ಕೇವಲ ಕನ್ನಡ ಚಿತ್ರರಂಗದ ವಿಚಾರದಲ್ಲಿ ಮಾತ್ರವಲ್ಲ; ಸಾಹಿತ್ಯಕ ವಲಯದಲ್ಲಿಯೂ ಮಹತ್ವದ್ದಾಗಿ ಗುರುತಿಸಿಕೊಂಡಿರುವ ಚಿತ್ರ (maavu bevu) `ಮಾವು ಬೇವು’. ಒಂದು ಬಗೆಯ ಚಿತ್ರಗಳ ಗುಂಗು ಹತಿರುವಾಗ, ಆ ಚೌಕಟ್ಟು ಮೀರಿದ ಚಿತ್ರವೊಂದು ತಯಾರಾಗಿದೆ ಎಂಬುದೇ ತಂಗಾಳಿ ತೀಡಿದಂಥಾ ಅನುಭೂತಿ. ಅಂಥಾದ್ದೊಂದು ದಿವ್ಯ ಭಾವವೀಗ ಸದಭಿರುಚಿಯ ಪ್ರೇಕ್ಷಕರ ಮೈ ಮನಸುಗಳನ್ನಾವರಿಸಿಕೊಂಡಿದೆ. ಅದೆಲ್ಲವೂ ಸಾಧ್ಯವಾಗಿರೋದು (suchendra prasad) ಸುಚೇಂದ್ರ ಪ್ರಸಾದ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ `ಮಾವು ಬೇವು’ ಚಿತ್ರದ ಮೂಲಕ. ಒಂದರ್ಥದಲ್ಲಿ ಇದು ಸದರಿ ಚಿತ್ರಕ್ಕೆ ಲಭಿಸಿರುವ ಆರಂಭಿಕ ಯಶವೆಂದರೂ ಅತಿಶಯವೇನಲ್ಲ. ಅಷ್ಟಕ್ಕೂ ಮಾವು ಬೇವು ಚಿತ್ರ ಆರಂಭವಾದ ರೀತಿ, ಅದಕ್ಕೆ ಕಾರಣವಾದ ಸ್ಫೂರ್ತಿ, ಅದಕ್ಕಾಗಿ ನಡೆದ ದಿಗ್ಗಜರ ಪ್ರಯತ್ನಗಳೆಲ್ಲವೂ ಸಮ್ಮೋಹಕ ಅಧ್ಯಾಯ. ಅದೆಲ್ಲವೂ ದೃಷ್ಯ ರೂಪ ಧರಿಸಿ ಸಾರ್ಥಕ್ಯಗೊಂಡಿದ್ದರಲ್ಲಿ (producer) ನಿರ್ಮಾಪಕರಾದ (s rajashekhar) ಎಸ್.ರಾಜಶೇಖರ್ ಅವರ ಪಾತ್ರ ನಿಜಕ್ಕೂ ಮಹತ್ತರವಾದದ್ದು!

ಸಿನಿಮಾ ನಿರ್ಮಾಣವೆಂಬುದೇ ಅಪ್ಪಟ ವಾಣಿಜ್ಯಕ ವ್ಯವಹಾರ. ಕಾಸು ಹಾಕಿ ದುಪ್ಪಟ್ಟಾಗಿ ವಾಪಾಸು ಪಡೆಯೋದರತ್ತಲೇ ಬಹುತೇಕರ ಕಣ್ಣು ನೆಟ್ಟಿರುತ್ತದೆ. ಬಹುಶಃ ಇಂಥಾ ಮನಃಸ್ಥಿತಿ ಮಾತ್ರವೇ ಇದ್ದಿದ್ದರೆ, ಖಂಡಿತವಾಗಿಯೂ ಕನ್ನಡ ಚಿತ್ರರಂಗ ಹೊಸತರತ್ತ ತೆರೆದುಕೊಳ್ಳಲು, ಪ್ರಯೋಗಗಳಿಗೆ ಒಡ್ಡಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಹೊಸತನ ಹೊದ್ದ, ಸಂದೇಶ ಸಾರುವ ಸದಭಿರುಚಿಯ ಸಿನಿಮಾಗಳನ್ನೇ ಗುರಿಯಾಗಿಸಿಕೊಂಡ ರಾಜಶೇಖರ್ ಥರದ ನಿರ್ಮಾಪಕರ ಬೆಂಬಲವಿಲ್ಲದೇ ಹೋಗಿದ್ದರೆ `ಮಾವು ಬೇವು’ ಚಿತ್ರ ಈ ಹಂತ ತಲುಪುವುದು ಕನಸಿನ ಮಾತಾಗುಳಿಯುತ್ತಿತ್ತು. ಎಸ್‍ಪಿ ಬಾಲಸುಬ್ರಹ್ಮಣ್ಯಂ, ಸಿ.ಅಶ್ವತ್ಥ್, ದೊಡ್ಡರಂಗೇಗೌಡರಂಥಾ ದಿಗ್ಗಜರ ಕನಸು ಕನಸಾಗಿಯೇ ಉಳಿದು ಹೋಗುತ್ತಿತ್ತು.

ಈ ಚಿತ್ರ ನಿರ್ಮಾಣದ ಪ್ರಸ್ತಾವ ಬಂದಾಗಲೇ ಅತ್ಯಂತ ಖುಷಿಯಿಂದ ನಿರ್ಮಾಣ ಮಾಡಲು ಒಪ್ಪಿಕೊಂಡಿದ್ದವರು ಎಸ್.ರಾಜಶೇಖರ್. ಆ ನಂತರದಲ್ಲಿ ಅಷ್ಟೇ ಕಕ್ಕುಲಾತಿಯಿಂದ ಸಿನಿಮಾ ನಿರ್ಮಾಣ ಮಾಡಿ ಮುಗಿಸಿದ ಧನ್ಯತಾ ಭಾವವೊಂದು ಅವರನ್ನಾವರಿಸಿಕೊಂಡಿದೆ. ಸ್ವತಃ ಉದ್ಯಮಿಯಾಗಿದ್ದರೂ, ಸಾಹಿತ್ಯ, ಸಿನಿಮಾಗಳ ಮೇಲೆ ಅತೀವ ವ್ಯಾಮೋಹ ಹೊಂದಿರುವವರು ರಾಜಶೇಖರ್. ಆ ಅಭಿರುಚಿಯಿಂದಲೇ ಮಾವು ಬೇವು ಚಿತ್ರವನ್ನು ಅವರು ಶ್ರೀ ಸಾಯಿ ಗಗನ್ ಪ್ರೊಡಕ್ಷನ್ಸ್ ಬ್ಯಾನರಿನಡಿಯಲ್ಲಿ ನಿರ್ಮಾಣ ಮಾಡಿದ್ದಾರೆ. ಸಿನಿಮಾ ವಲಯದ ಬಗ್ಗೆ ಅಪಾರವಾದ ಒಲವಿಟ್ಟುಕೊಂಡಿದ್ದ ಅವರು, 2016ರಲ್ಲಿ ಶ್ರೀ ಸಾಯಿ ಗಗನ್ ಪ್ರೊಡಕ್ಷನ್ಸ್ ಎಂಬ ನಿರ್ಮಾಣ ಸಂಸ್ಥೆಯನ್ನು ಆರಂಭಿಸಿದ್ದರು. ಅದರ ಮೂಲಕ ಚೆಂದದ ಸಿನಿಮಾಗಳನ್ನು ನಿರ್ಮಾಣ ಮಾಡಬೇಕೆಂಬ ಗುರಿ ಹೊಂದಿದ್ದ ರಾಜಶೇಖರ್ ಅವರು ಸ್ವತಂತ್ರವಾಗಿ ನಿರ್ಮಾಣ ಮಾಡಿದ್ದ ಮೊದಲ ಚಿತ್ರ `ಲೈಫ್ 360’.

ಆ ನಂತರದಲ್ಲಿ 2019ರಲ್ಲಿ `ವೈಟ್’ ಎಂಬ ಚಿತ್ರವನ್ನು ರಾಜಶೇಖರ್ ನಿರ್ಮಣ ಮಾಡಿದ್ದರು. ನೇತ್ರದಾನದ ಬಗ್ಗೆ ಮಹತ್ತರವಾದ ಅಂಶಗಳನ್ನೊಳಗೊಂಡಿದ್ದ ಈ ಚಿತ್ರಕ್ಕೆ ಐ ಬ್ಯಾಂಕ್ ಆಫ್ ಇಂಡಿಯಾ ಸಾಥ್ ಕೊಟ್ಟಿತ್ತು. ಆ ಬಳಿಕ ಅವರ ಮುಂದೆ ಬಂದಿದ್ದು ಮಾವು ಬೇವು ಸಿನಿಮಾ. ಒಟ್ಟಾರೆಯಾಗಿ ಎಲ್ಲ ಕೋನಗಳಿಂದಲೂ ಹೊಸತನ ಹೊಂದಿದ್ದ ಈ ಚಿತ್ರ ಬದುಕಿಗೆ ಹತ್ತಿರಾದ ಅಂಶಗಳನ್ನೊಳಗೊಂಡಿದೆ ಅನ್ನಿಸಿದ್ದರಿಂದಲೇ ರಾಜಶೇಖರ್ ನಿರ್ಮಾಣ ಮಾಡಲು ಮುಂದಾಗಿದ್ದರಂತೆ. ಸುಚೇಂದ್ರ ಪ್ರಸಾದ್, ಜನಪ್ರಿಯ ಗೀತೆಗಳ ಗುಚ್ಛಕ್ಕೆ ದೃಷ್ಯ ರೂಪ ಕೊಡಲು ಸಜ್ಜುಗೊಂಡಿದ್ದ ರೀತಿಯೇ ಅವರಿಗೆ ಮೆಚ್ಚುಗೆಯಾಗಿತ್ತಂತೆ. ಬದುಕಿನ ಏರಿಳಿತದ ಜೊತೆಯಲ್ಲಿಯೇ, ಮೌಲ್ಯಗಳನ್ನು ಪರಿಚಯಿಸುವ ಗುಣ ಹೊಂದಿರುವ ಆ ಚಿತ್ರ, ಮಹತ್ವದ ಮೈಲಿಗಲ್ಲಾಗುತ್ತದೆಂಬ ನಂಬಿಕೆ ಮೂಡಿದ್ದರಿಂದಲೇ ಅವರು ಬಲು ಆಸ್ಥೆಯಿಂದ ನಿರ್ಮಾಣ ಮಾಡಿದ್ದಾರೆ.

ರಾಜಶೇಖರ್ ಅವರ ಉತ್ಸಾಹ ಕಂಡು, ಸುಚೇಂದ್ರ ಪ್ರಸಾದ್ ಅವರ ಮೇಲಿನ ಗೌರವದಿಂದ ಲಹರಿ ವೇಲು ಕೂಡಾ ಈ ಚಿತ್ರಕ್ಕೆ ಸಾಥ್ ನೀಡಿದ್ದಾರೆ. ಇದು ರಾಜಶೇಖರ್ ಅವರ ಉತ್ಸಾಹ ನೂರ್ಮಡಿಸುವಂತೆ ಮಾಡಿದೆ. ಸುಚೇಂದ್ರ ಪ್ರಸಾದ್ ಅದ್ಭುತವಾದ ಕಥೆ ಸೃಷ್ಟಿಸಿ, ಅದಕ್ಕೆ ತಕ್ಕುದಾದ ಕಲಾವಿದರನ್ನು ಹುಡುಕಿ, ಒಂದಿಡೀ ಚಿತ್ರವನ್ನು ದೃಷ್ಯ ಕಾವ್ಯವಾಗಿಸಿದ ರೀತಿಯ ಬಗ್ಗೆ ರಾಜಶೇಖರ್ ಅವರಲ್ಲೊಂದು ಅಸೀಮ ಮೆಚ್ಚುಗೆ ಇದೆ. ಈ ಸಿನಿಮಾ ಮೂಲಕ ಒಂದು ಸತ್ಸಂಗವೇ ದಕ್ಕಿದ ಆತ್ಮ ತೃಪ್ತಿಯೂ ಅವರಲ್ಲಿದೆ. ಇದೆಲ್ಲದರಿಂದಾಗಿಯೇ ರಾಜಶೇಖರ್ ಅವರು ತಮ್ಮ ತಂದೆಯ ಹುಟ್ಟುಹಬ್ಬವಾದ ಏಪ್ರಿಲ್ ಇಪ್ಪತ್ತೊಂದರಂದೇ ಈ ಸಿನಿಮಾವನ್ನು ತೆರೆಗಾಣಿಸಲು ತೀರ್ಮಾನಿಸಿದ್ದಾರೆ. ಅದು ಮಾವು ಬೇವು ಚಿತ್ರದ ಬಗ್ಗೆ ಅವರಲ್ಲಿರುವ ಪ್ರೀತಿಗೊಂದು ಉದಾಹರಣೆಯಷ್ಟೇ.

ಮೂಲತಃ ಬೆಂಗಳೂರಿನವರೇ ಆಗಿರುವ ಎಸ್. ರಾಜಶೇಖರ್ ಪ್ರೌಢ ಶಿಕ್ಷಣವನ್ನು ನ್ಯಾಷನಲ್ ಹೈಸ್ಕೂಲಿನಲ್ಲಿ ಮುಗಿಸಿಕೊಂಡು, ವಿಜಯಾ ಕಾಲೇಜಿನಲ್ಲಿ ಕಾಮರ್ಸ್ ವಿಷಯದಲ್ಲಿ ಡಿಗ್ರಿಯನ್ನು ಡಿಸ್ಟಿಂಕ್ಷನಿನಲ್ಲಿ ಪಾಸು ಮಾಡಿಕೊಂಡಿದ್ದ ಪ್ರತಿಭಾವಂತ. ಆ ನಂತರದ ದಿನಗಳಲ್ಲಿ ಬದುಕಿನ ಪಥದಲ್ಲಿ ಗಂಭೀರವಾಗಿ ಹೆಜ್ಜೆಯಿಡುತ್ತಾ ಸಾಗಿ ಬಂದಿದ್ದ ಅವರು, ಕಷ್ಟಪಟ್ಟು ಬದುಕು ಕಟ್ಟಿಕೊಂಡಿದ್ದಾರೆ. 2014ರಲ್ಲಿ ವಿಜಯಾ  ವಾಣಿಜ್ಯ ಅಲ್ಮಿಯ ಫೌಂಡರ್ ಟ್ರಸ್ಟಿಯಾಗಿ ಕಾರ್ಯ ನಿರ್ವಹಿಸಿ, ಸಹಪಾಠಿಗಳ ಪ್ರೀತಿಯ ಒತ್ತಾಸೆಯ ಫಲವಾಗಿ ಆರು ವರ್ಷಗಳ ಕಾಲ ಕಾರ್ಯನಿರ್ವಹಿಸಿದ್ದರು. ಆ ನಂತರದಲ್ಲಿ ಎರಡು ವರ್ಷಗಳ ಕಾಲ ಫಾಸ್ಟ್ ಪ್ರೆಸಿಡೆಂಟ್ ಆಗಿಯೂ ಜವಾಬ್ದಾರಿ ನಿಭಾಯಿಸಿದ್ದರು. ಈ ಅವಧಿಯಲ್ಲಿ ನಾನಾ ಬಗೆಯ ಸಾರ್ಥಕ ಕ್ಷಣಗಳನ್ನು ತಮ್ಮದಾಗಿಸಿಕೊಂಡ ತುಂಬ ಖುಷಿ ರಾಜಶೇಖರ್ ಅವರಲ್ಲಿದೆ. ಇದೆಲ್ಲದರ ಜೊತೆಗೆಹಲವಾರು ವಿದ್ಯಾ ಸಂಸ್ಥೆಗಳ ಟ್ರಸ್ಟಿಯಾಗಿ, ಅಧ್ಯಕ್ಷರಾಗಿ ಅಕ್ಷರ ಸೇವೆಯನ್ನೂ ಮಾಡುತ್ತಾ ಬಂದಿರುವ ರಾಜಶೇಖರ್, ತಮ್ಮ ತಾಯಿಯ ಹೆಸರಿನಲ್ಲೇ ಸರ್ವಮಂಗಲ ಚಾರಿಟಬಲ್ ಎಂಬ ಫ್ಯಾಮಿಲಿ ಟ್ರಸ್ಟ್ ಅನ್ನೂ ಮುನ್ನಡೆಸುತ್ತಿದ್ದಾರೆ. ಈ ಮೂಲಕ ಅನೇಕ ಸಮಾಜಮುಖಿ ಕೆಲಸ ಕಾರ್ಯಗಳಲ್ಲಿಯೂ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ.

ಹೀಗೆ ರತಿಯೊಂಉ ವಿಚಾರದಲ್ಲಿಯೂ ಭಿನ್ನವಾಗಿ ಕಾಣಿಸುವ ರಾಜಶೇಖರ್, ನಿಸ್ಸಂದೇಹವಾಗಿಯೂ ಕನ್ನಡ ಚಿತ್ರರಂಗಕ್ಕೆ ಹೊಸಾ ದಿಕ್ಕು ತೋರುವ ಕಸುವಿರುವ ನಿರ್ಮಾಪಕರು. ಅವರೊಳಗೆ ವ್ಯವಹಾರದಾಚೆಗಿನ ಸಿನಿಮಾ ಪ್ರೇಮವೊಂದು ಪ್ರವಹಿಸದೇ ಇದ್ದಿದ್ದರೆ ಈವತ್ತಿಗೆ ಮಾವು ಬೇವು ಇತ್ರ ಮೈ ಕೈ ತುಂಬಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಈ ಸಿನಿಮಾ ಬಿಡುಗಡೆಯಾದ ನಂತರವೂ ಮತ್ತೊಂದಷ್ಟು ಒಳ್ಳೆ ಕಂಟೆಂಟಿನ ಸಿನಿಮಾಗಳನ್ನು ನಿರ್ಮಾಣ ಮಾಡಬೇಕೆಂಬ ಮಹದಾಸೆ ರಾಜಶೇಖರ್ ಅವರಲ್ಲಿದೆ. ನಿರ್ಮಾಣದ ವಿಚಾರದಲ್ಲಿ ಅತ್ಯಂತ ಶಿಸ್ತು ರೂಢಿಸಿಕೊಂಡಿರುವ ಅವರು, ಇನ್ನು ಮುಂದೆ ಎರಡು ವರ್ಷಕ್ಕೊಂದಾದರೂ ಸಿನಿಮಾ ನಿರ್ಮಾಣ ಮಾಡುವ ಗುರಿ ಹೊಂದಿದ್ದಾರೆ. ಅವರ ಕಡೆಯಿಂದ ಇನ್ನೊಂದಷ್ಟು ಸಿನಿಮಾಗಳ ನಿರ್ಮಾಣವಾಗಲಿ, ದೊಡ್ಡ ಮಟ್ಟದಲ್ಲಿ ಯಶ ಕಾಣಲೆಂಬುದು ಹಾರೈಕೆ!

The post life story: ಸದಭಿರುಚಿಯ ಚಿತ್ರಗಳೇ ರಾಜಶೇಖರ್ ಅವರ ಪ್ರಧಾನ ಆಧ್ಯತೆ! appeared first on ಶೋಧ ನ್ಯೂಸ್ - Shodha News.

ಕಡಲ ತೀರದ ಭಾರ್ಗವ ಚಿತ್ರ ತೆರೆಗಾಣಲು ಕ್ಷಣಗಣನೆ ಆರಂಭವಾಗಿದೆ. ಒಂದಿಡೀ ಚಿತ್ರತಂಡದ ಪರಿಶ್ರಮ ಸಾರ್ಥಕಗೊಳ್ಳುವ ಘಳಿಗೆಯೂ ಹತ್ತಿರಾಗುತ್ತಿದೆ. ಈ ಹೊತ್ತಿನಲ್ಲಿ ಕಡಲ ತೀರದ ಭಾರ್ಗವನ ಒಡಲಲ್ಲಿರಬಹುದಾದ ಕಥೆಗಳು, ಆ ಬಿಂದುವಿನಿಂದ ಗರಿಗೆದರಿಕೊಳ್ಳಲಿರೋ ಪಾತ್ರಗಳ ಸುತ್ತಾ ಒಂದಷ್ಟು ಚರ್ಚೆಗಳಾಗುತ್ತಿವೆ. ಐದು ಬಹುಮುಖ್ಯ ಪಾತ್ರಗಳ ಸುತ್ತ ಸುತ್ತುವ, ರೋಚಕ ತಿರುವುಗಳನ್ನು ಹೊಂದಿರುವ ಈ ಸಿನಿಮಾದಲ್ಲಿ ರಂಗಭೂಮಿಯಲ್ಲಿ ಹದಗೊಂಡಿರುವ ಅಪರೂಪದ ಪ್ರತಿಭೆ ರಾಘವ್ ನಾಗರಾಜ್ ಕೂಡಾ ಒಂದು ಪಾತ್ರವಾಗಿದ್ದಾರೆ. ಆ ಪಾತ್ರವೇ ತನ್ನ ವೃತ್ತಿ ಬದುಕಿಗೆ ಹೊಸಾ ದಿಕ್ಕು ತೋರಲಿದೆಯೆಂಬಂಥಾ ಗಾಢ ನಂಬುಗೆಯೂ ಅವರಲ್ಲಿದೆ.

ಇದು ಪನ್ನಗ ಸೋಮಶೇಖರ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚಿತ್ರ. ಈಗಾಗಲೇ ಟೀಸರ್, ಟ್ರೈಲರ್ ಮೂಲಕ ಇದರ ಕಸುವೇನೆಂಬುದರ ಸ್ಪಷ್ಟ ಸೂಚನೆಗಳು ಸಿಕ್ಕಿವೆ. ಅದರ ಮೂಲಕವೇ ಒಂದಷ್ಟು ಪಾತ್ರಗಳ ಚಹರೆಗಳೂ ಗೋಚರಿಸಿವೆ. ಅದರಲ್ಲಿ ರಾಘವ್ ನಾಗರಾಜ್ ನಟಿಸಿರುವ ಪಾತ್ರವೂ ಸೇರಿಕೊಂಡಿದೆ. ಈಗಾಗಲೇ ಹಲವಾರು ಸೀರಿಯಲ್ಲುಗಳಲ್ಲಿ ನಟಿಸಿ, ನಾಯಕರಾಗಿಯೂ ನೆಲೆ ಕಂಡುಕೊಳ್ಳುವ ಸನ್ನಾಹದಲ್ಲಿರುವವರು ರಾಘವ್. ಸಾಮಾನ್ಯವಾಗಿ, ರಂಗಭೂಮಿಯ ಹಿನ್ನೆಲೆಯಿಂದ ಬಂದವರಿಗೆ ಎಂಥಾ ಪಾತ್ರವನ್ನಾದರೂ ಆವಾಹಿಸಿಕೊಳ್ಳುವ ಸಾಮಥ್ರ್ಯ ದಕ್ಕಿರುತ್ತದೆಂಬ ನಂಬಿಕೆ ಇದೆ. ಅಂಥಾ ರಂಗಭೂಮಿಯ ಸಾಹಚರ್ಯವನ್ನೇ ತನ್ನ ನಟನೆಯ ಶಕ್ತಿಯಾಗಿಸಿಕೊಂಡವರು ರಾಘವ್ ನಾಗರಾಜ್!

