ಅದನ್ನು ಸಮಾಧಿಯೊಳಗೆ ಮಲಗಿರೋ ಸಂಬಂಧಿಕರು ಚಪ್ಪರಿಸಿ ಕುಡಿದು ಸಂತೃಪ್ತರಾಗ್ರಾರೆ ಎಂಬ ನಂಬಿಕೆ ಈಗಲೂ ರೋಮನ್ನರಲ್ಲಿದೆ!

The post ಹೆಣಕ್ಕೂ ವೈನ್ ಕುಡಿಸೋ ಸೆಂಟಿಮೆಂಟು! appeared first on ಶೋಧ ನ್ಯೂಸ್ - Shodha News.

ಮನುಷ್ಯರಿರಲಿ, ಪ್ರಾಣಿಗಳೇ ಆಗಿರಲಿ… ತಲೆಗೇನಾದರೂ ಸಣ್ಣ ಪೆಟ್ಟಾದರೂ ಇಡೀ ದೇಹದ ವಾತಾರವಣವೇ ಬದಲಾಗಿ ಬಿಡುತ್ತವೆ. ತಲೆಗೇನಾದರೂ ಬಲವಾಗಿ ಪೆಟ್ಟು ಬಿದ್ದರೆ ಸ್ವಾಧೀನವನ್ನೇ ಕಳೆದುಕೊಳ್ಳಬೇಕಾಗುತ್ತೆ. ಹೀಗಿರುವಾಗ ತಲೆಯನ್ನೇ ಕತ್ತರಿಸಿ ತೆಗೆದು ಬಿಟ್ಟರೆ ಜಗತ್ತಿನ ಯಾವ ಜೀವಿಯೇ ಆದರೂ ಬದುಕಲು ಸಾಧ್ಯವೇ? ಇಂಥಾ ಪ್ರಶ್ನೆ ಎದುರಾದರೆ ಇಲ್ಲವೇ ಇಲ್ಲ ಎಂಬ ಉತ್ತರ ಅಷ್ಟ ದಿಕ್ಕುಗಳಿಂದಲೂ ಮೊರೆಯುತ್ತೆ. ಆದರೆ ಒಂದು ವಿಚಿತ್ರವಾದ ಘಟನೆ ನಮ್ಮ ನಂಬಿಕೆಯನ್ನೇ ಸುಳ್ಳು ಮಾಡಿದೆ!

ಇಂಥಾದದ್ದೊಂದು ವಿಶೇಷವಾದ ವಿದ್ಯಮಾನ ನಡೆದಿರೋದು ಕೊಲ್ಯಾರಾಡೋದಲ್ಲಿ. ಈಗ್ಗೆ ಹಲವಾರು ವರ್ಷಗಳ ಹಿಂದೆ ನಡೆದಿರೋ ಈಘಟನಾವಳಿಗಳ ಹಿಂಚುಮುಂಚಿನ ವಿದ್ಯಮಾನ ನಿಜಕ್ಕೂ ರೋಚಕವಾಗಿದೆ. ಕೊಲ್ಯಾರಾಡೋದಲ್ಲಿನ ರೈತ ದಂಪತಿಗಳ ಸಮ್ಮುಖದಲ್ಲಿಯೇ ಈ ಅಚ್ಚರಿ ನಡೆದಿದೆ. ಅಲ್ಲಿನ ರೈತನೊಬ್ಬ ಕೃಷಿಯ ಜೊತೆಗೆ ಪೂರಕವಾಗಿ ಅನೇಕ ಪ್ರಾಣಿ ಪಕ್ಷಿಗಳನ್ನ ಸಾಕಿದ್ದ. ಅದರಲ್ಲಿ ಕೋಳಿಗಳೂ ಸೇರಿಕೊಂಡಿದ್ದವು. ಆಗಾಗ ಒಂದೊಂದು ಕೋಳಿಗಳನ್ನ ಕತ್ತರಿಸಿ ತಿನ್ನೋದು ಅವರೆಲ್ಲರ ರೂಢಿಯಾಗಿತ್ತು.

