ಕನ್ನಡ ಚಿತ್ರರಂಗದಲ್ಲಿ ವಿಶಿಷ್ಟ ನಿರ್ದೇಶಕರಾಗಿ ಗುರುತಿಸಿಕೊಂಡಿರುವವರು ದುನಿಯಾ ಸೂರಿ. ರಾ ಸನ್ನಿವೇಶಗಳ ಮೂಲಕವೇ ನೋಡುಗರ ಮನಸನ್ನು ಆದ್ರ್ರಗೊಳಿಸಬಲ್ಲ ಛಾತಿಯಿಂದಲೇ ಸೂರಿ ಇದುವರೆಗೂ ಗೆಲುವು ದಾಖಲಿಸುತ್ತಾ ಬಂದಿದ್ದಾರೆ. ಇದೀಗ ಅವರು ಅಂಬರೀಶ್ ಪುತ್ರ ಅಭಿಷೇಕ್ ನಾಯಕನಾಗಿರೋ ಬ್ಯಾ ಮ್ಯಾನರ್ಸ್ ಚಿತ್ರದಲ್ಲಿ ಬ್ಯುಸಿಯಾಗಿದ್ದಾರೆ. ಸಾಮಾನ್ಯವಾಗಿ ಒಂದು ಸಿನಿಮಾ ಆರಂಭಿಸಿದರೆ, ಅದನ್ನೊಂದು ಧ್ಯಾನದಂತೆ ಪರಿಭಾವಿಸುವವರು ಸೂರಿ. ಅದರ ನಡುವಲ್ಲಿಯೇ ಮತ್ತೊಂದು ಚಿತ್ರದತ್ತ ಅವರು ಹೊರಳಿಕೊಳ್ಳೋದಿಲ್ಲ. ಆದರೆ, ಸಣ್ಣದೊಂದು ಗ್ಯಾಪು ಸಿಕ್ಕರೂ ಹೊಸಾ ದೃಷಯ ಕಾವ್ಯವೊಂದಕ್ಕೆ ಅಣಿಗೊಂಡು ಬಿಡೋದು ಸೂರಿ ಸ್ಪೆಷಾಲಿಟಿ. ಇದೀಗ ಅವರು ಅದಕ್ಕೆ ತಕ್ಕುದಾಗಿಯೇ ಹೊಸಾ ಚಿತ್ರಕ್ಕೆ ತಯಾರಾಗಿದ್ದಾರೆ!

ಸೂರಿ ಬ್ಯಾಡ್ ಮ್ಯಾನರ್ಸ್ ನಂತರದಲ್ಲಿ ನಿರ್ದೇಶನ ಮಾಡಲಿರೋ ಈ ಚಿತ್ರವನ್ನು ಜಯಣ್ಣ ನಿರ್ಮಾಣ ಮಾಡೋದು ಪಕ್ಕಾ ಆದಂತಿದೆ. ಬ್ಯಾಡ್ ಮ್ಯಾನರ್ಸ್ ಬ್ಯುಸಿಯ ನಡುವೆಯೇ ಸೂರಿ ಜಯಣ್ಣನೊಂದಿಗೆ ಮಾತುಕತೆ ನಡೆಸಿದ್ದಾರೆ. ಅದಕ್ಕೀಗ ಅಧಿಕೃತವಾಗಿಯೇ ಚಾಲನೆಯೂ ಸಿಕ್ಕಂತಾಗಿದೆ. ಅಂದಹಾಗೆ, ಈ ಹೊಸಾ ಸಿನಿಮಾದಲ್ಲಿ ವಿರಾಟ್ ನಾಯಕನಾಗಿ ನಟಿಸಲಿದ್ದಾನಂತೆ. ಮೊದಲ ಚಿತ್ರದಲ್ಲಿಯೇ ಭರವಸೆ ಮೂಡಿಸಿದ್ದ ಹುಡುಗ ವಿರಾಟ್. ಅಪ್ಪಟ ನಟನಾಗಿ ನೆಲೆ ಕಂಡುಕೊಳ್ಳುವ ಕಸುವು ಹೊಂದಿರುವ ವಿರಾಟ್ ಸೂರಿ ಕಾಂಬಿನೇಷನ್ನಿನ ಚಿತ್ರದ ಬಗ್ಗೆ ಥ್ರಿಲ್ ಆಗಿದ್ದಾನೆ. ಸದ್ಯಕ್ಕೆ ತಯಾರಿ ಅಂತ ನಡೆದಿರೋದಷ್ಟೇ. ನಾಯಕಿ, ತಾರಾಗಣದ ಆಯ್ಕೆಯೆಲ್ಲವೂ ಮುಂಗಾರಿನ ಜೊತೆ ಜೊತೆಗೇ ಆರಂಭವಾಗುವ ಸಾಧ್ಯತೆಗಳಿದ್ದಾವೆ!

ಹಾಗೆ ನೋಡಿದರೆ, ಸೂರಿಯನ್ನು ಹೊರತಾಗಿಸಿ ನೋಡಿದರೆ ಬ್ಯಾಡ್ ಮ್ಯಾನರ್ಸ್ ಚಿತ್ರದ ಬಗ್ಗೆ ಪ್ರೇಕ್ಷಕರಲ್ಲೇನೂ ನಿರೀಕ್ಷೆ ಮೂಡಿಕೊಳ್ಳಲು ಸಾಧ್ಯವಿಲ್ಲ. ಯಾಕೆಂದರೆ, ಈ ಹಿಂದಿನ ಚಿತ್ರಗಳಲ್ಲಿ ಅಂಬಿ ಪುತ್ರ ಅಭಿಷೇಕ್ ಅಂಥಾದ್ದೊಂದು ನಿರೀಕ್ಷೆ ಮೂಡಿಸುವಲ್ಲಿ ವಿಫಲರಾಗಿದ್ದಾರೆ. ಅಷ್ಟಕ್ಕೂ ಅಂಬಿ ಪುತ್ರನೆಂಬ ಲೇಬಲ್ಲಿನ ಹೊರತಾಗಿ ಅಭಿಷೇಕ್‍ಗೆ ಬೇರ್ಯಾವ ಬಲವೂ ಇಲ್ಲ. ನಟನೆಯ ಗಂಧಗಾಳಿಯಂತೂ ಸೂರಿಯ ದಯೆಯಿಂದ ಮಾತ್ರವೇ ಆತನಿಗೆ ದಕ್ಕಬೇಕಷ್ಟೇ. ಫಾರಂ ಕೋಳಿಯಂತಿರೋ ಅಭಿಷೇಕನನ್ನು ಸೂರಿ ಅದು ಹೇಗೆ ಗುಮ್ಮೋ ಗೂಳಿಯಾಗಿಸಿದ್ದಾರೆಂಬ ಒಂದೇ ಒಂದು ಕುತೂಹಲ ಸದ್ಯ ಪ್ರೇಕ್ಷಕರಲ್ಲಿದೆ. ಬ್ಯಾಡ್ ಮ್ಯಾನರ್ಸ್ ಮೇ ಅಂತ್ಯದಲ್ಲಿ ಬಿಡುಗಡೆಗೊಂಡ ನಂತರದಲ್ಲಿ ಸೂರಿ ಗರಡಿಯಲ್ಲೊಂದು ವಿರಾಟ ಪರ್ವ ಶುರುವಾಗೋದಂತೂ ಸತ್ಯ!

The post duniya soori: ಫಾರಂ ಕೋಳಿ ಗುಮ್ಮೋ ಗೂಳಿಯಾಗಲು ಸಾಧ್ಯವೇ? appeared first on ಶೋಧ ನ್ಯೂಸ್ - Shodha News.

ಸುಚೇಂದ್ರ ಪ್ರಸಾದ್ (suchendra prasad) ನಿರ್ದೇಶನದ `ಮಾವು ಬೇವು’ (maavu bevu) ಚಿತ್ರ ಈ ವಾರ ರಾಜ್ಯಾದ್ಯಂತ ಬಿಡುಗಡೆಗೊಳ್ಳಲಿದೆ. ಒಂದೊಳ್ಳೆ ಕಂಟೆಂಟು ಹೊಂದಿರುವ ಚಿತ್ರ ಪ್ರಚಾರದ ಪಟ್ಟುಗಳಾಚೆಗೂ ಪ್ರೇಕ್ಷಕರನ್ನು ಸೆಳೆಯುತ್ತದೆ, ಆಕರ್ಷಣೆಯ ಕೇಂದ್ರಬಿಂದುವಾಗುತ್ತದೆ ಎಂಬುದಕ್ಕೆ ಬಹುಶಃ ಮಾವು ಬೇವು ಚಿತ್ರಕ್ಕಿಂತಲೂ ಬೇರೆ ಉದಾಹರಣೆ ಬೇಕಿಲ್ಲ. ತನ್ನ ಆಂತರ್ಯ ಕಸುವಿನ ಕಾರಣದಿಂದಲೇ ಹೀಗೆ ಸದ್ದು ಮಾಡುತ್ತಿರುವ `ಮಾವು ಬೇವು’ (maavu bevu)  ಹಲವಾರು ವಿಶೇಷತೆಗಳನ್ನೊಳಗೊಂಡಿದೆ. ಇಲ್ಲಿ ಈ ಕಾಲಮಾನಕ್ಕೆ ಕನ್ನಡಿ ಹಿಡಿಯುವಂಥಾ ಅದ್ಭುತ ಕಥಾನಕವಿದೆ. ನಮ್ಮ ಜೊತೆಯಲ್ಲೇ ಹೆಜ್ಜೆ ಹಾಕುವಂತೆ ಭಾಸವಾಗೋ ಪಾತ್ರಗಳಿವೆ. ಅಂಥಾದ್ದೊಂದು ವಿಶಿಷ್ಟವಾದ ಪಾತ್ರಕ್ಕೆ ಕನ್ನಡ ಕಿರುತೆರೆ ಮತ್ತು ಚಿತ್ರರಂಗದ ಪ್ರತಿಭಾನ್ವಿತ ನಟ ನೀನಾಸಂ ಸಂದೀಪ್ (neenasam sandeep) ಜೀವ ತುಂಬಿದ್ದಾರೆ. ಈ ಮೂಲಕ ಎಸ್. ರಾಜಶೇಖರ್ ನಿರ್ಮಾಣ ಮಾಡಿರುವ ##ಮಾವು ಬೇವು ಚಿತ್ರದ ನಾಯಕನಾಗಿ ನಟಿಸಿರುವ ತುಂಬು ತೃಪ್ತಿಯೊಂದು ಸಂದೀಪ್ ಅವರಲ್ಲಿದೆ.

ನೀನಾಸಂ ಸಂದೀಪ್ ರಂಗಭೂಮಿಯಿಂದ ಬಂದ ಗಟ್ಟಿ ಪ್ರತಿಭೆ. ಯಾವ ಪಾತ್ರವಾದರೂ ಸೈ ಎಂಬಂಥಾ ಛಾತಿ ಹೊಂದಿರುವ ಅಪರೂಪದ ನಟ. ಕಿರುತೆರೆಯಲ್ಲಿ ಥರ ಥರದ ಪಾತ್ರಗಳಿಗೆ ಬಣ್ಣ ಹಚ್ಚುವ ಮೂಲಕ ಚಿರಪರಿಚಿತರಾಗಿರುವ ಸಂದೀಪ್, ಹಿರಿತೆರೆಯಲ್ಲಿಯೂ ಅಂಥಾದ್ದೇ ಛಾಪು ಮೂಡಿಸಿದ್ದಾರೆ. ಸಿನಿಮಾಗಳ ಸಂಖ್ಯೆಗಿಂತಲೂ ಪಾತ್ರದ ವೈಶಿಷ್ಟ್ಯ, ಗುಣಮಟ್ಟದತ್ತ ಪ್ರಧಾನವಾಗಿ ಗಮನ ಹರಿಸುವ ವಿರಳ ನಟರ ಸಾಲಿನಲ್ಲಿ ಸಂದೀಪ್ ನಿಸ್ಸಂದೇಹವಾಗಿ ಸೇರಿಕೊಳ್ಳುತ್ತಾರೆ. ಯಾವ ಬಗೆಯ ಪಾತ್ರಗಳಿಗಾದರೂ ಜೀವ ತುಂಬುವ ಶಕ್ತಿ ಇರುವ ಸಂದೀಪ್ ಪಾಲಿಗೆ ಕಂಟೆಂಟ್ ಓರಿಯಂಟೆಂಡ್ ಸಿನಿಮಾಗಳದ್ದೇ ಧ್ಯಾನ. ಹೊಸ ಹೊಸಾ ಪ್ರಯೋಗಾತ್ಮಕ ಪಾತ್ರಗಳಿಗೆ ಒಡ್ಡಿಕೊಂಡು ನಟನಾಗಿ ಮಿರುಗಬೇಕೆಂಬ ಅದಮ್ಯ ತುಡಿತ…

ಇಂಥಾ ಮನಃಸ್ಥಿತಿ ಹೊಂದಿರುವ ಸಂದೀಪ್ ಅವರ ಪಾಲಿಗೆ ಅದೆಲ್ಲವೂ ಒಟ್ಟೊಟ್ಟಿಗೇ ಸಾಕಾರಗೊಂಡಂತಿದ್ದ ಮಾವು ಬೇವು ಚಿತ್ರದ ನಾಯಕನಾಗೋ ಅವಕಾಶ ತಾನೇ ತಾನಾಗಿ ಕೂಡಿ ಬಂದಿದೆ. ನಿರ್ದೇಶಕ ಸುಚೇಂದ್ರ ಪ್ರಸಾದ್ ಇದರಲ್ಲಿನ ಪ್ರತೀ ಪಾತ್ರಗಳಿಗೂ ಕೂಡಾ ಅಳೆದೂ ತೂಗಿ ಕಲಾವಿದರನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಅವರೇ ಅತ್ಯಂತ ಪ್ರೀತಿಯಿಂದ, ಭರವಸೆಯಿಂದ ಪ್ರಧಾನ ಪಾತ್ರಕ್ಕೆ ನೀನಾಸಂ ಸಂದೀಪ್ ಅವರನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಸದಾ ಹೊಸತರತ್ತ ತೆರೆದುಕೊಳ್ಳುವ ಗುಣ ಹೊಂದಿರುವ ಸಂದೀಪ್ ಪಾಲಿಗಂತೂ ಈ ಸಿನಿಮಾ ಆರಂಭದಿಂದ ಹಿಡಿದು, ಕಡೇಯವರೆಗೂ ರೋಮಾಂಚಕ ಅನುಭವವನ್ನು ಕೊಡಮಾಡಿದೆ. ಸುಚೇಂದ್ರ ಪ್ರಸಾದ್ ಅವರ ಸಾಂಗತ್ಯ, ಗ್ರಂಥ ಭಂಡಾರ, ಅನುಭವದ ಕಣಜದೊಂದಿಗೆ ಕಲೆತು ಕೆಲಸ ಮಾಡುವ ಅವಕಾಶ ದಕ್ಕಿಸಿದೆಯೆಂಬ ಧನ್ಯತಾ ಭಾವವೂ ಅವರಲ್ಲಿದೆ.