ಇದೊಂದು ಸೈಕಾಲಾಜಿಕಲ್ ಥ್ರಿಲ್ಲರ್ ಕಥಾನಕವನ್ನೊಳಗೊಂಡಿರುವ ಚಿತ್ರ. ನಿಮಗೆಲ್ಲ ಗೊತ್ತಿಲ್ಲದಿರುವಂಥಾದ್ದೇನಲ್ಲ; ಈ ಮನಸಿಗೆ ಸಂಬಂಧಿಸಿದ ವ್ಯಾಧಿಗಳು ಅಕ್ಷರಶಃ ಸಮುದ್ರವಿದ್ದಂತೆ. ಅಂಥಾ ಸಮುದ್ರದಾಳಕ್ಕೆ ಇಳಿದು, ಎಲ್ಲರಿಗೂ ಹೊಸತೆನ್ನಿಸುವ ಅಚ್ಚರಿಗಳೊಂದಿಗೆ ನಿರ್ದೇಶಕರು ಈ ಸಿನಿಮಾದ ಕಥೆ ಹೆಣೆದಿದ್ದಾರೆ. ಹಾಗಿರುವಾಗ, ಅದರ ಪಾತ್ರಗಳೂ ಕೂಡಾ ವಿಶೇಷವಾಗಿರದಿರಲು ಸಾಧ್ಯವೇ? ರಾಘವ್ ನಿರ್ವಹಿಸುವ ಪಾತ್ರವೂ ನಾನಾ ಶೇಡುಗಳನ್ನು, ನಿಗೂಢಗಳನ್ನು ಒಂದಿದೆಯಂತೆ. ಪ್ರತೀ ಪಾತ್ರಗಳೂ ಸವಾಲಿನದ್ದಾಗಿರಬೇಕೆಂಬ ಇಂಗಿತವೊಂದು ರಾಘವ್‍ರೊಳಗಿತ್ತಲ್ಲಾ? ಅದಕ್ಕೆ ಸಿಕ್ಕಿದ ವರದಂಥಾ ಅಂಶಗಳನ್ನು ಸದರಿ ಪಾತ್ರ ಒಳಗೊಂಡಿದೆಯಂತೆ. ಮೂರು ಭಿನ್ನ ಶೇಡುಗಳ ಈ ಪಾತ್ರವನ್ನು ಜೀವಿಸಿ ನಟಿಸಿದ ಆತ್ಮತೃಪ್ತಿ ರಾಘವ್‍ರಲ್ಲಿದೆ.

ಹೀಗೆ ಕಡಲ ತೀರದ ಭಾರ್ಗವನ ಭಾಗವಾಗಿರುವ ರಾಘವ್ ನಾಗರಾಜ್ ಮೂಲತಃ ಮಲೆನಾಡಿನ ಹೆಬ್ಬಾಗಿಲಿನಂಥಾ ಶಿವಮೊಗ್ಗೆಯ ಆಯನೂರಿನವರು. ಅಲ್ಲಿ ಹುಟ್ಟಿ ಬೆಂಗಳೂರಿನೇ ಬೆಳೆದಿದ್ದರೂ ಊರ ಕಡೆಗಿನ ನಂಟನ್ನು ಇನ್ನೂ ಕಾಪಿಟ್ಟುಕೊಂಡಿರುವವರು. ಶಾಲಾ ಕಾಲೇಜು ದಿನಗಳಲ್ಲಿಯೇ ಸಾಂಸ್ಕøತಿಕ ಚಟುವಟಿಕೆಗಳಲ್ಲಿ ಮುಂದಿದ್ದ ರಾಘವ್, ತಾವೇ ಬರೆದು, ನಿರ್ದೇಶನ ಮಾಡಿ ನಾನಾ ನಾಟಕಗಳಲ್ಲಿ ಅಭಿನಯಿಸುತ್ತಾ ಸಹಪಾಠಿಗಳ ನಡುವೆ ಶೈನಪ್ ಆಗಿದ್ದರು. ಹಾಗೆ ಸಾಗಿ ಬಂದು, ಓದು ಮುಗಿಸುವ ಹೊತ್ತಿಗೆಲ್ಲ ನಟನಾಗಬೇಕೆಂಬ ಗುರಿಯನ್ನೇ ನೆಚ್ಚಿಕೊಂಡಿದ್ದರು. ಹಾಗೊಂದು ಅಚಲ ನಿರ್ಧಾರ ತಳೆದ ಬಳಿಕ ಅವರಿಗೆ ಸಿಕ್ಕಿದ್ದು ರಂಗಭೂಮಿಯ ನಂಟು.

ರಂಗ ದೇಗುಲ, ನಾಟಕ ಮನೆ ಮುಂತಾದ ತಂಡಗಳಲ್ಲಿ ಸಕ್ರಿಯರಾಗಿದ್ದ ರಾಘವ್, ನಟನೆಯಲ್ಲಿ ಎಷ್ಟು ಸಾಧ್ಯವೋ ಅಷ್ಟು ಪಳಗಿಕೊಂಡಿದ್ದರು. ಆ ನಂತರ ಶುರುವಾದದ್ದು ಅವಕಾಶಗಳ ಬೇಟೆ. ಈ ಹಾದಿಯಲ್ಲಿ ಸಾಕಷ್ಟು ಕಷ್ಟ, ನಿರಾಸೆಗಳನ್ನು ಕಂಡುಂಡರೂ ಕೂಡಾ, ನಟನೆಯ ಶಕ್ತಿ ಎಂಬುದು ಅವರ ಕೈ ಹಿಡಿದಿತ್ತು. ಅದರ ಫಲವಾಗಿಯೇ ಮಾಸ್ಟರ್ ಆನಂದ್ ನಿರ್ದೇಶನದಲ್ಲಿ ಮೂಡಿ ಬರುತ್ತಿದ್ದ ಎಸ್‍ಎಸ್‍ಎಲ್‍ಸಿ ನನ್ಮಕ್ಳು ಎಂಬ ಧಾರಾವಾಹಿಯ ಪುಟ್ಟ ಪಾತ್ರವೊಂದು ಅವರಿಗೆ ಸಿಕ್ಕಿತ್ತು. ಅದರಲ್ಲಿಯೇ ಚೆಂದಗೆ ನಟಿಸುತ್ತಾ, ಗಮನ ಸೆಳೆಯುತ್ತಾ ಮುಂದುವರೆದಿದ್ದ ರಾಘವ್ ಏನಿಲ್ಲವೆಂದರೂ ಮೂವತ್ತಕ್ಕೂ ಹೆಚ್ಚ ಧಾರಾವಾಹಿಗಳಲ್ಲಿ ನಟಿಸಿ ಸೈ ಅನ್ನಿಸಿಕೊಂಡಿದ್ದಾರೆ.

ಧಾರಾವಾಹಿಯ ನಟನೆಯ ಯಾನವನ್ನೂ ಕೂಡಾ, ನಾಯಕನಾಗೋ ಹಾದಿಯ ಪಯಣವನ್ನಾಗಿ ಪರಿಗಣಿಸಿದ್ದ ರಾಘವ್, ಆ ನಂತರ ನಾಯಕ ನಟನಾಗುವ ನಿಟ್ಟಿನಲ್ಲಿ ನಿರ್ಣಾಯಕವಾಗಿ ಪ್ರಯತ್ನಿಸಲಾರಂಭಿಸಿದ್ದರು. ಕಡೆಗೂ ಶ್ರೀನಾಥ್ ವಸಿಷ್ಟ ನಿರ್ದೇಶನದ ಮಂಥನ ಎಂಬ ಚಿತ್ರದಲ್ಲಿ ನಾಯಕನ ಗೆಳೆಯನ ಪಾತ್ರ ಸಿಕ್ಕಿತ್ತು. ಆ ಚಿತ್ರದಲ್ಲಿ ದಿಲೀಪ್ ರಾಜ್ ನಾಯಕನಾಗಿ ನಟಿಸಿದ್ದರು. ಅದಾದ ಬಳಿಕ ಗೋಲ್ಡನ್ ಸ್ಟಾರ್ ಗಣೇಶ್ ನಟಿಸಿದ್ದ ಕೂಲ್ ಚಿತ್ರದಲ್ಲಿ ಪುಟ್ಟದೊಂದು ಪಾತ್ರ ಸಿಕ್ಕಿತ್ತು. ಪ್ರಜ್ವಲ್ ದೇವರಾಜ್ ನಟನೆಯ ಗೋಕುಲ ಕೃಷ್ಟ, ಭದ್ರ ಮುಂತಾದ ಚಿತ್ರಗಳಲ್ಲಿ ಒಂದಷ್ಟು ಪ್ರಾಧಾನ್ಯತೆ ಇರುವ ಪಾತ್ರಗಳೂ ರಾಘವ್‍ಗೆ ಸಿಕ್ಕಿದ್ದವು.

ನಂತರ ಗೂಳಿಹಟ್ಟಿ ಎಂಬ ಚಿತ್ರದ ಐದು ಮಂದಿ ನಾಯಕರಲ್ಲೊಬ್ಬರಾಗಿ ರಾಘವ್ ನಟಿಸಿದ್ದರು. ಡಯಾನಾ ಹೌಸ್ ಮೂಲಕ ಪೂರ್ಣ ಪ್ರಮಾಣದಲ್ಲಿ ನಾಯಕರಾಗಿದ್ದ ರಾಘವ್, ತರುವಾಯಹಫ್ತಾ ಚಿತ್ರದಲ್ಲಿಯೂ ನಾಯಕರಲ್ಲೊಬ್ಬರಾಗಿ ಕಾಣಿಸಿಕೊಂಡಿದ್ದರು. ಸದ್ಯಕ್ಕೀಗ ಐಯಾಮ್ ಪ್ರೆಗ್ನೆಂಟ್ ಎಂಬ ಚಿತ್ರದಲ್ಲಿಯೂ ರಾಘವ್ ಮುಖ್ಯ ಪಾತ್ರವೊಂದರಲ್ಲಿ ನಟಿಸಿದ್ದಾರೆ. ಈ ನಡುವೆ ತೆಲುಗು ಚಿತ್ರರಂಗಕ್ಕೂ ಎಂಟ್ರಿ ಕೊಟ್ಟು, ನಾಯಕನಾಗಿ ನಟಿಸುತ್ತಿದ್ದಾರೆ. ಆ ಚಿತ್ರದ ಚಿತ್ರೀಕರಣವೀಗ ಚಾಲ್ತಿಯಲ್ಲಿದೆ. ಇದೆಲ್ಲದರಾಚೆಗೆ ಕಡಲ ತೀರದ ಭಾರ್ಗವ ರಾಘವ್ ಬದುಕಿನ ಬಹುಮುಖ್ಯ ಚಿತ್ರ. ಅದು ಗೆಲಲುವ ಮೂಲಕ ರಾಘವ್ ಅವರಿಗೂ ಗೆಲುವಾಗಲೆಂಬುದು ಹಾರೈಕೆ!

The post ಕಡಲ ತೀರದ ಭಾರ್ಗವ ಚಿತ್ರದಲ್ಲಿದೆ ಖಡಕ್ ಪಾತ್ರ! appeared first on ಶೋಧ ನ್ಯೂಸ್ - Shodha News.

ಸದ್ಯದ ಮಟ್ಟಿಗೆ ಎಲ್ಲಾ ವರ್ಗದ ಪ್ರೇಕ್ಷಕರೊಳಗೂ ಕೌತುಕದ ಕಂದೀಲೊಂದನ್ನು ಆರದಂತೆ ಕಾಪಿಟ್ಟುಕೊಂಡಿರುವ ಚಿತ್ರ `ಕಡಲ ತೀರದ ಭಾರ್ಗವ’. ಸಾಮಾನ್ಯವಾಗಿ ಯಶಸ್ವೀ ಸಿನಿಮಾಗಳದ್ದೊಂದು ಅನೂಹ್ಯವಾದ ಹೆಜ್ಜೆ ಜಾಡಿರುತ್ತೆ. ಈ ಸಿನಿಮಾ ಸಾಗಿ ಬಂದ ಹಾದಿಯ ತುಂಬೆಲ್ಲ ಅದರ ಛಾಯೆಗಳು ದಟ್ಟವಾಗಿಯೇ ಗೋಚರಿಸುತ್ತವೆ. ಟೀಸರ್, ಟ್ರೈಲರ್ ಮೂಲಕವೇ ಕಡಲ ತೀರದ ಭಾರ್ಗವ ಹುಟ್ಟು ಹಾಕಿರೋ ಕ್ರೇಜ್ ಇದೆಯಲ್ಲಾ? ಅದು ಎಂಥವರನ್ನೂ ಬೆರಗಾಗಿಸುವಂತಿದೆ. ಈ ಎಲ್ಲ ಪಲ್ಲಟಗಳ ಹಿಂದೆ ಒಂದಿಡೀ ಚಿತ್ರತಂಡದ ಶ್ರಮವಿದೆ. ಅದರಲ್ಲಿಯೂ ವಿಶೇಷವಾಗಿ ಈ ಸಿನಿಮಾದ ನಿರ್ದೇಶಕ ಪನ್ನಗ ಸೋಮಶೇಖರ್ ಅವರದ್ದು ಸಿಂಹಪಾಲೆಂಬುದರಲ್ಲಿ ಯಾವ ಸಂದೇಹವೂ ಇಲ್ಲ!

ಈಗಾಗಲೇ ಟೀಸರ್, ಟ್ರೈಲರ್, ಹಾಡುಗಳು ಸೇರಿದಂತೆ ಒಂದಷ್ಟು ಬಗೆಯಲ್ಲಿ ಕಡಲ ತೀರದ ಭಾರ್ಗವ ಪ್ರೇಕ್ಷಕರನ್ನು ಸೋಕಿದ್ದಾನೆ. ಈ ಅಷ್ಟೂ ನಡೆಯಲ್ಲಿಯೂ ನಿರ್ದೇಶಕ ಪನ್ನಗ ಸೋಮಶೇಖರ್ ಅವರ ಜಾಣ್ಮೆ ಎದ್ದು ಕಾಣಿಸುತ್ತದೆ. ಪ್ರಚಾರದ ಸಂದರ್ಭದಲ್ಲಿ ಹೇಗೆಲ್ಲ ಮುಂದುವರೆಯಬೇಕೆಂಬುದೂ ಒಂದು ಕಲೆ. ಕೆಲ ಮಂದಿಗೆ ಒಂದಷ್ಟು ದೂರ ಸಾಗಿದ ನಂತರವೂ ಅದು ದಕ್ಕುವುದಿಲ್ಲ. ಆದರೆ, ಪನ್ನಗ ಸೋಮಶೇಖರ್ ಅದನ್ನು ಮೊದಲ ಹೆಜ್ಜೆಯಲ್ಲಿಯೇ ಸರಿಕಟ್ಟಾಗಿ ಪಳಗಿಸಿಕೊಂಡಿದ್ದಾರೆ. ನಿಸ್ಸಂದೇಹವಾಗಿಯೂ ಅದರಲ್ಲಿ ಯಶಸ್ವಿಯಾಗಿದ್ದಾರೆ.

ಇದೊಂದು ಸೈಕಾಲಾಜಿಕಲ್ ಥ್ರಿಲ್ಲರ್ ಜಾನರಿನ ಚಿತ್ರ. ಹಾಗಂತ ಸಿದ್ಧಸೂತ್ರಗಳಿಗೆ ಯಾವ ಕೋನದಿಂದಲೂ ಒಳಪಡಿಸುವಂತಿಲ್ಲ ಎಂಬುದು ಖುದ್ದು ನಿರ್ದೇಶಕರ ಅಭಿಪ್ರಾಯ. ಯಾಕೆಂದರೆ, ಪನ್ನಗ ಸೋಮಶೇಖರ್ ಅದೆಷ್ಟೋ ವರ್ಷಗಳಿಂದ ಧ್ಯಾನಿಸಿಯೇ ಈ ಕಥೆಗೆ ಜೀವ ತುಂಬಿದ್ದಾರೆ. ಬದುಕೆಂಬುದು ಎತ್ತೆತ್ತಲೋ ಹೊಯ್ದಾಡಿಸಿದರೂ, ಅನಿವಾರ್ಯತೆಗಳ ಸುಳಿಗೆ ಸಿಕ್ಕಿಸಿ ನಕ್ಕರೂ, ಕಡೆಗೂ ತಮ್ಮ ಗುರಿಯ ತೆಕ್ಕೆಗೆ ಬಿದ್ದು ನಸುನಕ್ಕವರು ಪನ್ನಗ ಸೋಮಶೇಖರ್. ಮಾಡಿದರೆ, ಪುಷ್ಕಳ ಗೆಲುವು ಕಂಡು ನೆನಪಲ್ಲುಳಿಯುವಂಥಾ ಸಿನಿಮಾವನ್ನೇ ಮಾಡಬೇಕೆಂದ ದೃಢ ನಿಶ್ಚಯವೇ ಅವರನ್ನು ಗುರಿಯ ನೇರಕ್ಕೆ ತಂದು ನಿಲ್ಲಿಸಿದೆ. ಹಂಬಲವೆಂಬುದು ಆತ್ಮದಿಂದಲೇ ಪಡಿಮೂಡಿಕೊಂಡರೆ, ಅದಕ್ಕೆ ಪೂರಕವಾದ ಪ್ರಯತ್ನ ಒಂದಿದ್ದರೆ ಖಂಡಿತವಾಗಿಯೂ ಒಂದಿಡೀ ವಾತಾವರಣವೇ ಸಾಥ್ ಕೊಡುತ್ತದೆ. ಪನ್ನಗ ಅವರ ಬದುಕಿನ ಮಜಲುಗಳನ್ನು ನೋಡಿದರೆ ಆ ಮಾತು ನಿಜವೆನ್ನಿಸುತ್ತೆ!

ಮೂಲತಃ ಬೆಂಗಳೂರಿಗರೇ ಆದ ಪನ್ನಗ ಸೋಮಶೇಖರ್, ಈ ಮಹಾ ನಗರಿಯ ಬೆರಗುಗಳು, ಧಾವಂತಗಳನ್ನೆಲ್ಲ ಹೊತ್ತುಕೊಂಡೇ ಬೆಳೆದವರು. ಶಾಲಾ ಕಾಲೇಜು ದಿನಗಳಿಂದಲೇ ಸಿನಿಮಾಗಳತ್ತ ಅತೀವ ಆಸಕ್ತಿ ಹೊಂದಿ, ಬುದ್ಧಿ ಬಲಿಯುತ್ತಲೇ ಸಿನಿಮಾ ರಂಗದಲ್ಲಿ ಏನಾದರೊಂದು ಸಾಧಿಸಬೇಕೆಂಬ ಛಲವನ್ನು ಸಾಕಿಕೊಂಡವರು ಪನ್ನಗ ಸೋಮಶೇಖರ್. ಆದರೆ, ಹೆಚ್ಚಿನ ಬಾರಿ ಎದೆಯೊಳಗೆ ಊಟೆಯೊಡೆಯೋ ಕನಸು, ಬದುಕಿನ ಅನಿವಾರ್ಯತೆಗಳ ಇಕ್ಕಳಕ್ಕೆ ಸಿಲುಕಿ ನರಳುತ್ತದೆ. ಹಾಗೆಯೇ ಓದು ಮುಗಿಸಿದ ಪನ್ನಗ ಅವರಿಗೆ ಸಿನಿಮಾ ಕನಸಿದ್ದರೂ, ಉದ್ಯೋಗ ಅರಸೋ ಸಂದರ್ಭ ಸೃಷ್ಟಿಯಾಗಿತ್ತು. ಮೂರು ವರ್ಷಗಳ ಕಾಲ ಖಾಸಗಿ ಕಂಪೆನಿಯೊಂದರಲ್ಲಿ ಕೆಲಸ ಮಾಡುತ್ತಾ, ಆ ಕಂಫರ್ಟ್ ಜೋನಿನಲ್ಲಿ ಕಳೆದು ಹೋಗಿದ್ದರೆ, ಬಹುಶಃ ಕಡಲ ತೀರದ ಭಾರ್ಗವ ಎಂಬ ಅಚ್ಚರಿಯೊಂದು ಸಾಧ್ಯವಾಗುತ್ತಿರಲಿಲ್ಲವೇನೋ…

ಎಲ್ಲವೂ ಪೂರಕವಾಗಿದ್ದರೂ ಸಿನಿಮಾ ಸೆಳೆತದಿಂದ ತಪ್ಪಿಸಿಕೊಳ್ಳಲಾಗದ ಪನ್ನಗ, ಕಡೆಗೂ ಒಂದು ದಿನ ಕೆಲಸ ಬಿಟ್ಟು ಸಿನಿಮಾದತ್ತ ಹೊರಳಿಕೊಳ್ಳುವ ಗಟ್ಟಿ ನಿರ್ಧಾರ ಮಾಡಿದ್ದರು. ಇಂಥಾ ನಿರ್ಧಾರ ತೆಗೆದುಕೊಳ್ಳುವಾಗ ಮನೆ ಮಂದಿಯ ಕಡೆಯಿಂದ ಮೊದಲು ವಿರೋಧ ವ್ಯಕ್ತವಾಗುತ್ತೆ. ಆದರೆ, ಪನ್ನಗ ಅವರ ಸಿನಿಮಾಸಕ್ತಿಯ ಬಗ್ಗೆ ಅರಿವಿದ್ದ ಪೋಶಕರು ಅವರ ನಿರ್ಧಾರವನ್ನು ಬೆಂಬಲಿಸಿದ್ದರು. ಹಾಗೆ ಕೆಲಸ ಬಿಟ್ಟು ವರ್ಷಾಂತರಗಳ ಕಾಲ ಶ್ರಮ ವಹಿಸಿ, ಫೀಲ್ಡ್ ವರ್ಕ್ ಮಾಡಿ ಕಥೆ ಸಿದ್ಧಪಡಿಸಿಕೊಂಡಾಗ ನಿರ್ಮಾಪಕರನ್ನು ಹುಡುಕೋ ಸವಾಲೆದುರಾಗಿತ್ತು. ಗಮನೀಯ ಅಂಶವೆಂದರೆ, ಈ ಸಿನಿಮಾದ ಹೀರೋ ಕಂ ನಿರ್ಮಾಪಕರುಗಳಾದ ಪಟೇಲ್ ವರುಣ್ ರಾಜ್ ಮತ್ತು ಭರತ್ ಗೌಡ ಪನ್ನಗರ ಬಾಲ್ಯ ಸ್ನೇಹಿತರು. ಆ ದೆಸೆಯಿಂದಲೇ ಪನ್ನಗ ಸಿದ್ಧಪಡಿಸಿದ್ದ ವಿಶಿಷ್ಟ ಕಥೆ ನಿರ್ಣಾಯಕ ಹಂತ ತಲುಪಿಕೊಂಡಿತ್ತು.