ಅದೊಂದು ದಿನ ಬಿಳಿ ಮೈಬಣ್ಣದ ಕೋಳಿಯೊಂದನ್ನು ಆ ರೈತ ತಿನ್ನುವ ಸಲುವಾಗಿ ಕತ್ತು ಕತ್ತರಿಸಿ ಕೊಂದಿದ್ದ. ಮಾಮೂಲಿಯಾದರೆ ಕತ್ತು ಕತ್ತರಿಸಿದ ನಂತರ ಕೋಳಿಗಳು ತುಸು ಒದ್ದಾಡಿ ಜೀವ ಬಿಡುತ್ತವೆ. ಆದರೆ ಆ ಕೋಳಿ ಮಾತ್ರ ತಲೆ ಕತ್ತರಿಸಿದ ನಂತರ ಕೈ ಕೊಸರಿಕೊಂಡು ನೆಲದ ಮೇಲೆ ಬಿದ್ದಿತ್ತಂತೆ. ಇನ್ನೇನು ಅದರ ದೇಹ ಸ್ತಬ್ಧವಾಗುತ್ತೆ ಅಂದುಕೊಂಡಿರುವಾಗ ಆ ಕೋಳಿ ತಲೆ ಇಲ್ಲದಿದ್ದರೂ ಎದ್ದು ಓಡಿತ್ತಂತೆ.

ಇದೊಂದು ವಿಸ್ಮಯ ಅನ್ನಿಸಿದ್ದರಿಂದ ಆ ರೈರ ಕೋಳಿಯನ್ನು ಹಿಡಿದು ತಂದು ಆಪಲ್ ಬಾಕ್ಸಿನಲ್ಲಿಟ್ಟಿದ್ದ. ಒಂದು ರಾತ್ರಿ ಕಳೆದು ಬೆಳಗ್ಗೆ ನೋಡಿದಾಗಲೂ ಆ ಕೋಳಿ ಬದುಕಿತ್ತು. ಹೊರಗೆ ಬಿಟ್ಟಾಗ ಸಲೀಸಾಗಿ ಓಡಾಡಲಾರಂಭಿಸಿತ್ತಂತೆ. ಆ ನಂತರ ಎಷ್ಟು ದಿನ ಇರುತ್ತೆ ನೋಡೋಣ ಅಂತ ಆ ರೈತ ತಲೆ ಇಲ್ಲದ ಕೋಳಿಯನ್ನು ಕಣ್ಣಲ್ಲಿ ಕಣ್ಣಿಟ್ಟು ನೋಡಿಕೊಳ್ಳಲಾರಂಭಿಸಿದ್ದ. ಕತ್ತು ಕತ್ತರಿಸಿದ್ದ ಜಾಗಕ್ಕೆ ಆಗಾಗ ನೀರು ಬಿಡಲಾರಂಭಿಸಿದ್ದ. ಅದು ಬರೋಬ್ಬರಿ ಹದಿನೆಂಟು ತಿಂಗಳು ಬದುಕಿತ್ತಂತೆ. ಈವತ್ತಿಗೂ ಈ ವಿದ್ಯಮಾನ ವಿಜ್ಞಾನ ಜಗತ್ತಿಗೆ ಅಚ್ಚರಿಯಾಗಿ, ಸವಾಲಿನದ್ದಾಗಿ ಉಳಿದುಕೊಂಡಿದೆ.

The post ತಲೆ ಕತ್ತರಿದ ಮೇಲೂ ಆ ಕೋಳಿ ಹದಿನೆಂಟು ತಿಂಗಳು ಬದುಕಿತ್ತು! appeared first on ಶೋಧ ನ್ಯೂಸ್ - Shodha News.

ಇಂದು ಆವಿಷ್ಕಾರ, ಸಂಶೋಧನೆಗಳ ಭರಾಟೆಯೂ ಹೆಚ್ಚಾಗಿದೆ. ಅದಕ್ಕೆ ಸ್ಪರ್ಧೆಯೊಡ್ಡುವಂತೆ ಮಾನವರನ್ನು ನಾನಾ ಬಗೆಯ ಕಾಯಿಲೆಗಳೂ ಕೂಡಾ ಬಾಧಿಸಲಾರಂಭಿಸಿವೆ. ಆದರೆ ಕಾಸೊಂದಿದ್ದರೆ ಅದೆಂಥಾ ಕಾಯಿಲೆಗಳನ್ನಾದರೂ ವಾಸಿ ಮಾಡುವಂಥ, ಸಾವಿನ ಕ್ಷಣಗಳನ್ನು ಮತ್ತೊಂದಷ್ಟು ಕಾಲಾವಧಿಗೆ ಮುಂದೆ ತಳ್ಳುವಂಥಾ ಔಷಧಿಗಳೂ ಇದ್ದಾವೆ. ಆಧುನಿಕ ಜೀವನಶೈಲಿಯೇ ಜನರನ್ನು ಇಂಥಾ ಕಾಯಿಲೆ ಕಸಾಲೆಗಳ ಕೋರೆ ಹಲ್ಲುಗಳಲ್ಲಿ ಸಿಲುಕಿಸಿವೆ ಅನ್ನೋ ಅಪವಾದವೂ ಇದೆ.