ಸಾಮಾನ್ಯವಾಗಿ ಆಕಾಂಕ್ಷೆಗಳು ಉತ್ಕಟವಾಗಿದ್ದರೆ, ಅದಕ್ಕಾಗಿ ಬೇಕಾದ ಪರಿಶ್ರಮ ಪ್ರಾಮಾಣಿಕವಾಗಿದ್ದರೆ ಕೊಂಚ ತಡವಾದರೂ ಅಂಥಾದ್ದೇ ಅವಕಾಶಗಳು ಸಾಲುಗಟ್ಟಿ ನಿಲ್ಲುತ್ತವೆ. ನೀನಾಸಂ ಸಂದೀಪ್ ಅವರ ವಿಚಾರದಲ್ಲಿಯೂ ಆ ಮಾತು ಅಕ್ಷರಶಃ ಸತ್ಯ. ಯಾಕೆಂದರೆ, ಸಿನಿಮಾ ವಿಚಾರದಲ್ಲಿ ಅವರೊಳಗಿನ ತುಡಿತಕ್ಕೆ ಪೂರಕವಾದ ಪಾತ್ರಗಳೇ ಅವರಿಗೆ ಸಾಲು ಸಾಲಾಗಿ ಸಿಗುತ್ತಾ ಸಾಗುತ್ತಿವೆ. ಇತ್ತೀಚೆಗೆ ಬಿಡುಗಡೆಗೊಂಡು ಜನಮೆಚ್ಚುಗೆ ಪಡೆದಿರುವ 19 20 21 ಚಿತ್ರದಲ್ಲಿಯೂ ಸಂದೀಪ್ ಮುಖ್ಯವಾದೊಂದು ಪಾತ್ರ ಮಾಡಿದ್ದರು. ಇನ್ನೊಂದಷ್ಟು ಗಟ್ಟಿ ಕಂಟೆಂಟಿನ ಸಿನಿಮಾಗಳು ಬಿಡುಗಡೆಯ ಸರತಿಯಲ್ಲಿವೆ. ಆ ಸಾಲಿನಲ್ಲಿ ಮಾವು ಬೇವು ಪ್ರಧಾನವಾಗಿ ಗುರುತಿಸಿಕೊಳ್ಳುತ್ತದೆ.

ಸುಚೇಂದ್ರ ಪ್ರಸಾದ್ ನಿರ್ದೇಶನದಲ್ಲಿ ಕಾರ್ಯನಿರ್ವಹಿಸಿರುವುದು ಸಂದೀಪ್ ಅವರ ಪಾಲಿಗೆ ಹಲವಾರು ನೆನಪಿಟ್ಟುಕೊಳ್ಳುವಂಥಾ, ಇದುವರಗಿನ ಯಾನ ಸಾರ್ಥಕಗೊಂಡಿತೆಂಬಂಥಾ ಅದೆಷ್ಟೋ ಅನುಭೂತಿಯನ್ನು ಸಂದೀಪ್ ಅವರಿಗೆ ಕೊಡಮಾಡಿದೆ. ಒಂದಷ್ಟು ಆಸೆಗಳೂ ಕೂಡಾ ಮಾವು ಬೇವು ಮೂಲಕ ಈಡೇರಿವೆ. ಡೈಲಾಗುಗಳೇ ಇಲ್ಲದೆ, ಕೇವಲ ಭಾವನೆಗಳ ಮೂಲಕವೇ ಎಲ್ಲವನ್ನೂ ಅಭಿವ್ಯಕ್ತಗೊಳಿಸುವಂಥಾ ಪಾತ್ರದಲ್ಲಿ ನಟಿಸಬೇಕೆಂಬುದು ಸಂದೀಪ್ ಅವರ ಬಹುಕಾಲದ ಕನಸಾಗಿತ್ತು. ಅದು ಈ ಸಿನಿಮಾದ ಹಾಡುಗಳ ಮೂಲಕ ಸಾಧ್ಯವಾಗಿದೆ. ಶಕ್ತಿ ಮೀರಿ ಈ ಹಾಡುಗಳಲ್ಲಿ ಅಭಿನಯಿಸಿದ ಆತ್ಮತೃಪ್ತಿಯೂ ಅವರಲ್ಲಿದೆ.

ಹೀಗೆ ಮಾವು ಬೇವು ಚಿತ್ರದ ಮೂಲಕ ಸದ್ಯ ಸುದ್ದಿಯಲ್ಲಿರುವ ನೀನಾಸಂ ಸಂದೀಪ್ ಹಂಪಿಯ ಹೊಸಪೇಟೆಯವರು. ಹೊಸಪೇಟೆಯ ರೈತಾಪಿ ಕುಟುಂಬದಲ್ಲಿ ಹುಟ್ಟಿ, ಅಲ್ಲಿಯೇ ಡಿಪ್ಲೊಮೋ ಇನ್ ಮೆಕ್ಯಾನಿಕಲ್ ಇಂಜಿನೀರಿಂಗ್ ಪದವಿ ಪಡೆದುಕೊಂಡಿದ್ದ ಅವರು, ಶಾಲಾ ಕಾಲೇಜು ದಿನಗಳಿಂದಲೇ ನಟನೆಯೆಡೆಗೊಂದು ವ್ಯಾಮೋಹ ಬೆಳೆಸಿಕೊಂಡಿದ್ದವರು. ಬದುಕು ಬೇರೆ ಬೇರೆ ತೀರಗಳತ್ತ ಹೊಯಾಡಿಸಿದರೂ ತಾನು ಸೇರಬೇಕಾದ ಗಮ್ಯ ಕಲಾ ಜಗತ್ತೆಂಬುದನ್ನು ತೀರಾ ಚಿಕ್ಕ ವಯಸ್ಸಿನಲ್ಲಿಯೇ ನಿರ್ಧರಿಸಿಕೊಂಡಿದ್ದವರು ಸಂದೀಪ್. ಕಾಲೇಜು ವ್ಯಾಸಂಗದ ಸಮಯದಲ್ಲಿಯೆ `ಕನ್ನಡ ಕಲಾ ಸಂಘ’ ಎಂಬ ನಾಟಕ ತಂಡದಲ್ಲಿ ಗುರುತಿಸಿಕೊಂಡಿದ್ದ ಸಂದೀಪ್ ಪಾಲಿಗೆ ತನ್ನಿಷ್ಟದ ಹಾದಿಯಲ್ಲಿ ಗಟ್ಟಿಯಾಗಿ ಹೆಜ್ಜೆಯೂರೋ ಅವಕಾಶ ಕೂಡಿ ಬಂದಿದ್ದು ಕೂಡಾ ಅಲ್ಲಿಂದಲೇ…

ಕನ್ನಡ ಕಲಾ ಸಂಘದ ಕಡೆಯಿಂದಲೇ ಪ್ರಸಿದ್ಧ ರಂಗಕರ್ಮಿ ಪ್ರಸನ್ನ ಅವರು ನಾಟಕ ಶಿಬಿರವೊಂದನ್ನು ನಡೆಸಿಕೊಟ್ಟಿದ್ದರು. ಹೆಜ್ಜೆ ಹೆಜ್ಜೆಗೂ ಬೆರಗುಗಣ್ಣಾಗುತ್ತಾ, ಅದಕ್ಕೆ ತಕ್ಕುದಾದ ಪ್ರಶ್ನೆಗಳನ್ನು ಕೇಳುತ್ತಿದ್ದ ಚುರುಕು ಸ್ವಭಾವದ ಸಂದೀಪ್‍ರೊಳಗಿನ ಕಲಾವಿದನನ್ನು ಪ್ರಸನ್ನ ಸರಿಯಾಗಿಯೇ ಗುರುತಿಸಿದ್ದರು. ಆ ಕಾರಣದಿಂದಲೇ ಸಂದೀಪ್‍ಗೆ ನೀನಾಸಂ ಅನ್ನು ಪರಿಚಯಿಸಿ, ಅಲ್ಲಿಗೆ ತೆರಳಿ ತರಬೇತಿ ಪಡೆದು ಪಳಗಿಕೊಳ್ಳುವಂತೆ ಸಲಹೆ ನೀಡಿದ್ದರು. ಅದಾದೇಟಿಗೆ ಸೀದಾ ಹೆಗ್ಗೋಡಿಗೆ ತೆರಳಿ ನೀನಾಸಂನಲ್ಲಿ ಒಂದು ವರ್ಷದ ಕೋರ್ಸ್ ಪೂರೈಸಿಕೊಂಡಿದ್ದ ಸಂದೀಪ್ ನಟನಾಗಿ ನೆಲೆ ಕಂಡುಕೊಳ್ಳುವ ಅದಮ್ಯ ಉತ್ಸಾಹದೊಂದಿಗೆ ಗಾಂಧಿನಗರದತ್ತ ಹೆಜ್ಜೆಯಿಟ್ಟಿದ್ದರು.

ಹಾಗೆ ನೀನಾಸಂನಿಂದ ಹೊರ ಬಂದ ಸಂದೀಪ್ ಪಾಲಿಗೆ ತೆಲುಗು ಚಿತ್ರವೊಂದರ ಭಾಗವಾಗುವ ಅವಕಾಶವೂ ಕೂಡಿ ಬಂದಿತ್ತು. ತೇಜ ನಿರ್ದಶನದ ಚಿರವೊಂದ್ಕೆ ಆಡಿಷನ್ನಿನಲ್ಲಿ ಪಾಲ್ಗೊಂಡು ನಟನೆಯಲ್ಲಿ ಸೈ ಅನ್ನಿಸಿಕೊಂಡಿದ್ದರೂ ಬಾಷೆಯ ಸಮಸ್ಯೆಯಿಂದಾಗಿ ದೂರ ಸರಿಯುವಂತಾಗಿತ್ತು. ಆ ಬಳಿಕ ಕನ್ನಡ ಕಿರುತೆರೆಯತ್ತ ಸಾಗಿ, ಅಲ್ಲಿ ಒಂದಷ್ಟು ಅವಕಾಶ ಪಡೆದುಕೊಂಡಿದ್ದ ಸಂದೀಪ್, ನೀನಾಸಂ ಸಂದೀಪ್ ಆಗಿ ಖ್ಯಾತಿ ಪಡೆದುಕೊಂಡಿದ್ದರು. ಅದಾದ ನಂತರ ಒಂದು ತೆಲುಗು ಸೀರಿಯಲ್ಲಿನಲ್ಲಿ ನಟಿಸಿ, ತೆಲುಗರೇ ನಾಚುವಂತೆ ಅದಕ್ಕೆ ಸ್ವತಃ ತಾವೇ ಡಬ್ಬಿಂಗ್ ನಡೆಸೋ ಮೂಲಕ, ಆರಂಭಿಕ ಹಿನ್ನಡೆಯ ವಿರುದ್ಧ ಸೇಡು ತೀರಿಸಿಕೊಂಡಿದ್ದರಂತೆ. ಅದು ನೀನಾಸಂ ಸಂದೀಪ್ ಅವರ ಕಲಿಕಾ ಗುಣ, ಓರ್ವ ನಟನಾಗಿ ಅವುಡುಗಚ್ಚಿ ಸಾಧಿಸಿ ತೋರಿಸುವ ಸಂಕಲ್ಪಕ್ಕೊಂದು ಸೂಕ್ತ ಉದಾಹರಣೆ!

ಅಂದಹಾಗೆ, ನೀನಾಸಂ ಸಂದೀಪ್ ಮೊದಲ ಸಲ ನಟನಾಗಿ ಬಣ್ಣ ಹಚ್ಚಿದ್ದದ್ದು ಬಿದಿಗೆ ಚಂದ್ರಮ ಎಂಬ ಧಾರಾವಾಹಿಯ ಮೂಲಕ. ಅದು ಆ ಕಾಲದಲ್ಲಿ ಈ ಟೀವಿಯಲ್ಲಿ ಪ್ರಸಾರವಾಗಿದ್ದ ಅತ್ಯಂತ ಜನಪ್ರಿಯ ಧಾರಾವಾಹಿ. ಹಾಗೆ ಸಾಕಷ್ಟು ಧಾರಾವಾಹಿಗಳಲ್ಲಿ ನಟಿಸಿದ ನಂತರ ಅವರ ಚಿತ್ರ ಚಿತ್ರರಂಗದತ್ತ ಹೊರಳಿಕೊಂಡಿತ್ತು. ಬಾಯ್ ಫ್ರೆಂಡ್, ಅಂಬಾರಿ, ಸೈನೈಡ್, ಉಗ್ರಂ ಸೇರಿದಂತೆ ಅನೇಕ ಹಿಟ್ ಸಿನಿಮಾಗಳಲ್ಲಿ ಬಹುಮುಖ್ಯವಾದ ಪಾತ್ರಗಳನ್ನು ನಿರ್ವಹಿಸಿದ್ದರು. ಆ ಮೂಲಕ ಹಿರಿತೆರೆಯಲ್ಲಿಯೂ ಗೆದ್ದು ತೋರಿಸಿದ್ದರು.

ಇದೀಗ ಅವರು ಕಲಾ ಜಗತ್ತಿಗೆ ಪಾದಾರ್ಪಣೆ ಮಾಡಿ ಇಪ್ಪತ್ತೆರಡು ವಸಂತಗಳು ಕಳೆದಿವೆ. ಈಗಾಗಲೇ ಅವರು ನೂರಾ ಇಪ್ಪತ್ತಕ್ಕೂ ಹೆಚ್ಚು ಧಾರಾವಾಹಿ ಮತ್ತು ಇಪ್ಪತೈದಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಆ ಯಾನ ಮಾವು ಬೇವು ಎಂಬ ಸಮ್ಮೋಹಕ ಮೈಲಿಗಲ್ಲಿನ ಮೂಲಕ ಮತ್ತಷ್ಟು ಕಳೆಗಟ್ಟಿಕೊಳ್ಳುತ್ತದೆಂಬ ತುಂಬು ನಂಬಿಕೆ, ಇದಕ್ಕೆಲ್ಲ ಕಾರಣವಾಗಿರೋದು ರಂಗಕರ್ಮಿ ಪ್ರಸನ್ನ ಎಂಬ ಸಾರ್ವಕಾಲಿಕ ನೆನಕೆ ನೀನಾಸಂ ಸಂದೀಪ್ ಅವರದ್ದು. ಮಾವು ಬೇವು ಚಿತ್ರ ದೊಡ್ಡ ಮಟ್ಟದಲ್ಲಿ ಯಶ ಕಾಣಲಿ, ಸಂದೀಪ್ ಅವರ ಪಾತ್ರ ಪ್ರೇಕ್ಷಕರನ್ನೆಲ್ಲ ಆವರಿಸಿಕೊಳ್ಳಲಿ, ಅವರ ವೃತ್ತಿಬದುಕು ಮತ್ತೊಂದಷ್ಟು ಚೆಂದದ ಪಾತ್ರಗಳ ಮೂಲಕ ಕಳೆಗಟ್ಟಿಕೊಳ್ಳಲೆಂಬುದು ಹಾರೈಕೆ…

The post maavu bevu: ಪ್ರತಿಭಾವಂತ ನಟನಿಗೊಲಿದ ಅಪರೂಪದ ಪಾತ್ರ! appeared first on ಶೋಧ ನ್ಯೂಸ್ - Shodha News.

actress ramola: ಕಿರುತೆರೆಯಲ್ಲಿ ಒಂದಷ್ಟು ಪ್ರಸಿದ್ಧಿ ಪಡೆಯುತ್ತಲೇ ಏಕಾಏಕಿ ಹಿರಿತೆರೆಗೆ ಲಗ್ಗೆಯಿಡೋದು ಅನೇಕ ನಟ ನಟಿಯರ ಮಹಾ ಕನಸು. ಆದರೆ, ಆ ಯೋಗ ಮಾತ್ರ ಅಷ್ಟು ಸಲೀಸಾಗಿ ಎಲ್ಲರಿಗೂ ದಕ್ಕುವಂಥಾದ್ದಲ್ಲ. ಆದರೆ, ಹಿರಿತೆರೆಯಲ್ಲಿ (film industry) ಮಿಂಚುವ ಸೆಳೆತವಿರುತ್ತದಲ್ಲಾ? ಅದು ನಾನಾ ಆಟ ಆಡಿಸುತ್ತೆ. ಕೆಲವರನ್ನು ಹತ್ತಿದ ಏಣಿಯನ್ನೇ ಒದ್ದು ಕೆಡವಿ ಬಿಡುವಂತೆಯೂ ಪ್ರೇರೇಪಿಸುತ್ತೆ. ಹಾಗೆ ತಿಮಿರು ತೋರಿಸಿ ಸೀರಿಯಲ್ಲುಗಳಿಂದ ಅರ್ಧಕ್ಕೇ ಎದ್ದು ಬಂದವರನೇಕರು ಹೇಳ ಹೆಸರಿಲ್ಲದಂತೆ ಮಾಯವಾಗಿದ್ದಾರೆ. ಇನ್ನೂ ಕೆಲ ಮಂದಿ ಗಾಂಧಿನಗರದ ಸಂದಿಗೊಂದಿಗಳಲ್ಲಿ ಅಂತರ್‍ಪಿಶಾಚಿಗಳಂತೆ ಅಂಡಲೆಯುತ್ತಿದ್ದಾರೆ. ಈ ಹುಡುಗಿ (ramola) ರಮೋಲಾ ಕನ್ನಡತಿ (kannadathi) ಎಂಬ ಹಿಟ್ ಸೀರಿಯಲ್ಲಿನಿಂದ ಇದ್ದಕ್ಕಿಂದಂತೆ ಮಾಯವಾಗಿ, ಸಿನಿಮಾದಲ್ಲಿ ಪ್ರತ್ಯಕ್ಷಳಾದಾಗ ಬಹುತೇಕರು ಈಕೆಯೂ ಸೋತವರ ಸಾಲಿಗೆ ಸೇರುತ್ತಾಳೆಂದೇ ಅಂದುಕೊಂಡಿದ್ದರು. ಆದರೆ, ಆಕೆಯೀಗ ಅಕ್ಷರಶಃ ಅವಕಾಶಗಳ ಒಡ್ಡೋಲಗದಲ್ಲಿ ಮಿಂಚಲಾರಂಭಿಸಿದ್ದಾಳೆ!