ಅದಾಗಲೇ ನಟರಾಗಬೇಕೆಂಬ ನಿಟ್ಟಿನಲ್ಲಿ ತಯಾರಿ ಆರಂಭಿಸಿದ್ದ ಪಟೇಲ್ ವರುಣ್ ರಾಜ್ ಹಣ ಹೂಡಲು ಮುಂದಾಗಿದ್ದರು. ಭರತ್ ಕೂಡಾ ಅದಕ್ಕೆ ಸಾಥ್ ಕೊಟ್ಟಿದ್ದರು. ಹೀಗೆ ಜೀವ ಪಡೆದ ಚಿತ್ರ ಕಡಲ ತೀರದ ಭಾರ್ಗವ. ಹಾಗಾದರೆ, ಪನ್ನಗ ಸೋಮಶೇಖರ್ ಯಾವ ಕಥೆಯೊಂದಿಗೆ ಈ ಸಿನಿಮಾವನ್ನು ರೂಪಿಸಿದ್ದಾರೆ? ಅದರ ವಿಶೇಷತೆಗಳೇನು ಎಂಬಿತ್ಯಾದಿ ಪ್ರಶ್ನೆಗಳು ಮೂಡಿಕೊಳ್ಳುವುದು ಸಹಜ. ಈ ಬಗ್ಗೆ ಅವರು ಒಂದಷ್ಟು ಇಂಟರೆಸ್ಟಿಂಗ್ ಆದ ವಿಚಾರಗಳನ್ನು ಬಿಚ್ಚಿಡುತ್ತಾರೆ. ಇದೊಂದು ಸೈಕಾಲಾಜಿಕಲ್ ಕಥಾ ಹಂದರದ ಚಿತ್ರವಾದ್ದರಿಂದ, ಎಲ್ಲೋ ಕುಳಿತು ಬರೆದು ಬಿಡುವ ಹಾಗಿರಲಿಲ್ಲ. ಅದಕ್ಕೊಂದಷ್ಟು ತಯಾರಿ, ಅಧ್ಯಯನ ಬೇಕಾಗಿತ್ತು. ವರ್ಷಗಳ ಕಾಲ ಶ್ರಮ ವಹಿಸಿ ಪನ್ನಗ ಅವರು ಅಂಥಾ ರೋಚಕ ಮಾಹಿತಿಗಳನ್ನು ಕಲೆ ಹಾಕಿದ್ದರು.

ಕಗ್ಗಲೀಪುರದ ಕಡಂಬಂಮ್ಸ್ ಆಸ್ಪತ್ರೆಗೆ ತೆರಳಿ, ಅಲ್ಲಿನ ವೈದ್ಯರನ್ನು ಭೇಟಿಯಾಗಿ ನಾನಾ ಆಯಾಮಗಳಲ್ಲಿ ಪನ್ನಗ ಚರ್ಚಿಸಿದ್ದರು. ರೋಗಿಗಳ ಮಾನಸಿಕ ಸ್ಥಿತಿಗತಿ ಮತ್ತು ವರ್ತನೆಗಳ ಬಗ್ಗೆ ವರ್ಷಾಂತರಗಳ ಕಾಲ ನಿಗಾ ಇಟ್ಟು ಅಧ್ಯಯನ ನಡೆಸಿದ್ದರಂತೆ. ಹಾಗೆ ಸಿಕ್ಕ ವಿವರಗಳು ಸದರಿ ಕಥೆಗೆ ಮತ್ತಷ್ಟು ಖದರ್ ತಂದುಕೊಟ್ಟಿದ್ದವು. ಇಂಥಾ ಅನೇಕ ವಿಚಾರಗಳಿಂದ ಸಿದ್ಧಗೊಂಡ ಈ ಕಥೆ ಸುಲಭಕ್ಕೆ ಕಲ್ಪನೆಗಳ ನಿಲುಕಿಗೆ ಸಿಗುವಂಥಾದ್ದಲ್ಲ. ಇಲ್ಲಿ ನಾನಾ ನಮೂನೆಗಳ ಮಾನಸಿಕ ಖಾಯಿಲೆಗಳಿದ್ದಾವೆ. ಮನಸಿಗಾದ ಗಾಯಗಳಿಗೆ ಮದ್ದು ಕೊಡೋ ಪ್ರಯತ್ನಗಳೂ ಸದಾ ಚಾಲ್ತಿಯಲ್ಲಿದೆ. ಅಂಥಾ ಊಹಾತೀತ ತುಮುಲಗಳು, ಭಾವನೆಯ ತಾಕಲಾಟಗಳು ಈ ಸಿನಿಮಾದಲ್ಲಿ ಅಡಕವಾಗಿವೆಯಂತೆ.

ಅಂದಹಾಗೆ, ಆರಂಭದಿಂದಲೇ ಕಡಲ ತೀರದ ಭಾರ್ಗವ ಎಂಬ ಶೀರ್ಷಿಕೆಯನ್ನೇ ಏಕೆ ನಿಕ್ಕಿ ಮಾಡಲಾಗಿದೆ ಅಂತೊಂದು ಪ್ರಶ್ನೆ ಪ್ರೇಕ್ಷಕರನ್ನೆಲ್ಲ ಬಿಟ್ಟೂಬಿಡದಂತೆಕಾಡಿತ್ತು. ಈ ಬಗ್ಗೆ ನಿರ್ದೇಶಕರು ನಿಖರವಾಗಿಯೇ ಸ್ಪಷ್ಟೀಕರಣ ನೀಡುತ್ತಾರೆ. ನಾಯಕ ಕಡಲ ತಡಿಯವನು ಅನ್ನುವ ಕಾರಣವನ್ನೂ ಮೀರಿಸುವ ಮತ್ತೊಂದು ಮಾಯೆ ಈ ಶೀರ್ಷಿಕೆಯ ಹಿಂದಿದೆ. ಸಾಮಾನ್ಯವಾಗಿ ಮನಸನ್ನು ಕಡಲಿಗೆ ಹೋಲಿಸಲಾಗುತ್ತೆ. ಯಾಕೆಂದರೆ, ಅಲ್ಲಿ ಏಳುವ ಅಲೆಗಳನ್ನು ಲೆಕ್ಕವಿಡಲಾಗೋದಿಲ್ಲ. ಅದರ ಮೂಲಕ್ಕೆ ಹೋದವರಿಲ್ಲ; ನಿಗೂಢಗಳಿಗೆ ಕಣ್ಣಾದವರಿಲ್ಲ. ಆದರೂ ನಿಖರವಾಗಿ ಅದೆಲ್ಲವನ್ನೂ ಗ್ರಹಿಸೋದು ಕಷ್ಟಸಾಧ್ಯ. ಹೀಗೆ ಕಡಲಿಗೂ ಮನಸಿಗೂ ಸಂಬಂಧವಿರೋದರಿಂದಲೇ ಈ ಸಿನಿಮಾಗೆ ಸದರಿ ಶೀರ್ಷಿಕೆಯನ್ನಿಡಲಾಗಿದೆಯಂತೆ. ಸಾಕಷ್ಟು ವೈಶಿಷ್ಟ್ಯಗಳನ್ನು ಒಡಲಲ್ಲಿಟ್ಟುಕೊಂಡಿರುವ, ಈಗಾಗಲೇ ಸಾಕಷ್ಟು ನಿರೀಕ್ಷೆ ಹುಟ್ಟು ಹಾಕಿರುವ ಕಡಲ ತೀರದ ಭಾರ್ಗವ ಈ ವಾರ ಅಂದರೆ ಮಾರ್ಚ್ 3ರಂದು ತೆರೆಗಾಣಲಿದೆ!

The post ಅಷ್ಟಕ್ಕೂ ಕಡಲ ತೀರದ ಭಾರ್ಗವ ಚಿತ್ರದ ಅಸಲೀ ಕಥೆಯೇನು? appeared first on ಶೋಧ ನ್ಯೂಸ್ - Shodha News.

ಒಮ್ಮೊಮ್ಮೆ ಯಾವುದೋ ಸಿನಿಮಾದ ಸಣ್ಣ ತುಣುಕಿನಲ್ಲಿ ಹಣಕಿ ಹಾಕುವ ಪಾತ್ರದ ಚಹರೆಗಳು ಮನಸಲ್ಲುಳಿದು ಬಿಡುತ್ತವೆ. ಅಂಥಾದ್ದೊಂದು ಪವಾಡ ಸಂಭವಿಸುವುದು ತುಸು ಅಪರೂಪವಾದರೂ, ಹಾಗೆ ಮನ ಸೆಳೆದ ಪಾತ್ರದ ರೂವಾರಿಯಾದ ನಟರು ಯಶಸ್ವಿಯಾಗುತ್ತಾರೆಂಬುದರಲ್ಲಿ ಸಂದೇಹವೇನಿಲ್ಲ. ಕಡಲ ತೀರದ ಭಾರ್ಗವ ಚಿತ್ರದ ವಿಚಾರದಲ್ಲಿ ಹೇಳೋದಾದರೆ ಟೀಸರ್ ಮತ್ತು ಟ್ರೈಲರ್‍ನಲ್ಲಿ ಕಂಡಿರುವ ಅದೊಂದು ರಗಡ್ ಲುಕ್ಕಿನ ಪಾತ್ರ ಎಲ್ಲರ ಕುತೂಹಲದ ಕೇಂದ್ರಬಿಂದುವಾಗಿ ಬಿಟ್ಟಿದೆ. ಆ ಪಾತ್ರವನ್ನು ಆವಾಹಿಸಿಕೊಂಡು ನಟಿಸಿರುವವರು ವರುಣ್ ರಾಜ್. ವಿಶೇಷವೆಂದರೆ, ಹೀಗೆ ನಟನಾಗಿ ಸಂಚಲನ ಸೃಷ್ಟಿಸೋ ಸೂಚನೆ ಕೊಟ್ಟಿರುವ ವರುಣ್ ಈ ಸಿನಿಮಾಮಾದ ನಿರ್ಮಾಪಕರೂ ಹೌದು!

ಸಿನಿಮಾ ನಿರ್ಮಾಣವೆಂಬುದು ಕೂಡಾ ಒಂದು ಕಲೆ. ಅದನ್ನು ಒಲಿಸಿಕೊಳ್ಳಬೇಕೆಂದರೆ ಸಾಕಷ್ಟು ಕಸರತ್ತುಗಳನ್ನು ನಡೆಸಬೇಕಾಗುತ್ತದೆ. ಅಂಥಾದ್ದರಲ್ಲಿ ನಿರ್ಮಾಣದ ಜೊತೆಗೆ, ನಾಯಕರಲ್ಲೊಬ್ಬರಾಗಿಯೂ ನಟಿಸೋದೆಂದರೆ ಅದು ಸಲೀಸಿನ ಸಂಗತಿಯೇನಲ್ಲ. ಒಂದು ವೇಳೆ ಅಂಥಾ ಸಾಹಸಕ್ಕಿಳಿದರೆ, ಎರಡು ದೋಣಿಗೆ ಕಾಲಿಟ್ಟು ಸರಿದೂಗಿಸಿಕೊಂಡು ಸಾಗುವ ಸವಾಲೆದುರಾಗುತ್ತೆ. ಈ ನಿಟ್ಟಿನಲ್ಲಿ ಹೇಳುವುದಾದರೆ, ನಿರ್ಮಾಣ ಕಾರ್ಯದಲ್ಲಿ ಗಣನೀಯವಾಗಿ ಕಾರ್ಯನಿರ್ವಹಿಸಿರುವ ವರುಣ್ ಎಲ್ಲವನ್ನೂ ಬಹು ಜಾಣ್ಮೆಯಿಂದಲೇ ನಿಭಾಯಿಸಿದ್ದಾರೆ. ಈ ವಿಚಾರದಲ್ಲಿ ಖುದ್ದು ಚಿತ್ರತಂಡದಲ್ಲಿಯೇ ಅಚ್ಚರಿ ಮೂಡಿಸಿದ್ದಾರೆ.

ಪನ್ನಗ ಸೋಮಶೇಖರ್ ನಿರ್ದೇಶನದಲ್ಲಿ ಮೂಡಿ ಬಂದಿರುವ ಚಿತ್ರ ಕಡಲ ತೀರದ ಭಾರ್ಗವ. ಟೀಸರ್, ಟ್ರೈಲರ್ ಮತ್ತು ಹಾಡುಗಳಿಂದಲೇ ಈ ಸಿನಿಮಾ ಹುಟ್ಟು ಹಾಕಿರುವ ಕ್ರೇಜ್ ನಿಜಕ್ಕೂ ಸಮ್ಮೋಹಕವಾದದ್ದು. ಈ ಮೂಲಕವೇ ಗಾಢವಾದ ಭರವಸೆ, ನಿರೀಕ್ಷೆಗಳನ್ನು ಮೂಡಿಸುವಲ್ಲಿ ಚಿತ್ರತಂಡ ಗೆದ್ದಿದೆ. ಹಾಗೆ ಹೊರ ಬಂದಿರುವ ಟೀಸರ್, ಟ್ರೈಲರ್‍ಗಳಲ್ಲಿ ಘನ ಗಂಭೀರವಾದ, ರಗಡ್ ಲುಕ್ಕಿನ ವರುಣ್ ಅವರ ಪಾತ್ರ ಕಂಡು ಸಿನಿಮಾ ಪ್ರೇಮಿಗಳೆಲ್ಲ ಥ್ರಿಲ್ ಆಗಿದ್ದಾರೆ. ಇದರೊಂದಿಗೆ ಕನ್ನಡ ಚಿತ್ರರಂಗಕ್ಕೆ ಖಡಕ್ ನಟನೊಬ್ಬನ ಆಗಮನವಾಗಲಿದೆ ಎಂಬ ನಂಬಿಕೆ ಬಹುತೇಕರಲ್ಲಿ ಮೂಡಿಕೊಂಡಿದೆ. ಹಾಗಂತ ಇಂಥಾದ್ದೊಂದು ಸಕಾರಾತ್ಮಕ ವಾತಾವರಣವೇನು ಏಕಾಏಕಿ ಸೃಷ್ಟಿಯಾಗಿರುವುದಲ್ಲ. ಅದರ ಹಿಂದೆ ವರುಣ್ ಅವರ ಅಗಾಧ ಪರಿಶ್ರಮವಿದೆ. ಬದುಕು ಎತ್ತೆತ್ತ ಹೊಯ್ದಾಡಿದರೂ ಅವಡುಗಚ್ಚಿ ಕಂಡ ಸಿನಿಮಾ ಕನಸು, ಅದಕ್ಕಾಗಿ ಪಟ್ಟ ಪರಿಶ್ರಮವೆಲ್ಲ ನಿಜಕ್ಕೂ ಸ್ಫೂರ್ತಿಯಂತೆಯೇ ಭಾಸವಾಗುತ್ತೆ!

ಬೆಂಗಳೂರಿನ ಸಾರಕ್ಕಿ ಪ್ರದೇಶದಲ್ಲಿ ಹುಟ್ಟಿ ಬೆಳೆದ ವರುಣ್ ಅಪ್ಪಟ ಬೆಂಗಳೂರಿನ ಹುಡುಗ. ಬುದ್ಧಿ ಬಲಿಯುತ್ತಲೇ ಓದಿಗಿಂತಲೂ ಹೆಚ್ಚಾಗಿ, ಸ್ವತಂತ್ರವಾಗಿ ನೆಲೆ ಕಂಡುಕೊಳ್ಳಬೇಕೆಂಬ ತುಡಿತವೇ ವರುಣ್‍ರನ್ನು ಆವರಿಸಿಕೊಂಡಿತ್ತು. ಹೈಸ್ಕೂಲು ತಲುಪೋ ಹೊತ್ತಿಗೆಲ್ಲ ಅವರನ್ನು ಸಿನಿಮಾ ವ್ಯಾಮೋಹವೆಂಬುದು ಅಪಾದಮಸ್ತಕ ಆವರಿಸಿಕೊಂಡಿತ್ತು. ನಂತರದಲ್ಲಿ ಬದುಕಿಗಾಗಿ ಬ್ಯುಸಿನೆಸ್ ನಡೆಸಿ, ಆ ನಂತರ ನಟನಾಗಿ ನೆಲೆ ಕಂಡುಕೊಳ್ಳಬೇಕೆಂಬ ದೃಢ ನಿರ್ಧಾರ ಆ ದಿನಗಳಲ್ಲಿಯೇ ವರುಣ್‍ರ ಮನಸಲ್ಲಿ ಆಳವಾಗಿ ಬೇರೂರಿಕೊಂಡಿತ್ತು. ಓದಿನ ಬಗ್ಗೆ ಅಷ್ಟೇನೂ ಆಸಕ್ತಿ ಇರದಿದ್ದ ಅವರು, ಪಿಯುಸಿಗೆಲ್ಲ ವಿದ್ಯಾಭ್ಯಾಸಕ್ಕೆ ಗುಡ್ ಬೈ ಹೇಳಿ ಬ್ಯುಸಿನೆಸ್‍ನತ್ತ ಹೊರಳಿಕೊಂಡಿದ್ದರು.

ಅಲ್ಲಿಂದಾಚೆಗೆ ದುಡಿಮೆಯ ಹಾದಿಯಲ್ಲಿ ಸಾಕಷ್ಟು ಏಳುಬೀಳುಗಳನ್ನು ಕಂಡು, ಅವುಡುಗಚ್ಚಿ ಗೆದ್ದ ವರುಣ್ ಪಾಲಿಗೆ ಆ ನಂತರದ ಏಕಮಾತ್ರ ಗುರಿಯಾಗಿದ್ದದ್ದು ನಟನಾಗೋದು ಮಾತ್ರ. ಯಾರೇ ಆದರೂ, ಎದೆಯೊಳಗೆ ಕನಸೊಂದು ಪ್ರಾಮಾಣಿಕವಾಗಿದ್ದರೆ, ಅದಕ್ಕಾಗಿ ಅದೆಂಥಾ ರಿಸ್ಕು ತೆಗೆದುಕೊಳ್ಳಲೂ ಸಿದ್ಧ ಎಂಬಂಥಾ ಛಾತಿ ಇದ್ದರೆ ವಾತಾವರಣವೆಂಬುದು ತಾನೇತಾನಾಗಿ ಅನುಕೂಲಕರ ಸನ್ನಿವೇಷಗಳನ್ನು ಸೃಷ್ಟಿಸಿ ಬಿಡುತ್ತದೆ. ವರುಣ್ ಅವರ ವಿಚಾರದಲ್ಲಿಯೂ ಈ ಮಾತು ಅಕ್ಷರಶಃ ಸತ್ಯ. ಯಾಕೆಂದರೆ, ಸಿನಿಮಾ ಕನಸು ಕಟ್ಟಿಕೊಂಡಿದ್ದ ಅವರಿಗೆ ಸಮಾನ ಮನಸ್ಕ ಗೆಳೆಯರೇ ಜೊತೆಗೂಡಿದ್ದರು. ಈ ಸಿನಿಮಾ ನಿರ್ದೇಶಕರಾದ ಪನ್ನಗ ಸೋಮಶೇಖರ್ ಹಾಗೂ ಭರತ್ ಗೌಡ ವರುಣ್‍ರ ಸ್ನೇಹ ವಲಯವನ್ನು ಪ್ರವೇಶಿಸಿದ್ದರು. ಈ ಸ್ನೇಹಿತರ ಗುಂಪು ಸದಾ ಕಾಲವೂ ಸಿನಿಮಾವನ್ನೇ ಧಯಾನಿಸಿದ್ದರ ಫಲವಾಗಿಯೇ ಈವತ್ತಿಗೆ ಕಡಲ ತೀರದ ಭಾರ್ಗವ ಬಿಡುಗಡೆಗೆ ಸಜ್ಜಾಗಿ ನಿಂತಿದೆ!

ನಿಂತಲ್ಲಿ ಕುಂತಲ್ಲಿ ಸಿನಿಮಾವನ್ನೇ ಕನವರಿಸುತ್ತಿದ್ದ, ನಟನಾಗಬೇಕೆಂದು ಹಂಬಲಿಸುತ್ತಿದ್ದ ವರುಣ್‍ಗೆ, ನಿರ್ದೇಶಕನಾಗಬೇಕೆಂಬ ಹಂಬಲ ಹೊಂದಿದ್ದ ಪನ್ನಗ ಸೋಮಶೇಖರ್ ಸಾಥ್ ಕೊಟ್ಟಿದ್ದರು. ಪನ್ನಗ ಒಂದೊಳ್ಳೆ ಕಥೆ ರೆಡಿ ಮಾಡಿಕೊಂಡು ಕಿರುಚಿತ್ರವೊಂದನ್ನು ನಿರ್ದೇಶನ ಮಾಡಿದ್ದರು. ವರುಣ್ ಅದರ ನಾಯಕನಾಗಿ ನಟಿಸಿದ್ದರು. ಆದರೆ, ಆ ನಂತರದಲ್ಲಿ ಎಲ್ಲರ ಬದುಕೂ ಅನಿವಾರ್ಯತೆಗಳ ತಿರುವಿಗೆ ಸಿಕ್ಕಿದ್ದರಿಂದಾಗಿ ಕೆಲ ಕಾಲ ಸಿನಿಮಾ ಪ್ರಯತ್ನಗಳಿಗೆ ಬ್ರೇಕ್ ಬಿದ್ದಂತಾಗಿತ್ತು. ಆದರೆ ವರುಣ್‍ರ ಪ್ರಯತ್ನ ಮಾತ್ರ ಸದಾ ಚಾಲ್ತಿಯಲ್ಲಿತ್ತು. ವರ್ಷಾಂತರಗಳ ನಂತರ ಮತ್ತೆ ಪನ್ನಗ, ಭರತ್ ಮತ್ತು ವರುಣ್ ಸಿನಿಮಾ ತಯಾರು ಮಾಡಬೇಕೆಂಬ ದೃಢ ನಿರ್ಧಾರಕ್ಕೆ ಬಂದಿದ್ದರು. ಆದರೆ, ನಿರ್ಮಾಪಕರ ಸಮಸ್ಯೆ ಎದುರಾದಾಗ, ತಾವೇ ಹಣ ಹೂಡುವ ಧೈರ್ಯ ಪ್ರದರ್ಶಿಸಿದ್ದವರು ವರುಣ್.

ಆ ಧೈರ್ಯಕ್ಕೆ ಸಾಥ್ ಕೊಟ್ಟಿದ್ದೇ ಕಡಲ ತೀರದ ಭಾರ್ಗವವನಿಗೆ ಚಾಲನೆ ಸಿಕ್ಕಿತ್ತು. ಹೀಗೆ ಈ ಸಿನಿಮಾ ಆರಂಭವಾಗುವ ಮುನ್ನ ಕಥೆಯೊಂದು ರೆಡಿಯಾಗಿತ್ತಲ್ಲಾ? ಆ ಕಾಲದಲ್ಲಿ ವರುಣ್‍ಗೆ ನಿಕ್ಕಿಯಾಗಿದ್ದ ಪಾತ್ರ ಪುಟ್ಟದಾಗಿತ್ತು. ಆ ನಂತರದಲ್ಲಿ ಆ ಪಾತ್ರದ ಚಹರೆಗಳು ತಂತಾನೇ ಬದಲಾದವು. ಬರ ಬರುತ್ತಾ ನುರಿತ ನಟರನ್ನು ಬಿಟ್ಟರೆ ಮತ್ಯಾರೂ ಅದನ್ನು ನಿಭಾಯಿಸೋದು ಕಷ್ಟವೆಂಬಂತೆ ಅದು ತೂಕ ಪಡೆದುಕೊಂಡಿತ್ತು. ಸ್ವತಃ ವರುಣ್ ಪಾಲಿಗೂ ಕೂಡಾ ಅದೊಂದು ಸವಾಲಿನಂತೆಯೇ ಎದುರುಗೊಂಡಿತ್ತು. ವರುಣ್ ಬಲು ಇಷ್ಟಪಟ್ಟೇ ಅದನ್ನು ಆವಾಹಿಸಿಕೊಂಡಿದ್ದರು. ಚಿತ್ರತಂಡದ ತುಂಬು ಸಹಕಾರದಿಂದ ಅದಕ್ಕೆ ಸಾಕಷ್ಟು ತಯಾರಿಯನ್ನೂ ಮಾಡಿಕೊಂಡಿದ್ದರು.

