ಇನ್ನೇನು ಲೋಕಸಭಾ ಚುನಾವಣೆಗೆ ಎರಡು ವರ್ಷಗಳು ಬಾಕಿ ಇರುವಾಗಲೇ, ರಾಜಕೀಯ ರಂಗದಲ್ಲಿ ಅದಕ್ಕಾಗಿನ ತಯಾರಿಗಳು ತಾರಕಕ್ಕೇರಿವೆ. ಅದರಲ್ಲಿಯೂ ವಿಶೇಷವಾಗಿ, ದೇಶಾದ್ಯಂತ ಅತ್ಯಂತ ಹೀನಾಯ ಸ್ಥಿತಿ ತಲುಪಿಕೊಂಡಿರುವ ರಾಷ್ಟ್ರೀಯ ಪಕ್ಷ ಕಾಂಗ್ರೆಸ್‌ನಲ್ಲಿಯಂತೂ ಸದ್ಯಕ್ಕೆ ಹೊಸಾ ಬಗೆಯ ಸಂಚಲನವೇ ಶುರುವಿಟ್ಟುಕೊಂಡಿದೆ. ಪ್ರತೀ ಬಾರಿಯೂ ಚುನಾವಣೆ ಕಣ್ಣಳತೆಯಲ್ಲಿದ್ದಾಗ ಕಣ್ಣುಜ್ಜಿಕೊಂಡು ಅಖಾಡಕ್ಕಿಳಿಯುತ್ತಿದ್ದ ಕಾಂಗ್ರೆಸ್ ಹೈಕಮಾಂಡ್ ಈ ಬಾರಿ ತುಸು ಮುಂಚೆಯೇ ಎಚ್ಚರಗೊಂಡಿದೆ. ಅದರ ಫಲವಾಗಿಯೇ ಶುರುವಾಗಿರೋದು ಭಾರತ್ ಜೋಡೋ ಯಾತ್ರೆ!

ರಾಹುಲ್ ಗಾಂಧಿ ಸಾರಥ್ಯದಲ್ಲಿ ಶುರುವಾಗಿರುವ ಈ ಯಾತ್ರೆ ಎಲ್ಲ ರಾಜ್ಯಗಳನ್ನೂ ಬಳಸಿಕೊಂಡು ಸಾಗುವಂಥಾ ಮಹತ್ವಾಕಾಂಕ್ಷೆ ಹೊಂದಿದೆ. ಈ ಯಾತ್ರಗೆ ಸಿಗುತ್ತಿರುವ ಜನರ ಪ್ರತಿಕ್ರಿಯೆಗಳೇ ಒಂದು ಮಟ್ಟಿಗೆ ಕಾಂಗ್ರೆಸ್ ಪಕ್ಷಕ್ಕೆ ನವೋಲ್ಲಾಸ ತಂದುಕೊಟ್ಟಿದೆ. ಸಾಲು ಸಾಲಾಗಿ ಹಿರಿಯ ನಾಯಕರು ರಾಜೀನಾಮೆ ಕೊಟ್ಟು, ಒಂದಷ್ಟು ನಾಯಕರನ್ನು ಬಿಜೆಪಿ ಆಪರೇಷನ್ ಕಮಲದಲ್ಲಿ ಸೆಳೆದುಕೊಂಡ ಪರಿಣಾಮ ಕಾಂಗ್ರೆಸ್ ನಿತ್ರಾಣ ಸ್ಥಿತಿಯಲ್ಲಿತ್ತು. ಆದರೀಗ ಭಾರತ್ ಜೋಡೋ ಯಾತ್ರೆಯಿಂದ ಕಾಂಗ್ರೆಸ್ ಒಂದಷ್ಟು ನಳನಳಿಸುವಂತೆ ಕಾಣಿಸುತ್ತಿದೆ. ಈ ಬಗ್ಗೆ ಕಾಂಗ್ರೆಸ್‌ನ ಹಿರಿಯ ನಾಯಕ ಜೈರಾಮ್ ರಮೇಶ್ ಈ ವಿದ್ಯಮಾನದ ಬಗ್ಗೆ ಮಾತಾಡಿದ್ದಾರೆ. ಈ ಯಾತ್ರೆಯಲ್ಲಿ ರಾಹುಲ್ ಗಾಂಧಿಗೆ ಸಿಗುತ್ತಿರುವ ಭರಪೂರ ಬೆಂಬಲ ಕಂಡು ಬಿಜೆಪಿ ಥರಗುಟ್ಟಿ ಹೋಗಿದೆ ಎಂದಿದ್ದಾರೆ.