ಆಯ್ತು, ಈಗಿನ ದಿನಮಾನದಲ್ಲಿ ಕಲುಷಿತ ವಾತಾವರಣ ಮನುಷ್ಯನ ದೇಹವನ್ನು ಕಾಯಲೆಗಳ ಕೊಂಪೆಯನ್ನಾಗಿಸಿದೆ. ಹಾಗಂತ ನಮ್ಮ ಪೂರ್ವಜರನ್ನು ಇಂಥಾ ಕಾಯಿಲೆಗಳೂ ಬಾಧಿಸುತ್ತಿರಲಿಲ್ಲವಾ ಅನ್ನೋ ಪ್ರಶ್ನೆ ಕಾಡುತ್ತೆ. ಪ್ರಮಾಣ ಕೊಂಚ ಕಡಿಮೆಯಿದ್ದರೂ ಕೂಡಾ ಮಾರಣಾಂತಿಕ ಕಾಯಿಲೆಗಳು ಮತ್ತು ಸಾಂಕ್ರಾಮಿಕಗಳು ಎಲ್ಲ ಕಾಲದಲ್ಲಿಯೂ ಇದ್ದವು. ಈಗಾದರೆ ಅಂಥಾ ಕಾಯಿಲೆಗಳು ಸಲೀಸಾಗಿ ಬಂದೆರಗದಂತೆ ತಡೆಯುವಂಥಾ, ಅದರ ವಿರುದ್ಧ ಹೋರಾಡುವಂಥ ಲಸಿಕೆಗಳಿದ್ದಾವೆ. ಆದರೆ ಅದರ ಕಲ್ಪನೆಯೂ ಇಲ್ಲದಿದ್ದ ಕಾಲದಲ್ಲಿ ಜನ ಏನು ಮಾಡುತ್ತಿದ್ದರು? ಈ ಪ್ರಶ್ನೆಯೇ ಭಯಾನಕ ಸತ್ಯಗಳನ್ನ ಮುಖಾಮುಖಿಯಾಗಿಸುತ್ತೆ.

ನಮ್ಮ ಪೂರ್ವಜರು ಅದಕ್ಕಾಗಿ ಒಂದಿಷ್ಟು ವಿಚಿತ್ರ ಎನ್ನಿಸುವ, ಭಯ ಆವರಿಸಿಕೊಳ್ಳುವಂಥಾ ಮಾರ್ಗೋಪಾಯಗಳನ್ನ ಅನುಸರಿಸುತ್ತಿದ್ದರು. ಅದರಲ್ಲಿಯೂ ಯುರೋಪಿಯನ್ನರು ಹದಿನೇಳನೇ ಶತಮಾನದಲ್ಲಿ ಕಂಡುಕೊಂಡಿದ್ದ ಮಾರ್ಗವಂತೂ ತುಂಬಾನೇ ಭಯಾನಕ. ಯಾಕಂದ್ರೆ, ಅವರು ಕಾಯಿಲೆಗಳಿಂದ ಪಾರಾಗಲು ಶವದ ಭಾಗಗಳನ್ನು ಪುಡಿ ಮಾಡಿ ತಿನ್ನುತ್ತಿದ್ದರಂತೆ. ಮೊದಲಿಗೆ ಮಮ್ಮಿಗಳ ದೇಹದ ತುಣುಕುಗಳನ್ನು ಪುಡಿ ಮಾಡಿ ಒಳಗಿಳಿಸಿಕೊಳ್ಳುತ್ತಿದ್ದರು. ನಂತರ ಫ್ರೆಶ್ ಆದ ಮನುಷ್ಯರ ಮಾಂಸವನ್ನೇ ಮೆಲ್ಲುವ ಮೂಲಕ ಕಾಯಿಲೆಗಳಿಂದ ತಪ್ಪಿಸಿಕೊಳ್ಳುವ ಮಾರ್ಗವನ್ನು ಶ್ರೀಮಂತ ಯೂರೋಪಿಯನ್ನರು ಅನುಸರಿಸುತ್ತಿದ್ದರಂತೆ!