ಈ ಚಿತ್ರದಲ್ಲಿ ವರುಣ್ ನಿರ್ವಹಿಸಿರುವ ಪಾತ್ರ ವಿಶಿಷ್ಟವಾದದ್ದು. ಅದರ ಹೆಸರೂ ಕೂಡಾ ವಿಶೇಷವಾಗಿದೆ. ಅಗಾಧ ಪ್ರಮಾಣದ ಫೈಟ್ ಸನ್ನಿವೇಶಗಳೂ ಇದ್ದುದರಿಂದ ವರುಣ್ ಸಾಕಷ್ಟು ತಾಲೀಮು ನಡೆಸಿದ್ದರು. ಹೀಗೆ ಪ್ರತೀ ಹಂತದಲ್ಲಿಯೂ ಕಲಿಯುತ್ತಾ, ತಯಾರಿ ನಡೆಸುತ್ತಾ ಶ್ರದ್ಧೆಯಿಂದ ಜೀವ ತುಂಬಿರುವ ಅವರಿಗೆ, ಸದರಿ ಪಾತ್ರ ತನ್ನ ಕನಸಿಗೊಂದು ದಿಕ್ಕು ತೋರಲಿದೆ ಎಂಬ ನಂಬಿಕೆ ಇದೆ. ಪ್ರೇಕ್ಷಕರು ತಮ್ಮನ್ನು ಆ ಪಾತ್ರದ ಹೆಸರಿನಿಂದಲೇ ಕರೆದು ಗುರುತಿಸುವ ಮಟ್ಟಕ್ಕೆ ಆ ಪಾತ್ರದ ಕಿಮ್ಮತ್ತಿದೆ ಎಂಬಂಥಾ ಧನ್ಯತಾ ಭಾವವೂ ವರುಣ್‍ರೊಳಗಿದೆ. ಯಾವ ದೊಡ್ಡ, ಕಮರ್ಶಿಯಲ್ ಸಿನಿಮಾಗಳಿಗೂ ಕಡಿಮೆಯಿಲ್ಲದಂಥಾ ಮಾಸ್ ಸೀನುಗಳನ್ನು ಹೊಂದಿರೋ ಈ ಸಿನಿಮಾ ಗೆದ್ದೇ ಗೆಲ್ಲುತ್ತದೆಂಬ ನಂಬಿಕೆಯೂ ಅವರಲ್ಲಿದೆ. ಈಗಾಗಲೇ ಈ ಪಾತ್ರ ವರುಣ್ ಪಾಲಿಗೆ ಸಕಾರಾತ್ಮಕ ವಾತಾವರಣ ಸೃಷ್ಟಿಸಿದೆ. ಅದಾಗಲೇ ಅವರು ಮತ್ತೊಂದು ಚಿತ್ರದಲ್ಲಿ ನಾಯಕನಾಗಿ ನಟಿಸುತ್ತಿದ್ದಾರೆ. ವರುಣ್ ಅವರ ಇಂಗಿತದಂತೆಯೇ ದೊಡ್ಡ ಗೆಲುವಿನ ರೂವಾರಿಯಾಗಲಿ. ಕಡಲ ತೀರದ ಭಾರ್ಗವ ದೊಡ್ಡ ಮಟ್ಟದಲ್ಲಿ ಗೆದ್ದು ಬೀಗುವಂತಾಗಲೆಂಬುದು ಹಾರೈಕೆ…

The post ಇದು ವರುಣ್ ರಾಜ್ ಬಗೆಗಿನ ಅಚ್ಚರಿಯ ಕಥೆ! appeared first on ಶೋಧ ನ್ಯೂಸ್ - Shodha News.

ಭರತ್ ನಟನೆ ಕಂಡು ಅಚ್ಚರಿಗೀಡಾಗಿದ್ದರು ಅಪ್ಪು!
ಸಿನಿಮಾ ಎಂಬ ಮಾಯೆಯ ಸೆಳೆತವೇ ಅಂಥಾದ್ದು. ನಿಜವಾಗಿಯೂ ಎದೆಯೊಳಗೆ ಕಲೆಯ ಬಗ್ಗೆ ಆಸಕ್ತಿ ಅಂತೊಂದಿದ್ದರೆ, ಅದು ಅದೆಷ್ಟು ಗಾವುದ ದೂರದಲ್ಲಿದ್ದರೂ ಬರಸೆಳೆದು ಅಪ್ಪಿಕೊಳ್ಳುತ್ತೆ. ನಿಜವಾದ ಪ್ರತಿಭೆ, ಪರಿಶ್ರಮವಿದ್ದರಂತೂ ಕೊಂಚ ಕಾಡಿಸಿಕೊಂಡಾದರೂ ಗೆಲುವೆಂಬುದು ನಿಕ್ಕಿ. ನೀವೊಮ್ಮೆ ಕನ್ನಡ ಚಿತ್ರರಂಗದತ್ತ ಸೂಕ್ಷ್ಮವಾಗೊಮ್ಮೆ ಕಣ್ಣು ಹಾಯಿಸಿದರೂ ಈ ಮಾತುಗಳು ನಿಜವೆನ್ನಿಸುತ್ತೆ. ಅಂಥಾದ್ದೊಂದು ಮಾಯಕ ಅಸ್ತಿತ್ವದಲ್ಲಿಲ್ಲದೇ ಹೋಗಿದ್ದರೆ, ಅದೆಷ್ಟೋ ಪ್ರತಿಭೆಗಳು ಬದುಕಿನ ಯಾವುದೋ ಜಂಜಾಟದಲ್ಲಿ ಕಳೇದುಹೋಗಿ ಬಿಡುವ ಅಪಾಯವಿತ್ತು. ಇದೀಗ ಬಿಡುಗಡೆಗೆ ಸಜ್ಜಾಗಿ ನಿಂತಿರುವ `ಕಡಲ ತೀರದ ಭಾರ್ಗವ’ ಚಿತ್ರದ ನಿರ್ಮಾಪಕ ಕಂ ನಾಯಕ ಭರತ್ ಗೌಡರ ಬದುಕಿನ ಹಾದಿಯತ್ತ ಒಮ್ಮೆ ಕಣ್ಣು ಹಾಯಿಸಿದರೆ, ನಿಮಗೂ ಕೂಡಾ ಮೇಲ್ಕಂಡ ಮಾತುಗಳಿಗೊಂದು ಹೊಸಾ ಪುರಾವೆ ಸಿಕ್ಕಂತೆ ಭಾಸವಾದೀತು!

ಭರತ್ ಗೌಡ ಎಂಬ ಹೆಸರು ಈಗಾಗಲೇ ಚಿತ್ರರಂಗದಲ್ಲಿ ಮೆಲುವಾಗಿ ಸಂಚಲನ ಶುರುವಿಟ್ಟುಕೊಂಡಿದೆ. ಟೀಸರ್ ಮತ್ತು ಟ್ರೈಲರ್ ಮೂಲಕವೇ ಭರತ್ ಅಂಥಾದ್ದೊಂದು ಭರವಸೆಯನ್ನು ಸಿನಿಮಾ ಪ್ರೇಮಿಗಳಲ್ಲಿ ಪ್ರತಿಷ್ಟಾಪಿಸಿದ್ದಾರೆ. ಸಿನಿಮಾ ಅಂದಮೇಲೆ ಒಂದೊಂದು ಜವಾಬ್ದಾರಿಗಳನ್ನು ನಿಭಾಯಿಸೋದೇ ಕಷ್ಟ. ಅಂಥಾದ್ದರಲ್ಲಿ ನಿರ್ಮಾಣದೊಂದಿಗೆ, ನಾಯಕ ನಟನಾಗಿಯೂ ನಟಿಸೋದಿದೆಯಲ್ಲಾ? ಅದೊಂದು ಸಾಹಸ. ಅದನ್ನು ತುಸು ಪ್ರಯಾಸವೆನಿಸಿದರೂ ಲೀಲಾಜಾಲವಾಗಿ ಜಯಿಸಿಕೊಂಡ ಖುಷಿ ಭರತ್‍ರಲ್ಲಿದೆ. ಪ್ರಚಾರದ ಪಟ್ಟುಗಳನ್ನು ಅನುಸರಿಸದಿದ್ದರೂ ಕೂಡಾ, ತಾನೇ ತಾನಾಗಿ ಈ ಸಿನಿಮಾ ಜನಮಾನಸವನ್ನು ತಲುಪಿಕೊಂಡ ರೀತಿಯ ಬಗ್ಗೆ ಅವರಲ್ಲೊಂದು ಬೆರಗು ಬೆರೆತ ಖುಷಿಯಿದೆ. ಅದು ಒಂದಿಡೀ ಚಿತ್ರತಂಡದಲ್ಲೂ ಪ್ರತಿಫಲಿಸುತ್ತಿದೆ.

ಚಿಕ್ಕಮಗಳೂರಿನ ಮಲ್ಲೇನಹಳ್ಳಿ ಸೀಮೆಯ ರೈತಾಪಿ ಕುಟುಂಬದಿಂದ ಬಂದವರು ಭರತ್ ಗೌಡ. ಹುಟ್ಟಿದೂರು, ಮಂಗಳೂರು ಅಂತೆಲ್ಲ ವ್ಯಾಸಂಗ ಮುಗಿಸಿಕೊಂಡಿದ್ದ ಅವರಿಗೆ, ಓದಿನ ಕಾಲದಲ್ಲಿಯೇ ವಿಪರೀತ ಸಿನಿಮಾ ವ್ಯಾಮೋಹವಿತ್ತು. ಅದರ ನಡುವೆಯೇ ಬ್ಯುಸಿನೆಸ್ ನಡೆಸಿ ಯಶಸ್ವಿಯಾಗಬೇಕೆಂಬ ಆಳವಾದ ಹಂಬಲಿಕೆಯೂ ಇತ್ತು. ಓದೆಲ್ಲ ಮುಗಿಸಿಕೊಂಡ ನಂತರ ಬೆಂಗಳೂರು ಸೇರಿಕೊಂಡು, ತಮ್ಮಿಷ್ಟದ ಬ್ಯುಸಿನೆಸ್ ಕ್ಷೇತ್ರವನ್ನು ಆರಿಸಿಕೊಂಡಿದ್ದ ಭರತ್, ಶ್ರಮ ವಹಿಸಿ ಕನಸನ್ನು ನನಸಾಗಿಸಿಕೊಂಡಿದ್ದರು. ಅವರೊಳಗೆ ಬೆಚ್ಚಗಿದ್ದ ಸಿನಿಮಾ ಕನಸು ಕೂಡಾ ಆ ಹಂತದಲ್ಲಿ ಗರಿಗೆದರಲಾರಂಭಿಸಿತ್ತು. ಸಿಕ್ಕ ಪಾತ್ರಗಳನ್ನು ಬಳಸಿಕೊಂಡು ನಟನಾಗಿ ನೆಲೆ ಕಂಡುಕೊಳ್ಳಬೇಕೆಂಬ ಇರಾದೆಯಿಂದ ಅವಕಾಶದ ಬೇಟೆಗೆ ಅಣಿಯಾಗಲಾರಂಭಿಸಿದ್ದರು.

ಕಡೆಗೂ ಕನಸುಗಾರ ರವಿಚಂದ್ರನ್ ನಟನೆಯ ದಶರಥ ಸಿನಿಮಾ ಮೂಲಕ ನಟನಾಗುವ ಭರತ್ ಕನಸಿಗೆ ಗರಿ ಮೂಡಿಕೊಂಡಿತ್ತು. ಆ ಚಿತ್ರದಲ್ಲಿ ಅವರು ಪುಟ್ಟದೊಂದು ಪಾತ್ರವನ್ನು ನಿರ್ವಹಿಸಿದ್ದರು. ಅದರಲ್ಲಿಯೇ ಚೆಂದಗೆ ನಟಿಸುವ ಮೂಲಕ ಗಮನ ಸೆಳೆಯುವಲ್ಲಿಯೂ ಯಶಸ್ವಿಯಾಗಿದ್ದರು. ಆ ಪಾತ್ರದ ದೆಸೆಯಿಂದಲೇ ಮತ್ತೊಂದಷ್ಟು ನಟನೆಯ ಅವಕಾಶಗಳೂ ಅವರತ್ತ ಸಾಗಿ ಬರಲಾರಂಭಿಸಿದ್ದವು. ಈ ನಡುವೆ ಒಂದೊಳ್ಳೆ ಕಥೆ, ತಂಡ ಸಿಕ್ಕಿದರೆ ತಾವೇ ಮುಖ್ಯಪಾತ್ರದಲ್ಲಿ ನಟಸಬೇಕೆಂಬ ಬಯಕೆಯೊಂದು ಭರತ್‍ರೊಳಗೆ ಹಬೆಯಾಡಲಾರಂಭಿಸಿತ್ತು. ಅದಾಗಲೇ ಸ್ನೇಹಿತರಾಗಿದ್ದ ನಿರ್ದೇಶಕ ಪನ್ನಗ ಸೋಮಶೇಖರ್ ಒಂದೊಳ್ಳೆ ಕಥೆ ಮಾಡಿಕೊಂಡಿದ್ದರೂ ಕೂಡಾ, ನಿರ್ಮಾಣ ಮಾಡೋರ್ಯಾರೆಂಬ ಯಕ್ಷ ಪ್ರಶ್ನೆಯೊಂದು ಆ ಸ್ನೇಹಿತರ ಬಳಗವನ್ನು ಬಹುವಾಗಿ ಕಾಡಿತ್ತು.

ನಿಮಗೆ ಗೊತ್ತಿಲ್ಲದ ವಿಚಾರವೇನಲ್ಲ; ಹೊಸಬರ ತಂಡಗಳಖು ಅದೆಂಥಾ ಕಥೆ ರೆಡಿ ಮಾಡಿಟ್ಟುಕೊಂಡರೂ ನಿರ್ಮಾಪಕರನ್ನು ಒಲಿಸಿಕೊಳ್ಳುವುದು ಕಷ್ಟ. ಅದರ ಅರಿವು ಭರತ್ ಮತ್ತವರ ಸ್ನೇಹಿತರಿಗೂ ಆಗಿತ್ತು. ಆ ನಂತರ ತಮ್ಮ ತಂಡ ಮತ್ತು ಕಥೆಯ ಕಸುವಿನ ಮೇಲೆ ನಂಬಿಕೆಯಿಟ್ಟು ಈ ಸಿನಿಮಾಗೆ ಗೆಳೆಯ ವರುಣ್ ಜೊತೆ ಸೇರಿ ತಾವೇ ಬಂಡವಾಳ ಹೂಡಲು ಭರತ್ ತೀರ್ಮಾನಿಸಿದ್ದರು. ಆ ನಂತರದಲ್ಲಿ ನಿರ್ದೇಶಕ ಪನ್ನಗ ಸೋಮಶೇಖರ್ ಕಥೆಯನ್ನು ಮತ್ತಷ್ಟು ಬಿಗಿಯಾಗಿಸಿ, ಪಾತ್ರಗಳನ್ನು ಹೊಳಪಾಗಿಸಿ ಚಿತ್ರೀಕರಣಕ್ಕಿಳಿದಿದ್ದರು. ಈ ನಡುವೆ ಆಗಾಗ ಕೊರೋನಾ ಪೀಡೆ ಅಡ್ಡಗಾಲು ಹಾಕಿದರೂ ಲೆಕ್ಕಿಸದೆ ಒಂದಿಡೀ ಚಿತ್ರದ ಚಿತ್ರೀಕರಣ ಸುಸೂತ್ರವಾಗಿ ನಡೆದಿತ್ತು. ಈ ಮೂಲಕ ಭರತ್ ಅವರ ಬಹುಕಾಲದ ಕನಸೊಂದು ದೃಷ್ಯರೂಪ ಧರಿಸಿದಂತೆ ಕಣ್ಮುಂದೆ ನಿಂತಿತ್ತು.

ಕಡಲ ತೀರದ ಭಾರ್ಗವದಲ್ಲಿ ತಮ್ಮ ಪಾತ್ರದ ಬಗ್ಗೆ ಭರತ್ ಅವರಿಗೆ ಅತೀವ ಭರವಸೆ ಇದೆ. ಯಾಕೆಂದರೆ, ವಿಶಿಷ್ಟವಾದ ಕಥಾನಕವನ್ನೊಳಗೊಂಡಿರುವ ಈ ಚಿತ್ರದಲ್ಲಿ ಭರತ್ ಅವರ ಪಾತ್ರವೂ ಭಿನ್ನವಾಗಿದೆ. ಒಂದಷ್ಟು ತಯಾರಿಯಿಲ್ಲದೆ, ಬೇರೆಯದ್ದೇ ತೆರನಾದ ತಾಲೀಮು ನಡೆಸದೆ ಅದನ್ನು ಆವಾಹಿಸಿಕೊಳ್ಳುವುದು ಕಷ್ಟವಿತ್ತು. ಆ ಪಾತ್ರದ ರೂಪುರೇಷೆಗಳನ್ನು ಅರ್ಥ ಮಾಡಿಕೊಂಡು, ಅದಕ್ಕೆ ಬೇಕಾದಂತೆ ಒಗ್ಗಿಕೊಳ್ಳುವ ಕಸರತ್ತಿಗೆ ಒಂದಷ್ಟು ತಿಂಗಳುಗಳು ಸವೆದಿದ್ದವು. ಆ ಪರಿಶ್ರಮವೆಲ್ಲವೂ ತೆರೆ ಮೇಲೆ ಸಾರ್ಥಕ್ಯ ಕಂಡಿದೆ ಎಂಬಂಥಾ ತೃಪ್ತ ಭವವೊಂದೀಗ ಭರತ್‍ರಲ್ಲಿ ನೆಲೆ ನಿಂತಿದೆ. ಸೂಕ್ಷ್ಮ ಎಳೆಗಳೊಂದಿಗೆ, ಒಳಸುಳಿಗಳೊಂದಿಗೆ ಸಾಗುವ ಈ ಸೈಕಾಲಾಜಿಕಲ್ ಥ್ರಿಲ್ಲರ್ ತನ್ನ ವೃತ್ತಿ ಬದುಕಿನ ದಿಕ್ಕು ಬದಲಾಯಿಸಲಿದೆ ಎಂಬ ತುಂಬು ನಂಬುಗೆಯೂ ಅವರಲ್ಲಿದೆ.

ವಿಶೇಷವೆಂದರೆ, ಪುನೀತ್ ರಾಜ್ ಕುಮಾರ್ ಕೂಡಾ ಭರತ್ ಅವರ ನಟನೆ ನೋಡಿ ಮೆಚ್ಚಿಕೊಂಡಿದ್ದರು. ಆ ಪಾತ್ರದ ಎನರ್ಜಿ, ಹಾವಭಾವಗಳನ್ನು ಅದು ಹೇಗೆ ಕಲಿತಿರೆಂಬಂತೆ ಅಚ್ಚರಿಯಿಂದ ಅಪ್ಪು ಪ್ರಶ್ನಿಸಿದ್ದರಂತೆ. ಭರತ್ ಪಾಲಿಗೆ ಅದೊಂದು ಪ್ರಶಸ್ತಿ ಮತ್ತು ಭರವಸೆ ಇದ್ದಂತೆ. ಅಪ್ಪು ಅಭಿಪ್ರಾಯವೇ ಈ ಸಿನಿಮಾ ನೋಡಿದ ಪ್ರತೀ ಪ್ರೇಕ್ಷಕರಲ್ಲಿಯೂ ಮೂಡಿಕೊಳ್ಳಲಿದೆ ಎಂಬ ಭರವಸೆಯೂ ಅವರಲ್ಲಿದೆ. ತಮ್ಮ ಬ್ಯುಸಿನೆಸ್, ಸಿನಿಮಾಗಳ ನಡುವೆ ಫಿಟ್ನೆಸ್‍ನತ್ತಲೂ ಪ್ರೀತಿ ಇಟ್ಟುಕೊಂಡಿರುವ ಭರತ್, ತಮ್ಮ ದೇಹವನ್ನೂ ಹೀರೋಗಿರಿಗೆ ಒಗ್ಗಿಸಿಕೊಂಡಿದ್ದಾರೆ. ಅದು ಈ ಸಿನಿಮಾದ ಮಟ್ಟಿಗೂ ಉಪಕಾರಿಯಾಗಿದೆ. ಫಿಟ್ನೆಸ್ ಕ್ಲಾಸ್‍ಗಳನ್ನೂ ನಡೆಸುತ್ತಿರುವ ಭರತ್, ವ್ಯಹಾರದಾಚೆಗೆ ದೈಹಿಕ ಕಸರತ್ತುಗಳ ಅರಿವು ಮೀಡಿಸಲು ಪ್ರಯತ್ನಿಸುತ್ತಿದ್ದಾರೆ. ಇದೆಲ್ಲದರಾಚೆಗೆ ಕಡಲ ತೀರದ ಭಾರ್ಗವ ಮೂಲಕ ಅವರ ಬದುಕು ಮುಖ್ಯ ಬಿಂದುವಿನತ್ತ ಹೊರಳಿಕೊಂಡಿದೆ. ಈ ಸಿನಿಮಾ ಇದೇ ಮಾರ್ಚ್ 3ರಂದು ರಾಜ್ಯಾದ್ಯಂತ ತೆರೆಗಾಣುತ್ತಿದೆ. ಅದು ಪ್ರೇಕ್ಷಕರಿಗೆಲ್ಲ ಹಿಡಿಸಿ ಗೆಲುವಾಗಲಿ, ಭರತ್ ನಾಯಕ ನಟನಾಗಿ ನೆಲೆ ಕಂಡುಕೊಳ್ಳಲೆಂಬುದು ಸಿನಿ ಶೋಧ ಹಾರೈಕೆ!

The post ಕಡಲ ತೀರದ ಭಾರ್ಗವ ಭರತ್ ಗೌಡ ಮನದಾಳ! appeared first on ಶೋಧ ನ್ಯೂಸ್ - Shodha News.