ಇದೇ ಸಂದರ್ಭದಲ್ಲಿ ಜೈರಾಮ್ ರಮೇಶ್ ಕಾಂಗ್ರೆಸ್ ಕೇಂದ್ರಿತವಾಗಿ ನಡೆಯುತ್ತಿರುವ ಮತ್ತೊಂದಷ್ಟು ವಿದ್ಯಮಾನಗಳಬಗ್ಗೆಯೂ ಮಾತಾಡಿದ್ದಾರೆ. ಕಳೆದ ಲೋಕಸಭಾ ಚುನಾವಣೆಯ ಸಂದರ್ಭದಲ್ಲಿಯೂ ಮಹಾ ಘಟಬಂಧನ್ ಹೆಸರಲ್ಲಿ ಒಂದಷ್ಟು ವಿರೋಧ ಪಕ್ಷಗಳು ಒಗ್ಗೂಡಿದ್ದವು. ಈ ಬಾರಿಯೂ ಅಂಥಾದ್ದೇ ಮಂತ್ರ ಕೇಳಿ ಬರುತ್ತಿದೆ. ಹೀಗೆ ಬೇರೆ ಪಕ್ಷಗಳನ್ನು ಒಗ್ಗೂಡಿಸಿ ಮುಂದುವರೆದರೂ ಕೂಡಾ ಕಾಂಗ್ರೆಸ್ ಪಕ್ಷ ದುರ್ಬಲವಾಗೋದಿಲ್ಲ ಎಂದು ಜೈರಾಮ್ ರಮೇಶ್ ಪ್ರತಿಪಾದಿಸಿದ್ದಾರೆ. ಈ ಬಾರಿ ಘಟಬಂಧನ್‌ನ ಹೊಸಾ ವರ್ಷನ್ನಿನ ಮೂಲಕ ಬಿಜೆಪಿಯನ್ನು ಮಣಿಸುವ ವಿಶ್ವಾಸವನ್ನೂ ಅವರು ವ್ಯಕ್ತಪಡಿಸಿದ್ದಾರೆ.

The post ಕಾಂಗ್ರೆಸ್ ನಾಯಕ ಹೇಳಿದ್ದೇನು? appeared first on ಶೋಧ ನ್ಯೂಸ್ - Shodha News.