The post ಮಾರಣಾಂತಿಕ ಕಾಯಿಲೆಗಳಿಗೆ ಹೆಣವೇ ಮದ್ದು! appeared first on ಶೋಧ ನ್ಯೂಸ್ - Shodha News.

ಅಲ್ಲಿ ಚಿತ್ರೀಕರಣ ನಡೆಸಿದ್ದೇ ಒಂದು ಅದ್ಭುತ ಅನುಭವ!
ವಿಲೋಕ್ ಶೆಟ್ಟಿ ನಿರ್ದೇಶನದ ಚೇಸ್ ಇಂದು ತೆರೆಗಂಡಿದೆ. ಪ್ರೀಮಿಯರ್ ಶೋಗಳಲ್ಲಿ ಭರಪೂರ ಮೆಚ್ಚುಗೆಗೆ ಪಾತ್ರವಾಗಿರುವ ಈ ಚಿತ್ರ ರಾಜ್ಯಾದ್ಯಂತ ಹೆಚ್ಚಿನ ಚಿತ್ರಮಂದಿರಗಳಲ್ಲಿ ಪ್ರದರ್ಶನ ಕಾಣುತ್ತಿದೆ. ಈವತ್ತಿನ ಸನ್ನಿವೇಶದಲ್ಲಿ ಯಾವುದೇ ಚಿತ್ರಗಳು ಒಂದಷ್ಟು ಡಿಲೇ ಆದರೂ ಅದರಿಂದ ಪ್ರೇಕ್ಷಕರು ವಿಮುಖರಾಗುತ್ತಾರೆ. ಅಂಥಾ ವಾತಾವರಣದಲ್ಲಿ ಎರಡ್ಮೂರು ವರ್ಷಗಳ ಕಾಲ ಕುತೂಹಲವನ್ನು ಯಥಾ ಪ್ರಕಾರವಾಗಿ ಕಾಯ್ದಿಟ್ಟುಕೊಂಡು ಬಂದಿರುವ ಚಿತ್ರ ಚೇಸ್. ವಿಲೋಕ್ ಶೆಟ್ಟಿ ಸೇರಿದಂತೆ ಒಂದಿಡೀ ಚಿತ್ರತಂಡ ಶ್ರಮ ವಹಿಸಿ, ಚೇಸ್ ಅನ್ನು ಪ್ರೇಕ್ಷಕರ ಕುತೂಹಲದ ಕೇಂದ್ರದಲ್ಲಿ ಕಾಪಿಟ್ಟುಕೊಂಡು ಬಂದಿತ್ತು. ಅದೆಲ್ಲವೂ ಸಾರ್ಥಕಗೊಳ್ಳುವ ಕ್ಷಣಗಳು ಇಂದು ಎದುರಾಗಿವೆ.

ಒಡಲ ತುಂಬಾ ವಿಶೇಷತೆಗಳನ್ನು ಬಚ್ಚಿಟ್ಟುಕೊಂಡಿರುವ ಈ ಸಿನಿಮಾವನ್ನು ಸಿಂಪ್ಲಿ ಫನ್ ಮೀಡಿಯಾ ನೆಟ್‌ವರ್ಕ್ ಬ್ಯಾನರಿನಡಿಯಲ್ಲಿ ಮನೋಹರ್ ಸುವರ್ಣ ನಿರ್ಮಾಣ ಮಾಡಿದ್ದಾರೆ. ನಿರ್ದೇಶಕ ವಿಲೋಕ್ ಶೆಟ್ಟಿಯ ಕಲ್ಪನೆಯಂತೆಯೇ ಇಡೀ ಚಿತ್ರ ಮೂಡಿ ಬರಲು ಒತ್ತಾಸೆಯಾಗಿ ನಿಂತಿದ್ದಾರೆ. ಈ ಕಾರಣದಿಂದಲೇ ಬಾಲಿವುಡ್ಡಿನ ಮಂದಿಯೂ ಕಾಲಿಡಲಾಗಂಥಾ ಅಪರೂಪದ ಪ್ರದೇಶಗಳಲ್ಲಿ ಚೇಸ್‌ನ ದೃಷ್ಯಾವಳಿಗಳು ಕಳೆಗಟ್ಟಿಕೊಂಡಿವೆ. ಅಂಥಾ ದೃಷ್ಯ ವೈಭವಗಳೂ ಕೂಡಾ ಈ ಚಿತ್ರದ ಪ್ರಧಾನ ಆಕರ್ಷಣೆಗಳಲ್ಲಿ ಒಂದಾಗಿ ಗುರುತಿಸಿಕೊಂಡಿವೆ.