ವರ್ಷದ ಹಿಂದೆ ಕನ್ನಡತಿ ಅಂತೊಂದು ಧಾರಾವಾಹಿ ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗಿತ್ತು. ಪ್ರತಿಭಾನ್ವಿತ ನಟಿ ರಂಜನಿ ರಾಘವನ್ ಆ ಸೀರಿಯಲ್ಲಿನ ನಾಯಕಿಯಾಗಿ ನಟಿಸಿದ್ದಳು. ಆಕೆಗೆ ಸದಾ ಕಾಟ ಕೊಡುವ ಖಡಕ್ ವಿಲನ್ ಸಾನಿಯಾ ಆಗಿ ಕಾಣಿಸಿಕೊಂಡಿದ್ದಾಕೆ ರಮೋಲಾ. ಹಾಗೆ ನೋಡಿದರೆ, ಈ ಸೀರಿಯಲ್ಲು ರಂಜಿನಿ ರಾಘವನ್ ಪಾಲಿಗೆ ಮತ್ತಷ್ಟು ಖ್ಯಾತಿ ತಂದು ಕೊಟ್ಟಿತ್ತು. ರಮೋಲಾ ನಿರ್ವಹಿಸಿದ್ದ ಸಾನಿಯಾ ಎಂಬ ಪಾತ್ರ ರಂಜಿನಿಯನ್ನು ಸರಿಗಟ್ಟುವಂತೆ ಪ್ರಚಾರ ಪಡೆದುಕೊಂಡಿತ್ತು. ವಿಲನ್ ಪಾತ್ರದ ಮೂಲಕವೂ ರಮೋಲಾ ತನ್ನ ಕ್ಯೂಟ್ ಲುಕ್ಕು, ಅಭಿನಯದಿಂದ ಮನ ಗೆದ್ದಿದ್ದಳು.

ಆ ಸೀರಿಯಲ್ಲು ಖ್ಯಾತಿಯ ಉತ್ತುಂಗದಲ್ಲಿರುವಾಗಲೇ ರಮೋಲಾ ಸಾನಿಯಾ ಪಾತ್ರದಿಂದ ನಿರ್ಗಮಿಸಿದ್ದಳು. ಸಾಮಾನ್ಯವಾಗಿ ಇಂಥಾ ಪಾತ್ರಗಳಲ್ಲಿ ಮಿಂಚಿದ ಕಲಾವಿದರು ಬದಲಾವಣೆಯಾದಾಗ ಸ್ವಲ್ಪ ಸಮಯದ ನಂತರ ಪ್ರೇಕ್ಷಕರು ಹೊಸಬರಿಗೆ ಹಿಒಂದಿಕೊಳ್ಳುತ್ತಾರೆ. ಆದರೆ ಕನ್ನಡತಿ ಅಭಿಮಾನಿಗಳು ಮಾತ್ರ ಸಾನಿಯಾ ಪಾತ್ರಕ್ಕೆ ಸೂಟ್ ಆಗೋದು ರಮೋಲಾ ಮಾತ್ರ ಎಂಬ ನಿರ್ಧಾರಕ್ಕೆ ಬಂದು ಬಿಟ್ಟಿದ್ದರು. ಆದರೆ, ಅಂಥಾ ಯಶಸ್ವಿ ಪಾತ್ರ ಬಿಟ್ಟು ಹೋದ ರಮೋಲಾ ಚಿತ್ರರಂಗದಲ್ಲಿ ಬರಖತ್ತಾಗೋದು ಕಷ್ಟವಿದೆ ಎಂದೇ ಅನೇಕರು ಅಂದುಕೊಂಡಿದ್ದರು. ಅದರ ಬೆನ್ನಿಗೇ ಈಕೆ ರಿಚ್ಚಿ ಅಂತೊಂದು ಚಿತ್ರದಲ್ಲಿ ನಟಿಸುತ್ತಿದ್ದಾಳೆಂಬ ಸುದ್ದಿ ಬಂದಿತ್ತು. ಆ ಚಿತ್ರವೀಗ ಪೋಸ್ಟ್ ಪ್ರೊಡಕ್ಷನ್ ಹಂತದಲ್ಲಿದೆ. ಅದಾಗಲೇ ರಮೋಲಾ ಮತ್ತೊಂದು ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾಳೆ.

ಕೇವಲ ಚಂದ, ವೈಯ್ಯಾರಗಳಿದ್ದರೆ ಸಾಲದು; ಸಿಕ್ಕ ಪಾತ್ರಗಳನ್ನು ಆವಾಹಿಸಿಕೊಳ್ಳುವ ಕಸುವಿರುವ ಕಲಾವಿದರು ಮಾತ್ರವೇ ಕಿರುತೆರೆ, ಚಿತ್ರರಂಗದಲ್ಲಿ ಭದ್ರವಾದ ನೆಲೆ ಕಂಡುಕೊಳ್ಳಲು ಸಾಧ್ಯ. ಅಂಥಾ ಪ್ರತಿಭೆ ಖಂಡಿತವಾಗಿಯೂ ರಮೋಲಾಗಿದೆ. ಈಕೆ ಕನ್ನಡತಿ ಧಾರಾವಾಹಿ ಬಿಟ್ಟು ಬಂದಾಗ `ಆ ಹುಡುಗಿಗೆ ದುರಂಹಕಾರ ಹೆಚ್ಚು’ ಎಂಬಂಥಾ ರೂಮರುಗಳು ಹಬ್ಬಿಕೊಂಡಿದ್ದವು. ಆದರೆ, ಅದ್ಯಾವುದಕ್ಕೂ ತಲೆ ಕೆಡಿಸಿಕೊಳ್ಳದ ರಮೋಲ ಮೊದಲ ಚಿತ್ರವನ್ನು ಯಶಸ್ವಿಯಾಗಿ ಮುಗಿಸಿಕೊಂಡಿದ್ದಾಳೆ. ಆ ಚಿತ್ರದ ಭಾಗವಾಗಿದ್ದವರ ಟೀಮಿನ ಮತ್ತೊಂದು ಚಿತ್ರಕ್ಕೂ ಆಯ್ಕೆಯಾಗಿದ್ದಾಳೆ. ಚಿತ್ರ ತಂಡದಲ್ಲಿ ಆಕೆಯ ಬಗ್ಗೆ ಮೆಚ್ಚುಗೆಯಿದೆಯೇ ಹೊರತು, ಯಾವ ತಕರಾರುಗಳೂ ಇಲ್ಲ. ಈ ಹುಡುಗಿಯ ಸ್ಪೀಡು ನೋಡಿದರೆ, ನಿಸ್ಸಂದೇಹವಾಗಿ ಚಿತ್ರರಂಗದಲ್ಲಿ ನಾಯಕಿಯಾಗಿ ನೆಲೆ ಕಂಡುಕೊಳ್ಳುವಂತಿದೆ!

The post ramola: ಕಿರುತೆರೆಯ ವಿಲನ್ ಮುಂದೆ ಅವಕಾಶಗಳ ಮೆರವಣಿಗೆ! appeared first on ಶೋಧ ನ್ಯೂಸ್ - Shodha News.

ಸುಚೇಂದ್ರ ಪ್ರಸಾದ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ `ಮಾವು ಬೇವು’ (maavu bevu) ಚಿತ್ರ ಇದೇ ತಿಂಗಳ 21ರಂದು ರಾಜ್ಯಾದ್ಯಂತ ತೆರೆಗಾಣುತ್ತಿದೆ. ಪ್ರಚಾರದ ಅಬ್ಬರಗಳಿಲ್ಲದೆ ತಾನೇತಾನಾಗಿ ಪ್ರೇಕ್ಷಕರ ಮನಸಿನಲ್ಲಿ ಪ್ರತಿಷ್ಟಾಪನೆಗೊಂಡಿರುವ ಈ ಸಿನಿಮಾ (movie) ಬಗ್ಗೆ ಗಾಂಧಿನಗರದಲ್ಲಿಯೇ ಬೆರಗು ಮೂಡಿಕೊಂಡಿದೆ. ಒಂದು ಕಡೆಯಲ್ಲಿ ಪ್ಯಾನಿಂಡಿಯಾ ಸಿನಿಮಾಗಳ ಜಪ ಜೋರಾಗಿರುವಾಗಲೇ, ಮತ್ತೊಂದು ದಿಕ್ಕಿನಿಂದ ಈ ಕಾಲಘಟ್ಟದ ತುರ್ತಿಗನುಗುಣವಾದ ಪ್ರಯತ್ನಗಳೂ ಆಗುತ್ತಿವೆ. ಅದು ಚಿತ್ರರಂಗವನ್ನು ಸಂಪನ್ನಗೊಳಿಸಬಲ್ಲ ಸಕಾರಾತ್ಮಕ ಚಲನೆ. ಈ ನಿಟ್ಟಿನಲ್ಲಿ ನೋಡಹೋದರೆ, (suchendra prasad) ಸುಚೇಂದ್ರ ಪ್ರಸಾದ್ `ಮಾವು ಬೇವು’ ಮೂಲಕ ಮಹತ್ವದ್ದೊಂದು ಹೆಜ್ಜೆಯಿಟ್ಟಿದ್ದಾರೆ. ವಾರದೊಪ್ಪೊತ್ತಿನಲ್ಲಿಯೇ ಆ ಭಿನ್ನ ಪ್ರಯತ್ನ ಪ್ರೇಕ್ಷಕರನ್ನು ಮುಖಾಮುಖಿಯಾಗಲಿದೆ!

ಒಂದು ಹುಮ್ಮಸ್ಸಿನ ಪ್ರವಾಹವೆದ್ದಿರುವಾಗ, ಅದರ ಜೊತೆ ಜೊತೆಯಾಗಿ ಸಾಗುವ ಜಾಣ ನಡೆಯನ್ನು ಅನೇಕರು ಅನುಸರಿಸುತ್ತಾರೆ. ಆದರೆ, ಪ್ರವಾಹಕ್ಕೆದುರಾಗಿ ಈಜುವ ಧೈರ್ಯ ಪ್ರದರ್ಶಿಸುವವರ ಸಂಖ್ಯೆ ಕಡಿಮೆ. ಅಂಥಾದ್ದೊಂದು ಧೈರ್ಯ ಇದ್ದರೂ ಬಂಡವಾಳ ಹೂಡಿ ಸಾಥ್ ಕೊಡಬಲ್ಲ ಸದಭಿರುಚಿಯ ನಿರ್ಮಾಪಕರ ಸಂಖ್ಯೆಯೂ ವಿರಳವಾಗಿದೆ. ಒಂದೊಳ್ಳೆ ಕಥೆ, ಬದುಕಿಗೆ ಹತ್ತಿರಾದ ಚಹರೆಗಳು, ಪ್ರತಿಭಾನ್ವಿತ ನಿರ್ದೇಶಕರು, ಅದಕ್ಕೊಪ್ಪುವ ತಾರಾಗಣ ಮತ್ತು ಅದೆಲ್ಲದರ ಮೇಲೆ ನಂಬಿಕೆಯಿಟ್ಟು ಕಾಸು ಹೂಡಿದ ನಿರ್ಮಾಪಕ ಎಸ್ ರಾಜಶೇಖರ್ ಅವರ ಸಾಥ್… ಇಷ್ಟೆಲ್ಲವೂ ಏಕಕಾಲದಲ್ಲಿಯೇ ಸಂಧಿಸಿದ ಪರಿಣಾಮವಾಗಿಯೇ ಮಾವು ಬೇವು ಎಂಬ ದೃಷ್ಯ ಕಾವ್ಯವೊಂದು ಜೀವ ಪಡೆಯಲು ಸಾಧ್ಯವಾಗಿದೆ.

ಒಂದು ಅಮೋಘವಾದ ಕನಸು ಸಾಕಾರಗೊಳ್ಳುವುದಕ್ಕೆ ಸಾಕಷ್ಟು ಸಮಯ ಹಿಡಿಯೋದಿದೆ. ಮಾವು ಬೇವು ವಿಚಾರದಲ್ಲಿಯೂ ಈ ಮಾತು ನೂರಕ್ಕೆ ನೂರರಷ್ಟು ನಿಜವಾದ ಸಂಗತಿ. ಯಾಕೆಂದರೆ, ಎಪ್ಪತ್ತು ಎಂಭತ್ತರ ದಶಕದಲ್ಲಿಯೇ ಕನ್ನಡದ ಮೇರು ಕವಿ ದೊಡ್ಡರಂಗೇಗೌಡರು, ಪ್ರಖ್ಯಾತ ಗಾಯಕ ಎಸ್.ಪಿ ಬಾಲಸುಬ್ರಮಣ್ಯಂ ಮತ್ತು ಜನಪ್ರಿಯ ಸಂಗೀತ ನಿರ್ದೇಶಕರುಗಳಾದ ಅಶ್ವತ್ಥ್-ವೈದಿ ಜೋಡಿ `ಮಾವು ಬೇವು’ ಎಂಬ ಗೀತ ಗುಚ್ಛವನ್ನು ಹೊರ ತಂದಿದ್ದರು. ಆ ಕಾಲಕ್ಕದು ಯಾವ ಪರಿಯಾಗಿ ಜನಪ್ರಿಯತೆ ಹೊಂದಿತ್ತೆಂದರೆ, ಎಲ್ಲರ ಮೈ ಮನಸುಗಳನ್ನೂ ಆವರಿಸಿಕೊಂಡಿತ್ತು. ಹಾಗೆ ನೋಡಿದರೆ, ಅದು ಸರ್ವ ಕಾಲಕ್ಕೂ ಸಲ್ಲುವ, ಈ ಕ್ಷಣ ಆಲಿಸಿದರೂ ಹಲವು ಭಾವಗಳನ್ನು ಸ್ಫುರಿಸುವ ಸಾರ್ವಕಾಲಿಕ ಗೀತ ಗುಚ್ಛ. ಅದಕ್ಕೆ ಸಿನಿಮಾ ರೂಪ ಕೊಡಬೇಕೆಂಬುದು ಅಶ್ವತ್ಥ್ ಮತ್ತು ತಂಡದ ಮಹಾ ಕನಸಾಗಿತ್ತು.