ಶಂಕರಣ್ಣನ ಅಭಿಮಾನಿ ಪ್ರಭಾಕರ್ ಬದುಕಿನ ಹಾದಿ…
ಶೀರ್ಷಿಕೆಯಲ್ಲಿನ ಸೆಳೆತದಿಂದಲೇ ಸಾಕಷ್ಟು ನಿರೀಕ್ಷೆ ಮೂಡಿಸಿರುವ ಚಿತ್ರ ಕೌಟಿಲ್ಯ. ಈಗಾಗಲೇ ಪ್ರೇಕ್ಷಕರನ್ನು ನಾನಾ ದಿಕ್ಕಿನಲ್ಲಿ ಸೆಳೆದಿರುವ ಈ ಸಿನಿಮಾ ನಾಳೆ ರಾಜ್ಯಾದ್ಯಂತ ತೆರೆಗಾಣುತ್ತಿದೆ. ಸ್ವಾತಂತ್ರ್ಯ ದಿನಾಚರಣೆಯ ಪ್ರಯುಕ್ತ ಬಿಡುಗಡೆಯಾಗಿದ್ದ ಈ ಚಿತ್ರದ ಟ್ರೈಲರ್ ನೋಡಿ ಬಹುತೇಕರು ಬೆರಗಾಗಿದ್ದರು. ಯಾವ ಸದ್ದುಗದ್ದಲವೂ ಇಲ್ಲದೆ ಮುಂದುವರೆದು ಬಂದು, ಬಿಡುಗಡೆಯ ಹೊಸ್ತಿಲಿನಲ್ಲಿ ನಿಂತಿದ್ದ ಈ ಚಿತ್ರ ದೊಡ್ಡ ಮಟ್ಟದಲ್ಲಿ ಟಾಕ್ ಕ್ರಿಯೇಟು ಮಾಡಿದ್ದೇ ಈ ಟ್ರೈಲರ್ ಮೂಲಕ. ಕೌಟಿಲ್ಯ ಎಂಬ ಹೆಸರೇ ಚಿತ್ರದೊಳಗೆ ಅಡಕವಾಗಿರುವ ವಿಭಿನ್ನ ಕಥೆ ಮತ್ತು ವೈಶಿಷ್ಟ್ಯಗಳಿಗೆ ಕನ್ನಡಿ ಹಿಡಿಯುವಂತಿದೆ. ಒಟ್ಟಾರೆ ಕಥೆಯ ಬಗ್ಗೆ ಯಾವೊಂದು ಸುಳಿವನ್ನೂ ಬಿಟ್ಟುಕೊಡದ ಚಿತ್ರತಂಡ ಈ ಮೂಲಕ ಕುತೂಹಲವನ್ನು ಮತ್ತಷ್ಟು ತೀವ್ರಗೊಳಿಸಿದೆ. ಹೀಗೆ ಜನಮಾನಸವನ್ನು ಸೆಳೆದಿರುವ ಕೌಟಿಲ್ಯ ಚಿತ್ರದ ಮೂಲಕವೇ ಉತ್ತರಕರ್ನಾಟಕ ಸೀಮೆಯ ಅಪ್ಪಟ ಪ್ರತಿಭೆ ಪ್ರಭಾಕರ ಶೇರಖಾನೆ ನಿರ್ದೇಶಕರಾಗಿ ಪಾದಾರ್ಪಣೆ ಮಾಡುತ್ತಿದ್ದಾರೆ.

ಈ ಚಿತ್ರದಲ್ಲಿ ಅರ್ಜುನ್ ರಮೇಶ್ ಮತ್ತು ಪ್ರಿಯಾಂಕಾ ಚಿಂಚೊಳ್ಳಿ ನಾಯಕ, ನಾಯಕಿಯರಾಗಿ ನಟಿಸಿದ್ದಾರೆ. ಉತ್ತರಕರ್ನಾಟಕದಿಂದ ಬಂದು ಈಗಾಗಲೇ ಒಂದಷ್ಟು ಸದ್ದು ಮಾಡಿರುವ ಪ್ರಿಯಾಂಕಾ ಕೂಡಾ ಈ ಚಿತ್ರದಲ್ಲಿ ವಿಭಿನ್ನ ಪಾತ್ರವೊಂದಕ್ಕೆ ಜೀವ ತುಂಬಿದ್ದಾರೆ. ಆಕೆ ಕೈಲಿ ಸಿಗರೇಟು ಹಿಡಿದು ನಿಂತಿರುವ ಪೋಸೇ ಆ ಪಾತ್ರದ ಬಗ್ಗೆ ಜನ ಕಣ್ಣಿಡುವಂತೆ ಮಾಡಿದೆ. ಇನ್ನುಳಿದಂತೆ ಶನಿ ಧಾರಾವಾಹಿಯಲ್ಲಿ ಶಿವನ ಪಾತ್ರದ ಮೂಲಕ ಅಪಾರ ಪ್ರಮಾಣದ ಪ್ರೇಕ್ಷಕರನ್ನು ಸೆಳೆದಿದ್ದ ಅರ್ಜುನ್ ರಮೇಶ್ ಇಲ್ಲಿ ನಾಯಕರಾಗಿ ನಟಿಸಿದ್ದಾರೆ. ಅವರದ್ದೂ ಕೂಡಾ ಭಿನ್ನ ಪಾತ್ರವೇ. ಇದೀಗ ತಾನೇ ಬಿಗ್‌ಬಾಸ್ ಓಟಿಟಿ ಸ್ಪರ್ಧಿಯಾಗಿ ಹೊರಬಿದ್ದಿರುವ ಅರ್ಜುನ್‌ರ ಲಕ್ಕು ಕೌಟಿಲ್ಯ ಮೂಲಕ ಕುದುರಿಕೊಳ್ಳುವ ಗಾಢವಾದ ಲಕ್ಷಣಗಳು ಗೋಚರಿಸುತ್ತಿವೆ.

ಹೀಗೆ ಹೂರಣದ ಹೊಳಹಿನ ಮೂಲಕವೇ ಈ ಚಿತ್ರವನ್ನು ಈ ಪರಿಯಾಗಿ ಲಕಲಕಿಸುವಂತೆ ಮಾಡಿರುವಲ್ಲಿ ನಿರ್ದೇಶಕರ ಪಾತ್ರ ದೊಡ್ಡದಿದೆ. ಕೌಟಿಲ್ಯ ನಿರ್ದೇಶಕ ಪ್ರಭಾಕರ ಶೇರಖಾನೆ ನಡೆದು ಬಂದ ಹಾದಿ, ಸಿನಿಮಾ ನಿರ್ದೇಶಕನಾಗಲು ಪಟ್ಟ ಪಡಿಪಾಟಲುಗಳ ಕಥೆ ಇದೆಯಲ್ಲಾ? ಅದು ಎಂಥವರನ್ನೂ ಅರೆಕ್ಷಣ ಹಿಡಿದು ನಿಲ್ಲಿಸುತ್ತದೆ. ಈ ಹೊತ್ತಿನಲ್ಲಿಯೂ ಚಿತ್ರರಂಗದಲ್ಲಿ ಮಹತ್ತರವಾದುದನ್ನು ಸಾಧಿಸಬೇಕೆಂದು ಹೊರಟಿರುವವರ ನಡಿಗೆಗೂ ವೇಗ ತುಂಬುತ್ತದೆ. ಪ್ರಭಾಕರ್‌ರ ಬದುಕಿನ ಹಾದಿ ನಿಸ್ಸಂದೇಹವಾಗಿ ಎಲ್ಲರಿಗೂ ಸಾರ್ವಕಾಲಿಕ ಸ್ಫೂರ್ತಿಯಂತಿದೆ.

ಸಾಮಾನ್ಯವಾಗಿ, ಪ್ರತೀ ವಾರವೂ ಸಾಕಷ್ಟು ಸಿನಿಮಾಗಳು ತೆರೆಗಾಣುತ್ತವೆ. ಅದರಲ್ಲಿ ಎಷ್ಟೋ ಸಿನಿಮಾಗಳು ಸಣ್ಣ ಕುರುಹೂ ಉಳಿಸದಂತೆ ಮಾಯವಾಗಿ ಬಿಡುತ್ತದೆ. ಅದ್ಯಾವುದೋ ಝಗಮಗಿಸುವ ಬಣ್ಣಗಳತ್ತ ಕಣ್ಣು ನೆಟ್ಟು ಕೂತಿರುವ ನಮಗೆಲ್ಲ, ಹಾಗೆ ಕಾಲ್ತುಳಿತಕ್ಕೊಳಗಾಗಿ ನರಳೋ ಕನಸುಗಳ ಖಬರಿರೋದಿಲ್ಲ. ಹಾಗೆ ಥೇಟರು ಸೇರಿಕೊಂಡ ಚಿತ್ರಗಳ ಹಿಂದೆ ಎಷ್ಟು ಪರಿಶ್ರಮ, ಪಡಿಪಾಟಲುಗಳಿರುತ್ತವೆಂಬ ವಿಚಾರ ನಮ್ಮನ್ನು ತಾಕುವುದೇ ಇಲ್ಲ. ಕೌಟಿಲ್ಯ ಚಿತ್ರದ ನಿರ್ದೇಶಕ ಪ್ರಭಾಕರ ಶೇರಖಾನೆಯ ಬದುಕಿನ ಪುಟಗಳನ್ನೊಮ್ಮೆ ಗಮನಿಸಿದರೆ, ನೀವು ಯಾವ ಸಿನಿಮಾಗಳನ್ನೂ ನಗಣ್ಯವಾಗಿ ಕಾಣಲು ಸಾಧ್ಯವಾಗೋದಿಲ್ಲ. ಖಂಡಿತವಾಗಿಯೂ ಒಂದೊಳ್ಳೆ ಸಿನಿಮಾ ಎಂಬ ಸೂಚನೆ ಸಿಕ್ಕಾಗಲಾದರೂ ಕುಟುಂಬ ಸಮೇತರಾಗಿ ಚಿತ್ರಮಂದಿರಕ್ಕೆ ತೆರಳುತ್ತೀರಿ, ಆ ಸಿನಿಮಾ ಉಳಿದುಕೊಳ್ಳಲು ಅಳಿಲು ಸೇವೆ ಸಲ್ಲಿಸುವ ದೊಡ್ಡ ಮನಸು ಮಾಡುತ್ತೀರಿ…

ಪ್ರಭಾಕರ ಶೇರಖಾನೆ ಉತ್ತರಕರ್ನಾಟಕ ಸೀಮೆಯ ಗೋಕಾಕ್‌ನ ನಾಗನೂರು ಎಂಬ ಪುಟ್ಟ ಹಳ್ಳಿಯಲ್ಲಿ ಹುಟ್ಟಿ ಬೆಳೆದವರು. ಅವರದ್ದು ರೈತಾಪಿ ಕುಟುಂಬ. ಸಿನಿಮಾ ಬಗ್ಗೆ ಅಲ್ಲಿಲ್ಲಿ ಕೇಳಿ, ನೋಡಿ ತಿಳಿದುಕೊಂಡಿರಬಹುದೇ ಹೊರತು, ಅದರ ಭಾಗವಾಗಬೇಕೆಂಬ ಕನಸು ಕಾಣುವ ಸ್ಥಿತಿಯೂ ಆ ಕುಟುಂಬಕ್ಕಿರಲಿಲ್ಲ. ಅಂಥಾ ಕುಟುಂಬದ ಕೂಸಾಗಿ ಹುಟ್ಟಿದ್ದ ಪ್ರಭಾಕರ್, ಆಡಿ ಬೆಳೆದದ್ದು, ಓದುವ ಮೂಲಕ ವಿಸ್ತಾರವಾದದ್ದೆಲ್ಲ ಆ ಪುಟ್ಟ ಹಳ್ಳಿಯಲ್ಲಿಯೇ. ಇಂಥಾ ಮನೆಯಲ್ಲಿ ಅದೃಷ್ಟವೆಂಬಂತೆ ಕಲೆಗೆ ಸಂಬಂಧಿಸಿದ ವಾತಾವರಣವಿತ್ತು. ಪ್ರಭಾಕರ್‌ರ ತಾತಾ ಡ್ರಾಮಾ ಕಲಾವಿದ ಹಾಗೂ ನಾಟಕದ ಮೇಸ್ಟ್ರಾಗಿದ್ದವರು. ಆದರೆ ಅದು ಮುಂದಿನ ತಲೆಮಾರಿನಲ್ಲಿ ಸಿನಿಮಾದತ್ತ ಕೈಚಾಚಿಕೊಳ್ಳುವಂಥಾ ಯಾವ ವಾತಾವರಣವೂ ಇರಲಿಲ್ಲ.

ಇಂಥಾ ಪರಿಸರದಲ್ಲಿ ಹುಟ್ಟಿ ಬೆಳೆದ ಪ್ರಭಾಕರ್ ಪಾಲಿಗೆ ಜಾನಪದ ಹಾಡುಗಳು ರಕ್ತಗತವಾಗಿಯೇ ಒಲಿದು ಬಂದಿದ್ದವು. ತಾತ ಪರಶುರಾಮ್ ನಾಟಕದ ಮೇಸ್ಟ್ರಾಗಿದ್ದುದರಿಂದಲೋ ಏನೋ, ಕಲೆ ಎಂಬುದು ಎಳವೆಯಲ್ಲಿಯೇ ಅವರನ್ನು ಎದೆಗಾನಿಸಿಕೊಂಡಿತ್ತು. ಆ ಕಾಲದಿಂದಲೇ ಅವರ ಪಾಲಿಗೆ ಶಂಕರ್ ನಾಗ್ ಎಂದರೆ ಪ್ರಾಣ. ಸಮಯ ಸಿಕ್ಕಾಗ ಮಿಸ್ ಮಾಡದೇ ಶಂಕರಣ್ಣ ಸಿನಿಮಾಗಳನ್ನು ನೋಡುತ್ತಾ, ಅವರ ಪಾತ್ರಗಳಿಂದ ಪ್ರಭಾವಿತರಾಗುತ್ತಾ ಸಾಗಿದ್ದ ಪ್ರಭಾಕರ್‌ಗೆ, ಆ ಹೊತ್ತಿನಲ್ಲಿಯೇ ನಿರ್ದೇಶಕನಾಗಬೇಕೆಂಬ ಆಸೆ ಮೊಳೆತುಕೊಂಡಿತ್ತು.

ಆ ಹಳ್ಳಿಯಲ್ಲಿಯೇ ಒಂದಷ್ಟು ಓದಿಕೊಂಡು, ಲೋಕಜ್ಞಾನ ದಕ್ಕುವ ಹೊತ್ತಿಗೆಲ್ಲ ದುಡಿದು ಸಂಸಾರದ ನೊಗ ಹೊರುವ ಜವಾಬ್ದಾರಿ ಅವರನ್ನು ಅರಸಿ ನಿಂತಿತ್ತು. ಇಂಥಾ ಹೊತ್ತಿನಲ್ಲಿ ತನ್ನ ಸಿನಿಮಾ ಕನಸಿನ ಕಥೆ ಹೇಳಿದರೆ ಮನೆಯ ದಿಕ್ಕಿನಿಂದ ಉಗಿತವಲ್ಲದೇ ಬೇರೇನೂ ಸಿಕ್ಕಲು ಸಾಧ್ಯವಿರಲಿಲ್ಲ. ಯಾರ ಬೆಂಬಲವಿಲ್ಲದಿದ್ದರೂ, ಅನಿವಾರ್ಯತೆಗಳು ಸಾವಿರವಿದ್ದರೂ ಅದೊಂದು ಘಳಿಗೆಯಲ್ಲಿ ಪ್ರಭಾಕರ್ ತನ್ನ ಬದುಕೇನಿದ್ದರೂ ಚಿತ್ರರಂಗಕ್ಕೇ ಸೀಮಿತವೆಂಬಂತೆ ದೃಡ ಸಂಕಲ್ಪ ಮಾಡಿಕೊಂಡಿದ್ದರು. ಆದರೆ ತಾನು ನಿರ್ದೇಶಕನಾಗಲೇ ಬೇಕೆಂಬ ಅಚಲ ಸಂಕಲ್ಪ ಮಾಡಿಕೊಂಡಿದ್ದರು. ಅಂಥಾ ಗುರಿಯೊಂದನ್ನು ಗಟ್ಟಿಯಾಗಿಸಿಕೊಂಡು ಉತ್ತರ ಕರ್ನಾಟದಿಂದ ಬೆಂಗಳೂರಿಗೆ ಹೊರಡಲನುವಾದ ಪ್ರಭಾಕರ್‌ಗೆ ಐಟಿ ಸಿಟಿಯಲ್ಲಿ ಉಳಿಯುವಂಥಾ ಯಾವ ಸೌಕರ್ಯವೂ ಇರಲಿಲ್ಲ.

ಹಾಗೆ ಸಿನಿಮಾ ಕನಸು ಹೊತ್ತು ಬೆಂಗಳೂರಿಗೆ ಬಂದಿಳಿದ ನಂತರದಲ್ಲಿ ಬದುಕೆಂಬುದು ಪ್ರಭಾಕರ್ ಪಾಲಿಗೆ ರೌರವ ನರಕ ತೋರಿಸಿತ್ತು. ಊರ ಕಡೆಯಿಂದ ಅದಾಗಲೇ ಬೆಂಗಳೂರು ಸೇರಿಕೊಂಡಿದ್ದವರನ್ನು ಸಂಪರ್ಕಿಸಿ, ರಿಕ್ವೆಸ್ಟ್ ಮಾಡಿಕೊಂಡು ರೂಮಲ್ಲುಳಿಯುತ್ತಲೇ ಅವರ ಯಾನ ಆರಂಭವಾಗಿತ್ತು. ಅಲ್ಲಿಂದಾಚೆಗೆ ದಿನಂಪ್ರತೀ ಕಂಠೀರವದವರೆಗೆ ನಡೆದುಕೊಂಡೇ ಹೋಗಿ, ಅಲ್ಲಿ ಚಿತ್ರೀಕರಣ ನಡೆಸುತ್ತಿದ್ದವರಲ್ಲಿ ಅವಕಾಶಕ್ಕಾಗಿ ಕೇಳಿಕೊಳ್ಳೋದೇ ಅವರ ಪಾಲಿನ ಕಸುಬಾಗಿತ್ತು. ಅದೆಷ್ಟೋ ಕಾಲ ಅವರಿಗೊಂದು ಅವಕಾಶವೇ ಸಿಗಲಿಲ್ಲ. ಹಾಗೆ ಕಂಠೀರವ ಸ್ಟೇಡಿಯಮ್ಮಿನಿಂದ ವಾಪಾಸು ನಡೆದುಕೊಂಡೇ ರೂಮಿನತ್ತ ಸಾಗುತ್ತಿದ್ದ ಪ್ರಭಾಕರ್ ಕಾಲು ಸೋತಾಗ ಒಂದೆಡೆ ಕುಳಿತು, ಅಲ್ಲಿಯೇ ಕಥೆ ಮತ್ತು ಡೈಲಾಗುಗಳನ್ನು ಬರೆದಿಟ್ಟುಕೊಳ್ಳುತ್ತಿದ್ದರಂತೆ. ಅದು ಸಾಧಿಸಿಯೇ ತೀರುವಂಥಾ ಪ್ರಖರ ಕಿಚ್ಚೊಂದು ಅವರೊಳಗೆ ಹೊತ್ತಿ ಉರಿಯುತ್ತಿದ್ದುದರ ಪರಿಣಾಮ!

ಹಾಗೆ ಅದೆಷ್ಟೋ ಕಾಲ ಅಂಡಲೆದ ಫಲವಾಗಿ ಅದೊಂದು ಘಳಿಗೆಯಲ್ಲಿ ಪ್ರಭಾಕರ್ ಪಾಲಿಗೆ ಅವಕಾಶ ಕೂಡಿ ಬಂದಿತ್ತು. ಹಾಗೆ ಸಿಕ್ಕ ಅವಕಾಶವನ್ನು ಪ್ರಾಮಾಣಿಕವಾಗಿ, ಶ್ರದ್ಧೆಯಿಂದ ಬಳಸಿಕೊಂಡಿದ್ದವರಿಗೆ ಗಾಳಿಪಟ, ಗೊಂಬೆಗಳ ಲವ್, ದಾದಾ ಈಸ್ ಬ್ಯಾಕ್, ನಾನು ಲವರ್ ಆಫ್ ಜಾನು ಮುಂತಾದ ಚಿತ್ರಗಳಲ್ಲಿ ಅಸಿಸ್ಟೆಂಟ್ ಡೈರೆಕ್ಟರ್ ಆಗಿ ಕಾರ್ಯನಿರ್ವಹಿಸುವ ಅವಕಾಶ ಕೂಡಿ ಬಂದಿತ್ತು. ದಶಕಗಟ್ಟಲೆ ಹಾಗೆ ಪಳಗಿಕೊಂಡಿದ್ದ ಪ್ರಭಾಕರ್ ಪಾಲಿಗೆ, ಅಷ್ಟಾದರೂ ಸ್ವಂತದ್ದೊಂದು ರೂಮು ಮಾಡಿಕೊಳ್ಳುವ ಅವಕಾಶ ಕೂಡಿ ಬಂದಿರಲಿಲ್ಲ. ಗೆಳೆಯರ ರೂಮೇ ಅವರಿಗೆ ಆಸರೆಯಾಗಿತ್ತು. ಈ ನಡುವೆ ಹಣಕಾಸಿಗೆ ಅಡಚಣೆಯಾಗಿ ದಿನಗಟ್ಟಲೆ ಉಪವಾಸವಿರಬೇಕಾದ ಪರಿಸ್ಥಿತಿಯನ್ನೂ ಪ್ರಭಾಕರ್ ಎದುರಿಸಿದ್ದರು. ಅಂಥಾ ಹೊತ್ತಿನಲ್ಲಿ ಪೆಟ್ರೋಲ್ ಬಂಕಿನಲ್ಲಿ ಕೆಲಸ ಮಾಡುತ್ತಾ ಹೊಟ್ಟೆ ಹೊರೆದದ್ದೂ ಇದೆ!

ಗುರಿಯೆಂಬುದು ಸ್ಪಷ್ಟವಾಗಿಲ್ಲದೇ ಹೋಗಿದ್ದರೆ, ನಿರ್ದೇಶಕನಾಗಬೇಕೆಂಬ ಆಸೆ ಅಚಲವಾಗಿಲ್ಲದಿದ್ದರೆ, ಪ್ರಭಾಕರ್ ಅರ್ಧದಾರಿಯಿಂದಲೇ ವಾಪಾಸಾಗಬೇಕಿತ್ತು. ಅವರನ್ನು ಅವುಡುಗಚ್ಚಿ ಅಲ್ಲೇ ಉಳಿಯುವಂತೆ ಮಾಡಿದ್ದು ಒಳಿತಾಗುತ್ತದೆಂಬ ಭರವಸೆ ಮತ್ತು ಅವರ ಪ್ರತಿಭೆಯ ಮೇಲಿದ್ದ ಗಾಢವಾದ ನಂಬಿಕೆ. ಅದರ ಬಲದಿಂದಲೇ ಪ್ರಭಾಕರ್ ನೆಲೆಯೂರಿ ನಿಂತರು. ಒಂದಷ್ಟು ಅನುಭವ ಪಡೆದುಕೊಂಡು, ಪಟಾಗಿ ಕೂತು ಕಥೆಯನ್ನು ಸಿದ್ಧಪಡಿಸಿಕೊಂಡಿದ್ದರು. ಆದರೆ ನಿರ್ಮಾಪಕರನ್ನು ಹುಡುಕೋದೇ ದೊಡ್ಡ ಸವಾಲಾಗಿತ್ತು. ಅಂಥಾ ಹೊತ್ತಿನಲ್ಲಿ ಪ್ರಭಾಕರ್‌ಗೆ ಎದುರಾದವರು ವಿಜಯೇಂದ್ರ ಬಿ.ಎ. ಒಂದೊಳ್ಳೆ ಸಿನಿಮಾ ಮಾಡಬೇಕೆಂಬ ಕನಸು ಹೊಂದಿದ್ದ ವಿಜಯೇಂದ್ರ ಸಾವಧಾನದಿಂದಲೇ ಕಥೆ ಆಲಿಸಿದ್ದರು. ಅದರ ಗಟ್ಟಿತನ ನೋಡಿ ಮಾರು ಹೋದ ಅವರು, ಭಾರೀ ನಂಬಿಕೆಯಿಂದ ಹೊಸಬರಾದ ಪ್ರಭಾಕರ್‌ಗೆ ನಿರ್ದೇಶಕನಾಗೋ ಅವಕಾಶ ಕೊಟ್ಟಿದ್ದರು. ಈ ಮೂಲಕ ಪ್ರಭಾಕರ್ ಸ್ವತಂತ್ರ ನಿರ್ದೇಶಕರಾಗುವಂತಾಗಿತ್ತು.