ಪ್ರಧಾನಿ ನರೇಂದ್ರ ಮೋದಿ ದರ್ಬಾರಿನಲ್ಲಿ ಪ್ರಜಾಪ್ರಭುತ್ವದ ಅಸಲೀ ಆಶಯಗಳು ಮಣ್ಣುಪಾಲಾಗುತ್ತಿವೆ ಅಂತೊಂದು ಆರೋಪ ದೇಶವ್ಯಾಪಿ ಕೇಳಿ ಬರುತ್ತಿದೆ. ಪ್ರಜಾಪ್ರಭುತ್ವದಲ್ಲಿ ಆಡಳಿತ ಪಕ್ಷದಷ್ಟೇ ಪ್ರತಿಪಕ್ಷಗಳ ಅವಶ್ಯಕತೆಯೂ ಇದೆ. ಪ್ರತಿಪಕ್ಷಗಳು ದುರ್ಬಲಗೊಂಡರೆ, ಆಡಳಿತಪಕ್ಷ ಹಗ್ಗ ಕಡಿದ ಗೂಳಿಯಂತಾಗುತ್ತದೆ ಎಂಬುದು ವಾಸ್ತವ. ಸೂಕ್ಷ್ಮವಾಗಿ ಗಮನಿಸಿದರೆ, ಮೋದಿ ಪಟಾಲಮ್ಮು ವಿಪಕ್ಷಗಳನ್ನು ದುರ್ಬಲಗೊಳಿಸೋದನ್ನೇ ಪ್ರಧಾನ ಉದ್ದೇಶವಾಗಿಸಿಕೊಂಡಂತಿದೆ. ಈ ಪ್ರಕ್ರಿಯೆಗೆ ಬಿಜೆಪಿ ಅತ್ಯಂತ ಪರಿಣಾಮಕಾರಿಯಾಗಿ ಐಟಿ ಸೆಲ್ ಅನ್ನು ಬಳಸಿಕೊಳ್ಳುತ್ತಿದೆ. ಅದರ ಫಲವಾಗಿಯೇ ರಾಹುಲ್ ಗಾಂಧಿಯನ್ನು ಅಸಮರ್ಥ, ಪಪ್ಪು ಅಂತೆಲ್ಲ ಮೂದಲಿಸುವ ಪ್ರಯತ್ನಗಳು ಅವ್ಯಾಹತವಾಗಿ ನಡೆಯುತ್ತಿವೆ. ಇದೀಗ ರಾಹುಲ್ ಗಾಂಧಿಗೆ ಅಂಟಿಕೊಂಡಿರುವ ಪಪ್ಪು ಎಂಬ ಮೂದಲಿಕೆಯ ಬಗ್ಗೆ ಬಾಲಿವುಡ್ ನಟಿ ಸ್ವರ ಭಾಸ್ಕರ್ ಬಿಡುಬೀಸಾಗಿ ಮಾತಾಡಿದ್ದಾಳೆ.

ಎಲ್ಲರೂ ಕೂಡಾ ರಾಹುಲ್ ಗಾಂಧಿಯನ್ನು ಪಪ್ಪು ಅಂತ ಕರೆಯಲಾರಂಭಿಸಿದ್ದರು. ಈ ಮೂಲಕವೇ ರಾಜಕೀಯವಾಗಿ, ವ್ಯಕ್ತಿಗತವಾಗಿ ಅವರನ್ನು ಹಣಿಯಲು ಪ್ರಾರಂಭಿಸಿದ್ದರು. ಆದರೀಗ ಜನರಿಗೆ ಮೆಲ್ಲಗೆ ವಾಸ್ತವಾಂಶದ ಅರಿವಾಗುತ್ತಿದೆ. ಪಪ್ಪುವಿನ ಮೇಲೀಗ ಎಲ್ಲರಿಗೂ ನಂಬಿಕೆ ಮೂಡಿಕೊಂಡಿದೆ ಅನ್ನೋದು ಸ್ವರ ಭಾಸ್ಕರ್ ಮಾತಿನ ಸಾರಾಂಶ. ಮುಂದುವರೆದು ಮಾತಾಡಿರುವ ಸ್ವರ, ತಾನು ರಾಹುಲ್ ಗಾಂಧಿಯನ್ನು ಖುದ್ದಾಗಿ ಭೇಟಿಯಾಗಿ ಮಾತಾಡಿದ್ದಾಗಿಯೂ ಹೇಳಿಕೊಂಡಿದ್ದಾಳೆ. ಆ ಹಂತದಲ್ಲಿ ಅವರೊಬ್ಬ ಸಮರ್ಥ ಮತ್ತು ಬುದ್ಧಿವಂತ ಎಂಬುದು ಮನದಟ್ಟಾಯ್ತು ಎಂದೂ ಸ್ವರ ಭಾಸ್ಕರ್ ಹೇಳಿಕೊಂಡಿದ್ದಾಳೆ.