ಆ ಕಾಲದಲ್ಲಿಯೇ ಈ ಬಳಗದ ಕಡೆಯಿಂದ ಆ ದಿಸೆಯಲ್ಲಿ ಪ್ರಯತ್ನಗಳಾಗಿದ್ದವು. ಬಳಿಕ ಅವರಲ್ಲೊಬ್ಬೊಬ್ಬರೇ ಮರೆಯಾಗಿ, ದೊಡ್ಡರಂಗೇಗೌಡರೆಂಬ ಕವಿ ಜೀವ ಒಂಟಿತನ ಅನುಭವಿಸಿತ್ತು. ಜೊತೆಗಾರರು ಎದ್ದು ನಡೆದ ನಂತರವೂ, ಆ ಜೀವಗಳ ಕನಸನ್ನು ಸಾಕಾರಗೊಳಿಸುವ ಸಲುವಾಗಿ ಸರ್ವ ರೀತಿಯಲ್ಲಿಯೂ ಪ್ರಯತ್ನಿಸಿದ್ದರು. ಈಗ್ಗೆ ಹತ್ತು ವರ್ಷಗಳ ಹಿಂದೆ ಖುದ್ದು ಸುಚೇಂದ್ರ ಪ್ರಸಾದ್‍ರನ್ನೂ ಆ ಪ್ರಯತ್ನ ತಾಕಿತ್ತು. ಆ ಕ್ಷಣದಿಂದಲೇ ಅವರ ಮನಸಲ್ಲೊಂದು ಗುಂಗೀಹುಳ ಕೆಲಸ ಶುರುವಿಟ್ಟುಕೊಂಡಿತ್ತು. ಬಳಿಕ ವರ್ಷಗಳ ಹಿಂದೆ ಗಂಭೀರವಾಗಿ ಅಖಾಡಕ್ಕಿಳಿದಿದ್ದ ಸುಚೇಂದ್ರಪ್ರಸಾದ್, ದೊಡ್ಡರಂಗೇಗೌಡರ ಮಾರ್ಗದರ್ಶನದೊಂದಿಗೆ ಮಾವು ಬೇವು ಗೀತ ಗುಚ್ಛಕ್ಕ ದೃಷ್ಯ ರೂಪ ನೀಡಲು ನಿರ್ಣಾಯಕವಾಗಿ ಪ್ರಯತ್ನಿಸಿದ್ದರು. ಅದರ ಫಲವಾಗಿಯೇ ಇದೀಗ ಮಾವು ಬೇವು ಪ್ರೇಕ್ಷಕರನ್ನು ಮುಖಾಮುಖಿಯಾಗಲು ಸನ್ನದ್ಧವಾಗಿದೆ!

ಯಾವುದೋ ಮಾಯಾ ಜಿಂಕೆಯ ಬೆಂಬತ್ತಿ ಬದುಕುವವರೇ ಹೆಚ್ಚಾಗಿರುವ ಕಾಲಮಾನವಿದು. ಇಂಥಾ ಘಳಿಗೆಯಲ್ಲಿ ಖಾಸಗೀ ಬದುಕಿನ ಗೋಜಲುಗಳಿಂದ ಬಹುತೇಕರು ಬಸವಳಿದಿದ್ದಾರೆ. ಅಂಥಾ ಸಿಕ್ಕುಗಳನ್ನು ಬಿಡಿಸುವ ಪ್ರಯತ್ನ, ವಿನೂತನ ಯತ್ನ ಈ ಚಿತ್ರದಲ್ಲಿದೆ. ಸಾಮಾನ್ಯವಾಗಿ, ಯಾವುದೇ ಸಿನಿಮಾಗಳಲ್ಲಿ ಕಥೆ ಮತ್ತು ಸನ್ನಿವೇಶಗಳಿಗೆ ತಕ್ಕುದಾಗಿ ಹಾಡು ಸೃಷ್ಟಿಸೋದು ಮಾಮೂಲು. ಆದರೆ, ಜನಪ್ರಿಯ ಹಾಡುಗಳಿಗಾಗಿಯೇ ಕಥೆಯೊಂದು ಸಿದ್ಧಗೊಂಡ ಅಪರೂಪದ ವಿದ್ಯಮಾನಕ್ಕೆ ಮಾವು ಬೇವು ಸಾಕ್ಷಿಯಾಗಿದೆ. ಎಲ್ಲರ ಬದುಕಿಗೂ ಹತ್ತಿರಾಗುತ್ತಲೇ, ಎಲ್ಲ ವರ್ಗದ ಪ್ರೇಕ್ಷಕರನ್ನೂ ಕಾಡುವ ಗುಣಗಳಿಂದ ಮಾವು ಬೇವು ಸಮೃದ್ಧವಾಗಿದೆ. ಅದರ ಅಸಲೀ ಸ್ವಾದ ಏನೆಂಬುದು ಇದೇ ಇಪ್ಪತ್ತೊಂದರಂದು ಪ್ರೇಕ್ಷಕರ ಅರಿವಿಗೆ ಬರಲಿದೆ.

ಮಾವು ಬೇವು ಕನ್ನಡ ಚಿತ್ರರಂಗದಲ್ಲಿ ಹೊಸಾ ಮೈಲಿಗಲ್ಲಾಗುವಂಥಾ ಗುಣ ಲಕ್ಷಣಗಳನ್ನು ಹೊಂದಿರುವ ಚಿತ್ರ. ಇದರ ಬಗ್ಗೆ ಪ್ರೇಕ್ಷಕ ವಲಯದಲ್ಲೊಂದು ಅವರ್ಣನೀಯ ಸೆಳೆತ ಮೂಡಿಕೊಂಡಿದೆ. ಅದುವೇ ಅಮೋಘ ಗೆಲುವಾಗಿ ರೂಪಾಂತರಗೊಳ್ಳುವ ಲಕ್ಷಣಗಳು ಸ್ಪಷ್ಟವಾಗಿ ಗೋಚರಿಸುತ್ತಿವೆ. ಈ ಮೂಲಕ ಪ್ರತಿಭಾನ್ವಿತ ನಟರಾಗಿ ಗುರುತಿಸಿಕೊಂಡಿರುವ ಸುಚೇಂದ್ರ ಪ್ರಸಾದ್‍ರ ಪ್ರತಿಭೆಯ ಮತ್ತೊಂದು ಮಗ್ಗುಲಿನ ಅನಾವರಣವೂ ಆಗಲಿದೆ. ಅಂದಹಾಗೆ, ಹಿರಿಯ ನಟ ಶ್ರೀನಿವಾಸ ಮೂರ್ತಿ, ಸುಂದರಶ್ರೀ, ನೀನಾಸಂ ಸಂದೀಪ್, ಚೈತ್ರ ಎಚ್.ಜಿ, ಡ್ಯಾನಿ ಕುಟ್ಟಪ್ಪ, ಸುಪ್ರಿಯಾ ಎಸ್ ರಾವ್, ರಂಜಿತಾ ಎಚ್, ಸಿತಾರಾ, ಚಕ್ರವರ್ತಿ ದಾವಣಗೆರೆ, ರಂಜನ್ ಮುಂತಾದವರ ತಾರಾಗಣ ಈ ಚಿತ್ರಕ್ಕಿದೆ.

The post maavu bevu movie: ಸುಚೇಂದ್ರ ಪ್ರಸಾದ್ ಸಾರಥ್ಯದಲ್ಲಿ ಅಮೋಘ ಪ್ರಯತ್ನ! appeared first on ಶೋಧ ನ್ಯೂಸ್ - Shodha News.

ರಮೇಶ್ ಅರವಿಂದ್ ಸಾರಥ್ಯದ ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದ ಐದನೇ ಆವೃತ್ತಿ ಶುರುವಾಗಿದೆ. ಕಳೆದ ಸೀಜನ್ನಿನ ಒಂದಷ್ಟು ಅಧ್ವಾನಗಳನ್ನು ಕಂಡಿದ್ದವರಿಗೆಲ್ಲ ಈ ಶೋನ ಮೇಲೆ ಹೇಳಿಕೊಳ್ಳುವಂಥಾ ಮೋಹ ಉಳಿದುಕೊಂಡಿರಲಿಲ್ಲ. ರಮೇಶ್ ಅರವಿಂದ್ ಆ ಕಾರ್ಯಕ್ರಮ ನಡೆಸಿ ಕೊಡುವ ರೀತಿ, ಸಾಧಕರೆನ್ನಿಸಿಕೊಂಡವರ ಬದುಕಿನ ಸೂಕ್ಷ್ಮಗಳನ್ನು ಕಲೆ ಹಾಕಿ ಅವರನ್ನೇ ಅಚ್ಚರಿಗೀಡು ಮಾಡುವ ಕಸುಬುದಾರಿಕೆಗಳೆಲ್ಲ ಒಂದಷ್ಟು ಆಕರ್ಷಣೆ ಉಳಿಸಿಕೊಂಡಿದ್ದದ್ದು ನಿಜ. ಝೀ ಕನ್ನಡದ ಬ್ಯುಸಿನೆಸ್ ಹೆಡ್ ರಾಘವೇಂದ್ರ ಹುಣಸೂರ ಈ ಬಾರಿ ಅದೇನೋ ಹೊಸತನ ತುಂಬಿರುತ್ತಾರೆ, ಈ ಕಾರ್ಯಕ್ರಮ ಮತ್ತೊಂದಷ್ಟು ಹೊಳಪುಗಟ್ಟಿಕೊಂಡು ಬರುತ್ತದೆಂಬಂಥಾ ಕೃಶವಾದ ನಿರೀಕ್ಷೆಗಳೂ ಇದ್ದವು. ಇದೆಲ್ಲದರ ಒಡ್ಡೋಲಗದಲ್ಲೀಗ ವೀಕೆಂಡ್ ವಿತ್ ರಮೇಶ್ ಶುರುವಾಗಿದೆ. ಆರಂಭದ ಎಪಿಸೋಡಿಗೆ ಪ್ರೇಕ್ಷಕರ ಮುನಿಸು ಮುತ್ತಿಕೊಂಡಿದೆ!

ಈ ಕಾರ್ಯಕ್ರಮವನ್ನು ಪ್ರೀತಿಯಿಂದ ನೋಡುವ ಪ್ರೇಕ್ಷಕರಲ್ಲಿಯೇ ಇಂಥಾದ್ದೊಂದು ಮುನಿಸು ಮಡುಗಟ್ಟಿಕೊಳ್ಳಲು ಪ್ರಧಾನ ಕಾರಣವಾಗಿರುವಾಕೆ ಪುರಾತನ ನಟಿ ರಮ್ಯಾ. ನಟಿಸಿರೋದು ಸಲೀಸಾಗಿ ಲೆಕ್ಕವಿಟ್ಟುಕೊಳ್ಳುವಷ್ಟೇ ಚಿತ್ರಗಳಲ್ಲಾದರೂ, ಈಕೆ ಸಂಪಾದಿಸಿಕೊಂಡ ಅಭಿಮಾನಿ ಬಳಗ ನಿಜಕ್ಕೂ ಅಚ್ಚರಿ ಮೂಡಿಸುತ್ತೆ. ಬಹುಶಃ ಕನ್ನಡ ಮಟ್ಟಿಗೆ ನಟಿಯೊಬ್ಬಳು ಸೃಷ್ಟಿಸಿದ ದಾಖಲೆಯದು. ಈವತ್ತಿಗೆ ರಮ್ಯಾ ರಾಜಕಾರಣಿಯಾಗಿ ಬದಲಾಗಿದ್ದಾರೆ. ಒಂದು ಪಕ್ಷದಲ್ಲಿ ಅಧಿಕೃತವಾಗಿ ಗುರುತಿಸಿಕೊಂಡಿದ್ದಾರೆ. ಈ ಭೂಮಿಕೆಯಲ್ಲಿ ಒಂದು ವರ್ಷ ಆಕೆಯನ್ನು ಶತಾಯಗತಾಯ ವಿರೋಧಿಸುತ್ತಿದೆ; ಸಮಯ ಸಿಕ್ಕಾಗೆಲ್ಲ ಶಕ್ತ್ಯಾನುಸಾರ ಹಳಿಯುತ್ತಿದೆ. ಹಾಗೆ ವಿರೋಧಿಸಲೇಬೇಕೆಂದು ಟೊಂಕ ಕಟ್ಟಿ ನಿಂತವರೊಳಗೂ ಒಂದು ಅಭಿಮಾನದ ಛಳುಕು ಜಾಗೃತವಾಗಿರುವಂತೆ ನೋಡಿಕೊಂಡಿರುವಾಕೆ ರಮ್ಯಾ!

ಇಂಥಾ ರಮ್ಯ ಇದೀಗ ವೀಕೆಂಡ್ ವಿತ್ ರಮೇಶ್ ಶೋನ ಐದನೇ ಆವೃತ್ತಿಯ ಮೊದಲ ಅತಿಥಿಯಾಗಿದ್ದಾರೆ. ಆ ಭಾಗದ ಕಾರ್ಯಕ್ರಮ ಕೂಡಾ ಪ್ರಸಾರವಾಗಿದೆ. ಈಕೆ ಮೊದಲ ಅತಿಥಿ ಎಂಬ ವಿಚಾರ ಜಾಹೀರಾದಾಕ್ಷಣ ಯಾವ ಪ್ರೇಕ್ಷಕರು ಖುಷಿಗೊಂಡಿದ್ದರೋ, ಅದೇ ಮಂದಿ ಕಾರ್ಯಕ್ರಮ ನೋಡಿ ನಖಶಿಖಾಂತ ಕೋಪಗೊಂಡಿದ್ದಾರೆ. ಅದಕ್ಕೆ ಕಾರಣವಾಗಿರೋದು ಸಾಧಕರ ಸೀಟಿನಲ್ಲಿ ಕುಕ್ಕರಿಸಿದ್ದ ರಮ್ಯಾ ಕಡೆಯಿಂದ ಕಾಣಿಸಿಕೊಂಡಿದ್ದ ತಿರ್ಕೆ ದೌಲತ್ತು ಮತ್ತು ಆಕೆಯ ಅಗಾಧ ಇಂಗ್ಲಿಂಷ್ ವ್ಯಾಮೋಹ. ಅಷ್ಟಕ್ಕೂ ಈವತ್ತಿಗೆ ರಮ್ಯಾ ಏನೇ ಆಗಿದ್ದರೂ, ಯಾವ ಎತ್ತರಕ್ಕೆ ತಲುಪಿಕೊಂಡಿದ್ದರೂ ಅದಕ್ಕೆ ಮೂಲ ಕಾರಣ ಕರ್ನಾಟಕ ಮತ್ತು ಕನ್ನಡಿಗರೇ. ರಮ್ಯಾ ನಟಿಯಾಗಿ ಮೆರೆದಿದ್ದರ ಹಿಂದೆ ಕನ್ನಡತನದ ಋಣವಿದೆ. ಕನ್ನಡಿಗರೆಲ್ಲರು ಮನದುಂಬಿ ಹಾರೈಸಿ, ಪ್ರೋತ್ಸಾಹಿಸಿದ್ದರಿಂದಲೇ ಆಕೆ ಇಂದು ಸಾಧಕರ ಸೀಟಿನಲ್ಲಿ ಕೂತು ಮೆರೆಯುವಂತೆ ಮಾಡಿದೆ.