ತನ್ನ ಮೇಲೆ ನಂಬಿಕೆಯಿಟ್ಟು ನಿರ್ಮಾಣ ಮಾಡಿದ ನಿರ್ಮಾಪಕರಿಗೆ ಮಾತ್ರವಲ್ಲ; ನಿರೀಕ್ಷೆಯಿಟ್ಟು ಬರುವ ಪ್ರತೀ ಪ್ರೇಕ್ಷಕರನ್ನು ಅಚ್ಚರಿಗೀಡು ಮಾಡುವಂತೆ, ಆವರಿಸಿಕೊಳ್ಳುವಂತೆ ಕೌಟಿಲ್ಯ ಮೂಡಿ ಬಂದಿದೆ ಎಂಬ ಭರವಸೆ ಪ್ರಭಾಕರ್ ಅವರಲ್ಲಿದೆ. ಗಾಂಧಿನಗರದ ಪಟ್ಟುಗಳಾಚೆಗೆ, ಈ ಕ್ಷಣಕ್ಕೂ ಹಳ್ಳಿಗಾಡಿನ ಮುಗ್ಧತೆಯನ್ನು ಧರಿಸಿಕೊಂಡಿರುವವರು ಪ್ರಭಾಕರ್. ಆ ವಿಧೇಯತೆ ಮತ್ತು ತನ್ನ ಪ್ರತಿಭೆಯ ಮೇಲಿಟ್ಟಿರುವ ಭರವಸೆಯೇ ಅವರನ್ನು ಇಲ್ಲಿತನಕ ಕರೆತಂದಿದೆ. ಅವರ ಪಾಲಿಗೆ ಕೌಟಿಲ್ಯ ಎಂಬುದು ಮಹತ್ವದ ತಿರುವು. ಈ ಚಿತ್ರ ದೊಡ್ಡ ಮಟ್ಟದಲ್ಲಿ ಯಶ ಕಾಣಲಿ. ಪ್ರಭಾಕರ್ ಕನ್ನಡ ಚಿತ್ರರಂಗದ ಮುಖ್ಯನಿರ್ದೇಶಕನಾಗಿ ನೆಲೆಕಾಣಲೆಂದು ಸಿನಿಶೋಧ ಹಾರೈಸುತ್ತದೆ!

The post ಇದು ಕೌಟಿಲ್ಯ ನಿರ್ದೇಶಕನ ಸ್ಫೂರ್ತಿಯ ಕಥನ! appeared first on ಶೋಧ ನ್ಯೂಸ್ - Shodha News.

ಭಿನ್ನ ಅಭಿರುಚಿ ಮತ್ತು ಬೇರೆ ಬೇರೆ ಕ್ಷೇತ್ರಗಳಲ್ಲಿಯೂ ಕೈಯಾಡಿಸಿ ಗೆಲ್ಲಬಲ್ಲ ಛಾತಿ ಇರುವ ಒಂದಷ್ಟು ಮಂದಿ ಬಹುಮುಖ ಪ್ರತಿಭೆಗಳು ಕನ್ನಡ ಚಿತ್ರರಂಗದಲ್ಲಿದ್ದಾರೆ. ಆ ಸಾಲಿಗೆ ನಿಸ್ಸಂದೇಹವಾಗಿ ಸೇರಿಕೊಳ್ಳುವವರು ಚಂದ್ರ ಓಬಯ್ಯ. ಈಗಾಗಲೇ ಪ್ರತಿಭಾನ್ವಿತ ಸಂಗೀತ ನಿರ್ದೇಶಕರಾಗಿ ಗುರುತಿಸಿಕೊಂಡಿರುವ ಅವರು, ಸಾಹಿತಿಯೂ ಹೌದು. ಅಂಥಾದ್ದೊಂದು ಕ್ರಿಯಾಶೀಲ, ಸೂಕ್ಷ್ಮ ಮನಃಸ್ಥಿತಿಯನ್ನೇ ನಿರ್ದೇಶನಕ್ಕೂ ಒಗ್ಗಿಸಿಕೊಂಡಿರುವ ಚಂದ್ರು, ಯೂ ಟರ್ನ್೨ ಎಂಬ ಚಿತ್ರದ ಮೂಲಕ ನಾಯಕನಾಗಿಯೂ ಪಾದಾರ್ಪಣೆ ಮಾಡಲು ಅಣಿಗೊಂಡಿದ್ದಾರೆ. ಈ ಮೂಲಕ ಸಂಗೀತ ನಿರ್ದೇಶಕರಾಗಿದ್ದ ಚಂದ್ರು ಓಬಯ್ಯ ನಿರ್ದೇಶಕರಾಗಿ, ನಾಯಕನಾಗಿ ಮತ್ತು ನಿರ್ಮಾಪಕರಾಗಿಯೂ ಅವತರಿಸುವ ಮೂಲಕ ಎಲ್ಲರ ಅಚ್ಚರಿಗೆ ಕಾರಣರಾಗಿದ್ದಾರೆ.

ಈ ವಿಚಾರ ಕೇಳಿದೇಟಿಗೆ, ಒಬ್ಬರೇ ಇಷ್ಟೊಂದು ಜವಾಬ್ದಾರಿಗಳನ್ನು ಏಕಕಾಲದಲ್ಲಿಯೇ ನಿಭಾಯಿಸಲು ಸಾಧ್ಯವೇ ಎಂಬಂಥಾ ಪ್ರಶ್ನೆಗಳೇಳುತ್ತವೆ. ಆದರೆ, ಪ್ರತೀ ಮನುಷ್ಯರಲ್ಲಿಯೂ ಪ್ರತಿಯೊಂದನ್ನು ನಿಭಾಯಿಸುವ ಜಾಣ್ಮೆ ಇರುತ್ತದೆ. ಮನಸು ಮಾಡಿದರೆ ಎಲ್ಲವೂ ಸಾಧ್ಯ ಎಂಬಂಥ ಮನಃಸ್ಥಿತಿ ಹೊಂದಿರುವ ಚಂದ್ರು ಓಬಯ್ಯ ಎಲ್ಲವನ್ನೂ ಲೀಲಾಜಾಲವಾಗಿ ಮಾಡಿ ಮುಗಿಸಿದ್ದಾರೆ. ಹಾಗಾದರೆ, ಯೂ ಟರ್ನ್೨ ಯಾವ ಬಗೆಯ ಚಿತ್ರ? ಇದರ ವಿಶೇಷತೆಗಳೇನೆಂಬ ಪ್ರಶ್ನೆಗಳು ಸಹಜವಾಗಿಯೇ ಕಾಡುತ್ತವೆ. ಈ ದಿಸೆಯಲ್ಲಿ ನೋಡಹೋದರೆ ಒಂದಷ್ಟು ಇಂಟರೆಸ್ಟಿಂಗ್ ವಿಚಾರಗಳು ಜಾಹೀರಾಗುತ್ತವೆ. ಅದರನ್ವಯ ಹೇಳೋದಾದರೆ, ಇದೊಂದು ಹಾರರ್ ಸಿನಿಮಾ. ಪಕ್ಕಾ ಮನೋರಂಜನಾತ್ಮಕ ಗುಣಗಳೊಂದಿಗೆ, ಕಾಮಿಡಿ ಝಲಕ್ಕುಗಳೊಂದಿಗೆ ಮೈಕೈ ತುಂಬಿಕೊಂಡಿರುವ ಈ ಚಿತ್ರ ಯೂಟರ್ನ್೨. ಇದಕ್ಕೀಗ ಸೆನ್ಸಾರ್ ಸರ್ಟಿಫಿಕೆಟ್ ಕೂಡಾ ಸಿಕ್ಕಿದೆ. ನಿಕ್ಕಿಯಾಗಬೇಕಿರೋದು ಬಿಡುಗಡೆಯ ದಿನಾಂಕ ಮಾತ್ರ!

ಗಡಿನಾಡು ಪಾವಗಡದಲ್ಲಿ ಹುಟ್ಟಿ ಬೆಳೆದು, ಅಲ್ಲಿಂದಲೇ ಜೀವನದ ಬಗ್ಗೆ ನಾನಾ ಆಸಕ್ತಿಗಳನ್ನು, ಕನಸುಗಳನ್ನು ಕಟ್ಟಿಕೊಂಡವರು ಚಂದ್ರು ಓಬಯ್ಯ. ತಂದೆ ಡ್ರಾಮಾ ಮೇಸ್ಟ್ರಾಗಿದ್ದದ್ದರಿಂದ ಎಳವೆಯಿಂದಲೇ ಅವರ ಪಾಲಿಗೆ ಕಲಾಪ್ರೇಮದ ವಾತಾವರಣ ಸಿಕ್ಕಿತ್ತು. ಈ ಕಾರಣದಿಂದಲೇ ಕಲಾಸಕ್ತಿ ಹೊಂದಿದ್ದ ಚಂದ್ರುಗೆ ಶಾಲಾ ದಿನಗಳಿಂದಲೇ ಹಾಡೋದೆಂದರೆ ಬಹಳಾ ಇಷ್ಟವಾಗಿತ್ತು. ಹೀಗೆ ಮುಂದುವರೆಯುವಾಗಲೇ ಅತ್ಯಂತ ಚಿಕ್ಕ ವಯಸ್ಸಿನಲ್ಲಿ ತಂದೆ ಇನ್ನಿಲ್ಲವಾದ ಆಘಾತವೂ ಅವರಿಗೆದುರಾಗಿತ್ತು. ಅಂಥಾ ನೋವು, ಆಘಾತಗಳಿಂದಲೇ ಗಟ್ಟಿಗೊಳ್ಳುತ್ತಾ, ಸೃಜನಶೀಲ ಆಲೋಚನೆಗಳನ್ನು ಒಳಗಿಳಿಸಿಕೊಳ್ಳುತ್ತಾ ಸಾಗಿ ಬಂದಿದ್ದವರು ಚಂದ್ರು ಓಬಯ್ಯ. ಆ ನಂತರದಲ್ಲಿ ಬದುಕಿನ ಮುಖ್ಯ ಘಟ್ಟ ಎದುರಾದಾಗ ಅವರು ಶಿಕ್ಷಕರಾಗಬೇಕೆಂಬ ತೀರ್ಮಾನಕ್ಕೆ ಬಂದಿದ್ದರು.

ಹಾಗೊಂದು ತೀರ್ಮಾನವೇ ತಮ್ಮನ್ನು ಮತ್ತೆತ್ತಲೋ ಕೊಂಡೊಯ್ದು ನಿಲ್ಲಿಸಲಿದೆ ಎಂಬ ಸಣ್ಣ ಕಲ್ಪನೆಯೂ ಚಂದ್ರು ಅವರಿಗೆ ಬಹುಶಃ ಇರಲಿಕ್ಕಿಲ್ಲ. ಪ್ರಾಥಮಿಕ ಶಾಲಾ ಶಿಕ್ಷಕರಾಗಲು ತರಬೇತಿಗೆಂದು ೨೦೦೯ರಲ್ಲಿ ಬೆಂಗಳೂರಿಗೆ ಬಂದಿಳಿದ ಚಂದ್ರು, ಅದನ್ನು ಪೂರೈಸಿಕೊಂಡು ಜ್ಞಾನ ಗಂಗಾ ಎಂಬ ಶಾಲೆಯಲ್ಲಿ ಶಿಕ್ಷಕ ವೃತ್ತಿ ಆರಂಭಿಸಿದ್ದರು. ಆ ವೃತ್ತಿಯ ನಡುವೆಯೇ ಆಲ್ಬಂ ಸಾಂಗ್ ಒಂದನ್ನೂ ರೂಪಿಸಿದ್ದರು. ಆ ಶಾಲೆಯ ಮಾಲೀಕರಿಗೂ ಕೂಡಾ ಸಿನಿಮಾ ರಂಗದ ಬಗ್ಗೆ ಅತೀವ ಆಸಕ್ತಿ ಇತ್ತು. ಚಂದ್ರು ಕೂಡಾ ಅಂಥಾದ್ದೇ ಆಸಕ್ತಿ ಹೊಂದಿರುವವರು ಅಂತ ಗೊತ್ತಾದಾಕ್ಷಣವೇ ಒಂದು ಸಿನಿಮಾ ಮಾಡೋಣ ಅಂತ ಮಾತುಕತೆ ಆರಂಭಿಸಿದ್ದರು. ಹಾಗೆ ಶುರುವಾದ ಚಿತ್ರ ಟ್ರಿಗರ್. ಇದರ ಮೂಲಕವೇ ಚಂದ್ರು ಓಬಯ್ಯ ಸಂಗೀತ ನಿರ್ದೇಶಕರಾಗಿ ಪಾದಾರ್ಪಣೆ ಮಾಡಿದ್ದರು.

ಕರ್ನಾಟಕ ಸಂಗೀತದಲ್ಲಿ ಒಂದಷ್ಟು ಜ್ಞಾನ ಹೊಂದಿದ್ದ ಚಂದ್ರು, ಆ ನಂತರವೂ ಒಂದಷ್ಟು ಚಿತ್ರಗಳಿಗೆ ಸಂಗೀತ ನಿರ್ದೇಶನ ಮಾಡಿ ಸೈ ಅನ್ನಿಸಿಕೊಂಡಿದ್ದರು. ಶಿಕ್ಷಕ ವೃತ್ತಿಯಲ್ಲಿದ್ದುದರಿಂದ ಬರವಣಿಗೆಯೂ ಅವರ ಕೈ ಹಿಡಿದಿತ್ತು. ಅದರ ಫಲವಾಗಿಯೇ ಅವರೊಂದಷ್ಟು ಕಾದಂಬರಿ, ಪ್ರವಾಸ ಕಥನಗಳನ್ನೂ ಬರೆದು ಸೈ ಅನ್ನಿಸಿಕೊಂಡಿದ್ದಾರೆ. ಈ ಮೂಲಕ ಸಾಹಿತ್ಯ ವಲಯದಲ್ಲಿಯೂ ಗುರುತಿಸಿಕೊಂಡಿದ್ದಾರೆ. ಇದೀಗ ಡಸ್ಟ್‌ಬಿನ್ ಎಂಬ ಕಾದಂಬರಿ ಬರೆಯುತ್ತಿರುವ ಚಂದ್ರು, ಅದನ್ನೇ ಸಾಮಾಜಿಕ ಕಾಳಜಿಯ ಸಿನಿಮಾವಾಗಿಸುವ ನಿಟ್ಟಿನಲ್ಲಿಯೂ ಪ್ರಯತ್ನಿಸುತ್ತಿದ್ದಾರೆ. ಹೀಓಗೆ ಭಿನ್ನ ಅಭಿರುಚಿ ಹೊಂದಿರುವ ಚಂದ್ರು ಓಬಯ್ಯ ಇದೀಗ ಯೂ ಟರ್ನ್೨ ಚಿತ್ರಕ್ಕೂ ನಟನೆ, ನಿರ್ದೇಶನದ ಜೊತೆಗೆ ಸಂಗೀತ ನಿರ್ದೇಶನವನ್ನೂ ಮಾಡಿದ್ದಾರೆ.

ಬೆಂಗಳೂರು, ಬಿಡದಿ, ಹೊನ್ನಾವರ ಬೀಚ್ ಮುಂತಾದೆಡೆಗಳಲ್ಲಿ ಈ ಚಿತ್ರವ ನನು ದೃಷ್ಯೀಕರಿಸಲಾಗಿದೆ. ಬಿಗ್‌ಬಾಸ್ ಖ್ಯಾತಿಯ ಮಂಜು ಪಾವಗಡ, ಗಿಚ್ಚಿಗಿಲಿಗಿಲಿ ಚಿಲ್ಲರ್ ಮಂಜು, ಕರಿಸುಬ್ಬು, ಡಿಂಗ್ರಿ ನಾಗರಾಜ್ ಮುಂತಾದವರು ಪ್ರಧಾನ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಹಿಂದೆ ತಿಥಿ ಚಿತ್ರದ ಮೂಲಕ ಹೆಸರು ಮಾಡಿದ್ದ ಪೂಜಾ ಎಂ.ಎಸ್ ನಾಯಕಿಯಾಗಿ ಚಂದ್ರುಗೆ ಸಾಥ್ ಕೊಟ್ಟಿದ್ದಾರೆ. ಹಲವಾರು ಪ್ರಯೋಗಾತ್ಮಕ ಅಂಶಗಳನ್ನೊಳಗೊಂಡಿರುವ ಈ ಚಿತ್ರ ಪ್ರೇಕ್ಷಕರಿಗೆ ಬಹುವಾಗಿ ಇಷ್ಟವಾಗುತ್ತದೆಂಬ ನಂಬಿಕೆಯೂ ಅವರಲ್ಲಿದೆ. ಶೀಘ್ರದಲ್ಲಿಯೇ ಯೂ ಟರ್ನ್೨ ಬಿಡುಗಡೆಯ ದಿನಾಂಕ ಘೋಷಣೆಯಾಗಲಿದೆ.

The post ಇದು ಚಂದ್ರು ಓಬಯ್ಯರ ಹೊಸಾ ಸಾಹಸ! appeared first on ಶೋಧ ನ್ಯೂಸ್ - Shodha News.

ಕನ್ನಡ ಚಿತ್ರರಂಗದ ಪಾಲಿಗಿದು ಹೊಸತನದ ಶಖೆಯೊಂದು ತೆರೆದುಕೊಂಡಿರುವ ಪರ್ವಕಾಲ. ಅದೇನೇನೋ ಸರ್ಕಸ್ಸು ನಡೆಸುತ್ತಾ, ಯುವ ಮನಸುಗಳು ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡುತ್ತಿವೆ. ಹಾಗೆ ಬಂದವರು ಎಲ್ಲರೂ ತಿರುಗಿ ನೋಡುವಂತೆ ಸದ್ದನ್ನೂ ಮಾಡುತ್ತಿದ್ದಾರೆ. ಸದ್ಯ ಆ ರೀತಿಯದ್ದೊಂದು ಪಾಸಿಟಿವ್ ಟಾಕ್ ಕ್ರಿಯೇಟ್ ಮಾಡಿರುವ ಚಿತ್ರ ವಿಕಿಪೀಡಿಯಾ. ಈ ಚಿತ್ರದ ಮೂಲಕ ಯಶ್ವಂತ್ ನಾಯಕನಾಗಿ, ನಿರ್ಮಾಪಕನಾಗಿ ಕನ್ನಡ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದ್ದಾರೆ. ಸಿನಿಮಾ ಮಾಯೆಯನ್ನು ತೀವ್ರವಾಗಿ ಹಚ್ಚಿಕೊಂಡು, ಬದುಕು ಬೇರೆಡೆಗೆ ವಗಾಯಿಸಿದಾಗಲೂ ಮತ್ತೆ ಗುರಿಯ ನೇರಕ್ಕೆ ಬಂದು ನಿಂತವರು ಯಶ್ವಂತ್. ಅವರ ಕನಸೆಲ್ಲವೂ ವಿಕಿಪೀಡಿಯಾ ಚಿತ್ರದ ಮೂಲಕ ನನಸಾಗುವ ಹಂತದಲ್ಲಿದೆ.

ಯಾವುದೇ ಕನಸಾದರೂ ವಾಸ್ತವಿಕವಾಗಿ ಅದನ್ನು ಎದುರುಗೊಳ್ಳಲು ಸಾಕಷ್ಟು ಸರ್ಕಸ್ಸು ನಡೆಸಬೇಕಾಗುತ್ತೆ. ತೀರಾ ಜಿದ್ದಿಗೆ ಬಿದ್ದಂತೆ ಬಂದ ಕಷ್ಟಗಳನ್ನೆಲ್ಲ ಎದೆಯೊಡ್ಡಿ ಹಿಮ್ಮೆಟ್ಟಿಸದಿದ್ದರೆ ಬದುಕು ಬೇರೆಲ್ಲೋ ಕಳೆದು ಹೋಗಿ ಬಿಡುವ ಅಪಾಯಗಳಿರುತ್ತವೆ. ಕನಸಿನ ಹಾದಿಯಲ್ಲಿ ಘಟಿಸುವ ಎಲ್ಲ ಅನಿರೀಕ್ಷಿತ ಘಟನಾವಳಿಗಳನ್ನೂ ಕೂಡಾ ಗುರಿಯ ನೇರಕ್ಕೆ ಪಳಗಿಸಿಕೊಳ್ಳುವ ವಿದ್ಯೆ ಕರಗತ ಮಾಡಿಕೊಳ್ಳದೇ ಹೋದರೆ ಗೆಲುವು ಅಕ್ಷರಶಃ ಮರೀಚಿಕೆಯಾಗಿ ಬಿಡುತ್ತದೆ. ಇದೆಲ್ಲವನ್ನೂ ಹಂತ ಹಂತವಾಗಿ ಅರ್ಥ ಮಾಡಿಕೊಂಡು ಒಂದೊಂದೇ ಮೆಟ್ಟಿಲುಗಳನ್ನು ಹತ್ತುತ್ತಾ ಬಂದಿರುವ ಯಶ್ವಂತ್ ಈಗಾಗಲೇ ಕಿರುತೆರೆ ಪ್ರೇಕ್ಷಕರ ಪಾಲಿಗೆ ಪರಿಚಿತರಾಗಿದ್ದಾರೆ. ಒಂದಷ್ಟು ಅಭಿಮಾನಿ ಬಳಗವನ್ನೂ ತನ್ನದಾಗಿಸಿಕೊಂಡಿದ್ದಾರೆ.

ಮೂಲತಃ ಹಾಸನದ ಸಿಂಗಾಪಟ್ಟಣದ ಹಳ್ಳಿಯೊಂದರಲ್ಲಿ ಹುಟ್ಟಿ ಬೆಳೆದವರು ಯಶ್ವಂತ್. ಆರಂಭದಿಂದಲೂ ತಾಯಿ ಪುಷ್ಪಲತಾರ ಆಸರೆಯಲ್ಲಿಯೇ ಬೆಳೆದು ಬಂದಿದ್ದ ಯಶ್ವಂತ್, ವಿದ್ಯಾಭ್ಯಾಸ ಪೂರೈಸಿಕೊಂಡಿದ್ದೆಲ್ಲವೂ ಆ ಪರಿಸರದಲ್ಲಿಯೇ. ಆ ಕಾಲದಿಂದದಲೇ ಯಶ್ವಂತ್‌ರೊಳಗೆ ನಾಯಕ ನಟನಾಗಿ ನೆಲೆ ನಿಲ್ಲಬೇಕೆಂಬ ಆಸೆ ಉತ್ಕಟವಾಗಿ ಮೊಳಕೆಯೊಡೆದುಕೊಂಡಿತ್ತು. ಆದರೆ ಅಮ್ಮನ ಪಾಲಿಗೆ ಮಗನ ಬಗ್ಗೆ ಬೇರೆಯದ್ದೇ ಕನಸಿತ್ತು. ಮಗ ಇಂಜಿನಿಯರ್ ಆಗಿ ನೆಲೆಯೂರಬೇಕೆಂಬ ಇರಾದೆ ಅಮ್ಮನದ್ದಾಗಿತ್ತು. ಒಬ್ಬಂಟಿಯಾಗಿ ತನ್ನ ಜೀವನ ರೂಪಿಸಿದ ಅಮ್ಮನ ಆಸೆ ಪೂರೈಸೋದೇ ಪರಮ ಗುರಿ ಎಂಬಂತೆ ಮುಂದುವರೆದಿದ್ದ ಯಶ್ವಂತ್‌ರನ್ನು ಸಿನಿಮಾ ಮಾಯೆ ಎಂಬುದು ಪ್ರತೀ ಹೆಜ್ಜೆಯಲ್ಲಿಯೂ ಸೆಳೆಯುತ್ತಲೇ ಬಂದಿತ್ತು.