ಸ್ವರ ಭಾಸ್ಕರ್ ತನ್ನ ನೇರವಾದ ಮಾತುಗಳಿಂದ, ರಾಜಕೀಯ ನೆಲೆಗಟ್ಟಿನ ಅಭಿಪ್ರಾಯಗಳಿಂದ ಗಮನ ಸೆಳೆಯುತ್ತಿರುವ ನಟಿ. ಅತ್ತ ಕಂಗನಾ ಬಿಜೆಪಿ ಪರವಾಗಿ ಏಕಮುಖವಾಗಿ ಬ್ಯಾಟಿಂಗು ನಡೆಸುತ್ತಿದ್ದರೆ, ಇತ್ತ ಸ್ವರ ಭಾಸ್ಕರ್ ಸಮಚಿತ್ತದ ವಿಚಾರಗಳಿಂದ ಆಗಾಗ ಸುದ್ದಿಯಾಗುತ್ತಿರುತ್ತಾಳೆ. ಇಂಥಾ ಮಾತಾಡಿದಾಗೆಲ್ಲ ಭಕ್ತಗಣ ಆಕೆಯ ವಿರುದ್ಧ ತಿರುಗಿ ಬೀಳುತ್ತದೆ. ಇದೀಗ ರಾಹುಲ್ ಗಾಂಧಿ ಬಗ್ಗೆ ಆಕೆ ಹೊಮ್ಮಿಸಿರುವ ಅಭಿಪ್ರಾಯ ಕೂಡಾ ಒಂದು ಪಾಳೆಯಕ್ಕೆ ಉರಿ ತರಿಸಿದೆ. ಸಾಮಾಜಿಕ ಜಾಲತಾಣದ ಮೂಲಕ ಸ್ವರ ಭಾಸ್ಕರ್‌ಳನ್ನು ಗೇಲಿ ಮಾಡುವ ಪ್ರಯತ್ನಗಳೂ ವ್ಯಾಪಕವಾಗಿ ನಡೆಯುತ್ತಿವೆ.

The post ರಾಹುಲ್ ಗಾಂಧಿ ಪಪ್ಪು ಅಲ್ಲ ಅಂದಳು ಸ್ವರ ಭಾಸ್ಕರ್! appeared first on ಶೋಧ ನ್ಯೂಸ್ - Shodha News.

ಈ ಈಶ್ವರಪ್ಪನಿಗೆ ಅದೇಕೋ ವಿವಾದಗಳನ್ನೆಬ್ಬಿಸದಿದ್ದರೆ ಉಂಡ ಅನ್ನ ಅರಗುವುದಿಲ್ಲ ಅನ್ನಿಸುತ್ತೆ. ಬಾಯಿಗೆ ಬಂದದ್ದನ್ನು ಮಾತಾಡುತ್ತಾ ಹರುಕು ಬಾಯಿ ಈಶ್ವರಪ್ಪ ಎಂದೇ ಖ್ಯಾತರಾಗಿರುವ ಸನ್ಮಾನ್ಯರು, ಇತ್ತೀಚೆಗಷ್ಟೇ ಫಾರ್ಟಿ ಪರ್ಸೆಂಟ್ ಕಮಿಷನ್ ತಿಂದ ಆರೋಪದಲ್ಲಿ ಮಂತ್ರಿಗಿರಿ ಕಳಕೊಂಡು ಮನೆ ಸೇರಿದ್ದರು. ಹಾಗೆ ಸುಮ್ಮನೆ ಮನೆಯೊಳಗಿದ್ದರೆ ಜನ ಮರೆಹು ಹೋಗುತ್ತಾರೆಂದೋ, ನಾಲಿಗೆ ಚಪಲವನ್ನು ಹತ್ತಿಕ್ಕಿಕೊಳ್ಳಲಾಗದೆಯೋ ಮತ್ತೊಮ್ಮೆ ವಿವಾದಾತ್ಮಕ ಹೇಳಿಕೆ ಕೊಟ್ಟಿದ್ದಾರೆ. ಅದಕ್ಕೆ ಈಗ ಮತ್ತೆ ದಾಳವಾಗಿರೋದು ಭಗವಾಧ್ವಜ. ಈ ಹಿಂದೆ ಭಗವಾಧ್ವಜವೇ ರಾಷ್ಟ್ರದ ಬಾವುಟವಾಗುತ್ತದೆಂದು ಪುಂಗಿಯೂದಿದ್ದ ಈಶ್ವರಪ್ಪ ಇದೀಗ ಮತ್ತದೇ ಮಾತುಗಳನ್ನಾಡಿದ್ದಾರೆ!