ಇಂಥಾ ಅಗಾಧ ಪ್ರೀತಿಯನ್ನು ಹಾಸಿ ಹೊದ್ದು ಸಾಧಕರ ಸೀಟೇರಿ ಕೂತ ರಮ್ಯಾಳ ಮಾತು, ವರ್ತನೆಗಳಲ್ಲಿ ಆ ಋಣ ಭಾರದ ಲವಲೇಶವೂ ಕಾಣಿಸಿಲ್ಲ. ಅಮೆರಿಕದಲ್ಲಿ ಹುಟ್ಟಿ, ಅಲ್ಲೇ ಬೆಳೆದು ಸೀದಾ ಸಾಧಕರ ಸೀಟಿಗೆ ಧೊಪ್ಪನೆ ಉದುರಿಕೊಂಡಿದ್ದಾಳೇನೋ ಎಂಬಂತೆ ರಮ್ಯಾ ತಿರ್ಕೆ ದೌಲತ್ತು ಪ್ರದರ್ಶಿಸಿದ್ದಾಳೆ. ಕಾಲ ಮೇಲೆ ಕಾಲು ಹಾಕಿಕೊಂಡೇ ಕಾರ್ಯಕ್ರಮ ಮುಗಿಸಿಕೊಂಡಿದ್ದಾಳೆ. ಇರಲಿ, ರಮ್ಯಾ ತನ್ನ ಸ್ವಂತ ಕಾಲ ಮೇಲೆ ತನ್ನದೇ ಕಾಲು ಹಾಕಿ ಕುಂತರೆ ತಪ್ಪೇನು ಅಂತೊಂದು ವಾದ ಮೂಡಿಕೊಳ್ಳಬಹುದು. ಅವಳದ್ದೇ ಕಾಲು, ರಾಘವೇಂದ್ರ ಹುಣಸೂರನ ಕೆಂಪು ಚೇರು… ಅದರ ಕಥೆ ಹಾಳು ಬಿದ್ದು ಹೋಗಲಿ. ನೆಟ್ಟಗೆ ಕನ್ನಡ ಮಾತಾಡಲು ಈಕೆಗೇನು ರೋಗ? ಹಾಗಂತ ಪ್ರೇಕ್ಷಕರೇ ಆಕ್ರೋಶಗೊಂಡು ಪ್ರಶ್ನಿಸುತ್ತಿದ್ದಾರೆ!

ಯಾವ್ಯಾವ ಭಾಷೆಯಿಂದ ಬಂದ ನಟಿಯರೂ ಕೂಡಾ ಕನ್ನಡಿಗರ ಪ್ರೀತಿಯನ್ನು ಸ್ಮರಿಸುತ್ತಾರೆ. ಕಷ್ಟಪಟ್ಟು ಕನ್ನಡ ಕಲಿತು ಮಾತಾಡುತ್ತಾರೆ. ಕೆಲವರಂತೂ ಕನ್ನಡದಲ್ಲಿಯೇ ಶುಭಾಶಯ ಕೋರುವ, ಅಭಿಪ್ರಾಯ ಹಂಚಿಕೊಳ್ಳುವ ಅಭಿಮಾನವನ್ನೂ ಪ್ರದರ್ಶಿಸುತ್ತಾರೆ. ಹಾಗಿರುವಾಗ, ಕನ್ನಡದ ಹುಡುಗಿ ರಮ್ಯಾಗೆ ನೆಟ್ಟಗೆ ಕನ್ನಡ ಮಾತಾಡಲೇನು ನೋವಿದೆಯೋ ಭಗವಂತನೇ ಬಲ್ಲ. ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದಲ್ಲಂತೂ ಆಕೆ ಇಂಗ್ಲಿಷಿನಲ್ಲಿಯೇ ಪುಂಗಿದ್ದಾಳೆ. ನಡುವಲ್ಲೊಂದಿಷ್ಟು ಕನ್ನಡ ಪದಗಳನ್ನು ಉಸುರಿದ್ದಾಳೆ. ಇದು ತಿರ್ಕೆ ದೌಲತ್ತಲ್ಲದೆ ಬೇರೇನೂ ಅಲ್ಲ. ರಮ್ಯಾ ತನ್ನನ್ನು ತಾನು ಮಹಾನ್ ಸಾಧಕಿ ಅಂದುಕೊಂಡಿರಬಹುದು. ಹೋದಲ್ಲಿ ಬಂದಲ್ಲಿ ಆಕೆಗೆ ಬಿಲ್ಡಪ್ಪುಗಳೂ ಸಿಗುತ್ತಿರಬಹುದು. ಅದೆಲ್ಲವೂ ಕನ್ನಡಿಗರು ನೀಡಿದ ಪ್ರೀತಿಯ ಭಿಕ್ಷೆ ಎಂಬ ಖಬರಿದ್ದರೆ ಒಳಿತು!

The post ಇಂಗ್ಲಿಷ್ ರಮ್ಯಾ ಮೇಲೆ ಪ್ರೇಕ್ಷಕರ ಮುನಿಸು! appeared first on ಶೋಧ ನ್ಯೂಸ್ - Shodha News.

ಕೊರೋನಾ ವೈರಸ್ಸು ಬಹುತೇಕರ ಬದುಕನ್ನೇ ಬರ್ಬಾದಾಗಿಸಿದ್ದೀಗ ಕರಾಳ ಇತಿಹಾಸವಾಗಿ ದಾಖಲಾಗಿದೆ. ನಾನಾ ಕ್ಷೇತ್ರದಲ್ಲೂ ಕೂಡಾ ಇದಕ್ಕೆ ಬಲಿಬಿದ್ದ ದುರಂತಗಾಥೆಗಳು ದಂಡಿ ದಂಡಿಯಾಗಿವೆ. ಅದರಲ್ಲಿಯೂ, ಸಿನಿಮಾ ರಂಗದಲ್ಲಂತೂ ದುರಂತದ ಗಡಿ ದಾಟಿಕೊಂಡ ದಾರುಣ ಕಥೆಗಳಿದ್ದಾವೆ. ಅದೆಷ್ಟೋ ಸಿನಿಮಾಗಳು ಗೆಲ್ಲುವ ತಾಕತ್ತಿದ್ದರೂ, ಎದ್ದು ನಿಲ್ಲಲಾಗದೆ ಮರೆಯಾಗಿವೆ. ಅದೆಷ್ಟೋ ಸಿನಿಮಾಗಳು ಬಿಡುಗಡೆಯ ಭಾಗ್ಯ ಕಾಣದೆ ಕಂಗಾಲಾಗಿವೆ. ಗೆಲ್ಲಬಲ್ಲ ಎಲ್ಲ ಲಕ್ಷಣಗಳಿದ್ದರೂ ಕೂಡಾ ವಿಧಿಯಾಟಕ್ಕೆ ಸಿಕ್ಕು, ಮರೆಗೆ ಸರಿಯುವ ಸಂಕಟವಿದೆಯಲ್ಲಾ? ಅದನ್ನು ಒಂದು ಹಂತದಲ್ಲಿ ದೊಡ್ಡ ಮಟ್ಟದಲ್ಲಿಯೇ ಸದ್ದು ಮಾಡಿದ್ದ `ಕೊಡೆಮುರುಗ’ ಚಿತ್ರತಂಡ ಸರಿಯಾಗಿಯೇ ಅರಿತುಕೊಂಡಿತ್ತು. ಕೊರೋನಾ ಅಬ್ಬರದಿಂದಲೇ ಚಿತ್ರಮಂದಿರಗಳಿಂದ ಮರೆಯಾಗಿದ್ದ ಈ ಚಿತ್ರ ಪ್ರೇಕ್ಷಕರ ಮನಸಲ್ಲುಳಿದಿದೆ. ಅದು ನಿಜವಾದ ಸಾರ್ಥಕ್ಯ!

ಕೊಡೆಮುರುಗ ಚಿತ್ರದ ಬಗ್ಗೆ ಈಗ ಏಕಾಏಕಿ ಪ್ರಸ್ತಾಪಿಸುತ್ತಿರೋದಕ್ಕೆ ಬಲವಾದ ಕಾರಣವಿದೆ. ಆ ಚಿತ್ರದ ಚೆಂದದ ವೀಡಿಯೋ ಸಾಂಗ್ ಇದೀಗ ಆನಂದ್ ಆಡಿಯೋ ಮೂಲಕ ಬಿಡುಗಡೆಗೊಂಡಿದೆ. ಅದಕ್ಕೆ ಸಿಗುತ್ತಿರುವ ವೀಕ್ಷಣೆ ಮತ್ತು ಭರಪೂರ ಪ್ರತಿಕ್ರಿಯೆಗಳ ಪ್ರಭೆಯಲ್ಲಿ ಕೊಡೆಮುರುಗ ಮತ್ತೊಮ್ಮೆ ಪ್ರೇಕ್ಷಕರ ಮೈ ಮನಸುಗಳನ್ನು ಆವರಿಸಿಕೊಂಡಿದ್ದಾನೆ. ಹೀಗೆ ಅನಿವಾರ್ಯತೆಗಳ ಸುಳಿಗೆ ಸಿಕ್ಕು ಮರೆಯಾಗಿದ್ದ ಚಿತ್ರವೊಂದು, ಅಚ್ಚರಿದಾಯಕವಾಗಿ ಮತ್ತೆ ಸುದ್ದಿ ಕೇಂದ್ರಕ್ಕೆ ಬರುವುದು, ಆ ಸಿನಿಮಾ ಬಗ್ಗೆ ಪ್ರೇಕ್ಷಕರೇ ಚರ್ಚೆ ಮಾಡುವುದೆಲ್ಲವೂ ವಿಶೇಷ ವಿದ್ಯಮಾನ. ಅದನ್ನು ಕೊಡೆಮುರುಗ ಚಿತ್ರ ಸಾಧ್ಯವಾಗಿಸಿದೆ. ಈ ಸಮ್ಮೋಹಕವಾದ ಹಾಡಿನ ಭೂಮಿಕೆಯಲ್ಲಿಯೇ ಈ ಸಿನಿಮಾ ಬಗೆಗಿನ ಮಹತ್ವದ ಅಂಶಗಳೂ ಜಾಹೀರಾಗಿವೆ!

ಮೊದಲಿಗೆ ಈ ಗ ಹೊರ ಬಂದಿರುವ ಹಾಡಿನ ಬಗ್ಗೆ ಹೇಳುವುದಾದರೆ, ಅದು ಈ ಸಿನಿಮಾ ನಿರ್ದೇಶಕ ಕಂ ಹೀರೋ ಸುಬ್ರಮಣ್ಯ ಪ್ರಸಾದ್ ಅವರ ಕನಸಿನ ಕೂಸು. ನಿಮಗೆ ಸುಬ್ರಮಣ್ಯ ಪ್ರಸಾದ್ ಹೀರೋ ಅಂದಾಕ್ಷಣ ಅವರು ಈ ಸಿನಿಮಾ ನಿರ್ದೇಶಕರಲ್ಲವಾ ಅಂತೊಂದು ಪ್ರಶ್ನೆ ಮೂಡಿಕೊಳ್ಳಬಹುದು. ಒಂದು ವೇಳೆ ನೀವು ಈ ಚಿತ್ರವನ್ನು ನೋಡಿದವರಾಗಿದ್ದರೆ ಆವಾಗಲೇ ಈ ರಹಸ್ಯ ನಿಮಗೆ ಗೊತ್ತಾಗಿರುತ್ತೆ. ಅಷ್ಟಕ್ಕೂ ಈ ಸಿನಿಮಾದ ನಿಜವಾದ ಹೀರೋ ಸುಬ್ರಮಣ್ಯ ಪ್ರಸಾದ್. ಅದೆಂಥಾ ಹಿಂಜರಿಕೆಯಿತ್ತೋ, ಅನಿವಾರ್ಯತೆ ಇತ್ತೋ ಗೊತ್ತಿಲ್ಲ; ಸುಬ್ರಮಣ್ಯ ಪ್ರಸಾದ್, ತಾನು ಕೊಡೆಮುರುಗ ಚಿತ್ರದ ಹೀರೋ ಆಗಿದ್ದರೂ ಕೂಡಾ, ಅದನ್ನು ಯಾವ ಹಂತದಲ್ಲಿಯೂ ರಿವೀಲ್ ಮಾಡಿರಲಿಲ್ಲ. ಆದರೆ ಸಿನಿಮಾ ನೋಡಿದ ಪ್ರತಿಯೊಬ್ಬರಿಗೂ ಕೂಡಾ ಅವರ ಪಾತ್ರದ ಹೀರೋಗಿರಿ ತಾಕಿತ್ತು. ಅವರೇ ನಿಜವಾದ ಹೀರೋ ಅಂತ ಜನ ಮಾತಾಡಿಕೊಂಡಿದ್ದರು. ಅದು ಸುಬ್ರಮಣ್ಯ ಪ್ರಸಾದ್ ಅವರ ಶ್ರಮ, ಪಡಿಪಾಟಲುಗಳಿಗೆ ಸಿಕ್ಕ ಮಹಾನ್ ಸನ್ಮಾನ!

ಸುಬ್ರಮಣ್ಯ ಪ್ರಸಾದ್ ಕಿರುತೆರೆ, ಹಿರಿತೆರೆ ಸೇರಿದಂತೆ ಬಣ್ಣದ ಜಗತ್ತಿನ ನಾನಾ ಮಗ್ಗುಲುಗಳನ್ನು ಕಂಡವರು. ಅದರ ಭಾಗವಾಗಿ ದುಡಿದವರು. ಸಾಮಾನ್ಯವಾಗಿ, ಅದೆಷ್ಟೇ ಪಳಗಿಕೊಂಡಿದ್ದರೂ ಕೂಡಾ ಅಖಾಡಕ್ಕಿಳಿದಾಗ ಚಿತ್ರರಂಗ ನಾನಾ ಥರದ ಪಾಠ ಮಾಡುತ್ತೆ. ಕೊಡೆಮುರುಗ ಚಿತ್ರದ ಸಂದರ್ಭದಲ್ಲಿ ಅಂಥಾ ಎಲ್ಲ ಪಾಠಗಳನ್ನೂ ಕೂಡಾ ಸುಬ್ರಮಣ್ಯ ಪ್ರಸಾದ್ ಮನದಟ್ಟು ಮಾಡಿಕೊಂಡಿದ್ದಾರೆ. ಅಸಲಿಗೆ ಕೊಡೆಮುರುಗ ಗೆಲ್ಲುವ ಎಲ್ಲ ಲಕ್ಷಣಗಳನ್ನೂ ಹೊಂದಿದ್ದ ಚಿತ್ರ. ಸುಬ್ರಮಣ್ಯ ಸಿದ್ಧ ಸೂತ್ರಗಳಾಚೆಗೆ, ಮನೋರಂಜನೆಯನ್ನೇ ಮುಖ್ಯವಾಗಿಟ್ಟುಕೊಂಡು ಗಂಭೀರ ಕಥೆ ಹೇಳಿದ್ದರು. ಜೊತೆಗೆ ಆ ಸಿನಿಮಾದಲ್ಲಿ ನಿರ್ದೇಶಕನ ಪಾತ್ರದಲ್ಲಿ ಹೀರೋ ಆಗಿ ನಟಿಸಿದ್ದರು. ನೋಡಿದ ಎಲ್ಲರೂ ಥ್ರಿಲ್ ಆಗಿ ಈ ಸಿನಿಮಾವನ್ನು ಒಪ್ಪಿಕೊಂಡಿದ್ದರು.