ಸಾಮಾನ್ಯವಾಗಿ ಕಥೆಯೊಂದು ಸಿನಿಮಾ ರೂಪ ಧರಿಸುತ್ತಲೇ ಅದರ ಚಿತ್ರೀಕರಣ ಇಂತಿಂಥಾದ್ದೇ ಲೊಕೇಶನ್ನುಗಳಲ್ಲಿ ನೆರವೇರಬೇಕೆಂಬ ಸ್ಪಷ್ಟ ಅಂದಾಜಿರುತ್ತದೆ. ಅದೇ ರೀತಿಯಲ್ಲಿ ನಿರ್ದೇಶಕ ವಿಲೋಕ್ ಶೆಟ್ಟಿಗೂ ಆ ಥರದ್ದೊಂದು ಕನಸಿತ್ತು. ಇದರ ಪ್ರಧಾನ ಭಾಗದ ಚಿತ್ರೀಕರಣವನ್ನು ಹಿಮಾಚಲ ಪ್ರದೇಶದಲ್ಲಿ ನೆರವೇರಿಸಬೇಕೆಂಬುದು ಅವರ ಇರಾದೆಯಾಗಿತ್ತು. ಆದರೆ ಅದು ಅಷ್ಟು ಸಲೀಸಿನ ಸಂಗತಿಯಾಗಿರಲಿಲ್ಲ. ಯಾಕೆಂದರೆ ಆವರೆಗೂ ಬಾಲಿವುಡ್ಡಿನ ಮಂದಿಗೂ ಆ ಪ್ರದೇಶದಲ್ಲಿ ಚಿತ್ರೀಕರಣ ನಡೆಸುವ ಅವಕಾಶ ಸಿಕ್ಕಿರಲಿಲ್ಲ. ಕಡೆಗೂ ಹರಸಾಹಸ ಪಟ್ಟು ಆ ಪ್ರದೇಶದಲ್ಲಿಯೇ, ಮೈ ಕೊರೆಯುವ ಚಳಿಯ ನಡುವೆಯೂ ಚಿತ್ರೀಕರಣ ಮಾಡಲಾಗಿದೆ.

ಇನ್ನುಳಿದಂತೆ ಬಾಲಿವುಡ್ ಮಟ್ಟದಲ್ಲಿ ಹೆಸರು ಮಾಡಿರುವ ತಂತ್ರಜ್ಞರ ತಂಡ ಚೇಸ್‌ಗೆ ಸಾಥ್ ಕೊಟ್ಟಿದೆ. ಈ ಕಾರಣದಿಂದಲೇ ಸದರಿ ಸಿನಿಮಾ ತಾಂತ್ರಿಕವಾಗಿಯೂ ಶ್ರೀಮಂತಿಕೆಯ ಕಳೆಕಟ್ಟಿಕೊಂಡಿದೆ. ಎರಡು ವರ್ಷಗಳ ಕಾಲ ಅವಿರತವಾಗಿ ಶ್ರಮಿಸಿ ಇಡೀ ಚಿತ್ರತಂಡ ಚೇಸ್ ಅನ್ನು ಸಿದ್ಧಪಡಿಸಿದೆ. ಇಂದು ಅದೆಲ್ಲವೂ ಸಾರ್ಥಕಗೊಳ್ಳುವ ದಿನ. ಯಾಕೆಂದರೆ, ರಾಜ್ಯಾದ್ಯಂತ ಚೇಸ್ ತೆರೆಗಂಡಿದೆ. ಇಂದೇ ಹತ್ತಿರದ ಚಿತ್ರಮಂದಿರಗಳಿಗೆ ತೆರಳಿ ನೋಡುವ ಮೂಲಕ ಒಂದು ಅಪರೂಪದ ಅನುಭೂತಿಯನ್ನು ನಿಮ್ಮದಾಗಿಸಿಕೊಳ್ಳಬಹುದು.

The post ಅದ್ಭುತ ಅನುಭೂತಿಗಾಗಿ ಇಂದೇ ನೋಡಿ! appeared first on ಶೋಧ ನ್ಯೂಸ್ - Shodha News.