ಒಂದಿಲ್ಲೊಂದು ದಿನ ಕೇಸರಿ ಧ್ವಜ ಈ ದೇಶದ ಬಾವುಟವಾಗುತ್ತದೆ. ಅದಕ್ಕೆ ಅದೆಷ್ಟೋ ಶತಮಾನಗಳ ಇಹಿಹಾಸ, ಗೌರವವಿದೆ. ಭವಿಷ್ಯದಲ್ಲಿ ಅದೇ ರಾಷ್ಟ್ರ ಧ್ವಜವಾಗೋದರಲ್ಲಿ ಯಾವ ಸಂದೇಹವೂ ಇಲ್ಲ ಅನ್ನೋದು ಈಶ್ವರಪ್ಪನ ಬಡಬಡಿಕೆಯ ಸಾರಾಂಶ. ಈ ಆಸಾಮಿಗೆ ಅದ್ಯಾವ ದೆವ್ವ ಮೆಟ್ಟಿಕೊಂಡಿದೆಯೋ ಗೊತ್ತಿಲ್ಲ. ಫಾರ್ಟಿ ಪರ್ಸೆಂಟ್ ಕಮೀಷನ್ ದಂಧೆಗೆ ಗುತ್ತಿಗೆದಾರನ ಹೆಣ ಹಾಕಿದ ಗಂಭೀರ ಆರೋಪ ಈತನ ಮೇಲಿದೆ. ಅದಕ್ಕೆಂದೇ ಸಚಿವಗಿರಿ ಕಳೆದುಕೊಂಡಿರುವ ಈಶ್ವರಪ್ಪ ಮಾನ ಮರ್ಯಾದೆಗಳನ್ನೂ ಕಳೆದುಕೊಂಡಿದ್ದಾರೆ.

ಆದರೂ ಕೂಡಾ ತಮ್ಮ ಹಳೇ ಚಾಳಿ ಬಿಟ್ಟಿಲ್ಲ. ಕೋಟ್ಯಂತರ ಭಾರತೀಯರ ಅಭಿಮಾನ ಹೆಮ್ಮೆಯ ಪ್ರತೀಕವಾದ ರಾಷ್ಟ್ರ ಧ್ವಜವನ್ನು ಅವಮಾನಿಸೋದನ್ನು ಈಶ್ವರಪ್ಪ ಯಥಾ ಪ್ರಕಾರವಾಗಿ ಮುಂದುವರೆಸಿದ್ದಾರೆ. ಅಲ್ಲಾ ಸ್ವಾಮಿ, ಈ ನೆಲದ ಬಡ ಬಗ್ಗರು ಬೆಲೆಯೇರಿಕೆಯಿಂದ ಕಂಗಾಲಾಗಿದ್ದಾರೆ. ನಿಮ್ಮದೇ ಬಿಜೆಪಿ ಸರ್ಕಾರ ಜನ ಹಾಕೋ ಕಾಚಾದ ಬೆಲೆಯನ್ನೂ ಏರಿಸಿದ್ದಾರೆ. ಇಂಥಾ ಹೊತ್ತಿನಲ್ಲಿ ಯಾವ ಪುರುಷಾರ್ಥಕ್ಕಾಗಿ ಇಂಥಾ ಭಳಾಂಗು ಮಾತುಗಳನ್ನಾಡುತ್ತೀರಿ ಅಂತ ಜನ ಸಾಮಾನ್ಯರು ಪ್ರಶ್ನಿಸುತ್ತಿದ್ದಾರೆ. ಈಶ್ವರಪ್ಪನಿಗೆ ಉತ್ತರಿಸುವ ವ್ಯವಧಾನವಾಗಲಿ, ನೈತಿಕತೆಯಾಗಲಿ ಇದ್ದಂತಿಲ್ಲ!

The post ಫಾರ್ಟಿ ಪರ್ಸೆಂಟ್ ಈಶ್ವರಪ್ಪನ ಹೊಸಾ ಪ್ರಲಾಪ! appeared first on ಶೋಧ ನ್ಯೂಸ್ - Shodha News.