ಆದರೆ, ಅದೇಕೋ ಕೊರೋನಾ ಆಘಾತದಿಂಣದ ಕೊಡೆಮುರುಗ ತತ್ತರಿಸಿತ್ತು. ಇನ್ನೇನು ಟೇಕಾಫ್ ಆಗಬೇಕೆಂಬಷ್ಟರಲ್ಲಿ, ಬಿಡುಗಡೆಯಾದ ಮೂರೇ ದಿನಕ್ಕೆ ಲಾಕ್‍ಡೌನ್ ಹೇರಿಕೆಯಾದದ್ದರಿಂದ ಸಿನಿಮಾ ಮಂದಿರಗಳಿಂದ ಹೊರ ನಡೆಯಬೇಕಾಗಿ ಬಂದಿತ್ತು. ಅದಾಗಿ ವರ್ಷ ಕಳೆದ ಮೇಲೆ ಇತ್ತೀಚೆಗೆ ಮರು ಬಿಡುಗಡೆ ಮಾಡಿದರೂ ಹತ್ತಾರು ಕಾರಣಗಳಿಂದ ಮತ್ತೆ ಜನರನ್ನು ತಲುಪೋದು ಕೊಂಚ ಕಷ್ಟವಾಗಿತ್ತು. ಇದೆಲ್ಲದರಾಚೆಗೆ ಒಳ್ಳೆ ಚಿತ್ರವಾಗಿ ಗುರುತಿಸಿಕೊಂಡಿದ್ದ ಕೊಡೆಮುರುಗ, ಇದೀಗ ಹುಡುಕಾಡು ಅಲೆದಾಡು ಎಂಬ ಭರವಸೆ ತುಂಬುವ ಹಾಡಿನ ಮೂಲಕ ಮತ್ತೆ ಸದ್ದು ಮಾಡುತ್ತಿದೆ.

ಈ ವಿಶೇಷವಾದ ಹಾಡಿನಲ್ಲಿ ಕೊಡೆಮುರುಗ ಚಿತ್ರದ ಅಸಲೀ ಹೀರೋ ಸುಬ್ರಮಣ್ಯ ಪ್ರಸಾದ್ ನಟಿಸಿದ್ದಾರೆ. ಅವರ ನಟನೆಯ ಪ್ರತೀ ಚಹರೆಗಳಲ್ಲಿಯೂ ಹೀರೋಗಿರಿಯ ಗುಣ ಲಕ್ಷಣಗಳು ತೊನೆದಾಡುತ್ತಿವೆ. ಆ ಹಾಡನ್ನು ಖುದ್ದು ಸುಬ್ರಮಣ್ಯ ಅವರೇ ಸಾಹಿತ್ಯ ಬರೆದು ರೂಪಿಸಿದ್ದಾರೆ. ಸೋಲಿನ ಕಮರಿಯಿಂದ ಮೇಲೆದ್ದು, ಗುರಿಗಾಗಿ ಸಜ್ಜುಗೊಳಿಸುವ ತಾಕತ್ತಿರುವ ಈ ಹಾಡು, ಸಾಹಿತ್ಯ, ಸಂಗೀತ, ಮೇಕಿಂಗ್ ಸೇರಿದಂತೆ ಎಲ್ಲದರಲ್ಲಿಯೂ ಗಮನ ಸೆಳೆಯುತ್ತದೆ. ಈ ಹಾಡಿನ ಮೂಲಕ ಸುಬ್ರಮಣ್ಯ ಪ್ರಸಾದ್ ಅಕ್ಷರಶಃ ಹೀರೋ ಆಗಿ ಮಿಂಚಿದ್ದಾರೆ. ಇದಕ್ಕೀಗ ವ್ಯಾಪಕ ಮೆಚ್ಚುಗೆ, ಲಕ್ಷ ಲಕ್ಷ ವೀಕ್ಷಣೆಗಳು ಸಿಗುತ್ತಿವೆ. ಇದೇ ಖುಷಿಯಲ್ಲಿ ಕೊಡೆಮುರುಗ ನಿರ್ದೇಶಕ ಕಂ ಹೀರೋ ಸುಬ್ರಮಣ್ಯ ಪ್ರಸಾದ್ ಹೊಸಾ ಕನಸಿನತ್ತ ಹೊರಳಿಕೊಂಡಿದ್ದಾರೆ. ಅದರ ಬಗೆಗಿನ ಮಾಹಿತಿಗಳು ಶೀಘ್ರದಲ್ಲಿಯೇ ಜಾಹೀರಾಗಲಿವೆ!

The post ಹೀರೋ ಆಗಿಯೂ ಗಮನ ಸೆಳೆದರು ಸುಬ್ರಮಣ್ಯ ಪ್ರಸಾದ್! appeared first on ಶೋಧ ನ್ಯೂಸ್ - Shodha News.

ಕಳೆದ ವರ್ಷದ ಕಡೇಯ ಭಾಗದಿಂದ ಮೊದಲ್ಗೊಂಡು, ಇಲ್ಲಿಯ ವರೆಗೂ ದೊಡ್ಡ ಮಟ್ಟದಲ್ಲಿ ಸದ್ದು ಮಾಡುತ್ತಾ, ಅಡಿಗಡಿಗೆ ಪ್ರೇಕ್ಷಕರನ್ನು ಸೆಳೆಯುತ್ತಾ ಸಾಗಿ ಬಂದಿದ್ದ ಚಿತ್ರ `ಪೆಂಟಗನ್’. ಖ್ಯಾತ ನಿರ್ದೇಶಕ ಗುರು ದೇಶಪಾಂಡೆ ತಮ್ಮದೇ ಸ್ವಂತ ಬ್ಯಾನರಿನಡಿಯಲ್ಲಿ ಈ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಹೊಸತನದ ಕಥೆಗಳಿಗೆ ದೃಷ್ಯರೂಪ ಕೊಡುವ ಸದುದ್ದೇಶದೊಂದಿಗೆ ನಿರ್ಮಾಣ ಸಂಸ್ಥೆ ಆರಂಭಿಸಿದ್ದ ಗುರು ದೇಶಪಾಂಡೆ ಅವರ ಇಂಗಿತವನ್ನು ಸಾರ್ಥಕಗೊಳಿಸುವಂತೆ ಮೂಡಿ ಬಂದಿರುವ ಚಿತ್ರ `ಪೆಂಟಗನ್’. ಇದೀಗ ಈ ಚಿತ್ರದ ಪೊಗದಸ್ತಾದ ಟ್ರೈಲರ್ ಲಾಂಚ್ ಆಗಿದೆ. ನಿಗಿನಿಗಿಸುತ್ತಿದ್ದ ನಿರೀಕ್ಷೆಗಳೆಲ್ಲ ಖುಷಿಗೊಂಡು ಧಗಧಗಿಸುವಂತೆ ಮಾಡುವ ಕಂಟೆಂಟಿನ ಸುಳಿವೊಂದು, ಈ ಟ್ರೈಲರ್ ಮೂಲಕ ಸ್ಪಷ್ಟವಾಗಿಯೇ ಸಿಕ್ಕಿದೆ!

ಅದೆಂಥಾದ್ದೇ ಅಲೆಯಿರಲಿ; ಒಂದೊಳ್ಳೆ ಕಂಟೆಂಟು ಹೊಂದಿರುವ, ಪ್ರಯೋಗಾತ್ಮಕ ಗುಣಗಳಿಂದ ಮೈ ಕೈ ತುಂಬಿಕೊಂಡಿರುವ ಸಿನಿಮಾಗಳತ್ತ ಕತ್ತನಡ ಪ್ರೇಕ್ಷಕರು ಸದಾ ಕಾಲವೂ ಕಣ್ಣಿಟ್ಟಿರುತ್ತಾರೆ. ಅಂಥಾ ಚಿತ್ರಗಳನ್ನು ವಿಶೇಷವಾದ ಅಕ್ಕರಾಸ್ಥೆಗಳಿಂದ ಗೆಲ್ಲಿಸುತ್ತಾರೆ. ಈ ಮಾತಿಗೆ ಉದಾಹರಣೆಯಂಥಾ ಅದೆಷ್ಟೋ ಚಿತ್ರಗಳಿದ್ದಾವೆ. ಆ ಸಾಲಿಗೆ ಪೆಂಟಗನ್ ಕೂಡಾ ಸೇರ್ಪಡೆಗೊಳ್ಳುವಂಥಾ ಸ್ಪಷ್ಟ ಕುರುಹುಗಳು ಈ ಟ್ರೈಲರ್ ಮೂಲಕ ನಿಖರವಾಗಿಯೇ ಗೋಚರಿಸಿವೆ. ಸಾಮಾನ್ಯವಾಗಿ ಒಂದು ಸಿನಿಮಾದಲ್ಲಿ ಒಂದೇ ಕಥೆಯಿರೋದು ಮಾಮೂಲು. ಆದರೆ ಪೆಂಟಗನ್ ಐದು ಭಿನ್ನ ಕಥಾನಕಗಳ ಗುಚ್ಛ. ಆ ಐದೂ ಕಥೆಗಳನ್ನು ಕುತೂಹಲ ಮೂಡುವಂತೆ ಟ್ರೈಲರ್‍ನಲ್ಲಿ ಕಟ್ಟಿ ಕೊಡುವುದಿದೆಯಲ್ಲಾ? ಅದೊಂದು ಸಾಹಸ. ಗುರು ದೇಶಪಾಂಡೆ ಸಾರಥ್ಯದಲ್ಲಿ ಆ ಸಾಹಸವನ್ನು ಸಮರ್ಥವಾಗಿಯೇ ಮಾಡಲಾಗಿದೆ.

ಅದು ಪೆಂಟಗನ್ ಟ್ರೈಲರಿನ ನಿಜವಾದ ಸಾರ್ಥಕ್ಯ. ಇಲ್ಲಿ ಐದು ಕಥೆಗಳನ್ನು ಗುರು ದೇಶಪಾಂಡೆಯೂ ಸೇರಿದಂತೆ ಐವರು ನಿರ್ದೇಶಕರು ನಿರ್ದೇಶನ ಮಾಡಿದ್ದಾರೆ. ಆ ಕಥೆಗಳೆಲ್ಲದರ ಬಗ್ಗೆ ಈವರೆಗೆ ಸಣ್ಣ ಸಣ್ಣ ಸುಳಿವುಗಳನ್ನು ಬಿಟ್ಟು ಕೊಡಲಾಗಿತ್ತು. ಇದೀಗ ಈ ಟ್ರೈಲರಿನಲ್ಲಿ ಒಂದಕ್ಕೊಂದು ತಟಿಕೆ ಹಾಕಿಕೊಂಡಂಥಾ, ಅಗಾಧ ಪ್ರಮಾಣದಲ್ಲಿ ರೋಮಾಂಚನ ಮೂಡಿಸುವ ರೀತಿಯಲ್ಲಿ ಕಟ್ಟಿ ಕೊಡಲಾಗಿದೆ. ಈ ಮೂಲಕವೇ ಈ ಐದೂ ಕಥನಗಳು ಒಂದನ್ನೊಂದು ಮೀರಿಸುವಂತಿವೆ ಎಂಬ ನಂಬಿಕೆಯೂ ಮೂಡಿಕೊಂಡಿದೆ. ಇದರಲ್ಲಿನ ಪಾತ್ರಗಳು ಅಚ್ಚರಿ ಮೂಡಿಸುತ್ತವೆ. ಎಲ್ಲ ವರ್ಗಗಳಿಗೂ ಇಷ್ಟವಾಗುವ, ಎಲ್ಲರನ್ನೂ ಸೆಳೆಯುವ ಗುಣ ಕಥೆಯಲ್ಲಿ ಅಡಕವಾಗಿರುವ ಅಂಶ ವಿಶೇಷವಾಗಿ ಸೆಳೆಯುತ್ತದೆ.

ಒಟ್ಟಾರೆಯಾಗಿ, ಪೆಂಟಗನ್ ಕಡೆಯಿಂದ ಬಂದಿರೋದು ಈ ವರ್ಷದ ಅತ್ಯಂತ ಪ್ರಾಮಿಸಿಂಗ್ ಅನ್ನಬಹುದಾದ ಟ್ರೈಲರ್. ಇದು ಎಲ್ಲ ವರ್ಗದ ಪ್ರೇಕ್ಷಕರನ್ನೂ ಕೂಡಾ ಬೇಷರತ್ತಾಗಿ ಸಿನಿಮಾ ಮಂದಿರದತ್ತ ಸೆಳೆಯುವಷ್ಟು ಶಕ್ತವಾಗಿದೆ. ಬಿಡುಗಡೆಗೊಂಡ ಬಳಿಕ ಅತ್ಯಂತ ಕಡಿಮೆ ಅವಧಿಯಲ್ಲಿಯೇ ಹೆಚ್ಚೆಚ್ಚು ವೀಕ್ಷಣೆ, ಪ್ರೋತ್ಸಾಹದ ಮಾತುಗಳನ್ನೂ ಸಹ ಈ ಟ್ರೈಲರ್ ತನ್ನದಾಗಿಸಿಕೊಳ್ಳುತ್ತಿದೆ. ಅಂದಹಾಗೆ, ಇಲ್ಲಿನ ಐದು ಕಥೆಗಳನ್ನು ಶಿವಾಜಿ ಸುರತ್ಕಲ್ ಖ್ಯಾತಿಯ ಆಕಾಶ್ ಶ್ರೀವತ್ಸ, ಚಂದ್ರಮೋಹನ್, ರಾಘು ಶಿವಮೊಗ್ಗ, ಕಿರಣ್ ಕುಮಾರ್ ಮತ್ತು ಗುರು ದೇಶಪಾಂಡೆ ತಲಾ ಒಂದೊಂದು ಕಥಾನಕಗಳನ್ನು ನಿರ್ದೇಶನ ಮಾಡಿದ್ದಾರೆ. ಘಟಾನುಘಟಿ ಕಲಾವಿದರ ತಾರಾಂಗಣ, ಪ್ರತಿಭಾನ್ವಿತ ತಂತ್ರಜ್ಞರ ಸಾಥ್‍ನೊಂದಿಗೆ ಪೆಂಟಗನ್ ತಯಾರುಗೊಂಡಿದೆ. ಅದರ ಅಸಲೀ ಖದರ್ ಏನೆಂಬುದನ್ನು ಸದರಿ ಟ್ರೈಲರ್ ಪರಿಣಾಮಕಾರಿಯಾಗಿ ತೋರಿಸಿಕೊಟ್ಟಿದೆ!

The post ಗುರು ದೇಶಪಾಂಡೆ ಮ್ಯಾಜಿಕ್ ಮಾಡೋ ನಿಖರ ಮುನ್ಸೂಚನೆ! appeared first on ಶೋಧ ನ್ಯೂಸ್ - Shodha News.