ಹಾಗೆ ಇಂಜಿನಿಯರಿಂಗ್ ಮುಗಿಸಿಕೊಂಡಿದ್ದ ಯಶ್ವಂತ್ ಒಂದೊಳ್ಳೆಯ ಉದ್ಯೋಗವನ್ನು ಪಡೆದುಕೊಂಡಿದ್ದರು. ಅಲ್ಲಿಗೆ ಒಂದು ಹಂತಕ್ಕೆ ಅಮ್ಮನ ಕನಸನ್ನು ನನಸು ಮಾಡಿದಂತಾಗಿತ್ತು. ಆ ಹೊತ್ತಿನಲ್ಲಿ ಕೆಲಸ ಮಾಡುತ್ತಲೇ ತನ್ನಿಷ್ಟದ ನಟನೆಯನ್ನೂ ಸಂಭಾಳಿಸಿಕೊಂಡು ಹೋಗುವ ನಿರ್ಧಾರಕ್ಕೆ ಯಶ್ವಂತ್ ಬಂದಿದ್ದರು. ಹಾಗಂತ ಆ ಹಾದಿ ಅಷ್ಟು ಸಲೀಸಿನದ್ದೇನೂ ಆಗಿರಲಿಲ್ಲ. ಆದರೆ, ಅದೇನೇ ಕಷ್ಟ ಬಂದರೂ ತನ್ನ ಕನಸನ್ನು ನನಸಾಗಿಸಿಕೊಂಡೇ ತೀರುವ ಹಠ ಯಶ್ವಂತ್‌ರಲ್ಲಿತ್ತು. ೨೦೧೧ರ ಸುಮಾರಿಗೆ ಹೇಗೋ ಸರ್ಕಸ್ಸು ನಡೆಸಿ, ಜ್ಯೂನಿಯರ್ ಆರ್ಟಿಸ್ಟ್ ಅಸೋಸಿಯೇಷನ್ನಿನಲ್ಲಿ ಹೆಸರು ನೋಂದಾಯಿಸಿಕೊಂಡು, ಒಂದಷ್ಟು ಸಿನಿಮಾ ಮತ್ತು ಧಾರಾವಾಹಿಗಳಲ್ಲಿ ಸಣ್ಣಪುಟ್ಟ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಾರಂಭಿಸಿದ್ದರು.

ಹಾಗೆ ಸಾಗಿ ಬಂದಿದ್ದ ಖುಷ್ವಂತ್‌ಗೆ ಉದಯ ಟೀವಿಯ ಮಹಾಭಾರತ ಧಾರಾವಾಹಿಯಲ್ಲಿ ಸಣ್ಣದೊಂದು ಪಾತ್ರ ಮಾಡುವ ಅವಕಾಶ ಒದಗಿ ಬಂದಿತ್ತು. ಅದಾಗಲೇ ಒಂದು ವರ್ಷ ಜ್ಯೂನಿಯರ್ ಆರ್ಟಿಸ್ಟ್ ಆಗಿದ್ದರೂ ಯಶ್ವಂತ್ ಪಾಲಿಗೆ ಮೊದಲ ಸಾರಿ ಡೈಲಾಗು ಹೇಳುವ ಸುಯೋಗ ಕೂಡಿ ಬಂದಿದ್ದು ಆ ಧಾರಾವಾಹಿಯ ಮೂಲಕವೇ. ಮನೆ ಕಡೆ ಕಷ್ಟವಿದ್ದುದರಿಂದ, ಸಿಕ್ಕಿದ್ದ ಐಬಿಎಂ ಕಂಪೆನಿಯ ಸಂಬಳ ಸಂಸಾರ ನಿರ್ವಹಣೆಗೆ ಸಾಕಾಗುತ್ತಿತ್ತು. ನಟನೆಯಲ್ಲಿ ಪಳಗಿಕೊಳ್ಳಬೇಕೆಂಬ ಆಸೆ ಇದ್ದರೂ, ತರಬೇತಿ ಶಾಲೆಗಳಲ್ಲಿ ಸಾವಿರಾರು ರೂಪಾಯಿ ಕೇಳೋದರಿಂದ ಅಲ್ಲಿಗೆ ದಾಖಲಾಗುವುದೂ ಸಾಧ್ಯವಿರಲಿಲ್ಲ. ಆದ್ದರಿಂದಲೇ ಸಿಕ್ಕ ಅವಕಾಶಗಳನ್ನು ಬಳಸಿಕೊಂಡೇ ನಟನಾಗಿ ರೂಪುಗೊಳ್ಳಬೇಕೆಂಬಂಥಾ ದೃಢ ನಿರ್ಧಾರಕ್ಕೆ ಯಶ್ವಂತ್ ಬಂದಿದ್ದರು.

ಹೀಗೆ ಸಾಗಿ ಬಂದಿದ್ದ ಖುಷ್ವಂತ್‌ಗೆ ಏಕಾಏಕಿ ಒಂದೊಳ್ಳೆ ಅವಕಾಶ ಸಿಕ್ಕಿತ್ತು. ಜೀ ಕನ್ನಡ ವಾಹಿನಿಗೆ ಒಂದೂರಲ್ಲಿ ರಾಜಾರಾಣಿ ಎಂಬ ಧಾರಾವಾಹಿ ನಿರ್ದೇಶನ ಮಾಡಲು ಮುಂದಾಗಿದ್ದ ರವಿ ಗರಣಿ ಆಡಿಷನ್ ಕರೆದಿದ್ದರು. ಆದದ್ದಾಗಲಿ ಅಂತ ಅದರಲ್ಲಿ ಪಾಲ್ಗೊಂಡಿದ್ದ ಯಶ್ವಂತ್‌ಗೆ ಒಂದೊಳ್ಳೆ ಪಾತ್ರವೇ ಸಿಕ್ಕಿತ್ತು. ಈ ಪಾತ್ರದ ಮೂಲಕವೇ ಮನೆ ಮಾತಾದ ಯಶ್ವಂತ್, ಆ ನಂತರ ಶಾಂತಂ ಪಾಪಂ, ಯಾರೇ ನೀ ಮೋಹಿನಿ, ಸತ್ಯಂ ಶಿವಂ ಸುಂದರಂ ಮುಂತಾದ ಧಾರಾವಾಹಿಗಳ ಮೂಲಕ ಮತ್ತಷ್ಟು ಜನಪ್ರಿಯತೆ ಪಡೆದುಕೊಂಡಿದ್ದರು. ಸತ್ಯಂ ಶಿವಂ ಧರಾವಾಹಿಯ ಮೇಜರ್ ರೋಲಿನಲ್ಲಿ ಕಾಣಿಸಿಕೊಂಡಿದ್ದ ಅವರಿಗೆ ಇನ್ನು ಹೀರೋ ಆಗಬಹುದೆಂಬ ನಂಬಿಕೆ ಹುಟ್ಟಿಕೊಂಡಿತ್ತು. ಅದಾದ ಬಳಿಕೆ ಪರಿಚಿತರು, ಧಾರಾವಾಹಿಯ ಭಾಗವಾಗಿದ್ದವರೇ ನೀನ್ಯಾಕೆ ಪ್ರಯತ್ನಿಸಬಾರದು ಎಂಬಂಥಾ ಉತ್ತೇಜಕ ಮಾತುಗಳನ್ನಾರಂಭಿಸಿದ್ದರಿಂದ ಯಶ್ವಂತ್ ಗಂಭೀರವಾಗಿಯೇ ಅಣಿಗೊಳ್ಳಲಾರಂಭಿಸಿದ್ದರು.

ಈ ನಡುವೆ ಅಮರ್ ಎಂಬ ಕಿರುಚಿತ್ರವೊಂದನ್ನು ಯಶ್ವಂತ್ ರೂಪಿಸಿದ್ದರು. ಅದು ಮುಂಬೈ ಫೆಸ್ಟ್‌ನಲ್ಲಿ ಪ್ರದರ್ಶನಗೊಂಡು ಮೂರನೇ ಬಹುಮಾನ ಪಡೆದುಕೊಂಡಿತ್ತು. ಅದಾದ ನಂತರ ತಾವೇ ಮುಂದೆ ನಿಂತು ಕ್ರೌಡ್ ಫಂಡಿಂಗ್ ಮೂಲಕ ಸಿನಿಮಾ ನಿರ್ಮಾಣ ಮಾಡಿ ಹೀರೋ ಆಗಿ ಲಾಂಚ್ ಆಗಲು ಯಶ್ವಂತ್ ಶತಪ್ರಯತ್ನ ನಡೆಸಿದ್ದರು. ಅದರ ಫಲವಾಗಿಯೇ ವಿಕಿಪೀಡಿಯಾ ಚಿತ್ರವಿಂದು ಬಿಡುಗಡೆಗೆ ರೆಡಿಯಾಗಿದೆ. ಡ್ಯಾನ್ಸ್, ಫೈಟ್ ಸೇರಿದಂತೆ ಎಲ್ಲದರಲ್ಲಿಯೂ ಪಳಗಿಕೊಂಡಿರುವ ಯಶ್ವಂತ್ ಈ ಮೂಲಕ ಹೀರೋ ಆಗಿ ಆಗಮಿಸುತ್ತಿದ್ದಾರೆ. ಈ ಚಿತ್ರ ತನ್ನನ್ನು ನಾಯಕ ನಟನಾಗಿ ನೆಲೆಗಾಣಿಸುತ್ತದೆಯೆಂಬ ಗಾಢ ನಂಬಿಕೆಯೂ ಅವರಲ್ಲಿದೆ. ಅಂದಹಾಗೆ, ವಿಕಿಪೀಡಿಯಾ ಇದೇ ತಿಂಗಳ ೨೬ರಂದು ರಾಜ್ಯಾದ್ಯಂತ ತೆರೆಗಾಣಲಿದೆ.

The post ಗುರಿ ಮುಟ್ಟಲು ಬಡಿದಾಡಿದ್ದು ಹತ್ತು ವರ್ಷ! appeared first on ಶೋಧ ನ್ಯೂಸ್ - Shodha News.

ಕ್ಷೇತ್ರ ಯಾವುದೇ ಆಗಿರಲಿ; ಎಲ್ಲ ವ್ಯವಹಾರಗಳನ್ನು ಮೀರಿದ ತಪಸ್ಸೊಂದಿರದೇ ಹೋದರೆ ಸೃಜನಾತ್ಮಕವಾಗಿ ಏನೂ ಹುಟ್ಟಲು ಸಾಧ್ಯವಿಲ್ಲ. ಹಾಗಿದ್ದ ಮೇಲೆ ಸೃಜನಶೀಲತೆಯೇ ಆತ್ಮವಾಗಿರುವ ಸಿನಿಮಾ ರಂಗಕ್ಕೆ ಅಂಥಾದ್ದೊಂದು ಅಸೀಮ ಧ್ಯಾನದ ಹಾಜರಿ ಇದ್ದೇ ಇರಬೇಕು. ಹೆಚ್ಚಿನ ಮಂದಿ ನಿರ್ದೇಶನ, ನಟನೆ ಮುಂತಾದವುಗಳನ್ನು ಮಾತ್ರವೇ ಸೃಜನಶೀಲತೆಯ ಪರಿಧಿಗೆ ತರುತ್ತಾರೆ. ಆದರೆ ಓರ್ವ ನಿರ್ಮಾಪಕನೊಳಗೂ ಅಂಥಾ ಗುಣ ಇಲ್ಲದೇ ಹೋದರೆ ಸಿನಿಮಾ ಒಂದು ಎಲ್ಲ ಕೋನಗಳಿಂದಲೂ ಪರಿಪೂರ್ಣವಾಗಿ ಮೂಡಿ ಬರಲು ಸಾಧ್ಯವಾಗುವುದಿಲ್ಲ. ಇಲ್ಲಿಯವರೆಗೂ ನಿರ್ಮಾಣ ವಿಭಾಗದಲ್ಲಿ ಇಂಥಾ ಮನಸ್ಥಿತಿಒ ಹೊಂದಿರುವವರೇ ದಾಖಲೆಗಳನ್ನು ಸೃಷ್ಟಿಸಿದ್ದಾರೆ. ಇದೀಗ ಅಂಥಾದ್ದೇ ಮನಸ್ಥಿತಿ, ಸಿನಿಮಾ ವ್ಯಾಮೋಹ ಹೊಂದಿರುವ ಮನೋಹರ್ ಸುವರ್ಣ ವಿಲೋಕ್ ಶೆಟ್ಟಿ ನಿರ್ದೇಶನದ ಚೇಸ್ ಚಿತ್ರದ ಮೂಲಕ ಆಗಮಿಸಿದ್ದಾರೆ. ಈ ಮೂಲಕ ಕನ್ನಡ ಚಿತ್ರ ನಿರ್ಮಾಣ ವಲಯದಲ್ಲೊಂದು ‘ಸುವರ್ಣ’ ಅಧ್ಯಾಯ ಶುರುವಾಗುವ ಮುನ್ಸೂಚನೆ ನಿಖರವಾಗಿಯೇ ಸಿಗಲಾರಂಭಿಸಿದೆ!

ಯಾವುದೇ ಸಿನಿಮಾ ರೂಪುಗೊಳ್ಳೋದರ ಹಿಂದೆ ಒಂದಷ್ಟು ಘಟ್ಟಗಳಿರುತ್ತವೆ. ಒಂದು ಕಥೆ ಹುಟ್ಟಿ, ಅದು ಸಿನಿಮಾ ರೂಪ ಪಡೆದು ಗೆದ್ದೇ ಗೆಲ್ಲುತ್ತದೆಂಬಂಥಾ ನಂಬಿಕೆ ಹುಟ್ಟಿದ ನಂತರವೂ ನಿರ್ಮಾಪಕನೊಬ್ಬ ಸಿಗದೇ ಹೋದರೆ ಕನಸಿನ ಪಕಳೆಗಳೆಲ್ಲ ಬಾಡಿ ಉದುರುತ್ತವೆ. ಹಾಗೆ ಕಮರಿದ ಕನಸುಗಳು ಗಾಂಧಿನಗರದ ಗಲ್ಲಿಗಳಲ್ಲಿ ಚೆಲ್ಲಾಪಿಲ್ಲಿಯಾಗಿ ಬಿದ್ದಿವೆ. ಈ ದಿಸೆಯಲ್ಲಿ ನೋಡ ಹೋದರೆ ಯಾವುದೇ ಚಿತ್ರಗಳ ವಿಚಾರದಲ್ಲಿಯೂ ನಿರ್ಮಾಪಕರೊಬ್ಬರು ಸಿಕ್ಕುವುದು ನಿರ್ಣಾಯಕ ಘಟ್ಟ. ಚೇಸ್ ವಿಚಾರದಲ್ಲಿ ಆ ಹಂತವನ್ನು ದಾಟಿಕೊಂಡು ಬಂದಿದ್ದರ ಹಿಂದೊಂದು ಅಚ್ಚರಿದಾಯಕ ಕಥಾನಕವಿದೆ.

ಮನೋಹರ್ ಸುವರ್ಣ ಮೂಲತಃ ಮಂಗಳೂರು ಸೀಮೆಯವರು. ಕಡುಗಷ್ಟದಿಂದ ಮೇಲೆದ್ದು ಬಂದು ಅವರು ಉದ್ಯಮಿಯಾಗಿ ನೆಲೆ ಕಂಡುಕೊಂಡಿದ್ದೇ ಒಂದು ಸೋಜಿಗ. ಮಂಗಳೂರಿನಲ್ಲಿಯೇ ಪೆಟರೋ ಕೆಮಿಕಲ್ಸ್ ಬ್ಯುಸಿನೆಸ್ ಮಾಡುತ್ತಾ ಮುಂದುವೆರೆದು ಬಂದ ಸುವರ್ಣ ಭಿನ್ನ ಅಭಿರುಚಿ ಹೊಂದಿರುವವರು. ಆರಂಭ ಕಾಲದಿಂದಲೂ ಸಿನಿಮಾ ಗೀಳು ಅಂಟಿಸಿಕೊಂಡಿದ್ದ ಅವರೊಳಗೆ, ಸಿನಿಮಾ ರಂಗದಲ್ಲೇನಾದರೂ ಸಾಧಿಸಬೇಕೆಂಬಂಥ ಸುಪ್ತ ಬಯಕೆಯಿತ್ತು. ಆದರೆ ಆ ಬಗ್ಗೆ ತೀರಾ ಹತ್ತಿರದವರ ಬಗ್ಗೆಯೂ ಅವರು ಪ್ರಸ್ತಾಪಿಸಿದ್ದು ಕಡಿಮೆಯೇ. ಆದರೆ, ಇಂಥಾ ಆಕಾಂಕ್ಷೆಗಳು ತೀವ್ರವಾಗಿದ್ದರೆ ಕೆಲವೊಮ್ಮೆ ಅವಕಾಶವೆಂಬುದು ತಾನೇ ತಾನಾಗಿ ಕೂಡಿ ಬರುತ್ತದೆ. ಮನೋಹರ್ ಸುವರ್ಣರ ವಿಚಾರದಲ್ಲಿಯೂ ಅದು ಅಕ್ಷರಶಃ ನಿಜವಾಗಿದೆ. ಯಾಕೆಂದರೆ, ಲೋಕಾಭಿರಾಮವಾಗಿ ಕೇಳಿದ ಕಥೆಯನ್ನು ಅವರು ಬಹುವಾಗಿ ಇಷ್ಟಪಟ್ಟು ಆ ಮೂಲಕವೇ ನಿರ್ಮಾಪಕರಾಗಿದ್ದೊಂದು ಅಚ್ಚರಿ!

ಈ ಚಿತ್ರದ ನಿರ್ದೇಶಕ ವಿಲೋಕ್ ಶೆಟ್ಟಿ ಕೂಡಾ ಮಂಗಳೂರು ಸೀಮೆಯವರೇ. ಮನೋಹರ್ ಸುವರ್ಣ ವಿಲೋಕ್ ಅವರ ಫ್ಯಾಮಿಲಿ ಫ್ರೆಂಡ್. ಅದಾಗಲೇ ಚೇಸ್ ಚಿತ್ರದ ಕಥೆ ಸಿದ್ಧಪಡಿಸಿಕೊಂಡಿದ್ದ ವಿಲೋಕ್ ಶೆಟ್ಟಿ ಮನೋಹರ್ ಸುವರ್ಣರನ್ನು ಭೇಟಿಯಾದಾಗ ನಿರುದ್ಧಿಷ್ಯವಾಗಿ ಕಥೆ ಹೇಳಿದ್ದರು. ಒಂದು ಅದ್ಭುತ ಸಸ್ಪೆನ್ಸ್ ಥ್ರಿಲ್ಲರ್ ಕಥಾನಕ ಕಣ್ಮುಂದೆ ಹಾದು ಹೋಗುತ್ತಿದೆ ಎಂಬಂತೆ ತನ್ಮಯರಾಗಿ ಕೇಳಿಸಿಕೊಂಡಿದ್ದ ಸುವರ್ಣರಿಗೆ ಒಂದೇ ಸಲಕ್ಕೆ ಒಂದಿಡೀ ಕಥೆ ಇಷ್ಟವಾಗಿ ಹೋಗಿತ್ತಂತೆ. ಹೇಳಿಕೇಳಿ ಆ ಹೊತ್ತಿಗೆಲ್ಲ ನಿರ್ಮಾಪಕನಾಗಿ ಸಿನಿಮಾ ರಂಗಕ್ಕೆ ಎಂಟ್ರಿ ಕೊಡುವ ಆಕಾಂಕ್ಷೆ ಅವರೊಳಗೆ ಗರಿಗೆದರಿಕೊಂಡಿತ್ತು. ಆದುದರಿಂದಲೇ ಚೇಸ್ ಸಿನಿಮಾ ನಿರ್ಮಾಣ ಮಾಡುವ ಬಗ್ಗೆ ಉತ್ಸುಕತೆ ತೋರಿದ್ದರು. ಹಾಗೆ ನಿರ್ಮಾಪಕರಾಗಿ ಮನೋಹರ್ ಸುವರ್ಣರ ಯಾನ ಅಚಾನಕ್ಕಾಗಿ ಅಲ್ಲಿಂದಲೇ ಶುರುವಾಗಿ ಹೋಗಿತ್ತು.

ಆ ನಂತರದಲ್ಲಿ ಚೇಸ್ ಅನ್ನು ಸುವರ್ಣ ಅವರು ಪೊರೆಯುತ್ತಾ ಬಂದಿರುವ ಪರಿಯ ಬಗ್ಗೆ ನಿರ್ದೇಶಕ ವಿಲೋಕ್ ಶೆಟ್ಟಿ ಸೇರಿದಂತೆ ಇಡೀ ಚಿತ್ರತಂಡದಲ್ಲೊಂದು ಮೆಚ್ಚುಗೆ ಇದೆ. ಒಂದಷ್ಟು ಮಂದಿ ಕೇವಲ ವ್ಯಾವಹಾರಿಕ ದೃಷ್ಟಿಯಿಂದಷ್ಟೇ ಸಿನಿಮಾ ನಿರ್ಮಾಣಕ್ಕಿಳಿಯುತ್ತಾರೆ. ಅವರ ಪಾಲಿಗದು ಕಾಸು ಹಾಕಿ ಫಸಲು ತೆಗೆಯುವ ಒಂದು ಉದ್ಯಮವಷ್ಟೇ. ಅಂಥಾ ಮೆಂಟಾಲಿಟಿ ಹೊಂದಿರುವ ಮಂದಿ ಕಾಸು ಹೂಡಿಕೆ ಮಾಡೋದಷ್ಟೇ ತಮ್ಮ ಕೆಸ ಎಂಬಂತಿರುತ್ತಾರೆ. ಆದರೆ ಮತ್ತೆ ಕೆಲವರು ಹಣಕಾಸಿನ ವ್ಯವಹಾರದಾಚೆಗೆ ತಮ್ಮ ಸಿನಿಮಾವನ್ನು ಪೊರೆಯುತ್ತಾರೆ. ಯಾವುದಕ್ಕೂ ಕಡಿಮೆಯಾಗದಂತೆ ಸಿನಿಮಾ ಏನು ಬಯಸುತ್ತದೋ ಅದನ್ನು ಪೂರೈಸುತ್ತಾ ಚೆಂದಗಾಣಿಸುತ್ತಾರೆ. ಮನೋಹರ್ ಸುವರ್ಣ ಎರಡನೇ ಸಾಲಿಗೆ ಸೇರುವವರು. ಯಾಕೆಂದರೆ ಅವರ ಪಾಲಿಗೆ ಚೇಸ್ ಎಂಬುದು ಮಹಾ ಕನಸಾಗಿತ್ತು!