ಹಾಸ್ಯ ನಟನಾಗಿ ಪ್ರಖ್ಯಾತಿ ಪಡೆದು, ಆ ನಂತರ ನಾಯಕ ನಟನಾಗಿಯೂ ನಗುವಿನ ಪಥದಲ್ಲಿಯೇ ಮುಂದುವರೆದಿದ್ದವರು ಕೋಮಲ್. ಒಂದಷ್ಟು ಕಾಲ ಅವರು ನೇಪಥ್ಯಕ್ಕೆ ಸರಿದಂತಾದಾಗ, ಅಪಾರ ಸಂಕ್ಯೆಯ ಪ್ರೇಕ್ಷಕರು ಕೋಮಲ್‍ರನ್ನು ಮಿಸ್ ಮಾಡಿಕೊಂಡಿದ್ದದ್ದು ನಿಜ. ಆದರೀಗ ಅವರು ಹೊಸಾ ಚೈತನ್ಯದಿಂದ ಮೈಕೊಡವಿಕೊಂಡು ಮೇಲೆದ್ದು ನಿಂತಿದ್ದಾರೆ. ಅವರು ನಟಿಸುತ್ತಿರುವ ಚಿತ್ರಗಳ ಬಗ್ಗೆ ಸುದ್ದಿಯಾಗುತ್ತಲೇ, ನಟಿಸಿಯಾಗಿರುವ ಸಿನಿಮಾಗಳೂ ಕೂಡಾ ಸಂಚಲನ ಸೃಷ್ಟಿಸುತ್ತಿವೆ. ಅದರ ಭಾಗವಾಗಿಯೇ ಇದೀಗ `ಉಂಡೆನಾಮ’ ಎಂಬ ಶೀರ್ಷಿಕೆಯ ಸಿನಿಮಾ ಕೂಡಾ ಪ್ರೇಕ್ಷಕರ ಆಸಕ್ತಿ ಕೇಂದ್ರಕ್ಕೆ ಬಂದು ನಿಂತಿದೆ. ಸದ್ದೇ ಇಲ್ಲದೆ ಚಿತ್ರೀಕರಣಗೊಂಡಿದ್ದ ಉಂಡೆನಾಮ ಇದೇ ಏಪ್ರಿಲ್ 14ರಂದು ತೆರೆಗಾಣಲಿದೆ.

ಈ ಶೀರ್ಷಿಕೆ, ಕೋಮಲ್ ಕಾಂಬಿನೇಷನ್ ಮತ್ತು ನಿರ್ದೇಶಕರ ಹಿನ್ನೆಲೆಗಳೆಲ್ಲವನ್ನೂ ಒಟ್ಟುಗೂಡಿಸಿ ನೋಡಿದರೆ, ಉಂಡೆನಾಮದ ಮೂಲಕ ಭರ್ಜರಿ ನಗುವಿನ ಹಬ್ಬದ ಮುನ್ಸೂಚನೆ ಸಿಗುತ್ತಿದೆ. ಅಂದಹಾಗೆ ಇದು ಕೆ.ಎಲ್ ರಾಜಶೇಖರ್ ಕಥೆ, ಚಿತ್ರಕಥೆ ಮತ್ತು ಸಂಭಾಷಣೆ ಬರೆದು ನಿರ್ದೇಶನ ಮಾಡಿರುವ ಚಿತ್ರ. ರಾಜಶೇಖರ್ ಸೃಜನ್ ಲೋಕೇಶ್ ಸಾರಥ್ಯದ ಮಜಾ ಟಾಕೀಸ್ ಶೋ ಮೂಲಕ ಹೆಚ್ಚು ಪ್ರಚಲಿತಕ್ಕೆ ಬಂದಿದ್ದವರು. ಆ ಶೋನ ಮೊದಲ ಸೀಜನ್ನಿನ ಇನ್ನೂರರಷ್ಟು ಎಪಿಸೋಡ್‍ಗಳಿಗೆ ಸ್ಕ್ರಿಪ್ಟ್ ಸಿದ್ಧಪಡಿಸಿದ್ದವರು ಇದೇ ರಾಜಶೇಖರ್. ಅದೇ ಶೋನಲ್ಲಿ ನಟಿಸುವ ಮೂಲಕವೂ ಅವರು ಅಪಾರ ಜನಪ್ರಿಯತೆ ಪಡೆದುಕೊಂಡಿದ್ದರು.

ಹಾಗಿದ್ದ ಮೇಲೆ ರಾಜಶೇಖರ್ ನಿರ್ದೇಶನ ಮಾಡಿರುವ ಉಂಡೆನಾಮ, ನಗುವಿನ ಪರಿಷೆಯನ್ನೇ ಸೃಷ್ಟಿಸೋದರಲ್ಲಿ ಯಾವ ಅನುಮಾನವೂ ಇಲ್ಲ. ಇತ್ತೀಚೆಗಷ್ಟೇ ಶರಣ್. ನೆನಪಿರಲಿ ಪ್ರೇಂ, ಶ್ರುತಿ, ಸಾಧು ಕೋಕಿಲಾ, ರಾಗಿಣಿ ದ್ವಿವೇದಿ ಮುಂತಾದವರು ಉಂಡೆನಾಮ ಟೈಟಲ್ ರಿವೀಲ್ ಮಾಡಿದ್ದರು. ಇನ್ನು ಹಂತ ಹಂತವಾಗಿ ಪೋಸ್ಟರ್, ಟೀಸರ್, ಟ್ರೈಲರ್ ಮತ್ತು ಹಾಡುಗಳನ್ನು ಬಿಡುಗಡೆ ಮಾಡುವ ಮೂಲಕ ಕೌತುಕದ ಕಾವೇರಿಸಲು ಚಿತ್ರತಂಡ ಅಣಿಗೊಳ್ಳುತ್ತಿದೆ. ದಶಕಗಳಿಂದೀಚೆಗೆ ಕಿರುತೆರೆಯಲ್ಲಿ ಧಾರಾವಾಹಿಗಳ ಎಪಿಸೋಡ್ ನಿರ್ದೇಶಕರಾಗಿ, ಅಮ್ಮ ಐ ಲವ್ ಯೂ, ರಾಬರ್ಟ್, ವಿಕ್ಟರಿ2, ತ್ರಿಬಲ್ ರೈಡಿಂಗ್ ಮುಂತಾದ ಚಿತ್ರಗಳಿಗೆ ಡೈಲಾಗ್ ಬರೆದು ಸೈ ಅನ್ನಿಸಿಕೊಂಡಿರುವವರು ರಾಜಶೇಖರ್. ಹಾಗಿರುವಾಗ ಉಂಡೆನಾಮದ ಬಗ್ಗೆ ಸಹಜವಾಗಿಯೇ ಕುತೂಹಲ ಮೂಡಿಕೊಳ್ಳುತ್ತೆ.

ಹಾಗಾದರೆ, ಉಂಡೆನಾಮ ಯಾವ ಥರದ ಕಥೆ ಹೊಂದಿಗೆ ಎಂಬಂಥಾ ಪ್ರಶ್ನೆ ಕಾಡೋದು ಸಹಜ. ಎರಡನೇ ಲಾಕ್‍ಡೌನ್ ಸಮಯದಲ್ಲಿ ಶುರುವಾಗಿದ್ದ ಉಂಡೆನಾಮ, ಲಾಕ್‍ಡೌನ್ ಅವಧಿಯಲ್ಲಿ ಹೀಗೆ ನಡೆದರೆ ಹೇಗೆಂಬ ಕಲ್ಪನೆಯ ಮೂಸೆಯಲ್ಲರಳಿದ ಮಜವಾದ ಕಥಾನಕವನ್ನೊಳಗೊಡಿದೆಯಂತೆ. ನಟ ಕೋಮಲ್‍ಗೆ ಇಲ್ಲಿ ಇದುವರೆಗಿನ ಅಷ್ಟೂ ಪಾತ್ರಗಳಿಗಿಂದ ಭಿನ್ನವಾದ ರೋಲ್ ಇದೆಯಂತೆ. ಅವರಿಗೆ ಉಂಡೆನಾಮದ ಮೂಲಕವೇ ಸರಿಯಾದ್ದೊಂದು ಬ್ರೇಕ್ ಸಿಗುವ ಎಲ್ಲ ಲಕ್ಷಣಗಳೂ ದಟ್ಟವಾಗಿಯೇ ಗೋಚರಿಸುತ್ತಿವೆ. ಲವಲವಿಕೆಯ ಕಥೆ, ಚೇತೋಹಾರಿ ನಿರೂಪಣೆ ಮತ್ತು ಚೆಂದದ ಪಾತ್ರಗಳೊಂದಿಗೆ ಉಂಡೆನಾಮ ಕಳೆಗಟ್ಟಿಕೊಂಡಿದೆಯೆಂಬ ಭರವಸೆ ಚಿತ್ರತಂಡದಲ್ಲಿದೆ.

ಇದು ಎನ್.ಕೆ ಸ್ಟುಡಿಯೋಸ್ ಬ್ಯಾನರಿನಡಿಯಲ್ಲಿ ಸಿ.ನಂದಕಿಶೋರ್ ನಿರ್ಮಾಣ ಮಾಡಿಕರುವ ಚಿತ್ರ. ಕೆ.ಎಲ್ ರಾಜು ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶನ ಮಾಡಿರುವ ಈ ಚಿತ್ರದಲ್ಲಿ ಕೋಮಲ್‍ಗೆ ಹರೀಶ್ ರಾಜ್, ಧನ್ಯಾ ಬಾಲಕೃಷ್ಣ, ಅಪೂರ್ವ, ತಬಲಾ ನಾಣಿ, ವೈಷ್ಣವಿ, ತನಿಷಾ ಕುಪ್ಪಂಡ, ಬ್ಯಾಂಕ್ ಜನಾರ್ಧನ್ ಮುಂತಾದವರು ನಟಿಸಿದ್ದಾರೆ. ಶ್ರೀಧರ್ ಸಂಭ್ರಮ್ ಸಂಗೀತ ನಿರ್ದೇಶನ, ನವೀನ್ ಕುಮಾರ್ ಛಾಯಾಗ್ರಹಣ, ಕೆ.ಎಂ ಪ್ರಕಾಶ್ ಸಂಕಲನವಿದೆ. ಇನ್ನೇನು ಉಂಡೆನಾಮ ಪ್ರೇಕ್ಷಕರ ಮುಂದೆ ಬರಲು ದಿನಗಣನೆ ಶುರುವಾಗಿದೆ. ಅಂತೂ ಈ ಸಿನಿಮಾದ ಬಗ್ಗೆ ತಾನೇತಾನಾಗಿ ಪ್ರೇಕ್ಷಕರ ವಲಯದಲ್ಲಿ ಚರ್ಚೆಗಳು ಶುರುವಾಗಿವೆ. ಅದುವೇ ಗಾಢ ನಿರೀಕ್ಷೆಯಾಗಿಯೂ ಹರಳುಗಟ್ಟಿಕೊಳ್ಳುತ್ತಿದೆ.

The post ಇದು ಮಜಾ ಟಾಕೀಸ್ ಖ್ಯಾತಿಯ ರಾಜಶೇಖರ್ ನಿರ್ದೇಶನದ ಚಿತ್ರ! appeared first on ಶೋಧ ನ್ಯೂಸ್ - Shodha News.

ರಾಜ್ಯದಲ್ಲೀಗ ಉರಿಗೌಡ ಮತ್ತು ನಂಜೇಗೌಡನೆಂಬ ಕಲ್ಪಿತ ವೀರರ ಕಥನಗಳು ಎಗ್ಗಿಲ್ಲದೆ ಹರಿದಾಡುತ್ತಿವೆ. ಈ ಬಗ್ಗೆ ವಾಟ್ಸಪ್ ಯುನಿರ್ಸಿಟಿಯ ಕಸುಬಿಲ್ಲದ ಸಂಶೋಧಕರೊಂದಷ್ಟು ಮಂದಿ ಎಗ್ಗಿಲ್ಲದೆ ಸಂಶೋಧನೆ ನಡೆಸುತ್ತಿದ್ದಾರೆ. ರಾಜಕೀಯ ನೆರಳಿನಲ್ಲಿ ಹಾಯಾಗಿರುವ ಮತ್ತೊಂದಷ್ಟು ಮಂದಿ, ಅದಕ್ಕೆ ಪೂರಕವಾದ ಆಕರ ವಿಚಾರಗಳನ್ನು ಹರಿಯಬಿಡುತ್ತಿದ್ದಾರೆ. ಸನ್ಮಾನ್ಯ ಸಿ.ಟಿ ರವಿಯಂತೂ ಥೇಟು ಇತಿಹಾಸ ತಜ್ಞನಂತೆ ದಿನಕ್ಕೊಂದೊಂದು ವಿಚಾರಗಳನ್ನು ಹರಿಯಬಿಡುತ್ತಿದ್ದಾರೆ. ಹೀಗೆ ಬಿಜೆಪಿ ಮಂದಿ ಚುನಾವಣಾ ದಾಳವಾಗಿಸಿಕೊಂಡಿದ್ದ ಉರಿ ಗೌಡ, ನಂಜೇಗೌಡ ಯಾರು? ಅಷ್ಟಕ್ಕೂ ಅವರು ವೀರರಾ? ಅವರಿಬ್ಬರೂ ಟಿಪ್ಪು ಸುಲ್ತಾನನನ್ನು ಕೊಂದಿದ್ದ ನಿಜವಾ? ಹೀಗೇ ನಾನಾ ದಿಕ್ಕಿನಲ್ಲಿ ಚರ್ಚೆಗಳು ಚಾಲ್ತಿಯಲ್ಲಿವೆ!

ಇದೇ ಹೊತ್ತಿನಲ್ಲಿ ಸದ್ದೇ ಇಲ್ಲದೆ ಉರಿಗೌಡ ಮತ್ತು ನಂಜೇಗೌಡನ ಇರುವಿಕೆಗೆ ಅಧಿಕೃತ ಮುದ್ರೆಯೊತ್ತಿವ ಕೆಲಸವೂ ನಡೆದಿತ್ತು; ಅವರಿಬ್ಬರ ಬಗೆಗೊಂದು ಸಿನಿಮಾ ಮಾಡುವ ತಯಾರಿಯೊಂದಿಗೆ. ಒಂದು ಕಲ್ಪಿತ ಕಥೆಯನ್ನು ನಿಜ ಇತಿಹಾಸವೆಂಬಂತೆ ಬಿಂಬಿಸುವುದು, ಆ ಮೂಲಕ ಜನಮಾನಸದಲ್ಲಿ ಸುಳ್ಳನ್ನು ಸತ್ಯವೆಂಬಂತೆ ಪ್ರತಿಷ್ಠಾಪಿಸುವುದೆಲ್ಲ ಅಕ್ಷಮ್ಯ ಅಪರಾಧ. ಆದರೆ, ಅದೇಕೋ ಈ ಬಿಜೆಪಿ ಮಂದಿ ಮಾತ್ರ ಆಗಾಗ ಕಪೋಲ ಕಲ್ಪಿತ ಸರಕುಗಳನ್ನು ಕೈಗೆತ್ತಿಕೊಳ್ಳುತ್ತಾರೆ. ಆ ಮೂಲಕ ತಮ್ಮ ಆಡಳಿತ ವೈಫಲ್ಯವನ್ನು ಬಚ್ಚಿಟ್ಟುಕೊಳ್ಳಲು ಪ್ರಯತ್ನಿಸುತ್ತಾರೆಂಬ ಆರೋಪವಿದೆ. ಆರಂಭದಲ್ಲಿ ವಿರೋಧ ಪಕ್ಷಗಳ ಅಭಿಪ್ರಾಯದಂತಿದ್ದ ಆ ಆರೋಪಗಳೀಗ, ಸಾರ್ವಜನಿಕರನ್ನೂ ಆವರಿಸಿಕೊಂಡಿದೆ.

ಚುನಾವಣೆಯ ಹೊಸ್ತಿಲಲ್ಲಿ ಬಿಜೆಪಿಯನ್ನು ಅಂಥಾದ್ದೊಂದುಬ ಸಂದಿಗ್ಧ ಸ್ಥಿತಿಗೆ ತಳ್ಳಿದ್ದರಲ್ಲಿ ಉರಿಗೌಡ ಮತ್ತು ನಂಜೇಗೌಡರ ಪಾಲು ಬೆಟ್ಟದಷ್ಟಿದೆ. ಯಾವಾಗ, ಸಿ.ಟಿ ರವಿಯೆಂಬ ಆಸಾಮಿ ಪದೇ ಪದೆ ಈ ಎರಡು ಹೆಸರುಗಳನ್ನಿಟ್ಟುಕೊಂಡು ಪುಂಗಲು ಶುರುವಿಟ್ಟರೋ, ಆಗ ಅದೊಂದು ವಿವಾದದ ಸ್ವರೂಪ ಪಡೆದುಕೊಂಡಿತ್ತು. ಚುನಾವಣೆಯ ಹಂತದಲ್ಲಿ ಉರಿಗೌಡ ಮತ್ತು ನಂಜೇಗೌಡರನ್ನು ಮತ್ತಷ್ಟು ಮುನ್ನೆಲೆಗೆ ತರುವ ಸಲುವಾಗಿಯೇ ಸಿನಿಮಾಕ್ಕೂ ತಯಾರಿ ನಡೆದಿತ್ತು. ಕುರುಕ್ಷೇತ್ರದಂಥಾ ಸಿನಿಮಾ ಮಾಡಿ ಜಯಿಸಿಕೊಂಡಿದ್ದ ಮುನಿರತ್ನ ಸಿಟಿ ರವಿಯ ಪುಂಗಿಗೆ ಮನಸಾರೆ ತಲೆದೂಗಿದ್ದರು.

ಹಾಗೆ ರವಿಯ ಪ್ರವರ ಕೇಳಿ ಬಂದವರೇ, ಉರಿಗೌಡ ಮತ್ತು ನಂಜೇಗೌಡರೆಂಬ ವೀರರ ಬಗ್ಗೆ ಸಿನಿಮಾ ಮಾಡೋದಾಗಿ ಘೋಷಣೆ ಮಾಡಿ ಬಿಟ್ಟಿದ್ದರು. ಅಷ್ಟರಲ್ಲಿ ಅವರಿಗೆ ನಿರ್ಮಲಾನಂದ ಶ್ರೀಗಳಿಂದ ಬುಲಾವು ಬಂದಿದೆ. ಹಾಗೆ ಸ್ವಾಮಿಗಳ ಮುಂದೆ ಹೋಗಿ ಕೂತ ಮುನಿತ್ನಗೆ ಜ್ಞಾನೋದಯವಾಗಿದೆ. ಯಾಕೆಂದರೆ, ನಿರ್ಮಲಾನಂದರು ಅತ್ಯಂತ ನಿಷ್ಟುರವಾಗಿ, ನ್ಯಾಯಸಮ್ಮತವಾಗಿ ಮಾತಾಡಿದ್ದಾರೆ. ಕಲ್ಪಿಸಿಕೊಂಡು ಬರೆಯೋದು ಕಾದಂಬರಿಯಾಗುತ್ತದೇ ಹೊರತು ಇಹಿತಾಸವಾಗಲಾರದೆಂಬ ಕಾಮನ್‍ಸೆನ್ಸಿನ ಪಾಠ ಮಾಡಿದ್ದಾರೆ. ಇದರೊಂದಿಗೆ ಸಿಟಿ ರವಿ ಬಿಟ್ಟಿದ್ದ ಹಾವು ಹೇಳ ಹೆಸರಿಲ್ಲದಂತೆ ಮಾಯವಾಗಿದೆ. ಹಾಗೆ ಹೊರ ಬಂದ ಮುನಿರತ್ನ, ಇನ್ನು ಮುಂದೆ ಉರಿಗೌಡ ನಂಜೇಗೌಡರ ಬಗ್ಗೆ ಸಿನಿಮಾ ಮಾಡೋದಿರಲಿ; ಆ ಹೆಸರನ್ನೂ ಎತ್ತೋದಿಲ್ಲ ಎಂಬರ್ಥದಲ್ಲಿ ಮಾತಾಡಿದ್ದಾರೆ.

ಅಲ್ಲಿಗೆ ಸುಳ್ಳನ್ನೇ ಸತ್ಯವೆಂಬಂತೆ ಒದರುತ್ತಾ ಬಂದಿದ್ದ ರವಿಗೆ ಮುಖಭಂಗವಾದಂತಾಗಿದೆ. ಅದರ ಜೊತೆಗೆ ಒಂದು ಕಂಟಕವೂ ಕಳೆದಂತಾಗಿದೆ. ಯಾಕೆಂದರೆ. ಕಾಶ್ಮೀರ್ ಫೈಲ್‍ನಂಥಾ ಸಿನಿಮಾದ ಮೂಲಕ ಒನ್‍ಸೈಡೆಡ್ ವಿಚಾರ ಮಂಡಿಸಿ, ಬಿಜೆಪಿ ಬೇಳೆ ಬೇಯಿಸಿಕೊಂಡಿದೆ ಎಂಬಂಥಾ ಆರೋಪವಿದೆ. ನಂಜೇಗೌಡ ಉರಿಗೌಡರ ವಿಚಾರದಲ್ಲಿ ಪೂರಕ ದಾಖಲೆ ಒದಗಿಸುವ ಯೋಗ್ಯತೆ ಇಲ್ಲದ ಮಂದಿ, ಸಿನಿಮಾ ಮೂಲಕ ಆ ಕಲ್ಪಿತ ಪಾತ್ರಗಳಿಗೊಂದು ಕಾಯಕಲ್ಪ ಕೊಡಲು ಮುಂದಾಗಿದ್ದರು. ಅದಕ್ಕೀಗ ನಿರ್ಮಲಾನಂದರ ಸಾನಿಧ್ಯದಲ್ಲಿ ಬ್ರೇಕ್ ಬಿದ್ದಿದೆ. ಈ ಮೂಲಕ ಬಿಜೆಪಿಗರ ಸುಳ್ಳುಗಳು ಮಂಡ್ಯ ಸೀಮೆಯ ಒಕ್ಕಲಿಗರು ಎಚ್ಚೆತ್ತುಕೊಂಡಿದ್ದಾರೆ. ಇಂಥಾ ಸುಳ್ಳಿನ ಸಾರಥ್ಯದಲ್ಲಿ ಚುನಾವಣೆ ಗೆಲ್ಲುವ ಭ್ರಮೆ ಹೊಂದಿದ್ದ ಬಿಜೆಪಿಗೆ ಹಿನ್ನಡೆಯಾಗಿದೆ. ಬಿಜೆಪಿ ಪಾಳೆಯದ ಭಯಾನಕ ಇತಿಹಾಸ ತಜ್ಞರಾದ ಸಿ.ಟಿ ರವಿ ಸಾಹೇಬರು ಅದೇಕೋ ಥಂಡಾ ಹೊಡೆದಂತಿದ್ದಾರೆ!

The post ಇದರ ಬಗ್ಗೆ ಇತಿಹಾಸ ತಜ್ಞ ಸಿ.ಟಿ ರವಿ ಏನಂತಾರೆ?! appeared first on ಶೋಧ ನ್ಯೂಸ್ - Shodha News.

ಕನ್ನಡ ಕಿರುತೆರೆ ಜಗತ್ತಿನ ಮಹತ್ವದ ಮೈಲಿಗಲ್ಲಿನಂಥಾ ಒಂದಷ್ಟು ಕಾರ್ಯಕ್ರಮಗಳಿವೆ. ಬರೀ ಟಿಆರ್‍ಪಿ ಮೇಲೆ ಕಣ್ಣಿಟ್ಟ ಕೆಲ ಕೊಳಕು ರಿಯಾಲಿಟಿ ಶೋಗಳು ಪ್ರೇಕ್ಷಕರಲ್ಲೊಂದು ರೇಜಿಗೆ ಹುಟ್ಟಿಸಿದ್ದರೆ, ಮತ್ತೆ ಕೆಲ ಕಾರ್ಯಕ್ರಮಗಳು ಪ್ರೇಕ್ಷಕರನ್ನೆಲ್ಲ ಬೇಷರತ್ತಾಗಿ ಹಿಡಿದಿಟ್ಟುಕೊಂಡಿವೆ. ಅಂಥಾ ಸಕಾರಾತ್ಮಕ ಕಾರ್ಯಕ್ರಮಗಳಲ್ಲಿ ನಿಸ್ಸಂದೇಹವಾಗಿಯೂ ವೀಕೆಂಡ್ ವಿತ್ ರಮೇಶ್ ಸೇರಿಕೊಳ್ಳುತ್ತೆ. ನಟ ರಮೇಶ್ ಆ ಕಾರ್ಯಕ್ರಮವನ್ನು ನಡೆಸಿಕೊಡುತ್ತಿರುವ ರೀತಿ, ನಾನಾ ಕ್ಷೇತ್ರಗಳ ಸಾಧಕ ಬದುಕಿನ ಪ್ರತೀ ಮಗ್ಗುಲನ್ನು ತೆರೆದಿಡವ ಪರಿಗಳೆಲ್ಲವೂ ಭಾರೀ ಜನಪ್ರಿಯತೆ ಗಳಿಸಿಕೊಂಡಿವೆ. ಒಂದು ಸುದೀರ್ಘ ಅಂತರದ ನಂತರ ವೀಕೆಂಡ್ ವಿಥ್ ರಮೇಶ್ ಮತ್ತೆ ಶುರುವಾಗುತ್ತಿದೆ.

ಇದೇ ತಿಂಗಳ ಇಪ್ಪತೈದನೇ ತಾರೀಕಿನಿಂದ ಈ ಕಾರ್ಯಕ್ರಮ ಮತ್ತೆ ಪ್ರಸಾರವಾಗಲಿದೆ. ಆ ದಿನ ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದ ಐದನೇ ಆವೃತ್ತಿಗೆ ಚಾಲನೆ ಸಿಗಲಿದೆ. ಹೀಗೆ ತಮ್ಮ ನೆಚ್ಚಿನ ಕಾರ್ಯಕ್ರಮಕ್ಕೆ ವಾರವಿವೊಂದು ಬಾಕಿ ಇರುವಾಗಲೇ ಪ್ರೇಕ್ಷಕರೆಲ್ಲರೊಳಗೂ, ಸಾಧಕರ ಸೀಟಿನಲ್ಲಿ ಯಾರ್ಯಾರು ಮಿರುಗಲಿದ್ದಾರೆ? ಈ ಸೀಜನ್ನಿನ ಮೊದಲ ಅತಿಥಿಯಾಗಿ ಯಾರು ಬರಲಿದ್ದಾರೆ ಅಂತೆಲ್ಲ ಪ್ರಶ್ನೆಗಳಿವೆ. ಈ ಹಿಂದೆ ಪ್ರಭುದೇವ ಮೊದಲ ಅತಿಥಿಯಾಗಲಿದ್ದಾರೆಂಬ ಮಾತುಗಳು ಹರಿದಾಡಿದ್ದವು. ಆದರೀಗ ಮೊದಲ ಅತಿಥಿಯಾಗಿ ಆಗಮಿಸಲಿರೋದು ಮೋಹಕ ತಾರೆ ರಮ್ಯಾ ಎಂಬ ಸುದ್ದಿ ಜಾಹೀರಾಗಿದೆ!

ಹಾಗೆ ನೋಡಿದರೆ, ಕಳೆದ ಒಂದಷ್ಟು ಸೀಜನ್ನುಗಳಲ್ಲಿಯೇ ರಮ್ಯಾ ಹೆಸರು ಕೇಳಿ ಬಂದಿತ್ತು. ಅಷ್ಟಕ್ಕೂ ದಶಕಗಳ ಕಾಲ ಚಿತ್ರರಂಗದಲ್ಲಿ ನಂಬರ್ ಒನ್ ನಟಿಯಾಗಿ ಮೆರೆದು, ಈಗಲೂ ಅದೇ ಫ್ಯಾನ್ ಬೇಸ್ ಹೊಂದಿರುವಾಕೆ ರಮ್ಯಾ. ಈ ಬಾರಿಯಂತೂ ರಾಜಕೀಯದಾಚೆ ಆಕೆ ಸಿನಿಮಾ ಕಾರಣದಿಂದ ಸುದ್ದಿಯಲ್ಲಿದ್ದಾರೆ. ಈ ಕಾರ್ಯಕ್ರಮದ ಆಯೋಜಕರು, ಸೀಜನ್ ಐದರ ಮೊದಲ ಅತಿಥಿ ಮೋಹಕ ತಾರೆ ಎಂಬ ನಿರ್ಧಾರಕ್ಕೆ ಬಂದಿದ್ದಾರೆ. ಒಂದು ಮೂಲದ ಪ್ರಕಾರ, ಅದಕ್ಕೆ ರಮ್ಯಾ ಕೂಡಾ ಗ್ರೀನ್ ಸಿಗ್ನಲ್ ಕೊಟ್ಟಾಗಿದೆ. ಹಾಗಂತ ಚಿತ್ರೀಕರಣವೂ ಮುಕ್ತಾಯಗೊಂಡಿದೆ ಅಂದುಕೊಳ್ಳಬೇಕಿಲ್ಲ. ಇದೇ ಇಪ್ಪತ್ತೊಂದರಂದು ರಮ್ಯಾ ಚಿತ್ರೀರಣದಲ್ಲಿ ಭಾಗಿಯಾಗಲಿದ್ದಾರೆ.

ಅಲ್ಲಿಗೆ ಸೀಜನ್ ಐದರ ಮೊದಲ ಅತಿಥಿಯಾಗಿ ರಮ್ಯಾ ಸಾಧಕರ ಸೀಟಿನಲ್ಲಿ ಮಿಂಚೋದು ನಿಕ್ಕಿಯಾದಂತಾಗಿದೆ. ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮ ಶುರುವಾಗಿದ್ದದ್ದು 2014ರಲ್ಲಿ. ಈ ಶೋನ ಮೊಟ್ಟಮೊದಲ ಅತಿಥಿಯಾಗಿ ಕಂಗೊಳಿಸಿದ್ದವರು ಪವರ್ ಸ್ಟಾರ್ ಪುನೀತ್ ರಾಜ್ ಕುಮಾರ್. ಆದರೆ ನಾಲಕ್ಕನೇ ಸೀಜನ್ನಿಗೆ ದಾಟಿಕೊಳ್ಳುವ ಹೊತ್ತಿಗೆಲ್ಲ, ಯೋಗ್ಯತೆ ಇಲ್ಲದ ಒಂದಷ್ಟು ಮಂದಿ ಸಾಧಕರ ಸೀಟಿನಲ್ಲಿ ಮಿಂಚಿದ್ದರೆಂಬ ಅಸಹನೆ ಪ್ರೇಕ್ಷಕರನ್ನು ಆವರಿಸಿಕೊಂಡಿತ್ತು. ರಕಿತ್ ಶೆಟ್ಟಿ, ಶ್ರೀಮುರುಳಿಯಂಥಾ ಮಹಾನ್ ಸಾಧಕರು ಆ ಸೀಟಿನಲ್ಲಿ ಕೂತು, ತಮ್ಮ ಕಲ್ಪಿತ ಕಷ್ಟದ ದಿನಗಳನ್ನು ಮೆಲುಕು ಹಾಕುತ್ತಾ, ಘನತೆ ಹೊಂದಿದ್ದ ಈ ಕಾರ್ಯಕ್ರಮಕ್ಕೊಂದು ಕಾಮಿಡಿ ಟಚ್ ಕೊಟ್ಟಿದ್ದರು. ಈ ಬಾರಿ ಅಂಥಾ ದುರಂತಗಳು ಸಂಭವಿಸದಿರಲೆಂಬುದು ಹಾರೈಕೆ!

The post ಅಭಿಮಾನಿಗಳ ಹೃದಯದಲ್ಲೀಗ ರಮ್ಯ ರೋಮಾಂಚನ! appeared first on ಶೋಧ ನ್ಯೂಸ್ - Shodha News.