ನಿರ್ದೇಶಕ ವಿಲೋಕ್ ಶೆಟ್ಟಿ ಕಥೆಯನ್ನು ರೂಪಿಸಿದ್ದ ರೀತಿ ಮತ್ತು ಸಿನಿಮಾ ಬಗ್ಗೆ ಅವರಿಗಿದ್ದ ಗಂಭೀರ ಮನಸ್ಥಿತಿಗಳನ್ನು ಮೆಚ್ಚಿಕೊಂಡೇ ಸುವರ್ಣ ಈ ಚಿತ್ರವನ್ನು ಆರಂಭಿಸಿದ್ದರಂತೆ. ಹಾಗೆ ಚೇಸ್ ಶುರುವಾದದ್ದು ಸಣ್ಣ ಬಜೆಟ್ಟೊಂದರ ಚೌಕಟ್ಟಿನಲ್ಲಿ. ಆದರೆ ದಿನಗಳೆದಂತೆಲ್ಲ ಅದರ ಬಜೆಟ್ಟಿನ ವ್ಯಾಪ್ತಿ ವಿಸ್ತಾರವಾಗುತ್ತಾ ಸಾಗಿತ್ತು. ಹೇಳಿ ಕೇಳಿ ಮನೋಹರ್ ಸುವರ್ಣ ಓರ್ವ ಉದ್ಯಮಿ. ದಿನವಹೀ ಬಿಡುವಿರದಷ್ಟೆ ಕೆಲಸ ಕಾರ್ಯಗಳಿರುತ್ತವೆ. ಅದರ ನಡುವೆಯೂ ಬಿಡುವು ಮಾಡಿಕೊಳ್ಳುತ್ತಿದ್ದ ಸುವರ್ಣ, ಪ್ರತೀ ನಿತ್ಯ ಚಿತ್ರೀಕರಣದ ಸ್ಥಳದಲ್ಲಿ ಹಾಜರಿರುತ್ತಿದ್ದರಂತೆ. ಈ ಕಾರಣದಿಂದಲೇ ಸಿನಿಮಾವೊಂದರ ಹಿಂದಿರುವ ಶ್ರಮದ ಅರಿವಾಗಿ, ಏನು ಮಾಡಿದರೆ ಅದು ಅಂದಗಾಣುತ್ತದೆಂಬ ಸ್ಪಷ್ಟ ಅಂದಾಜು ಸಿಗುವಂತಾಗಿತ್ತು. ಈ ಕಾರಣದಿಂದಲೇ ಯಾವ ಕಾಂಪ್ರೋಮೈಸ್ ಕೂಡಾ ಇಲ್ಲದೆ ಚೇಸ್ ಅನ್ನು ರೂಪಿಸುವ ನಿರ್ಧಾರಕ್ಕೆ ಸುವರ್ಣ ಬಂದಿದ್ದರು.

ಅದರ ಫಲವಾಗಿಯೇ ಚೇಸ್ ಎಲ್ಲ ಕೋನಗಳಿಂದಲೂ ಚೆಂದಗೆ ಮೂಡಿ ಬರುವಂತಾಗಿದೆ. ಅದರ ದೆಸೆಯಿಂದಲೇ ಯುಎಫ್‌ಒದಂಥಾ ದೊಡ್ಡ ಸಂಸ್ಥೆ ಅದರ ವಿತರಣಾ ಹಕ್ಕುಗಳನ್ನು ಖರೀದಿಸುವಂತಾಗಿದೆ. ಹೀಗೆ ಅತೀವ ಸಿನಿಮಾ ಪ್ರೀತಿಯಿಂದ ಈ ಚಿತ್ರ ನಿರ್ಮಾಣ ಮಾಡಿದ್ದ ಮನೋಹರ್ ಸುವರ್ಣರಿಗೆ ಸವಾಲೆಂಬುದು ಕೊರೋನಾ ವೈರಸ್ಸಿನ ಸ್ವರೂಪದಲ್ಲಿ ಬಂದೆರಗಿತ್ತು. ಸಿನಿಮಾ ತಯಾರಾಗಿದ್ದರೂ ಬಿಡುಗಡೆಗೆ ಸಿದ್ಧಗೊಳ್ಳಲಾರದ ಪರಿಸ್ಥಿತಿ ಬಂದೆರಗಿತ್ತು. ಅಂಥಾ ಕಾಲದಲ್ಲಿಯೂ ಅಂಜದೆ ಚಿತ್ರತಂಡವನ್ನು ಪೊರೆದ, ಯಾವುದಕ್ಕೂ ಕಡಿಮೆಯಾಗದಂತೆ, ಹಿನ್ನಡೆಯಾಗದಂತೆ ನೋಡಿಕೊಂಡ ಸುವರ್ಣರ ಸಿನಿಮಾ ಪ್ರೀತಿ ದೊಡ್ಡದು. ಇಷ್ಟೆಲ್ಲ ಆಗುಹೋಗುಗಳ ನಡುವೆ ಒಂದೊಳ್ಳೆ ಸಿನಿಮಾ ನಿರ್ಮಾಣ ಮಾಡಿರುವ ಖುಷಿ ಮನೋಹರ್ ಸುವರ್ಣರಲ್ಲಿದೆ. ಈಗ ಚೇಸ್ ಬಗ್ಗೆ ಮೂಡಿಕೊಂಡಿರುವ ಕ್ರೇಜ್ ನೋಡಿದರೆ ಅವರ ಶ್ರಮ ಸಾರ್ಥಕವಾಗುವ ಲಕ್ಷಣಗಳು ಸ್ಪಷ್ಟವಾಗಿಯೇ ಗೋಚರಿಸುತ್ತಿವೆ.

The post ಸಿನಿಮಾ ವ್ಯಾಮೋಹಿ ಉದ್ಯಮಿ ನಿರ್ಮಾಪಕನಾದ ಕಥನ! appeared first on ಶೋಧ ನ್ಯೂಸ್ - Shodha News.

ವಿಲೋಕ್ ಶೆಟ್ಟಿ ನಿರ್ದೇಶನದ ಚೇಜ಼್ ಚಿತ್ರ ಈ ವಾರ ಬಿಡುಗಡೆಗೊಳ್ಳಲಿದೆ. ವರ್ಷಾಂತರಗಳ ಕಾಲ ಒಂದಿಡೀ ತಂಡ ಬಲು ಆಸ್ಥೆಯಿಂದ ರೂಪಿಸಿರುವ ಈ ಚಿತ್ರ ಪ್ರತೀ ಕೆಲಸ ಕಾರ್ಯಗಳನ್ನೂ ಮೈಲಿಗಲ್ಲಾಗುವಂತೆ ಮಾಡುತ್ತಾ ಟೀಸರ್ ಮೂಲಕವೇ ಅಗಾಧ ಪ್ರಮಾಣದಲ್ಲಿ ಕ್ರೇಜ್ ಹುಟ್ಟು ಹಾಕಿದೆ. ಪ್ರಚಾರದ ಪಟ್ಟುಗಳಾಚೆಗೆ ತನ್ನ ಹೂರಣ, ಗಟ್ಟಿತನದಿಂದಲೇ ಪ್ರೇಕ್ಷಕರನ್ನು ಆಕರ್ಷಿಸಿಕೊಂಡಿರೋ ಈ ಸಿನಿಮಾದಲ್ಲಿ ಚಿತ್ರವಿಚಿತ್ರವಾದ ಪಾತ್ರಗಳಿವೆ. ಅವೆಲ್ಲವುಗಳಿಗೆ ಪ್ರತಿಭಾವಂತ ಕಲಾವಿದರೇ ಜೀವ ತುಂಬಿದ್ದಾರೆ. ಚೇಜ಼್ ಎಂಬ ದೊಡ್ಡ ಕ್ಯಾನ್ವಾಸಿನ ಸಿನಿಮಾದಲ್ಲಿ ಪ್ರತಿಯೊಬ್ಬರೂ ನೆನಪಿಟ್ಟುಕೊಳ್ಳುವಂಥಾದ್ದೊಂದು ಪಾತ್ರ ನಿರ್ವಹಿಸಿರುವವರು ಅರ್ಜುನ್ ಯೋಗಿ. ಈ ಹಿಂದೆ ಕಿರುತೆರೆಯಲ್ಲಿ ಒಂದಷ್ಟು ಖ್ಯಾತಿ ಹೊಂದಿದ್ದ ಅಕ್ಕ ಧಾರಾವಾಹಿಯ ಅರ್ಜುನ್ ಎಂಬ ಪಾತ್ರದ ಮೂಲಕವೇ ಪ್ರಸಿದ್ಧಿ ಪಡೆದುಕೊಂಡಿದ್ದ ಯೋಗೀಶ್ ತನ್ನ ಮೂಲ ನಾಮಧೇಯವನ್ನು ಮೀರಿ ಆ ಪಾತ್ರವನ್ನೇ ಐಡೆಂಟಿಟಿ ಆಗಿಸಿಕೊಂಡಿರೋದೊಂದು ಸೋಜಿಗ!

ತುಮಕೂರಿನ ಅಳಾಲಸಂದ್ರದವರಾದ ಅರ್ಜುನ್ ಯೋಗಿ ಪಾಲಿಗೆ ಸಿನಿಮಾ ಎಂಬುದು ಶಾಲಾ ಕಾಲೇಜು ದಿನಗಳಲ್ಲಿಯೇ ಮೈ ಮನಸುಗಳನ್ನು ಆವರಿಸಿಕೊಂಡಿದ್ದ ಮಹಾ ಕನಸು. ಅದರ ಬೆಂಬತ್ತಿ ರಂಗಭೂಮಿಯ ಮೂಲಕ ತನ್ನ ಪ್ರತಿಭೆಗೆ ಸಾಣೆ ಹಿಡಿದುಕೊಂಡಿದ್ದ ಅರ್ಜುನ್ ಯಾವ ಗಾಡ್ ಫಾದರ್‌ಗಳ ನೆರಳೂ ಇಲ್ಲದೇ ನಡೆದು ಬಮದ ಹಾದಿ ನಿಜಕ್ಕೂ ಯಾರೇ ಆದರೂ ಮೆಚ್ಚಿಕೊಳ್ಳುವಂಥಾದ್ದು. ಪುನೀತ್ ರಾಜ್ ಕುಮಾರ್ ಅಭಿನಯದ ಅಣ್ಣಾಬಾಂಡ್ ಚಿತ್ರದಲ್ಲಿ ನೂರಾರು ಕಲಾವಿದರೊಂದಿಗೆ ಕಳೆದು ಹೋದಂಥಾದ್ದೊಂದು ಪಾತ್ರವೇ ಅರ್ಜುನ್ ಪಾಲಿಗೆ ಮೊದಲ ಅನುಭವ. ಆ ನಂತರ ಅಕ್ಕ ಧಾರಾವಾಹಿಯಲ್ಲಿ ಅವಕಾಶ ಗಿಟ್ಟಿಸಿಕೊಂಡ ಅವರ ಬಣ್ಣದ ಹೆಜ್ಜೆಗಳೀಗ ಚೇಜ಼್ ಮೂಲಕ ನಿರ್ಣಾಯಕ ಘಟ್ಟ ತಲುಪಿಕೊಂಡಿದೆ.

ನಿರ್ದೇಶಕ ವಿಲೋಕ್ ಶೆಟ್ಟಿ ಚೇಜ಼್ ಚಿತ್ರದ ಪ್ರತೀ ಪಾತ್ರಗಳಿಗೂ ಬಹಳಷ್ಟು ಶ್ರಮ ವಹಿಸಿಯೇ ಕಲಾವಿದರನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಅದರಲ್ಲೊಂದು ಮುಖ್ಯ ಪಾತ್ರಕ್ಕೆ ಬಹಳಷ್ಟು ಹುಡುಕಾಟ ನಡೆಸಿ ಕಡೆಗೂ ನಿಕ್ಕಿಯಾಗಿಸಿದ್ದು ಅರ್ಜುನ್ ಯೋಗಿಯನ್ನ. ನಿರ್ದೇಶಕರ ನಿರೀಕ್ಷೆಗೂ ಮೀರಿ ಆ ಪಾತ್ರಕ್ಕೆ ಜೀವ ತುಂಬಿದ್ದ ಅವರು ಆ ಪಾತ್ರ ತನ್ನ ಬಣ್ಣದ ಬದುಕಿನ ನಿರ್ಣಾಯಕ ಘಟ್ಟವೆಂದು ಪರಿಭಾವಿಸಿದಂತೆ ಸಮರ್ಪಿಸಿಕೊಂಡು ನಟಿಸಿದ್ದಾರೆಂಬ ಮೆಚ್ಚುಗೆ ಚಿತ್ರತಂಡದಲ್ಲಿದೆ. ಈ ಸಿನಿಮಾದ ಪಾತ್ರವೇ ಲಾಗಾಯ್ತಿನಿಂದಲೂ ಕಾಪಿಟ್ಟುಕೊಂಡು ಬಂದಿರುವ ತನ್ನ ಕನಸನ್ನು ನನಸಾಗಿಸುತ್ತೆ, ಈ ಮೂಲಕವೇ ನಟನಾಗಿ ಹೊಸಾ ಆವೇಗದೊಂದಿಗೆ ಮುಂದುವರೆಯಲು ಅನುವು ಮಾಡಿ ಕೊಡುತ್ತದೆಯೆಂಬ ತುಂಬು ನಂಬಿಕೆ ಅರ್ಜುನ್ ಅವರಲ್ಲಿದೆ.

ಅರ್ಜುನ್ ಪಾಲಿಗೆ ನಟನೆ ಎಂಬುದು ತಂದೆಯಿಂದ ಬಂದ ಬಳುವಳಿ. ನಾಟಕ ಕಲಾವಿದರಾಗಿದ್ದ ತಂದೆಯ ಕಾರಣದಿಂದ ಆ ವಾತಾವರಣದಲ್ಲಿಯೇ ಬೆಳೆದು ಬಂದಿದ್ದ ಅರ್ಜುನ್ ಶಾಲಾ ಕಾಲೇಜು ದಿನಗಳಲ್ಲಿಯೇ ಓದನ್ನೂ ಮೀರಿದ ಕಲಾಸಕ್ತಿ ಹೊಂದಿದ್ದರು. ಆ ನಂತರದಲ್ಲಿ ಒಂದಷ್ಟು ಕಾಲ ಇಂಜಿನಿಯರ್ ಆಗಿ ಕಾರ್ಯ ನಿರ್ವಹಿಸಿದರೂ ಬಣ್ಣದ ಸೆಳೆತವೆಂಬುದು ಅವರನ್ನು ಗಾಂಧಿನಗರಕ್ಕೆ ತಂದು ನಿಲ್ಲಿಸಿತ್ತು. ಅವರಿಗೆ ಆರಂಭಿಕವಾಗಿ ಸಣ್ಣ ಮಟ್ಟದಲ್ಲಿ ಅವಕಾಶ ಸಿಕ್ಕಿದ್ದು ಅಣ್ಣಾ ಬಾಂಡ್ ಚಿತ್ರದಲ್ಲಿ. ಆ ಪಾತ್ರ ಆಟಕ್ಕುಂಟು ಲೆಕ್ಕಕ್ಕಿಲ್ಲ ಎಂಬಂತಿದ್ದರೂ ಓರ್ವ ಕಲಾವಿದನಾಗಿ ಮೊದಲ ಸಲ ಅರ್ಜುನ್ ಕ್ಯಾಮೆರಾ ಮುಂದೆ ನಿಂತಿದ್ದದ್ದು ಅಣ್ಣಾಬಾಂಡ್ ಮೂಲಕವೇ.

ಆ ನಂತರದಲ್ಲಿ ಸಣ್ಣ ಪುಟ್ಟ ವಕಾಶಗಳನ್ನು ಪಡೆದುಕೊಂಡು ಮುಂದುವರೆಯುತ್ತಿದ್ದ ಅರ್ಜುನ್ ಯೋಗಿ ಪಾಲಿಗೆ ಅಕ್ಕ ಧಾರಾವಾಹಿಯಲ್ಲಿ ಅವಕಾಶ ಸಿಕ್ಕಿದ್ದೊಂದು ಪವಾಡ. ಹೆಚ್ಚೇನೂ ನಿರೀಕ್ಷೆ ಇಲ್ಲದೆಯೇ ಅಕ್ಕ ಧಾರಾವಾಹಿಯ ಅರ್ಜುನ್ ಎಂಬ ಪಾತ್ರವನ್ನು ಯೋಗಿ ಒಪ್ಪಿಕೊಂಡಿದ್ದರು. ಇಡೀ ಜಗತ್ತನ್ನು ಪ್ರೀತಿ ತುಂಬಿದ ಕಣ್ಣುಗಳಿಂದ ದಿಟ್ಟಿಸುವ, ಲವಲವಿಕೆಯ ಒರತೆಯಂಥಾ ಆ ಪಾತ್ರಕ್ಕೆ ಯೋಗಿ ಯಾವ ರೀತಿ ಜೀವ ತುಂಬಿದ್ದರೆಂದರೆ, ಅವರು ಎಂಟ್ರಿ ಕೊಟ್ಟ ನಂತರ ಧಾರಾವಾಹಿಯ ಟಿಆರ್ಪಿಯಲ್ಲಿ ಏರುಗತಿ ಕಂಡಿತ್ತು. ನೋಡ ನೋಡುತ್ತಲೇ ಅವರು ಹೆಂಗಳೆಯರ ಫೇವರಿಟ್ ನಟನಾಗಿ ಹೊರ ಹೊಮ್ಮಿದ್ದರು.

ಆ ಪಾತ್ರದ ಪ್ರಭೆಯಲ್ಲಿಯೇ ಅರ್ಜುನ್ ಅವರನ್ನು ನಿರ್ಣಾಯಕವಾಗಿ ಸಿನಿಮಾ ಅವಕಾಶಗಳು ಹುಡುಕಿಕೊಂಡು ಬರಲಾರಂಭಿಸಿದ್ದವು. ಮುಖ್ಯ ಪಾತ್ರಗಳಲ್ಲಿಯೇ ನಟಿಸೋ ಸದವಕಾಶವೂ ಅರ್ಜುನ್ ಯೋಗಿ ಪಾಲಿಗೆ ಸಿಗಲಾರಂಭಿಸಿತ್ತು. ಹಾಗೆ ಸಿಕ್ಕ ಪ್ರತೀ ಪಾತ್ರಗಳಿಗೂ ಶ್ರದ್ಧೆಯಿಂದ ನ್ಯಾಯ ಸಲ್ಲಿಸುತ್ತಾ ಸಾಗಿ ಬಂದಿರೋ ಅವರ ಪಾಲಿಗೆ ಚೇಜ಼್ ಚಿತ್ರದಲ್ಲಿ ಹಂಬಲದ ಪಾತ್ರವೇ ಸಿಕ್ಕಿದೆಯಂತೆ. ಈ ಸಿನಿಮಾದಲ್ಲಿ ಹಲವಾರು ಆಕರ್ಷಣೆಗಳಿದ್ದಾವೆ. ಅದರಲ್ಲಿ ಅರ್ಜುನ್ ನಿರ್ವಹಿಸಿರೋ ಪಾತ್ರವೂ ಒಂದಾಗಿ ಗುರುತಿಸಿಕೊಳ್ಳುವಷ್ಟು ಶಕ್ತವಾಗಿದೆಯಂತೆ. ಟೀಸರ್ ಮತ್ತು ಟ್ರೈಲರ್‌ಗಳಲ್ಲಿ ಅರ್ಜುನ್ ಯೋಗಿ ಪಾತ್ರದ ಸಣ್ಣ ಝಲಕ್ ಮಾತ್ರವೇ ಹಾದು ಹೋಗಿದೆ. ಅದರ ಅಸಲೀ ಚಹರೆ ಪ್ರತೀ ಪ್ರೇಕ್ಷಕರಿಗೂ ಇಷ್ಟವಾಗುವಂತಿದೆಯಂತೆ. ಅದರ ನಿಜವಾದ ಗಮ್ಮತ್ತು ದಿನದೊಪ್ಪತ್ತಿನಲ್ಲಿಯೇ ನಿಮ್ಮ ಮುಂದೆ ತೆರೆದುಕೊಳ್ಳಲಿದೆ.

ಈ ಚಿತ್ರವನ್ನು ಮನೋಹರ್ ಸುವರ್ಣ ನಿರ್ಮಾಣ ಮಾಡಿದ್ದಾರೆ. ಪ್ರಶಾಂತ್ ಶೆಟ್ಟಿ ಮತ್ತು ಪ್ರದೀಪ್ ಶೆಟ್ಟಿ ನಿರ್ಮಾಣದಲ್ಲಿ ಸಾಥ್ ಕೊಟ್ಟಿದ್ದಾರೆ. ಶಿವ್ ಶೆಟ್ಟಿ ಕಾರ್ಯಕಾರಿ ನಿರ್ಮಾಪಕರಾಗಿ ಕಾರ್ಯನಿರ್ವಹಿಸಿದ್ದಾರೆ. ಅನಂತ್ ರಾಜ್ ಅರಸ್ ಛಾಯಾಗ್ರಹಣ, ಕಾರ್ತಿಕ್ ಆಚಾರ್ಯ ಹಿನ್ನೆಲೆ ಸಂಗೀತ ಮತ್ತು ಸಂಗೀತ ನಿರ್ದೇಶನ, ಶ್ರೀ ಕ್ರೇಜಿಮೈಂಡ್ಸ್ ಸಂಕಲನ, ಅವಿನಾಶ್ ಎಸ್ ದಿವಾಕರ್ ಕಲಾ ನಿರ್ದೇಶನ, ಸುನೀಲ್ ಕಟಾಬು ಉಪ ನಿರ್ದೇಶನ, ಡಿಫರೆಂಟ್ ಡ್ಯಾನಿ, ಚೇತನ್ ರಮ್ಶಿ ಡಿಸೋಜಾ ಮತ್ತು ವಿನೋದ್ ಸಾಹಸ ನಿರ್ದೇಶನ, ವಿಜಯ ರಾಣಿ ಮತ್ತು ಸುಶಾಂತ್ ಪೂಜಾರಿ ನೃತ್ಯ ನಿರ್ದೇಶನ ಈ ಚಿತ್ರಕ್ಕಿದೆ. ರಾಧಿಕಾ ನಾರಾಯಣ್, ಅವಿನಾಶ್, ಶೀತಲ್ ಶೆಟ್ಟಿ, ಅರ್ಜುನ್ ಯೋಗಿ, ಸುಶಾಂತ್ ಪೂಜಾರಿ, ರಾಜೇಶ್ ನಟರಂಗ, ಅರವಿಂದ್ ರಾವ್, ಪ್ರಮೋದ್ ಶೆಟ್ಟಿ, ಅರವಿಂದ್ ಬೋಳಾರ್, ಶ್ವೇತಾ ಸಂಜೀವುಲು, ರೆಹಮಾನ್ ಹಾಸನ್, ವೀಣಾ ಸುಂದರ್, ಸುಧಾ ಬೆಳವಾಡಿ, ಉಷಾ ಭಂಡಾರಿ, ಸುಂದರ್, ಸತೀಶ್ ಸಿದ್ಧಾರ್ಥ ಮಾಧ್ಯಮಿಕ, ಪ್ರಿಯಾ ಶಟಮರ್ಶನ್ ಮುಂತಾದವರ ಬೃಹತ್ ತಾರಾಗಣವಿದೆ.

The post ಪುನೀತ್ ಚಿತ್ರದ ಮೂಲಕ ನಟನಾದ ಅರ್ಜುನ್! appeared first on ಶೋಧ ನ್ಯೂಸ್ - Shodha News.